Muqdisho (Caasimada Online) – Ciidamada xoogga dalka iyo kuwa dadka deegaanka ayaa maanta kooxda Al-Shabaab ka xoreeyay deegaano dhowr ah oo ka tirsan gobolka Baay ee dowlad-goboleedka Koonfur Galbeed.

Deegaanada ay ciidamada huwanta ka saareen kooxda Al-Shabaab ayaa kala ah deegaanada Adeegow, Dhaydhayka, Tabarow, Walak iyo Arbasale oo 45 KM dhanka Waqooyi kaga beegan magaalada Baydhabo.

Wararka ayaa intaas kusii daraya in ciidamada huwanta ee is-garabsanaya ay weli xubnaha kooxda ee laga saaray deegaanadaasi ay kusii baacsanayaan dhulka howdka ah.

Ciidamada xoogga dalka iyo kuwaa degaanka ayaa degaanno badan oo katirsan gobolada dalka ka wada howl-gallo ka dhan ah Al-Shabaab, iyada oo howl-gallada ay markale si dardar leh uga socdaan qeybo badan oo dalka.

Dowladda federaalka Soomaaliya ayaa guulo horleh ka sheegatay dib u bilaabashada howl-gallada ka dhanka ah kooxda Al-Shabaab, iyada oo sheegtay in saddexdii maalmood ee ugu dambeysay ciidamada huwanta ay la wareegeen deegaano ka tirsan gobolka Galgaduud.

“Waxay ciidamada ku guuleysteen inay gacanta ku dhigaan deegaanka Ceel Axmed, deegaanka Ceel Saban Sablaale, deegaanka Ceel Cali Xasan, deegaanadaasi waa deegaano ceel biyoodyo leh, dhul daaqsimeed leh oo cadowga ay ka talinayeen,” ayuu yiri Afhayeenka wasaaradda gaashaandhigga Soomaaliya General Cabdullaahi Cali Caanood oo maanta la hadlay warbaahinta.

Sidoo kale wuxuu tilmaamay in saaka ciidamada Xoogga dalka ay gudaha u galeen deegaanka Budbud oo ay muddo ka talineysay Al-Shabaab, waxaana uu tilmaamay in ciidamada marka ay la wareegeen magaaladaasi ay soo dhaweeyeen dadka deegaanka.

Si kastaba, Maalmihii lasoo dhaafay waxaa si dardar leh ku socday howl-gallada ay ciidamada huwanta ka wadaan qeybo kamid ah dalka, iyada oo si hordhac ah u billowday wejiga labaad ee dagaalka, oo la filayo inay qeyb ka noqdaan ciidan ka socda dalalka deriska.

Muqdisho (Caasimada Online) – Taliyaha ciidanka Asluubta Soomaaliya Jeneraal Mahad Cabdiraxmaan Aadan ayaa soo saaray go’aan uu ku dalbanayo in shaqada lagu soo celiyo 25 askari oo ilaalo u ah xildhibaano ka tirsan baarlamaanka Soomaaliya.

Jeneraal Mahad oo maanta shir jaraa’id qabtay ayaa sheegay in shaqada uu ka joojinayo, mushaarkana ka jari doono askarigii ku soo laaba waaya shaqada ciidanka 10 cisho gudahood.

Taliyaha oo hadda la wareegay xilka, kadib markii dib loogu magacaabay ciidanka ayaa sheegay in taliska uu ugu tegay liiska 25 askari oo ku maqan (ereg) kuwaas oo ilaalo u ah xildhibaano ka tirsan baarlamaanka.

“Anagu xaq uma lihin in masuul aan ilaalo siino, markii aan xafiiska ka tegayna hal askari banaanka kuma maqneyn oo ereg kama tegin, hadda waxaa ereg ku maqan 25 askari, oo la kala socota xildhibaano iyo wasiirro,” ayuu yiri Jeneraal Mahad.

Wuxuu sheegay in masuuliyiintaas ay booliska xaq ugu leeyihiin inay askar ereg ah ka qaataan, balse aysan Asluubtu bixin ciidan ereg ah, “Looma ogola Asluubta inay ereg noqdaan,” ayuu yiri.

