Laascaanood (Caasimada Online) – Ciidamada Booliska ee Maamulka Waqooyi Bari ayaa gacanta ku dhigay shan nin oo loo haysto inay geysteen kufsi wadareed, halka nin lixaad oo lala xiriirinayo falkaasi uu weli baxsad yahay, sida ay sheegeen saraakiisha ammaanka.

Howlgalka lagu soo qabtay eedeysanayaasha ayaa yimid kadib baaritaanno ay sameeyeen laamaha ammaanka, kuwaas oo la xiriiray dhacdada kufsiga ah oo Laascaanood ka dhacday 23-kii bishan May, kadib markii kufsi wadareed loo gaystay gabar kasoo jeeda deegaanka.

“Ciidanka Booliska Dowlad Goboleedka Waqooyi Bari Soomaaliya, gaar ahaan Ciidanka Booliska Qaybta Gobolka Sool, iyagoo gudanaya waajibaadkooda shaqo ee ilaalinta ammaanka, badqabka bulshada iyo sugidda caddaaladda, ayaa ku guulaystay dabagal ay ku sameeyeen fal-danbiyeed kufsi ah oo ka dhacay magaalada Laascaanood taariikhdu markay ahayd 23 May 2026.

Howlgalkaasi kadib, Ciidanka Boolisku waxay gacanta ku soo dhigeen shan (5) eedaysane oo loo haysto kiiskaasi, halka hal eedaysane oo kale uu weli baxsad yahay, isla markaana ay ku raadjoogaan laamaha ammaanku,” ayaa lagu yiri warsaxaafadeedka.

Ragga lasoo qabtay ayaa kala ah;-  1-Maxamed Cabdi Ismaaciil Faarax Ina Farduus Xasan Saalax L/28 Jir Ah, 2-Sharmaake Cabdi Cali Cabdilaahi Ina Safiya Daahir Obsiiye L/22 Jir Ah, 3-Sahal Maxamed Cabdi Samatar Ina Deeqa Axmed Ducaale L/22 Jir Ah, 4-Axmed Cabdiqaadir Ashkir Ina Muxubo Jaamac Ciise L/24 Jir ah, 5-Cabdicasiis Jaamac Shire Ina Yurub Kaariye Bulaale L/21 Jir Ah iyo 6-Maqane Cabdiraxmaan Maxamed Muuse Warsame oo maqane ah.

Sidoo kale warsaxaafadeedka ayaa lagu caddeeyay in kiiskan ay dhibbane ka tahay muwaadinad reer Waqooyi Bari ah, sidoo kalena uu khuseeyaa ilaalinta sharciga iyo ammaanka guud ee Dowlad Goboleedka Waqooyi Bari Soomaaliya.

Booliska ayaa sidoo kale shaaca ka qaaday in baaritaanku si buuxda u socdo, isla markaana warbixin dhammaystiran ay wadaagi doono bulshada marka ay soo gebageboobaan baaritaannada socda.

“Eedaysanayaasha gacanta lagu hayo waxaa sida ugu dhakhsiyaha badan loogu gudbin doonaa hay’adaha garsoorka si loo marsiiyo habraaca sharciga waafaqsan,” ayaa mar kale lagu yiri qoraalka Booliska.

Ugu dambeyn, Ciidanka Boolisku ayaa bulshada u sheegay in uusan jirin war rasmi ah oo kasoo baxay hay’adaha ammaanka, kana horreeyay war-saxaafadeedkan, sidaas darteedna dhammaan wararka lagu faafiyey baraha bulshada ee la xiriira kiiskan ee aan kasoo bixin hay’adaha rasmiga ah ay yihiin warar aan xaqiiqo ku dhisnayn, kuwaas oo carqaladayn kara hannaanka caddaaladda iyo shaqada ay hayaan ciidamada ammaanku.

Muqdisho (Caasimada Online) – Dekedda weyn ee magaalada Muqdisho ayaa sanadihii u dambeeyay sameysay horumar muuqda oo dhinacyo badan leh, kadib markii maamulkeeda loo dhiibay Danjire Maxamed Cali Nuur (Ameeriko). Horumarkaasi wuxuu taabanayaa maamulka dekedda, adeegyada ganacsiga iyo qorshayaasha fog ee ballaarinta mustaqbalka.

Guulaha laga gaaray dekedda, gaar ahaan marka la eego qiimeynta Bangiga Adduunka iyo kooxda khubarada teknoolojiyadda ee S&P Global, oo sheegay in ay noqotay dekedda labaad ee ugu waxqabadka fiican dalalka Afrika ee Saxaraha ka hooseeya, waa guul weyn oo taariikhi ah, marka loo eego tartanka adag ee dekedaha gobolka sida Mombasa iyo Jabuuti. Warbixintu waxay sidoo kale muujisay in Dekedda Muqdisho ay gashay kaalinta 163aad ee 407 dekedood oo caalami ah.

Tan iyo markii uu maamulka la wareegay Danjire Maxamed Cali Nuur, waxaa mudnaanta koowaad la siiyay dib-u-habeynta hufnaanta shaqada iyo dhismaha kalsoonida shaqaalaha.

Dekedda Muqdisho waxay gaartay rikoor cusub oo taariikhi ah marka la eego xamuulka la maareeyay. Hal bil gudaheed ayay dekeddu maareysay 160,703 metric tonnes oo xamuul ah, taas oo noqotay waxqabadkii ugu sarreeyay ee taariikhda dekedda tan iyo markii la aasaasay.

Maamulka dekeddu wuxuu qaaday tallaabooyin waaweyn oo lagu dhiirrigelinayo ganacsiga caalamiga ah iyo kan maxalliga ah. Waxaa la ballaariyay, laguna soo kordhiyay, isticmaalka nidaamyada elektaroonigga ah ee lagula socdo xamuulka, taas oo yareysay waqtigii ay ganacsatadu ku qaadan jireen inay hantidooda kala baxaan dekedda.

Marka laga hadlayo dhinaca amniga, waxaa si weyn loo adkeeyay amniga gudaha dekedda iyo kan badda, iyadoo la kaashanayo ciidamada amniga iyo qalabka casriga ah ee lagu baaro kunteenarrada, taas oo dekedda ka dhigtay mid buuxisay shuruudaha badqabka caalamiga ah.

Adeegga shaqaalaha ayaa sidoo kale la horumariyay, waxaana la kordhiyay saacadaha shaqada dekedda si loo yareeyo ciriiriga maraakiibta, loona dardargeliyo dhoofinta iyo soo-dejinta.

