Muqdisho (Caasimada Online) – Howl-galada dagaal ee ka dhanka ah Al-Shabaab ayaa kasii socda qeybo badan oo ka tirsan gobolada dalka, ayada oo xiligaan uu howl-galka dagaalkaasi ka bilaabanayo deegaanka Bakajeex ee gobolka Shabeelaha Dhexe.

Guddoomiyaha gobolka Shabeelaha Dhexe, Axmed Meyre Makaraan iyo masuuliyiin kale ayaa sheegay in geba-gebo uu marayo abaabulka dagaalka ka dhanka ah Al-Shabaab ee deegaanka Bakajeex, ayada oo halkaasi lagu diyaariyay ciidamo fara-badan oo ka qeyb-qaadan doona howl-galada.

“Madaxda sare iyo kuwa gobolkaba diyaar ayey u yihiin in lala dagaalamo Al-Shabaab, waxaana dadka deegaanka ee hubka qaatay ku boorinaya inay laba jibaaraan howl-galka ka dhanka Al-Shabaab,” ayuu yiri Guddoomiyaha gobolka Shabeelaha Dhexe.

Sidoo kale qaar kamid ah horjoogayaasha ciidamada deegaanka ee u diyaarsan inay howl-galo ka fuliyaan gobolka Shabeelaha Dhexe ayaa sheegay in Al-Shabaab ay dhibaatooyin kala duwan ka geysteen gobolka, islamarkaana ay dhankooda u diyaarsan yihiin ka qeyb qaadashada xoreynta deegaanka.

Howl-galada ka dhanka Al-Shabaab ayaa toddobaadyadii dambe sii xoogeysanayay, ayada oo ciidamada dowladda iyo kuwa deegaanka ay argagixisada ka xoreeyeen deegaano ay sanado badan gacanta ku hayeen.

Sidoo kale waxaa tan iyo markii ay billowdeen howl-galada ka dhanka ah argagixisada lagu burburiyay saldhigyo muhiim u ahaa Al-Shabaab, kaasi oo u dambeeyay saldhigii ay ku lahaayeen deegaanka Ceel Gorof.

Muqdisho (Caasimada Online) – Afhayeenka Al-Shabaab, Cali Maxamuud Raage (Cali Dheere), oo wareysi dheer siiyey warbaahinta kooxdaas, ayaa ka jawaabay su’aal ku saabsaneyd sababta ay dadka shacabka ah u dilaan oo ay qaraxyada ula beegsadaan. 

Cali Dheere ayaa sheegay in kooxdooda aysan si toos ah beegsan shacabka muslimiinta ah, wuxuuna qiil yaab leh u sameeyey shacabka ay dilaan. 

“Annaga ahlu towxiidka iyo dadka muslimiinta ah dhiiggoodu waa inaga xaaraan, Ilaahey baana xarrimay subxaanahu watacaalaa, Ilaahey wuxuu xarrimayna uma gudbeyno annagoo og, tusaale waxaa kuugu filan haddaan annaga dhiig muslim iska daadineyno wilaayaatka maxaan dadka ugu leyn weynay? suuqyada Bakaaraha iyo Suuq bacaad maxaan dadka faraha badan ee dhooban ugu leyn weynay?” ayuu yiri Cali Dheere.

Hase yeeshee Cali Dheere, oo u muuqda inuu ka hadlayo dadka aan ku sugneyn Bakaaraha iyo Suuq Bacaad ee ay ku dilaan meelaha kale ee Muqdisho, ayaa ugu yeeray kuwa aysan u aqoonsaneyn muslimiin, oo sida uu hadalka u dhigay, u adeegga dowladda federaalka. 

“Haddii loola jeedo islaamnimada ninka murtadka ah ee cadawgaas soo horjooga ee cadawgaa indhaha u ah ee gacan yaraha u ah ee Muslimiinta cawraadkooda tusaya haddii muslimiin loola jeedo innaga kuwaa muslim uma naqaano,” ayuu yiri.

Kooxda Al-Shabaab ayaa weerarkii ugu dambeeyey ee shacab ay la beegsato wuxuu ahaa kii Zoobe ka dhacay 29-kii October, waxaana ku dhintay dad ka badan 120 qof oo aan shaqo ku laheyn dowladda federaalka, una badnaa haween xoogsato ah iyo caruur. 

