Muqdisho (Caasimada Online) – Madaxweynaha Soomaaliya Mudane Xasan Sheekh Maxamuud ayaa war kasoo saaray geerida Taliye ku-xigeenka ciidanka gaarka u tababaran ee DANAB Gaashaanle Xasan Maxamed (Xasan Tuure), oo saaka ku dhintay weerar ay Al-Shabaab ku qaaday degmada Galcad ee gobolka Galgaduud.

Madaxweyne Xasan ayaa sheegay in geerida Taliye Xasan Tuure aysan marnaba niyad jebin karin ciidanka xoogga dalka Soomaaliyeed iyo shacabka u midoobay inay argagixisada nolosha u diiddan shacabka ay iska dul-qaadaan.

“Taliye Xasan Tuure waxaa uu ku shahiiday hawlgal uu uu waddankiisa ku xorreynayo, waana geesi taariikhda ay xusi doonto, laguna xusuusan doono kaalinta uu ka qaatey in Khawaarijta laga sifeeyo guud ahaan geyiga Soomaaliya,” ayuu yiri.

Madaxweynaha ayaa tilmaamay in kaalintii taliyaha AHUN ay buuxin doonaan geesiyaasha kale ee ciidanka xooga dalka, islamarkaana ay saameyn ku yeelan doonin dardarta ay ku socdaan howl-galada ka dhanka ah Al-Shabaab.

“Waxaa uu ahaa astaan u taagan in Soomaaliya laga xorreeyo Khawaarijta, kaalintiisana waxaa buuxin doona geesiyaasha kale ee Ciidanka Xoogga Dalka Soomaaliyeed ka tirsan oo diyaar u ah inay naftooda u huraan difaaca waddankooda.”

Dowladda Federaalka Soomaaliya ayaa sidoo kale tacsi u dirtay shacabka, ciidanka xoogga dalka, qoyska iyo eheladii uu ka geeriyooday Gaashaanle Xasan Maxamed (Xasan Tuure).

Taliye Xasan Tuure ayaa ku dhintay dagaal qaraxyo ku billowday oo ka dhacay Galcad, halkaasi oo ciidanka xooga dalka ay ku dileen in ka badan 100 xubnood oo ka tirsan Al-Shabaab, sida lagu sheegay qoraal kasoo baxay wasaaradda warfaafinta Soomaaliya.

“In ka badan 100 maleeshiyaad ka tirsan kooxda Khawaarijta ayaa saaka la dilay kadib markii ay weerar ku soo qaadeen saldhig ay leeyihiin Ciidanka Xoogga Dalka Soomaaliyeed oo ku yaalla Magaalada Galcad ee Gobalka Galguduud halkaas oo ka mid ah goobihii dhawaan laga xoreeyay Khawaarijta,” ayaa lagu yiri qoraalka.

“Dagaal culus oo halkaas ka dhacay ayaa lagu jabiyay Khawaarijta waxaana meydadkooda ay daadsan yihiin goobta dagaalka uu ka dhacay, iyadoo halkaasi looga gubay gaadiid dagaal oo gaaraya ilaa shan gaari, kuna jiro mid ka mid ah gawaarida gaashaaman oo ay khawaarijtu xilli hore ku qabsatay dagaalo dhacay.”

Weerarka saaka ayaa imanaya xilli ay ciidamada dowladda iyo kuwa deegaanka ay weli kusii siqayaan deegaano iyo degmooyin ka tirsan gobolka Galgaduud.

Muqdisho (Caasimada Online) – Faah-faahino dheeraad ah ayaa ka soo baxaya weerar qaraxyo ku billowday oo waaberigii hore ee saaka ay Al-Shabaab ku qaaday saldhigyada ciidamada dowladda iyo kuwa deegaanka ee ku sugan degmada Galcad ee gobolka Galgaduud.

Weerarka ayaa la sheegay in uu ku billowday illaa laba gaari oo laga soo buuxiyay walxaha qarxa, kadibna uu xigay dagaal toos ah oo u dhaxeeyay ciidamada dowladda iyo kuwa deegaanka oo dhinac ah iyo dagaal-yahaanada Al-Shabaab

Dagaalkan ayaa waxaa ka dhashay khasaare kala duwan oo isugu jira dhimasho, dhaawac iyo burbur hantiyeed. Khasaaraha ayaa soo kala gaaray labada dhinac ee kala ah ciidamada dowladda, dadka deegaanka oo dhinac ah iyo Shabaabkii weerarka soo qaaday.

