Buulo-burde (Caasimada Online) – Militariga Mareykanka ayaa sheegay inay Soomaaliya ka fuliyeen duqeyn lagu dilay xubno ka tirsan kooxda Al-Shabaab oo dagaal kula jiray ciidamada Xoogga Dalka.

“Iyada oo la kaashanayo dowladda federaalka Soomaaliya, Taliska Mareykanka ee Afrika (AFRICOM) wuxuu fuliyey duqeyn ka dhan ah argagixisada Al-Shabaab oo weerarayey ciidamo ka tirsan Xoogga Dalka Soomaaliya, meel u dhow degmada Buulobarde, oo qiyaastii 218 KM waqooyi-galbeed kaga beegan Muqdisho, October 23,” ayaa lagu yiri bayaan kasoo baxay AFRICOM.

Bayaanka ayaa intaas ku daray in qiimeynta horudhaca ah ay muujineyso in duqeynta lagu dilay laba Al-Shabaab ah, islamarkaana aysan jirin wax khasaare ah oo kasoo gaaray shacabka.

“Taliska AFRICOM wuxuu qaadayaa tallaabooyin waa weyn si looga hortago waxyeellada rayidka. Ilaalinta rayidka waa qayb muhiim ah oo ka mid ah hawlgallada taliska uu sare ugu qaadayo Afrika xasilloon oo ammaan ah,” ayaa lagu yiri bayaanka.

Gobolka Hiiraan ayaa waxaa ka socda dagaal xooggan oo ay iska kaashaanayaan ciidamada dowladda iyo shacab hubeysan oo la baxay Macawiisley, dagaalkaas oo ka dhan ah kooxda Al-Shabaab.

Muqdisho (Caasimada Online) – Madaxweynaha Soomaaliya Mudane Xasan Sheekh Maxamuud ayaa maanta kulan saagootin ah kula qaatay Madaxtooyada Qaranka Wakiilka gaarka ah ee xoghayaha Qaramada Midoobay u qaabilsan Soomaaliya Mudane James Swan.

James oo soo gaba-gabeeyey shaqadiisa diblumaasiyadeed ee uu ku joogay dalkeena ayaa waxa uu madaxweynaha ku bogaadiyay doorkii uu ka qaatay taageerada dowladda Somaliland.

Sidoo kale waxa uu madaxweynaha ku amaanay James Swan kaalinta uu ka qaatay gurmadka abaaraha baahsan ee ka jira dalkeena iyo dagaalka ka dhanka ah argagixisada.

Danjire Swan ayaa dhankiisa waxa uu madaxweynaha uga mahad-celiyey kulankaan, isaga oo tilmaamay sida uu ugu faraxsan yahay wada-shaqeynta ay u muujiyeen dowladda iyo shacabka Soomaaliyeed, inta uu ku guda jiray gudashada waajibaadka diblumaasiyadeed ee loo soo igmaday.

Madaxweynaha ayaa ugu dambeyntiina waxa uu xusay sida ay uga go’an tahay dowladda iyo shacabka Soomaaliyeed inay xoojiyaan xiriirka iyo iskaashiga diblumaasiyadeed ee ay la leeyihiin dalalka caalamka, taasi oo ku saleysan in danaha dadka Soomaaliyeed lagu xaqiijiyo iskaashi iyo wax- la qabsiga dalalka kale ee caalamka.

James oo dhawaan wareejin doona xilka wakiilka Xoghayaha Guud ayaa sidan oo kale shalay kulan la qaatay ra’iisul wasaaraha dalka, kaasi oo guddoonsiiyay haddiyado kala duwan oo ay ku jiraan dharka hiddaha iyo dhaqanka Soomaaliya.

Xoghayaha guud ee QM weli ma uusan magacaabin danjiraha beddeli doona James Swan, balse waxaa la filayaa inuu shaaciyo maalmaha soo socda.

Garoowe (Caasimada Online) – Madaxweynaha dowlad Goboleedka Puntland Saciid Cabdullaahi Deni oo khubad ka jeedinayay furitaanka kal-fadhiga 51-aad ee baarlamaanka ayaa ka hadlay xaaladda guud ee Soomaaliya, gaar ahaan dagaalka ka dhanka ah Al-Shabaab, iyo arrimaha Puntland.