Arrimaha bogaadinta mudan ee maareeyaha dekeddu ku soo kordhiyay waxaa ka mid ah nidaamka lagula dagaallamayo musuqmaasuqa, iyadoo la hubiyay in dakhliga dekeddu si toos ah ugu dhaco khasnadda dowladda. Waxaa sidoo kale kor loo qaaday xirfadda shaqaalaha dekedda si ay ula jaanqaadaan isbeddellada casriga ah ee dekedaha caalamiga ah.

Maareeyaha dekeddu wuxuu xoojiyay xiriirka iyo kormeerka shirkadda Al-Bayrak ee gacanta ku haysa maamulka iyo shaqada dekedda, si loo xaqiijiyo inay u adeegto danta guud ee dalka iyo ganacsatada Soomaaliyeed.

Si dekeddu u qaaddo culeyska ganacsi ee sii kordhaya, waxaa la qorsheeyay in lagu sameeyo dib-u-habeyn, gaar ahaan qodista iyo ballaarinta moolalka, si maraakiibta waaweyn ee xamuulka qaada ay si toos ah ugu soo xiran karaan. Sidoo kale, waxaa qorshaha ku jirta in la kordhiyo meelaha ay maraakiibtu ku soo xirtaan iyo goobaha lagu keydiyo kunteenarrada.

Qorshaha fog ee maamulka ayaa ah in Dekedda Muqdisho aysan noqon oo keliya mid u adeegta Soomaaliya, balse ay noqoto marin ganacsi oo ay isticmaali karaan waddamada deriska ah ee aan badda lahayn, sida Itoobiya.

Hoggaanka Danjire Maxamed Cali Nuur (Ameeriko) wuxuu dekedda u horseeday hufnaan maamul iyo kalsooni ganacsi. Isbeddellada maaliyadeed iyo kuwa amni waxay fure u noqdeen in Dekedda Muqdisho ay dakhli xooggan u soo xareyso Dowladda Federaalka, isla markaana ay door muhiim ah ka qaadato kobcinta dhaqaalaha qaranka.

Soomaaliya iyo Turkiga ayaa bilowgii sanadkan gaaray heshiis lagu horumarinayo mashaariic cusub oo dhanka kaabayaasha dhaqaalaha ah, kuwaas oo laga fulinayo Dekedda Muqdisho. Waxaa sidoo kale heshiiskaas qeyb ka ah hirgelinta deked ballaaran, iyadoo dabayaaqada sanadkan la rajeynayo in la bilaabo qorshaha fulinta heshiiska Turkiga iyo Soomaaliya. Heshiiska ayaa ujeeddadiisu tahay in lagu xoojiyo ganacsiga, laguna kordhiyo dakhliga dowladda, isla markaana kor loogu qaado hufnaanta marinka ugu weyn ee badda ee dalku leeyahay.

Abu Dubai (Caasimada Online) – Dowladda Isu Tegga Imaaraadka Carabta ayaa illaa iyo hadda ka hadlin tallaabada Somaliland ee ku aadan safaaradda ay sheegtay inay ka furineyso magaalada Qudus, si ay u xoojiso xiriirka kala dhexeeya maamulka Israa’iil.

Imaaraadka oo haatan xiriir wanaagsan la leh maamulka Hargeysa ayaan jawaab ka bixin tallaabadan oo ay si wayn uga soo horjeesteen dhammaan dalalka Carabta iyo kuwa Islaamka oo garab istaag u muujiyay madax banaanida dhuleed ee Jamhuuriyadda Federaalka Soomaaliya.

Arrintan ayaa muujineyso in Imaaraadka uu ka goos adeegayo tallaabada Somaliland, waxayna u muuqataa inuu ku xumeynayo Dowladda Federaalka oo horay xiriirkii ugu jartay, kadib markii ay ka baxday dhammaan heshiisyadii ay horay ula gashay.

Goor sii horreysay Jamhuuriyadda Carabta Masar, Boqortooyada Sacuudi Carabiya, Dowladda Qatar, Boqortooyada Hashimiyiinta ee Urdun, Jamhuuriyadda Turkiga, Jamhuuriyadda Islaamiga ah ee Pakistan, Jamhuuriyadda Indonesia, Jamhuuriyadda Jabuuti, Dowladda Falastiin, Saldanadda Cumaan, Jamhuuriyadda Suudaan, Jamhuuriyadda Yemen, Jamhuuriyadda Lubnaan iyo Jamhuuriyadda Islaamiga ah ee Mauritaaniya, oo bayaan wadajir ah soo saaray ayaa si adag u cambaareeyay tallaabada sharci darrada ah ee aan la aqbali karin ee ay qaaday Waqooyi galbeed ee ku saabsan furitaanka wax loogu yeeray safaarad ku taalla magaalada Qudus ee la haysto.

Bayaankan ayey dowladaha mar kale ku  xaqiijiyeen in tallaabooyinka noocaas ahi ay si cad ugu xadgudbayaan sharciga caalamiga ah iyo qaraarrada khuseeya ee caalamiga ah, isla markaana ay si toos ah u dhaawacayaan xaaladda sharci iyo mida taariikheed ee magaalada Qudus ee la haysto.

Waxaa kale oo ay ku celiyeen diidmadooda buuxda ee dhammaan tallaabooyinka hal dhinac ah ee lagu doonayo in sharciyad lagu siiyo qorshayaal iyo heshiisyo ka hor imanaya sharciga caalamiga ah iyo qaraarrada Qaramada Midoobay ee khuseeya.

Ugu dambeyn, 14-kan dal ayaa adkeeyey in bariga Qudus uu yahay dhul Falastiiniyiin ah oo la haysto tan iyo sanadkii 1967, isla markaana tallaabo kasta oo lagu doonayo in lagu beddelo xaaladdiisa sharci iyo taariikheed ay tahay waxba kama jiraan oo aan lahayn wax saameyn sharci ah.

Muqdisho (Caasimada Online) – Ra’iisul wasaarihii hore ee Soomaaliya, Xasan Cali Kahyre oo maanta ka hadlay shir jaraa’id oo ay mucaaradka ku qabteen Muqdisho ayaa digniin culus u diray taliyaha qaybta guud ee Booliska Gobolka Banaadir Macallin Mahdi oo maalmahan howlgal ka waday caasimada.

Khayre ayaa sheegay in Macallin Mahdi uu ka shaqeeyay in lasoo xir-xiro dhalinyaro cabiray fikirkooda, isla markaana uu u shaqeynayo Madaxweyne Xasan Sheekh oo uu tilmaamay inuu dhamaaday muddo xileedkiisa.

