Jowhar (Caasimada Online) -Guddoomiyaha baarlamaanka HirShabelle, Sheekh Cismaan Barre Maxamed oo wareysi siiyey Radio Kulmiye ayaa ka hadlay xaaladda guud ee maamulkaasi.

Guddoomiyaha ayaa ugu horreyn sheegay in HirShabelle ay wado qorshe ay ugu dhaawaqeyso gobollo iyo demooyin cusub oo hoostaga maamulkaasi.

Sidoo kale wuxuu tilmaamay in gobollada Hiiraan iyo Shabeelaha Dhexe ay ku yaallaan deegaano u qalma degmooyin, sida uu hadalka u dhigay.

Sheekh Cismaan Barre Maxamed oo hadalkiisa sii wata ayaa dhinaca kale ka hadlay howlaha horyalla baarlamaanka iyo sidoo kale caqabadaha heysta.

Guddoomiye Barre ayaa sheegay in muddo goluhu wajahayey xaalad amni darro iyo mushaar la’aan Xildhibaanada heysatay, taasoo cuuryaamisay shaqadii baarlamaanka.

HirShabelle ayaa waxaa lagu sheegaa inay tahay maamulka ugu tabarta daran maamullada dalka, waxaana isugu darsamay amni darro iyo dhaqaale la’aan.

Caasimada Online
Xafiiska Jowhar
[email protected]

Muqdisho (Caasimada Online) – Guddiga KMG ah ee soo diyaarinta sharciga doorashooyinka qaranka ee Golaha Shacabka ayaa maanta kulan kula yeeshay xarruunta gudoonka iyo guddiyada ee Villa Hargeysa wasiiradda Amniga iyo Gaashaandhigga Maxamed Abuukar Islaaw Ducaale iyo Xasan Cali Maxamed Amardambe.

Ajendaha kulanka uu guddiga la yeeshay wasiiradda ayaa ahaa doorka ay ka qaadan karaan sugida doorashada ka dhici doonta dalka sanadka 2021-Ka.

wasiiradda Amniga iyo Gaashaandhiga Maxamed Abuukar Islaaw Ducaale iyo Xasan Cali Maxamed Amardambe ayaa guddiga uga warbixay qaabka ay u sugi karaan amaanka goobaha ay doorashada dalka ka dhici doonta 2021-ka.

Ankara (Caasimada Online) – Madaxweynaha dalka Turkiga, Recep Erdogan oo ka hor hadlayey baarlamaanka dalkaasi ayaa sheegay inuu u mahadcelinayo Soomaaliya iyo dalalka kale ee ku taageeray howlgalka Milatari ee uu ka wado waqooyiga dalka Syria.

Erdogan ayaa sheegay in dowladda federaalka ah ee Soomaaliya ay u muujisay garab istaag muhiim ah, xilli dalal badan ay ka horyimaadeen tallaabada Turkiga.

“Waxaan Soomaaliya uga mahadecinayaa ina y nagu garab istaageen howlgalka militari ee aan ka wadno waqooyiga Syria.” ayuu yiri Madaxweyne Erdogan.

Hadalkan ayaa ku soo aadaya, iyadoo dhowaan dowladda federaalka ah ee Soomaaliya ay ka hortimid bayaan ka dhan ahaa Turkiga oo ka soo baxay Jaamacadda Carabta, kaas oo lagu dhaleeceynayey howlgalka Milatari ee uu dalkaasi ka wada gudaha dalka Syria.

Sidoo kale waxaa Warsaxaadeedkaasi ka dhanka ahaa Turkiga diiday inay ka mid noqoto dowladda Qatar.

Turkiga ayaa ka mid ah dalalka sida dhow u taageero Soomaaliya, waxaana uu mashaariic kala duwan ka fuliyaa magaalada Muqdisho, sidoo kale wuxuu tababaro xoogan siiyaa ciidamada kala duwan ee dowladda federaalka ah ee Soomaaliya.

Caasimada Online
Xafiiska Istanbul
[email protected]

Muqdisho (Caasimada Online) – Madaxweynaha Soomaaliya Mudane Maxamed Cabdullaahi Farmaajo ayaa warqadaha aqoonsiga ka guddoomay Danjireyaasha cusub ee dalalka Talyaaniga iyo Swedan ee Soomaaliya.