Hadalka Cali Dheere ayaa laga fahmi karaa inay bartilmaameed u yihiin dhammaan shacabka ku nool ama taga goobaha ay ku xooggan tahay dowladda federaalka. 

Horey ayaa Mahad Karataay oo ka mid ah madaxda kooxdaas wuxuu u sheegay in dadka ku dhinta weerarada ay la beegsanayaan dowladda ay yihiin; kuwa ku dhintay shil, oo aan loo haysan kooxdaas.

Belgrade (Caasimada Online) – Danjiraha Jamhuuriyadda Faderaalka Soomaaliya u qaabilsan dalka Serbia Danjire Maxamed Cabdullaahi Axmed ayaa kulan miro dhal ah la qaatay Ra’iisul Wasaare ku xigeenka ahna Wasiirka Arrimaha Dibadda Serbia Mudane Ivica Dačić.

Kulankan Shaqo ayay Danjire Maxamed Cabdullaahi iyo Mudane Ivica kaga wada hadleen xoojinta Xiriirka Taariikhiga ah ee ka dhexeeya Labada dal, Fursadaha Ganacsi iyo sida ay Ganacsatada labada dal uga faa’iideysan lahaayeen.

Inta uu kulanka socday ayay sidoo kale kaga hadleen Iskaashiga labada dal sida Waxbarashada iyo Cilmiga Farsamada.

Jamhuuriyadda Faderaalka Soomaaliya iyo Jamhuuriyadda Serbia ayaa leh Xiriir Wax wada qabsi, waxaana moodaa in uu furmayo bog cusub oo ku saabsan Xoojinta Xiriirkaas.

Gaalkacyo (Caasimada Online) – Mid ka mid ah wiilasha uu dhalay Allaha u naxariistee Wariye Jamaal Faarax Aadan oo horey sanadkii 2021-kii loogu dilay gudaha magaalada Gaalkacyo ayaa ka hadlay kiiska dilka Aabihiis & sababta weli loo fulin la’yahay xukunkii kasoo baxay maxamadda.

Wiilkan dhalinyarada ah oo la hadlay warbaahinta ayaa sheegay in dilka Aabihiisa oo ay sheegatay kooxda Al-Shabaab ay kasoo wareegatay sanad sideed bilood, welina aysan helin cadaalad.

Sidoo kale wuxuu tilmaamay in ragga dilay oo afar ahaa lasoo qabtay, islamarkaana la xukumay balse weli aan wax tallaabo ah laga qaaday, isaga oo ku dooday in la gacan bidixeynayo kiiska.

“Aabahey Jamaal Faarax Aadan dilkiisa waxaa kasoo wareegtay sanad iyo sideed bilood afartii nin ee dishay waan aqaanaa ehelkoda oo ku jees-jeesayay dilka Abaahey $50 baa dhinac ii tuurta lahaa ma garanayo waxay Puntland u haysto. Anigu waxaan ahay nin dhallinyaro ah waxkasta waa iga imaan karaa” ayuu yiri mid ka mid ah wiilasha uu dhalay AUN Jamaal Faarax Aadan.

Wiilkan yar oo sidoo kale ah arday ayaa la gar-naqdsay maamulka Puntland, wuxuuna sidoo kale ka digay in la abuuro iska horkeen bulsho iyo colaad horleh.

“Shacabka yeysan dib isugu laaban yaan la’isku dirin dadku waxaa dad ehela waa dad wada daga marka Puntland 4 nin oo dambi geysatay yeysan fidno dad kale isku abuurin,” ayuu sii raaciyey

Ugu dambeyn wuxuu ka dalbaday hoggaanka sare ee Puntland in arrintaan ay soo farageliyaan, si cadaaladda loo marsiiyo raggii dilay AUN Aabihiis Jamaal Faarax Aadan.

“Dowladda iyada ayaa shacabka u dhexeyso iyadaa dowlad ah cadaaladda ha mariso raggaas dadkii ka horreeyey meesha ay mareen ha mariso” ayuu markale yiri.

Jigjiga (Caasimada Online) – Madaxweynaha dowlad degaanka Soomaalida Mustafe Cagjar ayaa u jawaabay dadka dhaliilaya dagaalka ay shacabka isku abaabulay habka qabiil iyo ciidamada dowladda kula jiraan kooxda Al-Shabaab.

