Jowhar (Caasimadda Online) – Wararka ka imaanaya gobolka shabeellada dhexe ayaa sheegaya in ciidamo ka tirsan Milateriga Soomaaliya iyo kuwa AMISOM ay  ku baxeen  tuulooyin ku yaala baadiyaha degmada Raaga-ceelle oo laga soo sheegay  dhaq-dhaqaaq ay wadaan dagaalameyaasha Al-shabaab.

Ciidamada amniga ayaa la sheegay in ay baadi goobayaan  dagaalamayaashii Al-shabaab ee sida dhuumaaleysiga ku tagay tuulooyinkaas waxaana hada dagan xaalada degmada Raaga-celle.

Guddoomiyaha degmada Raaga-ceelle oo la hadlay Warbaahinta ayaa sheegay in aysan jirin wax cabsi ah oo laga qabo Al-shabaab amnigana wanaagsanyahay.

Dhinaca kale, dagaalamayaasha Al-shabaab ayaa wali ku sugan tuulooyin ka tirsan magaalada Jowhar ee xarunta maamulka HirShabeelle.

Wararkii ugu dambeeyay ee laga helayo Jowhar ayaa soo sheegaya in Al-shabaab ay ku suganyihiin tuulooyinka kala ah Warciise, Doondheere iyo Shamiindo.

Ma jiro weli wax war ah oo ka soo baxay Maamulka HirShabeelle, waxaana muuqato in kooxda Al-Shabaab ay dhaq dhaqaaqyo ciidan oo xooggan ay ka wado deegaano ka tirsan Gobolkaas.

Muqdisho (Caasimadda Online) – Hay’adda Qaramada Midoobey u qaabilsan Qaxootiga ayaa sheegtay in Soomaaliya ay ka mid aheyd dalalka Afrika ee sanadkii lasoo dhaafay martigaliyay Qaxootiga faraha badan.

War kasoo baxay hay’adda ayaa lagu sheegay in Qaxootigaasi ay kala socdeen Afrika iyo Aasiya ayna dalalka ay ka yimaadeen ka jireen dhibaatooyin dhanka Amniga.

Jowhar (Caasimada Online) – Wararka aan caawa ka heleyno deegaano ka tirsan gobolka Shabeellada Dhexe waxay sheegayaan in dagaalamayaal ka tirsan Al-Shabaab ay saacadihii lasoo dhaafay la wareegeen deegaano dhowr ah oo hoos taga degmooyinka Jowhar iyo Raaga-Ceelle ee gobolka Shabeellada Dhexe.

Tuulooyinka ay qabsadaan Al-Shabaab waxaa kamid ah Warciise oo Jowhar u jirta 15 ilaa 20 KM iyo sidoo kale tuulooyinka Qoordheere, Geyfo, Jabada-Carbeed, iyo Daba-gaab oo hoos taga degmada Raaga-Ceelle.

Al-Shabaab waxay caawa 10-KM u jiraan degmada Raaga-Ceelle, halka Jowhar-na ay ka qabsadeen tuulo hoos tagta oo lagu magacaabo Warciise, taas oo markii hore ay ku sugnaayeen ciidamada dowladda Soomaaliya.

Xaalad cabsi ah ayaa caawa ka taagan qeybo badan oo gobolka Shabeellada Dhexe ah, lamana oga sida uu xaalku noqon doono.

Al-Shabaab ayaa sidaan oo kale maalin ka hor ula wareegay deegaanka Mashallaay oo hoos taga degmada Qoryooleey ee gobolka Shabeellada Hoose, kadib markii ay isaga soo baxeen ciidamada dowladda iyo kuwa AMISOM oo ku sugnaa seddaxdii sano ee lasoo dhaafay.

Mashallaay oo dhacda inta u dhaxeysa magaalooyinka Qoryooley iyo Buulo-Mareer ayaa ah deegaan istaraatiiji ah, isla markaana muhiin u ah isu-socodka labadaas magaalo.

Iska daa inay weerar tagaane, ciidamada dowladda Soomaaliya ayaa sanadihii u dambeeyey soo baneynayey fariisimo muhiim ah, iyadoo markii ay ka baxaan ay dib ula wareegayeen Al-Shabaab.

