Muqdisho (Caasimada Online) – Madaxweynaha Soomaaliya, Mudane Xasan Sheekh Maxamuud ayaa qaaday tallaabo culus oo la xiriirta garsoorka gobolka Banaadir, wuxuuna xilka qaadis ku sameeyey gudoomiyihii Maxkamadda gobolka Banaadir iyo midka racfaanka.

Ilo wareedyo lagu kalsoonyahay ayaa innoo xaqiijiyey xilka qaadista haatan lagu sameeyey guddoomiyihii maxkamadda gobolka Banaadir, Mudane Cabdiqadar Maxamed Xasan, waxaana xilkan loo magacaabay Garyaqaan Salah Ali Dabaan, sida ay wararku sheegayaan.

Sidoo kale waxaa xilka guddoomiyaha maxkamadda racfaanka ee gobolka Banaadir isna loo magacaabay Garyaqaan Saciid Cali Maxamed (Gureey), sida ay ogaatay Caasimada Onlne.

Mas’uuliyiinta cusub ee la magacaabay ayaa sidoo kale la faray inay si deg-deg ah ula wareegaan xilalka loo magacaabay, isla-markaana ay gutaan waajibaadka loo igmaday.

Isbeddalkan ayaa ah mid la filayey, maadaama uu horey madaxweyne Xasan Sheekh uu shaaciyey inuu wax ka beddal ku sameyn doono guud ahaan hay’adaha garsoorka dalka.

Madaxweynaha ayaa dhowaan xilkiisii hore dib ugu celiyey guddoomiyaha maxkamadda sare ee ciidanka qalabka sida, Liibaan Cali Yarow oo uu horey shaqada uga eryey Farmaajo.

Si kastaba Tallaabadan cusub ayaa kusoo aadeyso, ayada oo maalmo kahor madaxweynaha dowladda Soomaaliya uu kala diray guddiga garsoorka dalka iyo kan la dagaalanka musuq-maasuq, isaga oo sheegay in hannaan baal-marsan sharciga lagu dhisay labadaas guddi.

Muqdisho (Caasimada Online) – Madaxweynaha dowladda federaalka ah ee Soomaaliya, Mudane Xasan Sheekh Maxamuud ayaa maanta xarunta madaxtooyada kulan kula yeeshay wasiirada waxbarashada dowlad goboleedyada oo haatan ku sugan magaalada Muqdisho.

Kulankan ayaa waxaa sidoo kale goobjoog ahaa ra’iisul wasaare ku xigeenka dalka, Saalax Axmed Jaamac iyo wasiirka waxbarashada dowladda dhexe Faarax Sheekh C/qaadir

Madaxweynaha ayaa wasiirada waxbarashada heer federaal iyo heer dowlad goboleed kala hadlay sidii wadajir loogu sii ambaqaadi lahaa dadaallada tayeynta waxbarashada.

Xasan Sheekh ayaa tilmaamay in ay ka go’an tahay tayeynta iyo kordhinta fursadaha waxbarasho, tirada macalimiinta iyo xarummaha waxbarashada.

“Waxbarashadu waa xuquuq aasaasi ah oo tahay in caruurteennu ay helaan. Waxa ay nagu tahay waajib in aan u diyaarinno ubadkeenna Soomaaliyeed waxbarasho iyo mustaqbal anfaca dadkeena iyo dalkeena.” ayuu yiri madaxweynaha dowladda dederaalka Soomaaliya.

Qoraalka ka soo baxay Villa Soomaaliya ayaa waxaa sidoo kale lagu sheegay in dowladda federaalka ah ee Soomaaliya ay xooga saareyn horumarinta waxbarashada dalka, si ay fursaddo u helaan caruurta Soomaaliyeed ee gaaray da’da iskuulka iyo kuwa kale ee aan fursadaha helin.

“Dowladda Federaalka Soomaaliya waxaa ka go’an dib u habeynta nidaamka waxbarashada dalka, iyada oo la hirgelinayo hindiseyaal lagu kordhinayo qoondada maaliyadeed ee waxbarashada, si ay fursaddo u helaan caruurta Soomaaliyeed ee gaaray da’da iskuulka iyo kuwa kale ee aan fursadaha helin una baahan tababarro dhanka xirfadaha ah” ayaa lagu yiri.

