Muqdisho (Caasimada Online) – Ra’iisul Wasaaraha XFS Soomaaliya Xamza Cabdi Barre ayaa u nasteexeeyey madaxweyne Farmaajo, isagoo kula taliyey in dadka Soomaaliyeed ee lagu dhibaateeyey xukunkiisa uu cafis weydiisto, inta lagu jiro bishaan qiimaha badan ee Ramadaan.

Inkastoo magaca Farmaajo uusan carrabkiisa ku dhufan, hadana Xamza Cabdi Barre wuxuu soo tiriyey qaar ka mid ah gabood-falladii ay geystay dowladii Farmaajo, isagoo wax lala yaabo ku tilmaamay sida uu weli iskula saxan yahay.

Ra’iisul Wasaare Xamza ayaa sheegay in mudadii ay raggaas uu kooxda Farmaajo kala jeedo ay xukunka joogeen ay dalka ka geysteen jariimooyin uu ka xusay in madaxdii hore ee dalka shil diyaaradeed loo qorsheeyey, in kabaha lagu aasay dad la laayey oo dabcan uu kala jeeday askartii lagu laayey guriga Cabdiraxmaan Cabdishakuur.

Sidoo kale Xamsa ayaa sheegay in xiligaas la waayey muwaadiniin ay haween ku jireen oo dabcan uu kala jeeday Ikraan Tahliil, in la cunaqabateeyey oo dhiigbax iyo gaajo loo dilay dadkii ku noolaa gobollada dalka qaar oo dabcan uu Gedo iyo Jubbooyinka kala jeedo.

“Waxyaabahaas oo dhan waa dhaawacyo aad geysteen, hadiiba aad nasiib u yeelateen in idinkoo nool aad dalka dib ugu soo laabateen, in bisha Ramadaan waxaa idiin fiicneed inaad dib u dhaydaan dhibaatooyinkaa geysateen oo dadkiina cafis weydiisataan, waa hadii umadaan aad rajo dambe ka qabto, in wixii aad geysatay hilmaanto oo hadda aad wax sii qasto, runtii ma qurux badna, marka waxaan soo jeedinayaa in dadka cafis la weydiisto,” ayuu yiri Xamza Barre.

Ra’iisul Wasaaraha oo hadalkaan ka jeediyey kulan ciwaankiisu ahaa “Afur wadareedka is aragga xukuumadda iyo bulshada” ayaa dhinaca kale ka hadlay arrinta muranka badan uu ka taagan yahay ee dhameystirka dastuurka dalka, isagoo sheegay in dastuurku uu ku jiro gacan aamin ah.

“Walaalayaal dastuurku maanta wuxuu jiraa gacan aamin ah, qof kasta meel ayuu ka daneynayaan dastuurka, laakiin waxaan idin leeyahay qof kasta shaqadiisa haloo daayo, dhameystirkiisa waxaa ku xiran karaamada iyo dowladnimadeena, qof kasta oo xil idinka raba wuxuu dhihi jiray dastuurka ayaan dhameynayaa, balse maanta ayagii ayaa diidan inaan dhameystirno,” ayuu yiri Xamza.

Ra’iisul Wasaaraha ayaa soo hadal qaaday dooda haweenka oo maalmahaan dalbanayey in dastuurka lagu cadeeyo oo qodob dhan laga dhigo qoondada haweenka oo 30% ah, isagoo sheegay in gabdhaha Soomaaliyeed ay xukuumadiisu u ogoshahay wax kasta oo ay dalbanayaan, isagoo haweenka kula taliyey in hanaan sharci ah ay xuquuqdooda ku raadsadaan oo buuq ka fogaadaan.

Hoos ka daawo

Muqdisho (Caasimada Online) – Ra’iisul Wasaaraha XFS Xamza Cabdi Barre ayaa ka hadlay sida uu u soo hagaagayo amniga caasimadda Muqdisho, isagoo tusaale u soo qaatay arrimo ka dhashay weerarkii Hotel SYL ay Shabaab ka geysteen.