Muqdisho (Caasimada Onlinee) – Shirka Golaha Wasiirrada Soomaaliya oo shir guddoominayay Ra’iisul Wasaare Maxamed Xuseen Rooble ayaa lagu ansixiyey Guddiga sare ee maamulka Hay’adda qaran ee naafada Soomaaliyeed, xubin ka bannaanatay guddiga madaxa bannaan ee xuduudaha iyo federaalka iyo xubin laga saaray guddiga maamulka hay’adda batroolka Soomaaliyeed.

Golaha Wasiirrada ayaa warbixinno la xiriira amniga guud ee dalka ka dhageystay Wasiirrada Amniga Gudaha iyo Gaashaandhigga, waxayna tilmaameen in Ciidanka qaranku ay u diyaarsan yihiin sidii loo xaqiijin lahaa amniga iyo xoreynta dalka.

Xubnaha Golaha Wasiirrada ayaa wadajir uga tacsiyeyeey geerida guddoomiyihii degmada Hodan ee Gobolka Banaadir oo xalay ku geeriyooday fal nasiib darro ah oo ka dhacay Muqdisho, waxayna fareen hay’adaha ammaanka in baaritaan dhab ah lagu sameeyo sababaha keenay dhacdadan.

Wasaaradda Caafimaadka ayaa golaha la wadaagtay warbixinnadii ugu danbeeyey ee caabuqa karoona iyo dadaalka ay waddo dowladdu ee la xiriira sidii bulshada looga wacyigelin lahaa dhibaatada uu leeyahay xanuunkan.

Muqdishoi (Caasimada Onlin) – Wasaaradda amniga Soomaaliya ayaa faah faahin dheeraad ah ka bixisay dilkii xalay Muqdisho loogu geystay guddoomiyihii hore ee degmada Hodan ee gobolka Banaadir, Marxuum Cabdixakiin Cabdiraxmaan Ciise (Dhagajuun).

Wasiiru dowlaha wasaaradda amniga xukuumadda Soomaaliya Farxaan Cali Axmed oo la hadlay warbaahinta dowladda ayaa marka hore ka tacsiyeeyey geerida marxuumka, wuxuuna sheegay in wax laga naxo ay tahay inuu ku baxay gacanta ciidanka amniga.

Farxaan Cali Axmed ayaa sidoo kale sheegay in gacanta lagu dhigay saraakiishii iyo askartii ku sugneyd goobta uu dilku ka dhacaym, isaga oo shaaciyey in haatan ay ku xiran yihiin xarunta hay’adda CID-da, islamarkaana lagu weydiinayo su’aallo dheeri ah.

Sidoo kale wuxuu intaasi ku daray in ciddii ku lug yeelataa dilka guddoomiyihii hore ee degmada Hodan la horgeyn doono sharciga, lagana qaadi doono tallaabo adag.

“Waa wax laga naxo in ciidamadeenii uu gacantooda ku baxo, waxaan caddeyneynaa in saraakiishii iyo ciidamadii ku lugta lahaa dilka guddoomiyihii degmada Hodan Cabdixakiin Cabdiraxmaan Ciise in gacanta lagu dhigay oo baaritaan ay CID-da u joogaan,” ayuu yiri.

Sidoo kale wuxuu wasiiru dowlaha intaasi sii raaciyey “Ciddii ku lug yeelataa sharciga ayaa la horgeyn doonaa,”.

Ugu dambeyn wuxuu ugu baaqay dadweynaha Soomaaliyeed inay is dajiyaan, kana war sugayaan natiijada baaritaanada socda ee ay wado dowladda Soomaaliya.

Allaha u naxariistee Marxuum Cabdixakiin Dhagajuun oo shalay ku soo laabtay dalka, kadib dhaawicii loogu qaaday Turkiga ayaa xalay lagu dilay agagaarka isgoyska Howl-wadaag, kadib is-rasaaseyn dhex-martay ciidamada ammaanka iyo qaar ka mid ah ilaaladiisa.