Tan iyo markii uu billowday dagaalka ayaa waxaa jiray siyaasiyiin dano ka leh oo dhaliilaya dagaalka ayaga oo sheegaya in shacabka hubeysan ay dhibaato ka iman karto marka laga adkaado Al-Shabaab iyo in hubkii dowladda lagu xoojinayo qabiilo gaara h.

“Dadka sida kale uga hadlay kacdoonka ka socda gobolka Hiiraan ee lagaga soo horjeedo Al-Shabaab dadkaasi way khaldan yihiin, Muddo aad u dheer dadkan dadka qarxinayay haddii cid u dhaqaaqda la waayay, maanta markii dadku dhaqaaqeen in waxyaabo kale la yiraahdo oo khalkhal iyo doodo kale ay keenaan dad iyagu wakhti haya oo meelahaa fadhi ku dirirka fadhiya khalad ayaan u arkaa,” ayuu madaxweyne Mustafe.

Mustafe ayaa sheegay in howl kasta oo lagalo ay dhibaato ka imaan karto, sidaasi si lamid ahna howlgalladana wixii dhibaato ah ee hadhow ka yimaadda xalkeeda loo wada joogi doono.

“Codka midaysan ee Soomaaliyeed ee ah in Al-Shabaab meel la iska saaro, cidda tashuushka ku furaysa iyo khalkhalka haka waan toobaan,” ayuu yiri. 

Madaxweyne Mustafe Cagjar ayaa bogaadiyay sida Shacabka gobolka Hiiraan ay isugu xil qaameen inay u midoobaan sidii ay meel uga soo wada jeedsan lahaayeen ladagaalanka kooxda Al-Shabaab, iyagoo gacan ka helaya Xukuumadda Federalka ah ee Soomaaliya.

Madaxweynuhu waxa kale oo uu sheegay in dowlad degaanka Soomaalidu ay ka go’an tahay sidii loo soo afjari lahaa kooxda Al-Shabaab oo uu sheegay in dhibaatooyin badan ay Soomaalida u gaysteen.

“Kooxda Al-Shabaab waa koox Soomaalida halaag iyo dhibaato badan u gaystay, waxaana naga go’an inaan gudano kaalinta nagu aadan ee lagu soo afjarayo kooxda Al-Shabaab”, ayuu yiri Madaxweynuhu.

Waxa kale oo Madaxweynuhu xusay inay xukuumaddiisu iyo shacabka degaanka Soomaalida ay mar walba hiil iyo hooba la garab taagan yihiin shacabka gobolka Hiiraan ee howlgalka kula jira kooxda Al-Shabaab, oo uu sheegay in labada shacab waa degaanka Soomaalida iyo gobolka Hiiraan inay yihiin dad wlaalo ah oo howlo badan iska caawin kara.

Nairobi (Caasimada Online) – Wejigii labaad wada-hadaladii u dhaxeeyay dowladda Itoobiya iyo jabhadda TPLF ee ka socday magaalada Nairobi ayaa durtaba u muuqda kuwa qaadan doona waqti dheer kadib markii ay soo wajaheen caqabado cusub.

Wada-hadalka oo qeyb ka yihiin saraakiisha ciidamada labada dhinac ayaa lagu waday in maalintii shalay aheyd lasoo gaba-gabeeyo, hase yeeshe illaa hadda majiro war rasmi ah oo dhinacyadu soo saaree.

Wararka ayaa sheegay in qodobka ugu adag ee illaa hadda la isku mari la’yahay uu yahay “hub ka dhigista kooxda TPLF” taasi oo jabhaddu ay shuruudo ku xirtay fulinta arrintaas.

TPLF ayaa rabta in gobolka Tigray ay si dhaqso ah uga baxaan ciidamada Eritrea, sida uu sheegay sarkaal ka tirsan ciidamada Itoobiya.

“Hubka dhigista qodobka la xiriira waxaa caqabad ku noqday dalab ka yimid kooxda TPLF oo doonaysa in si deg-dega ciiddamada Eritrea uga baxaan Tigray,” ayuu yiri sarkaalka oo magaciisa qariyay.

Sidoo kale waxaa dalabaadka TPLF ay hordhigtay wada-hadaladaan qeyb ka ah in marka hore la soo celiyo adeegyadii aasaasiga iyo inay dadkoodu gargaar deg-deg ah helaan.

