Muqdisho (Caasimada Online) – Taliska Ciidanka Booliska Soomaaliyeed ayaa shaaciyay in gacanta lagu soo dhigay nin loo haysto kiis dil ah oo baxsad ka ahaa cadaaladda.

Ninkan ayaa waxaa loo haysta dilka Ismaaciil Yuusuf Axmed oo 40 jir ah. Marxuumka ayaa u geeriyooday dhaawac culus oo ninkan u geystay, sida uu shaaciyay Booliska Muqdisho.

“Howl-gal ay sameeyeen ciidanka Booliska Soomaaliyeed gaar ahaan ciidanka saldhigga degmada Dharkenlay ayaa waxaa gacanta lagu soo dhigey gacan ku dhiigle ladaba joogay,” ayaa lagu yiri qoraalka kasoo baxay Booliska.

Waxa kale oo lagu yiri “Taariikhda markay aheyd 09-05-2024 ayuu dhaawac u geystay muwaadin Soomeeliyeed oo lagu magacaabo Marxuum Ismaaciil Yuusuf Axmed Ina Muumino Maxamed Cumar oo 40 jir ah, kaas oo u geeriyooday dhaawicii soo gaaray.”

Booliska ayaa horey sidan oo kale ugu guuleystay inuu soo qabto saddex nin oo muddo baxsad ka ahaa cadaaladda, oo lagu raad-joogay.

Saddexdan nin oo mid kamid ah uu ka tirsanaa ciidanka xoogga dalka ayaa waxaa iyagna loo haystay dilka wiil yar oo Ardey ah oo 18 Jir ah, kaasi oo lagu magacaabo Cabdullaahi Cabdi Isaaq.

“Ciidanka Booliiska gobolka Banaadir oo hawl-gallo kala duwan sameeyey ayaa ugu dambeyn waxaa u suurto-gashay inay gacanta ku soo dhigaan eedeysanayaashii falkaas ku eedeysnaa,” ayaa lagu yiri qoraal kasoo baxay taliska qeybta guud ee Booliska gobolka Banaadir.

Eedeysanayaasha ayaa waxaa sida ugu dhaqsaha badan loo horgeyn doona maxkamada, si loo marsiiyo cadaaladda, sida lagu shaaciyay qoraalka taliska booliska.

Muqdisho (Caasimada Online) – Warqad uu ku saxiixan yahay Wasiirka Arrimaha Dibadda Soomaaliya Axmed Macalin Fiqi, loona diray Madaxweynaha Golaha Ammaanka Pedro Comissario Afonso, ogeysiina la siiyay Xoghayaha Guud ee Qaramada Midoobay Antonio Guterres ayaa looga codsaday in la baabi’iyo Hawgalka Kaalmaynta Qaramada Midoobay ee Soomaaliya ee marka magaciisa la soo gaabiyo loo yaqaano (UNSOM), innagoo tixgalineyna bay yiraahdeen hawllaheena istiraajiyadeed ee hortabinta leh.

Warqada ayaa lagu sheegay in Dawladda Soomaaliya aysan codsan doonin in la cusbooneysiiyo qaraarka tirsigiisu yahay 2705 ee soo baxay 2023.

Dawladdu waxa ay codsatay in la qaado dhammaan talaabooyinka lagama maarmaanka u ah hannaanka lagu gabagabeynayo muddo xileedka Hawgalka Kaalmaynta Qaramada Midoobay ee Soomaaliya, kaas oo ku eg bisha Oktoobar 2024.

Warqadan oo ku taariikhaysan 5-tii may 2024 ayaa Madaxweynaha Golaha Ammaanka waxa gaarsiiyay danjiraha Soomaaliya ee Qaramada Midoobay Abuukar Daahir Cismaan (Abuukar Baale) 8-dii May.

Dawladdda Soomaaliya illaa hadda wax faahfaahin ah kama bixin sababta ay u codsatay in la baabi’iyo Hawgalka Kaalmaynta Qaramada Midoobay ee Soomaaliya.

Xiriir aan la sameynay sarkaal ka tirsan Wasaaradda Arimaha Dibadda, waxa uu xaqiijiyay jiritaanka warqaddan, balse waa uu ka gaabsaday in uu wax faahfaahin ah ka bixiyo waxa xilligan ku soo beegay in Dawladdu codsato in la baabi’iyo hawlgalka UNSOM.