Muqdisho (Caasimada Online) – Dadweyne fara badan oo ka careysan dilkii loo geystay guddoomiyihii degmada Hodan, Marxuum Cabdixakiin Cabdiraxmaan Ciise (Dhagajuun) ayaa maanta dibad-bax ka dhigay qeybo ka mid ah magaalada Muqdisho.

Dibad-baxayaasha ayaa isugu soo baxay isgoyska Tarabuunka ee magaalada Muqdisho, iyaga oo hakad-geliyey dhaq-dhaqaaqa dadka, gaadiidka iyo ganacsiga.

Sidoo kale dadka dhigayey dibad-baxa ayaa taayaro ku gubay laamiga, sidoo kalena biro iyo dhagaxaan ku gooyey.

Qaar ka mid ah dibad-baxayaasha oo la hadlay warbaahinta ayaa sheegay inay aad uga xun yihiin dilka guddoomiyaha, iyaga oo cadaalad ka dalbadayadowladda Soomaaliya.

Shacabkan isugu soo baxay Taraboonka ayaa sidoo kale wax lagu xumaado ku tilmaamay hadalka guddoomiyaha gobolka Banaadir ee ahaa inuu iska hor imaad ku dhintay guddoomiye Cabdixakiin Dhagajuun oo shalay uun ku soo laabtay dalka.

Si kastaba dilka guddoomiyihii hore ee degmada Hodan ayaa dhaliyey xiisad xoogan, iyadoo haatan ay socdaan baaritaano dheeraad ah oo ku aadan dilkiisa, waxaana loo xiray illaa 9 askari oo labo ka mid ah ay yihiin saraakiil ka tirsan Booliska Soomaaliya.

Muqdisho (Caasimada Online) – Madaxweynaha maamulka Puntland, Mudane Saciid Cabdullahi Maxamed (Deni) ayaa maanta kulan la yeeshay wakiilka gaarka ah ee xoghayaha guud eee Qaramada Midoobay u qaabilsan Soomaaliya Amb. James Swan.

Kulanka oo ahaa mid hab maqal iyo muuqaal ah ayaa labada dhinac waxay uga wada-haleen xaaladda dalka iyo doorashooyinka 2021-ka.

Labada mas’uul ayaa si gaar ah diirada u saaray xal u helida tabashooyinka la xiriira doorashada dalka.

Swan ayaa dadaal xoogan ugu jira sidii xal mideysan looga gaari lahaa doorashooyinka 2021-ka, isaga oo shalay kulan kan la mid ah la yeeshay Axmed Madoobe.

Maamullada Jubbaland iyo Puntland oo weli diidan hannaanka ay doorashada ku wajaheyso dowladda Soomaaliya ayaan soo magacaaabin guddiyadooda doorashada.

Xaaladda siyaasadeed ee dalka ayaa ah mid cakiran, iyada oo uu waqtigu yahay mid gabagabo ah, balse beesha caalamka ayaa wada qorshe lagu qabanayo shirweyne kale.

Muqdisho (Caasimada Online) – Ra’iisul wasaaraha Soomaaliya, Mudane Maxamed Xuseen Rooble ayaa war kasoo saaray dilkii xalay Muqdisho loogu geystay AUN guddoomiyihii degmada Hodan, Marxuum Cabdixakiin Cabdiraxmaan Ciise (Dhagajuun).

Ra’iisul wasaare Rooble ayaa ugu horreyn tacsi u diray qoyskii iyo asxaabtii uu ka baxay Marxuumka.

Sidoo kale wuxuu intaasi ku daray in guddoomiyaha uu ku dhintay fal uu nasiib darro ku tilmaamay.

“Waxaan tacsi tiiraanyo leh u darayaa qoyskii iyo asxaabtii Marxuum Cabdixakiin Dhagajuun guddoomiyihii degmada Hodan oo ku geeriyooday fal nasiib darro ah oo xalay ka dhacay Muqdisho. Waxaa Eebbe uga baryayaa in uu naxariistii Janno ka waraabiyo ehelka iyo asxaabtana Samir iyo iimaan ka siiyo,” ayuu yiri ra’iisul wasaaraha.