Danjiraha Boqortooyada Sweden Mudane Staffan Tillander oo Madaxweynaha la wadaagay farriin iyo salaan uu uga siday Boqorka Sweden Mudane Carl XVI Gustaf ayaa tilmaamay dadaalka uu ku bixin doono sare u qaadidda xiriirka labada dal, isaga oo dowladda iyo shacabka Soomaaliyeed uga mahadceliyey soo dhaweynta diirran.

Sidoo kale, Danjiraha cusub ee dalka Talyaaniga Mudane Alberto Vecchi oo warqadahiisa aqoonsi u gudbiyey Madaxweynaha ayaa muujiyey sida uu ugu hanweyn yahay in uu ka mid noqdo bahda diblumaasiyiinta ka hawlgala dalkeenna.

Vecchi ayaa Madaxweynaha u gudbiyey dhambaal iyo salaan uu uga siday dhiggiisa dalka Talyaaniga Mudane Sergio Mattarella, waxa uuna tilmaamay in dalkiisu ay saaxiib dhaw la yihiin shacabka Soomaaliyeed, xiriir soo jireen ahna uu ka dhexeeye labada dal.

Dhankiisa, Madaxweyne Maxamed Cabdullaahi Farmaajo ayaa danjireyaasha uu warqadaha aqoonsiga ka guddoomay uga warbixiyey sida dowladda Federaalka Soomaaliya ay uga go’an tahay xoojinta xiriirka ku dhisan iskaashiga iyo wax-wada-qabsiga ee kala dhexeeya dalalka caalamka.

Madaxweyne Farmaajo ayaa Danjireyaasha cusub ugu hambalyeeyay xilalka loo magacaabay, waxa uuna u sheegay in ay soo dhaweyn wanaagsan kala kulmayaan shacabka Soomaaliyeed, Dowladda Federaalkuna ay ku garab istaagayso gudashada waajibaadka diblumaasiyadeed ee loo soo igmaday.

Caasimada Online
Xafiiska Muqdisho
[email protected] 

Madaxweynihii ugu horeeyay ee Soomaaliya si dimoqraadi ah loogu doortay, Cabdirashiid Cali Sharmaake, ayaa la dilay 15-kii October 1969-kii oo ay kasoo wareegatay muddo ku suntay 50-sano.

Khaarijintiisa oo la rumeysan yahay in ay ahayd mid siyaasadeysan uuna ka dambeeyay askari boolis ah kaasoo ilaaladiisa kamid ahaa ayaa ka dhacay magaaladda Laascaanood. Gacan ku dhiiglaha ayaa durba la toogtay.

Alle ha u naxariistee Sharmaake ayaa 1960-kii illaa iyo 1964-tii wuxuu wasiirka koowaad ee xukuumadda uu u ahaa Aadan Cabdulle Cismaan. Isla markii uu xilku qabtay waxa uu dhiirogeliyay dhaqdhaqaaqyadii gobanimo doonka.

Mudadii uu xafiiska joogay Soomaaliya ayaa dagaalo qaraar la gashay Itoobiya oo ciidamo iyo hub culus haysatay. Kaliya xoogaga Soomaaliya waxaa lagu qiyaasay saddex kun oo bilaa hub iyo gaadiid ah balse aad u dhiiran.

Hadaladdii taariikhda galay ee aadka loogu xasuusto lagana qabtay intii ay dagaaladdu socdeen oo ay Soomaaliya iska difaacday Itoobiya waxaa kamida “gacan waan ku dagaalameynaa, gacanna doorashadan ku galeynaa”.

Markii dagaalku istaagay dalkana ay ka dhacday doorasho dibna uu ugu soo laabtay ra’iisul wasaare-nimadda ayaa waxa uu socdaal taageero raadis ah uu ugu baxay dalal ay ku jiraan; France, UK, Germany iyo Canada.

Ujeedada ugu weyn ee safarkiisa ayaa lagu sheegay dhismaha ciidamadda xoogan oo ay Soomaaliya yeelato si ay dib ugu soo ceshato dhulalka ka maqan. Balse, socdaalkiisa wuxuu ahaa mid aanan wax miro dhan ah kasoo bixin.