Inta la xaqiijiyay waxaa dagaalka ku dhintay Taliye ku-xigeenka ciidanka gaarka u tababaran ee DANAB Xasan Maxamed Cismaan oo ku magac-dheera (Xasan Tuure).

Sidoo kale dadka ku dhintay dagaalkan ayaa waxaa kamid ah askar, kuwaasi oo sida la xaqiijiyay ahaa Ilaaladii taliye Xasan Tuure, inkasta oo aan faah-faahin rasmi ah laga bixin in uu ku dhintay qaraxyada iyo in uu ku naf waayay dagaalka tooska ah ee xigay.

Taliye Xasan Maxamed Cismaan (Xasan Tuure) ayaa waxa uu kamid ahaa saraakiisha hogaamineysay howl-galka lagu qabtay degmada Galcad iyo deegaano kale, oo laga saaray kooxda Al-Shabaab.

Ciidamada dowladda oo kaashanaya kuwa deegaanka ayaa dagaal xoogan kala hortagay dagaalamayaasha Al-Shabaab ee weerarka ku qaaday mid kamid ah saldhigyada ay ka sameysteen degmada Galcad ee gobolka Galgaduud.

Dowladda federaalka ayaa goor sii horeysay sheegtay in weerarkii saaka lagu jebiyay kooxda Al-Shabaab, kaasi oo ay ku tilmaamtay inuu ahaa weerar “naf la-caari ah”.

Sidoo kale waxa lagu sheegay qoraal kooban oo kasoo baxay dowladda in xaaladda magaalada ay hadda degan tahay, islamarkaana ay si buuxda gacanta ugu hayaan ciidamada Qaranka iyo kuwa deegaanka.

Baydhabo (Caasimada Online) – Guddoomiyaha Golaha Shacabka Sheekh Aadan Madoobe ayaa xalay kulan muhiim ah la qaatay qaar ka mid ah Midowga Musharraxiinta iyo Madasha Samata-bixinta Koonfur Galbeed.

Guddoomiye Aadan Madoobe ayaa midowga siyaasiyiinta mucaaridka kala hadlay arrimaha shirka dib-u-heshiisiinta oo maalmihii dambe ka socda magaalada Baydhabo ee xarunta gobolka Baay.

Kulanka ayaa sidoo kale waxaa diirada lagu saaray sidii loogu guuleysan lahaa gogosha taala magalada Baydhabo ee looga arrinsanaayo dib-u-heshiisiinta deegaannada Koonfur Galbeed.

Guddoomiyaha Golaha Shacabka Sheekh Aadan Madoobe oo Baydhabo ugu sugan shirka dib-u-heshiisiinta Koonfur Galbeed ayaa waxa uu dadaal badan ku bixinaya sidii uguuleysan lahaa shirkan, oo dan u ah maamulka Koonfur Galbeed oo dhulkeeda inta badan gacanta ugu jira Al-Shabaab.

“Arrinta dib-u-heshiisiinta laab la-kac ma ahan, ujeedo kalena lagama laha ee waa helista Koonfur Galbeed oo mid ah,” ayuu Aadan Madoobe ka sheegay furitaankii shirka dib-u-heshiisiinta ee ka furmay magaalada Baydhabo.

Guddoomiye Aadan Madoobe oo shalay la kulmay odayaasha dhaqanka, ayaa wuxuu u xil-saaray in ay xaliyaan khilaafaadka iyo wixii mad-madow ah ee ka dhex jira bulshada reer Koonfur Galbeed, si wajiga koowaad ee dib-u-heshiisiinta u noqdo mira-dhal.

Shirka dib-u-heshiisiinta ayaa waxaa lagu wadaa in heshiis looga gaaro xiisadda siyaasadeed ee muddooyinkii dambe ka dhex aloosneyd madaxweyne Lafta-gareen iyo siyaasiyiinta mucaaradka Koonfur Galbeed, waxayna u badan tahay in Lafta-gareen hal-kiisa sano loo dhaafi doono.

Galcad (Caasimada Online) – Dagaal-yahaano ka tirsan kooxda Al-Shabaab ayaa waaberigii hore ee saaka weerar qaraxyo ku billowday ku qaaday saldhigyada ciidamada dowladda iyo kuwa deegaanka ee ku sugan degmada Galcad ee gobolka Galgaduud.