Labo nin oo warbaahinta la hadlay maalin kadib markii uu weerarkaasi dhacay ayaa sheegay inay ka maqan tahay Alaab ay uga carareen Hotelka, iyagoo ciidamada ammaanka ku eedeeyey inay alaabtaas qaateen.

Nin safiir soo noqday ayaa ku jiray ragga xatooyada ku eedeeyey ciidamada amniga ee Shabaab ka badbaadiyey dadkii lagu weeraray Hotelka, kaas oo sheegay in qalin laga xaday, halka ninka kale uu sheegay in dahab laga xaday, maadaama xaaskiisa ay la deganeed oo aroos ah ay ahaayeen.

Ra’iisul Wasaare Xamza oo hadalladii ay warbaahinta mariyeen labadaas nin si tusaaleyn ah uga jawaabay ayaa sheegay in amniga dalkaan uu soo hagaagay oo la soo gaaray heer hanti iyo qalimaan laga fekero, inta lagu guuleystay badbaadinta naftii muwaadinka.

“Amniga uu Rabbi nagu maneystay, markii ay wax dhacaan waxaa la dhihi jiray qof ayaa iga dhintay iyo waa la baaba’ay, balse waxaan maanta mareynaa ‘qalin ayaa iga maqan, computer ayaa iga maqan iyo xaaskaa ila degeneed oo dahab ayaa ka lumay’ taasi waxay ku tusineysaa inaan meel fog ka nimid oo amniga dalkeenu soo hagaagay,” ayuu yiri Xamsa Barre.

Ra’iisul Wasaaraha ayaa duqa Muqdisho iyo hey’adaha ammaanka uga mahadceliyey dadaalka ay geliyeen sugidda amniga caasimada, isagoo ka dalbaday inay sii laba jibaaraan halganka amni xaqiijinta ah oo ay ku jiraan.

Sidoo kale, R/Wasaare Xamza ayaa ka hadlay dhaqanka bulshada, isagoo sheegay in mararka qaar ay soo gaaraan inuu magaalada ka jiro dhaqan aan wanaagsaneyn, sida isticmaalka maandooriyaha, soon la’aan, tumasho iyo waxyaabo kale oo diinteena suuban aysan ogoleyn, isagoo dalbaday in meel looga soo wadajeesto dhaqan xumada oo la suuliyo.

“Waxaan nahay dad dagaal ku jira, shacab iyo dowlad waxaa la rabaa inaan dadaalno, is dhigasho ayaa dhacda mararka qaar,  waa inaan amniga gacmaheena ku raadsanaa, aan tirtirno Khawaarijta, hadii ay towbad keeni waayaan, in Khawaarij dalkaan la dhaafiyo waxaa ku xiran dowladnimadeena, diinteena ilaalinteeda iyo wax kasta oo wanaagsan,” ayuu hadalkiisa ku sii daray Xamza Barre.

Ra’iisul Wasaaraha ayaa hadalkaan ka jeediyey kulan ciwaankiisu ahaa “Afur wadareedka is aragga xukuumadda iyo bulshada” kaas oo wasaaradda arrimaha gudaha ay soo qabanqaabisay, laguna qabtay beerta nabadda ee magaalada Muqdisho.

Hoos ka daawo

Garoowe (Caasimada Online) – Madaxweynihii hore ee Soomaaliya Sheekh Shariif Sheekh Axmed iyo wafdi uu hoggaaminayo ayaa goordhoweyd gaaray magaalada Garoowe ee caasimada maamulka Puntland.

Wafdiga Shariif ayaa waxaa kamid ah xildhibaano, waxaana garoonka diyaaradaha ee Garoowe kusoo dhaweeyay madaxweynaha Puntland Saciid Cabdullaahi Deni iyo masuuliyiin kala duwan oo ka tirsan maamulka.

Shariif iyo xubnaha uu horkacayo ayaa waxay halkaasi kaga qeyb galayaan shir wada-tashi ah oo ku saabsan xaaladda dalka, gaar ahaan arrinta dastuurka oo xiisad xooggan ka taagan tahay.