Ra’iisul wasaarihii hore ayaa sheegay in ay diyaarinayaan liiska saraakiisha ku howlan ku xadgudubka shacabka, ayna u gudbin doonaan caalamka.

“Booliska gobolka Banaadir oo uu hoggaamiy Macallin Mahdi ee dhalinarada soo xir-xiraayo waxaan leeyahay ka jooga, Golaha Mustaqbalka Soomaliyeed waxay go’aansadeen shaqana ka wadaan inaan sameyno liis dhammaystiran oo dadka Soomaaliyeed iyo dunidaba lala wadaagi doono saraakiisha dhalinyarada Soomaaliyeed beegsata,” ayuu yiri Xasan Cali Khayre.

Sidoo kale, wuxuu ka digay howlgalka ciidamada ee habeennadii lagu beegsado guryaha dadka shacabka ah, isaga oo tilmaamay in dad badan lagu dhibaateeyay, sida uu hadalka u dhigay.

“Waan ka digeynaa dhaqanka soo kordhay ee dadka Saq dhexe Guryahooda loogu dhacayo iyadoo lagu gambanayo baaritaan, Maxaa 4-sano Baaritaan loo sameyn waayey?” ayuu mar kale yiri Mudane Xasan Cali Khayre.

Musharraxa oo hadalkiisa sii wata ayaa sii raaciyay  “Dowladdu ma awoodo shacabka Soomaaliyeed oo dhan inay xirto dhalinyaradu waa inay dhiiranaaan muujiyaan ogow xuquuqdaada adiga oo fadhiyo kuu imaan mayso”.

Si kastaba, Mucaaradka ayaa maalmahan ku doodayay in Xasan uu sharci darro ku joogo Villa Somalia, isla markaana uu yahay Madaxweyne hore oo lamid ah madaxdii dalka soo martay, sida ay hadalka u dhigeen.

Soomaaliya ayaa haatan ku jirto marxalad xasaasi ah, iyadoo weli la’isku hayo hannaanka doorashooyinka iyo wax ka beddelka dastuutka kumeel gaarka ah.

Muqdisho (Caasimada Online) – Warsaxaafadeed kasoo baxay Wasaaradda Arrimaha Dibadda Soomaaliya ayaa si weyn loogu dhaweeyay bayaankii wadajirka ahaa ee kasoo baxay wasiirada arrimaha dibadda 14 dal oo ka mid ah dalalka Islaamka, kuwaasi oo si adag uga horyimid qorshaha ay Somaliland ku dooneyso inay safaarad kaga furato magaalada Qudus, si ay u xoojiso xiriirkeeda Israa’iil.

Dowladda Federaalka ayaa si cad u sheegtay in aysan aqbali doonin tallaabooyinka gurracan ee labada dhinac, waxayna soo dhaweysay go’aanka ay gaareen wasiirrada carbeed oo si xooggan u cambaareeyay tallaabada sharci darrada ah ee aan la aqbali karin ee ay qaaday xukuumadda Hargeysa.

“Wasaaraddu waxay si gaar ah u soo dhoweynaysaa adkeynta cad ee Wasiirradu ku muujiyeen taageeradooda buuxda ee midnimada, madaxbannaanida, iyo wadajirka dhuleed ee Jamhuuriyadda Federaalka Soomaaliya, iyo sidoo kale diidmadooda aan mugdi ku jirin ee tallaabo kasta oo hal dhinac ah oo wiiqaysa midnimada dhulka Soomaaliya ama ku xadgudbaysa madaxbannaanideeda,” ayaa lagu yiri bayaanka.

Hoos ka akhriso warsaxaafadeedka oo dhammaystiran;-

Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya waxay soo dhoweynaysaa bayaanka wadajirka ah ee ay soo saareen Wasiirrada Arrimaha Dibadda ee Jamhuuriyadda Carabta Masar, Boqortooyada Sacuudi Carabiya, Dowladda Qatar, Boqortooyada Hashimiyiinta ee Urdun, Jamhuuriyadda Turkiga, Jamhuuriyadda Islaamiga ah ee Pakistan, Jamhuuriyadda Indonesia, Jamhuuriyadda Jabuuti, Dowladda Falastiin, Saldanadda Cumaan, Jamhuuriyadda Suudaan, Jamhuuriyadda Yemen, Jamhuuriyadda Lubnaan iyo Jamhuuriyadda Islaamiga ah ee Mauritaaniya, kaas oo si adag loogu cambaareeyay tallaabada sharci darrada ah ee aan la aqbali karin ee ay qaaday Waqooyi galbeed ee ku saabsan furitaanka wax loogu yeeray safaarad ku taalla magaalada Qudus ee la haysto.

Bayaanku ayeey Dowladaha mar kale ku  xaqiijiyeen in tallaabooyinka noocaas ahi ay si cad ugu xadgudbayaan sharciga caalamiga ah iyo qaraarrada khuseeya ee caalamiga ah, isla markaana ay si toos ah u dhaawacayaan xaaladda sharci iyo mida taariikheed ee magaalada Qudus ee la haysto.

Wasiirradu waxay sidoo kale ku celiyeen diidmadooda buuxda ee dhammaan tallaabooyinka hal dhinac ah ee lagu doonayo in sharciyad lagu siiyo qorshayaal iyo heshiisyo ka hor imanaya sharciga caalamiga ah iyo qaraarrada Qaramada Midoobay ee khuseeya.

Waxay carrabka ku adkeeyeen in Bariga Qudus uu yahay dhul Falastiiniyiin ah oo la haysto tan iyo sanadkii 1967, isla markaana tallaabo kasta oo lagu doonayo in lagu beddelo xaaladdiisa sharci iyo taariikheed ay tahay waxba kama jiraan oo aan lahayn wax saameyn sharci ah.

Wasaaraddu waxay si gaar ah u soo dhoweynaysaa adkeynta cad ee Wasiirradu ku muujiyeen taageeradooda buuxda ee midnimada, madaxbannaanida, iyo wadajirka dhuleed ee Jamhuuriyadda Federaalka Soomaaliya, iyo sidoo kale diidmadooda aan mugdi ku jirin ee tallaabo kasta oo hal dhinac ah oo wiiqaysa midnimada dhulka Soomaaliya ama ku xadgudbaysa madaxbannaanideeda.

