Galcad (Caasimada Online) – Ciidanka xoogga dalka, gaar ahaan kumaandooska Danab ayaa shacabka ku nool degmadda Galcad ee gobolka Galgaduud u qeybiyey raashin, sidoo kale degaano kale oo hoos taga Galcad ayuu ciidanka Danab deeqdaan gaarsiiyey.

Deeqdaan oo bulshada deegaankaas ay aad ugu baahnaayeen waxay isugu jirtay raashinka noocyadiisa kala duwan, waxayna ciidanku ugu tala galeen qoysaska aad u liita ee Galcad iyo aageeda ku nool.

Degaanada deeqdaan ay gaarsiiyeen ciidanka xoogga dalka, waxaa kamid ah Ceel-Xaaji, halkaas oo markii raashinka laga qeybinayey ay ku sugnaayeen xildhibaano ka tirsan baarlamaanka federaalka Soomaaliya oo metela dadka ku nool deegaanadaas.

Qoysaska qaar waxaa la sheegay in Al-Shabaab ay xoolahoodii ka dhaceen ama dileen xubnihii qoysaskaas u firfircoonaa ee u dhaq-dhaqaaqayey, maadaama ay sanado badan Galcad heysteen.

In Al-Shabaab 15 sano ka badan ay Galcad xukumayeen waxaa u dheer, inay mar dhexe dib ugu soo laabteen oo ka aar guteen cid kasta oo la shaqeysay ama ay tuhmeen inay wax un cilaaqaad ah la yeelatay ciidamada dowladda.

Ciidanka xoogga dalka oo Galcad ka xoreeyey kooxda dhowr bilood ka hor ayaa mar soo baneeyey degmadaas, kadib markii weerar cagmarin ah ay ku soo qaaday kooxdu, taas oo keentay in shacabku ay aad uga cabsadaan la shaqeynta ciidanka dowladda.

Weerarkii sababay in ciidanku dib uga soo baxo Galcad, waxaa lagu dilay taliye ku xigeenkii ciidanka Danab Allaha u naxariistee Xasan Tuure oo door-weyn ku lahaa in kooxda laga xoreeyo gobollada Hiiraan, Shabeellada Dhexe iyo Galgaduud qeybo ka mid ah oo markii dambe lagu dilay.

Ciidanka dowladda ayaa aad loogu amaanaa sida ay u caawiyaan bulshada ku nool deegaanada ay ka xoreeyaan kooxda Al-Shabaab oo si daran u cunaqabateysa bulshada ku nool deegaanada ay dalka ka joogaan.

Muqdisho (Caasimada Online) – Maamulka Gobolka Banaadir ayaa soo saaray go’aano rasmi ah oo lagu xirayo hoteellada iyo maqaayadaha lagu isticmaalo maan-dooriyaha eek u yaalla magaalada Muqdisho.

Go’aanka ka soo baxay maamulka gobolka ayaa dhigaya in si isku mid ah loola dagaalami doono kooxda Al-shabaab iyo cidii hadda kadib lagu arko goob lagu sameynayo ansha xumadii uu habeenadaan la dagaalamayey duqa Muqdisho.

Waxaa la xiray in la xiro dhamaan goobaha lagu isticmaalo maan-dooriyaha, cidii ka dhega adeygta amarka maamulka waxaa loogu goodiyey sharciga lala tiigsa doono.

Sidoo kale maamulka gobolka Banaadir wuxuu go’aankaan ku cadeeyey xarumaha ganacsi ee lagu isticmaalo maan-dooriyaha, una hoggaansami waaya go’aankaan lagala noqa doono shatiga ganacsi.

“Waa lagama maarmaan in la xiro goobaha lagu isticmaalo maan-dooriyaha ee ku yaalla magaaladaan Muqdisho,” ayaa lagu yiri go’aanada ka soo baxay maamulka gobolka.