Madaxweynihii hore ee dalka Sheekh Shariif oo shalay shir jaraa’id ku qabtay magaalada Muqdisho ayaa sheegay in uu dalka ku socdo waddo khaldan, isaga oo baaq u diray Madaxweyne Xasan Sheekh Maxamuud, oo uu ku eedeeyay inuu wado wax ka daran wixii ay horey uga diideen Farmaajo.

Safarka Shariif ayaa waxa uu ku soo aadayaa xilli ay Villa Somalia isku dayeyso in ay meel-mariso dastuurka dalka oo ay ka taagan tahay dood badan, uuna Garoowe ku sugan yahay madaxweynihii hore ee dalka Maxamed Cabdullaahi Farmaajo.

Shariif iyo Farmaajo ayaa qorshahooda yahay sidii Saciid Deni oo miisaan siyaasadeed leh ugu soo dari lahaayeen isbaaheysi siyaasadeed mucaarad ah oo ka dhan ah madaxweyne Xasan Sheekh.

Saddexda nin ayaa xilligaan ka mideysan diidmada qorshaha dhameystirka dastuurka ee uu wado madaxweyne Xasan, waana qodobka la aaminsan yahay in uu ka bilaaban karo is-xulefysiga labada dhinac.

Si kastaba, socdaalka ay madaxdii hore iyo siyaasiyiinta mucaaradka ku tageen Garoowe ayaa imanaya xilli uu halkiisi yahay khilaafka madaxweynaha Puntland Saciid Deni kala dhaxeeya madaxweyne Xasan Sheekh.

Muqdisho (Caasimada Online) – Ugu yaraan 54 qof ayaa Soomaaliya ugu geeriyootay cudurka daacuunka bilihii lasoo dhaafay, iyada oo toddobaadkii lasoo dhaafay ay u geeriyoodeen dad gaaraya ilaa 9 ruux.

Tan ayaa ka dhigan in sanad gudihiis dadkii ugu badnaa ay hal toddobaad u geeriyoodeen xanuunkan.

Ilaa dhowr kun oo qof ayaa xanuunkan laga helay gudaha Soomaaliya, iyada oo badankood lala tacaalay, sida laga soo xiganayo howl-wadeennada caafimaad ee Muqdisho.

Kiisaska u badan ee xanuunkan ayaa laga soo warinaya kaamamka barakacayaasha, halkaasi oo inta badan lagu yaqaano in aysan helin biyo nadiif ah oo ku haboon cabitaanka, islamarkaana uu aad u hooseeyo adeega caafimaadka iyo gaar ahaan arrimaha la xiriira fayo-dhawrka.

Sidoo kale waxaa qeyb ka ahaa daadadkii Soomaaliya ka dhacay, oo iyagu laftigooda keenay xanuunkan, oo meelaha qaarkood ay biyo fadhiisimo noqdeen.

Howl-wadeennada caafimaadka ayaa sidoo kale sheegaya in xanuunkan ay saameyn ku leeyihiin isku gudubka waddamada deriska, oo sanadkii hore qaarkood laga soo tabiyay kiisas hor leh.

Dowladda federaalka Soomaaliya, maamul goboleedyada iyo deeq-bixiyayaasha caalamka ayey howl-wadeennada caafimaadka ugu baaqayaan “in arrintaan la dhayalsan oo la iskaashado wax ka qabashadeeda,” kahor inta aysan xaaladda gaarin meel halis.

Muqdisho (Caasimada Online) – Hey’adaha ammaanka ee dowladda Soomaaliya ayaa soo bandhigay sawirrada rag Wanted ah oo la baadi goobayo, kuwaas la helay muuqaalkooda, iyagoo qaraxyo dhigaya goobo ganacsi oo ku yaalla Suuqa Bakaaraha ee magaalada Muqdisho.