Arrintaan ayaa imaneysa xili ay jabhadda TPLF wajaheyso culeyso uga imanaya dibadda, kuwaasi oo ku aadan inaysan ku deg-degin hubka dhigista, taasi oo ay si weyn u dooneyso dowladda dhexe ee Itoobiya.

Dowlada Itoobiya ayaa iyaduna dhankeeda dooneysa in in marka hore TPLF hubka dhigaan, ka hor inta aan talaabo kale la qaadin, taasi oo sida muuqata marnaba aysan aqbaleyn TPLF.

Si kastaba, waxaa socda dadaalo ay wadaan wakiilka Midowga Afrika u qaabilsan Itoobiya iyo madaxweynihii hore ee Kenya oo garwadeen ka ah wada-hadalka, sidii labada dhinac ay ugu heshiin lahaayeen qodobada la isku mari la’yahay.

Addis Ababa (Caasimada Online) – Dowladda federaalka Itoobiya ayaa shaaca ka qaaday in ciidamadeeda ay gacanta ku dhigeen in ka badan 100 dhalinyaro ah oo dooneysay inay ku biiraan kooxda Al-Shabaab, kadib howlgal culus oo ay sameeyeen ciidamadu.

Qoraal lagu daabacay barta Facebook ee ciidamada difaaca qaranka Itoobiya ayaa waxaa lagu sheegay in dhalinyaradaas ay doonayeen inay kasoo dhoofaan dalkaas, si ay ugu biiraan kooxda Al-Shabaab oo ka dagaalanta gudaha Soomaaliya.

Sidoo kale qoraalka ayaa waxaa lagu sheegay in dhalinyarada looga sheekeeyey in ay dalka isaga baxaan oo ay ku biiraan Al-Shabaab oo isku dayeyso inay gudaha u gasho dalka Itoobiya.

Bishii August ayey aheyd markii Itoobiya ay shaacisay in illaa 800 oo ka tirsan Al-Shabaab ay ka talaabeen xadka, kadibna ay dagaal ku qaadeen dhulka dowlad deegaanka Soomaalida.

Itoobiya ayaa wixii ka dambeeyey markaasi xoojisay feejignaanteeda, ayada oo ciidamo dheeraad ah soo dhigtay xadka, halka ay kuwa kale ay soo gelisay gobollada Bakool iyo Gedo.

Soomaaliya iyo Itoobiya ayaa si wadajir ah u wajahaya khatarta kooxaha xagjirka ah oo Al-Shabaab iyo Daacish ay ugu horeeyaan.

Dowladda Itoobiya ayaa sidoo kale qayb ka ah dalalka ay ciidamada ka joogaan gudaha Soomaaliya kuwaas oo ku jira howlgalka ATMIS ee ka socda Ururka Midowga Afrika.

Asmara (Caasimada Online) – Madaxweynaha Soomaaliya Xasan Sheekh Maxamuud ayaa gaaray magaalada Asmara ee dalka Eritrea, sida uu shaaciyey wasiirka warfaafinta Eritrea Yemane G. Meskel oo qoraal soo dhigay twitter-ka.

Yemane Meskel ayaa sheegay in Xasan Sheekh iyo wafdigiisa ay garoonka diyaaradaha Asmara uu kusoo dhoweeyey madaxweyne Isaias Afwerki, wuxuuna intaas ku daray inuu dalkaas joogi doono muddo afar maalmood ah. 

Madaxtooyada ayaa ujeedka safarkan ku sheegtay mid uu Madaxweyne Xasan Sheekh mudnaan ku siinayo Ciidamada Soomaaliyeed ee ku sugan dalkaas iyo kor u qaadidda doorka dalalka gobolku ay ku leeyihiin dagaalka ka dhanka ah argagixisada Al-Shabaab.

“Madaxweynaha ayaa dhigiisa dalka Eritrea Mudane Asias Afwerki la yeelan doona wada-xaajoodyo ku saabsan kor u qaadidda xiriirka labada dal iyo iskaashiga labada shacab ee walaalaha ah,” ayaa lagu yiri qoraalka Villa Somalia. 

Safarkan ayaa ah kii labaad ee madaxweynaha uu ku tago dalka Eritrea tan iyo markii dib loo doortay 15-kii May, ayada oo safarkii koowaad uu dhacay 9-kii July 2022.

