Aadan Yabaal (Caasimada Online) – Waxaa weli isa soo taraya saameynta ka dhalatay weerarkii qaraxyada ku billowday ee ay todobaadkan Al-Shabaab ku qaadeen xerada deegaanka Daaru Nimca oo hoostaga degmada Ruun-nirgood ee Shabeelaha Dhexe.

Weerarkan ayaa geystay khasaare isugu jiro dhimasho iyo dhaawac soo gaaray askar iyo dad shacab ah oo ku noolaa deegaankaasi.

Dadka weerarka ku dhintay waxaa kamid ahayd Hooyo Xaawo Maxamuud Calasow (Xaawo Sagale) oo caan ka ahayd deegaanka Daaru Nimca, taas oo si arxan darro ah loo dilay.

Axmed Nuur oo ah wiil 13 sanno jir ah oo ay dhashay marxuumadda ayaa ka sheekeeyay sida loo dilay hooyadiis, wuxuuna sheegay in marka hore la dhaawacay, kadibna la dilay.

“Marka hore lugtaa xabad looga dhuftay garabka ayaan kasoo qabtay guriga ayaan keenay, kadib guriga ayay soo garaaceen waa laga furi waayay waa soo jabsheen meel ayaan ka hoos galay xabadihii ayay ku fureen waana ku dhammeystireen,” ayuu yiri Axmed Yare.

Sidoo kale wuxuu intaasi kusii daray “Madaxa ayay shan uga dhufteen waa ku wadeen illaa ay ka dhimato aniga haddii ay guriga ka baxeen ayaa ka orday”.

Wiilkan yar ee Hooyadiisa lagu hordilay ayaa sidoo kale wacad ku maray inuu u aargudan doono, isla-markaana uu la dagaalami doono kooxda Al-Shabaab.

“Ninkii Hooyaday dilay aniga ma dhaafayo haddii aan arko xittaa wixii Shabaab ah waan dilaa, inta aan wax heysatana waan iska celinayaa,” ayuu markale yiri Axmed Nuur.

Dhankiisa Cabdi Taakow ah oo nin hoggaamiya ciidanka Macawiisleyda ee ku sugan Daaru Nimca ayaa sidoo kale sheegay in kooxda ay dishay gabar yar oo saddex sano jir aheyd, taas oo uu tilmaamay in dhaawac ahaa loo qaaday, balse mar dambe ay geeriyootay.

“Canug saqiir ah oo saddex sano jirta ayey dileen dhaawaceeda inta la qaaday ayay dhex ku dhimatay waa lasoo celiyay intan ku aasnay,” ayuu isna yiri Cabdi Taakow.

Baydhabo (Caasimada Online) – Abshir Axmed Macalin oo sanado badan ka tirsanaa kooxda Al-Shabaab ayaa maanta isku soo dhiibay ciidamada qeybta 60-aad ee xoogga dalka Soomaaliyeed ee ka howl-gala degaannada maamulka Koonfur Galbeed.

Abshir ayaa ka tirsanaa qeybta ay kooxda ugu yeerto “Jabhadaha”, wuxuuna sheegay inuu ka qeyb-galay dagaalo dhowr ah, gaar ahaan kuwa ka dhacay qeybo kamid ah gobolka Baay.

Ninkaan ayaa waxa uu sheegay inuu u dulqaadan waayay dhibaatada kooxda ku haysata Duurka, taasi oo ku kaliftay inuu isku soo dhiibo ciidamada dowladda federaalka Soomaaliya, sida uu sheegay.

“Waa u adkeysan waayay rafaadka ku haysta duurka iyo sida ay uga been sheegayaan Diinteena suuban ee Islaamka, iyo weliba dhibaatada joogtada ah ee shacabka Soomaaliyeed ee aan waxba galabsan ku hayaan,” ayuu yiri Abshir Axmed Macalin oo muddo ka tirsanaa kooxda Al-Shabaab.

