Addis Ababa (Caasimada Online) – Dowladda federaalka Soomaaliya iyo Itoobiya ayaa maanta heshiiska adeega Hawada (ASA) ee labada dal ku kala saxiixday magaalada Addis Ababa.

Heshiiskan ay labada kala saxiixdeen ayaa waxa lagu sameeyay dib u habeyn, kaasi oo la dhaqan-geliyay 3-dii December 1988-kii.

Wasiirka Gaadiidka iyo Duulista Hawada Xukuumadda Federaalka Soomaaliya, Xil. Fardowsa Cismaan Cigaal iyo dhigeeda dalka Itoobiya, Marwo Dagmawit Moges ayaa goobjoog u ahaa munaasabad ka dhacday Addis Ababa ee lagu saxiixay heshiiskaas.

Heshiiskan ayaa la sheegay inuu la jaan-qaadayo waqtigan la joogo, iyadoo lagu sameeyay isbeddelo lagu horumarinayo iskaashiga labada dal ee dhinacyada Gaadiidka iyo Duulista Hawada.

“Heshiiskan 1988 ayaa horay loo saxiixay , maaddama 35 sanno ay ka soo wareegatay waxaan u baahanahay in aan helno heshiis casri ah oo la jaanqadi kara qarnigaan la joogo,” ayey tiri Wasiirka Gaadiidka iyo Duulista Hawada XFS, Xil. Fardowsa.

Waxay hadalkeeda sii raacisay “Heshiiskan wuxuu horumarinayaa iskaashigeena iyo khibrad wadaaga dhinacyada Gaadiidka iyo Duulista Hawada Soomaaliya.”

Soomaaliya iyo Itoobiya ayaa leh xiriir wanaagsan, ayada oo labada dhinac ay hore iskula qaateen sidii looga wada-shaqayn lahaa arrimaha amniga, dhaqaalaha iyo danaha labada dawladood.

Jabuuti (Caasimada Online) – Madaxweynaha Jabuuti Ismaaciil Cumar Geelle ayaa maanta goobjoog ka noqday heshiis muhiim ah oo dowladdiisa la gashay koox qaabilsan teknooloojiyadda hawada sare oo ka socota Hong Kong.

Heshiiskan ayaa ku saabsan horumarinta qalabka iyo gantaallada dayax gacmeedka laga rido, xili Jabuuti ay ku howlan tahay sameynta xarun lag diro dayax-gacmeedka.

Mashruuca dayax-gacmeedka Jabuuti ayaa waxa ku bixi doona Hal bilyan oo dollar, wuxuuna qaadan doona muddo shan sano ah, sida ay ku warameyso wakaalada wararka ee Jabuuti.

Sidoo kale waxaa qeyb ka ah mashruucan in deked iyo waddo laga dhiso gobolka Waqooyiga dalkaas dhaca ee Obokh.

Dowladda Jabuuti ayaa noqon doonta dowladdii ugu horreysay ee Afrikan ah oo sameysata dayax-gacmeed, waxaana lagu wadaa in ay jiri doonaan dowlado kale oo ku daysan doona dowladda uu hogaamiyo Geelle.

Jabuuti ayaa sanadihii dambe ku tallaabsaneysay horumaro kala duwan oo uu ku hagayay madaxweyne Geelle, inkasta oo xukunkiisa lagu eedeeyo in uu ku kaco falal ka dhan ah xoriyatul qowlka.

Muqdisho (Caasimada Online) – Guddoomiyaha gobobolka Banaadir ahna duqa magaalada Muqdisho Mudane Yuusuf Xuseen Jimcaale (Madaale) ayaa maanta si rasmi ah u daah-furay shirka banbaxa maamulka gobolka Banaadir.

Shirkan oo socon doono mudda saddex maalmood ah ayaa waxa uu ku salaysan yahay is-barasho iyo in la isu keeno guud ahaan maamulka sare, agaasimayaasha iyo guddoomiyaasha degmooyinka ee magaalada Muqdisho.

“Ujeedka waa si loo hagaajiyo dib-u-habayna loogu sameeyo qaab-dhismeedka shaqo ee maamulka gobolka Banaadir iyo in gobolku yeesho aragti wadareed iyo qorshayaal istaraatiijiyadeed kuna salaysan sidii loo hagaajin lahaa adeegyadda bulshada ee magaalada Muqdisho,” ayaa lagu yiri qoraal kasoo baxay shirkaan.

Sidoo kale waxa shirkaan looga hadlay in la helo qaab-dhismeed sawiran oo ku dhegan qayb walba iyo degmo walba ee gobolka Banaadir ah, waxaana la filayaa in banbaxaan laga soo saari doono qorsha siyaasadeedka iyo xeerarka gobolka Banaadir.