Madaxweyne Xasan Sheekh Maxamuud ayaa xilligaas ka qeyb-galay dhoola-tus ay sameeyeen ciidamada Soomaaliyeed ee halkaas ku sugan, wuxuuna dowladda Eritrea uga mahadceliyay tababbarka ciidamadan oo qayb ka qaadan doona xasilinta Soomaaliya, sida qoraalka lagu sheegay.

Xasan Sheekh ayaa horey u ballan-qaaday in askarta Soomaaliyeed ee ku sugan Eritrea oo gaaraya illaa 5,000 uu si deg deg ah dalka ugu soo celin doono, balse kama dhabeyn ballan-qaadkaas illaa hadda.

Toddobaadkii tegay, Qaar kamid ah Waalidiinta wiilashooda ay ku maqan yihiin dalka Eritrea ayaa si weyn u cambaareeyay madaxweyne Xasan Sheekh Maxamuud.

Waalidiinta oo warbaahinta la hadlay ayaa sheegay in madaxweyne Xasan Sheekh uusan ahmiyad gaar ah siin soo celinta wiilashooda, islamarkaana uusan ka dhameyn ballan-qaad uu usameeyay waalidiintaan, sida ay sheegeen.

Muqdisho (Caasimada Online) – Wasiirka Arrimaha Gudaha Soomaaliya Axmed Macallin Fiqi ayaa jawaab kulul ka bixiyey hadalkii kasoo yeeray Sheekh Aaadan Cabdiraxmaan Warsame (Sunne) oo khudbad ka jeediyey shir ay qabatay kooxda Al-Shabaab, isaga oo weerar qaawan ku qaaday dowladda federalka Soomaaliya oo kordhisay dagaalka Al-Shabaab.

Fiqi ayaa shaaca ka qaaday in argagixiye uu yahay Sheekh Aadan Sunne, islamarkaana uu doonayo inuu xasuuqo shacabka Soomaaliyeed.

“Wadaadkan argagixiyaha ah ee dhowr bilood kahor usoo goostey in uu qeyb ka qaato xasuuqa shacabka, waxaa la yaab lahayd asagoo isqalqaloocinaya hadalada qadafka ah ee uu ku hadlayey, ee uu rabo in uu marmarsiiyo uga dhigto xasuuqa shacabkeena,” ayuu yiri wasiir Fiqi.

Sidoo kale wuxuu intaasi kusii daray in wadaadka uu Al-Shabaab ku biiray, xilli ay xaaladda ku xun tahay, islamarkaana ay kordheen cadaadiska haatan lagu haayo.

“Aadan Sunne waxaa muuqata in xisaabtu ay ka qaldantay oo uu kooxda Khawaarijta u soo goostey mar kooxda xaalku uu ku sii xun yahay oo ay il-geeriyaad leeyihiin!” ayuu raaciyey.

Wasiirka arrimaha gudaha xukuumadda Soomaaliya oo hadalkiisa sii wata ayaa xusay in ujeedka uu Sheekh Aadan Sunne ugu biiray Al-Shabaab ay tahay inuu qabto hoggaanka kooxda maadaama xanuunsan-yahay buu yiri hoggaamiyaha Al-Shabaab Sheekh Axmed Cumar Abuu Cubaydah.

“Waxaa ka sii daran markii la sheegey in uu madaxtinimada kooxda Khawaarijta soo raadsaday maadaama kii heystay uu xanuun la ildaran yahay,” ayuu qoraalkiisa kusoo gabagabeeyey.

Addis Ababa (Caasimada Online) – Taliyaha hay’adda Nabad sugidda iyo sirdoonka qaranka Soomaaliyeed ee NISA, Mahad Maxamed Salaad oo weli ku sugan caasimada dalka Itoobiya ee Addis Ababa ayaa maanta booqasho ku tegay xarunta maamulka xogaha sirdoonka ee IMEDA.

Mahad Salaad ayaa kormeeray qaybaha ay ka kooban xaruntan oo ah halka lagala socda xogaha sirdoonka ee dalka Itoobiya, waxaana xarunta kusoo dhoweeyey mas’uuliyiinta hay’addaasi.