Abshir Axmed Macalin ayaa waxa uu baaq u direy saaxibadiisa kale ee ku haray kooxda Al-Shabaab in ay isaga Soo baxaan kana faa’iidaystaan cafiska dowladda u fidisay xubnaha ka kasoo laabanaya fikradaha gurracan ee xagjirka.

Dowladda federaalka Soomaaliya ayaa muddooyinkii dambe soo bandhigaysay xubno Shabaab ka tirsanaa oo isku soo dhiibay, kuwaasi oo sheegayay in lagu qalday fikrad Diimeed ay salkeeda soo taabteen inaysan waxba ka jirin iyo in ay u adkeysan waayeen howl-galada kooxda uga socda qeybo badan oo dalka.

Dagaalka ka dhanka ah kooxda Al-Shabaab ayaa tan iyo markii uu billowday waxaa kooxda looga saaray deegaano horleh, inkasta oo ay weli ku xooggan yihiin qeybo kamid ah dalka, xilli uu billaabanayo wajiga labaad ee dagaalka, oo ay qeyb ka yihiin dalalka Ethiopia, Kenya iyo Jabuuti.

Muqdisho (Caasimada Online) – Wasiirka Gaashaandhigga ee dowladda federaalka Soomaaliya Cabdulqaadir Maxamed Nuur ayaa ka jawaabay eedeymo uu Xildhibaan Cabdullaahi Maxamed Sanbaloolshe u jeediyay qaabka ay dowladda u dejisay qorshaha wejiga labaad ee dagaalka.

Taliyihii hore ee Nabad-sugidda Soomaaliya Xildhibaan Sanbaloolshe ayaa waxa uu dowladda federaalka ku eedeeyay inay isku koobtay qorshaha dagaalka wejiga labaad, islamarkaana aysan ka qeyb-galin dadka deegaanka oo iyagu door muhiim ah ka qaatay wajigii koowaad ee dagaalka.

“Dagaalkan waxaa u weyna ee guushiisa keenay waa in Shacabka iyo Shabaab la iska horkeenay, dagaalka marka dowladda hogaamineyso dib u dhac iyo jab ayaa ka imaada, marka dadka hogaaminayo horumar iyo guulo ayaa ka imaada,” ayuu yiri Xildhibaan Sanbaloolshe.

Wasiirka Gaashaandhiga oo VOA ay arrintaas wax ka weydiisay ayaa waxa uu sheegay in dowladda aysan ka leexan nidaamkii ay markii hore ku billowday dagaalka ee ka tala-gelinta dadka deegaanka iyo qabaa’ilka Soomaaliyeed.

“Dagaalkan waa dagaal shacabka Soomaaliyeed ay leeyihiin oo shacabka iyo dowladda ay iska kaashanayaan, guulaha la gaaray waxaa lagu gaaray iskaashiga shacabka iyo dowladda, haddana kii ayaa ku raadjoogna oo deegaan walba oo la xoreynayo dadkiisa ayaa ka tala-gelina,” ayuu yiri Wasiirka Gaashaandhiga Soomaaliya.

“Inta harsan waxaa rejaynayna in shacabka Soomaaliyeed ay iska kiciyaan oo u istaagan, hadda kahor kaalmo fiican ayay na-siiyaan shacabka. Waa aaminsahay guud ahaan shacabka Soomaaliyeed nin maanta raba in Khawaarij deegaankiisa u joogaan majirto.”

Wasiirka ayaa sidoo kale waxa uu xusay in qorshaha wejiga labaad ee dagaalka ay doorkooda ka qeyb-gelineyso dadka deegaanka, hase yeeshe ay qorshaha dagaal uu qorsheeyo dowladda oo ay iyadu dejineyso, iyada oo marnaba iska fogeyn shacabkeeda, sida uu hadalka u dhigay.

“Dhamaan deegaanada aan ka howl-galno shaqooyinkii loogu tala-galay in shacabka nagala qabtaan wey kala qeyb-qaadanayaan waajibaadka ciidanka xoogga dalka Soomaaliyeed. Cid kasta oo maamulada iyo deegaanada waa kaashanayna oo waa howl-galina.”