Sidoo kale maamulka ayaa cadeeyey in fasahaad culus uu ku socdo dhalinyarada Soomaaliyeed, isla markaana bulsho badan ay ka soo cabatay waxyaabaha lagu sameeyo ama lagu isticmaalo hoteellada iyo maqaayadaha qaar.

“Laga bilaabo maanta, waxaa la xiray goobaha lagu isticmaalo maan-dooriyaha iyo wax kasta oo anshaxa iyo akhlaaqda lidi ku ah, cidii hadda kadib lagu arko goobahaas waxaa laga qaadi doonaa tallaabo waafaqsan sharciga,” ayuu yiri afhayeenka maamulka gobolka Saalax Xasan oo bayaanka akhriyey.

Sida lagu cadeeyey go’aanadaan waxaa sii soca doona howlgallada ka dhanka ah arrimahaan laga digayo ee maamulka gobolka Banaadir uu soo waday labadii habeen ee lasoo dhaafay.

“Howlgalladu waa soca doonaan, waxaana sida Khawaarijta loola diriri doonaa goobaha lagu gado ama laga soo dejiyo maan-dooriha,” ayuu yiri Afhayeenka maamulka gobolka maamulka gobolka Banaadir Saalax Xasan oo go’aanadaan cusub u akhriyey warbaahinta.

Hoos ka daawo

Muqdisho (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta Madaxtooyada Qaranka kulan kula qaatay Wasiirka Arrimaha Dibadda dalka Burundi Mudane Albert Shingiro oo booqasho ku jooga caasimadda dalka ee Muqdisho.

Wasiirka ayaa soo gaarsiiyey Madaxweynaha farriin iyo salaan uu ka siday Madaxweynaha dalkiisa Mudane Évariste Ndayishimiye, iyada oo dowladda Burundi ay hoosta ka xariiqday muhiimadda nabadda iyo xasilloonida Soomaaliya ay u leedahay gobolka iyo adduunka.

Sidoo kale, Wasiirka ayaa sheegay in dalkiisu ay bogaadinayaan guulaha deg-degga ah ee dowladda Soomaaliyeed ay ka gaartay dagaalka lagula jiro argagixisada Al-Shabaab, isaga oo sheegay in dalkiisu ay garab taagan yihiin shacabka iyo dowladda Soomaaliyeed.

Madaxweynaha Soomaaliya ayaa dhankiisa waxa uu kala hadlay Wasiirka xoojinta xiriirka labada dal, wuxuuna xusay in shacabka iyo dowladda Soomaaliyeed ay soo dhawaynayaan booqashadiisa, taasi oo ka tarjumeysa hor u socodka dowladnimada Soomaaliyeed iyo dib u kabashada dalka.

Mudane Albert Shingiro ayaa Axadii soo gaaray dalka, wuxuuna horkacaya wafdi ballaaran oo uu qeyb ka yahay General Silas Ntigurirwa oo ah la-taliyaha Madaxweynaha Burundi ee dhanka ciidamada.

Wasiir Albert Shingiro ayaa waxaa Muqdisho ku soo dhaweeyay dhiggiisa Soomaaliya, Abshir Cumar Jaamac (Huruuse) oo ay yeesheen wada-hadallo gaar ah, kuwaasi oo diiradda lagu saaray taageerada xagga ammaanka ee Burundi ay siiso Soomaaliya, iyagoo qayb ka ah howl-galka ATMIS.

Burundi ayaa ka mid ah waddamada dhanka militariga ka taageera Soomaaliya, waxayna qayn ka yihiin howl-galka ATMIS ee ururka Midowga Afrika.

Si kastaba, Soomaaliya ayaa waxaa haatan ka socdo dagaal culus oo ka dhan ah kooxda Al-Shabaab, iyada oo dhawaan uu si rasmi ah u bilaaban doono wejiga labaad ee dagaalka oo qeyb ka noqonayaan waddamada ciidamada ka joogaan dalka.