Sidoo kale taliyaha NISA iyo wafdigiisa ayaa warbixin laga siiyey sida ay u shaqeyso xarunta IMEDA iyo doorka ay ku leedahay sugidda nabad geliyada ee dalkaasi.

Agaasimaha hey’adda Sirdoonka Soomaaliya Mahad Salaad ayaa sii joogi doono magaalada Addis Ababa, halkaas oo uu wadahadallo kula yeelan doono dhiggiisa dalka Itoobiya oo casuumay.

Labada Agaasime ayaa la sheegay inay yeela doonaan kulamo muhiim u ah labada dowladood, oo lagu xoojinayo iskaashiga iyo wada shaqeynta hey’adaha sirdoonka labada dal.

Safarkaan ayaa ku soo aaday maalmo uun kadib markii uu magaalada Muqdisho safar ku yimid Agaasime ku xigeenka sirdoonka Itoobiya oo la kulmay hoggaanka sare taliska Nabad Sugidda.

Soomaaliya iyo Itoobiya ayaa si wadajir ah u wajahaya khatarta kooxaha xagjirka ah oo Al-Shabaab iyo Daacish ay ugu horeeyaan.

Madaxda labada dowladood ayaa horey u ballan-qaaday inay yeela doonaan cilaaqaad dhinacyo badan leh, sida iskaashi dhinaca ammaanka ah iyo is dhexgal bulsho, maadaama ay deris yihiin.

Muqdisho (Caasimada Online) – Ciidamada ammaanka ee dowladda Soomaaliya ayaa maanta howlgal qorsheysan kusoo qabtay laba nin oo hubeysan, kuwaas oo weerar ka geystay qaybo ka mid ah magaalada Muqdisho, xilli ay la socdeen Mooto Bajaaj mareysay waddada 21-ka October.

Afhayeenka Booliska Soomaaliyeed, Sadiiq Doodishe oo war qoraal ah soo saaray ayaa ka warbixiyey howlgalkaas iyo sida uu u dhacay, waxa uuna shaaca ka qaaday in ciidamada Booliska ay toogasho ku dhaawaceen raggaasi, xilli ay soo geysteen weerar loo adeegsaday bam-gacmeed.

Doodishe ayaa tilmaamay in raggan oo dhaawacyo ah ay ugu dambeyn gacanta kusoo dhigeen ciidamada ammaanka Soomaaliya, haatana lagu haayo baaritaano dheeraad ah.

Afhayeenka ma shaacin bartilmaameedka weerarka ay geysteen raggaasi, balse wuxuu tilmaamay in bambada lagu tuuray dad shacab ah oo marayey waddada, sida uu hadalka u dhigay.

“Ciidamada Boliiska Soomaaliyed ayaa manta oo taariikhdu tahay 10/11/2022 abaara 10:30 gacanta ku dhigay eedeysanayaal watay Mooto Bajaaj,ku waas oo la rumaysanyahay in ay ku tuureen Bombo gacmeed dadweynihii marayay wadada 21 OCT aaga Hotel Nasahablood,” ayuu yiri.

Sidoo kale wuxuu intaasi ku daray in ragga lasoo qabtay ee ay dhaawacyada soo gaareen hadda lagu dabiibayo mid ka mid ah isbitaallada ku yaalla magaalada Muqdisho.

“Eedeysanayaasha oo dhaawac ah ayaa lagu dabiibayaa goobaha caafimaadka,” ayuu sii raaciyey afhayeenka ciidamada Booliska Soomaaliyeed.

Maalmihii u dmabeeyey ayaa waxaa magaalada Muqdisho ka dhacayey falal ammaan darri oo isugu jiro dilal qosheysan iyo qaraxyo, waxaana ka mid ah weerarkii ka dhacay Zoobe.

Muqdisho (Caasimada Online) – Madaxweynaha dowladda federaalka Soomaaliya, Mudane Xasan Sheekh Maxamuud ayaa maanta qaaday tallaabo culus, isaga oo isbedal ku sameeyey dhismaha Golaha Dhaqaalaha Qaranka, kadib wareegto ka soo baxday xafiiskiisa.

Madaxweynaha ayaa sidoo kale kala diray xubnihii hore ee Golaha Dhaqaalaha Qaranka oo ka koobnaa 5 xubnood oo Soomaali ah & 4 xubnood oo ajaaniib ah, isagoo magacaabay kuwa cusub.