Hoos ka dhageyso wareysigaan oo qeybihiisa hore uu wasiirku kaga hadlayo arrimaha dagaalka Al-Shabaab.

Muqdisho (Caasimada Online) – Guddoomiyaha maamulka gobolka Banaadir, ahna duqa magaalada Muqdisho Yuusuf Xuseen Jimcaale (Madaale) ayaa ku dhawaaqay in la sharciyeeyay lacag dheeraad ah oo laaluush ahaan looga qaadan jiray dadka usoo adeeg doonta xarunta gobolka.

Lacagtan oo laga qaadi jiray dadka raba waraaqaha dhalashada ayaa markii hore si loogu fududeeyo adeeggooda laga qaadi jiray lacag badan oo dheeraad ka ah midda rasmiga ah, hase yeeshe guddoonka ayaa shaaciyay in meesha laga saaray lacagihii laaluushka ahaa ee sida hoose loo kala qaadan jiray, islamarkaana ay hadda ku dhaceyso akoonka dowladda hoose ee Xamar.

“Dadka waa dad deg-degsan oo raba in loo boobsiiyo meeshii la gacma-gacmeysan jiray dadka waxaa dhahnay $5 oo dowladda Hoose ogtahay oo akoonkeeda ku dhacaya ayaa laga qaadaya, shantaas doollar waaxda ayaa dib loogu celinaya oo amuuraheeda dib loogu celinayaa,” ayuu yiri.

“Ka badan lagama qaadi karo qof deg-degsan $5, kuwa caadiga ah $15 ayuu bixinayaa ee warqada dad-dhigista (dhalashada). Ciddii ku xad-gudubta dadka masaakiinta ah ee Soomaaliyeed waxay lamid tahay kuwa been abuurka sameynaya.”

Guddoomiye Madaale ayaa sidoo kale waxa uu digniin culus u diray shaqaalaha gobolka, oo uu sheegay in ciddii lagu qabto iyada oo laaluush ka qaadeysa dadka adeegga soo doontay ay sharciga la tiigsan doonaan.

“Kuwa ka shaqeeya goobaha ku xisaabtama ayaa leeyahay sharciga ayaa la idinla tiigsan doona. Dadweynaha waxaa u sheegayna ka dhaafa dadka laaluushka kala daba-wareegaysan deg-deg hadda rabto $5  shaciga bixineysa wax ka badan lagama qaadi karo, hadda qof caadi ah tahay lacagta caadiga ah ayaa iska bixineysa wax walwal ah ama degdeg ah ma jiraan.”

Inta badan hay’addaha dowladda ayaa waxaa aad looga cawda marka loo adeeg doonto in dadka lagu baarto oo laga qaado lacago aan ku dhicin akoonada dowladda, taasi oo dhowr jeer ay cabasho xooggan ka muujiyeen dadweynaha ku nool magaalada Muqdisho.

Muqdisho (Caasimada Online) – Wasiirka Gaashaandhigga ee dowladda federaalka Soomaaliya Cabdulqaadir Maxamed Nuur ayaa ka hadlay dagaalka ka dhanka kooxda Al-Shabaab, isaga oo faah-faahin ka bixiyay wejiga labaad ee dagaalka ee dhawaan bilaaban doona.

“Shaqadii soo bilaabatay billo ka hor ayaa weli socota, meel gaar ah oo meel hebel ayaa dagaal ka qaadeyna aan ku leeyahay majirto laakiin dib u xoreynta Khawaarijta si fiican ayay u socotaa,” ayuu yiri Wasiirka Gaashaandhiga ee dowladda federaalka.

