Cadaado (Caasimada Online) – Iyadoo khilaaf xoogan uu ka dhextaagan yahay maamulka Galmudug, ayaa waxaa goordhow arrintaasi ka hadlay Wasiirka Arrimaha Gudaha Soomaaliya Cabdi Maxamed Sabriye.

Wasiirka Arrimaha Gudaha ayaa sheegay inuu aad uga xun yahay Khilaafka soo gala dhexgalay Madaxda Sare ee maamulka Galmudug.

Wasiir Sabriye, oo maanta Warbaahinta kula hadlay magaalada Muqdisho ayaa sheegay in dowladda Somalia ay kaalin wanaagsan ka qaadan doonto Khilaafka madaxda maamulka.

Sabriye waxaa uu sheegay in dowladda Somalia ay si weyn uga xun tahay Khilaafka soo gala dhex galay Madaxda Galmudug,islamarkaana Galmudug ay u baahan tahay in Madaxdooda ay is xaliyaan.

‘’Waxaan ku baaqeynaa in si shuruud la’aan ah lagu xaliyo Khilaafka ka dhextaagan Galmudug, waa ayaan darro in la garan waayo wanaaga xalka ku jira’’

Wasiir Sabriye, ayaa sheegay in xilli ay waddeen dhexdhaxaadin in Magaalada Muqdisho ay ka dhoofeen Madaxda Galmudug, sidaa aawgeedna la doonaayo in lasoo nooleeyo wadahadalka.

Sidoo kale, Sabriye ayaa ku nuux-nuuxsaday in dowlada Somalia ay arrin mushkiladeeda leh u qaadan doonto Khilaafka kala geeyay maamulka Galmudug, waxa uuna ku baaqay in xal degdeg ah laga gaaro Khilaafka.

Docda kale, Madaxda Galmudug oo laba u kala jabay ayaa kala gaaray Magaalooyinka Cadaado iyo Dhuusamareeb ee Galmudug, taa oo sii xoojisay Khilaafka oo iminka gaaray heerkii ugu adkaa.

Caasimada Online
Xafiiska Cadaado
[email protected]

Muqdisho-(Caasimadda Online) – Munaasabad kooban oo maanta lagu qabtay xarunta Villa Hargeysa ayaa waxaa xilalkoodii kula wareegay Wasiiraddii dhawaan uu magaacabay ra’iisal wasaare Xassan Cali Kheyre.

Munaasabaddan ayaa Maanta ka dhacday Xarunta Villa Hargeysa, waxaana goobjoog ka ahaa gudoomiyaha ku xigeenka Koobaad ee Golaha Shacabka C/wali Sheekh Ibraahim Muuddeey, Guddoomiye ku xigeenka Labaad Mahad Cabdalla Cawed iyo kusimaha Ra’iisul wasaaraha ahna Ra’iisul Wasaare ku xigeenka Dalka, Mahdi Maxamed Guueed Khadar.

Gudoomiyaha Maxkamadda sare ee dalka, Ibraahim Iidle Saleebaan, ayaa dhaariay wasiirada cusub si ay u bilaabaan la wareegidda xafiisyadooda si dhaqsa ahana u guda galaan shaqooyinka laga sugaayo in ay qabtaan.

Xubnaha Maanta la dhaariyay oo isugu jira Wasiirro, wasiir ku xigeenno iyo Wasiiru Dowlayaal ayaa masuuliyiinta hortooda lagu dhaariyay, marka laga reebo Wasiirka Warfaafinta Dhaqanka iyo Dalxiiska Daahir Maxamuud Geelle oo safar dibedda ugu maqan.

Ku-simaha Ra’iisul Wasaaraha ayaa kula dardaarmay wasiirada cusub in ay dadaal dheeraad ah sameeyaan si ay ugu guuleestaan howlaga qaran ee Hor-yaalla.

Sidoo kale Gudoomiyaha Golaha Shacabka, Maxamed Mursal Shekh Cabdiraxman ayaa kula dardaarmay Wasiirada in ay u dhega nuglaadaan la xisaabtanka guddiyadda Baarlamanka ay ku sameynayaan xubnaha golaha Wasiirrada.