Guddoomiyaha gobobolka Banaadir ahna duqa magaalada Muqdisho Mudane Yuusuf Xuseen Jimcaale (Madaale) oo shirkaan daah-furay ayaa madaxdii kasoo qeyb-gashay kula dardaarmay in si hufan oo Alla ka cabsi leh loogu adeego bulshada.

Guddoomiye Madaale ayaa sidoo kale waxa uu madaxda maamulka gobolka u sheegay in aan marnaba la aqbali doonin musuq-maasuq iyo wax is-dabamarin.

Guddoomiye ku-xigeenada iyo xoghayaha guud ee gobolka Banaadir oo iyaguna halkaasi hadal ka jeediyay ayaa waxay tilmaameen in shir-weynahaan banbaxa uu noqon doono mid ahmiyad gaar u leh horumarinta caasimadda, fulinta adeegyada bulshada, hogaaminta siyaasada cad ee gobolka iyo isla-xisaabtan ku aadan gudashada waajibaadka shaqo.

Baydhaba (Caasimada Online) – Ciidamada ammaanka ee Koonfur Galbeed ayaa lagu soo warramayaa in laga wareejiyay amniga goobta uu ka dhacayo shirka dib u heshiisiinta maamulkaasi oo ay ka qaybgalayaan xubnaha mucaaradka ee jooga magaalada Muqdisho.

Wararka ayaa sheegaya in goobta uu shirka ka dhacayo iyo amniga guud ee magaalada lagu wareejiyay ciidamada Itoobiya ee qaybta ka ah howlgalka ATMIS ee Soomaaliya.

Ujeedada arrintaan ka dambeysa ayaa ah fulinta dalabka xubnaha mucaaradka ee kasoo horjeedo Lafta-gareen oo horay u sheegay inay u baahan yihiin gacan ka madax banaan maamulka oo sugta amnigooda inta ay wada-hadalka u joogaan magaalada Baydhaba.

Dhinaca kale guddoomiyaha Golaha Shacabka, Sheekh Aadan Madoobe oo isagu iclaamiyay shirkan oo haatan ku sugan Baydhaba ayaa la kulmay saraakiisha howlgalka ATMIS, isaga oo kala hadlay arrimaha amniga, wuxuuna xaqiijiyay in lagu wareejiyay amniga guud.

Sidoo kale Aadan Madoobe ayaa boggaadiyay ciidanka nabad ilaalinta qeybta 3-aad ee ATMIS isagoo ku dhiirageliyay in laga taxdaro weerarada kooxda Al-Shabaab, wuxuuna xusay in Ciidanka Xoogga Dalka Soomaaliyeed ay ka wadashaqeyaan amniga.

Dhankooda saraakiihs ATMIS ayaa guddoomiyaha u sheegay in ay sugi doonaan amniga guud ee magaalada, goobta shirka lagu qabanaayo ee Baydhabo & wufuuda imaaneysa.

Madaxweynaha Soomaaliya, Xasan Sheekh Maxamuud ayaa la filayaa inuu furo shirkaan, isaga oo saacadaha soo socda gaari doono magaalada Baydhaba ee xarunta gobolka Baay.

Shirka ayaa waxaa looga hadli doonaa xaaladda siyaasadeed ee Koonfur Galbeed, gaar ahaan doorashada kusoo foodka leh maamulkaas oo ay isku hayaan labada dhinac.

Sida uu qorshuhu yahay waxaa la filayaa in go’aanno wax ku ool ah ay kasoo baxaan shirkan oo kusoo aaday, xilli loo baahnaa oo ay qalalaase ka taagnaayeen Koonfur Galbeed.

Xiisadda ayaa kasii dartay markii ay mucaaradka ka horyimaadeen muddo kororsiga loo sameeyay Lafta-gareen, waxaana ka dhashay dagaal ka dhacay magaalada Baydhaba

Kismaayo (Caasimada Online) – Wararka ka imaanaya gobolka Jubbada Hoose ayaa sheegaya in darawalka mid kamid ah golaha wasiirada maamulka Jubbaland uu u goostay Al-Shabaab, isla-markaana uu iska dhiibay magaalada Jilib ee gobolka Jubbada Dhexe.

Darawalka ayaa u shaqeynayay wasiir ku xigeenka wasaaradda Biyaha iyo Tamarta ee maamamulkaasi Mustaf Xaaji, wuxuuna la goostay gaari qaali ah oo ay wasaaraddu laheyd.

Gaariga ayaa noociisa lagu sheegay Hardtop, waana gawaarida lagu isticmaalo dhulka bacaadka ah, kaas oo ay horay Jubbaland ugu deeqday hay’ad caalami ah.

Wararka ayaa intaasi ku daraya in gaariga la geeyay magaalada Jilib oo ay ku sugan yihiin xoogaga Al-Shabaab, sida ay innoo xaqiijiyeen ilo wareedyo lagu kalsoon yahay.