Heshiisyadii “sababay” dhimashadiisa

Isaga oo ka qeybgalaya Shirka loo dhan yahay ee Qaramada Midoobay, waxa ay wada kulmeen Wasiirka Arrimaha Dibadda Russia, kaasi oo uu u bandhigay qorshihiisa dhismaha ciidan xoog leh oo ay Soomaaliya hesho.

Ra’iisul wasaarihii dowladdii KMG ahayd ee Soomaaliya, Maxamed Cabdi Yuusuf oo dilka madaxweynaha usoo joogay ayaa wuxuu dib uga faaloodey xusuustiisa.

Wada hadalo kadib ayay isla qaateen in ay u wada safraan Ruushka. Sharmaake waxaa xiligaas wehliyay Wasiiradda Arrimaha Dibadda, Difaaca iyo saraakiisha kala duwan ee Ciidamadda Qalabka Sidda ee Soomaaliya.

“Miis baa loo keenay, waxaa la yiri ‘waxaad ku qortaa waxaad rabtaan’ 20-kun oo ciidan, hubkood, taangi iyo wax walbaa lagu qoray,” ayuu Yuusuf ku sheegay wareysi uu siiyey VOA-da laanta Af Soomaaliga.

Maadaama uu xifaaltan ka dhaxeeyay, reer Galbeedka ayaa aad uga carooday bogga cusub ee u furmay xiriirka Soomaaliya iyo Ruushka, waxayna cadaadis xoogan saareen madaxweynihii waqtigaas dalka xumayey.

Yuusuf ayaa ka jawaabaya sababta loo dilay Sharmaake: “Midowgii Suufiyeenti [Ruushka] buu xiriir la sameeyay 17-mashruuc baa la saxiixay oo ciidanka, shirkadaha iyo waxbarashada, dabadeedna Midowgii Suufiyeenti iyo Dowladda Soomaaliya ayaa isku dhawaaday, markaas ayaa nimanka reer Galbeedku ka xumaadeen dabagalna ku sameeyeen”.

Kadib doorashadii qabsoontay 1964-tii, Sharmaake ayaa waxa uu waayey jagadiisa, waxaana ra’iisul wasaare noqday waqtigaas Cabdirisaaq Xaaji Xuseen xili Aadan Cabdulle Cismaan uu difaacday kursigiisa.

Sidda laga soo xigtay Yuusuf, in Sharmaake la eryo waxay ka dambeysay markii ay madaxweynaha saameeysay dhabar ka taabashada reer Galbeedka oo Sharmaake u arkayey “caqabad”.

– Madaxweyne – 

Kadib doorashadii madaxweynaha ee qabsoontay 1967-dii ayaa waxa uu Cabdirashiid Cali Sharmaake kusii baxay xilka madaxweynaha, isaga oo ra’iisul wasaare ka dhigtay Maxamuud Xaaji Cigaal, oo ka tirsanaa xisbiga SNT.

“Cigaal oo xisbiga SNT ka tirsanaa ayaa intii ay reer Galbeedku la hadleen waxaa la yiri ‘SNT kasoo tag Leegada tag, Cabdirashiid baa soo bixi doono’. Cabdirashiid-na la hadleen la yiri ‘Cigaal ra’iisul wasaare ha dhig’ wax waan wada qeyb-saneynaayeen tanaasulaad buu la galay,” ayuu raaciyey hadalkiisa.

Wuxuu intaasi ku daray: “Markaad kadib reer Galbeedku aad buu xirmay. Kolka maxaa dhacay? Waxaa dhacay shacabkii oo kacay, Soofiyeedku gacanta ku hayaan meeshuu doono qabsan karo. Reer Galbeedku waxay ku fekereen marka in Cabdirashiid meesha ka saaraan, ciidanka la bedelo, rag iyaga ah [reer Galbeedka] la keensado”.

Dilkiisa kadib dhowr cisho waxaa taladii waddanka afgembi kula wareegay ciidamadii militariga ee uu hoggaaminayey allaha u naxariistee Jeneral Maxamed Siyaad Barre, kaas oo dalka xukumayey in ka badan 30-sano.

Xigasho: Garoweonline

Kismaayo (Caasimada Online ) – Madaxweynaha Jubbaland, Axmed Maxamed Islaam (Axmed Madoobe) ayaa maanta dalacsiiyey Saadiiq Maxamuud Dhogor oo ah taliyaha ciidanka amniga garoonka magaalada Kismaayo ee xarunta gobolka Jubbada Hoose.