Wuxuu sheegay in askarta Muqdisho joogta uu shan maalmood u qabtay, kuwa gobollada jirana 10 maalmood, “Ninka ay la joogaanow, iska soo dir askartaas ha dhibaateyn, anigu waqtiga aan u qabtay ninkii ku imaan waaya mushaarkana waan ka jaraa, waana ruqseynaa,” ayuu hadalkiisa ku sii daray Taliyaha Asluubta.

Wuxuu sheegay in ciidankaas uu shaqo u dirsanayo, “Nin aan fadhigiisa joogin oo shaqada ciidanka Asluubta aan heynin, kama mid noqonayo ciidanka,” ayuu yiri.

Wuxuu sheegay in dalku dagaal galay oo ciidan kasta la diyaarinayo, “Markii nala dhaho ciidan halkaas la geeyo keena, 50 askari ayaa fasax nooga maqan cid naga yeeleysa ma jirto,” ayuu hadalkiisa ku sii daray Jeneraal Mahad.

Hoos ka daawo

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa ka qeyb-galay wada-hadallo degdeg ah oo ay yeesheen madaxda dalalka urur goboleedka IGAD, kuwaas oo ay kaga arrinasadeen iska-hor imaadyada hubaysan ee ka socda dalka Suudaan.

Shirkan oo ahaa mid madaxdu ay ku yeesheen habka fogaan aragga ah ayaa Madaxweynaha Soomaaliya wuxuu la wadaagay hoggaamiyeyaasha kale ee dalalka IGAD sida dowladda Soomaaliya ay uga walaacsan tahay xaaladda ka taagan dalka Suudaan.

Madaxweyne Xasan Sheekh ayaa cadeeyey in Soomaaliya ay codkeeda heer gobol iyo heer qaaradeedba ku garab istaagi doonto nabadda, midnimada iyo dowladnimada walaalaha Suudaan oo hiil taariikhi ah u muujiyey dadka Soomaaliyeed, waayihii adkaa.

Madaxda dalalka IGAD ee shirkan ka qayb galay ayaa isku raacay in si deg-deg loogu diro dalka Suudaan wafdi ka shaqeeya joojinta colaadda iyo billaabidda wadahadallo lagu dhammeynayo caqabadaha jira, si loo celiyo nabadda iyo xasilloonida dalka Suudaan.

Dagaal sokeeye ayaa ka qarxay dalka Suudaan, madaafiicda culus ayaa shalay iyo maanta la isku weydaarsanayaa Khartuum iyo magaalo kale oo lagu magacaabo Omdurman.

Ugu yaraan 56 qof ayaa la xaqiijiyay in ay ku dhinteen iska hor-imaad culus oo ka socda dagaaalkaas, una dhaxeeya ciidamada Sudan iyo ciidamada RSF ah, kaas oo ka dhacay caasimadda Suudan ee Khartoum.

Dagaallada ayaa sidoo kale ku fiday qeybo kale oo dalka ka mid ah oo uu ku jiro gobolka Daafuur oo ay ka jirto xaalad aanan deganayn.

Dagaalka ayaa bilowday xilli aan laga fileyn oo dadka ay si caadi ah u wataan halw-maalmeedkooda.

Labada dhinac ayaa midba sheeganaya inuu gacanta ku hayo xarumaha muhimka ah, sida garoonka diyaaradaha. Diyaaradaha milateriga ayaa duqeeyay xarumo ay ku sugan yihiin xooggaga la dagaallamaya.

Dhuusamareeb (Caasimada Online) – Dowladda federaalka Soomaaliya ayaa shaacisay in howl-gal gaarka ah lagu dilay horjoogayaal ka tirsan kooxda Al-Shabaab, kaasi oo ka dhacay gobolka Galgaduud.

Ciidanka xoogga dalka iyo kuwa dib u xoreynta deegaanka ayaa howl-galka lagu qaarajiyay horjoogayaashan ka sameeyay deegaanada Ceel Qansax iyo Ceel Huyun oo ka tirsan gobolka Galgaduud.

Qoraal kooban oo kasoo baxay wasaaradda warfaafinta ayaa lagu shaaciyay magacyada qaar kamid ah horjoogayaasha lagu dilay howl-galkan ay fuliyeen ciidmada xoogga dalka iyo kuwa deegaanka.