Dhankooda wasiirada waxbarashada dalka ayaa madaxweynaha uga warbixiyey baahiyaha waxbarasho ee jira iyo sidii heerarka kala duwan ee dowladda iskaga kaashan lahayeen suurta-gelinta kordhinta fursadaha waxbarashada, manhajka & imtixaanaadka shahaadiga.

Muqdisho (Caasimada Online) – Waxaa magaalada Muqdisho ee caasimada Soomaaliya lagu soo gabagabeeyey shir u dhexeeyey dowladda federaalka Soomaaliya iyo dowlad goboleedyada, kaas oo diiradda lagu saaray tayeenta hay’adaha waxbarashada eev dalka.

Shirkan oo socday intii u dhexeysay 16 illaa 18 bishaan ayaa lagu soo xiray Muqdisho, waxaana guddoomiyey Wasiirka Waxbarashada Soomaaliya Faarax Sheekh C/qaadir, iyada oo ay goobjoog ahaayeen wasiirada Waxbarashada ee shanta maamul goboleed ee dalka.

Xubnaha shirka ka qayb-galay ayaa soo saaray warmurtiyeed ka kooban illaa lix qodob oo ku aadan waxyaabaha ay ka wada-hadleen.

Sidoo kale waxay ku ballameen in la qabto shirweyne guud oo u dhexeeyo labada dhinac, kaas oo looga hadlayo dib u jiheynta waxbarashada dalka.

Qodobada lasoo saaray ayaa waxaa ugu muhiimsan:-In la joogteeyo kulamada u dhexeeyo wasaaradaha waxbarashada heer federaal iyo heer dowlad goboleed ee dalka.

-In la qabto Shirweynaha dib u jiheynta waxbarashada dalka.

-In dib u eegis lagu sameeyo sharciga waxbarashada dalka iyo siyaasada waxbarashada qaranka.

Jigjiga (Caasimada Online) – Ra’iisul wasaaraha xukuumadda Soomaaliya, Mudane Xamza Cabdi Barre oo haatah booqasho ku marayo dhulka dowlad deegaanka Soomaalida Itoobiya ayaa markale ka hadlay arrimo ku aadan dagaalka ka dhanka ah Al-Shabaab.

Xamza Cabdi Barre ayaa shacabka iyo ismaamulka Soomaalida Itoobiya ka dalbaday inay kusoo biiraan dagaalka, isla-markaana ay qayb ka noqdaan howlgallada ka socda dalka.

Ra’iisul wasaaraha ayaa sheegay in kooxda Al-Shabaab ay tahay cadowga Ummadda Soomaaliyeed, loona baahan yahay in loo midoobo, si looga adkaado.

“Waxaan u nimid meeshaan inaan idin sheegno in la’idin baahan yahay in cadowgaas aan naga caawisaan naga kaalmeysaan, sidaad sheegteen cadow waxaa jira aan wada leenahay oo runtii ah argagixisada ee dhibaatada fara badan Ummadda Soomaaliyeed ku haayo muddada dheer idinkana waa dhoweyd idin soo hujuumay,” ayuu yiri ra’iisul wasaaraha.

Sidoo kale ra’iisul wasaaraha ayaa dardaaran culus u jeediyey dadka shacabka ah,  wuxuuna ugu baaqay inay ka shaqeeyaan nabadda, midnimada iyo horumarka deegaanka.

“Waxaan ku talinayaa inaad midowdaan ood walaalowdaan oo aad xukuumad iyo shacaba gacmaha is qabsataan,” ayuu hadalkiisa sii raaciyey.

Hadalkan ayaa ku soo aadayo, ayada oo dhowaan ay toos isku wajaheen ciidamada Liyuu Boolis ee dowladda deegaanka Soomaalida iyo Al-Shabaab oo weerar ku qaaday qaybo ka mid ah dhulkaasi, kadib markii ay ka tallaabeen xadka u dhexeeyo Soomaaliya iyo Itoobiya

Muqdisho (Caasimada Online) – Afhayeenka ciidanka booliska Soomaaliya Gaashaanle Sadiiq Aadan Cali Doodishe ayaa sheegay in shacabka degmada Kaaraan ay caawa soo qabteen labo nin oo hubeysan, kuwaas oo dilay askari ka tirsanaa ciidamada dowladda.

Afhayeenka oo la hadlay Idaacadda dowladda ee Radio Muqdisho ayaa sheegay in raggaas lagu qabtay agagaarka Kaawada Kabasiini – Waaxda Nagayle ee degmada Kaaraan, iyagoo doonayey inay goobta ka baxsadaan.