Ma cadda sida uu ninkan darawalka ah ugu suura-gashay gaariga uu la baxsaday iyo sida lagu ogaan waayay wada-shaqeynta kala dhexeysay koxoda Al-Shabaab.

Dhanka kale ma jiro weli wax hadal ah oo kasoo baxay mas’uuliyiinta Jubbaland iyo saraakiisha ammaanka oo ku aadan gaarigaasi lala goostay ee loo geeyay Al-Shabaab.

Waa dhacdadii labaad, ayada oo dhowaan darawalka guddoomiyihii hore Golaha Shacabka, Mudane Maxamed Mursal Sheekh Cabdiraxmaan uu isna isku dhiibtay kooxda Al-Shabaab.

Darawalkaas oo muddo 4 sanno ah la shaqeeyay Mursal ayaa maalmo kahor u goostay Al-Shabaab, isagoo markaas ka tegay guriga guddoomiyaha, waxaana arrintaasi ka dhashay shaki xoogan iyo walaac amni, maadaama aan xog badan laga helin baxsashadiisa.

Arrimahan ayaa kusoo aadayo, ayada oo haatan ay dalka ka socdaan howlgallo culus oo ka dhan ah Al-Shabaab, kuwaas oo la filayo inay ka billowdaan gobollada Jubbooyinka.

Muqdisho (Caasimada Online) – Faahfaahino dheeraad ah ayaa waxaa laga helayaa howlgal qorsheysan oo ay xalay ciidamada Booliska Soomaaliya ka sameeyeen xaafadaha degmada Xamarjajab ee gobolka Banaadir, kaas oo lagu soo qab qabtay dad fara badan.

Howlgalkan ayaa waxaa horkacayay taliyaha qaybta Waliyow Cadde Gaashaanle Isaaq Maxamed Ciise, waxaana sidoo kale qayb ka ahaa maamulka degmadaasi.

Gaashaanle Isaaq Maxamed Ciise oo ka warbixiyay howlgalkan ayaa ka hadlay meesha uu maraayo ammaanka dalka, isagoo bogaadiyay guulaha laga gaaray howlgallada gobollada.

“Waxaad ogtihiin wiilkii halkan Xamar ka baxo inuu caawa Masagawaay iyo Ceeldheer uu xabadda kasii ridaayo,” ayuu yiri taliyaha Booliska ee qaybta Waliyow Cadde.

Sidoo kale wuxuu tilmaamay in culeyska kooxda Al-Shabaab lagu hayo uu keenay inay si dhuumaaleysi ah ay kusoo galaan gudaha magaalada Muqdisho, isaga oo shaaciyay in aysan macquul aheyn in lagu soo dhaweeyo ama laga kireeyo guryaha Xamarjajab.

“Teamkii halkaas kasoo firxaday in degmadan qaybo kamid ah lagu soo dhaweeyo ama laga kireeyo guryihii ay idinla dagan yihiin macquul ma noqoneyso,” ayuu markale yiri taliyuhu.

Taliyaha qaybta Waliyow Cadde oo hadalkiisa sii wata ayaa dardaaran culus u jeediyay dadka deegaanka, wuxuuna ugu baaqay in aysan guryaha ka kireyn dad aysan aqoon.

“Hal maado ayaa idin-kula dardaarmayaa gurigaaga inaadan nin Khawaarij ah ka kireyn nin firxad ah oo gobolka kale ka yimid oo aadan aqoon waxa uu soo sameeyay oo habraaca guriga kireyntiisa loo maro aad marsiin inaadan ka kireyn gurigaaga,” ayuu sii raaciyay.

Maalmihii u dambeeyay ciidamada dowladda Soomaaliya ayaa kordhiyay howlgallada lagu sugayo amniga caasimada oo ay inta badan ka dhacaan falal liddi ku ah nabad-gelyada.

Muqdisho (Caasimada Online) – Sheekh Maxamuud Cali Ow-Xuseen, oo kooxda Al-Shabaab ay 11-sano ka hor ka soo musaafurisay degaanka Masaajid Cali-gaduud ee gobolka Sh/Dhexe, ayaa hadda sheegay inuu dib ugu laabanayo deegaankii.

Sheekh Maxamuud oo wareysi siiyey Idaacadda Dowladda ee Radio Muqdisho ayaa sheegay Masaajid Cali-gaduud ku lahaa masjid weyn oo in ka badan 50 sano uu Kitaabo ka akhrinayey.

Sheekha ayaa xaqiijiyey inuu dib u bilaabayo duruustii diinta Islaamka ee dadka uu bari jiray ka hor inta aysan deegaankaas ka soo ceyrsan kooxda Al-Shabaab, oo aad u baacsata dadka aqoonta dheer u leh diinta islaamka.