Cartan Iley oo ahaa Gacan-yaraha Koba kutukade ayaa lagu dilay howl-galka, sida lagu sheegay qoraalka dowladsa.

Horjooge Daahir Calasoow oo dhibaato xoogan ka geystay gobolada Galgaduud iyo Shabeellaha Dhexe ayaa sidoo kale lagu dhaawacay howl-galkaan gaarka ah .

Ciidamada huwanta ayaa sidoo kale waxay howl-galkan ku burburiyeen saldhigyadii kooxda Al-Shabaab ay ku lahaayeen Ceel Qansax iyo Ceel Huyun oo ka tirsan gobolka Galgaduud.

Ciidamada dowladda iyo kuwa deegaanka ee loo yaqaano Macawiisleyda ayaa isla maanta weerar qorsheysan ku qaaday fariisimo ay ku sugnaayeen xoogaga Shabaab oo ku yaalla agagaarka deegaanka Budbud ee gobolka Galgaduud ee bartamaha Soomaaliya.

Howl-galkan ayaa waxaa lagu beegsaday goobo ay ku sugnaayeen Al-Shabaab oo ku yaalla tuulada Xaawo Gacal oo hoostegta deegaanka Budbud oo ay shalay la wareegeen ciidamada huwanta ee haatan howlgallada ka wada gobollada Galgaduud iyo Mudug.

Warbaahinta dowladda ayaa shaacisay in weerarkan khasaare culus lagu gaarsiiyay Al-Shabaab, islamarkaana looga dilay 9 xubnood, kadibna la burburiyay fariisimo ay ku lahaayeen halkaasi.

Dhanka kale, ma jiro wax hadal ah oo kasoo baxay Al-Shabaab oo ku aadan howlgalkaas ee ay guulaha ka sheegteen ciidamada dowladda iyo kuwa dadka deegaanka ee loo yaqaano Macawiisleyda ee ku sugan Galmudug.

Maalmihii u dambeeyay ayaa waxaa si dardar leh ku socday howl-galada ay gobolka Galgaduud ka wadaan ciidan Xoogga dalka iyo kuwa deegaanka oo ka talaabay gobolka Shabeellada Dhexe, waxayna qorsheynayaan inay kooxda sii baacsadaan illaa Ceelbuur.

Dhuusamareeb (Caasimada Online) – Faahfaahino kala duwan ayaa kasoo baxaya weerar qorsheysan oo ay maanta ciidamada dowladda iyo kuwa Macawiisleyda ku qaadeen fariisimo ay ku sugnaayeen xoogaga Shabaab oo ku yaalla agagaarka deegaanka Budbud ee gobolka Galgaduud ee bartamaha Soomaaliya.

Howlgalkan ayaa waxaa lagu beegsaday goobo ay ku sugnaayeen Al-Shabaab oo ku yaalla tuulada Xaawo Gacal oo hoostegta deegaanka Budbud oo ay shalay la wareegeen ciidamada huwanta ee haatan howlgallada ka wada gobollada Galgaduud iyo Mudug.

Warbaahinta dowladda ayaa shaacisay in weerarkan khasaare culus lagu gaarsiiyay Al-Shabaab, isla-markaana looga dilay 9 xubnood, kadibna la burburiyay fariisimo ay ku lahaayeen halkaasi.

“Ciidamada ayaa howlgalkaas qorsheysnaa ku dilay 9 ka tirsan Maleyshiyaadka Khawaarijta waxaana la burburiyay fariisimihii ay deegaankaas kaga sugnaayeen, iyadoo hadda wali la sii baacsanayo” ayaa lagu yiri war qoraal ah oo ay baahisay warbaahinta qaranka.

Sidoo kale saraakiisha ciidamada Xoogga dalka ayaa sheegay in weli uu socdo howlgalka, isla-markaana ay faahfaahin guud ka bixin doonaan marka uu soo dhammaado.

Dhanka kale, ma jiro wax hadal ah oo kasoo baxay Al-Shabaab oo ku aadan howlgalkaas ee ay guulaha ka sheegteen ciidamada dowladda iyo kuwa dadka deegaanka ee loo yaqaano Macawiisleyda ee ku sugan Galmudug.