Munaasabad ka dhacday xarunta Madaxtooyada Jubbaland ayaa darajada Gaashaanle Dhexe loogu xiray Saadiiq Dhogor oo ka mid ahaa sarakiishii sida gaarka aheyd uga shaqeysay amniga doorashadii dib loogu doortay Madaxweyne Axmed Madoobe.

Khudbad uu Madaxweynaha Jubbaland ka jeediyey madasha ayuu ku sheegay in taliyuhu dalacsiintan ku muteystay dadaal badan iyo karti uu la yimid.

Sidoo kale wuxuu ku booriyey saraakiisha kale ee Jubbaland in ay labo jibaaran shaqooyinka adag ee ay u hayaan dadka reer Jubbaland.

Tallaabadan ayaa u muuqata mid uu Axmed Madoobe ugu abaal gudayo dadkii ka shaqeeyey doorashadii muranka dhalisay ee dib loogu doortay hoggaanka Jubbaland.

Muqdisho (Caasimada Online) – Shabakadda Caasimada Online ayaa baaritaan dheer iyo dabagal ku sameysay dhibaatooyin dhinaca amniga ah oo ay muddooyinkii la soo dhaafay wajahayeen qaar ka mid ah shacabka ku dhaqan gudaha magaalada Muqdisho.

Sheekadan ayaa ku saabsan dhacdooyin kala duwan oo ka dhacay xaafadda Kaawo Godey oo kala qeybisa degmooyinka Wadajir iyo Dharkenley ee gobolka Banaadir, kuwaas oo sababay barakac xooggan oo ka socda xaafadda, oo dadkii deganaa ay isaga guurayaan.

Xaafadan oo deegaan ahaan horumar sameyneysay sanadihii la soo dhaafay ayaa waxaa ka dilaacay ciidan u abaabulan qaab Beeleed, kuwaas oo dhibaato ku haya deegaanka.

Caasimada Online ayaa ogaatay in tacadiyo badan ay ciidankaasi ka geysteen Kaawo Godey, kuwaas oo isugu jira dil, kufsi, dhac iyo dhibaatooyin kale.

Qaar ka mid ah dadka deegaanka ayaa inoo sheegay in xaafaddu aysan laheyn wax saldhig ah, islamarkaana aysan ka howlgalin ciidan Boolis ah oo ka shaqeeya amniga.

Dadka aan la hadalnay ayaa sidoo kale sheegay in ciidanka jooga halkan ay yihiin koox aan ka amar qaadan wax maamul dowladeed ah, kuwaas oo lacago baad ah ka qaada goobaha ganacsiga iyo haddii la dhisanayo xaafaddaasi.

“Xaaladda amni ee Kaawo Godey aadbey u liidataa walaal, malahan ciidan sugo amnigeena waxaa dhibaato nagu hayo maleeshiyaad hubeysan oo shaarka dowladda nooga qaato lacago baad ah, dad badan ayaa xaafadda ka guuraya.” ayuu yiri mid ka mid ah dadka deegaanka.

Sidoo kale wuxuu intaasi ku daray in marar badan dhibaatooyinkan ay la wadaageen maamulka degmada, basle aysan jirin cid ka jawaabtay baaqooda.

Waxa kale uu xusay in hadda ay xaaladdu ka sii dartay, islamarkaana dharaar cad la’is dhacayo, habeenkiina ay ka sii daran tahay oo guryaha dadka loogu galayo.

Dadka shacabka ah waxa kale uu sheegay inay hadda bilaabeen in guryahooda ay ka barakacaan, una wareegsadaan xaafado kale oo ku yaalla isla Muqdisho.

“Dadka shacabka ah waxa ay bilaabeen inay guryahooda ka barakacaan oo ijaar ka dagaan xaafadaha kale ee nabdoon.” ayuu hadalkiisa ku soo gabagabeeyey.

Xiriiro aan la sameeynay mas’uuliyiin ka tirsan maamullada degmooyinka Wadajir iyo Dharkenley ayaa waxa ay ka gaabsadeen in ay ka hadlaan dhibaatooyinkaasi.