Halkan hoose ka aqriso:-

Muqdisho, Nofeembar 10, 2022: Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa kadib markuu tixgaliyey baahida loo qabo in dib u habeyn lagu sameeyo Golaha Dhaqaalaha Qaranka si loo waafajiyo arrimaha mudnaanta leh ee horumarinta dhaqaalaha dalka waxa uu soo saaray Xeer Madaxweyne LR. 61 iyo Xeer Madaxweyne LR.62.

Golaha Dhaqaalaha Qaranka oo uu Guddoomiye ka yahay Madaxweynaha J.F.S, halka Ra’iisul Wasaaruhuna yahay Guddoomiye ku xigeen, oo ka koobnaa saddex heer, ayaa waxaa lagu soo koobay laba heer:

1-Heerka Jaangooynta Siyaasadda iyo Go’aamada Dhaqaale ee Masiiriga ah oo aan waxba laga badelin waxaa xubno ka ah:

Madaxweynaha J.F.S, Ra’iisul Wasaaraha, Guddi-hoosaadka Dhaqaalaha ee Golaha Wasiirada, Guddoomiyaha Bangiga Dhexe iyo Madaxda Dowladaha Xubnaha ka ah Dowladda Federaalka marka loo baahdo go’aan ka gaarista qodobbo saamaynaya.

2-Heerka La-talinta iyo Xog-heynta oo kooban 9 xubnood oo La-taliyayaal ah iyo Xog-heynta oo lagu soo xulay aqoontooda iyo khibraddooda, ayaa hoos imaanaya Xafiiska Madaxweynaha.

Heerka la-talinta iyo iyo xog-heynta waxaa agaasime guud u ah La-taliyaha Sare ee Dhaqaalaha Madaxweynaha, kaas oo mas’uul ka ah isku-duwidda maamulka heerkaan ee Golaha.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa sidoo kale Xeer Madaxweyne LR.62 ku kala diray xubnihii hore ee Golaha Dhaqaalaha Qaranka ee isugu jiray 5 xubnood oo Soomaali ah iyo 4 xubnood oo aan Soomaali ahayn,

Waxaa uu Madaxwaynuhu u magacaabay mudanayaasha iyo marwooyinka magacyadoodu hoos ku xusan xubnaha Golaha Dhaqaalaha Qaranka ee heerka la-talinta iyo xoghaynta:

1.Xasan Aadan Hoosow, La Taliyaha Sare ee Madaxweynaha, ahna Agaasimaha Guud

2. Cabdullaahi Cali Cabdi, Xubin

3. Kamaaludiin Axmed Sheekh, Xubin,

4. Adam Xuseen Rooble, Xubin

5. Nimco Maxamuud Sakal, Xubin

6. Maluuka Dheere Sheekh Cabdulqaadir, Xubin

7. Mahad Maxamed Sheekh Xasan, Xubin

8. Maxamed Cusmaan Maxamuud, Xubin

9. Cabdisalaam Cabdiraxmaan Maxamed, Xubin

Madaxweyne Xasan Sheekh Maxamuud ayaa kula dardaarmay xubnaha Golaha Dhaqaalaha Qaranka ee uu magacaabay in ay ka shaqeeyaan horumarinta dhaqaalaha dalka iyo sare u qaadida nolosha muwaaddiniinta Soomaaliyeed.

Muqdisho (Caasimada Online) – Warbixin cusub oo kasoo baxday Qaramada Midoobay ayaa waxaa lagu sheegay in kooxda Al-Shabaab haatan ay billowday inay kordhiso ilaha dakhliga uu kasoo galo kadib markii dowladda ay qaaday tallaabooyin lagu xakameynayo dakhliga kooxda.

Warbixinta ayaa sheegtay in kooxda ay billowday qaadista canshuuraha guryaha lagu soo rogo iyo dhismayaasha kala duwan, kadib tallaabooyinkii u dambeeyey ee ay qaaday dowladda dhexe oo ku dhowaaqday dagaal dhaqaale.

Khubaro ka tirsan QM ayaa shaaca ka qaaday in haatan kooxda ay raadineyso dhaqaale fara badan oo ay siiso dagaalyahaneeda oo haatan wajahaya dagaallo culus oo ka socdo dalka.