Saciid Deni, oo si gaar ah uga hadlay dagaalada ka dhanka ah kooxda Al-Shabaab ee ka socda qeybo badan oo kamid ah Soomaaliya, ayaa sheegay in Puntland ay diyaar u tahay inay ka qeyb qaadato dagaalkaas, oo ay ku biirto.

Madaxweynaha Puntland ayaa sheegay in kooxda Al-Shabaab ay dhibaato ku tahay horumarka guud ahaan dalka, wuxuuna ku baaqay in loo midoobo dagaalka ka dhanka ah kooxdaan.

Hadalka madaxweynaha Puntland ayaa kusoo aadayo xilli qeybo kamid ah dalka uu ka socdo kacdoon ka dhan ah kooxda Al-Shabaab.

Kacdoonka looga soo horjeedo kooxdaan ayaa si xowli ah uga socdo gobolada Hiiraan iyo Galgaduud, waxaana kooxdaan laga saaray deegaano badan oo ay ku sugnaayeen.

Dhinaca kale, Madaxweyne Deni ayaa sheegay in daadadkii kusoo rogmaday Magaalada Qardho ay guddi u saareen soo qiimaya waxyeeladu intay leeg tahay , sidoo kalena ay soo dhamaatay daraasad ku saabsan si xal waara looga gaaro daadadka soo noq noqday.

Sidoo kale, Madaxweynaha Puntland ayaa sheegay in Puntland degmooyin badan oo katirsan laga hirgelinayo doorasho qof iyo cod ah, taasina ay tahay qorshaha Xukuumaddiisa.

Kismaayo (Caasimada Online) – Madaxweynaha maamul goboleedka Jubbaland  Axmed Maxamed Islaam ayaa si kulul uga hadlay weerarkii ay kooxda Al-Shabaab shalay ku qaaday hotel Tawakal ee magaalada Kismaayo.

Qoraal kooban oo uu soo dhigay bogiisa gaarka ah ee Facebook ayuu ugu baaqay shacabka Soomaaliyeed inay iska dhiciyaan kooxda Al-Shabaab ee uu ku sheegay inay tahay koox horror ah.

Axmed Madoobe ayaa sheegay in ciidamada Jubbaland ay illaa daqiiqadihii ugu dambeeyey naftooda u hureyn sidii ay usoo badbaadin lahaayeen dadka shacabka ee ku xayirnaa gudaha Hotel Tawakal, oo ah Hotel ay dagaan siyaasiyiinta iyo odayaal dhaqameedyada.

“Waxaan tacsi u dirayaa dadka aan waxba galabsan ee ku waxyeeloobay qaraxii maanta ka dhacay hotelka Tawakal ee Magaalada Kismaayo halkaas oo argagixisadu ay doonaysay inay ku layso dad badan oo shacab ah balse ay qaar badan oo dadweynahii goobta ku sugnaa ah ay soo badbaadiyeen Ciidamada amniga,” ayuu qoraalkiisa ku yiri Axmed Madoobe.

Sidoo kale wuxuu qoraalka ku yiri “Waxaan bogaadinayaa dhammaan Ciidamada kala duwan ee mudada koobaan kusoo afjaray weerarkii argagixisada anigoo Alle uga baryaya inuu janadii fardowso ka waraabiyo dadkii ku shahiiday goobta si gaar ahna Ciidamadii ilaa daqiiqadahii u danbeeyay naftooda u hurayay sidii ay usoo badbaadin lahayeen dadka shacabka ahaa ee ku xayiraa dhismaha”.

Ugu dambeyn Axmed Madoobe ayaa baaq u diray shacabka “Waxaan ugu baaqaya dhammaan dadka Soomaaliyeed inay u duceeyaan shuhadada aan maanta ku waynay weerarka hotel Tawakal ayna u diyaar garoobaan sidii argagixisada hororka ah dalkeena aan uga cirib tiri lahayn,” ayuu kusoo xiray.

Kooxda Al-Shabaab ayaa sheegatay mas’uuliyadda weerarkaas oo la xaqiijiyey inay ku dhiteen 9 qof halka ay ku dhaawacmeen in ka badan 47 qof oo kale.