Dowladda Soomaaliya, gaar ahaan maamulka Banaadir ee uu hoggaamiyo Cumar Maxamuud Maxamed (Filish) ayey ugu dambeyn dadkani ka codsadeen inuu u soo gurmado, islamarkaana uu wax ka qabto amni darrada baahsan ee ka jirta halkaasi.

Caasimada Online
Xafiiska Muqdisho
[email protected]

Muqdisho (Caasimadda Online) – Taliyaha Ciidanka Booliska Soomaaliyeed Gen, Cabdi Xasan Xijaar ayaa isku shaandheyn ku sameeyay qaar ka mida taliyeyaasha iyo Saraakiisha sare ee ciiidamada Booliska Soomaaliyeed, iyadoo qaarkood xilalkii laga qaaday.

Taliyeyaasha qeybaha iyo taliska sare qaarkood ayay saameysay xil ka qaadista iyo isku shaandheynta uu sameeyya taliyaha ciidamada Booliska, waxaana saraakiisha la magacaabay ka mida taliyaha saldhiga Booliska Dharkeynley, taliyaha qeybta Waliyow Cadde, taliyaha ciidamada Birmadka Booliska iyo taliyaha Daraawiishta, waxayna kala yihiin:

Sidoo kale Taliyeyaasha la magacaabay ayaa waxaa la faray inay si toos ah u gutaan waajibaadkooda shaqo ee loo idmaday.

Taliyaasha la magacaabay oo gaaraya ilaa lix taliye ayaa kala ah:

1-Gaashaanle Mahad Cabdi Xakiin Cumar (Mahad Korow) ayaa loo magacaabay Taliyaha   qeybta Booliska Waliyow Cadde.

2-Cabdullaahi Mire Siyaad ayaa loo magacaabay La-taliyaha Ciidanka Booliska Soomaaliyeed,isagol horey u ahaa Taliyaha qeybta Waliyow Cadde.

3-Taliyaha Birmadka Ciidamada Booliska ayaa loo magacaabay  Yuusuf Xundubey oo hore u ahaa Taliyaha Saldhiga Galbeed ee G/Banaadir.

4-Yaasiin Nuur Kheyre ayaa loo magacaabay Taliyaha Saldhiga Booliska Degamada Dharkeenley.

5-Gaashaanle Sare Cabdullaahi Mire Siyaad ayaa lol magacaabay Taliyaha Daraawiishta Booliska.

6-Aadan Xersi ayaa loo magacaabay Taliyaha socdaalka Ciidamada Booliska.

Caasimada Online
Xafiiska Muqdisho
[email protected]

Muqdisho (Caasimadda Online) – Madaxweynaha Maamul Goboleedka Galmudug Axmed Ducaalle Geelle Xaaf ayaa ka hor imaaday inay Dowladda Soomaaliya ee uu hoggaamiyo Madaxweyne Maxamed Cabdullaahi Farmaajo sameysato muddo korosi.

Madaxweyne Xaaf, qaar ka tirsan Golihiisa wasiirada iyo Xildhibaano ka mid ah Baarlamaanka Galmudug oo kulan la qaatay Guddiga KMG ah ee soo diyaarinta sharciga doorashooyinka Qaranka ee Golaha Shacabka ayaa talo ahaan usoo jeediyey inaan la ogolaan muddo kororsi taas badalkeedana laga shaqeeyo sidii ay dalka uga dhici laheyd doorasho xor iyo xalaal ah.

Kulankaan oo ujeedkiisa lagu sheegay inuu ahaa dhagaysi iyo talo aruurin la xariira sharciga doorashooyinka Qaranka ayaa wuxuu ka dhacay Magaalada Muqdisho ee Caasimadda Soomaaliya.

Madaxweyne Xaaf ayaa guddiga u gudbiyey talaabooyin ay tahay muhiim in la qaado si dalkan ay kaga dhacdo doorasho,oo aysan muddo kororsi u dhicin,waxaana uu kaga mahad-celiyey howsha ay hayaan.

Guddoomiyaha guddiga Xildhibaan Cabdullaahi Abuukar Xaaji ayaa dhankiisa sheegay in aragtiyadaasi ay qaadanayaa islamarkaasina ay qeyb kaga dhigayaan qorshooda ee diyaarinta sharciga doorashooyinka qaran.