24-kii Bishan ayay ahayd markii uu Ra’iisul wasaaraha Dalka Mudane; Xasan Cali Kheyre soo Magacaabay 13 xubnood oo isugu jira Wasiirro, Wasiir ku xigeenno iyo Wasiiru Dowlayaal, kuwaas oo buuxiyay boosas u bannaanaaday siyaabo kala duwan.

Caasimada Online
Xafiiska Muqdisho
[email protected]

Muqdisho (Caasimadda Online) – Xildhibaan C/llaahi Maxamed Nuur oo ah Guddoomiyaha Kutlada Baarlamaaniga Horusocod ee mucaaradka ah ayaa dalbaday baaritaan madax banaan oo lagu sameeyo dhacdadii 23-kii bishan ka dhacday Koontarool ay leeyihiin Ciidanka NISA oo ku yaalla agagaarka KM-0 oo rasaas lagu riday gaari uu saarnaa.

Qoraal uu Xildhibaanka u diray Guddoomiyaha Golaha shacabka, kuna ogeysiiyay Guddiyada Baarlamaanka iyo Xafiiska Ra’iisul Wasaaraha ayuu kaga qaabkii wax u dhaceen, isagoo dalbaday in la sameeyo baaritaan ka madax banaan kan Laanta Fulinta.

Xildhibaanka ayaa codsaday in baaritaan madax banaan oo lagu sameeyo dhacdadaas oo uu horay u sheegay in ay aheyd mid lagu doonayey in isaga lagu dilo balse uu ka badbaaday.

Qoraalka ayaa waxa uu u diray Guddiyada Baarlamaanka iyo Xafiiska Ra’iisul Wasaaraha,isaga oo uga warbixiyey qaabkii uu falkaasi u dhacay iyo in uu doonayo in uu cadaalad helo,isla markana si dhab ah loo baaro.

Wasaaradda Amniga ayaa war saxaafadeed ay soo saartay ku sheegtay in baaritaan ku sameyneyso falkii dhacay, isla markaana askari ka tirsan NISA uu hal Xabad ku riday gaari hor gudbay Koontaroolka agagaarka KM-0

Haddaba  halkaan hoose ka akhriso qoraalka uu xildhibaanka qoray

Caasimada Online
Xafiiska Muqdisho
[email protected]

Muqdisho (Caasimadda Online) – Sida ay Caasimadda Online xogta ku heshay Ra’isulwasaaraha Soomaaliya ayaa ku dhaqaaqay  tallaabo si weyn looga hadal hayo xarunta madaxtooyada Villa Somalia.

Ra’isulwasaaraha Soomaaliya ayaa hal Unug oo ciidan ka tirsan beeshiisa Murusade gaar ahaan Habarceyne ku dursaday ciidamada Ilaaliya amaanka Madaxtooyada iyo agagaaraheeda ee la yiraahdo 60-aad.

Ra’isulwasaaraha ayaa keensaday ilaa 11 Askari oo u dhashay Beeshiisa, waxaana arrintaas ka dhalatay muran farabadan oo ku aadan inuu Kheyre keensado Madaxtooyada ciidamo isaga ku heyb ah.

Ra’isulwasaaraha ayaa ciidankaas ka dhigtay istaafkiisa gaarka ah, waxaana muuqato inuu Ra’isulwasaaraha garab maray habka loo qaadan jiray ciidamada ka tirsan qeybta 60-aad ee ilaaliyo Madaxtooyada iyo Madaxda qaranka.

Maalmihii ugu dambeeyey arrintaan ayaa noqotay hadal heynta ugu badan, waxayna keentay inay taliyaasha ciidamada Madaxtooyada ka hor imaadaan arrintaas, inkastoo aysan wax saameyn ah ku yeelan go’aanka Ra’isulwasaaraha maadaama ciidamadii uu keensaday loo diiwaan geliyey inay kamid ah noqdaan Qeybta 60-aad.

Lama ogo haddii uu arrintaan wax ka ogyahay Madaxweynaha Soomaaliya Maxamed Cabdullaahi Farmaajo.

Wixii warar ah ee kusoo kordha waan idinla socodsiin doonaa Inshaa Allah.