Shacabka ayuu sheegay inay ka caruudeen dilkii loo geystay askari, waxaana hadda labadii nine e askariga dishay ay shacabku ku wareejiyeen ciidamada ammaanka oo goobta soo gaaray.

Afhayeenka booliska ayaa sidoo kale sheegay in labada nin markii la qabtay ay wateen hubkii ay ku dileen askariga “Labada dhagarqabe ayaa waxaa la wareegay ciidanka ammaanka, ayaga iyo hubkii ay wateen, waxaana la horgay doonaa Maxkamada xukunkooda awooda u leh, Ilaahay idiinkii,” ayuu yiri Sadiiq Doodishe.

Wuxuu intaas ku sii daray, “Askari ayey si gaadmo ah ku dileen nimankaan oo ka tirsan argagixisada, shacabka oo careysan ayaana degdeg uga jawaabay falkaas oo labadii nin raacdeystay, soona qabtay, waa markii labaad ee shacabka ay soo qabtaan rag hubeysan, waxay tan oo kale maalmo ka hor ka dhacday suuqa Bakaaraha.”

Afhayeenku wuxuu sheegay in sharciga lamarsiinayo ragaan oo maxkmadda awooda u leh ay u gudbi doonaan, si looga jaaseeyo dembiyadii ay geysteen.

“Waxaan ku dadaaleynaa in eedeysanayaasha aan lagu xadgudbin xuquuqdooda, waxaana ku wareeji doonaa garsoorka iyo maxkamad awooda u leh,” ayuu yiri Afhayeenka ciidanka booliska Soomaaliya Gaashaanle Sadiiq Aadan.

Hoos ka dhageyso wareysiga

Jowhar (Caasimada Online) – Madaxweynaha Hirshabeelle Cali Guudlaawe ayaa ugu horeyn tacsi u diray qoysaska iyo qaraabada dadkii maanta ku nafwaayay qaraxyadii ay Al-Shabaab ka geysteen degmooyinka Buuloburde iyo Jalalaqsi ee Gobolka Hiiraan.

“Madaxweynaha ayaa xusay in argagixisadu cadow ku yihiin nolosha iyo horumarka dadka Soomaaliyeed, yoolkooduna yahay xasuuqa shacabka iyo beegsiga haldoorka umaddda, isagoo Shacabka Soomaaliyeed ugu baaqay inay meel uga soo wadajeestaan jiritaanka Kooxda Argagixisada ah ee Al-Shabaab,” ayaa lagu yiri qoraal ka soo baxay madaxtooyada HirShabeelle.

Madaxweynaha ayaa si gaar ah uga tacsiyeeyay geerida Gudoomiyihii hore ee degmada Jalalaqsi Marxuum Maxamed Nuur Dabaashe iyo Duqii Degmada Jalalaqsi Marxuum Aadan Maxamed Ciise oo ka mid haa dadkii maanta ku geeriyooday qaraxii ka kacay xarunta degmada Jalalaqsi.

“Madaxweynaha ayaa sidoo kale ka tacsiyeeyay qaraxii galabta ka dhacay buundada degmada Buuloburde oo ay ku geeriyoodeen dad shacab ah, isagoo tilmaamay in argagixisada arxanka daran ee sii dabar go’aya ay damacsanaayeen inay kala jaraan isu socodka dadka ku nool degmada Buuloburde,” ayuu yiri Cali Guudlaawe.

Ugu dambeyntii Madaxweynaha HirShabeelle ayaa Alle uga baryay masuuliyiintii iyo shacabkii ku geeriyootay qaraxyadaasi argagixiso in uu hoygooda ka yeelo Jannatul Firdowsa, inta ku dhaawacantayna uu Eebbe caafimaad deg deg siiyo.

Ugu yaraan 15 qof ayaa lagu dilay labada qarax ee ka kala Buuloburde iyo Jalalaqsi, sidoo kale waxaa burburtay muundadii muhiimka ahayd ee Buuloburde, waxayna qaraxyadaasi ahaayeen kuwo is miidaamin ah.

Muqdisho (Caasimada Online) – Ugu yaraan 16 qof ayaa ku dhimatay laba qarax oo maanta ka kala dhacay magaalooyinka Buulo Barde iyo Jalalaqsi ee gobolka Hiiraan.