Hey’adda Nabad Sugidda Qaranka ee NISA ayaa xalay baahisay sawirrada lix nin oo boorsooyin qaraxyo ah dhigay dad badana ku laayey tukaamo ku yaalla Suuqa Bakaaraha ee magaalada Muqdisho, raggaan ayaa muuqaalkooda laga helay kaamiradaha qarsoon ee CCTV-ga.

Qoraalkaan oo lagu baahiyey barta Twitter-ka ee NISA ayaa dadka Soomaaliyeed looga dalbaday in qofkii arka raggaas uu la xiriiro lambaro laga helo hey’adaha ammaanka oo lagu soo bandhigay qoraalkaan.

“Hay’adaha ammaanka waxay ku raad-joogaan dhagar-qabayaashaan oo ah kuwii qarxiyey ganacsatada Suuqa Bakaaraha, fadlan hadii aad xog ka hayso la xariir Numberadaan, 991/199 ama 0770747474/0620545454,” ayaa lagu yiri qoraalka ay soo saartay NISA.

Telefishinka Qaranka Soomaaliyeed ayaa sidoo kale baahiyay muuqaal Documentary ah oo ku saabsan qaraxyadii is xig-xigay ee 6-dii bishii Febraayo ee sanakan ka dhacay gudaha suuqa Bakaaraha ee magaalada Muqdisho, kuwaas oo sababay dhimasho iyo dhaawac badan oo soo gaaray dad shacab ah oo aan waxaba galabsan.

Kaamirooyinka qarsoon ee CCTV oo ku xiraa goobaha ganacsi ee la qarxiyey ayaa laga helay muuqaalada sida ay u dhaceen qaraxyadaas iyo raggii fuliyay oo toos looga arki karo muqaalada la baahiyay.

Warbixin dhameystiran oo xalay uu baahiyey SNTV ayaa lagu sheegay in qaraxyadan boorsooyin looga keenay Ceelasha Biyaha, kadibna lagu beesaday Bakaaraha, iyadoo xubnaha geeyey loogu dhiibay gudaha Masjidka Abuuhureyra oo ku yaalla Bakaaraha.

Muuqaalka waxaa laga arki karaa rag wada boorsooyin oo iska dhigaya inay wax iibsanayaan, kuwaas oo qaraxyada dhigaya gudaha tukaamada la bartilmaameedsaday.

Sidoo kale waxaa Kaamirooyinka laga arkayaa nin taagan meel banaan ah oo toos Romuud ugu qarxinaya miinooyinka la dhigay tukaamada lagu dhex laayey shacabka, kuwaas oo ku jiray booqsooyin.

Goobaha la qarxiyay ee boorsooyinka la dhigay waxaa kamid ah xarumaha Bedar, Kaamil, Sanguuni, Waayo Arag iyo dhismo qabyo ah oo ku yaalla gudaha suuqa Bakaaraha ee magaalada Muqdisho.

Hoos ka daawo muuqaalka oo dhameystiran:

Muqdisho (Caasimada Online) – Xafiiska Xeer Ilaaliyaha Guud ee Qaranka ayaa xabsiyo ku yaalla magaalada Muqdisho ka sii daayay 116 Maxbuus.

Maxaabiista lasii daayay oo ku xernaa Xabsiga Dhexe ee Xamar iyo Xabsiga MBCC ee Ex-Control Afgooye ayaa lagu sii daayay cafis madaxweyne, munaasabadda bisha barakeysan ee Ramadaan.

Maxaabiistan lagu sii daayay cafiska madaxweyne ayaa u xirnaa dambiyo kala duwan oo fudud, halka qaarkoodna la sheegay inay dhameysteen inta badan xukunadooda.

Xeer Ilaaliye ku-xigeenka Farxaan Xuseen Maxamed oo fagaare kula hadlay maxaabiista la sii daayay ayaa kula dardaarmay iney ka faa’iideystaan fursada la siiyay, isagoona u mahad-celiyay madaxweyne Dr Xasan Sheekh Maxamuud.