Kismaayo (Caasimada Online) – Ciidamada xoogga dalka iyo kuwa Daraawiishta Jubbaland ayaa howl-gal ay ka sameeyeen deegaano ka tirsan gobolka Jubbada Hoose ku bur-buriyay xarumo ay ku dhuumaleysanayeen kooxda Al-Shabaab.

Xarumaha la bur-buriyay ayaa ku kala yaallay deegaanada Buula-madeey iyo Alamgaab oo ka tirsan gobolkaasi, ayada oo inta uu socday howl-galka ciidamada saareen miinooyin dhowr ah oo ay kooxda ku aastay waddooyinka.

Howl-galkan oo ahaa mid qorsheysan ayaa sidoo kale waxaa lagu dilay illaa iyo siddeed dagaal-yahaan oo ka tirsan kooxda Al-Shabaab, kuwaasi oo ay toogteen ciidamada huwanta ee howl-galka ka fuliyay deeganadaasi.

Howl-galadan ayaa ujeedka ahaa mid lagu xaqiijinayo amniga degaanada maamulka Jubbaland, kuwaasi oo sii socon doona inta guud ahaan kooxda laga sifeeynayo degaanada ay kaga dhuumaaleeysanayaan Jubbada Hoose, sida uu warbaahinta u sheegay wasiirka warfaafinta dowlad-goboleedka Jubbaland Saleebaan Maxamad Maxamud.

Wasiir Saleebaan ayaa sidoo kale waxa uu sheegay in dhawaan ay bilaaban doonaan howl-galo si wada-jir ah u fulinayaan ciidanka xoogga, kuwa Jubbaland iyo saaxiibada caalamka ah, kuwaasi oo lagu beegsanayo kooxda Al-Shabaab iyo deegaanada ay kaga sugan yihiin gobollada Jubbooyinka.

Bulshada deegaanadaasi ayuu ugu dambeyntiina wasiirku ugu baaqay inay ka qeyb qaatan howl-galka, si kooxda looga xoreeyo deegaanada maamulka Jubbaland iyo dalka guud ahaan.

Howl-galkan ayaa imanaya xilli maalmihii u dambeeyay uu dagaalka Al-Shabaab si dardar leh uga socda deegaanada maamulka Jubbaland, iyada oo dhawaan madaxweynaha Jubbaland uu tegay Afmadow oo muhiim u ah gulufka dagaal ee Jubbaland ay ku wajaheyso kooxda.

Al-Shabaab waxay Jubbaland ka joogaan dhul baaxad leh, waxaana halka maamul oo gobol buuxa ay ka xukumaan Al-Shabaab, gobolkaas waa Jubbada Dhexe.

Sidoo kale waxaa xusid mudan in seddaxda gobolka ee Jubbaland la isku yiraahdo, ay labada gobo lee kale mid-ba qeyb ka joogaan, markii laga reebo Jubbada Dhexe oo ay wada xukumaan.

Marar badan waxaa madaxweynaha maamulkas lagu eedeeyey inuu ka caga jidayo in kooxda laga xoreeyo dhulka baaxadda leh oo Jubbaland ay ka joogaan, waxayna kooxdu si lamid ah gobollada kale weerarro culus ka fulisaa deegaanada Jubbaland.

Muqdisho (Caasimada Online) – Magaalada Muqdisho ee caasimada Soomaaliya waxaa haatan ku sugan wafdi ballaaran oo uu hogggaaminayo wasiirka arrimaha dibadda ee dalka Burundi, Mudane Albert Shingiro, kaas oo Axaddii lagu soo dhoweeyay garoonka Muqdisho.

Wafdigan ayaa waxaa sidoo kale qayb ka ah General Silas Ntigurirwa oo ah la-taliyaha Madaxweynaha Burundi ee dhanka Ciidamada, kaas oo u yimid kormeerka ciidankooda.