Wasiir Cabdulqaadir ayaa waxa uu sheegay in diyaar garowga wejiga labaad ee dagaalka uu si habsami leh u socda, islamarkaana ay dhawaan shacabka Soomaaliyeed ay maqli doonaan war farxad-geliya, “Waxaa rabaa in shacabka Soomaaliyeed uga bushaareynayo in taako kamid Khawaarij joogto xabadda kama joogsan doonto.”

Wasiirka Gaashaandhiga ayaa sidoo kale waxa uu xusay in dagaalka iyo diyaar garowga wejiga labaad ay ka wada socdaan dagaalka meelo badan oo dalka, ayna ka go’an tahay in dalka laga xoreeyo kooxda Al-Shabaab, iyada oo loo kaashanayo cid walba oo dowladda ka garab siin karta arrintaas.

“Qorshaha dalka guud ahaan waa in Khawaarijta dalka laga xoreeyo, dib u xoreyntaasi weli waa socota illaa ay ka dhamaato lama joojinayo. Diyaar-garowga iyo dagaalkaba waa socda,” ayuu yiri.

Waxa uu sii raaciyay hadalkiisa “Dowladda Soomaaliyeed qof alaala iyo ciddii nagu kaalmeysa in Khawaarij dalka laga saaro waa kaashaneysa, cid walba way nagala qeyb-galeysa oo aan u aragno in Khawaarijta dalka nagala saarayso, garabna siineysa shacabka Soomaaliyeed.”

Hadalka wasiirka ayaa imanaya xilli ay maalmihii ugu dambeysay abaabul iyo diyaargarow ciidan laga soo sheegayay gobolada Koonfurta & Bartamaha Soomaaliya, ayada oo gaba-gabo uu yahay wajiga koowaad ee dagaalka.

Wejigii hore ee hawl-galka ayaa Shabaab lagaga saaray inta badan deegaanadii ay kaga sugnaayeen dowlad-goboleedyada HirShabelle iyo Galmudug.

Madaxweyne Xasan Sheekh Maxamuud ayaa geed gaaban iyo mid dheerba u fuulaya, sidii dowladdiisu ay dalka kaga cirib-tiri laheyd mintidiinta Al-Shabaab, waxayna dhawaan kooxda wajihi doonta wejigii ugu adkaa ee dagaalka ka dhanka ah oo ay qeyb ka noqonayaan dalalka deriska.

Muqdisho (Caasimada Onlie) – Faah-faahino dheeraad ah ayaa kasoo baxaya dilka oday nabaddoon ah oo maanta loogu geystay degmada Kaaraan, xilli uu ku sugnaa goob ganacsi oo uu ku lahaa halkaasi.

Koox hubeysan ayaa Nabadoon Cali Cumar Carraale AUN ku toogtay goob ganacsi oo ku lahaa degmada Kaaraan ee magaalada Muqdisho, iyada oo dableyda geysatay dilkaan ay markiiba iskaga baxsadeen goobta.

Nabaddoon Cali ayaa la sheegay inuu kasoo jeedo degmada Ruun-Nirgood ee gobolka Shabeellaha Dhexe, ayada oo dilkiisa lagu eedeeyay kooxda Al-Shabaab oo dadka deegaanka uu kasoo jeedo kula jiraan dagaal xooggan.

Illaa hadda majiro wax war ah oo kasoo baxay laamaha amaanka iyo maamulka gobolka Banaadir, oo la xiriira dilka Nabaddoonkan loogu geystay degmada Kaaraan ee magaalada Muqdisho.

Dilka Nabaddoonkan ayaa imanaya xilli uu xalay degmada Kaaraan ka qabsoomay shir looga hadlayay amaanka degmadaasi, oo ay ka qeyb-galeen maamulka gobolka, saraakiisha ciidanka, maamulka Kaaraan iyo qaybaha kala duwan ee bulshada ku dhaqan degmadaasi.

Kaaraan ayaa noqotay degmada ugu dilalka badan ee gobolka Banaadir, islamarkaana ay ku sugan yihiin kooxo burcad ah iyo ciyaal weero oo si isku mid ah u dhibaateeya dadka shacabka ah, sida uu shaaca ka qaaday guddoomiyaha gobolka Banaadir ahna Duqa Muqdisho Yuusuf Madaale oo kulankaas.