Dadka dhintay iyo kuwa dhaawacmay ayaa la xaqiijiyey inay kamid ahaayeen arday ka timid iskuulada oo xilligii weerarka dhacayey isticmaalayey wadada uu ku yaalo Hotelka.

Jowhar (Caasimada Online) – Wararka naga soo gaaraya gobolka Shabeelaha Dhexe ayaa sheegaya in weli dhaq-dhaqaaqyo culus ay ka socdaan gobolkaasi, gaar ahaan deegaanka Masaajid Caliguduud iyo tuulooyin kale oo hoostaga magaalada Jowhar.

Howlgalladan oo ah kuwa ballaaran ayaa waxaa iska kaashanaya ciidamada Xoogga dalka, maleeshiyaadka deegaanka ee Macawiisleyda iyo diyaarado dagaal oo kor ka caawinaya.

Wararka ayaa sheegaya in duqeymo xoogan oo ay fulinayaan diyaaradaha dagaalka Turkiga ay weli ka socdaan furimaha dagaalka ee ay isku horfadhiyaan ciidamada iyo Al-Shabaab.

Ilo wareedyo lagu kalsoonyahay ayaa inoo sheegay in mid ka mid ah duqeymahaas lala beegsaday gaari nooca Hoomeyda ah oo ay la socdeen xubno ka tirsan kooxda Al-Shabaab, xilli ay marayeen agagaarka deegaanka Xawaadley oo ka tirsan gobolka Shabeelaha Dhexe.

Saraakiil ka tirsan milatariga Soomaaliya oo ka hadlay duqeyntaasi ayaa shaaca ka qaaday in lagu dilay xubno ka tirsanaa Al-Shabaab, balse ma shaacin tiro rasmi ah.

Dhanka kale ma jiro weli wax hadal ah oo ka soo baxay dhinaca Al-Shabaab oo ku aadan howlgallada ka socda halkaasi, gaar ahaan duqeymaha ay fuliyeen diyaaradaa Turkiga.

Dowladda Soomaaliya ayaa guullo waa weyn ka sheegatay howlgalka Masaajid Caliguud, waxayna sheegtay in lagu dilay 21 ka tirsanaa Al-Shabaab oo ku sugnaa garaash iyo guri ay ku shirayeen oo ku yaalla halkaasi, sida lagu sheegay qoraalka kasoo baxay dowladda.

Istanbul (Caasimada Online)  – Waxaa haatan soo hagaageyso xaaladda caafimaad ee guddoomiyihii hore ee Golaha Shacabka ee Baarlamaanka Soomaaliya, Maxamed Sheekh Cismaan (Jawaari) oo ku jiro isbitaal ku yaallo magaalada Istanbul ee waddanka Turkiga.

Guddoomiyaha Golaha Shacabka, Sheekh Aadan Maxamed Nuur (Aadan Madoobe) oo haatan safar transit ku ah magalada Istanbul ayaa isbitaalka ku booqday Jawaari.

Sheekh Aadan Madoobe ayaa sheegay in xaalada caafimaad ee Jawaari ay aad u wanagsan tahay, islamarkaana uu caafimaad qabo, wuxuuna Alle uga baryey inuu u siyaadiyo.

Sidoo kale dadka Soomaaliyeed ayuu ugu baaqay inay u soo duceeyaan guddoomiyihii hore ee Baarlamaanka, si uu Eebbe u siiyo caafimaad taam ah.

Allaha caafiyee Proff. Jawaari ayaa diyaarad gaar ah looga qaaday Muqdisho kadib markii ay kasii dartay xaaladdiisa caafimaad, isaga oo kahor maalmo ku jiray isbitaalka Digfer.

Si kastaba, marar kala duwan ayaa guddoomiyihii hore ee baarlamaanka xaalado caafimaad dartood loo dhigay isbitaallada Muqdisho, kadib xanuuno soo wajahay.

Jaawri ayaa ah rugcaddaa weyn oo siyaasadeed, walow kursigiisa xildhibaanimo uu waayey doorashadii u dambeysay, kadib markii uu tartanka ka reebay madaxweyne Lafta Gareen.