Sheekh Maxamuud Cali Ow-Xuseen ayaa aad looga jeclaa degaanka Masaajid Cali-gaduud, waxaana xusid mudan in masjidkii uu Kitaabada ka akhri jiray ay Al-Shabaab ka dhigteen Bakhaar ay hubka dhigtaan.

“Al-Shabaab waa i dhibi jireen, in ay i dilaan ayey go’aansadeen dhowr mar, balse Alle ayaa iga badbaadiyey, waana isaga soo cararay deegaankii, waxay igu heysteen in deegaanka aan ka ahaa Sheekh la jecelyahay,” ayuu yiri Sheekh Maxamuud.

Wuxuu sheegay in hadda uu dib u dhisayo masaajidkii ay Al-Shabaab bakhaarka u bedaleen 10 sano ka hor, oo duruustii diinta Islaamka uu dib ugu bilaabayo dadkiisii jeclaa.

“Waxaa asal ah in amni la helo, deegaankeygii Masaajid Cali-gaduud hadda waa la xoreeyey waana ku laabanaa, masaajidkiina dib ayaan u dhisayaa, ee dowladda iyo dadka Soomaaliyeed waxaan leeyahay amniga ku dadaala, hadii nabad la helo wax kasta waa la helaahe,” ayuu hadalkiisa ku sii daray Sheekh Maxamuud.

Kooxda Al-Shabaab ayaa caan ku ah burburinta goobaha cibaadada, waxaana deegaanadii laga xoreeyey laga soo tebiyaa dhacdooyin xanuun badan oo ay u geysa jireen dadka iyo diinta.

Hoos ka dhageyso wareysiga

Muqdisho (Caasimada Online) – Dowladda Mareykanka ayaa Axaddii Soomaaliya ku wareejisay hub ay ugu talagaleen ciidanka xoogga dalka, gaar ahaan Danab si loogu xaoojiyo ciidanka dagaalka ay kula jiraan kooxda Al-Shabaab.

Sahaydan, oo qiimaheedu ahaa 9 milyan oo dollar, ayaa waxaa ka mid ah hubka culus, baabuurta gaashaaman, kuwa dhismaha, qalabka lagu baaro walxaha qaraxa, agabka dayaxtirka gaadiidka ciidamada iyo hubka.

“Waxaan ku faraxsannahay guusha ay ciidamada Soomaaliya ka gaareen dagaalka taariikhiga ah ee ay ku xoreynayaan bulshooyinka Soomaaliyeed ee ay dhibaateysan Al-shabaab,” ayuu yiri danjire Andre. “Waa dagaal ay Soomaali hormuud ka tahay oo ay Soomaali dagaallameyso. Maraykanku wuxuu dib u xaqiijinayaa sida ay nooga go’an tahay inaan taageerno dadaalkan,” waxaa sidaas yiri safiirka Mreykanka ee Soomaaliya Larry Andre. 

“Mareykanku wuxuu noo gartay inuu nagu garab istaago xaaladaan adag, waxaan maanta kala wareegeynaa agabkii ay ciidankeenu u baahnaayeen, waa fariin iyo garab istaag wada socda hubkaan uu Mareykanku nasiiyey,” ayuu yiri wasiirka difaaca Soomaaliya Cabdulqaadir Maxamed Nuur.

Haddaba arrintani maxay ka dhigan tahay?

Inkastoo Soomaaliya ay saarantahay cunnaqabateynta hubka haddana dowladii kala dambeyay mid walba oo ka mid ah waxay dadaal galisay in dalka laga qaado cunnaqabateynta. Balse dhamaantood kuma aysan guuleysan.

 Maxamed Mukhtaar Ibraahim, oo wasiir ka soo noqday Soomaaliya,ayaa aaminsan in hubkan la siiyay dowladda Soomaaliya uu wax badan ku kordhin doono gaarhaan marka laga fiiriyo dagaalka dowladdu xilligaan kula jirto Shabaab.

Wuxuu sheegay in sidoo kale taageerada dowladda federaalku ka hesho dalalka kale aysan ku ekeyn oo kaliya hub, balse la siiyo waxyaabo kale sida cunto iyo dawooyin kuwaas oo gacan ka gaysan kara howgallada socda.

“Hubka hadda la siiyay ciidamada dagaalka runtii wuu ka anfacayaa,” ayuu yiri  wasiir hore Maxamed Mukhtaar Ibraahim. Wuxuu intaa raaciyay” runtii waa tallaabo soo dhweyn mudan”

Sidoo kale Muktaar ayaa aaminsan in ciidamada Macawisley ay xitaa helayaan waxyaabaha ay u baahan yihiin marka la eego kaalmadan agabka kala duwan isugu jirta ee la siiyay dowladda Soomaaliya.