Wararka ayaa sheegaya in illaa laba gaari oo laga soo buuxiyay waxlaha qarxa lagu weeraray saldhigyada ciidamada ee degmada Galcad, sida ay sheegayaan goobjoogayaal.

Jugta qaraxa oo si weyn looga maqlay degmada iyo nawaaxigeeda ayaa waxaa xigay dagaal toos ah oo u dhaxeeya ciidamada dowladda iyo kuwa deegaanka oo dhinac ah iyo dagaal-yahaanada Al-Shabaab.

Wararka ayaa intaas kusii daraya in dagaalkan ku billowday weerarka qaraxyada uu ka dhashay khasaare isugu jira dhimasho iyo dhaawac, waxaana aad u adag in la ogaado tirada rasmiga ah sababo la xiriira isgaarsiinta oo aad u xun.

Waxaa lasoo sheegaya in illaa hadda weli meelo kamid ah Galcad laga maqlayo rasaasta ay isku ridayaan labada dhinac.

Majiro wax war ah oo kasoo baxay taliska ciidanka xooga dalka Soomaaliyeed iyo maamulka Galmudug oo la xiriira weerarkan.

Weerarka saaka ayaa imanaya xilli ay ciidamada dowladda iyo kuwa deegaanka ay weli kusii siqayaan deegaano iyo degmooyin ka tirsan gobolka Galgaduud.

Muqdisho (Caasimada Online) – Maamulka gobolka Banaadir ayaa shaaciyay inay dib u bilaabayaan qaadista canshuurta guryaha iyo daaraha ka dhisan magaalada Muqdisho, taasi oo horay loo joojiyay sanadkii dhamaaday ee 2022-ka.

Afhayeenka maamulka gobolka Banaadir Saalax Dheere oo warbaahinta la hadlay ayaa sheegay in markii hore canshuurtan loo joojiyay arrimo la xiriira xalinta Maaliyadda.

“Laga bilaabo maanta maamulka gobolka iyo dowladda hoose ee Xamar waxay dib u bilaabayaan qaadista Canshuurta guryaha iyo daaraha ku yaala Muqdisho oo horay loo hakiyay bishii Oktoobar ee sanadkii dhamaaday 2022, sababo la xariira xalinta Maaliyadda,” ayuu yiri Afhayeen Saalax Dheere.

Sidoo kale waxa uu sheegay in maamulka gobolka uu ka codsanayo Milkiilayaasha guryaha inay si dhaw ula shaqeeyaan laamaha qaabilsan qaadista canshuurta.

Maamulka gobolka Banaadir iyo dowladda Hoose ee Xamar ayaa waxa kale oo ay ugu baaqeen Milkiilayaasha iska leh guryaha burbursan ee ku yaala meelaha faras magaalaha inay dib u dhisaan.

Afhayeenka ayaa sheegay in baaqan dambe uga dan leeyihiin “si bilicda magaalada caasimadda ah dib loogu soo celiyo oo ay ula tartanto caasimadaha kale ee caalamka.”

Maamulka cusub ee dowladda hoose ee Xamar, oo uu Hormuud u yahay guddoomiyaha gobolka Banaadir ahna Duqa magaalada Muqdisho Yuusuf Madaale ayaa wada dadaalo lagu dardar-gelinayo howsha ay u hayaan bulshada iyo bilicda caasimadda.

Waxaa dhawaana lasoo gaba-gabeeyay shirka banbaxa maamulka gobolka, kaasi oo diiradda lagu saarayay howlaha hortabinta u leh maamulka sanadka 2023-ka.

Muqdisho (Caasimada Online) – Wasiiru-dowlaha Amniga Soomaaliya Maxamed Cali Xagaa, oo warbaahinta la hadlay, ayaa faah-faahin ka bixiyay howl-gal amni oo si hordhac ah uga billowday magaalada Muqdisho ee caasimada dalka.

Wasiiru-dowlaha ayaa sheegay in Shabaab uu waqtigoodii dhamaaday, ayna Muqdisho ka bilaabanayaan qorshe xoogan oo amniga lagu sugayo, ayna ka qeyb qaadanayaan hay’addaha amniga, kaasi oo lagu xaqiijinayo xasiloonida caasimadda.