Si kastaba, Kaaraan ayaa kamid ah degmooyinka dhaca waqooyiga magaalada Muqdisho, waxaana ay wajaheysaa xaaladdii ugu darneyd ee amniga, taas oo dib u dhigtay hormarkii degmadaasi.

Muqdisho (Caasimada Online) – Ra’iisul Wasaaraha Soomaaliya Mudane Xamza Cabdi Barre ayaa maanta dhagax dhigay Warshadda Sameynta Burka oo ah tii ugu horreysay ee nooceeda ah ee laga hirgeliyo dalka burburkii kadib.

Warshadaan oo ay hirgalinayaan ganacsato Soomaaliyeed ayaa waxaa ku baxaya dhisamaheeda 37-milyan oo doollar, sida uu shaaciyay xafiiska ra’iisul wasaaraha Soomaaliya.

Ra’iisul Wasaare Xamza oo dhiirri-gelinaya maalgashiga Warshadaha iyo wax soo-saarka beeraha ayaa ku bogaadiyey ganacsatada Soomaaliyeed ee hirgelinaya warshaddan, isaga oo tilmaamay muhiimadda ay u leedahay kobcinta maalgashiga gudaha, si dalkeennu uu uga baxo cunto yarida iyo gaajada.

“In aan wax soo saarano oo warshadaheena dib u kicino, oo shaqooyinkii qaban jireen oo weliba sii casriyeysan qabtaan waa tallaabo wanaagsan oo dhaqaalaha dalka iyo isku filnaashaha dhaqaale ee istaraatijiga noo ah wax ka qabana waaye,” ayuu yiri ra’iisul wasaare Xamza Cabdi Barre.

Waxa uu sii raaciyay hadalkiisa “Wax weyn ayay ka bedeli doonta baahida aan qabno, ayada oo ognahay inta aan soo dhoofsano iyo lacagta adag ee inooga baxda bur, in aan gudaheena kasoo saarano waxay keenni doonta horumar wanaagsan oo dhinicii dhaqaalaha iyo bulshadaba ah Ilaahay idinkiis.”

Xukuumadda uu hogaamiyo ra’iisul wasaare Xamza ayaa qorsheynaysa sannadaha dhow in la sameeyo aag u gaar ah Warshadaha, wuxuuna ra’iisul wasaaruhu ugu baaqay shacabka Soomaaliyeed ee deggan xarumaha dowladda in la banneeyo, si loogu adeeggo dalka.

Ugu dambeyntiina waxa uu xusay in cunto yaridu ay tahay dhibaato weyn oo caalamka heysata, sidaas awgeedna ay xukuumaddu dhiirri-gelinayso maalgashiyada caalamiga ah iyo kuwa gudaha ee xagga warshadaha iyo wax soosaarka beeraha.

Warshadda Burka oo ay hirgalinayaan ganacsato Soomaaliyeed ayaa waxaa ku baxaya dhismaheeda 37 milyan oo dollar, iyada oo si maalinle ah u soo saari doonta 16,000 oo kiish (Loor).

Muqdisho (Caasimada Online) – Faahfaahino dheeraad ah ayaa waxaa laga helayaa howlgal qorsheysan oo ay xalay ciidamada Nabad Sugidda iyo kuwa Booliska Soomaaliya ay ka sameeyeen xaafado ka tirsan gudaha degmada Wadajir ee gobolka Banaadir.

Howlgalkan ayaa waxaa lagu soo qabtay dad u badan dhalinyaro, kuwaas oo qaarkood lasii daayay, halka kuwa kale oo laga shakiyay lagu xiray saldhigga degmada Wadajir.

Nasri Axmed Maxamed oo ah taliyaha booliska ee degmadaas ayaa ka warbixiyay baaritaanka ay sameeyeen, wuxuuna ujeedka ku sheegay amni xaqiijin.