Guddiga KMG ah ee soo diyaarinta sharciga doorashooyinka Qaranka ayaa maalmahaan dambe waday la kulanka Madaxda maamul-goboleedyada,iyagoona hore ula soo kulmay madaxda maamulada Hir-shabeelle iyo Puntland,waxaase la ogeyn Jubbaland cida ay kala kulmi donaan.

Caasimada Online
Xafiiska Muqdisho
[email protected]

Kuwait City (Caasimadda Online) – Ku xigeenka Wasiirka Arrimaha Dibadda ee dalka Kuwait  Khaled Al-Jarallah ayaa shaaciyey in wadankiisa uu marti gelin doono shir lagu taageerayo Soomaaliya .

Wasiirka ayaa sheegay in shirkaas oo ah mid Soomaaliya looga caawinayo dhanka Waxbarashada oo ay ka liidato uuna dhici doono sanadka soo socdo ee 2020 kaasoo lacago loogu deeqi doono.

Wakaaladda Wararka ee dalka Kuwaite ee marka lasoo gaabiyo loo yaqaan (KUNA) ayaa sheegtay in Al-Jarallah uu Axadii hoggaamiyey kulan loogu diyaar garoobayo shirkaas loogu deeqayo Soomaaliya oo noqonayo midkii ugu horeeeyey noociisa ah oo ay soo diyaariyaan Dowladaha Khaliijka.

Ku xigeenka Wasaaradda Arrimaha Dibadda ayaa la kulmay Diblomaasiyiin u dhashay Dalka Kuwait iyo xubno ka tirsan Wasaaradda Waxbarashada ee dalkaas si ay uga wada hadlaan sidii uu u dhici lahaa shirkaas lagu taageerayo Soomaaliya lagana hortago wax walba oo keeni karo inuu shirkaas baaqdo.

Arrintaan ayaa kusoo aadeyso xilli Shan Berri ka hor ay  Dowladda Mareykanka ku dhawaaqday in Barnaamijka Waxbarashada ee BAR ama BARO ay ku taageereyso lacag gaareysa $50 Milyan.

Barnamijkaas BAR ama Baro ayaa ah mashruuc socon doono muddo 5 Sano ah kaasoo la doonayo in lagu hormariyo tayada waxbarashada Soomaaliya iyo in la taageero dardargelinta waxbarashada carruurta.

Caasimada Online
Xafiiska Muqdisho
[email protected]

Boosaaso-(Caasimada Online) – Wasiirka Kalluumeysiga iyo kheyraadka badda ee maamulka Puntland Faarax Cawaash Beeldaaje oo warbaahinta kula hadlay magaalada Boosaaso ee xarunta gobolka Bari ayaa soo ban dhigay tirada iyo magacyada maraakiibta shisheeye ee sida sharci darada ah uga kalluumeysta xeebaha deegaanada Puntland.

Wasiir Beeldaaje ayaa sheegay in maraakiibtaas ay si dhuumaaleysi ah u gurtaan kheyraadka Puntland, isagoo sheegay in ay ku howlanyihii sidii sharciga ula tiigsan lahaayeen maraakiibtaas.

Iyagoo kaashanaya Wasaaradda kalluumaysiga ee xukuumadda federaalka ayuu sheegay in ay dacwado ka dhigeen dekedaha wadamada ay u iib geeyaan maraakiibtaas kalluunka ay ka xadaan xeebaha Puntland.

“Maraakiibtaas markii ay soo galayaan xeebaha dalka waxay damiyaan Satarleydka si aan loo ogaan, balse waan helnaa xogtiisa markab kasta oo soo gala xeebaha dalka, lkn ma heysano ciidamo ka howlgala oo soo qabta maraakiibtaas, waxaana hada socota diyaarinta ciidamo difaaca baddeena iyo khayraadka dhex ceegaaga” ayuu yiri wasiir Faarax Cawaash.

Wasiirka oo sii hadlayay ayaa soo ban dhigay magacyada Maraakiibta lagu eedeynayo in kalluumaysi sharci daro ah ay ka wadaan xeebaha dalka, gaar ahaan xeebaha gobolka Bari iyo dalalka laga kala leeyahay.