Mar la waydiyay in hubkaan isticmaalkiisa ay u diyaarsanyihiin ciidamada Soomaaliya wuxuu sheegay in hubkaan aanu ku cusbeyn ciidamada dowladda federaalka Soomaaliya. “Runtii hubka hadda Soomaaliya la siinayo maaha hub ku cusub oo aaney aad u garaneyn ma aha waa hub loo tababaray isticmaalkiisa,”.

Ciidamada Mareykanka

Sanadkii la soo dhaafay madaxweynaha Mareykanka Joe Biden ayaa amray in dib Soomaaliya loogu celiyo boqollaal askarta dalkaas, kuwaas oo

maamulkii madaxweyne Donald Trump bishii December ee sanadkii 2020, Soomaaliya kala baxay ciidan Ameerikaan ah oo tiradooda lagu qiyaasay 700 oo askari, kuwaas oo shaqadooda ay ahayd in ay ciidanka dowladda Soomaaliya ka caawiyaan dagaalka ka dhanka ah Al-Shabaab.

 “Madaxweyne Biden ayaa xilligaas oggolaaday codsi uga yimid Xogyaha Gaashaandhiga oo ahaa in dib loo howlgeliyo milaterigii Mareykanka ee joogay Soomaaliya, si uu wax ku ool u noqdo dagaalka lagula jiro Al-Shabaab,” ayuu yiri mas’uul sare oo ka mid ah maamulka dowladda, kaas oo magaciisa aan la sheegin.

Muqdisho (Caasimada Online) – Madaxweynaha dowladda federaalka Soomaaliya iyo wafdi uu hoggaaminayo ayaa maanta oo Talaado ah booqanayo magaalada Baydhabo ee xarunta kumeel gaarka ee K/ Galbeeed oo laga dareemayo dhaq-dhaqaaqyo siyaasadeed.

Ilo wareedyo lagu kalsoonyahay ayaa Casimada Online u xaqiijiyey in madaxweynaha uu saacadaha soo socdo u bixi doono magaaladaas oo sidoo kale xarun u ah gobolka Baay.

Sidoo kale waxaa lagu soo warramayaa in ammaanka si weyn loo adkeeyay, ayada oo qaban-qaabada soo dhoweynta madaxweynaha ay haatan ka socoto Baydhaba.

Wararka ayaa sidoo kale sheegaya in madaxweyne Xasan Sheekh Maxamuud oo furi doono shirweynaha dib u heshiisiinta Koonfur Galbeed, kaas oo ka dhacaya magaaladaasi, isla-markaana ay ka qayb-galayaa dhinacyada isku haya doorashada guud ee maamulkaasi.

Shirkan oo ah mid xasaasi ah ayaa waxaa iclaamiyay guddoomiyaha Golaha Shacabka Sheekh Aadan Maxamed Nuur (Aadan Madoobe) oo isaguna haatan ku sugan xarunta KMG ah ee Koonfur Galbeed, isaga oo shalay gaaray halkaas oo si weyn loogu soo dhoweeyay.

Madashan waxaa sidoo kale qayb ka ah xubnaha mucaaradka ee Koonfur Galbeed iyo madaxweyne Cabdicasiis Lafta-gareen, si ay uga wadahadlaan xalka maamulkaas, gaar ahaan doorashada kusoo foodka leh maamulkaas oo ay isku hayaan labada dhinac.

Sida qorshuhu yahay waxaa la filayaa in go’aanno wax ku ool ah ay kasoo baxaan shirkan oo kusoo aaday, xilli loo baahnaa oo ay qalalaase ka taagnaayeen Koonfur Galbeed.

Xiisadda ayaa kasii dartay markii ay mucaaradka ka horyimaadeen muddo kororsiga loo sameeyay Lafta-gareen, waxaana ka dhashay dagaal ka dhacay magaalada Baydhaba

Si kastaba, waa booqashadii labaad ee madaxweynaha Soomaaliya uu ku tegayo Koonfur Galbeed, isaga oo safarkiisii ugu horreysay ku bilaabay, kadib 15-kii May ee 2022-kii.

Muqdisho (Caasimada Online) – Wasiirka Gaashandhigga Soomaaliya Cabdulqaadir Maxamed Nuur ayaa kormeer shaqo ku tagay, xerada tababarada ciidamada ee TÜRKSOM ee magaalada Muqdisho, waxaa wasiirka halkaas ku soo dhaweeyay saraakiisha maamusha xerada.

Wasiirka ayaa indha-indheeyay qeybaha iyo fasallada lagu tababaro saraakiisha iyo askarta xoogga dalka.

Intii uu ku guda jiray kormeerka shaqo, saraakiisha gacanta ku haysa tababarka ciidanka ayaa wasiirka uga warbixiyay halka uu marayo tababarka u socda saraakiisha iyo askarta ciidanka CXD.

Wasiirka ayaa u mahadceliyay walaalaha Turkiga oo qeyb weyn ka qaadanaya tababarka iyo qalabeynta ciidanka, si loo helo ciidan awood leh oo ka saara dalka argagixidada, sugana ammaanka guud.