Ugu dambeyn ra’iisul wasaare Rooble ayaa faray laamaha amniga inay baaris dhab ah ku sameeyaan dilka guddoomiyihii maamulka degmada Hodan.

“Waxaan farayaa hay’adaha  ammaanka ee ku shaqada leh in ay baaritaan rasmi ah oo dhammeys tiran ku sameeyaan dhacdadadaas nasiib darrada ah,” ayuu sii raaciyey.

AUN Cabdixakiin Dhagajuun oo xalay saq-dhexe lagu toogtay agagaarka isgyska Howlwadaaga yaa shalay uun dib ugu soo laabtay dalka, isagoo ka yimid dalka Turkiga oo caafimaad ahaan loogu qaaday kadib dhaawac ka soo qaara qarax miino oo lala eegtay.

Muqdisho (Caasimada Online) – Xildhibaan Mahad Salaad oo ka tirsan mudanayaasha golaha shacabka baarlamaanka Soomaaliya ayaa si adag uga hadlay dilkii loo geystay guddoomiyihii degmada Hodan, Cabdixakiin Dhagajuun oo xalay lagu toogtay Muqdisho.

Mahad Salaad ayaa marka hore cambaareeyey hadal ka soo baxay guddoomiyaha gobolka Banaadir, ahna Duqa magaalada Muqdisho ee ahaa in guddoomiyaha uu ku dhintay is-rasaaseyn dhex-martay ciidamada ammaanka iyo qaar ka mid ah ilaaladiisa.

Xildhibaanka ayaa hadalka Cumar Filish ku tilmaamay inuu yahay gaf weyn oo ka soo yeeray, islamarkaana ka fog xaqiiqada & sida ay wax u dhaceen.

Sidoo kale wuxuu intaasi ku sii daray inay hadalkan uu yahay mid raad tirasho ah oo lagu qarinayo dadkii ka dambeeyey dilka guddoomiyaha, sida uu hadalka u dhigay.

“Waxaan cambaareynayaa hadalka gafka ah ee ka soo yeeray Gudoomiye Cumar Finish ee ah Gudoomiye Cabdihakiin Dhagajuun is-rasaasayn ayuu ku dhintay. Waxaanan u aragnaa in Gudoomiye Cumar iyo maamulkiisu bilaabeen raadtirasho si loo qariyo raadka dambiileyaasha falkaas geystay,” ayuu qoraalkiisa ku yiri xildhibaanka.

Mahad Salaad ayaa intaasi sii raaciyey “Gaari la hubiyay markii uu gudbayay, soo laabashadiisana loo diyaar garoobay, ciidamo xoojin ahna loo diray sida ay ii sheegeen saraakiisha tagay goobta falku ka dhacay sabab loogu sheego is-rasaasayn ayay ahayd waa wax aan la qaadan karin.  Gudoomiye Cumar na waxaan ugu baaqaynaa in uu cudurdaar ka bixiyo hadalkaas,”.

Ugu dambeyn wuxuu ku baaqay in si deg-deg ah cadaaladda loo horkeeno saraakiishii & askartii ka dambeysay toogashada loo geystay guddoomiyihii degmada Hodan.

“Waxaan ku baaqaynaa mar labaad in cadaalada la horkeeno saraakiisha amarka bixiyay iyo askartii fulisay falkaas foosha xun ee lagu qaarajiyay Gudoomiye Cabdixakiin,”.

Si kastaba dowladda Soomaaliya ayaa haatan wada baaritaano dheeraad ah oo ku aadan dhacdadaasi, iyada oo xabsiga la dhigay saraakiil & askar ka tirsan ciidamada Booliiska.

Muqdisho (Caasimada Online) – Dowladda federaalka ah ee Soomaaliya ayaa qaaday tallaabo deg-deg ah, kadib dilkii xalay magaalada Muqdisho loogu geystay guddoomiyihii maamulka degmada Hodan, Marxuum Cabdixakiim Cabdiraxmaan Ciise (Dhagajuun).