Muqdisho (Caasimada Online) – Madaxweynihii hore ee dowladdii KMG ka ahayd, Sheekh Shariif Sheekh Axmed oo maanta ka hadlay shir jaraa’id oo ay mucaaradka ku qabteenMuqdisho ayaa ka hadlay qorshaha Villa Soomaaliya ee ku aadan maamul-goboleedyada dalka ee uu waqtigoodu dhammaaday.

Shariif ayaa ku eedeeyay Madaxweyne Xasan Sheekh Maxamuud inuu awood ku maquuninayo madaxda dowlad-goboleedyada, si uu meesha uga saaro, kadibna iskuugu ballaariyo si sharci darro ah.

Madaxweynihii hore ee dalka ayaa tusaale usoo qaatay wixii ka dhacay magaalada Baydhabo, isaga oo sheegay in hadda arrintu ku socoto Galmudug, maadaama ay kasoo cusboonaadeen xiisado siyaasadeed oo horleh.

“Xasan sheekh Maamul-goboleedyadii markuu sharci daro ku haayay dhowr sano kadib ayuu leeyahay mid kasta meesha ka tag ama xabad aan kuu qaadanaa,” ayuu yiri Sheekh Shariif Sheekh Axmed.

Sidoo kale wuxuu sii raaciyay “Waad ogtihiin waxa ka dhacay Baydhabo, Galmudug hadda waxa ka socda waad ogtihiin HirShabelle waxa ka socdo waad ogthiin wax cad waayay”.

Dhinaca kale, waxa uu digniin u diray ciidamada qalabka sida oo uu ku eedeeyay in loo adeegsanayo siyaasad iyo in lagu gaar dano gaar ah, sida uu hadalka u dhigay.

“Ciidankii la rabay inay amni sugaan ma sugaanee waxay ka shaqeeyaan in dadka lagu caburiyo, gaar ahaan siyaasiyiinta,” ayuu markale yiri Shariif.

Hadalkan ayaa kusoo aadayo, iyada oo Madaxtooyada Soomaaliya ay haatan go’aansatay in musharaxeeda hoggaanka Galmudug uu noqdo siyaasi Liibaan Axmed Xasan (Shuluq). Sida ay ogaatay Caasimada Online, xaflad lagu shaacinayo taageerada Liibaan ayaa la qorsheynayaa in lagu qabto xarunta xisbiga Cadaaladda iyo Wadajirka (JSP) ee uu hoggaamiyo Madaxweyne Xasan Sheekh Maxamuud.

Si kastaba, Arrimahan ayaa kusoo aadaya xilli ay sare u sii kacayaan loollanka iyo is-xulafeysiga siyaasadeed ee la xiriira doorashooyinka maamul-goboleedka Galmudug, iyadoo dhinacyada siyaasadda gobolka ay bilaabeen dhaq-dhaqaaqyo lagu xoojinayo saameyntooda siyaasadeed.

Muqdisho (Caasimada Online) – Madaxweynaha Soomaaliya, Mudane Xasan Sheekh Maxamuud ayaa xarunta madaxtooyada ku qaabilay waxgaradka beesha Murasade ee ka tirsan beelweynta Hawiye.

Xubnahaasi oo isugu jiray xildhibaano, hoggaamiye dhaqameed, waxgarad, ganacsato iyo qeybaha bulshada ayaa waxaa hoggaaminayay wasiirka Wasiirka Cadaalada iyo Dastuurka Xasan Macalin.

Kulankan dhex-maray Madaxweyne Xasan Sheekh Maxamuud iyo hoggaanka dhaqameedka, waxgaradka, iyo ganasatada beesha Murusade ayaa ahaa mid xambaarsan miisaan siyaasadeed iyo mid amni oo wax ka qabanaya xaalada amni ee magaalada Muqdisho.

Ujeedada kulanka ayaa ahaa sidii looga wada qeyb qaadan lahaa xoojinta amniga caasimada iyo ku taageerida dawladda iyo laamaha amniga, maadaama beesha Murusade saameyn ku leedahay degmooyinka Dayniile iyo agagaarkeeda.

Waxay xubnaha kulanka ka qeyb-galay iyo madaxweynaha isla garteen muhimada amniga caasimada iyo in si wada jir ah looga wada shaqeeyo xoojintiisa.

Waxgaradka, odayaasha iyo xildhibaanada beesha Murusade waxay uga mahad celiyeen madaxweynaha iyo dowladdiisa doorkii ka qeybgalka munaasabada lagu duubayay Ugaaska Guud ee Beesha Murusade iyo garab-isgtaagii agabkii ay dowladda ku bixisay in munaasabadaas ay u dhacdo si nabad iyo deganaan leh.

Madaxwyenaha ayaa sidoo kale u mahad celiyay  waxgaradka beesha iyo qeybaha bulshada, isagoo sheegay in Madaxweynuhu inuu ogsoonyahay in nabadgelyada caasimadda aysan ku filnayn kaliya ciidanka dowladda, balse ay u baahantahay kalsoonida iyo xog-wadaagga dadka deegaanka.

Madaxweynaha yaa sheegay in kulankan uu xoojinayo in bulshada iyo odayaashu ay noqdaan indhaha iyo dhegaha laamaha amniga si looga hortago falalka nabad-diidka ah.

Kulankani ma ahayn oo kaliya is-arag, balse wuxuu xambaarsanaa is-afgarad istiraatiiji ah oo dowladda ay ku heshay taageerada mid ka mid ah beelaha ugu saameynta badan caasimadda si loo xaqiijiyo amniga iyo xasilloonida, halka beeshuna ay heshay aqoonsi iyo qaddarin heerkeedu sarreeyo oo ku aaddan hoggaankooda dhaqanka iyo doorkooda horumarineed.

Degmada Dayniile ayaa xudun u aheyd mudooyinkii u danbeeyay rabshado iyo dibadbaxyo looga soo horjeeday mashruuca guryo burburinta iyo goobaha danta guud ee shacabka deganaayeen, waxaana dibadbaxyadaasi ka faa’iideystay kooxaha mucaaradka oo u arkay fursad ay kaga faa’iideystaan danahooda.

Muqdisho (Caasimada Online) – Dowladda Federaalka Soomaaliya ayaa si ku-meel-gaar ah u hakisay in dalka Masar loogu safro oggolaanshaha safarka ee loo yaqaan (OK-to-Board).