“Dowladda Federaalka Soomaaliya waxaa ka go’an dib-u-dhiska Ciidamada Qaranka, qalabayntooda iyo tayeyntooda, si dib loogu soo celiyo cududda iyo tayada ay ku tilmaaman yihiin Cidiimada Qalabka Sida ee Soomaaliyeed,” ayuu yiri wasiirka Difaaca Soomaaliya.

Turkiga ayaa ciidamada Soomaaliya tababar ku siinayay dugsiga TÜRKSOM, tan iyo sanadkii 2017-kii, waxaana ka soo baxay saraakiil iyo askarta tayo leh oo meel uga soo baxay dalka, cadowgana kaga adkaaday fagaaraha dagaalka.

Kumanaan askari oo hadda ka dagaalameysa gobollada dalka ayaa lagu soo tababaray xeradaan TÜRKSOM, waxaana xusid mudan in qeyb ka mid ah mushaarka ay qaataan ciidamadii ay tababartay ay bixiso dowladda Turkiga.

Turkiga ayaa saaxiib dhow la ah Soomaaliya, waxaa ka dhexeeya labada dal heshiis difaac oo sal-adag, waxaana xusid mudan in saldhig ciidan kan ugu weyn ee dalka dibadiisa uu ku leeyahay Turkigu uu ka sameystay Soomaaliya, gaar ahaan koonfurta caasimadda Muqdisho.

Wasiirka difaaca Soomaaliya ayaa shalay shalay gudaha xarunta safaaradda Mareykanka ee Muqdisho wuxuu kula wareegay hub, saanad ciidan iyo gaadiid dagaal oo Mareykanku uu ugu deeqay Soomaaliya, si gaar ah waxaa agabka uu Mareykanku bixiyey lagu qalabey doonaa ciidanka Danab oo muhiim u ah dagaalka Al-Shabaab.

Qaahira (Caasimada Online) – Ra’iisul wasaaraha xukuumadda federaalka Soomaaliya, Mudane Xamza Cabdi Barre oo haatan booqasho rasmi ah ku joogo dalka Masar ayaa kulan gaar ah Qaahira kula yeeshay madaxweynihii hore ee dalka, Dr Cabdiqaasim Salaad Xasan.

Ra’iisul wasaaraha ayaa Cabdiqaasim Salaad ku booqday hoygiisa, si uu uga wareysto xaaladda guud iyo sidoo kale caafimaadkiisa, maadaama uu muddo ka maqan yahay dalka.

Labad mas’uul ayaa sidoo kale ka wada-hadlay arrimaha amniga iyo siyaasadda dalka, sida lagu sheegay qoraal kasoo baxay xafiiska ra’iisul wasaaraha dalka.

“Waxaan xalay gurigiisa magaalada Qaahira ku booqday Madaxweynihii hore ee Soomaaliya, Dr Cabdiqaasim Salaad Xasan. Waxaan ugu tagay in aan hubiyo xaaladdiisa caafimaad iyo in aan uga xog warramo halka uu dalku marayo, gaar ahaan xaaladda guud ee Amniga iyo Siyaasadda,” ayuu yiri ra’iisul wasaaraha xukuumadda Soomaaliya.

Dhankiisa madaxweynihii hore ee dowladdii KMG aheyd ayaa soo dhaweeyay dadaalka xukuumadda ee ku aadan ka hortagga Al-Shabaab iyo dagaallada ka socda gobollada.

Cabdiqaasim Salaad Xasan ayaa sidoo kale shaaca ka qaaday inuu ku rajo weyn yahay inuu dib ugu soo laabto dalka gudihiisa, si uu ugu noolaado caasimada Soomaaliya ee Muqdisho.

“Mudane Cabdiqaasim wuxuu soo dhaweeyay booqashada iyo dadaalka ay waddo dowladda Soomaaliyeed ee dib looga xoreynayo dalka kooxaha Khawaariijta dhibaatada ku haya shacabka, isagoo intaa raaciyay inuu ku rajo weyn yahay in sida ugu dhaqsaha badan uu dib ugu soo laabto kuna noolaado dalkiisa,” ayuu mar kale lagu yiri warka qoraalka ah.

Ra’iisul wasaaraha Soomaaliya oo ay booqashadiisa qaadatay maalmo ayaa illaa iyo hadda la kulmay mas’uul ka tirsan dalkaas oo uu ugu horreeyo dhiggiisa Mostafa Madbouly.

Labada Ra’iisul Wasaare ayaa ka wada-hadlay kor u qaadista xiriirka iyo xoojinta iskaashiga dhaqan dhaqaale ee u dhaxeeya labada dal ee walaalaha ah Soomaaliya iyo Masar, iyada oo Masar ballanqaadeyso inay Soomaaliya ku garab istaagto dib u dhiska Soomaaliya.