Warar ay heshay Caasimada Online ayaa sheegaya in xabsiga la dhigay taliyeyaal ciidan iyo askar ka tirsan ciidamada Booliiska Soomaaliya, kadib dhacdadaasi.

Sida aan xogta ku helnay waxaa illaa iyo hadda xabsiga la dhigay taliyaha  saldhigyada Booliiska degmooyinka Howlwadaag, Gaashaanle Shucayb Cabdi Maxamuud iyo taliyaha saldhigga Waabari, Gaashaanle Maxamed Cabduqaadir Mooshin, kuwaas oo la sheegay in xalay ay ki sugnaayeen goobta uu dilku ka dhacay, kuna qornaayeen heeganka.

Sidoo kale wararka ayaa intaasi ku daraya in la xiray illaa 7 askari oo iyana ku sugnaa barta koontarool ee lagu dilay guddoomiye Cabdixakiin Dhagajuun, waxaana haatan socda baaritaano dheeraad ah oo ku aadan, sida uu dhacay dilka guddoomiyaha.

Maamulka gobolka Banaadir ee uu horkacayo Cumar Maxamuud Maxamed (Filish) ayaa sidoo kale soo saaray amar de-deg ah oo la xiriira in baaritaan dhab ah lagu sameeyo shaqaaqadaasi, iyadoo guddi ka kooban todobo xubnood loo saaray aaska marxuumka.

Si kastaba guddoomiyaha la dilay ee maamulka degmada Hodan ayaa toogashadiisa waxa ay timid saacado uun, kadib markii uu ku soo laabtay gudaha magaalada Muqdisho, isaga oo bilihii u dambeeyey arrimo caafimaad ugu maqnaa wadanka Turkiga oo loo geeyey dhaawac ka soo gaaray qarax miino oo lagula eegtay qeybo ka mid ah Caasismada.

Muqdisho (Caasimada Online) – Sida aan ka soo xiganay xubno kamid ah beesha Caalamka waxaa muuqanaya isu soo dhawaansho madaxda dowladda Soomaaliya, kuwa maamul gobaleedyada, iyo musharaxiinta mucaaradka, taas oo ku saabsan muranka ka taagan doorashada Soomaaliya.

Xubnaha aan la hadalnay ayaa sheegay in dhinacyada ay mabda’ ahaan wada-ogolaadeen in la qabto kulan deg deg ah ka hor bish Febraayo, kaas oo looga hadli doono in lagu dhameeyo khilaafka hareeyey doorashada Soomaaliya.

Arrintan ayaa ka dambeysay kulamo dhowr ah oo beesha caalamka ay la yeelatay dhinacyada isku haya siyaasadda Soomaaliya. 

Madaxweynihii hore ee Soomaaliya, ahna guddoomiyaha golaha midowga musharaxiinta Sheekh Shariif Sheekh Axmed iyo qaar ka mid ah musharaxiinta mucaaradka, ayaa xalay kulan gaar ah la qaatay xubnaha beesha caalamka.

Xubno ka socday beesha caalamka ayaa sidoo kale qadka internet-ka kula kulmay Madaxweynaha Jubaland Axmed Maxamed Islaam (Axmed Madoobe) iyagoo kala hadlay khilaafka doorashada.

Xogta aan helnay ayaa tilmaameysa in James Swan uu ka shaqeeyay natiijo hordhaca ah, ayada oo dhinacyada ay mabda’ ahaan ogolaadeen wada-hadal. Dowladda federaalka ayaa sidoo kale la sheeegayaa inay ogolaatay wada-hadallo. Si kastaba, waxaa la ogeyn sida looga heshiin doono arrimaha la isku haayo marka la isku yimaado.

Ilaha aan warkaan ka soo xiganahay ayaa sheegay in sidoo kale dhinacyadu lagula ballamay in ay sameeyaan tanaasul markii shirka la isugu yimaado oo aan halkii la taagnaanin.

James Swan ayaa la filayaa 24-ka bishaan uu dalka ka baxo markii uu laabtana shirkaas si deg deg ah loo qabto. Sidoo kale waxaa dhici karta in isagoo maqan la qabto shirkaan.