Caasimada Online
Xafiiska Muqdisho
[email protected]

Caadaado-(Caasimadda Online) – Wararka laga helayo magaalada Cadaado ayaa sheegaya in maamulka Galmudug uu mar kale khilaaf soo kala dhexgalay, iyadoo laba qeybood u kala baxeen madaxda sare ee maamulkaasi.

Madaxweyne kuxigeenka Galmudug Maxamed Xaashi Carabey iyo Guddoomiyaha Baarlamaanka Cali Gacal Casir ayaa saaka gaaray magaalada Cadaado oo horay u aheyd xaruntii KMG Galmudug, iyadoo dib mar kale u soo cusboonaaday khilaafkii horay u ragaadiyay maamulkaas.

Xubnahaan waxaa Garoonka Cadaado,kusoo dhaweeyay Xildhibaano ka tirsan baarlamaanka Galmudug, masuuliyiin iyo qeybaha Bulshada.

labadan Mas’uul ayaa dhowaan shaaciyay inuu jiro khilaaf u dhaxeysa Madaxda Galmudug oo salka ku heysa isku darkii Baarlamaanka, awoodda oo hal dhinac noqotay iyo is bedel lagu sameeyay Dastuurka, kaddib markii Madaxweyne Xaaf uu muddo kororsaday.

Madaxweynaha Galmudug Axmed Ducaale Geelle Xaaf ayaa isna shalay dib ugu soo laabtay magaalada Dhuusmareeb Caasimadda Galmudug, iyadoo la  filayo inuu ku dhawaaqo Golaha Wasiirro cusub.

Xaaladda ayaa mareysa heerkii ugu sareeyay, waxaana fashilmay dadaalkii loogu jiray in khilaafka madaxda Galmudug xal loo helo oo ka socday magaalada Muqdisho, iyadoo laga cabsi qabo in magaalooyinka Cadaado iyo Dhuusamareeb ay laba dowladood ka sameysmaan oo mid waliba Galmudug sheeganeysa.

Caasimada Online
Xafiiska Muqdisho
[email protected]

Tukaraq-(caasimadda Online) – Xaalad degenaasho oo aan cago badan ku taagneyn ayaa ka jirta deegaanka Tukaraq ee gobolka Sool oo maalin ka hor dagaal culus uu ku dhaxmaray ciidamo ka kala tirsan maamulada Somaliland iyo Puntland.

Saacadaha soo socda ayaa lagu wadaa in ay deegaanka gaaraan wafdi ka socda maamulka Somaliland oo la sheegay in ay u kuurgali doonaan xaalada deegaanka, iyaga oo dhinaca kalana la kulmi doona saraakiisha ciidamada halkaa ku sugan.

Wararka ayaa sheegaya in wafdiga ka socda dhanka Somaliland ay booqan doonaan goobaha ay ku sugan yihiin ciidankooda, isla markaana ay u kuur galayaan xaalada.

Sidoo kale warar kale ayaa sheegaya in Wafdi ka socda Qaramada Midoobay, Midowga Africa, Dowladda Itoobiya iyo xubno ka tirsan Midowga Yurub ayaa maanta lagu wadaa iney gaaraan deegaanka Tukeraq ee gobalka Sool.

Wafdigaan ayaa xal u raadinaya dagaalka dhiigga badan ku daatay ee tan iyo Bilaawgii sanadkaan ka socday deegaanka Tukeraq kaas oo u dhaxeeya Ciidamo kala Taabacsan maamuladda Puntland iyo Soomaaliland.

Beesha caalamka ayaa horey ugu baaqday in la joojiyo dagaalka Tukaraq, waxaana ay ka dalbadeen dhinacyada dagaalamaya inay gaaraan heshiis xabad joojin shuruud la’aan ah.

Caasimada Online
Xafiiska Muqdisho
[email protected]

Muqdisho (Caasimada Online) – Maamulka Galmudug ayaa heshiis wada-shaqeyn oo qarsoodi ah la leh shirkad sirdoon oo ka dhisan dalka Mareykanka, sida ay baaritaan ku ogaatay Caasimada Online.

Ilo-wareedyo lagu kalsoon yahay ayaa Caasimada Online u sheegay in tan iyo bishii April ee sanadkan, ay shirkadda sirdoonoka SAACS Independent Intelligence Agency ay talooyin siineysay madaxweynaha Galmudug Axmed Ducaale Geelle Xaaf.