Cadaado (Caasimada Online) – Ciidamada daraawiishta Galmudug oo kaashanayaa kuwa dowladda ee ka howlgalka deegaanada maamulkaasi ayaa maanta si wadajir howlgal uga sameeyeen qaybo ka mid ah gobolka Galgaduud ee bartamaha dalka Soomaaliya.

Howlgalka oo ah mid ballaaran ayaa waxa ay ciidamadu ku qabsadeen deegaanka Qaayib oo hoostaga magaalada Cadaado, halkaas oo ay ku sugnaayeen xubno ka tirsan Shabaab.

Saraakiisha hoggaamineysa howlgalka ayaa shaaca ka qaaday in ay si nabdoon kula wareegeen deegaankaasi, kadib markii ay isaga baxeen xoogaga Al-Shabaab.

Sidoo kale saraakiisha ayaa ku eedeeyey Al-Shabaab in ay burburisay xarumihii isgaarsiinta ee deegaanka Qaayib iyo sidoo kale ceel biyoodkii ku yaallay halkaasi.

Xaaladda ayaa haatan ah mid aad u kacsan, waxaana ciidamada huwanta ay isku fidiyeen duleedka magaalada Cadaado, halkaas oo laga dareemayo dhaq-dhaqaaqyo ciidan.

Galgaduud ayaa ka mid ah meelaha ay ka socdaan howlgallada ka dhanka ah Al-Shabaab, ayada oo ujeedka uu yahay in la gaaro degmada Ceelbuur ee gobolkaasi.

Inta badan gobollada dalka ayaa waxaa ka socdo kacdoon shacab oo ka dhan ah Shabaab, kaas oo deegaano horleh ay ku qabsadeen ciidamada dowladda iyo kuwa deegaanka.

Muqdisho (Caasimada Online) – Wasiirka arrimaha gudaha Soomaaliya Axmed Macallim Fiqi oo ka qeyb-galay shirweynaha 1-aad ee tayo-dhowrka qaranka ayaa sheegay in bulshada intooda badan ay u geeriyoodaan badeecadaha dibadda laga soo dhoofiyo iyo daragooda.

Wasiir Fiqi ayaa sidoo kale tilmaamay in wasaaradiisa ay door muuqda ka qaadan doonto sidii ay ula shaqeyn lahayd hay’adda Tayo-dhowrka qaranka, isagoo hoosta ka xariiqay muhiimada ay u leedahay qaranka.

“Waxaa ay mas’uuliyad naga wada saarantahay ilaalinta badqabka shacabka Soomaaliyeed, ka wasaarad ahaan waxa aan ka qeyb qaadan doonaa ulajeedooyinka loo aasaasay Hay’adda Tayo-dhawrka Soomaaliyeed,” ayuu yiri.

Waxa uu hadalkiisa sii raaciyay “Inta xabadaha iyo dagaalada nooga dhinta maalin walba in ka badan ayaa inooga dhinta daroogada iyo cunnooyinka aan la koontoroolin ee dalka soo gala.”

Sidoo kale waxa uu wasiirku ku booriyey hay’adda sidii looga taxadiri lahaa, islamarkaana loo hubin lahaa badeecadaha iyo dawooyinka soo galaya dalkeena.

“Hay’adda waxay Qaranka Soomaaliyeed u tahay difaac adag oo looga hortagi karo wax kasta oo nolosha Ummaddeena halis gelin kara, gaar ahaan sidii loo hubin lahaa badeecadaha iyo dawooyinka dalkeenna soo galaaya.”

Wasaarada arrimaha gudaha iyo hay’adda tayo-dhowrka qaranka Soomaaliya ayaa ka wada-shaqeeya isku-xirka barnaamijdka xuduuduha dalka, iska kaashiga hay’ada ka shaqeeya iyo isku xirka maamul goboleedyada dalka.

Muqdisho (Caasimada Online) – Waxaa saacado uu hawada ka maqnaa kadib dib usoo laabta App-ka WhatsApp oo cilad ay ku timid, sida ay shaacisay shirkadda leh ee Meta.

Arrintan ayaa saameyn weyn ku ku yeelatay guud ahaan dadka isticmaala ee ku dhaqan waddamada caalamka oo ay Soomaaliya ku jirto.