“waa caadeystayaa mar walba ku soo noq-noqda xeebeheena, waxayna kala yihii Al-Amiin oo wata calankla Iran, Al-Khaliil oo Iiraani ah, Al-Nasiib oo siguna Iiraani ah, Amiir 374 oo Iiraani ah, Al-Saffa oo Pagistaani ah, Al-Tamasha oo Pakistaani ah, Arsanaal, Baytulaah, Xamiidi, Jasma, Kooka iyo kuwo kale oo dhamaan aan heyno magacyadooda, waxaana ku dacweynay wadamada ay u suuq geeyaan kalluunka ay sida sharci darada ah uga jalaabanayaan biyaha Soomaaliya, sharciga ayaana la tiigsa doonaa” ayuu hadalkiisa ku sii daray wasiirka kalluumaysiga maamulka Puntland.

Caasimada Online
Xaafiiska Boosaaso
[email protected]

Gaalkacyo (Caasimadda Online) – Wararka ka imaanaya Magaalada Gaalkacyo ee Gobolka Mudug ayaa sheegaya in isku day dil uu ka badbaaday Taliyaha Saldhiga Waqooyiga Magaalada Gaalkacyo Cabdiqani Xabuun.

Taliyaha ayaa la sheegay in Gaarigiisa uu ogaaday in qarax uu ku xiran yahay,kadib markii uu ka shakiyey xilli uu doonayey in uu ku aado goobtiisa Shaqada,waxaana la sheegay in uu qarxay mudo 15 daqiiqao kadib markii la ogaaday.

Markii Taliyaha uu ogaaday gaariga inuu qarax ku xiran yahay ayaa 15 daqiiqo kadib waxaa qarxay gaarigii.

Wararka ayaa waxaa ay intaasi ku darayaan in qaraxaasi aysan wax khasaaro ah kasoo gaarin taliyaha iyo qoyskiisa, kadib markii dhamaantood ay ka baxeen guriga oo uu dhex yaallay gaariga miinada lagu xiray ee qarxay.

Qaraxa Baabuurka Taliyaha lagu xiray ayaa noociisa wuxuu yahay midka dhajiska ah ee Baabuurta lagu hoos xiro.

Weli ma jiro wax war ah oo ka soo laamaha amniga Degmada Gaalkacyo ee dhinaca Puntland oo ay hadlayaan qaraxaas uu ka badbaaday ahaa Taliyaha Saldhigga bartamaha Magaalada Gaalkacyo Cabdiqani Xabuun.

Muqdisho (Caasimada Online) – Dowladda Federaalka Soomaaliya ayaa looga digay in ay doorasho kale ku qabato degmo ka tirsan gobalka Gedo xili ay socoto abaabulka doorasho kale oo afaraad oo lagu qabto Jubbaland kadib markii dowladda Soomaaliya ay diiday doorashooyinkii Kismaayo ka dhacay bishii August ee sanadkaan.

Warar ay heshay Caasimada Online ayaa xaqiijinaya in madaxda dowladda Soomaaliya looga digay in ay ku deg degaan doorasho kale oo ay wado dowladda Soomaaliya in lagu qabto degmooyinka gobalka Gedo, waxaana la sheegay in arintaasi ay abuuri doonto dagaalo iyo colaad sokeeye.

Mid kamid ah agaasimayaasha Wasaaradaha Xukuumadda Soomaaliya iyo Xildhibaano ka tirsan Golaha Shacabka ayaa Caasiamda Online u sheegay in xubno ka tirsan wakiilada Beesha Caalamka ay dowladda federaalka Soomaaliya u sheegeen in Gedo aysan marti gelin doorasho si aysan u sii fogaanin xiisadda Jubbaland.

Beesha caalamka ayaa rumeysan in xalka Jubaland ee ugu dhow uu yahay wada-hadal dhex mara maamulka Axmed Madoobe iyo dowladda, sida aan xogta ku helnay.

Talaabada dowladda Soomaaliya looga digay ee abuuri karta colaadda Jubbaland ayaa ah in dowladda Soomaaliya ay Gedo ku qabato doorasho, waxaana markaas xaaladda isu badali doontaa qabiilo ay ka soo kala jeedaan Farmaajo iyo Axmed Madoobe.

In Gedo doorasho lagu qabto waxaa ka roon oo la qaadan karaa in lagu qabto Jubada Dhexe ama meel kale oo kamid ah Jubada Hoose si looga fogaado in khilaafka loo badalo mid salka ku haayo qabiil iyo gobal, sida ay sheegeen xildhibaano la hadlay Caasimada online.