Mas’uuliyiinta magaalada Jalalaqsi ayaa sheegay in baabuur laga soo buuxiyey waxyaabaha qarxa uu ku qarxay bar kontorool oo laga hubiyo baabuurta u socota buundada magaalada. Baabuurkaas ayaa qaraxiisa uu burburiyey dhisme ay ku sugnaayeen mas’uuliyiinta magaalada.

Guddoomiye ku xigeenka degmada Jalalaqsi ayaa sheegay in qaraxaasi ay ku dhinteen ugu yaraan 15 qof oo ay ku jiraan duqii magaalada Jalalaqsi Aadan Maxamed Ciise, iyo Gudoomiyihii degmada Maxamed Nuur Cagajoof Dabbaashe oo xilkaasi laga qaaday dhowaan balse aan weli xil-wareejin samaynin.

Dhinaca kalena, mas’uuliyiinta magaalada Buulo Barde ayaa u sheegay idaacadda VOA in qarax loo adeegsaday mooto bajaaj lagu dhuftay buundada magaalada ee kormarta webiga Shabeelle.

Ugu yaraan hal qof ayaa ku dhintay qaraxa. Qaraxa waxa uu sidoo kale burburiyey qayb ka mid ah buundada oo uu dalooliyey.

Labadaan qarax ayaa u muuqda kuwo qorshaysnaa in lagu burburiyo buundooyinka magaalooyinka Buulo Barde iyo Jalalaqsi xixlli ay gobolka Hiiraan iyo gobollada ku dhow ay ka socdaan abaabullo ka dhan ah ururka Al-Shabaab.

Ururka Al-Shabaab ayaa sheegtay mas’uuliyadda labada qarax.

Sawiro laga soo qaaday halka uu qaraxa ka dhacay ayaa muujinaya in buundada ay ka go’aday dhex-bartankeeda, sidaas darteedna waxaa xiligaan aan mari karin wax gaadiid ah.

Qaraxayadan ayaa wuxuu u muuqda mid ay Al-Shabaab ku rabtay inay ku kala jarto buundada degmada Buulo-burte, marka la fiiriyo halka gaariga Ismiidaaminta ah lagu qarxiyay oo aheyd dhex-bartanka buundada.

Ciidamo ka tirsan dowladda Soomaaliya iyo masuuliyiinta maamulka degmada ayaa gaaray goobta qaraxa uu ka dhacay, illaa haddana majiro war kasoo baxay dhinacooda.

Muqdisho (Caasimada Online) – Ciidamada ururka 8-aad guutada 18-aad ee Kumaandooska Gorgor ee xooga dalka Soomaaliyeed ayaa maanta howl-galo ka dhanka ah Al-Shabaab ka sameeyay deegaano ka tirsan Fanax gobolka Hiiraan.

Howl-galkaan ayaa waxaa la sheegay in ciidamada Kumaandooska ay bartilmaameedsadeen xubno Shabaab ah oo mararka qaar lagu arki jiray tuulooyin ku dhow deegaanka Nuur Fanax ee gobolkaasi Hiiraan.

Saraakiisha ciidanka ayaa sheegay in howl-galkaas lagu dilay 7 xubnood oo ka tirsan Al-Shabaab, kadib dagaal kooban oo ciidamadu kula galeen dagaal-yahaanada Shabaab aaga deegaanka Nuur Fanax.

Waxay sidoo kale sheegeen inay ciidamadu sii wadi doonaan howl-galada lagu bartilmaameedsanayo dagaal-yahanada Al-Shabaab, illaa inta deegaanada gobolka laga ciribtirayo kooxda argagixisada ah.

Howl-galkaan lagu dilay xubnaha Shabaabka ah ayaa kusoo aadaya ayada oo maanta ciidamada huwanta ay sheegteen in deegaano hor leh ka qabsadeen kooxda Al-Shabaab, islamarkaana uu si habsami leh u socdo dagaalka ka dhanka ah kooxda.

Garoowe (Caasimada Online) – Dowladda Maraykanka ayaa war qoraal ah kasoo saartay khilaafka ka taagan doorashada la filayo inay ka dhacdo maamul goboleedka Puntland, taasi oo hadda ay xiisad xooggan ka taagan tahay.