“Waxa shacabka Soomaaliyeed ka codsanaya magaalada Muqdisho oo ah magaalo madaxdii dalka, waxaa dhawaan ka bilaaban doona qorshe lagu sugayo amniga. Waxa ka codsaneyna in barnaamijkaas nagala shaqeeyaan si hagar la’aan ah. Shacabka Soomaaliyeed iyaga la’aantooda midnimo iyo nabad-gelyo ma gaari karno nala shaqeeya,” ayuu yiri Xagaa.

Waxa uu sii raaciyay hadalkiisa “Soddan sanno iyo ka badan ayaa waxaad ku jirteen dagaal iyo maalinba waji cusub iyo dhagar cusub, waxa gaadhnay waqtigii aad odhan laheydeen intaas ayaa nagu filan wixii ka dambeeya waxa u baahanahay sida caalamka iyo waddamada deriska u nool yihiin in aan u noolaano.”

Sidoo kale waxa uu tilmaamay in dagaalka ka dhanka ah Al-Shabaab uu marayo meel wanaagsan, ayna dhiman tahay oo keliya in la dhameystiro oo dalka la isku furo, sida uu sheegay.

Wasiiru-dowlaha ayaa waxa kale oo u ballan-qaaday shacabka laamaha amniga kusoo wargelinaya shirqoolada Al-Shabaab iyo xogaha la xiriira ay u dhowri doonaan xogtooda shaqsiyeed, oo aysan jiho saddexaad u gacan galin doonin.

“Waxa ka mahad-celinayna shacabka xogta marwalba nala soo wadaaga, waxaa u ballan-qaadeyna in aan u xafideyno xogtooda. Farsamooyin badan oo casri ahna aan la wadaagi doono shacabka Soomaaliyeed oo qofka xogta uu gudbin karo, naftiisana ay ku badbaadeyso.”

Shacabka magaalada Muqdisho ay dhawaan si wada-jir ah ugu istaagay kacdoonka dagaal ee ka dhanka ah Al-Shabaab, waxaana dhawaan magaalada ka bilaaban doona howl-galo culus oo lagu xaqiijinayo amniga, islamarkaana looga sifeynayo caasimadda Shabaabka ku dhuumanaya.

Jowhar (Caasimada Online) – Wasaaradda amniga maamulka HirShabelle ayaa digniin culus kasoo saartay u hogaansanaanta awaamiirta Al-Shabaab, ayada oo sheegtay in cidkasta oo u hogaansanta in ay ku xukun yihiin Shabaab, xilli uu dalka ka socdo dagaal ka dhan ah kooxda.

Qoraal kasoo baxay wasaaradda amniga ayaa lagu sheegay in go’aankan uu qeyb ka yahay awaamiir dowladda Soomaaliya ay soo saartay, kuwaas oo lagula dagaalamayo kooxda Al-Shabaab iyo cid kasta oo gacan saar la’leh.

“Wasaaradda Amniga Gudaha Dowladda HirShabelle oo ka duuleysa go’aamadii laga gaaray la-dagaalanka kooxda Khawaarijta argagixisada ah ee Al-Shabaab waxa ay cadeyneysaa in cidkasta oo la shaqeysa, utagta ama u hogaansanta awaamiirta Khawaarijta ay ku xukun yihiin kooxda argagixisada ah ee had iyo goor dhibaateynaya shacabka Soomaaliyeed.”

Waxa kale oo lagu yiri qoraalka “Wasaaraddu waxay bulshada ku dhaqan degmooyinka iyo deegaanada dowladda HirShabelle uga digeysaa la-macaamilka iyo u hogaansanka amarka kooxaha khawaarijta ah ee gabalkoodu dhacay.”

Wasaaradda ayaa fartay dhamaan laamaha amniga qeybahooda kala duwan iyo ciidamada dib u xoreynta deegaanka inay gacanta ku dhigaan cid kasta oo kooxda macaamil la-sameeysa meelkasta oo ay joogaan si sharciga loo horkeeno.

“Dowladda HirShabelle iyo shacabkeeda oo kaashanaya dowladda federaalka Soomaaliya waxaa ka go’an in ay dhulkooda ka cirib-tiraan kooxaha Khawaarijta ah ee baneystay dhiiga shacabka Soomaaliyeed.”

Go’aanka kasoo baxay maamulka HirShabelle ayaa kusoo aadaya kadib markii ay odayaal kasoo jeeda gobolka Hiiraan sheegeen inay heshiis la qaateen kooxda Al-Shabaab, oo xilligaan uu dagaal culus kaga socdo qeybo badan oo dalka.