Muqdisho (Caasimada Online) – Guddoomiyaha maamulka gobolka Banaadir, ahna duqa magaalada Muqdisho ayaa soo saaray amar deg-deg ah, kadib dilkii loo geystay guddoomiyihii degmada Hodan, Marxuum Cabdixakiim Cabdiraxmaan Ciise (Dhagajuun).

Duqa magaalada Muqdisho ayaa marka hore Tacsi u diray ehellada Marxuumka, isaga oo xaqiijiyey in lagu dilay is-rasaaseyn xalay saq-dhexe dhex martay ciidamada ammaanka iyo ilaaladiisa, xilli uu marayey inta u dhaxeysa isgoysyada Howlwadaag iyo Aadan Cadde.

Cumar Filish ayaa amray in baaris dheeraad ah lagu sameeyo dhacdadaasi, si loo helo cadaalad, la’iskulana xisaabtamo dilka mas’uulkaasi oo saacado uun ku sugnaa Muqdisho, wuxuuna shalay ku soo qaabtay dalka, isaga oo dhaawac ahaan u jiray dalka Turkiga.

Sidoo kale guddoomiyaha maamulka gobolka Banaadir ayaa guddi u saaray aaska marxuumka, kaas oo ka kooban illaa 7 xubnood oo ka tirsan maamulkiisa.

Halkan hoose ka aqriso:

Guddoomiyaha Gobolka Banaadir Ahna Duqa Muqdisho Md. Cumar Maxamuud Maxamed (Filish) iyo dhamaan Madaxda Sare ee Maamulka Gobolka Banaadir iyo Dowladda Hoose ee Xamar, waxa ay Tacsi tiiraanyo leh u dirayaan Qoyskii, Qaraabadii, Saaxiibadii iyo Bulshada Soomaaliyeed ee uu ka baxay Allaha U naxriisto Guddoomiyahii Degmada Hodan Marxuum Cabdixakiim Cabdiraxmaan Ciise (Dhaga-juun).

New York (Caasimada Online) – Wasiirka arrimaha dibadda xukuumadda Soomaaliya, Mudane Maxamed Cabdirasaaq Maxamuud ayaa kulan gaar ah la qaatay Volkan Bozkir oo haatan ah madaxweynaha kal-fadhiga 75-aad ee Golaha Guud ee Qaramada Midoobay.

Kulanka oo ahaa mid wax ku ool ah, islamarkaana ka dhacay Mareykanka ayaa labada mas’uul waxay uga wada-hadleen xaaladda Soomaaliya oo xilligan wajaheyso doorasho.

Ugu horreyn wasiir Maxamed Cabdirasaaq ayaa Volkan Bozkir warbixin dheer ka siiyey xaaladda iyo horumarradii ugu dambeeyey ee ay ku tallaabsatay dowladda Soomaaliya, gaar ahaan arrimaha siyaasadda, amniga & sidoo kale kaabayaasha dhaqaalaha dalka.

Dhankiisa madaxweynaha kal-fadhiga 75-aad ee Golaha Guud ee Qaramada Midoobay oo madasha ka hadlay ayaa ka mahadceliyey booqashada wasiirka, isaga oo sidoo kale boggaadiyey horumarka ay gaartay dowladda federaalka ah ee Soomaaliya.

Ugu dambeyn wuxuu ballan qaaday in Qaramada Midoobay ay sii labo jibaari doonto  taageerada ay siiso Soomaaliya.

Si kastaba Qaramada Midoobay ayaa Soomaaliya ka caawiso dhinacyo dhowr ah oo ay ugu horreyso arrimaha siyaasadda, dhaqaalaha & dib u dhiska dalka.

Garoowe (Caasimada Online) – Maamulka Puntland ayaa maanta markii u horeysay soo bandhigay ciidamo cusub oo sugaya amaanka gobolka Sanaag oo deegaano kamid ah ay ku muransan yihiin Somaliland.