Aaladda WhatsApp ayaa ka mid ah baraha caanka ka ah adduunka, waxaana isticmaala ku dhowaad 2 bilyan oo qof guud ahaan caalamka.

Haddaba sidee ciladdan u saameysay dadka Soomaaliyeed ee isticmaala WhatsApp?

Dad badan oo Soomaaliyeed oo isticmaala aaladan ayaa Facebook ku baahiyey cabasho ku aadan in farriimaha WhatsApp-ka aan la isugu diri karin, kadib ciladda maanta ku timid.

Fardowsa Xasan oo ka mid ah dadka ka hadlay arrintaan ayaa sheegtay inay saameyn ku yeelatay ciladda ku timid WhatsApp, islamarkaana ay arki weysay fariimihii loo soo diray.

“Saaka dhan aan telka marna daminaayey marna daaraayey saa u arko fariimaha Whatsapp ee la’ii soo diray,” ayey tiri Farwowsa Xasan.

Dhankiisa  Jibriil Cabdullahi Shambow ayaa isna yiri “WhatsApp ka waabe la xeray Facebook halagu darro,” .

Wariye Farxiyo Maxamuud oo ka mid ah wariyeyaasha ka howlgala magaalada Muqdisho ayaa iyaduna soo jeedisay in baraha bulshada oo dhan la xiro, si ay dadka uga nastaan.

“Social media dhan mala xiroo halaga nastee,” ayey si kaftan leh u tiri Wariye Farxiyo Maxamuud Yuusuf.

Muqdisho (Caasimada Online)- Waxaa maanta magaalada Muqdisho laga sagootiyey safiirkii dowladda Qatar u joogay Soomaaliya 8-dii sano ee lasoo dhaafay.

Wasiirka Arrimaha Dibadda Soomaaliya Abshir Cumar Huruuse ayaa maanta kulan sagootin ah xafiiskiisa kula yeeshay Safiirkii hore ee Qatar u joogay Soomaaliya Xasan bin Xamza Asad Mohammed Hashim.

Waxaa soo gabagabowday 8 sano oo shaqo safiirnimo uu ku joogay dalka Soomaaliya, kadib markii ay dhawaan safiir cusub soo dirsatay dowladda Qatar.

Wasiirka ayaa uga mahad-celiyay xiriirkii iyo wada shaqayntii wanaagsanayd ee uu la lahaa wasaaradda arrimaha dibadda Soomaaliya iyo taageeradii ay dawladda Qatar “marwalba la garab taagan tahay dalkeena Soomaaliya.”

Qatar ayaa ahayd dowladda ugu dhow ee saaxiibka koowaad u aheyd Madaxweynihii hore ee Soomaaliya Maxamed Cabdulaahi Farmaajo, waxayna hadda u muqataa inay bedeshay siyaasadeedii Soomaaliya oo ay dejineyso siyaasad cusub oo ay kula shaqeyso dowladaan uu hoggaamiyo madaxweyne Xasan Sheekh.

“Dowladda Soomaaliya iyo Qatar waxay kee yihiin xiriir soo jireen ah,” ayaa lagu yiri nuqul ka mid ah qoraalkii ay sagootinta safiirka ka soo saartay wasaaradda arrimaha dibadda Soomaaliya.

Jalalaqsi (Caasimada Online) – Xildhibaan Maxamed Ibraahim Macalimuu ayaa ka hadlay khasaaraha weerarkii ay Al-Shabaab ku qaadeen degmada Jalalaqsi ee gobolka Hiiraan, halkaas oo weerar is-miidaamin ah uu ka dhacay todobaadkii hore.

Macalimuu oo maanta gaaray degmada Jalalaqsi ayaa sheegay in guryo badan uu dumiyey qaraxii ay Al-Shabaab doonayeen inay ku burburiyaan buundada degmadaas.

“Halkaan 30 qof ayaa ku dhimatay, 19 kale ayaa dhaawac ku noqotay qaraxaas, halkaan isbitaal fiican malaha, dadku waxay difaacanayeen buundada oo gaariga qaraxa ah loo waday, sidaas ayey dhibaatada isugu dhigeen,” ayuu yiri Macalimuu.