Wasiir Albert Shingiro ayaa waxaa Muqdisho ku soo dhaweeyay dhiggiisa Soomaaliya, Abshir Cumar Jaamac (Huruuse) oo ay yeesheen wadahadallo gaar ah.

Labada mas’uul ayaa kulankooda diiradda ku saaray taageerada xagga ammaanka ee Burundi ay siiso Soomaaliya, iyagoo qayb ka ah hawlgalka ATMIS.

Wasiir Huruuse ayaa sidoo kale dhiggiisa dalka Burundi uga mahadceliyay kaalinta muhiimka ah ee ay ku leeyihiin howlgalka ATMIS ee Ciidamada Midowga Afrika.

Sidoo kale waxaa la filayaa in wafdigan ay la kulmaan madaxweynaha Soomaaliya Xasan Sheekh Maxamuud, si ay ula yeesheen wadahadallo ku aadan xiriirka labada dal.

Sidoo kale waxaa  la sheegay in la wadaagi doonaan dhanbaal ay ka sidaan madaxweynaha Burundi Évariste Ndayishimiye, si ay u gaasiiyaan madaxweyne Xasan Sheekh Maxamuud.

Burundi ayaa ka mid ah waddada dhanka milatariga ka taageera Soomaaliya, waxayna qayn ka yihiin howlgalka ATMIS ee ururka Midowga Afrika.

Si kastaba, Soomaaliya ayaa waxaa haatan ka socdo dagaal culus oo ka dhan ah kooxda Al-Shabaab, kaas oo ka qayb qaadanayaan waddamada ay ciidamada ka joogaan dalka.

Muqdisho (Caasimada Online) – Waxaa marba marka ka dambeysa sii xoogeysanaya guuxa siyaasadeed ee ka dhashay mooshinka laga wado xukuumadda DanQaran ee uu hoggaamiyo ra’iisul wasaare Xamza, kaas oo si weyn looga hadal hayo baraha bulshada.

Mooshikan ayaa waxaa lagu soo warramayaa in ay diyaarinayaan qaar kamid ah Xildhibaanada Baarlamaanka Federaalka Soomaaliya, kuwaas oo raba in lagu rido xukuumadda aan sanad jirsan ee uu hoggaamiyo ra’iisul wasaare Xamza.

Sida ay ogaatay Caasimada Online abaabulka mooshinkan ayaa haatan si xawli ah u socda, ayada oo Xildhibaanada hormuudka u ah qorshahaan ay isku dayayaan inay taageero u helaan mooshinkooda.

Sidoo kale xildhibaanadaan ayaa xiriir la sameeyay qaar kamid ah saaxiibadooda Baarlamaanka, kuwaasi oo ay ka dalbadeen inay ka qeyb qaatan mooshinka lagu ridayo xukuumadda Xamza, sida ay ogaatay Caasimada Online.

Dhanka kale xukuumadda Soomaaliya ayaa dhankeeda ka hadashay arrintan, waxaana si gaar ah jawaab uga bixiyay agaasimaha warfaafinta ee xafiiska ra’iisul wasaaraha.

Farxaan Maxamed Jimcaale oo war kooban soo saaray ayaa u jawaabay xildhibaanada wada mooshinka, isaga oo sheegay in dalka uu ku jiro marxalad dagaal, sidaas darteedna aan loo baahneyn in la abuuro xiisad siyaasadeed.

Sidoo kale waxa uu tilmaamay in xukuumadda federaalka ay haatan ku howlan tahay dhammeystirka dastuurka iyo denyn cafinta.

“Miyaanay ogeyn in Dowladda iyo Dadkuba dagaal ay ku jiraan — weliba #DanQaran ay u sii dheer tahay Deyn cafinta iyo Dastuurka in la soo afjaro 2023!” ayuu yiri Farxaan Jimcaale.