Qoraalka kasoo baxay safaaradda ayaa lagu soo dhaweeyey doorashooyinka qof iyo cod ee Puntland qorsheynayso inay ka dhacdo 37 degmo, doorashadaas oo ah mid heer deegaan ah.

Sidoo kale, qoraalka ay soo saartay safaaradda Mareykanka ayaa madaxweynaha Puntland Saciiid Cabdullaahi Deni loogu baaqay inuu qabto doorasho loo dhan yahay, islamarkaana ay isku raacsan yihiin qeybaha kala duwan ee maamulkaas.

Safiirka Maraykanka ee Soomaaliya ayaa kamid ahaa safiirrada beesha caalamka ee shalay booqday magaalada Garoowe, halkaas oo ay kula shireen madaxda Puntland, iyagoo kala hadlay arrimaha doorashada iyo ka go’naanshahooda.

Beesha caalamku waxay sheegtay inay taageerayso dimuqraadiyada Puntland, inkastoo maamulada Puntland ay ku fashilmeen labo jeer oo hore, haddana uu walaac xooggan ka taagan yahay marka loo eego muddada u hartay maamulka Siciid Deni.

Siyaasiyiin caan ah oo ay kamid yihiin madaxweynayaashii hore ee Puntland iyo ra’isul wasaarayaal hore ayaa sheegay in madaxweyne Deni oo ku howlan yahay qorshe muddo kororsi ah.

Saciid Deni oo ku fashilmay doorashadii madaxweynimo ee Soomaaliya ayaa la rumeysan yahay inuu doorashada qof iyo cod ka leeyahay muddo kordhin, waxaana tallaabadaas lagu tilmaamay mid qalqal gelineyso xasiloonida siyaasadeed ee maamulkaas.

Jowhar (Caasimada Online) – Waxaa sii xoogeysanayo abaabulka beelaha iyo ciidamada loo diyaarinayo dagaalka ka dhanka ah kooxda Al-Shabaab ee ka bilowday gobolka Shabeelalda Dhexe.

Wararkii ugu dambeeyey ee halkaas naga soo gaaraya ayaa sheegaya inuu dagaalka ku biiray xildhibaan kale iyo ciidamo badan oo uu hoggaaminayo/

Xildhibaan Yuusuf Ibraahim Afrax (Yuusuf Kabaale) oo ka tirsan golaha shacabka Baarlamaanka Federaalka, kana soo jeeda beesha Kabaale ee Wacbuudhan Abgaal, ayaa gaaray Gobolka Shabeellaha Dhexe, isagoo hoggaaminaya ciidamo Militari ah oo ku hubeysan hubka noocyadiisa kala duwan.

Xildhibaanka ayaa sheegay inuu si toos ah ugu biiray dagaalka iyo kacdoonka ka dhanka ah kooxda A-Shabaab ee ka curtay deegaanada maamulka HirShabelle.

“Anagoo fulineyno baaqii madaxda sare ee dowladda waxaan si rasmi ah ugu biirnay dagaalka ka dhanka ah kooxda Al-Shabaab, waxaana qeyb ka noqon doonaa xoreynta deegaanada maamul goboleedka HirShabelle,” ayuu yiri xildhibaanka.

Ciidamadan ayaa ka mida kuwii uu danbeeyay ee laga abaabulo magaalada Muqdisho, kuna biira dagaalka Al-shabaab oo abaabulkii ugu danbeeyay iyo howlgallada ka socda Gobolka Shabeelaha Dhexe ee maamulka HirShabeelle.

Kooxda Al-Shabaab ayaa wajaheysa cadadadis xoog leh oo uga imaanayo beelaha Soomaaliyeed iyo dowladda dhexe, waxaana markaan ku furmay dagaal jihooyin kala duwan ah.

Madaxweynaha HirShabelle Cali Guudlaawe Xuseen ayaa sheegay in howlgallo xooggan oo ka dhan ah AS ay ka socdaan deegaanno ka kala tirsan Gobollada Shabeellaha Dhexe iyo Hiiraan si la isugu xiro degmooyinka muddada fog isu socodkoodu xayiran.

Guudlaawe waxa uu sheegay in horumar wanaagsan laga gaaray howlgallada ka socda Gobolka Shabeelaha Dhexe ee dhowaan billawday isaga oo intaas ku daray in ciidamada ka howlgallaya Hiiraan ay kahortagi doonnaan.