Hawlaha uu qabto xafiiska UNSOM

Hawgalka UNSOM xafiisyadiisa kala duwan ee Soomaaliya waajibaadkiisa waxa kamid ah in uu kala shaqeeyo Dawladda Federaalka iyo dawlad Gobolleedyada hawllaha dibu heshiisiinta, talo bixinno istraatijayeed oo kala duwan oo ku saabsan nabad iyo dawlad dhiska Soomaaliya, la socoshada xuquuqda aadamaha iyo isku xirka dadaallada caalamiga ah ee lagu taageerayo Soomaaliya.

Tan iyo markii uu hawgalkan bilowday 2013-kii, waxa ay gacan ka geysteen hannaanka federaalaynta Soomaaliya,. Waxa kale oo ay kaalin ku leeyihiin dawlad dhiska, amniga iyo dib u soo kabashada dhaqaalaha.

Hawlahaas in badan oo kamid ah hadda ayay qayb ka ahaayeen sida xoojinta nidaamka federaalka, dhameystirka dastuurka iyadoo loo marayo wadatashiyo ballaaran iyo dib u habeynta qaybaha amniga iyo caddaaladda ee Soomaaliya.

Arrimaha kale ee waaweyn ee xafiiskan kaalinta ku leeyahay waxa kamid ah u kala dab qaadidda dhinacyada siyaasadda Soomaaliya marka uu dhex maro khilaaf siyaasadeed. Xiliyada kaalintoodu muuqato waxa kamid ah marka doorashooyinka heer federaal ama heer dawlad gobolleed la qabanayo, markaas oo ay dhinacyada u sameeyaan kulamo xal loogu raadinayo isdiidooyinka jira.

Ma tahay xiligii la xiri lahaa xafiiska UNSOM?

Soomaaliya wali waxa ka jira khilaaf u dhaxeeya Dawladda Federaalka iyo Dawlad Goboleedka Puntland, waxa sii socda dagaalka Al-shabaab, waxana deegaannada qaar ka jira dagaal beeleedyo ragaadiyay geedi socodka nabadeynta Soomaaliya.

In kastoo dadka faaqida siyaasadda Soomaaliya ay qaarkood qabaan in waqtiga UNSOM dheeraaday loona baahan yahay in waqtigeedu soo dhamaado, haddana waxa jira aragti kale o oleh, wali lama gaarin isku filnaasho looga maarmi karo kaalmadooda.

Wasiirkii hore ee Arimaha Dibadda Axmed Ciise Cawad ayaa qaba in caawinta xafiiskan wali loo baahan yahay.

‘’Waa la joogaa xiligii la soo gabagabeyn lahaa hawgalkan, laakiin sow ma ahayn inaan isku filnaano, waxay ahayd inaan niraahno ma isku filanahay, aniga ilama aha in soomaaliya wali isku filan tahay, Soomaaliya wali way kala qoqoban tahay, magaalada Muqdisho kaliya ayaa xukuumaddu amnigeeda sugi Karin, gobolladii kale ayaan la gaari Karin, Soomaaliya sida ay u kala qaybsan tahay ayaad ogtahay oo kuuma sheegayo,’’ ayuu yiri Axmed Ciise Cawad.

Arimaha kale ee laga hadlayo haddii la xiro Xafiiska Hawgalka Kaalmaynta Qaramada Midoobay ee Soomaaliya waxa kamid ah sida loo maarayn karo khilaafyada siyaasiga ah ee dhexmara Dawladda Federaalka iyo Dawlad Gobolleedyada oo markii hore uu xafiiskan gacan ka geysan jiray sidii dhinacyada loogu kala dabqaadi lahaa.

“U kala dabqaadidii ay u sameyn jireen qaybaha kala duwan ee Dawladda Soomaaliya ayaa Meesha ka baxaya, waxa laga yaabaaba in go’aankan ka dhashay Dawladda Federaalka oo aan daneynin malaha in iyaga iyo gobollada federaalka loo kala dab qaado, sida aan oganahay Puntland iyo Dawaladda Federaalka beryahan khilaaf xoog badan ayaa u dhaxeeyay, Somaliland waa iyada heshiis la saxiixanayso Itoobiya oo u gaar ah oo Soomaaliya arintaas diidan tahay, markaas waxa weeye markii aan ugu baahi badneyn wax nagu taageera in loo kala dab qaado dadka Soomaaliyeed iyo gobolladiisa oo la isku xiro,’’ ayuu yiri wasiirkii hore ee arimaha dibadda Dawladda Federaalka.