Wasiirka haweenka iyo xuquuqul insaanka Khadiijo Maxamed Diiriye oo dhankeeda qoraal soo saartay ayaa difaacday xukuumadda, maadaama ay ka tirsan tahay, waxayna sheegtay in dalka ay hormar weyn gaarsiiyeeen ra’iisul wasaaraha iyo madaxweynaha.

“XJFS EE RW Hamza Abdi Barre & GUUD AHAAN DJFS EE MW Hassan Sheikh Mohamud OO JIDKA MAKKAH-ALMUKARAMA DHAAFTEY MOOSHIN HOWGA BAQINA” ayay qoraalkeeda ku tiri wasiir Khadiijo Diiriye.

Si kastaba, Xukuumadda ra’iisul wasaare Xamza ayaa muddooyinkii dambe wajaheysay dhaliilo xooggan oo la xiriira hab maamulkeeda iyo shaqada loo igmaday, ayada oo dhawaana uu weerar ku qaaday Xildhibaan Cabdiraxmaan Cabdishakuur Warsame.

Muqdisho (Caasimada Online) – Warar dheeraad ah ayaa kasoo baxaya howlgal qorsheysan oo xalay laga sameeyay qaybo kamid ah magaalada Muqdisho kaas oo lagu soo qabtay hub iyo dharka tuutaha ee ay xirtaan ciidamada milatariga dowladda Soomaaliya.

Howlgalkan oo uu hoggaaminayay guddoomiyaha gobolka Banaadir Yuusuf Xuseen Jimcaale (Madaale) ayaa waxaa wajigiisa labaad laga sameeyay degmooyinka Hodan iyo Wadajir.

Ciidamada ayaa gudaha ugu daatay dhowr xarumood oo ku yaalla halkaasi, kuwaas oo isugu jiro hoteello iyo goobo ay ku caaweeyaan dhalinyarada, xilliyada habeenkii ah.

Guddoomiye ku xigeenka amniga iyo siyaasadda ee gobolka Banaadir, Maxamed Axmed Diiriye (Yabooh) oo howlgalka kadib la hadlay warbaahinta ayaa shaaciyay in ciidamadu ay kasoo qabteen mid kamid ah hoteellada ay galeen saddex qoray iyo dharka tuutaha ee ay xirtaan milatariga, kuwaas oo uu tilmaamay inay ku wareejiyeen hay’adaha amniga.

“Meelihii aan tegnay meel kamid ah oo magaceeda la yiraahdo Saba waxaa lagu qabtay dareeska ciidamada milatariga oo ka kooban 45 joog iyo saddex qoray oo AK47 ah, waxaana ku wareejinay taliska qaybta guud ee booliska gobolka Banaadir,” ayuu yiri.

Sidoo kale waxa uu intaasi ku daray in ciidamada ammaanka ay gudaha u galeen xarun kale oo ay ku sugnaayeen dhalinyaro isugu jiro wiilal iyo gabdho, isla-markaana lagu sameynayay waxyaallo ka baxsan anshaxa, sidoo kalena lagu isticmaalayay maandooriye.

Yabooh oo hadalkiisa sii wata ayaa tilmaamay in howlgalladu ay sii socon doonaan, isla-markaana ujeedka uu yahay la dagaalanka maandooriyaha iyo dhaqan xumada.

“Waxaa sidoo kale kamid ah meelaha aan tegnay Boosh oo dhalinyaro fara badan oo waqti xilli dambe ah halkaas oo nalalka ay u dansan yihiin aan ku aragnay, marka waxaan rabnaa howlgalkan isaga ah muddo inuu sii socdo” ayuu hadalkiisa raaciyay guddoomiye Yabooh.

Howlgalkan ayaa waxaa wajigiisa koowaad habeen hore laga sameeyay xeebta Liido, kadib markii uu duqa Muqdisho gudaha u galay kalaabyo ku yaalla halkaasi, kadibna uu xiray.