Jowhar (Caasimada Online) – Wararka naga soo gaaraya gobolka Shabeelaha Dhexe ayaa sheegaya in weli ciidamada dowladda Soomaaliya iyo kuwa Macawiisleyda ay howlgallo ka wadaan gobolkaasi, kaas oo ay guullo ka sheegteen ciidamada huwanta.

Ciidamadan oo uu horkacayp, xildhibaan Cismaan Xaadoole ayaa gudaha u galay deegaano horleh oo ka tirsan gobolka Shabeelaha Dhexe oo ay horey ugu sugnaayeen Al-Shabaab.

Wararka ayaa sheegaya in ciidamada ay saaka la wareegeen tuulooyinka Warkulan, Bakajeex, Gaaleef, Warciise, Qoordheere iyo Jilableey oo u dhaxeeya degmooyinka Jowhar iyo degmada Raaga Ceele oo ka wada tirsan gobolka Shabeelaha Dhexe.

Saraakiisha howlgalka hoggaamineyso ayaa shaaca ka qaaday inay sii wadi doonaan duulaanka ka dhanka ah Al-Shabaab, inta laga xoreynayeo guud ahaan deegaanka.

Ilo deegaanka ah ayaa sidoo kale innoo sheegay in ciidamada ay isku ballaariyeen goobaha ay qabsadeen, isla-markaana ay ka sameysteen fariisimo ciidan.

Dhanka kale ma jiro wax hadal ah oo ka soo baxay kooxda Al-Shabaab oo ku aadan howlgalkaasi ee ay guulaha ka sheegteen ciidamada Xoogga dalka Soomaaliyeed.

Shabeelaha Dhexe ayaa waxaa ka socda abaabulkii ugu xooganaa ee ka dhan ah  kooxda Al-Shabaab, waxaana horkacayam madaxweynaha HirShabelle iyo mas’uuliyiin ay ka mid yihiin xildhibaano ka tirsan dowladda dhexe, balse deegaan ahaan kasoo jeeda gobolkaas.

Beledweyne (Caasimada Online) – Ciidamada Dowladda iyo xoogaga deegaanka ayaa shalay galab soo bandhigay nin oday ah, oo la sheegay inuu ka tirsan yahay saraakiisha Al Shabaab.

Tani ayaa waxay ka dambeysay, kadib markii ciidamadu ay shalay subax weerareen deegaanka Xalfooley, oo hoostagga Degmada Jalalaqsi, kuna dhow xadka Gobolada Hiiraan iyo Shabellaha Dhexe.

Korneyl Nuur Dheere oo ka mid ah Saraakiishii hawlgalka hoggaaminaya iyo ciidamadu uu watay ayaa gacanta ku dhigay ninkaasi odayga ah iyo gaari uu watay.

Wakaaladda Wararka Qaranka (SONNA) ayaa sheegtay in ciidamadu ay jidka u galeen gaadiid ay la socdeen maleeshiyada Al-Shabaab, ayna dagaalka ku dileen 10 ka mida maleeshiyadaasi, sidoo kalena ay gubeen mid ka mida gaadiidkii ay wateen.

SONNA ayaa ku warantay in ciidamadu ay halkaasi ka wadaan hawlgalo lagu dhameystirayo maleeshiyadii ku firxatay duurka.

Ciidamada ayaa u muuqdo kuwo guda galay wejigii ugu dambeeyay gulufka ay tahay in lagu soo afjaro Shabaabka Gobolka Hiiraan.

Dhuusomareeb (Caasimada Online) – Wasiirka Arrimaha Gudaha iyo Federaalka Soomaaliya Axmed Macallin Fiqi ayaa shaaca ka qaaday xilliga dagaalka ka dhanka ah Al-Shabaab laga billaabayo deegaanada Galmudug. 

Fiqi ayaa sheegay in kahor inta aysan dhammaan bisha October la billaabi doono howlgallada ka dhanka ah Al-Shabaab ee Galmudug. 

“Waxaan rajeynaynaa in bishaan October inta aysan dhamaan Galgaduud iyo Mudug iyo kulli aagaggaas oo dhan shaqada ay ka billaabato, culeyska Hiiraan haystana uu ka dul qaadmo,” ayuu yiri wasiir Axmed Macallin Fiqi oo ka qeyb galay doodda Twitter Space ee BBC Somali. 