“Waxaan idin sheegeynaa in cafiska aad ku baxdeen uu idin fidiyay Madaxweynaha Jamhuuriyadda Fedaraalka Soomaaliya Mudane Xasan Sheekh Maxamuud oo munaasabadda bisha Barakeysan awgeed, qof walba waxaa laga rabaa in uusan u laaban waxii loo soo xiray” ayuu yiri Xeer Ilaaliye ku-xigeenka Farxaan Xuseen.

Sidoo kale waxa uu sheegay in maxaabiistan xabsiyada ay ku jireen ku heleen adeegyo cafimaad oo bilaash ah, waxbarasho iyo goobo kale oo lagu ciyaaro.

Maxaabiista la sii daayay ee fursada cafiska madaxweyne dib ugu helay xoriyadooda ayaa ahaa kuwa u badan dhallinyaro aad u da’yar oo badanaa ku eedeysnaa dambiyo fudud.

Muqdisho (Caasimada Online) – Telefishinka Qaranka Soomaaliyeed ayaa baahiyay muuqaal Documentary ah oo ku saabsan qaraxyadii is xig-xigay ee 6-dii bishii Febraayo ee sanakan ka dhacay gudaha suuqa Bakaaraha ee magaalada Muqdisho, kuwaas oo sababay dhimasho iyo dhaawac.

Kaamirooyinka qarsoon ee CCTV ayaa laga helay muuqaalada sida ay u dhaceen qaraxyadaas iyo raggii fuliyay oo toos looga arki karo muqaalada la baahiyay.

Warbixin dhameystiran oo caawa uu baahiyey SNTV ayaa lagu sheegay in qaraxyadan boorsooyin looga keenay Ceelasha Biyaha, kadibna lagu beesaday Bakaaraha, iyadoo xubnaha geeyey loogu dhiibay gudaha Masjidka Abuuhureyra.

Muuqaalka waxaa laga arki karaa rag wada boorsooyin oo iska dhigaya inay wax iibsanayaan oo qaraxyada dhigaya gudaha tukaamada la bartilmaameedsaday.

Sidoo kale waxaa Kaamirooyinka laga arkayaa nin taagan banaanka, isla markaana toos Romuud ugu qarxinaya miinooyinka la dhigay tukaamada lagu dhex laayey shacabka.

Goobaha la qarxiyay ee boorsooyinka la dhigay waxaa kamid ah xarumaha Bedar, Kaamil, Sanguuni, Waayo Arag iyo dhismo qabyo ah oo ku yaalla gudaha suuqa Bakaaraha ee magaalada Muqdisho.

Warbixintaan waxaa ka soo muuqanaya qaar ka mid ah raggii keenay qaraxyada oo lasoo qabtay, kuwaas oo sharaxaya sidii ay qaraxyadaas ku keeneen Meesha iyo dhagarta ay u maleegeen shacabkii lagu laayey suuqa Bakaaraha.

Wasiir Al-Cadaala, Sheekh Cabdiqani Qorane, Sheekh Bashiir Axmed Salaad, Sheekh Cali Wajiid, Wasiir ku xigeenka diinta Sheekh Saalax iyo xubno kale ayaa ka soo muuqanaya warbixintaan, kuwaas oo falanqeynaya sida ay Shabaab u dhagreen.

Hoos ka daawo Documentary

Muqdisho (Caasimada Online) – Labo Xidigle Mucaawiye Cumar Cusmaan Waasuge oo loo soo xiray kamid ahaanshaha Shabaab iyo jaajuusida ciidanka xoogga dalka ee ku sugan jiidaha hore ee dagaalka iyo weliba weerarkii lagu dilay Taliye Xasan Tuure ayaa maanta lasoo gaba-gabeeyay maxkamadeyntiisa.

Mucaawiye ayaa hoggaamiyay dhowr horimood oo ciidanka gaarka ah ee DANAB kamid ah, isaga oo kaga faa’iideystay in uu xogaha ciidanka iyo howl-galada uu u dusiyo Al-Shabaab, uuna wakiil kaga ahaa Cabdullaahi Cabdi Cumar (Cabdullaahi Hiiraan) iyo Muxudiin Maxamuud Cabdi (Muxudiin Turki).