Xildhibaanka ayaa sheegay in qaraxaas ay buundadii loo waday ka badbaaday, balse uu burburiyey goobihii ganacsiga iyo guryihii ugu muhiimsanaa magaalada.

“Dadkaan cadowgoodii ayaa sidaan guryaha uga baabi’iyey, waxaan maamulka degmadaan ka codsanayaa in dadka aan beelo loo kala fiirin ee Shabaab loo midoobo, halkaas cadow ayaa dalkeenna ka jira,  Insha Allaah waa laga guuleysanayaa,” ayuu hadalkiisa ku sii daray.

Xildhibaan Macalimuu waxaa safarkaan uu ku tegay Jalalaqsi ku wehliyey Xildhibaan Caanoy waxayna degmadaas geeyeen gargaar ay sheegeen inay u qeybiyeen 400 oo qoys.

“Waxaan gargaar cunno ah soo gaarsinay 400 oo qoys oo dadka degmada Jalalaqsi oo colaad iyo abaaro ay isugu darsameen, waxaana ugu baaqayaa dowladda dhexe, HirShabeelle iyo hey’adaha gargaarka in dadkaan loo soo gurmado,” ayuu Macalimuu hadalkiisa ku soo daray.

Hoos ka daawo

Muqdisho (Caasimada Online) – Dowladda federaalka Soomaaliya ayaa soo saartay war-saxaafadeed ay ku shaacineyso guulihii 48 saac ee u dambeeyay laga gaaray dagaalka Al-Shabaab, kaasi oo lagu gaarsiiyay jab xoogan kooxda.

War-saxaafadeedka oo ay soo saartay wasaarada warfaafinta ayaa waxa lagu sheegay in 48 saac ee u dambeeyay in Al-Shabaab laga laayay horjoogayaal iyo dagaalyahano ka tirsan, islamarkaana lagu burburiyey gaadiid u siday saanad ciidan iyo walxaha qarxa.

“Howl-galladaan waxay ka dhaceen deegaanka Masaajid Cali-guduud iyo Bur-colow oo sidoo kale loo yaqaano Doolile oo ka tirsan Shabeellaha Dhexe. Howl-galka 1-aad waxaa la fuliyay 22-kii October waxaa lagu beegsaday garaash iyo guri ay ku shirayeen horjoogayaal iyo maleeshiyaad, waxaa lagu dilay 21 argagixisada ka tirsan oo ay ku jiraan horjoogayaal uu ka mid ahaa Horjooge Cabdullaahi Cali Caraale,” ayaa lagu yiri qoraalka.

Sidoo kale waxa lagu sheegay in howl-galkii ugu xoogana uu dhacay xalay, laguna beegsaday Bur-Coloow oo fariisin weyn u aheyd argagixisada, halkaasi oo ay ku sugnaayeen kooxda jabhada oo uu hogaaminayay Muscab Saneey iyo horjoogayaal kale oo qorsheynayay weerar ka dhan ah ciidamada huwanta.

“Weerarada xalay dhacay midka Koowaad waxaa lagu beegsaday gaari weyn oo nuuciisu yahay biijii oo ay u saarneed rasaas iyo saanad ciidan oo argagixisado lahaayeen halkaas ayaana si guul ah loogu burburiyay gaarigaas iyo agabkii saarnaa.”

Qoraalka kasoo baxay dowladda ayaa sidoo kale waxa lagu sheegay in tirada dhimashada ee Al-Shabaab kasoo gaadhay howl-galadii u dambeeyay ay kor u dhaafayso boqol.

“Howl-galadaan waxaa suura-galiyay xog dhameystiran oo ay haysay hay’adda NISA oo kaashanaysa saaxiibadeeda caalamka oo aan uga mahadcelinayno taageeradooda. Dowladda Soomaaliya oo kaashanaysa shacabkeeda iyo saaxiibada caalamka waxaa ka go’an ciribtirka maleeshiyada Khawaarijta ah ee Al-Shabaab.”