Axmed Macallin Fiqi ayaa intaas ku daray in shirka madaxtooyada Galmudug ee siyaasiyiinta Galmudug uu qeyb ka yahay howsha iyo abaabulka lagu doonayo in Al-Shabaab looga saaro deegaannada ay ka haysato gobollada Mudug iyo Galgaduud.  

Fiqi ayaa in shirka ujeeddadiisa ay tahay in loo dhaqaaqo dhanka degmada Ceelbuur ee gobolka Galgaduud oo ka mid ah meelaha ay haysato Al-Shabaab. 

Dhaqdhaaqyo ciidan ayaa hadda ka socda dhowr deegaan oo Galgaduud, Mudug, Hiiraan iyo Shabeellaha dhexe ah, sida uu sheegay wasiirka. Waxaa jira ciidamo ka degay Beledweyne iyo dhaqdhaaqyo cusub oo ka billowday Shabeellaha Dhexe. 

Axmed Macallin Fiqi ayaa aaminsan in furimaha cusub ee laga howlgalayo ay sababi doonaan in Al-Shabaabka ku sugan deegaannadaas la go’doomiyo, marka u dambeysana ay isku soo dhiibaan dowlada.

Waxaa maalmihii dambe jiray warar la isla dhexmarayay oo sheegayay inuu hakad ku yimid dagaalkii ka dhanka ahaa Al-Shabaab ee ka socday Galmudug.

Hase yeeshee madaweyne ku-xigeenka Galmudug Cali Ciid ayaa beeniyay arrintaas, isagoo xusay in dagaalku uu socday, uuna sii socon doono. “Waxaa lagu sii xoojiyay dhiirragelin iyo gurmadyo kala duwan marka dagaalkaas marnaba ma istaagi,” ayuu yiri. 

“Waxaa naga go’an inaan si buuxda u xoreyno degmooyinka muhiimka ah sida Ceel-dheere, Ceel-buur iyo Xaradheere,” ayuu yiri madaxweyne ku-xigeenka Galmudug.

Dhuusomareeb (Caasimada Online) – Xildhibaan Cabdiraxmaan Maxamed Xuseen (Odowaa) oo haatan ku sugan caasimada Galmudug ee magaalada Dhuusamareeb ayaa ka hadlay abaabulka dagaal ee ka dhanka ah kooxda Al-Shabaab ee hadda ka socda halkaasi.

Odowaa ayaa shaaca ka qaaday in loo baahan yahay in loo midoobo dagaalka kooxdan, si loogi wajaho, loogana saaro guud ahaan dalka.

Wasiirkii hore ee arrimaha gudaha oo hadalkiisa sii wata ayaa shaaca ka qaaday in guud ahaan dadka Soomaaliyeed looga baahan yahay gurmad iyo inay toos uga qayb qaataan dagaalka ay wado dowladda Soomaaliya, isaga oo farriin u diray Puntland iyo Somaliland.

“Dadka Soomaaliyeed ee ku nool deegaanada aan hadda Shabaab Front Line-ka ka aheyn taakulaa laga rabaa, garabaa laga rabaa, hiilaa laga rabaa. Dadkaas kuwa deegaankan kaliya jooga ma’aha Puntland iyo Somaliland ayaa ka mid ah,” ayuu yiri xildhibaan Odowaa.

Xildhibaanka ayaa sidoo kale ugu baaqay labada maamul ee Somaliland iyo Puntland inay garab istaag u muujiyaan dadka shacabka ah ee la dagaalamaya Al-Shabaab, isaga oo ka codsay in hub iyo ciidan ay usoo diraan deegaanada lagula dagaalamayo kooxda Shabaab.

“Haddii ay carigaan qararamsadaan meel ay daynayaan lama arko meel walbo saas ayey u rabaan inay tegaan, marka maamulka Puntland iyo maamulka Somaliland iyo wixii kale oo Soomaali ah oo ka nabad qaba nimanka gurmadka wax haka soo galaan, haddii ay rag soo diri karaan hasoo diraan iyo gabdho haddii ay hub & rasaas soo diri karaan” ayuu raaciyey.

Soomaaliya ayaa haatan ku jirto marxalad dagaal oo ka dhalatay howlgallad lagu qaaday Al-Shabaab ee haatan ka socdo koonfurta iyo bartamaha Soomaaliya, kuwaas oo sii xoogeystay markii ay dagaalka ku biireen dadka shacabka ee ku dhaqan gobollada dalka.