Lama oga go’aanka Golaha Ammaanka Jimciyadda Quruumaha ka dhaxaysa uu ka qaadan doono soo jeedinta ka timid Dawladda Federaalka ee ku aadan in la soo gabagabeeyo Hawgalka Kaalmaynta Qaramada Midoobay ee Soomaaliya kaas oo muddo xileedkisan hadda uu ku egyahay bisha Oktoobar ee sanad kan 2024.

Shirrar aan loo kala kicin ayaa maanta ka socday xafiiska UNSOM sida aan ka soo xiganay illo wareedyo ku sugan xarunta UN-ka ee Muqdisho kuwaas oo looga arinsanayay dalabka dawladda.

Nairobi (Caasimada Online) – Ra’iisul Wasaaraha Soomaaliya Xamza Cabdi Barre oo maalmahaan ku sugan magaalada Nairobi ayaa xalay booqday xarunta ganacsiga BBS Mall ugu weyn ee xaafadda Soomalida ee Islii, waxaana halkaasi ku dhaweeyay masuuliyiinta xaafadda Islii.

Ra’iisul Wasaaraha ayaa bogaadiyey horumarka baaxadda leh ee dhanka ganacsiga ah ee ay gaareen Soomaalida ku nool Kenya, gaar ahaan magaalada Nairobi.

Mudane Xamza oo hadal ka jeedinayay munaasabad si heer sare ah loo soo agaasimay oo ka dhacday Moolka BBS ee dhawaan laga hirgeliyey Nairobi, ayaa ganacsatada Soomaalida ku ammaanay kaalinta libaax ee ay ka qaadanayaan kobcinta dhaqaalaha iyo ganacsiga.

Sidoo kale waxa uu xusay sida ay muhiimka u tahay xiriirka Soomaaliya iyo Kenya, gaar ahaan faa’iidooyinka iskaashiga ganacsi ee labada bulsho, ayaa ku boorriyay ganacsatada in ay sii wadaan hal-abuurka iyo ku dhaqanka mabaadi’da ganacsi ee suubban, si loo sii ambaqaado guulaha la gaaray.

Ra’iisul Wasaaraha ayaa waxa kale uu hoosta ka xarriiqay in xukuumaddiisu ay diyaar u tahay fududeynta wax kasta oo caqabad ku noqon kara horumarka ganacsiga Soomaalida, isaga oo carabka ku adkeeyay in la sii wadi doono dadaallada dib u dhiska iyo taageerada ganacsatada Soomaalida meel kasta oo ay joogaan.

Booqashada ra’iisul wasaaraha uu xalay ku tagay suuqa ganacsiga BBS Mall oo ahayd dhiirri-gelin, ayaa markale xaqiijisay sida ay dowladda federaalka Soomaaliya uga go’an tahay taageerada iyo horumarinta muwaadiniinteeda meel kasta oo ay joogaan, gaar ahaan kuwa ku hawlan ganacsiga iyo horumarinta dhaqaalaha.

Muqdisho (Caasimada Online) – Ciidanka Booliska Soomaaliyeed ayaa howlgal ay ka sameeyeen waaxda 2-aad ee degmada Dharkenley ee Gobolka Banaadir waxay ku soo qabteen 5 eedeysane oo ku guda jirey buufinta mootooyin si sharci darro ah loogu qoraayey caalamadda lagu kala aqoonsado ee A iyo B.

Sidoo kale ciidanka ayaa albaabada isugu dhuftay Garaash lagu buufi jiray Mooto Bajaaj-ta.

Qoraal ka soo baxay booliska ayaa lagu sheegay in ragga furtay Garaashka ay sharciga baal-mareen, Milkiilihii Garaashka ayaa ka mid ah 5-ta eedeysane ee lasoo xiray.

Qoraalka Booliska waxaa lagu xusay magacyada ragga lasoo qabtay waxayna kala yihiin:

1. Maxamed Xasan oo 50 jir ah
2. Max’ed-deeq Axmad Cabdi oo 23 jir ah
3. Cabdiqani Maxamed Xasan oo 28 jir ah
4. Xuseen Deeq Maxamed 17 jir ah
5. iyo Ibraahin C/Qaadir  Maxamed 24 jir ah.