War-saxaafadeed kasoo baxay hay’adda socdaalka iyo jinsiyadda ayaa lagu sheegay in dowladda ay si dhow ula socotay xaaladda muwaadiniinta Soomaaliyeed ee u safrayay dalka Masar, kuwaas oo caqabado kala kulmay ka bixitaanka garoomada diyaaradaha, taas oo sababtay go’aankan cusub.

Hay’adda Socdaalka iyo Jinsiyadda ayaa shaacisay in laga bilaabo maanta oo ay taariikhdu tahay 24-ka May 2026, si ku-meel-gaar ah loo joojiyay adeegsiga warqadda OK-to-Board ee hore loogu geli jiray safarrada dalka Masar.

Sidoo kale, hay’adda ayaa caddeysay in muwaadiniinta Soomaaliyeed ee doonaya inay u safraan Jamhuuriyadda Carbeed ee Masar hadda kadib looga baahan yahay dal-ku-gal rasmi ah oo ay bixiso qunsuliyadda Masar, iyadoo meesha laga saaray nidaamkii hore ee oggolaanshaha safarka.

Qoraalka kasoo baxay hay’adda ayaa lagu xusay in go’aankan uu yahay mid lagu xallinayo caqabadaha joogtada noqday ee ay wajahayeen rakaabka Soomaaliyeed, gaar ahaan kuwa lagu celin jiray ama lagu xanibi jiray garoomada diyaaradaha ee dalka Masar.

Hay’adda Socdaalka iyo Jinsiyadda ayaa sidoo kale sheegtay inay sii wadeyso wada-shaqeynta iyo xiriirka kala dhexeeya dowladda Masar, si loo helo hannaan fudud oo sharciyeysan oo ay muwaadiniinta Soomaaliyeed ugu safri karaan dalkaas.

Dowladda Soomaaliya ayaa muwaadiniinta ugu baaqday inay si taxaddar leh ula socdaan wargelinnada rasmiga ah ee la xiriira safarrada dibadda, isla markaana aysan adeegsan waddooyin ama dokumentiyo aan waafaqsaneyn shuruudaha cusub ee la dejiyay.

Ugu dambeyntiina, hay’adda socdaalka ayaa xoojisay muhiimadda xiriirka saaxiibtinimo iyo iskaashiga labada dowladood ee Soomaaliya iyo Masar, iyadoo muujisay in tallaabooyinkan ay yihiin kuwo lagu ilaalinayo badqabka iyo xuquuqda muwaadiniinta Soomaaliyeed ee u safraya dalkaas.

Muqdisho (Caasimada Online) – Guddoomiyaha Gobolka Banaadir ahna Duqa Magaalada Muqdisho Mudane Xasan Maxamed Xuseen (Muungaab) ayaa maanta booqasho shaqo ku tagay xerada tababarka ciidamada ee TurkSom, halkaas oo lagu carbiyo Ciidamada Xoogga Dalka Soomaaliyeed.

Muungaab ayaa kulan gaar ah la qaatay saraakiisha iyo mas’uuliyiinta xerada, iyaga oo ka wada-hadlay xoojinta wada-shaqeynta dhinacyada amniga, sare-u-qaadidda xasilloonida Caasimadda Muqdisho iyo doorka TurkSom ee dadaallada lagu sugayo nabadgalyada Magaalada.

Sidoo kale, Duqa Muqdisho ayaa saraakiisha xerada TurkSom ka dhagaystay warbixinno la xiriira amniga, gaar ahaan hawlaha tababarrada ciidamada, dib-u-dhiska iyo tayeynta ciidamada qalabka sida ee Soomaaliyeed iyo dadaallada lagu taageerayo xasilloonida Caasimadda Muqdisho.

Saraakiisha ayaa tilmaamay inay ka go’an tahay sii xoojinta wada-shaqeynta kala dhexeysa Maamulka Gobolka Banaadir, si loo xaqiijiyo amni waara iyo adeegyo wax-ku-ool ah oo shacabka loo fidiyo.

Guddoomiyaha Maamulka Gobolka Banaadir iyo mas’uuliyiinta TurkSom ayaa sidoo kale ka wada hadlay qorshayaasha la xiriira taageerada iyo gargaarka shacabka danyarta ah inta lagu guda jiro munaasabadda barakeysan ee Ciidul Adxaa (Eid Al-Adha), ee nagu soo fool leh, iyada oo xoogga la saarayo garab istaagga bulshada nugul iyo xoojinta isku xirnaanta hay’adaha dowladda iyo dadweynaha.

Booqashada Guddoomiyaha Maamulka Gobolka Banaadir ahna Duqa Muqdisho Dr. Xasan Maxamed Xuseen (Muungaab), ee xerada TurkSom ayaa qayb ka ah dadaallada joogtada ah ee lagu xoojinayo wada-shaqeynta hay’adaha dowladda iyo laamaha amniga, si loo sii joogteeyo nabadda, horumarka iyo adeegyada bulshada ee Caasimadda Muqdisho.

TurkSom ayaa ah xero milatari oo uu gacanta ku haya Turkiga, waxaana inta badan lagu tababaraa ciidamada qalabka sida, iyada oo xeradaan ay soo saartay cutubyo badan oo hadda ka tirsan ciidanka Gorgor ee Xoogga Dalka.

Muqdisho (Caasimada Online) – Madaxweynihii hore ee maamulka HirShabelle, Cali Cosoble ayaa weerar ku qaaday Senator Cabdi Xasan Cawaale (Qeybdiid) oo ka tirsan Golaha Aqalka Sare oo shalay hanjabaad u direy Madaxweynaha Soomaaliya, Xasan Sheekh Maxamuud.

Qeybdiid oo ku jira safka mucaaradka dowladda ayaa madaxweynaha ugu hanjabay in uusan laheyn sharciyad, ayna ka hortagi doonaan tallaabo kasta oo xagooda ay usoo qaado dowladda, xilli 4-ta June loo ballansan yahay dibadbax uu qabanayo mucaaradka.

“Madaxweynuhu mas’uul kama dalka marbuu ka ahaa maanta talo ayuu leeyahay muddo afar sano ah ayaa la siiyay waa dhamaatay inuu odey Soomaaliyed noqdo ayaa waajib ku ah,” ayuu yiri Senator Qeybdiid.

Madaxweynihii hore ee HirShabelle ayaa weerar afka ah ku qaaday Senator Qeybdiid, isagoo si kulul uga hadlay doorka uu ku leeyahay colaadaha iyo dagaalladii Soomaaliya soo maray.

Cosoble ayaa sheegay in Qeybdiid uu inta badan ku lug lahaa dagaallo fashil ku soo dhammaaday, isaga oo su’aal geliyay waxa uu ka dhaxlay colaadaha muddada dheer soo socday.