Waxaa lagu eedeeyey in uu si gaar ah u dusiyey xogaha ciidanka ee dagaaladii Galcad ee uu ku shahiiday Abaanduullihii DANAB Gaashaanle Xasan Maxamed Cusmaan (Xasan Tuure).

Sidoo kale waxa uu gudbiyay xogaha difaacyadda ciidanka iyo in aysan hawada ku jirin diyaaradaha saaxiibada DANAB (Drones) dagaaladii Budbud, Cali Yabaal, Alkowsar iyo Daaru-nimca.

Waxa uu dhabar jabin ku sameeyay ciidanka, gaar ahaan dagaalkii Budbud kadib markii uu difaaca ka saaray horintii uu xukumayey. Sidoo kale waxa uu sahmiyay saldhigyadda Military ee Beli-doogle iyo Xero Nac-Nac, isaggoo la wadaagay Cabdullahi Hiiraan xogta ciidanka ku jira iyo koolba waardiyaasha xerooyinkaasi.

Mucaawiye ayaa intii ku howl jiray howlgalka jaajuusnimo adeegsanayey ereyo afgarasho ah oo ay isla yaqaaneen Cabdullahi Hiiraan, ayna ka mid yihiin, Adeer (saaxiibada DANAB ee Mareykanka), Ilmaha Adeer (Speacial DANAB), Abaayo (Beli-doogle), Hooyo (Muqdisho), meeshii hore (howlgalkii hore) iyo ereyo kale, sida uu sheegay xafiiska xeer ilaalinta.

Ninkaan ayaa sidoo kale la sheegay in kooxda u adeegsatay soo iibinta Drone, ookiyaalaha aragga habeenkii (Night Vision) iyo agabyo kale oo ciidan oo aan u suurta-gelin.

Baaris dheer kadib Xafiiska Xeer Ilaalinta Maxkamadda Ciidmada ayaa codsaday mudeynta kiiskan, waxaana laga ogolaaday 14-kii bishaan, iyaga oo maxkamadda horkeenay cadeymo ku saabsan kiiskaan oo ay ka mid yihiin marag-fur iyo saraakiishii ka sarreysay Mucaawiye oo marqaati ahaan maxkamaddu ay u dhageystay.

Garsoorka Maxkamadda Ciidamada oo waqti ku filan siiyey dhinacyadda dacwadda ayaa ugu dambayn maanta ku xukuntay Ex- Labo Xidigle Mucaawiye Cumar Cusmaan Waasuge 10 sano oo xabsi ciidan ah.

Sidoo kale waxaa laga xayuubiyey darajada labo xidigle iyo xubinnimada ciidanka xoogga dalka, sida uu warbaahinta u sheegay Guddoomiyaha Maxkamdda Darajada koowaad ee Ciidamada Qalabka Sida Gaashaanle Sare Xassan Cali Nuur Shuute.

Muqdisho (Caasimada Online) –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta ka qayb galay Tartanka Qur’aanka Kariimka ah ee Bisha Barakaysan ee Ramadaan.

Madaxweynaha oo munaasabadii tartanka lagu daahfuray ka hadlay ayaa tilmaamay in dowladdu ay mudnaan gaar ah siinayso horumarinta xarumaha waxbarashada diiniga ah.

Sidoo kale Madaxweyne Xasan Sheekh ayaa sheegay dowladnimada Soomaaliyeed ay aas-aas u tahay ilaalinta diinta iyo ku dhaqanka shareecadda Islaamka.

Madaxweynaha ayaa bogaadiyay wiilasha iyo gabdhaha ka qeyb-galaya Tartanka Quraanka Kariimka ah ee uu taaba geliyey Madaxweyne Xasan Sheekh.

Tartankaan waxaa soo qaban qaabiyey culimada iyo Wasaaradda Awqaafta iyo arrimaha Diinta ee XFS.

