Muqdisho (Caasimada Online) – Wasiirka Maaliyadda Soomaaliya Cilmi Maxamuud Nuur ayaa markii ugu horeysay ka soo jawaabay warbixintii sanadlaha aheyd ee hantidhawraha guud ee qaranka, taas oo inteeda badan quseysay wasaaradda maaliyadda.

Xafiiska hanti-dhowraha guud ee dawladda Soomaaliya ayaa dhowaan daabacay warbixin sannadeedka maaliyadda ee 2021-kii, taas oo lagu shaaciyey in 55% wasaaradaha iyo hay’adaha dawladda ay ku guul-daraysteen inay reebaan caddaymaha lacag bixiinta iyo kharashaadka xisaab-xirka hay’adahaas.

Waxaa kale oo hanti-dhowruhu sheegay lacag ku dow $100 milyan oo dollar inay Wasaaradda Maaliyaddu ka daynsatay hay’adda lacagta adduunka ee IMF iyo Bankiga Dhexe ee Soomaaliya, taas oo la isticmaalay.

Wasiirka ayaa qiray in caqabadihii iyo dul-duleeladii maaliyadeed ee hantidhawruhu soo bandhigay ay jiraan, sidoo kale wuxuu qiray inay jirto lacagtaas ay deynsatay dowladda Soomaaliya.

Wasiir Cilmi ayaa sheegay in Dowladda Soomaaliya aan loo ogoleyn in ay deyn qaadato, balse hey’adda lacagta adduunka ee IMF ay horay u ogolaatay 100 milyan oo lagu qalabeynayo Bangiyada maamula dhaqaalaha dalka.

“Soomaaliya hadii ay qaadato deyn wax badan ayey ku weyneysaa, laakiin hadda waxaa noo ogolaatay oo na deymisay IMF, lacagtaas waxay keyd ahaan u tiilay bangiga dhexe, hadii aan isticmaalno waxaa nagala rabaa dul-saar, hadii ay iska taalana dul-saar nalama qaadeen, balse hadda waan u baahanay waana isticmaalnay, waxaana lagu waajibay dul-saar,” ayuu yiri Wasiir Cilmi.

Sidoo kale wuxuu cadeeyey in lacagtaas ay isticmaashay xukuumadii tan ka horeysay, “Lacagtaas oo ku keydsaneyd Bangiga dhexe, waxaa ka maarmi weysay xukuumadii hore, xiligaasna baarlamaanka la hor geeyo, si loo fasaxo isticmaalkeeda ma uusan jirin, marka sidaas ayaa loo isticmaalay,” ayuu hadalkiisa ku sii daray.

Lacagtaas ayuu sheegay in markii hore loogu tala galay xoojinta keydka bangiga dowladda, isla markaana ay ogolaadeen bangiga adduunka iyo IMF in la isticmaali karo, hadii laga maarmi waayo, balse aysan aheyn deyn si ku talagal ah loo soo qaatay.

Hoos ka dhageyso wareysiga  

Muqdisho (Caasimada Online) – Ra’iisul Wasaaraha Soomaaliya, Xamza Cabdi Barre ayaa kulan la qaatay Wasiirka Dhallinyarada iyo Cayaaraha, Maxamed Barre Maxamuud iyo Guddiga Doorashooyinka ee Xiriirka Kubadda Cagta Soomaaliyeed.

Ra’iisul Wasaaraha ayaa kala hadlay masuuliyiinta cayaaraha dhawr arrimood oo muhiim ah oo ku saabsan doorashada Guddoomiyaha xiriirka kubadda cagta oo la filayo in dhowaan la qabto iyo sidii fursado loogu abuuri lahaa dhallinyarada ku sugan goobaha laga xoreeyay Khawaarijta.

Ra’iisul Wasaaraha ayaa sheegay in Guddiga looga fadhiyo inuu qabto doorasho daah-furan oo caddaalad ku dhisan, iyadoo la raacayo shuruucda u degsan xiriirka.

“Wuxuuna tilmaamay in aan la aqbali karin is barbar yaac, isaga oo kula dardaarmay guddiga in ay ka feejignaadaan dhinac gaar ah in ay la saftaan,” ayaa lagu yiri qoraal ka soo baxay xafiiska Ra’iisul Wasaaraha.

Xamza Cabdi Barre ayaa sheegay in rajo weyn laga qabo dhallinyarada 17 jirka ah ee guusha soo hooyay, isla markaana aan loo baahneyn in lagu niyad jabiyo is qabqabsi fursadaha jira lumiya.