“Jen. Cabdi Qeybdiid ma wuxuu cimrigiisa ku dhameysan doonaa dagaal sida raggii kheyrkii ahaa? Ma jiraa hal dagaal oo uu galay oo uu maanta ku faraxsan yahay?,” ayuu yiri Cosoble oo daba socda hanjabaada Senator-ka.

Madaxweynihii hore ee HirShabelle ayaa intaas kusii daray “Kolley Jeneral iyo Senator dhaafi maayee maa masaajidka galo oo tusbax qaato oo Ilahey u towbad keeno? Sow talo walaal ma aanan siin.”

Soomaaliya ayaa haatan ku jirto marxalad xasaasi ah, iyadoo weli la isku hayo hannaanka doorashooyinka iyo wax ka beddelka dastuurka, kaas oo dowladda sheegtay inuu dhaqangal yahay.

Si kastaba, mucaaradka ayaa maalmahan ku doodayay in Xasan Sheekh uu sharci darro ku joogo Villa Somalia, isla markaana uu yahay Madaxweyne hore oo lamid ah madaxdii dalka soo martay, sida ay hadalka u dhigeen.

Muqdisho (Caasimada Online) – Ciidamada gaarka ah ee madaxtooyadda Soomaaliya ayaa saakay waaberigii howlgal aan horay looga baran ka fuliyay xaafadaha xeyndaabka ee qasriga madaxtooyada.

Howlgalkaan oo bilowday saakay afartii subaxnimo, socdayna ilaa waaberigii saakay ayey ciidamadu guri guri ku galayeen iyadoo dadka laga soo saarayay guryaha, lana weydiinayay aqoonsiyadooda iyo tixraaca shaqsiyadeed.

Dhalinyaro isugu jirta da’walba ayaa howlgalkaasi lagu qabqabtay, iyadoo markii danbe lagu sii daayay dhalinyaradaasi markii baaris iyo hubin lagu sameeyay.

Howlgalkaan ayaa kusoo beegmay xili isbadal lagu sameeyay habraacyada amaanka madaxtooyada, sidoo kale laga mamnuucay wadada hormarta in ay maraan ilaalada ku labisan dharka milateriga iyo gaadiidka dagaalka.

Sidoo kale, waxaa la kordhiyay baaritaannada iyo hubinta gaadiidka iyo dadka galaya ama maraya agagaarka madaxtooyada si looga hortago wax kasta oo keeni kara isku dhacyo amni.

Habraacyadaan cusub waxay inta badan qeexayaan in ciidamada gaarka ah ee koofiyad gaduudka ay qaataan mas’uuliyadda koowaad ee aaggaas, iyadoo la yareynayo isku dhex yaaca ciidamada kala duwan.

Ilaalada xiran dharka milateriga, qaasatan kuwa aan ka tirsanayn kuwa madaxtooyada iyo gaadiidka tiknikada ah ee laga mamnuuco wadada madaxtooyada waxay caawineysaa in la ogaado cida soo galaysa aaga madaxtooyada.

Isbedeladan ayaa kusoo beegmay xili xiisada siyaasadeed ee magaalada Muqdisho ka taagan ee mucaaradka iyo dowladda ay korortay, iyadoo kooxaha mucaaradka ay ku baaqeen dibadbax weyn oo looga soo horjeedo siyaasadda dowladda ee madaxweyne Xasan Sheekh.

Washington (Caasimada Online) – Ciidamada ilaalada madaxda (Secret Service) ee Mareykanka ayaa toogasho ku dilay nin hubeysan oo rasaas ka furay meel u dhow Aqalka Cad fiidnimadii Sabtida, xilli Madaxweyne Donald Trump uu ku sugnaa gudaha xarunta madaxtooyada.

Trump wax dhaawac ah kama soo gaarin dhacdada, sida uu sheegay Anthony Guglielmi, oo ah madaxa xiriirka ee Secret Service.

Iska horimaadka ayaa dhacay wax yar kadib 6:00 maqribnimo, waqtiga Washington, markii nin ku sugnaa meel u dhow xeyndaabka amniga ee Aqalka Cad uu “hub kala soo baxay boorso uu watay, kadibna uu bilaabay inuu rasaas furo,” sida ay sheegeen saraakiisha amniga.

Ciidamada Secret Service ayaa rasaas ku jawaabay, waxayna toogteen ninka hubeysnaa, kaas oo markii dambe loo qaaday isbitaal, halkaas oo lagu xaqiijiyay inuu ku geeriyooday.

Hal qof oo rayid ah ayaa sidoo kale ku dhaawacmay rasaasta intii ay dhacdadu socotay. Lama faahfaahin xaaladda qofkaas, mana jirin askar ka tirsan Secret Service oo wax ku noqday weerarka.

Trump ayaa qoraal uu soo dhigay baraha bulshada ku sheegay in ninka hubeysnaa uu lahaa “taariikh rabshado” iyo “ku waalasho suurtagal ah” oo la xiriirta Aqalka Cad.

Booliska iyo ciidamada ammaanka ayaa si degdeg ah u buuxiyay goobta, iyagoo xiray waddooyinka iyo marinnada u dhow Aqalka Cad.

Dalxiise Canadian ah oo lagu magacaabo Reid Adrian ayaa sheegay inuu maqlay rasaas badan oo uu markii hore mooday dhawaqyada dabbaal-degga.

“Waxaan maqalnay qiyaastii 20 ilaa 25 dhawaq oo u ekaa dabbaal-deg, balse waxay ahaayeen rasaas, kadibna qof walba wuu cararay,” ayuu yiri.

Saxafiyiin ku sugnaa barxadda waqooyi ee Aqalka Cad ayaa sheegay in lagu amray inay ordaan oo ay gabaad ka dhigtaan qolka shirarka jaraa’id.

Weriyaha ABC News Selina Wang ayaa duubeysay muuqaal loogu talagalay baraha bulshada markii rasaastu bilaabatay, iyadoo codka rasaasta laga maqlay muuqaalka ka hor inta aysan dhulka isku tuurin.

“Waxay u ekeyd tobanaan xabbadood oo rasaas ah,” ayay ku qortay X.

Dhacdadan ayaa kusoo aadeysa xilli ammaanka Trump uu si weyn diiradda u saaran yahay, kadib dhowr isku day oo la sheegay in lagu doonayay in lagu dilo.