Muqdisho (Caasimada Online) – Qaar kamid ah ciidamada lagu soo tababaray ee Eritrea ee haatan ku jira xerada General Gordan ee magaalada Muqdisho ayaa qorshuhu yahay in laga bixiyo xeradaas, si loo howlgeliyo, uguna biiraan dagaalka ka dhanka ah Al-Shabaab.

Sida aan xogta ku helnay illaa kun askari oo kamid ah ciidamadan ayaa la geyn doonaa deegaanada Jubbaland, si ay kaalin uga qaataan howlgalka ka dhanka ah AlShabaab.

Ciidamadan ayaa si gaar ah weeraro ugu qaadi doono degmooyinka Jilib iyo Afmadow, ayaga oo ka barbar dagaalami doono ciidamo ay Jubbaland ku diyaarisay Kismaayo.

Sida ay ogaatay Caasimada Online waxaa go’aankan si wadajir ah u qaatay madaxweynaha dowladda federaalka, Mudane Xasan Sheekh Maxamuud, ra’iisul wasaaraha dalka, Xamza Cabdi Barre iyo madaxwyanaha Jubbaland, Axmed Madoobe oo ku heshiiyay in qaar kamid ah ciidamada milatariga ee laga keenay waddanka Eritrea la geeyo gobollada Jubbooyinka.

Qorshahan ayaa toos u bilaabanayo marka lasoo wada celiyo askarta weli ku maqan Eritrea, kuwaas oo la filayo in la keenyo dhammaadka beshan aynu ku jirno ee January, sida ay innoo xaqiijiyeen ilo wareedyo amni oo aad loogu kalsoon yahay.

Ujeedka ugu weyn ee ciidamada loo geynayo Jubbaland ayaa ah inay xoreeyaan gobollada maamulkaas oo ay saldhigyo waa weyn ay ku leedahay kooxda Al-Shabaab, maadaama gobolka Jubbada Dhexe oo dhan iyo degmooyin ka tirsan Jubbada Hoose ay maamulaan.

Sidoo kale arrintan ayaa qayb ka ah dagaalka dowladda ee ku aadan soo afjarida Al-Shabaab oo haatan laga wada saaray inta badan HirShabelle iyo Galmudug.

Gulufka ka dhanka ah Al-Shabaab wuxuu sidoo kale gaaray gobollo horleh ayada oo la filayo in wejiga labaad ee ka billowdo Koonfur Galbeed, sida uu shaaciyay madaxweynaha.

Si kastaba, Soomaaliya ayaa haatan ku jirto marxalad dagaal, waxaana ka qayb-qaadanaya shacabka maadaama ay kacdoonka socda ay safka hore uga jiraan ciidanka deegaanka.

Baydhaba (Caasimada Online) – Faah faahino dheeraad ah ayaa kasoo baxaya khasaaraha ka dhashay weerar culus oo ay maanta xubno ka tirsan kooxda Al-Shabaab ku qaadeen saldhig ciidan oo ku yaallo deegaanka Goofgaduud oo ka tirsan gobolka Baay.

Weerarka ayaa waxaa xigay dagaal foolka fool ah oo dhex-maray ciidamada dowladda iyo Al-Shabaabkii weerarka qaaday, kaas oo la’isku adeegsaday hubka noocyadiisa kala duwan.

Wasiirka Cadaaladda Koonfur Galbeed, Xasan Cabduqaadir Maxamed oo xilliga la weerarayay ku sugnaa deegaanka ayaa sheegay in jab xoogan la gaarsiiyay Shabaab.

Sidoo kale wuxuu intaasi ku daray in ku daray in ciidamada dowladda ay iska difaaceen weerarka, isla-markaana ay sameeyeen ka hortag ka dhan xubnaha soo weeraray.

“Runti geesiyaasha ciidamada Xoogga dalka Soomaaliyeed waxay sameeyeen arrin aad noo dhiira-gelisay Khawaarijtii soo weerartayna waa iska difaaceen meydadkoodi iyo dhaawacyadoodana waa ka carareen” ayuu yiri Wasiir Xasan Cabduqaadir.

Wasiirka oo sii hadlaya ayaa shaaca ka qaaday in illaa 20 xubnood oo ay ku jiraan horjoogayaalk laga dilay kooxda, isla-markaana laga gubay gaadiid dagaal.

“Horjoogayaal ayaa ku jiray runtii dadka halkaa soo weeraray oo ku naf waayey, waana sida ay u bilaabatay oo howlgalka waa sii soconaa,” ayuu markale yiri Wasiirku.