Dhinaca kale, Ra’iisul Wasaaraha ayaa xusay in Wasaaradda iyo xiriirka laga doonayo abaabulka cayaaro iyo is dhexgal bulshada iyo dhallinyarada ku sugan goobaha Khawaarijta laga xoreeyay, isla markaana jiilalka soo kacaya loo dhiso garoomo ay ku ciyaaraan.

Guddiga doorashada Xiriirka Soomaaliyeed ee Kubadda Cagta ayaa dhowaan qaaday tallaabo muran dhalisay oo hal musharax oo kaliya loogu xiray doorashada guddoomiyaha xiriirka kubadda cagta.

“Guddiga Racfaanka ayaa ku raacay go’aan uu dhawaan soo saaray guddiga doorashada xiriirka kubbada cagta dalka oo lagu xaqiijiyay in shuruudaha doorashada uu soo buuxiyay hal Musharax oo ah mudane Guddoomiye Cali Cabdi Maxamed (Cali Shiine) oo hadda ah guddoomiyaha xiriirka mar kalana u sharaxan xilkaas,” ayaa lagu yiri qoraal bishii hore kasoo baxay xiriirka.

Qoraalka ayaa intaas ku daray “Labada guddi ayaa isku raacay in Xasan Wiish iyo xubnaha uu wato aanay dhamaantood soo wada buuxin shuruudaha, sidaa daraadeedna aanu Xasan Wiish ahayn musharax, iyadoo halka musharax ee shuruudaha dastuurka ku xusan soo buuxiyay uu yahay Mudane Cali Cabdi Maxamed (Cali Shiine).” 

Tallaabadaas ayaa waxaa ku gacan sayray Wasaaradda dhallinyarada iyo ciyaaraha oo uga digtay xiriirka kubadda cagta Soomaaliyeed “inay iska indho tiraan baaqyadii ka soo kala baxay wasaaradda iyo xiriirka kubadda cagta Adduunka ee FIFA.”

Muqdisho (Caasimada Online) – Madaxweynaha Soomaaliya Mudane Xasan Sheekh Maxamuud ayaa maanta kormeer ku tegay xerada Jeneraal Goordan ee magaalada Muqdisho, taasi oo ay ku jiraan ciidamada xoogga dalka ee tababarka kusoo qaatay dalka Eritrea.

Madaxweynaha oo salaan sharaf ka qaatay cutubyo ka tirsan Qaybta Ilaalo Qaran gaar ahan Gaaska koowaad ee Duufaan ayaa faray in sida ugu dhaqsaha badan ugu diyaar garoobaan ka qayb-galka dagaalka dalka looga xoreynayo Al-Shabaab.

Xasan ayaa sheegay in howl-galka cusub ee deegaanada dhiman lagu xoreyn la rabo in uu ka deg deg bato kuwii hore ee lagu xoreeyay qeybo kamid ah dalka.

“Aniga iyo shacabka Soomaaliyeedba waan ku faraxsanahay dib usoo laabashadiina. Maanta wixii ka dambeeya waxaan galeynaa diyaar garoow iyo dhaqaaq aan ku wajahayno cadowga. Waxaan rabnaa in howgalka cusub ee deegaanada dhimman lagu xoreynayo uu ka degdeg bato kii hore, muddo koobana lagu soo afjaro,” ayuu yiri madaxweyne Xasan Sheekh Maxamuud.

Sidoo kale waxa uu Xasan la wadaagay ciidamadaan rajada dowladda iyo shacabka Soomaaliyeed ay ka qabaan in ay dhammeystiraan halganka gaba-gabada maraya ee dalka looga ciribtirayo argagixisada Al-Shabaab.

Madaxweynaha ayaa ugu dambeyntiina uga mahad-celiyay dowladda Eritrea garab istaagga ay u muujisay shacabka iyo dowladda Soomaaliyeed waqtiga adag ee lagu jiro dib u xoreynta dalka.

Ciidamadaan oo tababar kusoo qaatay Eritrea ayaa waxay qeyb ka noqon doonaan dagaalka culus ee lagu xoreynayo dalka, kaasi oo tan iyo markii uu billowday laga gaaray guulo waaweyn.

Saraakiisha ciidanka ayaa qaba in ciidamadaan looga maarmi doono yaraantii ciidan ee heysay dowladda oo sababi jirtay in ciidamada loo raro deegaano kala fog-fog, iyadoo diyaarado lagu qaadayo.