Trump, oo 79 jir ah, ayaa bishii July 2024 lagu beegsaday isku soo bax olole oo ka dhacay Butler, Pennsylvania, halkaas oo nin hubeysan uu dilay qof ka mid ahaa dadkii goobta joogay, isla markaana uu Trump dhaawac fudud ka gaarsiiyay dhegta.

Dhowr bilood kadib, nin kale oo hubeysan ayaa lagu qabtay garoon golf oo ku yaalla West Palm Beach, Florida, xilli Trump uu halkaas ku ciyaarayay.

Bishii April ee sanadkan, nin hubeysan ayaa sidoo kale weeraray bar koontarool oo ku taallay hotel uu Trump uga qeybgalayay munaasabad warbaahineed, balse ninkaasi uma dhowaan madaxweynaha ama martidii kale ee munaasabadda.

“Allah ayaa mahad leh in Madaxweyne Trump uu badqabo,” ayay xubno ka tirsan Jamhuuriyiinta Aqalka Wakiillada ku qoreen X.

Waxay sidoo kale u mahadceliyeen Secret Service, iyagoo sheegay in jawaabtoodu ahayd mid degdeg ah oo geesinimo leh.

“Rabshadaha siyaasadeed waa inay istaagaan,” ayay ku dareen.

Baydhabo (Caasimada Online) – Dowladda Federaalka Soomaaliya ayaa isbeddel ku sameysay hoggaanka Taliska Qeybta 60-aad ee Ciidanka Xoogga Dalka Soomaaliyeed, oo ka howl-gala deegaannada maamulka Koonfur Galbeed, xilli maamulka uu wajahayo xaalado amni oo cakiran.

Munaasabad ka dhacday magaalada Baydhabo ayaa waxaa xilka kula wareegay taliyaha cusub ee qeybta 60-aad, Korneel Isaaq Bardaale, kaas oo beddelaya taliyihii hore ee qeybtaasi. Munaasabadda xil wareejinta waxaa goobjoog ka ahaa saraakiil sare oo ka tirsan ciidamada dowladda iyo mas’uuliyiin kale.

Taliye ku-xigeenka ciidanka dhulka ee xoogga dalka, Jeneraal Cabdullaahi Xuseen Ciro oo si rasmi ah u guddoomiyay munaasabadda ayaa faray taliyaha cusub inuu dardar-geliyo howl-gallada milatari ee ka socda deegaannada Koonfur Galbeed.

Jeneraal Ciro ayaa sheegay in dowladda federaalka ay ka go’an tahay xoojinta dagaalka ka dhanka ah Al-Shabaab, isaga oo tilmaamay in taliska cusub laga sugayo inuu sare u qaado wada-shaqeynta ciidamada iyo sugidda amniga guud ee gobolka.

Sidoo kale, wuxuu carrabka ku adkeeyay muhiimadda ay leedahay in ciidamada qeybta 60-aad ay sii laba jibbaaraan howl-gallada lagu ciribtirayo Al-Shabaab, kuwaas oo muddooyinkii dambe dhaq-dhaqaaqyo ka waday qaybo ka mid ah gobollada Baay iyo Bakool.

Magacaabista Korneel Isaaq Bardaale ayaa ku soo aadeysa xilli deegaanno hoostaga magaalada Baydhabo ay maalmihii la soo dhaafay ka dhaceen dagaallo culus oo sababay khasaare isugu jira dhimasho iyo dhaawac.

Dagaalladaasi ayaa la sheegay inay ku lug lahaayeen dagaalyahanno ka tirsan kooxda Al-Shabaab iyo xubno ka tirsanaa maamulkii hore ee madaxweynaha Koonfur Galbeed, Cabdicasiis Lafta-gareen, inkastoo aan weli si rasmi ah loo faahfaahin khasaaraha rasmiga ah ee ka dhashay iska horimaadyadaasi.

Wararka la helayo ayaa sheegaya in dagaalladaasi lagu dilay saraakiil iyo askar ka tirsan ciidanka xoogga dalka, halka sidoo kale ay jiraan dhaawacyo soo gaaray ciidamada dowladda, xilli dowladda federaalka ay waddo qorshe lagu xoojinayo amniga iyo howl-gallada ka socda Koonfur Galbeed.

Dowladda Federaalka oo haatan gacanta ku haysa maamulka ayaa rabta inay qabato doorashada hoggaanka maamulka Koonfur Galbeed, si ay maamulkaasi u geysato hoggaan taabacsan, kaas oo la rumeysan inuu yahay musharax Aadan Madoobe, oo dhawaan shaaciyay inuu ka sharaxan yahay xisbiga JSP ee uu hoggaamiyo Madaxweyne Xasan Sheekh Maxamuud.

Garoowe (Caasimada Online) – Maamulka Puntland ayaa xabsiga dhigay sarkaal ka tirsan ciidamada Daraawiishta Puntland, kadib markii uu warbaahinta ka sheegay cabashooyin la xiriira mushaar la’aan iyo xaalado adag oo ay wajahayaan ciidamada ku sugan magaalada Garoowe.

Sarkaalkan oo lagu magacaabo Gaashaanle Cabdiraxmaan Cabdirisaaq Wayrax ayaa maalmo kahor si fagaare ah uga hadlay duruufaha nololeed iyo caafimaad ee haysta ciidamada Daraawiishta, gaar ahaan kuwa ku sugan xerada 54-aad ee magaalada Garoowe.

Gaashaanle Wayrax ayaa sheegay in ciidamada qaarkood aysan wax mushaar ah qaadan muddo gaareysa 24 bilood, taas oo uu ku tilmaamay xaalad si weyn u saameysay nolosha, caafimaadka iyo niyadda ciidamada Puntland.

Sarkaalkan ayaa sidoo kale shaaca ka qaaday in saraakiil ka tirsan ciidamada Daraawiishta ay dhawaan ugu geeriyoodeen magaalada Garoowe xaalado caafimaad darro, kadib markii, laga saaray isbitaallada sababo la xiriira dhaqaale la’aan iyo awood darro ay ku bixiyaan qarashaadka caafimaadka, sida uu sheegay.

Qoyska Gaashaanle Wayrax ayaa warbaahinta u sheegay in shalay barqadii looga yeeray taliska xerada 54-aad, isla markaana markii uu halkaas gaaray lagu wargeliyay inuu xiran yahay. Waxay sheegeen in hadda lagu hayo xabsi ku dhex yaalla xeradaasi.