Muqdisho (Caasimada Online) – Xildhibaanada Baarlamaanka Federaalka Soomaaliya ayaa ku kala qeybsamay mooshin ka dhan ah xukuumadda ra’iisul wasaare Xamza Cabdi Barre, kaasi oo ay wadaan qaar kamid ah xildhibaanada.

Xildhibaanada kasoo horjeestay mooshinkan oo la rabo in lagu rido xukuumadda aan sanad jirsan ee uu hoggaamiyo ra’iisul wasaare Xamza, ayaa waxay ku doodayaan in aan xilligaan la wiiqin dagaalka ka dhanka kooxda Al-Shabaab, oo aan fursan la siin argagixisada.

Xildhibaan Maxamed Cabdi Xayir Maareeye oo kamid ah xildhibaanada kasoo horjeeda mooshinkan ayaa waxa uu sheegay in waxx walba ay ku noqonayaan Zero oo ka dhigan halkii hore looga soo qaaday, marka loo eego horumarka laga sameeyay amaanka caasimadda dalka ee Muqdisho iyo gulufka dagaal ee ka dhanka ah kooxda Al-Shabaab.

“Xildhibaano aanu saaxiibonahay oo meelo kala duwan jooga ayaa habeenadan ila soo xidhiidhaya oo igala hadlaya in aan ka qayb-qaato kambayn-ka Mooshin lagu ridayo Xakuumadda Ra’iisul Wasaare Xamse,” ayuu yiri qoraal uu Xildhibaan Xayir Maareeye soo dhigay bartiisa Facebook.

Waxa uu intaas kusii daray “Saaxiibaday waxaan u sheegay in inkasta oo aanan ka mid ahayn Xukuumada RW Xamse hadana in aanan jecelayn in la rido xukuumada, waayo waxaan ku faraxsanahay oo dawladda ku amaanayaa dagaalka ay kula jirto argagixisada iyo sida ay wax uga qabatay Amniga Magaalooyinka qaar sida Muqdisho, hadii hada la furo muran siyaasadeed ama xukuumada la ridona wax waliba waxay ku noqonayaan zero.”

Xildhibaan Maxamed Cabdi Xayir Maareeye ayaa sidoo kale waxa uu iftiimiyay in mooshinka ka dhanka ah xukuumadda lagu rabo dano gaar ah, islamarkaana meesha ka saarayan rejada iyo dowlad-dhiska umadda Soomaaliyeed, taasi oo dabada ka riixayaan dowladda shisheeye, sida uu hadalka u dhigay.

“Illaa xiligii UNITAF ee 1993, waxaan u soo joogay oo qibrad weyn u leeyahay sida markasta oo Soomaaliya ay u soo ifto nabad, deganaansho iyo dawladnimo sida ay dawlado caan ah oo la yaqaan oo adeegsanaya Wakiilo gudaha ah oo marxali ah (marba ninkii xanaaqsan ee dareen qabiil ama mid xil shidayo) dhabarka uga jebin jireen oo u kala tuuri jireen rajada iyo dawlad dhiska ummadda Soomaaliyeed.”

Ugu dambeyntiina waxa uu sheegay in maanta oo mooshin iyo buuq siyaasadeed la furo ay la mid tahay “Shabaab waa sii jabayaa haloo hiiliyo oo dalka ha joogo, deynta ayaa la cafinayaa oo dalka maalgashi baa imaanaya ee hala kala tuuro oo dalka iyo dadku tuugsigoodii ha ku sii jireen, shirarkii Madasha, Dhameystirka Dastuurka, dhismaha Dawlad dhiska ee hawluhu ka socdaan hala istaajiyo,”

“Waxaas oo dhana sidii aan arki jiray waxaa dabada ka riixaya oo Qarash ku bixinaya Dawlado Shisheeye. Xildhibaanada walaalahay ah waxaan kula talinayaa yaan sidaas la yeelin ee dalka iyo dadka haloo tudho,” ayuu Xildhibaanka ku yiri qoraalkiisa.