“Waxaan u soconay waa inaan ka shaqeyno amnigiina iyo bad-qabkiina waxaan u carareyno waa inaan idinka idin shaqeyno,” ayuu yiru Taliye Nasri Axmed.

Sidoo kale wuxuu fariin u diray dadka deegaanka, isaga oo ugu baaqay inay la shaqeeyaan ciidamada ammaanka, si looga hortago wax kasta oo liddi ku ah nabad-gelyada.

“Idinkana waxaan idinka codsaneynaa inaan nala shaqeysaan oo aad booliska ku xirantaan lambarka gaaban aad soo wacdaan” ayuu markale yiri taliyaha saldhigga Wadajir.

Dhankiisa guddoomiyaha maamulka degmada Wadajir, Axmed Cabdulle Afrax oo howlgalka qayb ka ahaa ayaa soo jeediyay in laga wada shaqeeyo amniga guud ee degmada.

“Wax kasta xun waxaan rabnaa inaan meel uga soo wada jeesano inaan ogaano inaan isku dan-nahay” ayuu isna yiri guddoomiyaha maamulka degmada Wadajir.

Howlgalkan ayaa kusoo aadayo, maalin uun kadib markii tiro hoobiyeyaal ah lagu garaacay xaafadda Ceelka Sablaale oo ka tirsan degmada Wadajir ee gobolka Banaadir.

Muqdisho (Caasimada Online) – Taliyaha qaybta guud ee booliska gobolka Banaadir Gaashaanle Sare, Mahdi Cumar Mumin (Macallin Mahdi) oo la hadlay warbaahinta ayaa digniin culus u diray saraakiisha ciidamada dowladda ee ka howl-gala magaalada Muqdisho.

Macallin Mahdi ayaa shaaca ka qaaday inay soo badatay marka howlgallada la sameynaayo in dadweyne aan dambi gelin meel la’isugu geeyo, kadib sawirro laga qaado, lana baahiyo.

Taliyaha ayaa shaaca ka qaaday in dambi ay tahay in qof aan waxba geysan xoriyadda laga qaado, kadibna warbaahinta la horeeyo, sida uu hadalka u dhigay.

“Waxaa batay ayadoo howlgallo la galaayo in dadka meel la’isugu keeno oo xorriyadda laga qaado in media iyo warbaahinta laga sii daayo. Qofka muwaadinka ah in isaga oo dambi lagu haynin inta meel la keeno xorriyadda laga qaado la sawirro waa dambi,” ayuu yiri taliyaha qaybta guud ee booliska gobolka Banaadir Gaashaanle Sare Macallin Mahdi.

Sidoo kale wuxuu intaasi ku daray in dhammaan dadka deggan caasimada aysan wada aheyn dambiileyaal, sidaas darteedna loo baahanyahay in la dhowro sharafka muwaadinka.

“Dadka Muqdisho deggan qof kastaa dambiile ma’ahan qofkii dambi leh ayaa warbaahinta laga sii deyn karaa, laakiin 500 boqol oo qof in meel la’isugu keeno inta aad duubtaan lasii daayo oo la dhaho waa dambiileyaal arrin wanaagsan ma’ahan,” ayuu sii raaciyay.

Ugu dambeyn wuxuu farriin u diray saraakiisha ciidamada ee ku sugan Muqdisho, wuxuuna ugu baaqay inay ka waan toobaan arrintaasi oo ah mid aad usoo laa laabatay.

“Wax bannaan ma’ahan wax loo baahan yahayna ma’ahan, waana wax laga qurux badan yahay in la’iska dhaafo ayaa la rabaa” ayuu hadalkiisa kusoo gabagabeeyay.

Hadalkan ayaa kusoo aadayo, ayada oo inta badan dadka lagu soo qabto howlgallada habeenkii ka dhaca Muqdisho hal meel la’isugu geeyo, ayada oo goobtaasina looga qaado sawirro kadibna mar dambe lasii daayo sida marar badan ka dhacday magaalada Muqdisho.