Xaaladda ayaa haatan mid aad u kacsan, waxaana lagu soo warramayaa in weli dhaq dhaqaaqyo iska soo horjeedo laga darermayo qaybo badan oo ka mid ah gobolka Galgaduud.

Ciidamada dowladda federaalka Soomaaliya oo todobaadyadii lasoo dhaafay deegaano horleh kala wareegay Al-Shabaab ayaa weli howlgallo amni xaqiijin ah kasii wada koonfurta iyo bartamaha dalka Soomaaliya.

Maalmihii u dambeeyay ayaa waxaa si dardar leh ku socday howlgalll ay gobolka Galgaduud ka wadaan ciidan Xoogga dalka iyo kuwa deegaanka oo ka talaabay gobolka Shabeellada Dhexe, waxayna qorsheynayaan inay kooxda sii baacsadaan illaa Ceelbuur.

Muqdisho (Caasimada Online) – Dowladda Soomaaliya ayaa burburkii dalka kadib waxa ay ku dhawaaqday inay dib u furtay 2007 Bankigii dhexe ee Soomaaliya, iyadoo sheegtay inay ku shuban doonto lacagaha kasoo gala gudaha dalka iyo kuwa deeqaha ah ee ay beesha caalamka ugu deeqdo, ayna ka kaaftoontay isticmaalka xawaaladaha.

Tan iyo xiligaas waxa uu Bankiga Dhexe ee Soomaaliya soomaray heerar kala duwan waxaana muddo kooban gudaheed uu la jaan qaaday Bankiyada kale caalamiga ah ee Dunida waxaana uu ku guuleystay xasilinta dhaqaalaha dalka.

 Hadaba Shaqooyinka uu bankiga qabto waxaa ugu horeeysa maamulka iyo iskudheelitirka dhaqaallaha wadanka, xisaabinta miisaaniyada dowlada, ilaalinta qiimaha lacagta wadanka iyo nidaaminta koboca dhaqaalaha wadanka. Intaas waxaa u dheer, maamulka iyo dejinta siyaasada dhaqaalaha iyo maalgeshiga dowlada.

Agaasimaha sare ee Waaxda lacagta iyo fulinta Bankiga Dhexe Axmad Xundubey  oo wareysi siiyay Wariye Cabdicasiis Xasan Ibrahim (Abdiaziz Loyal) oo katirsan warbaahinta Qaranka ayaa ka warbixiyay qaar kamid ah mashaariicda Bankiga Dhexe  sida hanaanka lacag bixinta Qaranka, Lacagta dhawaan loosoo daabacayo Soomaaliya iyo waliba guusha Bankiga Dhexe ee  IBAN oo dalka muhiim u ahaa.

Hoos ka daawo, Agaasime Axmad Xundubey oo arrimahan sharaxaya. 

Muqdisho (Caasimada Online) –  Faah faahino dheeraad ah ayaa waxaa laga helayaa mooto Bajaaj ay la socdeen saddex nin oo saaka ku qaraxday qaybo kamid ah gudaha degmada Xamar-jajab ee gobolka Banaadir.

Qoraal kasoo baxay taliska Booliska ayaa lagu sheegay in mootada ay xoog ku soo dhaaftay bar lagu hubiyo gaadiidka oo ku taalla degmadaasi, balse ayada oo ay ceersanayeen ciidanka ammaanka ay ku qaraxday Waaxda General Daa’uud.

Taliska ciidamada Booliska ayaa sidoo kale xusay in laga hortagay weerarkan, isla-markaana qorshihii ay damacsanaayeen raggaan la fishiliyay, sida lagu sheegay qoraalka.

Sidoo kale waxa uu Boolisku tilmaamay in qaraxan ay ku dhinteen saddexdii nin ee watay mootada, sidoo kalena uu dhaawac fudud soo gaaray qof kale oo shacab ah oo waddada mararayay.