Saraakiil ku dhow dhow sarkaalkan la xiray ayaa dhankooda u sheegay Caasimada Online in amarka xarigga uu ka yimid madaxtooyada Puntland, inkastoo aysan jirin wax war rasmi ah oo arrintan kasoo saareen laamaha ammaanka ama madaxtooyada.

Xarigga Gaashaanle Wayrax ayaa si weyn looga hadal hayaa gudaha Puntland, iyadoo dad badan ay ku tilmaameen tallaabadaasi mid lagu caburinayo cabashooyinka ciidamada ee ku saabsan mushaar la’aanta iyo adeegyada aas-aasiga ah ee ay waayeen.

Arrintan ayaa kusoo aadeysa xilli ay sii kordhayaan cabashooyinka ka imaanaya qaar kamid ah ciidamada Puntland, kuwaas oo muddooyinkii dambe ka hadlayay dib u dhac ku yimid mushaarka, xaalado nololeed oo adag iyo adeeg caafimaad oo liita.

Gaalkacyo (Caasimada Online) – Iyada oo xaalad siyaasadeed oo cakiran ay ka taagan tahay Galmudug, ayaa waxaa isa soo taraya digniinaha laga bixinayo in xaaladdu faraha ka baxdo, isla markaana isku beddesho gacan ka hadal.

Senator Cabdi Xasan Cawaale Qaybdiid, oo ka tirsan Golaha Aqalka Sare, kana soo jeeda Galmudug, ayaa isaga oo ku sugan magaalada Gaalkacyo ka digay faragelin uu sheegay in dowladda federaalka ay ku hayso arrimaha doorashooyinka Galmudug, xilli lagu jiro marxalad siyaasadeed oo xasaasi ah.

Qaybdiid, oo ka mid ah siyaasiyiinta mucaaradka, ayaa sheegay in Galmudug aysan ahayn Koonfur Galbeed oo kale, isla markaana aan lagu muquunin karin xoog, sida uu hadalka u dhigay.

“Galmudug ma aha Koonfur Galbeed oo kale. Lama xoogi karo. Annagu wax aysan reer Galmudug doonayn naguma socon karaan,” ayuu yiri senatorku.

Sidoo kale, wuxuu ka horyimid qorshaha dowladda federaalka ee ku aaddan qabashada doorashooyin qof iyo cod ah oo ka dhaca deegaannada Galmudug.

“Waa cudur qof iyo cod aan heshiis lagu ahayn oo qof wato. Waa waxa dalka meelo badan dhibaato ka abuuray, waana ka soo horjeednaa,” ayuu raaciyay.

Dhanka kale, Qaybdiid ayaa weerar afka ah ku qaaday Madaxweyne Xasan Sheekh Maxamuud, isaga oo sheegay in muddadii xilka loo doortay ay dhammaatay, loogana baahan yahay inuu talada miiska soo saaro si looga heshiiyo doorashada.

“Madaxweynuhu mas’uul ayuu dalka ka ahaa, talana maanta wuu leeyahay. Muddo afar sano ah ayaa la siiyay, waana dhammaatay. Waxaa waajib ku ah inuu noqdo oday Soomaaliyeed,” ayuu mar kale yiri senatorku.

Si kastaba, mucaaradka ayaa maalmahan ku doodayay in Madaxweyne Xasan Sheekh uu si sharci darro ah ku joogo Villa Somalia, isla markaana uu yahay madaxweyne hore oo la mid ah madaxdii dalka soo martay, sida ay hadalka u dhigeen.

Sanca (Caasimada Online) – Mahdi al-Mashat, oo ah madaxa Golaha Sare ee Siyaasadda ee Xuutiyiinta, fadhigiisuna yahay magaalada Sanca ee dalka Yemen, ayaa dhaleeceeyay tallaabooyinka ay Somaliland ugu dhaqaaqday xiriirka Israel, isaga oo ku tilmaamay “qalad halis ah” oo aan la aqbali karin, khatarna ku ah Yemen iyo xasilloonida gobolka.

Hadalka al-Mashat ayaa ku soo beegmay xilli Somaliland ay soo dhoweysay magacaabista ergayga Israel u qaabilsan Hargeysa, halka Somaliland-na ay sheegtay inay safaarad ka furaneyso magaalada Qudus, oo ay Muslimiintu u yaqaannaan Baytul Maqdis, isla markaana ah goob barakaysan oo ku taalla dhulka Falastiin ee la haysto.

Al-Mashat ayaa sidoo kale ka digay weerar kasta oo cusub oo Mareykanka ama Israel ay ku qaadaan Yemen iyo gobolka intiisa kale, isaga oo sheegay in Sanca ay diyaar u tahay inay ka jawaabto waxa uu ugu yeeray gardarro cusub.

Wuxuu sheegay in ciidamada Xuutiyiinta ay diyaar u yihiin inay sii wadaan dagaalka illaa laga xoreynayo “meesha ugu dambeysa” ee dhulka Yemen, isaga oo mar kale xaqiijiyay taageerada Sanca ay u fidiso Falastiin, Lubnaan iyo Iiraan.

Khudbad uu jeediyay munaasabadda sanad-guurada 36-aad ee midnimada Yemen ayuu ku sheegay in Mareykanka iyo Israel aysan hadda qarinayn waxa uu ku tilmaamay mashruuca “Israel Weyn”. Wuxuu intaas ku daray in dagaalka ka dhanka ah Iiraan uu ujeedkiisu yahay in meesha laga saaro caqabadda ugu weyn ee hortaagan qorshayaasha Israel ee gobolka.

Al-Mashat ayaa sidoo kale ka digay in Israel ay sii waddo waxa uu ku tilmaamay gardarrada ay ku hayso shacabka Falastiin iyo Lubnaan. Wuxuu ku boorriyay dowladaha Carabta iyo kuwa Islaamka inay qaadaan tallaabooyin dhab ah oo lagu joojinayo waxa uu ugu yeeray dambiyada Sahyuuniyadda, halkii ay ku ekaan lahaayeen qoraallo cambaareyn ah oo kaliya.

Wuxuu carabka ku adkeeyay in Yemen aysan aqbali doonin qorshe kasta oo lagu kala qeybinayo dalkaas, ama isku day kasta oo lagu waxyeelleynayo midnimadiisa. Wuxuu Mareykanka iyo Sacuudi Carabiya ku eedeeyay inay doonayaan inay Yemen u kala qeybiyaan kooxo iska soo horjeeda, iyagoo adeegsanaya dagaal, go’doomin iyo taageero ay siiyaan dhinacyo ay xulafo la yihiin.