Waxa kale oo uu intaasi ku daray in dhanka ciidamada dowladda ay ka dhinteen illaa 5 askari oo kamid ah xoogga dalka, kuwaas oo ku sugnaa saldhigga la weeraray.

Goofgaduud oo qiyaastii 30 KM u jira Baydhabo ayaa dhowr jeer oo hore weerarayAl-Shabaab, ayada oo marar badana gacan ku heynteeda ay isku beddaleen labada dhinac.

Muqdisho (Caasimada Online) – Golaha Wasiirada Xukuumadda Federaalka Soomaaliya oo maamnta kulankoodii caadiga ahaa ku yeeshay gudaha magaalada Muqdisho ayaa meel-mariyay heshiis cusub oo ay gashay Soomaaliya iyo Hindise Sharciyeed kale oo muhiim ah.

Shirkan oo ay intooda badan goobjoog ahaayeen xubnaha Golaha Wasiirada Xukuumadda Soomaaliya ayaa waxaa guddoomiyey ku simaha Ra’iisul Wasaaraha, ahna Ra’iisul Wasaare Ku-Xigeenka Xukuumadda Federaalka Soomaaliya Mudane Saalax Axmed Jaamac.

Ugu horreyn Golaha Wasiirada ayaa shirkooda ku ansixiyay Hindise Sharciyeedka dhowrista maal-gashatada iyo maal-gashiga, kaas oo ah mid muhiim ah.

Sidoo kale kale Golaha ayaa maanta meel mariyey heshiis gaar ah oo u dhexeeya dowladaha Soomaaliya iyo Masar, kaas oo is af-garad ku aadan iskaashiga Tiknoolajiyada iyo Boostada ee ay dhawaan wada gaareen labada dal.

Heshiiskan ayaa qayb wayn ka qaadan doono dib u dhiska hay’adaha iyo kaabayaasha dhaqaalaha, siday ay shaacisay Xukuumadda federaalka Soomaaliya.

Inta uu shirka socday waxaa sidoo kale warbixin guud looga dhageystay Wasaaradaha Amniga iyo Gaashaandhigga oo golaha la wadaagay howlgalladii u dambeeyay ee dhacay.

Labada wasaaradood ayaa Golaha ka sheegay in howlgalladii ugu dambeeyay ee xoreynta laga gaaray guullo waa weyn, isla-markaana la qabtay magaalooyin horleh.

Xubnaha Golaha Wasiirada ayaa dhankooda boggaadiyey guulaha isdaba joogaa ee laga gaaray howlgallada xoreynta ee ka socda qaar kamid ah gobollada dalka.

Ugu dambeyn Wasaaradaha Gaashaandhigga iyo Deegaanka iyo Isbeddalka Cimilada ayaa golaha u qaybiyey siyaasadda qaran ee maaraynta deegaanka, hindise sharciyeedka maaraynta deegaanka iyo heshiiska aasaasidda ciidamada heeganka ee Bariga Afrika.

Baydhabo (Caasimada Online) – Madaxweynaha dowlad goboleedka Koonfur Galbeed Soomaaliya, Mudane Cabdicasiis Xasan Maxamed (Lafta-gareen) oo wareysi siiyay Telefishinka Qaranka Soomaaliyeed ee SNTV ayaa ka hadlay wejiga labaad ee howlgalka ka dhanka ah kooxda Shabaab ee ka bilaabaya gobollada Shabeelaha Hoose, Baay iyo Bakool.

Lafta-gareen ayaa shaaca ka qaaday in ay diyaar garoobeen dagaalka ka dhanka ah Al-Shabaab, ayada oo laga duulayo baaqa madaxweyne Xasan Sheekh Maxamuud.

“Annaga Koonfur Galbeed ahaan mar hore ayaan abaabul galnay markii ugu horreysay ee uu madaxweynaha ku baaqay in Khawaarijta Shabaab meel kasta oo ay joogto dowlad iyo shacab loo istaago in lala dagaalamo,” ayuu wareysigan ku yiri madaxweyne Cabdicasiis.

Sidoo kale wuxuu tilmaamay in istiraatiijiyad dagaal oo sarreysa ay dajiyeen, isla-markaaana gobollada Shabeelaha Hoose, Baay iyo Bakool looga saarayo Al-Shabaab bil gudaheeda, sida uu hadalka u dhigay madaxweynaha maamulka Koonfur Galbeed.