Dowladda Soomaaliya ayaa ku jahwareersan xaaladda maamulka Jubbaland waxaana muuqata in aysan wali gaarin go’aan maslaxad u ah Jubbaland oo ay dadkeeda wajahayaan culeesyo amni iyo mid siyaasadeed oo qaarkood sabab u yahay maamulka Axmed Madoobe.

Madaxweynaha Soomaaliya Maxamed Cabdullaahi Farmaajo oo cadaadis kala kulmaya beeshiisa ayaa diiday in xiisadad Jubaland la xaliyo, isaga oo ku adkeystay inusuan ku qanceyn wax ka yar in Axmed Madoobe meesha ka baxo.

Caasimada Online
Xafiiska Muqdisho
[email protected]

Boosaaso (Caasimadda Online) – Doon u rarneyd Ganacsato Soomaaliyeed ayaa lasoo sheegayaa inay ku dagtay Xeebaha Badweynta Hindiya.

Doontaan oo ay ganacsato Soomaaliyeed kasoo rarteen Dekad ku taalka Wadanka Cummaan ayaa la sheegay inay Shalay ku dagtay Xeebaha Badweynta Hindiya.

Doontaan ayaa la sheegay inay usoo socotay Dekadda weyn ee ku taal Magaalada Boosaaso ee Puntland.

Doontaan oo laga leeyahay dalka Hindiya ayaa lagu sheegay magaceeda Cabdikariin, waxaana saarnaa illaa 10 qof oo shaqaale ka ahaa Doonta.

Dhammaan shaqaalihii saarnaa Doonta ayaa lasoo badbaadiyey, waxaana lagu guurdareystay in la badbaadiyo hantidii saarneyd doonto oo ay lahaayeen ganacsato Soomaaliyeed.

Doontaan ayaa waxaa saarnaa 950 Kun oo Tan oo isugu jiray Raashin iyo Bagaash, mana ahan markii ugu horeysay oo ay dagto Doon usoo socotay Boosaaso waxayna aheyd Bishii Agoosto markii laba doon oo kasoo baxay Imaaraadka Carabta ay dageen kuwaas oo kusoo wajahnaa Magaalada Boosaaso.

Halkaan hoose ka dhageyso wakiilkii Doontaas oo la hadlay VOA

Caasimada Online
Xafiiska Boosaaso
[email protected]

Bali (Caasimada Online) – Wasiirka Howlaha Guud, Dib u Dhiska iyo Guryeynta Soomaaliya Cabdi Aadan Hoosow oo booqasha rasmi ah ku tagay dalka Indonesia, wuxuuna la kulmay mas’uuliyiinta ugu sareysa dalkaasi.

Wasiirka oo ka qeyb galay shirka Indonesia-Africa Insfrastructure Dialogue 2019 ee ka dhacay magaalada Bali ayaa wuxuu ku guuleystay in mas’uuliyiinta dalkaasi oo ay ka mid yihiin Wasiirka Dhaqaalaha Enggartiasto Lukita in ay Soomaaliya ka taageeraan dhibka ka heysta maalgashadayaasha iyo ganacsatada Soomaaliyeed dhanka is dhaafsiga ganacsiga gaar ahaan kaabayaasha dhaqaalaha iyo bankiyada.

Indonesia waxay ballanqaaday in iskaashi dhaqanka ganacsiga iyo horumarinta ay la yeelato Soomaaliya ayadoo loo fududeynayo ganacsatada Soomaaliyeed howlahooda.

Wafdiga wasiir Hoosow ee ka socday Soomaaliya waxay ka mid yihiin afar wasiir oo ka socday Africa oo ka qeyb galay shirka: Wasiirka Ganacsiga iyo maalgashiga ee Tanzania Amina Saloum, Wasiirka Ganacsiga Jabuuti Xasan Xaamud, iyo ku xigeenka Raisul Wasaaraha sidoo kalena ah wasiirka arrimaha geeska afrika ee ee Uganda A. M Kirunda Kivejinja.

Indonesia waa dal muhiim u ah Soomaaliya iyo Afrikaba ayadoo ganacsigeeda ay la leedahay Soomaaliya kor u dhaafaysa malaayin gaar ahaan qalabka dhismaha, bagaashka iyo dharka.