Madaxweyne Xasan Sheekh ayaa sheegay in sida loo daneynayo tartankaan ay ka tarjumeyso sida shacabka iyo dowladda Soomaaliyeed ay ugu dheggan yihiin diintooda suubban, ugana shaqeynayaan barashadeeda iyo ku dhaqankeeda.

Sanadkii hore ayuu madaxweynaha Soomaaliya balan qaaday in sanad kasta uu taaba-geli doono tartan Qur’aan Akhris ah oo loo qabanayo ardayda xaafidul Qur’aanka ah.

Abaalmarino qaali ah ayuu sanadkii hore madaxweynuhu siiyey wiilashii iyo gabdhihii galay kaalimaha hore, kadib markii sidaan oo kale loogu tartamay aqrinta Qur’aanka Kariimka.

Tartankaan oo maalmo ka soco doona Muqdisho ayaa markii lasoo gabagabeeyo waxaa la soo bandhigayaa natiijada, waxaana guuleystayaasha la sii doonaa abaalmarinta uu ugu talagalay Madaxweyne Xasan Sheekh.

Garoowe (Caasimada Online) – Madaxweynihii hore ee Soomaaliya Maxamed Cabdullaahi Farmaajo iyo wafdi uu hogaaminayo ayaa maanta gaaray magaalada Garoowe ee caasimada maamulka Puntland.

Farmaajo iyo wafdigiisa ayaa waxaa garoonka diyaaradaha ee Garoowe ku soo dhaweeyay madaxweynaha Puntland Saciid Cabdullaahi Deni iyo masuuliyiinta kala duwan ee maamulka, ayada oo loo sii gudbiyay Qasriga Madaxtooyada.

Madaxweynihii hore ee dalka iyo Saciid Deni ayaa waxaa u bilaabanaya kulamo wadi tashi, xilli ay sii xoogeysaneyso xiisadda siyaasadeed ee wax ka beddelka dastuurka oo ay weli ku dhegan tahay Villa Soomaaliya.

Sida aan xog ku helnay Farmaajo iyo Deni ayaa ka hadli doona arrimaha siyaasadda iyo amniga dalka, iyo muranka ka taagan dib u eegista dastuurka dalka, oo labadaba ay kasoo horjeedaan.

Deni iyo Farmaajo ayaa aad u kala fogaa siyaasad ahaan xilligii uu Farmaajo ka arriminayay Villa Somalia, wuxuuna madaxweynaha Puntland ka mid ahaa raggii sida adaga ula dagaalamay Farmaajo, ugu dambeyna ka saaray Villada.

Sida ay horey u baahisay Caasimada Online, Farmaajo ayaa isku dayaya xilligaan in Saciid Deni uu ku qanciyo isbaaheysi siyaasadeed mucaarad ah oo ka dhan ah dowladda madaxweyne Xasan Sheekh, kaasi oo ay ka wada socdaan madaxweynihii hore ee dalka Shariif Sheekh Axmed.

Labada nin ayaa xilligaan ka mideysan diidmada qorshaha dhameystirka dastuurka ee uu wado madaxweyne Xasan, waana qodobka la aaminsan yahay in uu ka bilaaban karo is-xulefysiga labada dhinac.

Socdaalka uu madaxweynihii hore ee Farmaajo uu ku tegay Garoowe ayaa imanaya xilli uu halkiisi yahay khilaafka madaxweynaha Puntland Saciid Deni kala dhaxeeya madaxweyne Xasan Sheekh.

Sidoo kale wararka ayaa shegaya in madaxweynihii hore ee KMG Shariif Sheekh Axmed uu isna tegayo magaalada Garoowe ee caasimada maamulka Puntland.

Si kastaba, waxaa si weyn looga dhursugaya waxa kasoo bixi doona shirarka ay Garoowe ku leeyihiin Farmaajo iyo Deni, kaasi oo kusoo aadaya xilli xasaasi ah oo madaxweyne Xasan uu ku dhagan yahay qorshaha wax ka beddelka dastuurka, ayna baarlamaanka ka socoto dooddiisa, si loo meel-mariyo.