“Maanta 16/Apr/2023, abaare 07:30 AM, Degmada Xamar Jajab, ayaa dhagarqabayal saarnaa mooto Bajaaj, ay soo jiireen bar lagu hubiyo gadiidka, iyada oo la raacdeynayo ayeey bajaajtii ku qaraxday Waaxda Gen Daa’uud, dhartoodii ay la damacsanayeen Ummadda Sooman ayaa iyagii ku laabtay waxaana goobta ku halaagsameen 3 dhagarqabe. Halka, qof muwaadin ah oo wadada marayaay uu dhaawac fudud ka soo gaaray” ayuu yiri qoraalka taliska ciidanka Booliska Soomaaliya.

Waxaa kale oo uu intaasi sii raaciyay “Burbur kooban oo soo gaaray guryaha laamiga ku teedsan agagaarka Haama-dhowr ama Isbilatka Yardimeli”

Dhanka kale taliska Booliska Soomaaliya ayaa intaasi ku daray in haatan ay wadaan baaris ku aadan dhacdadaasi, isla-markaaana wixii soo kordha ay la wadaagi doonaan shacabka.

“Dhacadaasi waxaa ku bilowday baaris, wixii ku soo kordha dib ayaan ummadda kala wadaagidoonaa” ayaa mar kale yiri qoraalka.

Saraakiisha ammaanka ayaa dhinaca kale farriin u diray dadka shacabka ah, waxayna ka dalbadeen inay la shaqeegaan ciidamada ammaanka, si looga hortago falalka ammaan dari ee ka dhaca gudaha caasimada.

Fashilinta weerarkan ayaa kusoo aadayo, ayada oo dowladda Soomaaliya ay la timid qorshe lagu sugayo amniga magaalada Muqdisho oo qayb ahaan lagu wareejiyay ciidamo cusub oo ah Boolis Militaaro.

Muqdisho (Caasimada Online) – Guddoomiyaha maamulka gobolka Banaadir, ahna Duqa magaalada Muqdisho, Yuusuf Xuseen Jimcaale (Madaale) ayaa xalay qaaday tallaabo ka xiriirta sugidda amniga, isaga oo booqday degmooyinka dhaca galbeedka caasimada.

Kormeerkan ayaa waxaa Yuusuf Madaale ku wehlinayay guddoomiye ku xigeenka amniga gobolka Banaadir, taliyaha ciidanka Booliska Soonaaliyeed, wasiiru dowlaha wasaaradda amniga gudaha iyo qaar kamid ah guddoomiyeyaasha maamulada degmooyinka.

Ujeedka kormeerkan ayaa ahaa u kuurgalidda, sida ay uga howlgalayaan ciidamada ammaanka dowladda federaalka iyo Isbeddalka ka muuqda tan iyo markii ciidan gaar ah loo dhiibay nabad-gelyada deegaanka.

Guddoomiye Yuusuf Madaale oo warbaahinta la hadlay ayaa sheegay in howlgallada cusub ee ay wadaan ciidanka lagu soo tababaray dalkanUganda ee Booliiska sida Militariga u tababaran uu wax badan ka beddalay amniga magaalada caasimada ah ee Muqdisho.

Sidoo kale waxa uu tilmaamay inay si wanaagsan ula dhaqmeen dadka rayidka ah, isla-markaana ay la yimaadeen niyad wanaag ay kula shaqeyn karaan bulshada rayidka ah.

Waxaa kale oo uu intaasi ku daray inay meesha ka saareen kooxihii burcadda ahaa iyo ciyaal-weerada dhibaatada ka waday degmooyinka gobolka Banaadir.

“Qalbiga furan iyo gacmo furan ayaan idinku soo dhaweyneenaa, 24 saac waxaa loo taagan yahay in kalsooni aan ka kasbano shacabkeenna oo aan ku heli karno marka ay arkaan wanaaggeena, dhimrinteenna iyo u shaqeynteeda, waxa aad meesha ka saarteen kooxihii burcadda ahaa ee dadka Soomaaliyeed dhibka ku hayay naftooda iyo Maalkooda” ayuu yiri Duqa Muqdisho.

Dhankiisa wasiiru dowlaha wasaaradda amniga gudaha, Maxamed Cali Xagaa oo madasha ka hadlay ayaa boggaadiyay ciidamada cusub ee ka wareegay amniga caasimada, waxaana uu tilmaamay inay ku guuleysteen wajiga koowaad ee howlgalka.