Raggaan ayaa kala wareejiya Taargada Mooto Bajaaj-ta ayagoo 1 taargo u isticmaala dhowr Mooto Bajaaj, waxaana goobtaas laga soo helay taargooyin tiro badan,” ayaa lagu yiri qoraal ka soo baxay taliska qeybta guud ee booliska Soomaaliya.

Sida ay cadeeyeen ragga lasoo qabtay shaqadaan waxay ku jireen in muddo ah, waxayna mootooyinka u kala wareeji jireen calaamadaha Dowlada Hoose ee Xamar, iyagoo adeegsanaya nidaam xatooyo ah, sida lagu sheegay qoraalka booliska.

“Ragga lasoo qabtay wali waxaa ku socda  baaris marka ay soo idlaatana waxaa la horgey doonaa Maxkamadda awooda u leh,” ayaa lagu soo gabagabeeyey qoraalka ka soo baxay taliska qeybta guud ee ciidanka booliska Soomaaliyeed.

Mootooyinka ka howlgala Muqdisho ayaa u kala qeybsan labo, waxaana ku kala buufsan A iyo B, iyadoo lambar kasta uu shaqeyso hal maalin, waxaana sharciga lagu buufinayo sameystay maamulka gobolka Banaadir, balse hadda ragaan ayaa dhinac maray oo sameystay nidaam loo ekeysiiyey kan dowladda hoose ee Xamar.

Muqdisho (Caasimada Online) – Sida ay ogaatay Caasimada Online kooxda Al-Shabaab ayaa dhameystirtay dagaalyahano ay saraakiil ku jiraan, kadib markii ay uga dhaawacmeen duqeyn ka dhacday duleedka degmada Ruun-nirgood ee gobolka Shabeellada Dhexe.

Xalay ayaa la dilay ragaas, kadib markii ay Shabaab ogaadeen in aysan daaweyn karin dhaawacada ay qabaan oo halis ahaa, waxayna ahaayeen shan askari iyo sarkaal weyn oo aad u dhibay dadka ku nool deegaanada dhaca soohdinta ay wadaagaan gobollada Galgaduud iyo Shabeellada Dhexe.

Sarkaalka ay Al-Shabaab dhaawaciisa dhameystireen waxaa lagu magacaabaa Ibraahim Sheekh Cali Sheekh Muuse, wuxuuna ahaa nin aad u dhibaateeya dadkiisa, gaar ahaan wuxuu u qaabilsanaa kooxda inuu xoolaha baada ah ka soo xoogo dadka reer miyiga ah.

Ibraahim Sheekh Cali oo markii hore kooxda ku galay Nabadoon u qaabilsan beesha uu ka dhashay ayaa markii dambe loo bedelay qeybta maaliyadda, gaar ahaan uruurinta xoolaha baada ah, wuxuuna si arxan darro ah ula dhaqmi jiray dadka uu ka dhashay oo loo adeegsa jiray.

Xubnaha la dhameystiray dhaawacyadooda waxaa duqeyn la beegsaday ciidamada xoogga dalka, xili ay ku sugnaayeen howdka degmada Ruun-nirgood ee gobolka Shabeellada Dhexe, waxayna ka hareen maleeshiyaad badan oo duqeyntaas lagu laayey.

Ilo xog ogaal ah ayaa Caasimada Online u sheegay in sarkaalka la dhameystiray uu qabay dhaawac halis ah, wuxuuna ka burburay qaarka dambe, kadib markii ay haleeshay duqeyn diyaaradeed.

Ibraahim ayaa noqday bareelis, waxayna Shabaab u arkeen inuusan ka soo kabsa karin dhaawaca gaaray, taas oo sababtay inay qaataan go’aan ay ku dhameystirayaan, isaga iyo raggii kale ee qabay dhaawacyada daran.

Saraakiil ka tirsan ciidanka xoogga dalka iyo kuwa deegaanka oo si dhow ula socday xogta ragga Shabaab-ka ah ee dhaawacyadooda la dhameystiray ayaa Caasimada Online u sheegay inay xaqiijiyeen in 6-daas qof lagu toogtay soohdinta Sh/Dhexe iyo Galgaduud.