Guddoomiyaha folaha Wakiillada maamulka Puntland, Cabdirashid Yuusuf Jibril iyo wafdi uu horkacayo ayaa kormeer ku tagay dugsiga tobabarka ciidamada ee magaalada Badhan, halkaas oo lagu tobabaro ciidamada badan oo sugaya amniga gobolka Sanaag.

Ciidamadan cusub ayaa qeyb ka noqon doona ciidamada difaaca Puntland, waxayna si gaar ah uga howl-gali doonaan gobolka Sanaag oo ay ku muransan yihiin Somaliland, iyada oo dhowr jeer uu deegaano ka tirsan gobolkaas uu ku dhex-maray dagaal.

Guddoomiye Jibriil ayaa bogaadiyey ciidamada tobabarka u socda, isagoona kula dar-daarmay inay ka faa’iideystaan casharada iyo aqoonta la siiyey, kadib markii uu soo idlaaday dhoolatus cajiib ah oo ay soo bandhigeen ciidamadaas.

Wafdiga guddoomiyaha ayaa waxa kamid ahaa Wasiirka Wasaaradda Maaliyadda ahna Guddoomiyaha dib u habeynta ciidamada, Wasiirka Wasaaradda Amniga, Taliyaha Ciidamada Daraawiishta, Taliyaha Ciidamada Booliska, Xildhibaano iyo Saraakiil kale.

Puntland iyo Somaliland ayaa mararka qaar ku dagaalama deegaano hoostaga gobolka Sanaag oo uu maamulka Garoowe u diyaariyay ciidamadan cusub oo uu sheegay inay qeyb weyn ka qaadanayaan sugida amniga gobolkaas.

Muqdisho (Caasimada Online) – Allah ha u naxariisto’e, guddoomiyihii degmada Hodan Cabdxakiim Dhagajuun ayaa xalay lagu dilay agagaarka isgoyska Howlwadaag ee magaalada Muqdisho, sida ay noo xaqiijiyeen ilo-wareedyo lagu kalsoon yahay.

Cabdixakiim Dhagajuun ayaa ku dhintay is-rasaaseyn isgoyska ka dhacday oo dhex-martay ilaaladiisa iyo ciidan ka tirsan dowladda oo ku sugnaa isgoyska, sida aan xogta ku helnay.

Cabdixakiim Dhagajuun ayaa Arabacdii shalay un dib ugu soo laabtay magaalada Muqdisho kadib muddo ku dhow laba toddobaad oo uu ku sugnaa dalka Turkiga, halkaasi oo lagu daweynayey kadib markii uu ku dhaawacmay qarax 12-kii November ka dhacay waddada 21-ka October ee Muqdisho. 

Qaraxaas oo ka dhashay miino dhulka lagu aasay ayaa lala eegtay baabuur uu la socday guddoomiyaha, waxaana ku dhintay laba ka mid ah askarta ilaalada u aheyd, ayada oo guddoomiyahana uu ku dhaawacmay.

Cabdixakiim Dhagajuun ayaa wax ka yar saddex saac inta aan la dilin waxa uu bartiisa facebook soo dhigay qoraalka hoose.

Qoraalka Cabdixakiim ee facebook 

Alle ayaa Mahad leh, intaa kadib waxaa maanta ku soo noqday dalka, kadib markii hawlo Caafimaad muddo kooban aan ugu maqnaa dalka Turkiga, Alle mahadii xaaladeyda Caafimaad aad ayeey u wanaagsan tahay.

Intaa kadib maanta markii aan imid, waxaan durba bilaabay shaqadii aan Bulshada u haayay, waxaana Shir Guddoomiyay, Shirka Isbuuclaha ah ee Degmooyinka Hodan & Hawlwadaag, kaasi oo looga hadlo hawlaha shaqo ee ka socda labada Degmo.

Argagixisada mar kasta waxa ay isku dayaan in Bulshada Somaliyed ay ka niyad jabiyaan Dowladnimadooda, laakiin waxaan leenahay idiinma suuragaleyso qorshahaasi aad damacsan tihiin, idinka ayaana dhibka ku dambeyn doono Insha Allah.

Waxaa naga go’an inta nafta ay nagu jirto in aan u adeegno Bulshadeena qiimaha badan.