Ciidamadaan oo sanad badan ku maqna dalka Eritrea ayaa dhawaan si toos ah u bilaabatay soo daabulidooda, kadib dadaal uu soo celintooda u galay madaxweyne Xasan Sheekh oo dhowr jeer tagay dalka Eritrea.

Beledweyne (Caasimada Online) – Mid kamid ah dad ay Al-Shabaab ka afduubatay deegaano ku teedsan magaalada Beledweyne oo kasoo fakaday kooxda ayaa shaaciyay in beegsi gaar ah ay ku bilowday Al-Shabaab dadka kasoo jeeda beesha Xawaadle.

Ninkaan ayaa sheegaya in markii ay afduubanayeen dagaal-yahaanada Al-Shabaab u geysteen jirdil xoogan, islamarkaana ay xoog uga kaxeeyeen beerahooda oo ay xiligaas abuur ku wadeen, sida uu sheegay.

“Qoladii cadowga ayaa gacanta u galay waa ka fakaday, indhaha ayey naga duubeen oo waa na-jirdileen. 21 qof ayaa aheyn 4 ayaa ku fakanay oo waxa ka fakanay Dhoqor meesha la yiraahdo. Waxay naga qabteen beeraheena oo aan ka shaqeynaynay,” ayuu yiri.

Waxa uu intaas sii raaciyay “Meel beer moos ah ka dhaweyd ayaa ku daadanay, marka xabado ayey nagu rideen oo mooskii ayaa hoos ugu dhex guur-guuranay. Baardheere ayaa iskugu imaanay.”

Sidoo kale waxa uu sheegay in tirada guud ee maalmihii dambe ay Al-Shabaab ka afduubatay beesha Xawaadle ay tahay illaa 42 qof.

“Waxay nagu yidhaahdeen Xawaadle waa noo kala dhamaatay, qaar dagaal uu nagula jira, kuwana beer uu iska abuurana. Waxa aan rabno ayaa idinka sameynayna ayay na-dhaheen, Ilaahay mahadii waa kasoo fakanay anaga.”

Ugu dambeyntiina waxa uu dalbaday in lagu garab siiyo dagaalka ka dhanka ah Al-Shabaab, oo uu sheegay in uusan kala dhaxeyn wax aan dagaal aheyn, maadama ay bilaabeen beegsida dadkiisa.

Arrintaan ayaa banaanka usoo saareysa in Shabaab ay qorsheysanayso sidii beelaha qeybta ka ah dagaalka ka dhan ah loogu qasbi lahaa inay ka baxaan safka hore ee dagaalka, maadama ay billowday afduub ay kula kaceyso dadka beelahaas kasoo jeeda ee aan hubeysneyn.

Ankara (Caasimada Online) – Madaxweynaha dalka Turkiga, Rajab dayib Erdogan ayaa Ibrahim Mete Yagli u magacaabay safiirka Turkiga ee Soomaaliya, kaddib markii madaxweynaha uu saxiixay wareegto uu isku shaandheyn ugu sameeyay safiirada caalamka.

Safiirka cusub ayaa beddeli doona Mehmet Yilmaz oo tan & sannadkii 2018 shaqadaan hayay, waxaana lagu xasuusan doonaa Yilmaz kor u qaadista xiriirka labada dal iyo kordhinta tirada ardayda Soomaaliyeed ee wax ka barata waddanka Turkiga.

Ibrahim Mete Yagli oo ah diblumaasi xirfadeed oo ku biiray Wasaaradda Arrimaha Dibadda ee Turkiga 1986 ayaa sidoo kale waxa uu soo qabtay jagooyin dhowr ah gudaha iyo dibadda, oo ay ku jiraan ku-xigeenka koowaad ee safaaradda Poland iyo Agaasinka guud ee arrimaha dhaqaalaha ee wasaaradda arrimaha dibadda 2008.

Yagli ayaa la filayaa inuu Muqdisho soo gaaro bishan Janaayo si uu warqadihiisa aqoonsiga ugu gudbiyo madaxweyne Xasan Sheekh Maxamuud.

Soomaaliya iyo Turkiga ayaa leh xiriir aad u wanaagsan oo diblumaasiyadeed, dhaqaale, militari iyo mid siyaasadeed tan & horraantii 2010-kii.