Lama yaqaan nooca talooyinkan iyo haddii shirkaddan ay deegaanada Galmudug ka fulineyso howl-gallo sirdoon. Waxaan sidoo kale caddeyn haddii dowladda federaalka Soomaaliya ay ka war-hayso arrintan.

Shirkadda SAACS Independent Intelligence Agency, ayaa waxa uu fadhigeedu yahay magaalada Miami ee gobolka Florida ee dalka Mareykanka, waxaana madax ka ah gabar Cuban-American ah, oo lagu magacaabo Marissa Santana.

Shirkadda SAACS Independent Intelligence Agency ayaa waxa ay sidoo kale tan iyo sanadii 2015 la shaqeyneysay shirkad Soomaali ah oo lagu magacaabo Galeyr Security Services Corps (GSS), oo Iyana dhanka ammaanka ka shaqeysa.

Caasimada Online
Xafiiska Muqdisho
[email protected]
.

Muqdisho (Caasimada Online) – Sida aan wararkeena hore ku sheegnay Xukuumada Somalia, gaar ahaan Wasaarada arrimaha dibadda Somalia ayaa horay sharci daro ugu tilmaantay heshiisyada ay Hogaamiyayaasha maamul Goboleedyada dalka la galayaan Dowladaha Shisheeye ee daneeya arrimaha Somalia.

Xukuumadu waxa ay horay u sheegtay in heshiisyadaasi inta badan ay ka dhacaan dalka dibadiisa, xili dowlada Somalia ay dhowr jeer ka digtay heshiisyo dhexmara  maamul Goboleedyada iyo Dowladaha Shisheeye.

Xukuumada Somalia oo dhinacyo badan ka eegeysa Heshiisyad qarsoodiga ah, ayaa iminka wada qorsho lagu hakinaayo xiriirka maamul Goboleedyada kala dhexeeya dowladaha shisheeye sida Kenya, Ethiopia iyo Imaaraadka carabta.

Qorshahaani ay wado Xukuumada Somalia ayaa waxaa kaalin weyn ka qaadanaaya oo la marin doonaa Danjirayaasha Beesha Caalamka ka jooga Somalia, oo inta badan fududeeya is araga Hogaamiyayaasha iyo dowladaha Shisheeye.

Sida uu Qorshuhu yahay Xiriirka maamul Goboleedyada kala dhexeeya Dowladaha Shisheeye ayaa hakat gali doona Bilaha fooda nagu soo haya, iyadoo heshiisyada loo mari doono dowlada Somalia oo qura.

Xukuumada Somalia, gaar ahaan Wasaarada Arrimaha Dibadda  ayaa horay u sheegtay in waxyaabaha ay ku dhaqaaqayaan Hogaamiyayaasha maamul Goboleedyada qaar ay dhaawac ku tahay qarannimada Somalia.

Sidoo kale, Qorshaha Xukuumada Federaalka ayaa ah in la xadido safarada Hogaamiyayaasha Maamul Goboleedyada oo la rumeysan yahay inay ka safar badan yihiin Madaxweynaha iyo Ra’isul wasaaraha dalka.

Ma cadda sida uu ku dhaqan gali doono qorshaha ay wado  Xukuumada Somalia, ee lagu hakin doono xiriir Siyaasadeedka ka dhexeeya maamul Goboleedyada iyo Dowladaha shisheeye.

Caasimada Online

Xafiiska Muqdisho 

[email protected]

Muqdisho (Caasimada Online) – Xildhibaanada baarlamaanka Somalia ayaa dalbaday in la horkeeno Wasiirka Wasaaradda waxbarashadda Soomaaliya Cabdiraxmaan Daahir Cusmaan.

Xildhibaanada ayaa dalbaday in Wasiirka uu hor imaado maanta oo sabti ah, iyadoo uu ujeedku yahay in su’aalo laga weydiiyo Xaaladda Waxbarashadda Soomaaliya.

Xildhibaanada ayaa Wasiirka su’aalo ka weydiin doona deeqaha waxbarashadda iyo Shaqaallaha Wasaaradda oo mugdi uu ku jiro.

Xildhibaanada qaar ayaa qaba in Wasiirka uu qaabab aan muuqan u maareeyo Waxbarashada iyo deeqaha ay hesho dowlada.