Masar ayaa kamid ah dowladaha Carbeed ee haatan xiriirka wanaagsan la leh dowladda federaalka, waxaana horay dalkan u booqday madaxweyne Xasan Sheekh Maxamuud.

Muqdisho (Caasimada Online) – Madaxweynaha dowlad goboleedka HirShabelle, Mudane Cali Cabdullaahi Xuseen (Guudlaawe) oo haatan ku sugan magaalada Muqdisho ayaa kulan gaar ah la yeeshay safiirka Mareykanka ee Soomaaliya, Danjire Larry André.

Kulanka oo ka dhacay xarunta safaaradda Mareykanka ee ku dhex taallo xerada Xalane ayaa waxaa looga hadlay dagaalka Shabaab iyo kor u qaadida mashaariicda horumarineed.

Cali Guudlaawe iyo Danjiraha ayaa si gaar ah uga wada-hadlay amniga HirShabelle, gaar ahaan howlgallada ka dhanka ah kooxda Al-Shabaab ee ka socdo Hiiraan iyo Sh/ Dhexe.

Sidoo kale madaxweynaha HirShabelle ayaa la wadaagay Danjiraha Mareykanka Larry André in dagaaladii ugu dambeeyay ee lala galay Al-Shabaab lagu jabiyay, isla-markaana laga xoreeyay deegaano iyo degmooyin ka tirsan dowlad goboleedka HirShabelle.

Madaxweynaha ayaa sidoo kale intaasi kusii daray in haatan lagu jiro waqtigii lasoo afjari lahaa kooxda Al-Shabaab oo uu ku tilmaamay cadowga Ummadda Soomaaliyeed.

Dhanka kale labada mas’uul ayaa isla soo hadal qaaday muhiimada ay leedahay in deegaanada laga xoreeyay Al-Shabaab laga fuliyo barnaamijyada xasilinta, si ay bulshado u hesho adeegyada muhiimka ah ee dowladda iyo kor u qaadida mashaariicda horumarineed.

Kulankan ayaa qayb ka ah dadaallada uu haatan madaxweynaha HirShabelle ka wado magaalada Muqdisho ee caasimada dalka oo uu haatan u joogo howlo shaqo oo u gaar ah.

HirShabelle ayaa haatan meel wanaagsan ka gaartay dagaalka Al-Shabaab, waxayna ku guuleysatay in inta badan kooxda laga saaro gobollada Hiiraan iyo Shabeelaha Dhexe.

Si kastaba, waa maamulkii ugu horreeyay ee ka dhabeeya yoolkiisa ah in Al-Shabaab laga xoreeyo deegaanada iyo degmooyinka ay ka heystaan HirShabelle, ayada oo uu kacdoonka ka billowday gobolka Hiiraan, kaas oo ku sii fiday illaa gobolka Sh/ Dhexe ee maamulkaasi.

Qaahira (Caasimada Online) – Ra’iisul Wasaaraha Soomaaliya Xamse Cabdi Barre iyo koox wasiirro ah oo ka tirsan xukuumadiisa ayaa maanta Qaahira ku saxiixay heshiisyo ay Soomaaliya la gashay Masar.

Xamse Cabdi Barre iyo wafdigiisa oo ku guda jira booqasho rasmi ah oo dalka Masar ay ku joogaan ayaa galabta kulan la qaatay Ra’iisul Wasaaraha Masar Mostafa Madbouly.

Labada Ra’iisul Wasaare ayaa ka wadahadlay kor u qaadidda xiriirka iyo xoojinta iskaashiga dhaqan dhaqaale ee u dhaxeeya labada dal ee walaalaha ah, waa Soomaaliya iyo Masar.

“Masar ayaa ballanqaaday inay dowladda Soomaaliya ku garab istaageyso dib u dhiska iyo horumarka dalka,” ayaa lagu yiri qoraal ka soo baxay xafiiska Ra’iisul Wasaaraha.

Kulanka kadib ayaa masuuliyiinta labada dowladood ee Soomaaliya iyo Masar waxay si rasmi ah u kala saxiixdeen heshiisyo ku saabsan waxbarashada, warfaafinta, dhaqanka, diinta iyo awqaafta.

Heshiisyada waxaa dhinaca Soomaaliya u saxiixay wasiirka arrimaha dibedda iyo iskaashiga caalamiga ah, Abshir Cumar Huruse, wasiirka waxbarashada, hiddaha iyo tacliinta sare, Faarax Sheekh Cabdulqaadir iyo Wasiirka Warfaafinta Daa’uud Aweys Jaamac.