Sidoo kale waxa uu carabka ku dhuftay inay garab istaagi doonto dowladda federaalka, isla-markaana ay soo booqan doonaan madaxweynaha iyo ra’iisul wasaaraha dalka.

“Waan ku faraxsanahay in aan idinla kulano, waxa aad gacanta ku heysaan amniga mustaqbalka ummadda, askariga waa badbaadiyaha shacabka oo waxa aad habeen iyo maalin u taagan tihiin in aad badbaadisaan dadkiina iyo dalkiina, wajiga koowaad waad ku guuleysateen waxaana rajeyneynaa in inta dhiman aad heysaan, Madaxweynaha iyo Ra’iisul Wasaaraha ayaa idin soo booqon doonna waxa aan idinku imaanay in aan idin garab istaagno” ayuu isna yiri wasiir Xagaa.

Amniga magaalada Muqdisho ayaa haatan soo hagaagayo, kadib qorshaha cusub ee ay la timid dowladda federaalka, waxaana saaka ciidamada ammaanka ay ku guuleysteen inay fashiliyaan mooto sidday qaraxyo, taas oo ay ku dhinteen saddex nin oo la socday, kadib markii ay kula qaraxday waaxda General Daa’uue ee gudaha degmada Xamarjajab.

Addis Ababa (Caasimada Online) – Waxaa sii kordhaya dalalka iyo dhinacyada kala duwan ee dalbanaya in la joojiyo dagaalka maalintii labaad ka socda magaalada Khartuum ee caasimada Suudaan, kaasi oo u dhaxeeya ciidamada dowladda iyo kooxda la magac baxday ciidamada gurmadka deg deg ah ee Suudaan ee loo soo gaabiyo RSF.

Dowladda Mareykanka, Midowga Afrika iyo IGAD ayaa si kala goon-gooni ah ugu baaqay in si deg deg ah loo joojiya collaada ka istaadhmatay caasimadda dalka Suudaan, taasi oo durtaba laga soo warinayo khasaare horleh.

Xoghayaha Arrimaha Dibadda Mareykanka Antony Blinken ayaa walaac xooggan ka muujiyay xaaladda murugsan ee ka taagan halkaasi, wuxuuna dhinacyada isku haya maalintii labaad magaalada Khartuum ugu baaqay inay joojiyaan dagaalka, jawigana lagu soo dabaalo nabadgelyo.

Guddoomiyaha Guddiga Ururka Midowga Afrika, Moussa Faki Mahamat ayaa isaguna qeyb ka ah baaqyada nabadeed ee loo jeediyay dhinacyada isku haya halkaasi, isaga oo xasuusiyay in aysan marnaba ka tallaabin xeyndaabka nabad-galyada, islamarkaana ay miiska wada-hadalka iskugu imaadan, si ay xal uga gaaraan waxxa ka dhaxeeya.

Sidoo kale xoghayaha fulinta urur-goboleedka IGAD, Dr Workneh Gebeyehu ayaa waxa ku baaqay in dhinacyada hubeysan ee Suudaan ku hardamaya ay ilaaliyaan xasilloonida, iyada oo colaadda lasoo afjaro, lagana wada-hadlayo dhamaan waxyaabaha la isku hayo ee keenay gacan ka hadalka.

Waxaa qasan xaaladda magaalada Khartuum, waxaana lasoo warinaya in dagaalka uu sii fiday, iyada oo jugta madaafiicda culus aroornimadii maanta laga maqlayay Omdurman, oo kaabiga ku haysa magaalada Khartoum iyo Bahri oo iyadana ku dhow.

Goob joogayaal ayaa sidoo kale sheegay in rasaas ay ka dhacaysay magaalada Port Sudan ee ku taalla badda cas. Dadka deggan Khartoum ayaa sheegay inay argagax iyo cabsi ku dhacday iyadoo mid ka mid ah uu tilmaamay in rasaas lagu soo riday guriga deriska la ah.

Ugu yaraan 56 qof ayaa la xaqiijiyay in ay ku dhinteen iska horimaad culus oo u dhaxeeyay ciidamada Sudan iyo ciidamada RSF ah kaas oo ka dhacay caasimadda Suudan ee Khartoum.