Si kastaba, Mooshinkan cusub ee ka dhanka ah xukuumadda ra’iisul wasaare Xamza ee wadaan Xildhibaano ka tirsan Baarlamaanka Federaalka Soomaaliya ayaa waxa uu kusoo aadaya xilli uu dalka ka socdo guluf dagaal oo kooxda Al-Shabaab ka dhan ah.

Galcad (Caasimada Online) – Ciidanka xoogga dalka iyo kuwa dib u xoreynta deegaanka ayaa howlgal qorshaysan oo ay ka sameeyeen deegaanka Ceel-Qansax oo hoos taga degmada Galcad ee gobolka Galgaduud waxay ku soo qabteen gaadiid looga shakiyey inuu sahay u siday Al-Shabaab.

Ciidanka ayaa sidoo kale burburiyey fariisimo ay si qarsoodi ah isaga soo abaabulayeen maleeshiyaad ka tirsan kooxda Al-Shabaab, sida ay warbaahinta u sheegeen saraakiishii hoggaamineysay howlgalka.

Ciidanka Qaranka sidoo kale nolosha ku qabtay ilaa iyo shan ka tirsan Maleeshiyada Al-Shabaab, sida ay saraakiishu u xaqiijiyeen Caasimada Online.

Sidoo kale ciidanka ayaa gacanta ku dhigay gaari nooca xamuulka qaada ah oo loo yaqaano BG, kaas oo la sheegay ama looga shakiyey inuu saanad ciidan, sahay raashin iyo shidaal ah u sido kooxda Al-Shabaab.

Xildhibaan Cabdirisaaq Xusul oo ka tirsan golaha shacabka, isla markaana laga soo doorto bariga gobolka Galgaduud ayaa ka mid ahaa masuuliyiintii hoggaamineysay ciidanka fuliyey howlgalka lagu soo qabtay gaariga iyo maleeshiyaadka la aaminsan yahay inay ka tirsan yihiin kooxda Al-Shabaab.

Xildhibaan Xusul oo warbaahinta la hadlay ayaa sheegay inay baaritaan ku hayaan gaadiidka iyo ragga la qabtay, isla markaana ay dib bulshada ula soo wadaagi doonaan wixii ka soo baxa baaritaanka.

“Waxa aan soo qabanay hal gaari kaliya ma ahan, sidoo kale waxaa jira maxaabiis badan oo gacanta lagu hayo, dowladdu waa baareysaa gaadiidkaan, oo sida alaab u badan saadka ciidamada, waana sii baari doonaa,” ayuu yiri Xusul.

Sidoo kale xildhibaanka ayaa u tacsiyeeyey odayaashii ay maalin ka hor Al-Shabaab ku dileen weerarkii ay ku qaadeen deegaanka Mesagawaa ee gobolka Galgaduud, isagoo wax laga xumaado ku tilmaamay in kooxdu ay mar kasta disho dadka birimageydada ah.

Guud ahaan ammaanka deegaanka howlgalka laga fuliyey ee Ceel-Qansax ayaa la xaqiijiyay, sida saraakiil ka tirsan ciidanka xoogga dalka ay u xaqiijiseen Caasimada Online.

Hoos ka daawo warbixin uu Galcad ka soo diray Weriye ka tirsan warbaahinta dowladda Soomaaliya

Muqdisho (Caasimada Online) – Guddoomiyaha gobolka Banaadir, ahna duqa magaalada Muqdisho Mudane Yuusuf Xuseen Jimcaale (Madaale) ayaa wacad ku maray in uusan aqbali doonin kalaabyada ka furan Muqdisho iyo anshax xumada taalla caasimadda.

Guddoomiye Madaale ayaa xalay hoggaaminayay howl-gal aan hore loogu baran maamulka gobolka, kaasi oo ka dhacay xeebta Liido ee degmada Cabdicasiis, iyada oo gudoomiyaha uu gudaha u galay mid kamid ah kalaabyada ku yaalla halkaasi.