Cadaado (Caasimada Online) – Warar soo baxaaya ayaa sheegaya in Hoggaamiyaha maamulka Galmudug Axmed Ducaalle Geelle Xaaf uu ku dhawaaqi doono xukuumad cusub.

Xaaf ayaa lasoo sheegayaa inuu soo gabagabeeyay wadatashi uu la sameynaayay Xildhibaanada iyo Odayaasha Galmudug, waxaana lagu wadaa in Wasiirada cusub uu ku dhawaaqo maalmaha fooda nagu soo haya.

Wasiirada cusub ee la magacaabayo ayaa waxaa ka dhex muuqan doona Wasiiro hadda ku jira Xukuumada Galmudug.

Wasiirada horay uga tirsanaa Xukuumadda Xaaf ee  dib usoo laaban doona ayaa waxaa kamid ah Wasiirka Maaliyadda, Arrimaha Gudaha, Qorsheynta, Dekeddaha iyo Saadaasha Hawadda.

Hogaamiye Xaaf oo maalmahaani ku sugnaa magaalada Muqdisho ayaa shalay dib ugu laabtay magaalada Dhuusamareeb ee Caasimadda Galmudug, waxaana safarkiisa ku wehliyey Saadaq Sheekh Yuusuf wakiilka Ahlu Sunna.

Xaaf ayaa lagu waddaa in uu Magaalada Dhuusamareeb uu kaga dhawaaqo Golaha Wasiirada cusub ee uu yeelan doono maamulka Galmudug.

Magaalooyinka Muqdisho iyo Cadaado ayaa waxaa shalay ilaa xalay ka socday shirar looga arinsanayo qorshaha lagu doonaayo in lagu magacaabo Golaha Wasiirada cusub ee maamulka, waxaana jira warar hoose oo sheegaya in Khilaaf xoogan uu ka taagan yahay hanaanka loo maray qeybinta kuraasta.

Sidoo kale, Xaaf ayaa la qorsheynayaa in dhanka Ahlusuna uu ka keeni doono Wasiirada Amniga, Waxbarashadda iyo Caddaaladda, sida ay xaqiijiyeen Mas’uuliyiin ka tirsan Galmudug.

Ma cadda sida Golaha Wasiirada cusub lagu marin doono baarlamaanka maamulka oo qudhooda la sheegay inay isku hayaan awood qeybsiga Wasaaradaha.

Caasimada Online

Xafiiska Cadaado

[email protected]

Muqdisho (Caasimada Online) – Warar hoose oo aan helnay ayaa sheegaya in maamulka Gobolka Banaadir uu xilka ka xayuubiyay 12 Gudoomiye waaxeed oo hoostaga Seddex Degmo oo ka tirsan Gobolkan Banaadir.

Wararku waxa ay sheegayaan in Guddoomiye waaxeedyada ay xilkooda ku waayen dayacaad lagu eedeeyay kuwaa oo ka tirsanaa degmooyinka Kaaraan, Heliwaa iyo Yaaqshiid.

Xil ka qaadista Guddoomiye waaxeedyada ayaa soo degdegtay kadib dacwooyin ka dhan ahaa oo u gudbay maamulka sare ee Gobolka Banaadir, waxaana xigay xil ka xayuubintooda.

Dacwadaha Guddoomiye waaxeedyada xilka laga qaaday ee dacwadooda ay u gudubtay maamulka Gobolka ayaa waxaa kamid ahaa in wada shaqeyn uusan kala dhexeen Guddoomiyayaasha Degmooyinka.

Maamulka Gobolka Banaadir weli kama uusan hadal xil ka qaadista Guddoomiye waaxeedyada, inkastoo warar madaxbanaan ay sheegayaan in mas’uuliyiinta xilka laga qaaday ay ka biya diidan yihiin.

Dhawaan ayey aheyd markii Ra’isul wasaare Xasan Cali Kheyre uu ka digay in wada shaqeyn ay u dhexeyn weydo maamulka Gobolka iyo Degmooyinka, isagoo sheegay in wixii amniga khuseeya lagula xisaabtami doono Guddoomiyayaasha degmooyinka.