Dagaallada ayaa sidoo kale ku fiday qeybo kale oo dalka ka mid ah oo uu ku jiro gobolka Daafuur oo ay ka jirto xaalad aanan deganayn. Dagaalka ayaa bilowday xilli aan laga fileyn oo dadka ay si caadi ah u wataan hawl-maalmeedkooda.

Labada dhinac ayaa midba sheeganaya inuu gacanta ku hayo xarumaha muhimka ah, sida garoonka diyaaradaha. Diyaaradaha milateriga ayaa duqeeyay xarumo ay ku sugan yihiin xooggaga la dagaallamaya.

Xooggaga Dacmu Sariic ayaa sheegay in ay gacanta ku hayaan saddex garoon, hooyga taliyaha ciidamada iyo madaxtooyada, hase yeeshee waxaa sheegashadaas beeniyay hoggaamiyaha Sudan, Jenaraal Cabdifitaax Al-Burhaan oo u warramay telefishinka Al-Jazeera.

Galcad (Caasimada Online) – Taliyaha ciidanka dhulka ee xoogga dalka Jeneraal Maxamed Tahliil Biixi ayaa ka hadalay wajiga labaad ee dagaalka Al-Shabaab oo hadda ka socda bariga gobolka Galgaduud, “Wajigaan waa ka abaabul iyo awood badan yahay wajigii koowaad, ciidanka maanta dagaalamayana cadow ma hor istaagi karo,” ayuu hadalkiisa ku bilaabay Jeneraal Biixi.

Taliyaha ayaa sheegay in afar maalmood oo lasoo dhaafay ay ku soo jireen howlgal culus oo lagu xoreeyey dhul aad u baaxad weyn oo dhaca xuduuda gobollada Hiiraan, Galgaduud iyo Sh/Dhexe.

Sidoo kale Taliyaha ayaa sheegay in Shabaab maanta ay ku laayeen dagaal ka dhacay duleedka Galcad, “Maanta waxay noo aheyd maalin guul, dharbaaxo weyn ayaa ku dhacday Khawaarijta,” ayuu yiri.

Taliyaha ayaa ciidankaan dagaalamaya iyagoo Sooman wuxuu ugu laab-qaboojiyey in guushu dhowdahay oo deg deg loo soo afjarayo kooxda, isagoo sheegay in xog badan uu ka hayo tabar-darrada heysa Al-Shabaab.

“Maanta ciidankeenu wuxuu joogaa dhul aad u muhiim ah, tusaale waxaa idinkugu filan Budbud oo maanta aan qabanay waxay isku socodka Khawaarijta u ahayd muhiim,” ayuu yiri.

Jeneraal Biixi ayaa sheegay Budbud lagu samey jiray qaraxyada oo madaxda ugu sareysa Al-Shabaab ay deganaayeen, “Waxaan shacabka Soomaaliyeed u sheegayaa ciidanku wuxuu ku socdaa si xowli ah, waxaana ku ciidi doonaa magaalooyin waaweyn oo hadda ka maqan gacanta dowladda,” ayuu yiri Taliyuhu.

Taliyaha ayaa u mahad celiyey shacabka oo uu sheegay inay ku garab siiyeen dagaalka ay kula jiraan Al-Shabaab, “Maalin kasta waxaa xogta na siiya dhacabka, ilaa Ceelbuur kuwa naga soo wacaya waxaan leenahay deg deg ayaan idiin soo gaareynaa,” ayuu yiri Jeneraal Biixi.

Xogta ugu muhiimsan ee shacabka ay ka helaan ayuu ku sheegay miinooyinka ay wadooyinka geliyaan, oo sida uu sheegay ay marar badan uga badbaadeen gacan siinta ay ka helayaan shacabka.

“Waxaan idiin sheegayaa in maanta Shabaab lagu laayey Janaale, dhacdo taariikhi ah ayaa maanta dhacday, waxay jidka u galeen ciidanka ATMIS, waxaana u gurmaday guutada 14-ka October, waxaana halkaas lagu gumaaday cadowgii, waan u hambalyeynayaa ciidanki maanta howshaas qabtay,” ayuu yiri Biixi.

Hoos ka daawo