Kalaabyadaasi ayaa waxaa xilligaasi ku sugna dhalinyaro badan oo rag iyo dumar leh, iyada oo gudddoomiyaha uu garaacay wiilasga gabdhaha ku jiray kalaabka, kuwaasi oo la sheegay inay isticmaalayeen maandooriye.

Guddoomiye Madaale ayaa qoraal uu soo saaray kadib howl-galkii xalay waxa uu ku sheegay in magaalada Muqdisho ee caasimadda dalka u rabaan xasilooni, horumar, bilic iyo dhaqan wanaagsan.

Sidaas darteeda aysan hadda kadib aqbali doonin waxkaste oo wax udhimaayo sharafta Dadkeena, Diinteena iyo Anshaxa Suuban.

“Waxaa mas’uuliyad innaga saaran ilaalinta mustaqbalka dhallinteena Soomaaliyeed oo ah xooga ugu weyn uu Dalkeena ku tashanayo,” ayuu yiri guddoomiyaha gobolka Banaadir ahna Duq Magaalada Muqdisho Yuusuf Madaale.

Laamaha amaanka ayaa howl-galkii xalay kadib uu faray inay albaabada isugu dhuftaan dhammaan goobaha kalaabyada ee ku yaalla Muqdisho, wuxuuna shaaca ka qaaday in aan la furi karin wixii haatan ka dambeeyo.

Si kastaba, Tallaabada uu qaaday guddoomiye Madaale iyo maamulka gobolka ayaa waxa si weyn usoo dhaweeyay dadka reer Muqdisho oo guddoomiyaha ku amaanay tallaabadaasi, oo ay ku tilmaameen inay aheyd mid si weyn usoo daahday.

Muqdisho (Caasimada Online) – Dowladda Finland ayaa qaadatay go’aan lama filaan ah oo la xiriira kaalmo dhaqaale oo ay ku bixisay geedi socodka dib-u-heshiisiinta qaranka ee Soomaaliya.

Wasaaradda Arrimaha Dibadda ee dalka Finland ayaa la sheegay inay qorsheyneysa inay dib usoo ceshato dhaqaale dhan 50,000 oo Yuuro, kaasi oo markii hore ay ku shubtay hay’adda Finn Church Aid (FCA), looguna tala-galay hormarinta geedi socodka dib-u-heshiisiinta dalka.

Wasaaradda ayaa waxay sheegtay in ay doonayso in dib loo soo celiyo lacagahaas, kadib markii shaki laga muujiyay in dhaqaalahaas si sax ah loo isticmaalay.

Tallaabadan ayay wasaaradda arrimaha dibadda ee Finland sheegtay inay timid kadib markii aysan suurta-gelin in la xaqiijiyo in dhaqaalihii loo isticmaalay si waafaqsan go’aanka deeqda dowladda dalkaasi.

Kharashkan ayaa waxay dowladdu bixisay 2021-kii, waxaana loogu tala-galay in lagu hormariyo geeddi-socodka dib-u-heshiisiinta qaranka ee Soomaaliya.

Kaalmada dhaqaale ee Finland ayaa markii hore ujeedkoodu ahaa sidii loo xoojin lahaa ka qayb-galka ballaaran ee shacabka Soomaaliyeed ay ku yeelanayaan wada-tashiyada qaran, “loogana hortagayo in ay sii huriyaan qalalaasaha siyaasadeed ee doorashada kahor,” hase yeeshee lama xaqiijin karo in dhaqaalahaasi loo adeegsaday arrintaas.

Si kastaba, dowladda Finland gaar ahaan wasaaradda arrimaha dibadda ayaa billowday baaritaan madax-bannaan oo la xiriira hawlaha ururka si loo hubiyo in ay qaadato tallaabooyin ku filan, taasi oo lagu xoojinayo hababka maaraynta kaalmada la siiyo hay’adaha ka shaqeeya arrimaha gargaarka.