Muqdisho (Caasimada Online) – Guddoomiyaha maamulka gobolka Banaadir, ahna duqa magaalada Muqdisho Yuusuf Xuseen Jimcaale (Madaale) iyo qaar kamid ah ku xigeenadiisa ayaa xalay shir uga qayb-galay degmada Kaaraan, kaas oo looga hadlayey ammaanka degmadaasi.

Kulankan ayaa waxaa sidoo kale qayb ka ahaa maamulka Kaaraan iyo qaybaha kala duwan ee bulshada ku dhaqan degmadaasi, ayada oo inta badan laga hadlay dhibaatada Kaaraan.

Mid kamid ah odayaasha deegaanka oo ka hadlay madasha ayaa ka dhawaajiyay inay wajahayaan xaaladdii ugu xumeyd ee dhanka amniga, wuxuuna farriin toos ah u diray Madaale oo kulanka fadhiyay, isaga oo ka codsaday inuu la dagaalo ciyaal weerada.

“Ninka shalay qoray wax ku dhici jiray maanta laba Maqar ayuu iska soo qaadanayaa waxa uu ku leeyahay ciyaal weero ayaan ahay, marka guddoomiyaha gobolka Banaadir, ahna Duqa magaalada Muqdisho waxaan ka codsaneynaa in magacaan ciyaal weerada ee dadkii lagu laayay in uu wax ka qabtom” ayuu yiri mid kamid shacabka ku dhaqan Kaaraan.

Dhankiisa duqa Muqdisho oo kulanka ka hadlay ayaa shaaca ka qaaday in Kaaraan ay tahay degmada ugu dilalka badan ee gobolka Banaadir, isla-markaana ay ku sugan yihiin kooxo burcad ah iyo ciyaal weero oo si isku mid ah u dhibaateeya dadka shacabka ah.

“Degmada Kaaraan waa degmada ugu dilka badan waa degmada ugu dhaca badan waa degmada ugu baaba’san waa degmada ugu mugdiga badan waayay,” ayuu yiri Madaale.

Sidoo kale waxaa uu sababta ay ku timid arrintaan ku sheegay wada shaqeynta la’aanta ka dhex jirta shacabka degmada Kaaraan iyo saraakiisha laamaha amniga.

“Waxaa yeelaayo dadkeeda ayaana diyaar aheyn, dadkeeda haddii ay diyaar yihiin waxaan diyaar u nahay inaan la shaqeyno,” ayuu markale yiri duqa Muqdiso.

Ugu dambeyn wuxuu ka hadlay dhibaatada kooxaha ciyaal weerada ay ku hayaan gudaha Muqdisho, isaga oo sheegay inay markasta soo daba kacaan odayaal iyo waalidiinta qaar, isaga oo taasi ka digay, wuxuuna sheegay in dadkaasi iyaguna ay la dagaalami doonaan

“Ciyaal gaangiistarada burcadda ah haddii lasoo qabto odeyga daba jooga iyaga ayuu lamid yahay hooyada daba joogtana iyaga ayay lamid tahay” ayuu ku daray guddoomiyuhu.

Kaaraan ayaa kamid ah degmooyinka dhaca waqooyiga magaalada Muqdisho, waxaana ay  wajaheysaa xaaladdii ugu darneyd ee amniga, taas oo dib u dhigtay hormarkii degmadaasi.

Kismaayo (Caasimada Online) – Xildhibaan Shukri Saalax Cabdullaahi oo kamid ahaa mudanayaasha baarlamaanka maamulka Jubbaland ayaa maanta ku geeriyooday magaalada Kismaayo ee xarunta gobolka Jubbada Hoose.

Allaha unaxariiste Xildhibaanka ayaa waxaa la sheegay in maalmihii lasoo dhaafay uu ku xanuusanayay magaalada Kismaayo, islamarkaana uu xanuunnkii hayay ugu dambeyn u geeriyooday saaka.