Caasimada Online

Xafiiska Muqdisho

[email protected]

Muqdisho (Caasimada Online) – Ra’isul wasaaraha Xukuumada Somalia Xasan Cali kheyre iyo wafdi uu hoggaaminayo ayaa gaaray magaalada Addis-Ababa ee dalka Ethiopia.

Ra’isul wasaare Kheyre iyo wafdigiisa ayaa waxaa Garoonka Aadan Cadde ee magaalad Muqdisho ka sagootiyay Wasiiro ka tirsan Xukuumada iyo tirro Xildhibaano ah.

R’isul wasaare Kheyre ayaa casuumaad ka helay dhigiisa dalka Ethiopia Abiy Ahmed.

Mid kamida Xildhibaanada wehlinaaya Ra’isul wasaaraha ayaa inoo xaqiijiyay in labada mas’uul ay kawada hadli doonaan qodobo ay kamid yihiin heshiiska dekedda Berbera oo ay Ethiopia qeyb ka tahay, xiriirka Ethiopia ay la leedahay maamul goboledyada Soomaaliya, oo dowladda aysan raali ka ahayn iyo ciidamada Ethiopia ka joog Somalia. Waxaa sidoo kale qeyb ka ah khilaafka Somalia kala dhexeeya Imaaraadka.

Socdaalkan ayaa imanaya ayada oo maanta ay Caasimada Online ay shaacisay in agaasimaha madaxtooyada Soomaaliya Fahad Yaasin uu toddobaadkan socdaal ku tagey dalka Ethiopia.

Dowladda federaalka Soomaaliya ayaa ka walaacsan tallabooyinka ra’iisul wasaaraha cusub ee dalka Ethiopia Abiy Ahmed, ee ku aaddan siyaasadda arrimaha gudaha Soomaaliya, sida ilo-wareedyo lagu kalsoon yahay ay u sheegeen Caasimada Online.

Wararka ayaa sheegaya in dowladda ay u aragto mid aan habbooneyn xiriirka uu Abiy Ahmed la sameynayo qaaar ka mid ah maamul goboleedyada dalka, inkasta oo uu hoey u ballan-qaaday inuu dalka ku ixtiraamayo dowladda federaalka.

Abiy Ahmed ayaa dhowaan dalkiisa kula kulmay Axmed Madoobe, oo madax ka ah maamulka Jubbaland ee Soomaaliya, islamarkaana qorsheeyey kulamo kale oo uu la yeesho madax kale oo ka mid ah kuwa maamul goboleedyada.

Sida warku sheegayo, Fahad ayaa ka codsaday mas’uuliyiointa dalkaas inay ixtiraamaan madax banaanida dalka.

Waxaa sidoo kale la sheegay inuu kala hadlay socdaal uu Abiy Ahmed dhowaan ku tagey dalalka Sacuudiga iyo Imaaraadka, oo Soomaaliya aysan isku wanaagsaneyn. Ethiopia ayaa ka mid ah dalalka isku dayaya inay dhex-dhexaadiyaan Soomaaliya iyo Imaaraadka Carabta.

Caasimada Online
Xafiiska Muqdisho
[email protected]

Muqdisho (Caasimada Online) – Wasaaradda amniga xukuumadda federaalka Soomaaliya ayaa waxa ay si faah faahsan uga hadashay dhacdadii maalin ka hor ka dhacday Koontaroolka Ciidanka NISA ku leeyihiin agagaarka KM-0 ee magaalada Muqdisho.

Dhacdada ayaa waxa ay la xiriirtay in askari ka tirsan ciidanka ku sugnaa Barta Kontorool uu hal xabad ku riday gaari uu la socday Xildhibaan Xildhibaan C/llaahi Maxamed Nuur oo ka tirsan Golaha Shacabka, kadib markii uu ka gudbay barta kontorool.

Wasaaradda amniga ayaa qoraal ay soo saartay ku tiri “Wasaaradda amniga Gudaha Xukuumadda Federaalka Soomaaliya waxay Shacabka Soomaaliyeed iyo Xildhibaannada Golaha Shacabka la wadaageysaa shil kooban oo maalin kahor xilli galabnimo abbaarahihii 5:30-PM ka dhacday barta koontaroolka Ciidamada Amniga ay ku leeyihiin KM-0 ee magaalada Muqdisho, waxaa goobta ka dhacday hal xabbad oo kaliya taas oo askari ka tirsan ciidamada uu kor ugu riday digniin ahaan kadib markii uu ka shakiyay gaari ka gudbay barta kontorool.”