Warbixintan waxaa sidoo kale lagu sheegay in Al-Shabaab ay sameysteen xarumo cusub oo ka baxsan meelihii soo jireenka ah ee ay ku qaadi jireen lacagaha canshuuraha iyo  Zakawaatka.

QM ayaa sheegtay in weli Shabaab ay awood u leedahay in ay lacag u xawisho bangiyada gudaha iyo kuwa dibadda, ayada oo jirto in dowlada Soomaaliya ay xayirtay akoono ay leedahay kooxdu.

Sidoo kale waxaa warbixintan lagu wareystay haweeney Soomaaliyeed oo magaceeda la qariyey sababo amni darteed, taas oo sheegtay in Al-Shabaab ay la soo xiriirtay, kana dalbatay inay bixiso lacag dhan $425, taas loogu sheegay canshuurta guri ay ka iibsatay magaalada Muqdisho.

Haweeneyda ayaa intaasi ku dartay in markii hore taleefan laga soo wacay, kadibna looga yeeray maxkamad Al-Shabaab ay ku leedahay duleedka Muqdisho, sida ay hadalka u dhigtay.

Khuburada soo saaray warbixinta ayaa sidoo kale intaasi ku daray in kooxda ay sidoo kale lacago baad ah ka qaato milkiilayaasha dhismayaasha iyo guryaha laga dhisayo magaalada Muqdisho.

Warbixintan ayaa ku soo aadayo, xilli haatan dalka uu ka socdo kacdoon ka dhan Al-Shabaab oo ay horkaceyso dowladda dhexe oo kaashaneyso dadka deegaanka, waxaana sidoo kale barbar socda dagaal kale oo  dhaqaalaha looga cuuryaaminayo kooxda, sida ay sheegtay dowladdu.

Muqdisho (Caasimada Online) – Guddoomiye ku xigeenka amniga iyo siyaasadda ee maamulka gobolka Banaadir Cali Cabdi Wardheere (Cali Yare) ayaa sharaxaad ka bixiyey sida ay la tahay in lagu sugi karo amniga magaalada Muqdisho.

Cali Yare ayaa sheegay in amni darrada Muqdisho uu saldhig u yahay isla xisaabtan la’aanta jirta, maadaama aysan jirin cid si gaar ah masuul uga ah amniga caasimadda.

Wuxuu tusaale u soo qaatay erayga ah hey’adaha amniga, kaas oo muujinaya masuuliyad wadareed uu sheegay in amniga gobolka Banaadir ay beylah ka dhigtay.

“Sida kaliya ee Xamar nabad loogu heli karo waa in amniga gobolka Banaadir uu helo cid leh masuuliyadiisa oo hadey sugto lagu abaal mariyo, hadii ay ku guul dareysatana lagu ciqaabo,” ayuu yiri Cali Yare.

Wuxuu soo jeediyey in guddoomiyaha gobolka Banaadir la hoos geeyo amniga Muqdisho, si loo helo isla xisaabtan, waxana looga bedelo amniga Muqdisho ee masuuliyad wadareedka noqday.

“Aniga waxaan ku magacaabanahay guddoomiye ku xigeenka amniga gobolka Banaadir, hadana booliska, nabad sugidda iyo hey’adaha kale ee amniga cid iga amar qaadata ma jirto, hadii aan shaqo u dirsaneyno waan soo barinaa,” ayuu hadalkiisa ku sii daray guddoomiye ku xigeenka amniga gobolka Banaadir.

Wuxuu sheegay in iyadoo uusan jirin ciidan ka amar qaata ay hadana dadku ku dhahayaan waakan ninka amigeena dayacay, “Marka magaaladaan waa in qabiilka dega ay sugtaan amnigeeda,” ayuu yiri.

Cali Yare ayaa tusaale u soo qaatay magaalooyinka kale ee Soomaalida, sida Hargeysa, Garowe iyo Baydhaba oo qabaa’ilka dega ay amniga sugtaan.

“Xamar waa in qabiilka iska leh uu waardiyeysto, sababtoo ah khasaaruhu qabaa’il isku si uguma dhacayo, tan kale amniga magaaladaan waa in la hoos geeyo gobolka Banaadir, hadda taliyaha booliska ee gobolkaan wuxuu hoos tagaa taliyaha guud ee booliska dalka,” ayuu hadalkiisa ku sii daray Cali Yare.

Hoos ka daawo