Ugu dambeyntiina waxay dowladdu ugu baaqday dhalinyarada weli kusii jira kooxda Al-Shabaab inay isa-soo dhiibaan, si naftooda ay uga badbaadsadaan howl-galkaan wada-jirka ah ee lagu beegsaday kooxda.

Muqdisho (Caasimada Online) – Guddoomiyaha Gobolka Banaadir ahna duqa Muqdisho Yuusuf Xuseen Jimcaale (Madaale) ayaa gabi ahaanba joojiyey lacagihii canshuurta ahaa ee laga qaadi jiray guryaha ku yaalla magaalada caasimadda ah.

Guddoomiyaha ayaa sheegay inuu canshuurta joojiyey isagoo raacaya dastuurka dalka iyo sharciga lagu dhisay degmooyinka ee nambarkisu yahay 6 ee soo baxay 12/02/1980 iyo sharciga canshuuraha guryaha ee nambarkiisu yahay 43, soona baxay 23/04/1977.

Sidoo kale guddoomiyaha ayaa sheegay inuu arkay inay lagama maarmaan tahay in la nadaamiyo hannaanka qaadista canshuuraha guryaha Muqdisho.

“Maanta oo ay taariikhdu tahay 24/10/2022 guddoomiyaha gobolka Banaadir ahna duqa Magaalada Muqdisho wuxuu go’aamiyey in la joojiyo dhammaan qaadista canshuuraha guryaha iyo daaraha gobolka Banaadir illaa laga gaari doono 31/12/2022 si loo nidaamiyo hannaanka canshuuraha gobolka Banaadir,” ayaa lagu yiri qoraalka kasoo baxay Madaale.

Sidoo kale qoraalka ayaa lagu yiri “waxaa la farayaa dhammaan mas’uuliyiinta ay arrintaan khuseyso inay fuliyaan amarkaan,” ayaa lagu yiri qoraalka kasoo baxay Madaale.

Amarka kasoo baxay guddoomiyaha ayaa yimid kadib cabasho badan oo ka timid shacabka Muqdisho iyo sidoo kale musuq maasuqa xooggan oo ka jiro habka loo qaado canshuurta guryaha.

Mas’uuliyiinta degmooyinka qaarkood ayaa shacabka ka qaaday lacag xitaa uusan ka war hayn maamulka, ayada oo lacagtaas marba magac cusub loo bixiyo ama qiil cusub loo yeelo.

Halkaan hoose ka daawo

Cadale (Caasimada Online) – Wararka laga helayo gobolka Shabeelaha Dhexe ayaa sheegaya in weli xaalad kacsanaan ah laga dareemayo deegaanka Masaajid Caliguduud oo ay ku dagaalamayaan ciidamada dowladda Soomaaliya iyo dagaalyahannada Al-Shabaab.

Dagaalkan oo ah mid culus ayaa waxaa ka qayb-qaadanayaa diyaaradaha dagaalka Turkiga oo xalay iyo illaa saaka gantaallo ku garaacaya goobaha ay ku sugan yihiin Al-Shabaab.

Qaar ka mid ah dadka deegaanka ayaa innoo sheegay in duqeynta si xoogan looga dareemayo deegaanka, islamarkaana daryan hubka si weyn looga maqlayo halkaasi.

Saraakiil ka tirsan milatariga Soomaaliya oo ka hadlay duqeymahaasi ayaa shaaca ka qaaday in lagu dilay xubno ka tirsanaa Shabaab, balse ma shaacin tirada rasmiga ah.

Ciidamada dowladda oo maalin kahor dib uga soo baxay Masaajid Calguud ayaa sidoo kale lagu soo warrayaa inay haatan dib ugu laabanayaan deegaankaas oo ay muddo sanado ah maamulayeen Shabaab oo weerar rogaal celis ah soo qaaday, kadib duulaanka dowladda.

Ujeedka ciidamada huwanta ayaa ah inay gaaraan illaa degmada Aadan Yabaal oo uu ku yaalla saldhigga ugu weyn ee ay kooxda ku leedahay gobolka Shabeelaha Dhexe.

Howlgallada ka socda HirShabelle ayaa guullo waa weyn laga gaaray, ayada oo ciidamada Xoogga dalka iyo kuwa deegaanka ay Al-Shabaab uga qabsadeen deegaano horleh.