Wasiirka Warfaafinta Soomaaliya Daa’uud Aweys oo qoraal kooban ka soo saaray heshiiskaas ayaa yiri, “Munaasabadda saxiixa qaar ka mid ah heshiisyadii maanta ay magaalada Qaahira ku kala saxiixdeen Soomaaliya iyo Masar. Heshiisyada iskaashi ee labada dal ay kala saxiixdeen ayaa isugu jira dhinacyada warbaahinta, waxbarashada, dhaqanka iyo arrimaha diinta. Ra’iisul Wasaare Xamsa Cabdi Barre iyo Ra’iisul Wasaaraha Masar Mostafa Madbouly ayaa goobjoog ka ahaa saxiixa heshiisyadaasi.”

Wafdiga Ra’iisul wasaaraha Soomaaliya uu hoggaaminayo ayaa shalay ka baxay Muqdisho, waxayna wadahadal kadib heshiiskaan lasoo galeen Masar oo ka mid ah dowladaha saameynta leh ee Carabta.

Dowladda Masar waxay sanado badan saaxiib la aheyd Soomaaliya, laakiin waxay ku jirtay dowladihii ay xiriirkooda hoos iska dhigtay xukuumadii Farmaajo, balse dowladaan uu hoggaamiyo Xasan Sheekh ayaa u muuqata mid Masar ku soo celineysa booskeedii saaxiibka dhow ee Soomaaliya.

Mogadishu (Caasimada Online) – The Federal Government of Somalia has announced that a joint operation by the National Intelligence and Security Agency (NISA) and international partners has killed 61 members of the Al-Shabab militant group in the Middle Shabelle region.

According to a statement released by the Ministry of Information, the operation targeted 150 Al-Shabaab fighters planning to attack the country’s armed forces and local heroes in the Hawadlay area with explosive vehicles.

Two Homey and Noah vehicles filled with explosives were also destroyed in the operation.

NISA has recently targeted Al-Shabaab fighters in planned operations, killing several in various regions as the war against the militant group intensifies.

Since the start of the conflict, the government and local militias have had significant success against the extremist group, liberating areas that had been under their control for many years.

In September, President Hassan Sheikh Mohamud declared an “all-out war” against Al-Shabab following two attacks that killed more than 43 people, including senior officers.

On Friday, the president appealed to young members of the group to surrender and renounce their terrorist ideology.

In other news, on Monday morning, heavy fighting was reported in Mahas town in Hiiraan region between local clan militia and Al Shabab militants group in the Dunad village.

The fighting began after militia were alerted of Al-Shabaab militants’ plans to burn down water wells being built in the area.

The hour-long gun battle resulted in several casualties, including deaths and injuries. A Macawisley militia group leader confirmed that their fighters repulsed the attack and killed Al Shabaab fighters but also suffered three wounds.

Al-Shabab, affiliated with al-Qaeda and was mostly pushed out of Hiiraan’s eastern parts by government and allied militia, has been known to carry out ambushes in the area.

Muqdisho (Caasimada Online) – Warar dheeraad ah ayaa kasoo baxaya dagaal xoogan oo saaka ciidamada deegaanka iyo maleeshiyada Al-Shabaab ku dhexmaray deegaanka Duduncad oo hoostaga degmada Maxaas ee gobolka Hiiraan.

Dagaalkan ayaa la sheegay in uu yimid kadib markii dagaal-yahano ka tirsan Shabaab ay isku-dayeen inay gubaan Ceel-biyood laga dhisayo deegaankaasi, kaasi oo ay ka war heleen ciidamada dib u xoreynta ee deegaanka.

Waxaa halkaasi labada dhinac ku dhexmaray dagaal socday ku dhawaad hal saac oo xiriir ah, sida ay sheegeen dadka deegaanka.

Dagaalka dhexmaray ciidamada dib u xoreynta deegaanka ee loo yaqaano Macawiisleyda iyo Al-Shabaab ayaa la soo sheegaya in uu ka dhashay khasaare kala duwan oo isugu jira dhimasho iyo dhaawac.

Sarkaal ka tirsan ciidanka dib u xoreynta deegaanka oo la hadlay warbaahinta gudaha ayaa sheegay in dagaalkan uu dhankooda kaga dhaawacmeen saddex ruux.

“Weerarka Shabaab ay kusoo qaadeen deegaanka Duduncad waa iska difaacnay, waxaana gaarsiinay maleeshiyada (Shabaab) khasaare dhimasho iyo dhaawac leh,” ayuu yiri.

Kooxda Al-Shabaab oo inta badan laga saaray deegaanada iyo degmooyinka dhaca bariga gobolka Hiiraan ayaa mararka qaar waxay weeraro gaadmo ah ka geystaan deegaanadii horay looga saaray.

Shabaab ayaa tan iyo markii uu ku billowday dagaalka ka dhanka ah ee jabka xoogan lagu gaarsiiyay, ayaa sare u qaaday isku-dayada ay meesha uga saarayaan adeegyada daruuriga ah ee bulshada ku nool deegaanada laga xoreeyay.