Sidoo kale Wasaaradda amniga ayaa qoraalkeeda waxay ku sheegtay in ay bilowday baaritaanada la xiriira dhacdadaas, dibna ay ka soo saari doonto wixii go’aan ah, iyada oo sidoo kale tilmaamtay in ciidamada ay habeen iyo maalin diyaar u yihiin inay naftooda u huraan difaaca muwaadiniinta Soomaaliyeed oo dhan.

Wasaaradda amniga ayaa waxa ay sheegtay in ciidamada ay amar ku qabaan in ay ilaaliyaan amniga Xildhibaannada iyo Mas’uuliyiinta Dowladda, islamarkaana dhowraan xasaanadda Xildhibaannada labada Gole ee Baarlamaanka oo laguma xad gudbaan ah.

Ugu dambeyntii Wasaaradda ayaa tilmaamtay in ay aad uga xun tahay wararka aan salka lahayn ee laga faafiyey ciidamada amniga, waxayna ugu baaqday dhammaan Xildhibaannada iyo Mas’uuliyiinta Dowladda oo dhan inay iska ilaaliyaan faafinta iyo ka qeyb qaadashada wararka lidka ku ah ciidamada oo khalkhal gelinaya xasiloonida iyo Dowladnimada.

Madaxweynaha Jamhuuriyadda Federaalka Soomaaliya Maxamed Cabdullaahi Farmaajo ayaa mar kale ku celiyay in si shuruud la’aan ah loo joojiyo dagaalka ka socda deegaanka Tuka-raq ee Gobolka Sool, isaga oo caddeeyay in Dowladda Federaalka Soomaaliya ay sameysay, walina ay waddo dadaal kasta oo lagu baajin karo in la daadiyo dhiiga dadka Soomaaliyeed.

Madaxweynaha oo maanta hadalkan ka jeediyay khudbadii Jimcaha keddib Masjidka Shuhadada ee Villa Soomaaliya ayaa hoosta ka xariiqay in dagaallada iyo muusiibooyinka soo noqnoqda looga gudbi karo in shacabka Soomaaliyeed ay Allaah waydiistaan dambi dhaaf, ayna la yimaadaana isku duubni iyo midnimo.

Madaxweynaha ayaa yiri “Waxaan rabaa inaan baaq u jeediyo dadka Soomaaliyeed ee dhiigga ku daadinaya magaalada Tuka-raq. Waxaan leeyahay xabad joojin degdeg ah hala sameeyo, dhiiga daadanayana hala baajiyo. Waxa dhimanaayo waa wiilal Soomaaliyeed. Annagu ka dowlad ahaan wixii karaankeenna ah waan sameynay. Waan isku daynay Alle hortiisa inaan baajinno dhiigaas.”

Madaxweyne Farmaajo ayaa ugu baaqay shacabka Soomaaliyeed in ay gacmaha isqabsadaan, ayna gargaar u fidiyaan walaalaha Soomaaliyeed ee ay dhibaatada kasoo gaartay roobabkii iyo duufaannadii maalmo kahor ku dhuftay qeybo kamid ah Somaliland iyo Puntland iyo fatahaadaha Wabiyada Shabeelle iyo Jubba oo iyaga laftooda sababay barakac baahsan iyo burbur hantiyeed.

Madaxweyne Maxamed Cabdullaahi Farmaajo ayaa uga mahad celiyay dalalka aan saaxiibka nahay iyo hay’adaha samafalka ee garab istaagay walaalaha Soomaaliyeed ee ay saameeynta xooggan ku yeesheen duufaannada iyo daadadka ku dhuftay qeybo kamid ah dalka.

Madaxweynaha Jamhuuriyadda ayaa adkeeyay muhiimadda ay leedahay in hay’adaha amniga lagala shaqeeyo sidii loo sugi lahaa nabadgelyada dalka, loogana adkaan lahaa kooxaha argagixisada ah ee doonaya in ay maalin walba dhibaateeyaan dadka Soomaaliyeed ee gudanaya waajibaadka bisha barakeysan ee Ramadaan.