Sidoo kale waxaa xusid mudan in Ankara ay Muqdisho ku leedahay dhismaha safaaradda ugu weyn adduunka, taasi oo uu madaxweyne Erdogan furay sannadkii toban sanno kahor.

Muqdisho (Caasimada Online) – Waddooyinka magaakada Muqdisho ee caasimada Soomaaliya waxaa saaka la soo dhoobay ciidamo ka tirsan kuwa dowladda, gaar ahaan kuwa loo yaqaano Goofi Gaduuda ee ilaaliya xarunta madaxtooyada iyo madaxda qaranka.

Shacabka reer Muqdisho ayaa kusoo waabariistay ciidamadan oo la soo dhigay jidadka muhiimka ah ee caasimada, sida Maka Al-Mukaramaya, Tarabuunka iyo jidad kale.

Ciidamadan oo wata gaadiidka gaashaaman ee dagaalka idoo kale mar dambe hakiyay dhaq-dhaqaaqa waddooyinkaasi, si loo xaqiijiyo amniga.

Sida ay ogaatay Caasimada Online, dhaq-dhaqaaqan cusub ayaa ku aadan booqasho uu madaxweynaha Soomaaliya ugu tegayo qaar kamid ah ciidamada laga keenay Eritrea ee ku jiro mid kamid ah xeryaha ciidan ee ku yaalla magaalada caasimada ah ee Muqdisho.

Madaxweyne Xasan Sheekh Maxamuud ayaa la filayaa in uu khudbad u jeediyo ciidamadaasi oo loo diyaarinayo duulaan ka dhan ah kooxda Al-Shabaab.

Soomaaliya ayaa haatan ku jirto marxalad dagaal, waxaana howlgallo culus ay ka socdaan inta badan gobollada dalka, kuwaas oo deegaano horleh looga qabsaday Al-Shabaab.

Si kastaba, madaxweynaha Soomaaliya oo shalay khudbad jeediyay ayaa shaaca ka qaaday in sanadkan cusub ee 2023-ka uu noqon doono sanadka xoreynta dalka.

Doolow (Caasimada Online) – Wararka laga helayo gobolka Gedo ayaa sheegaya inuu fashil ku yimid qorshaha wasiirkii hore ee amniga Jubbaland, Cabdirashiid Nuur (Janan), kaas oo dhowaan dib ugu laabtay gobolkaas, isaga oo uu wehlinayay Senator Fartaag.

Janan oo doonayey inuu markale dib u soo ceshado awooddii uu mar ku lahaa Gedo ayaa waxaa haatan dhicisoobay qorshihii uu maalmo ka hor u tagay gobolkaasi.

Midda koowaad ee fashilisay ayaa ah in qaar kamid ah ciidamadii uu ku abaabulay gudaha degmada Doolwoay ayla goosteen hubkii uu siiyay, isla-markaana ay tageen degmada Beledxaawo, ayaga oo gabaad ka dhigtay xero ay ku sugan yihiin ciidamada dowladda.

Wararka ayaa intaasi ku daraya in Janan oo sameeyay dadaallo kala duwan laga diiday dalab ah in askarta iyo hubkaba markale dib loogu soo celiyo gacantiisa.

Sidoo kale qorshaha labaad ee fashiliyay damacii Janan ee ahaa inuu markale gacanta ku dhigo Gedo ayaa ah in saraakiisha ciidamada dowladda oo uu xiriir la sameeyay ay ka biyo diideen abaabulkiisa, isla-markaana ay u sheegeen in xittaa aysan siin karin magan-gelyo.

Arrimaha kale ee ka horyimid ninkan waxaa ka mid ah in la kala fur-furay xulafadiisii, wuxuuna waayey Senaor Cabdullaahi Sheekh Ismaaciil Fartaag oo la tegay Gedo, kaas oo hadda si deg deg ah looga yeeray magaalada Muqdisho, kadib dacwad uu ka gudbiyay madaxweynaha dowlad goboleedka Jubaland,Mudane Axmed Maxamed Islaam (Madoobe).

Si kastaba, lama oga sida ay wax noqon doonaan, balse madaxda Jubbaland ayaa doonaya inay dhinac isaga ridaan arrinta Gedo, si loo soo afjaro xiisada muddada soo socotay.

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa khudbadiisii xalay qeyb ka mid ah uga hadlay khilaafaadka dowladda federaalka iyo dowlad goboleedyada dalka, si gaar ah khilaafkii la sheegay in Puntland ay kala noqotay shirkii u dambeeyey.