Dagaalyahanada Al-Shabaab ee ku dhaawacmaya duqeymaha iyo dagaalka tooska ah waxaa loo waayey daawo lagu dabiibo, waxaana inta badan dhacda in la dhameystiro, maadaama kooxdaan aysan laheyn wax arxan ah, sidoo kale inta badan waxay qariyaan xogta xubnaha ay dhaawac-tiraan.

Muqdisho (Caasimada Online) – Guddoomiyihii hore ee amniga iyo siyaasadda ee maamulka gobolka Banaadir Cali Cabdi Wardheere (Cali Yare) oo ka hadlay fadeexadda dhulka ee dul hoganeysa dowladda Xasan Sheekh, ayaa wuxuu tallooyin dhowr ah usoo jeediyay madaxweynaha.

Cali Yare ayaa madaxweynaha usoo jeediyay in uu shacabka horyimaado, uuna si waadax ah oo aan oo la wada fahmi karana uga waramo qadiyadda dhulka ku lugta leh ee magaciisa sida naaneeys oo kale ugu lammaansan.

“Arbaco, February 8, 2017 – Qodobka ugu weeyn ee lagu jabiyay madaxweyne Xasan Sheekh wuxuu ahaa fadeexo dhul iyo musuqmaasuq ku-lug leh,” ayuu qoraalkiisa ku yiri Cali Yare, oo sheegay in markale ay dowladda Xasan dhex dabaalaneyso fadeexadda dhulka.

Sidoo kale wuxuu usoo jeediyay Xasan Sheekh inuu soo saaro digreeto madaxweyne oo lamid ah middii uu madaxweynihii isaga ka horreeyay ee Farmaajo soo saaray oo uu arrimaha dhulka ku hakinayo si uu sumcaddiisa u dhoowrto.

Hoos ka aqriso qoraalka oo dhameystiran;

Arbaco, February 8, 2017 – Qodobka ugu weeyn ee lagu jabiyay madaxweyne Xasan Sheekh wuxuu ahaa fadeexo dhul iyo musuqmaasuq ku-lug leh.

Shan [5] sano oo jabhadeeyn ah kadib hadda isaga ayaa ayaa madaxweyne noo ah. Isla intii uu shalay xilka ku waayay ayaa maanta socota.

Telefeshinkii aad daarto waxaa ka soo baxaya hooyo ilmeeneeysa oo dhul-boob cabasho ka ah.

Anigu 4-taan su’aalood ayaan is waydiiyay.

1. Sumcad ahaan culeys ilaa intee la eg ayay arrimaha dhulku ku hayaan madaxweynaha ?

2. Soo muddo-xileedkiisii hore, madaxweynuhu sababihii uu xilka ku waayay uguma weeyneeyn arrimaha dhulka iyo fadeexado la xariira ?

3. Maxay tahay musiibada daran ee ku dhaceeysa madaxweynaha, haddii uu soo saaro DIGREETO uu gebi-ahaan-ba ku joojinayo ama xataa ugu yaraan ku hakinayo arrimaha dhulka quseeya ?

4. Haddii aanu madaxweynuhu tallaabooyinkaas hantida dalka iyo isaga sharafkiisuba ay ku badbaadayaan aanu qaadin muxuu noqonayaa fahamka shacabka ay shacabka soomaaliyeed madaxweynaha ruuxiisa ka qaadanayaan ?

TALO:

Haddii madaxweynuhu doonayo ku-raaxeeysiga xukunka oo uu sifo sharci iyo sharaf-ba leh ugu sii negaado, waxaan kula talin lahaa, inuu shacabkiisa horyimaado, si waadax ah oo aan oo la wada fahmi karana shacabka uga waramo qadiyadda dhulka ku lugta leh ee magaciisa sida naaneeys oo kale ugu lammaansan, ama uu soo saaro digreeto madaxweyne oo lamid ah middii uu madaxweynihii isaga ka horreeyay soo saaray oo uu arrimaha dhulka ku joojinayo/hakinayo si uu sumcaddiisa u dhoowrto.

Wabillahi Towfiiq.

Muqdisho (Caasimada Online) – Hay’adda Sirdoonka iyo Nabad-sugidda Qaranka ee NISA ayaa shaaciyay inay hawl-gal kusoo qabatay shabakad halis ah oo ka tirsaneyd kooxda Al-Shabaab.