“Bil ayey Koonfur Galbeed kaga dhammaanayaan Khawaarijta, marka la fiiro qaabka aan u diyaar garownay iyo istaraatiijiyadda hadda la suubiyay ee dagaal, sida hal mar uu howlgalka uga bilaabanaayo saddexda gobolba” ayuu yiri madaxweyne Lafta-gareen.

Dhanka kale wuxuu hoosta ka xariiqay in duulaanka cusub ee ka bilaabay Koonfur Galbeed ay ka qayb qaadan doonaan dadka deegaanka, oo uu sheegay in la abaabulay.

“Abaabul badan ayaan sameynay bulshada ayaan ku wacyi-gelinay ciidamo cusub ayaa diyaarinay iyo goobihii ay ku howlgali lahaayeen,” ayuu hadalkiisa sii raaciyay.

Madaxweynaha oo sii hadlayey ayaa hoosta ka xariiqay in Al-Shabaab ay heystaan ugu yaraan 4 degmo, sidoo kalea ay go’doon dhan kasta ah galiyeen magaalooyinka kale.

Hadalkan ayaa ku soo aadayo, ayada oo todobaadkan uun madaxweynaha Soomaaliya uu shaaca ka qaaday in wejiga labaad ee dagaalka Al-Shabaab uu ka bilaabanayo deegaanada Koonfur Galbeed oo kamida meelaha ay ku xoogan tahay kooxda si looga xoreeyo halkaas.

Balcad (Caasimada Online) – Wararka naga soo gaaraya gobolka Shabeelaha Dhexe ayaa sheegaya in maanta ciidamada dowladda iyo kuwa deegaanka ay howlgal qorsheysan ka sameeyeen duleedka degmada Balcad, kaas oo lagu beegsaday kooxda Al-Shabaab.

Howlgalkan ayaa si gaar ah uga dhacay tuulada Dhagaxow oo hoostagta deegaanka Xawaadlay ee gobalka Shabeellaha Dhexe, halkaas oo ay ku sugnaayeen Al-Shabaab.

Sidoo kale waxaa howlgalkan barbar socday duqeyn lala bartilmaameedsaday goob ay isku uruursanayeen xoogaga hubeysan Al-Shabaab oo ku taallo, halka loo yaqaano dhul beereedka Sheekh Qaasim oo la soo wariyay inay isku uruursanayeen Al-Shabaab.

Dowladda Soomaaliya oo ka hadashay howlgalkan ka dhacay agagaarka deegaanka Xawaadley ayaa shaacisay in lagu dilay illaa 50 xubnood oo ka tirsanaa Al-Shabaab.

Sidoo kale dowladda dhexe ayaa sheegtay in howlgalkan lagu soo furtay gaadiid dagaal oo ay horay u qaateen Al-Shabaab, kuwaas oo uu ku jiro gaari uu saaran yahay qoriga Zuu-ga, waxaana sidoo kale howlgalka lagu burburiyay Gaadiid dagaal iyo saanad ciidan oo ay kooxdu laheyd, sida lagu sheegay war ka soo baxay dowladda federaalka Soomaaliya.

Dhankeeda dowladda waxa ay shaacisay in laga dilay jal askari, sidoo kalena laga dhaawacay saddex kale, sida lagu sheegay qoraalka.

Dhanka ma jiro wax hadal ah oo kasoo baxay kooxda Al-Shabaab oo ku aadan howlgalkaas ee ay guulaha ka sheegteen ciidamada Xoogga dalka iyo kuwa dadka deegaanka.

Xaaladda ayaa haatan ah mid aad u kacsan, waxaana weli dhaq-dhaqaaqyo laga dareemayaa deegaano ka tirsan gobolka Shabeelaha Dhexe ee maamulka HirShabelle.

Maalmo kahor ayey aheyd markii weerar lagu hoobtay oo ismiidaaminku billowday ee ay Al-Shabaab ku qaaday saldhig ciidamada dowladda ay ku leeyihiin deegaanka Xawaadley ee gobolka Shabeelaha Dhexe, kaas oo lagu dilay saraakiil ciidan iyo askar fara badan.

Si kastaba, dagaalyahanada Al-Shabaab ayaa intooda lagu jebiyay dagaalladii ka dhacay HirShabelle, waxaana laga saaray dhul ballaaran oo ku yaallo Hiiraan iyo Sh/ Dhexe.