Madaxweynaha ayaa sheegay in faalooyin qaldan laga qoray shirkii u dambeeyey ee dowladda federaalka iyo dowlad goboleedyada, isagoo qiray in madaxweynaha Puntland Saciid Deni uusan saxiixin heshiiskii lagu gaaray shirkaas.

“Waxaan rabaa in warbixin aan idinka siiyo shirkii u dambeeyey oo laga faafiyey faalooyin aan sax aheyn, shirkii dhowaa ee golaha wadatashiga, wuxuu ahaa muhiim, waxaana looga hadlayey laba ajende,” ayuu yiri Madaxweyne Xasan Sheekh.

Madaxweynaha ayaa sheegay in labadaas Ajende horay looga balamay oo shirkii hore ee golaha lagu go’aamiyey in shirkaan dambe looga wadahadlo labadaas qodob, “Xiligaas waxaan ku balanay in qolo kasta ay ka soo fekerto,” ayuu yiri.

Madaxweyne Xasan Sheekh ayaa sheegay in wadahadal kadib shirkii u dambeeyey heshiis looga gaaray labadii qodob ee ajendaha u aheyd shirka, balse Puntland aysan saxiixin heshiiska.

“Walaalaheen reer Puntland waxay ka cudurdaarteen heshiiskaas, waxay dalbadeen waqti dheeri ah oo wadatashi ay ku soo galaan, waqtigii ay u baahnaayeen ayey qaateen, waana ka rajeyneynaa in aragtidooda ay noo keenaan,” ayuu hadalkiisa ku sii daray Xasan Sheekh.

Sidoo kale Madaxweynaha ayaa cadeeyey in dowladda federaalka iyo afarta dowlad goboleed ee kale ay heshiiskaas si buuxda isugu af-garteen oo la wada saxiixday.

“Walaaleheen reer Puntland, waxaan ka rajeyneynaa in mar dhow aan aragtidooda helno, si loogu saleeyo dastuurka la sameyn doono,” ayuu yiri Madaxweynuhu.

Labada qodob ee ajendaha u aheyd shirkaas, Puntland-na ay ka cudurdaaratay inay saxiixdo ayaa bayaankii ka soo baxay shirka waxaa lagu cadeeyey in loogu heshiisyey sidaan:

Hoos ka daawo

Beledweyne (Caasimada Online) – Wararka laga helayo gobolka Hiiraan ayaa sheegaya in markale maanta ay Shabaab afduub ka geysatay gobolkaasi oo dhaca bartamaha dalka.

Xubno ka tirsan kooxda oo kasoo gudbay Webiga Shabelle ayaa lagu soo warramayaa inay gudaha u galeen deegaanada Beerxaano iyo Dhoqor oo ku yaala dhanka Koonfureed ee magaalada Baledweyne, waxayna kaxeysteen dad shacab ah oo sidoo kale ahaa beeraley.

Dadka la afduubtay ayaa gaaraya illa 20 qof, waxayna kasoo jeedaan Beesha Xawaadle oo haatan dagaal culus kula jirta Al-Shabaab.

Sidoo kale wararka ayaa intaasi ku daraya in xubnaha afduubtay dadkaas ay la aadeen dhanka howdka, gaar ahaan goobaha ay heystaan Al-Shabaab.

llaa iyo hadda ma jiro wax hadal ah oo kasoo baxay maamulka gobolka Hiiraan iyo saraakiisha ciidamada dowladda Soomalaiya oo ku aadan falkaasi.

Arrintan ayaa walaac xoogan ku abuurtay dadka deegaanka oo markii hore culeys kala kulmayay howlgallada iyo dagaalka haatan ka socda gobolkaasi.

Si kastaba, Hiiraan ayaa ah gobolka uu ka soo billowday kacdoonka ka dhanka ah Al-Shabaab, kaas oo ay horkaceyso dowladda Soomaaliya oo deegaano iyo degmooyin horleh ka qabsatay kooxda, kadib dagaallo ay qaadeen ciidamada Xoogga iyo kuwa deegaanka.

Muqdisho (Caasimada Online) – Guddoomiyaha Aqalka Sare ee baarlamaanka Soomaaliya oo shir jaraa’id qabtay ayaa Somaliland u diray fariin la xariirta xiisada maalinkii 8-aad ka aloosan magaalada Laascaanood ee gobolka Sool.