Faah-faahin dheeraad ah lagama hayo nooca uu ahaa xanuunka hayay Xildhibaan Shukri Saalax Cabdullaahi ee ugu dambeyn maanta ugeeriyooday AUN.

Geeridka Xildhibaanka ayaa waxaa ka tacsiyeeyay madax iyo siyaasiyiin kala duwan oo ugu horeeyo madaxweynaha maamulka Jubbaland Axmed Maxamed Islaam (Axmed Madoobe).

Axmed Madoobe ayaa tacsi u diray guud ahaan shacabka reer Jubbaland, qoyskii iyo qaraabadii uu ka baxay Xildhibaan Shukri Saalax Cabdullaahi.

“Waxaan tacsi u diraya guud ahaan shacabka reer Jubaland, Xildhibaanada golaha wakiilada, qoyskii iyo qaraabadii uu ka baxay Xildhibaanka ay ku timid geerida naxdinta leh, Xildhibaan Shukri Saalax Cabdullahi oo ku geeriyooday magaalada Kismaayo,” ayuu yiri madaxweynaha Jubbaland Axmed Madoobe.

Waxa uu intaasi sii raaciyay qoraalka madaxweynaha Jubbaland “Maruuxmka waxaan alle uga baryaya inuu naxariistii jano ha waraabiyo.”

Muqdisho (Caasimada Online) – Siyaasiyiinta iyo waxgaradka ka soo jeeda deegaanada Jubbaland ayaa go’aan culus ka gaaray in Madaxweynaha Jubbaland Axmed Madoobe uu safar ku tago gobolka Gedo iyo inuu sii xukumo Jubaland.

Kulankaas oo Muqdisho lagu qabtay waxaa ka soo qeyb galay siyaasiyiin ay ka mid yihiin Senator Cabdullahi Fartaag iyo Sanetor Iftiin Baasto, waxaana lagu iclaamiyey dagaal ka dhan ah Axmed Madoobe.

Qaar ka mid ah odayaashii ka soo qeyb galay kulanka ayaa sheegay in aysan suurta-geli doonin in Axmed Madoobe safar ku tago gobolka Gedo, iyagoo ku dhawaaqay in awood ciidan looga hor tago damaca madaxweynaha Jubbaland, sida ay hadalkooda u dhigeen.

“Axmed isku xishoo, umadda adigu ma lihid, waa fashilantay, Daarood oo dhan ayaa ku soo nacay, kuwii dad kuugu dhawaa ayaa Nairobi ku shiray oo ku diiday,” ayuu yiri Senator Fartaag.

Mid ka mid ah odayaasha dhaqanka ayaa yiri, “Maalin kasta Axmed Madoobe wuxuu qorsheeyaa inuu Gedo aado, wuxuu ku haminayaa inuu maamul isaga taabacsan u magacaabo Gedo, waxaas been waaye Axmed, Gedo waa kaa xiran tahay, cid kaa wakil ah xitaa ma tegi karto.”

Senator Iftiin Baasto oo saaxiib dhow la ahaa Axmed Madoobe ayaa kulankaan ka sheegay in Axmed Madoobe fashilmay oo Jubbaland uusan sii hoggaami karin.

“Jubbaland qof hoggaamiya ma weyneyso eek a hor wareeg saaxiibkey Axmedow, waa lagaa soo cabtay, waxna waa qaban weysay, 12 sano kadib waan kugu qanci weynay ee Axmedow naga raali ahaaw,” ayuu yiri Senator Iftiin Baasto.

Dhankiisa, Senator Fartaag ayaa carrabka ku adkeeyey in muddo kororsi iska dhaafe aan Axmed Madoobe laga yeeli doonin in doorashada soo socota ee Jubbaland ka dhaceysa uusan door ku yeela doonin, maadaama labadii jeer ee dastuurku u ogolaa uu soo hoggaamiyey Jubaland.

Hoos ka daawo