Shabakadan oo ka kooban 12 xubnood, kuwaasi oo ay NISA sheegtay inay kooxda u qaabilsanaayeen “dilalka qorsheysan, weerarrada tooska ah, uruurinta baadda ay ka qaadaan shacabka iyo tuuridda banbooyinka xilliyada habeenkii ah”.

Howl-galka lagu soo qabatay shabakadan ayaa ka dhacay magaalada Baydhabo iyo deegaanada hoos taga, sida ay qortay warbaahinta dowladda.

“Xubnaha lasoo qabtay ayaa iskula howl-geli jiray qeyb-qeyb, waxaana ciidanka u suurta-gashay inay gacanta ku soo dhigaan dhamaantood, kadib howlgallo is dabajoog ahaa oo maalmahaan ka socday gudaha magaalada Baydhaba iyo deegaanada ku xeeran,” ayaa lagu yiri bayaan kusoo baxay warbaahinta dowladda.

Ciidanka hay’adda ’ada nabad-sugida Iyo sirdoonka ayaa maalmihii dambe howl-galo ballaaran ka wada guud ahaan deeganada Koonfur Galbeed kuwaasi oo lagu xaqiijinaayo amniga guud ee deeganada maamulkaasi.

Ciidanka NISA ayaa horey gacanta ugu soo dhigay maleeshiyaad ka tirsan kooxda Al-Shabaab, ayagoo horeyna u bur-buriyay shabakado ka howl-gali jirey magaalada Baydhaba, kuwaasi oo la horgeeyey sharciga.

Muqdisho (Caasimada Online) – Dowladda Federaalka Soomaaliya oo warsaxaafadeed soo saartay ayaa maanta dalab culus u gudbisay Qaramada Midoobay, kaas oo ay ku dalbatay joojinta shaqada xafiiska Qaramada Midoobay ee Kaalmaynta Soomaaliya, kaas oo marka magaciisa la soo gaabiyo loo yaqaano (UNSOM).

Qoraalkan oo kasoo baxay wasaaradda arrimaha dibadda ayaa waxaa lagu sheegay in la joogo waqtigii ay Soomaalia u madax banaanaan lahayd howlaheeda gaarka ah.

Wasaaradda arrimaha dibadda ayaa shaaca ka qaaday in dowladda federaalka ay haatan horumar ballaaran ka sameysay dhismaha dowladnimada, gaar ahaan dhinacyada amniga iyo siyaasadda, sidaas daraadeedna ay  door bideyso madax-bannaanida horumarkeeda mustaqbalka.

Sidoo kale waxa ay wasaaraddu sheegtay inay haboon tahay in loo gudbo wajiga xiga, ayada oo doorkeeda si toos ah loo siinayo dowladda federaalka Soomaaliya.

Dowladda federaalka ayaa sidoo kale intaasi ku dartay inay sii wadi doonto dadaalkeena, isla-markaana ay joogteyn doonto arrimaha hortabinta u leh dowladnida.

“Ka dib markii aan si qoto dheer u tixgalinay muhiimada istaraatiijiga ah. Waxaan jeclaan lahayn inaan muujinno in hadda ay habboon tahay in loo gudbo wejiga xiga ee booskayaga. Waxaan kalsooni ku qabnaa in aan sii wadi doono dadaalladayada ku aaddan joogteynta nabadda iyo barwaaqada,” ayaa lagu yiri war saxaafadeed kasoo baxay wasaaradda.

Ma jiro illaa iyo hadda wax jawaab ah oo kasoo baxay dhanka Qaramada Midoobay oo ku aadan dalabkan kasoo baxay dowladda federaalka Soomaaliya oo ay ku dalbaneyso joojinta shaqada xafiiska Qaramada Midoobay ee Kaalmaynta ee Soomaaliya (UNSOM).

Arrintan ayaa kusoo aadeyso, ayada oo haatan xafiiska ay kasii tageyso wakiilka QM ee Soomaaliya, Marwo  Catriona Laing oo muddo sanad ah ka howlgaleysa dalka.

Si kastaba, waajibaadka xafiiska Qaramada Midoobay (UNSOM) ee Soomaaliya ayaa wuxuu ku eg yahay marka la gaaro dhammaadka bisha Oktoobar ee sanadkan 2024-ka.