Guddoomiyaha ayaa nasiib darro ku tilmaamay in dadka Soomaaliyeed aysan waxaba ka baran wixii taariikh madow soo maray, isagoo xusay in 45 sano oo dagaal ah ay Soomaalidu soo martay.

Cabdi Xaashi ayaa Somaliland iyo reer Laascaanood u diray baaq ka kooban seddax qodob oo kala ah:

1 – Somaliland waxaan u soo jeedinayaa in dad shacab ah oo banaanbax sameynaya in xabado lagu furo waa arrin qaldan, waana in la joojiyo.

2 – Dadweynaha reer Sool waxaan leeyahay mudo dheer ayaad nabad heysateen, waana ku amaanantihiin, laakiin mudaharaad wax burburinaya ma fiicna ee halaga joogo.

3 – Waxaan ugu baaqayaa dhinacyada in la wada fariisto, la wadahadlo oo heshiis lagu gaar, sida uu xalku ku jiro.

Guddoomiyaha Aqalka Sare ee Soomaaliya ayaa 3-daas qodob hor dhigay Somaliland iyo dadka reer Sool, isagoo baaq guud u diray guud ahaan Soomaalida.

“Soomaaliyey dantiinu waxay ku jirtaa inaad nabad ku wada noolaataan, waxaan idinkugu baaqayaa inaad heshiisaan, intii dhimatay Allaha u naxariisto, colaadahana allaha naga koriyo,” ayuu hadalkiisa ku soo gabagabeeyey Guddoomiye Cabdi Xaashi.

Xiisad culus oo sababtay banaan-baxyo rabshado wata iyo in ciidamada Somaliland ay toogasho toos ah geystaan ayaa ka taagan magaalada Laascaanood in ka badan hal todobaad, waxayna dadka gobolkaasi sheegeen inay diidan yihiin inay sii xukunto Somaliland.

Hoos ka daawo hadalkii Cabdi Xaashi

Laascaanood (Caasimada Online) – War-saxaafadeed kooban oo ka soo baxay beesha caalamka ayaa baaq loogu diray Somaliland iyo shacabka ku nool magaalada Laascaanood, iyadoo qoraalkaan walaac looga muujiyey xiisadda ka taagan magaaladaas.

“Saaxiibada Beesha caalamka ayaa ka walaacsan rabshadaha Laascaanood ee sababay dhimashada iyo dhaawaca dad rayid ah. Ka hortagga rabshadaha iyo xaqiijinta ilaalinta dadka rayidka ah ayaa ugu muhiimsan,” ayaa lagu yiri bayaankaan.

Qoraalka oo aad u koobnaa ayaa intaas ku sii daray, “Waxaan ku baaqaynaa xasillooni iyo is-xakameyn. Xiisadaha waa in lagu xalliyaa isdajin iyo wadahadal.”

Dad badan ayaa lagu dilay Laascaanood maalmihii lasoo dhaafay, waxaana xusid mudan in rabshadaha ka socda magaaladaas ay markii horaba ka dhasheen dilal aan la garaneyn cidda geysata.

Dad banaan-baxyada dhigaya ayaa sheegaya in aysan dooneyn inay Somaliland sii xukunto Laascaanood, iyagoo ku doodaya in dilka haldoorkooda aysan sidaan ku sii fiirsa karin.

Ciidamada Somaliland ayaa awood u adeegsanaya dibad-baxayaasha, waxay maalmihii lasoo dhaafay toogteen dhowr qof, waxayna rabshadahaani socdaan in ka badan todobaad.

Baaqyo ku aadan in la qaboojiyo xiisadda Laascaanood ayaa iska soo dabadhacaya, waxaana ugu dambeeyey kan caawa ka soo baxay beesha caalamka.

War-saxafadeedkaan waxaa si wadajir ah u soo saaray ururrada iyo wadamada kala ah: Hawlgalka Kalaguurka Midowga Afrika ee Soomaaliya (ATMIS), Canada, Shiinaha, Denmark, Masar, Itoobiya, Wafdiga Midowga Yurub, Finland, Faransiiska, Jarmalka, Urur-Goboleedka (IGAD), Ireland, Talyaaniga, Japan, Kenya, Ururka Jaamacadda Carabta (LAS), Holand, Norway, Qadar, Suudaan, Iswiidhan, Turkiga, Boqortooyada Midowday ee Britain, Dowladda Maraykanka and Qaramada Midoobay.