Qardho (Caasimada Online) – Wararka laga helayo magaalada Qardho ee hoostagta Puntland ayaa sheegaya in haatan xaalad adag ay ka taagan tahay magaaladaasi, kadib markii ay xalay ku rogmadeen daadad xoogan, kuwaas oo aan horay looga sii feejignaan.

Illaa saddex tog oo Qardho ku soo dhaca ayaa lagu soo warramayaa in biyo ka yimid meelo fog ku soo rogeen magaalada, gaar ahaan xaafadaha ku yaal dhanka hoose ee biyo dhaca.

Wararka ayaa sheegaya in khasaare isugu jiro dhimasho, dhaawac iyo burbur hantiyeed ay ka dhasheen daadadka markale ku dhuftay magaalada Qardho.

Ugu yaraan laba qof oo da’ah ayaa la xaqiijiyey inay ku dhinteen daadadka xalay ku rogmaday Qardho, waxaana sidoo kale ku burburay guryo iyo goobo kale oo ganacsi.

Guddoomiyaha maamulka gobolka Karkaar oo la hadlay warbaahinta ayaa ka warbixiyey saameynta ka dhalatay daadadkaasi, wuxuuna sheegay xaalad cakiran ay ka taagan tahay degmada Qardho, isaga oo qaylo dhaan u diray Puntland, dowlada dhexe & hay’adaha kale.

“Magaalada Qardho oo dhan biyaa maraya buundadii xattaa biyuhu dushay ka mareen , roob aan onkod iyo hilaac laheyn baa magaaladii biyo badan kusoo celiyey” ayuu yiri.

Waa markii labaad oo daadad xoogan ay ku dhufteen Qardho, waxaana u dambeysay 2020-kii oo biyo ay ku rogmadeen magaaladaas, kuwaas oo sababay khasaare kala duwan.

Garoowe (Caasimada Online) – Wasaaradda gargaarka iyo maareynta musiibooyinka Puntland ayaa digniin cusub oo ku aadan roobab dabeylo wata oo ku wajahan maamulkaasi u dirtay dadka shacabka ah, ayadoo ku baaqday in dadweynuhu ay muujiyaan feejignaan.

Qoraal ka soo baxay wasaaradda ayaa waxaa lagu sheegay in saadaashu muujinayso roobab mahiiggaan ah oo ku soo foodleh Puntland, gaar ahaan Gobolka Nugaal.

Wasaaradda ayaa si gaar ah farriin ugu dirtay dadka degan dhulka godan iyo meelaha biya qaba-tinka leh oo ay suurtagal tahay inay ku rogmadaan daadad xoogan.

“Digniin ku saabsan roobabka; waxay saadaashu sheegaysaa inay jiraan Roobab mahiigaan ah, gaar ahaan gobolka Nugaal, haddaba waxaa bulshada Puntland ku wargalinaynaa inay ka digtoonaadaan meelaha biyo qabatinka ah Miyi, Magaalo iyo Xeebaha” ayaa lagu yiri.

Sidoo kale wasaaradda gargaarka iyo maareynta musiibooyinka Puntland ayaa ugu baaqday kalluumeysatada iyo dadka u dhow xeebaha inay ka taxadaan badda, maadaama laga cabsi qabo roobab daadad wata oo markale kusoo wajagan deegaanada maamulkaas.

Digniintan ayaa ku soo beegantay, ayada oo xalay ay daadad xoogan ay ku rogmadeen magaalada Qardho, kuwaas oo geystay khasaare isugu jiro dhimasho, dhaawac & burbur.

Waa markii labaad oo daadad xoogan ay ku dhuftaan Qardho, waxaana u dambeysay 2020-kii oo biyo ay ku rogmadeen magaaladaas, kuwaas oo sababay khasaare kala duwan.

Kismaayo (Caasimada Online) – Warar kala duwan ayaa ka soo baxaya weerar ku billowday qarax xoogan oo goordhow ka dhacay gudaha magaalada Kismaayo ee xarunta ee xarunta ku meel gaarka ah ee dowlad goboleedka Jubbaland.

Weerarka ayaa waxa lagu soo warramayaa in lagu qaaday hoteelka Tawakal ku yaalla bartamaha magaalada Kismaayo ee xarunta gobolka Jubbada Hoose.

Ilo wareedyo lagu kalsoon yahay inoo sheegay in weerarka loo adeegsaday gaari laga soo buuxiyey walxaha qarxa, waxaana kadib hoteelka gudaha u galay rah hubeysan.

Xaaladda ayaa haatan aad u kacsan, waxaana la soo warinayaa in weli rasaas xoogan laga maqlayo gudaha hoteelka la weeraray.

Sidoo kale wararka ayaa intaasi ku daraya in uu jiro khasaare dhimasho iyo dhaawac ka dhashay weerarkan iyo qaraxa ka horreeyey

Dhismaha la weeraray ayaa ku yaallo meel aan ka fogeyn hoteelka caanka ah ee Ex Cascaseey oo ay horey 2019-kii u weerareen xoogaga Al-Shabaab.

Weerarka Kismaayo ka socdo ayaa ku soo aadayo, xilli maalmihii u dambeeyey magaaladan laga dareemayey abaabul ka dhan ah Al-Shabaabka ku sugan gobollada Jubbooyinka

Wixii soo kordho kala soco: Caasimada.net.

Kismaayo (Caasimada Online) – Waxaa weli ka socdo magaalada Kismaayo weerar toos ah oo xubno ka tirsan Al-Shabaab ay ku qaadeen dhismaha Hoteelka Tawakal oo ku yaallo waddada aada dhanka dekedda magaalada Kismaayo ee xarunta gobolka Jubbada Hoose.

Weerarka ayaa ku billowday gaari qarax siday oo lagu dhuftay albaabka hore ee hoteelka la weeraray, kaas oo ay inta badan fariistaan siyaasiyiinta iyo madaxda Jubaland.

Khasaare kala duwan oo isugu jiro dhimasho iyo dhaawac ayaa jiro, balse si dhab ah looma xaqiijin karo, maadaama uu weli socdo weerarka lagu qaaday magaalada Kismaayo.

Ilo wareedyo lagu kalsoonyahay ayaa innoo sheegay in xilliga uu weerarka dhacayey hoteelka uu ka socday shir ku saabsan gulufka ka dhanka ah Al-Shabaab iyo sidoo kale simaar dowladeed oo loo qabtay shaqaale ka tirsan dowlad goboleedka Jubbaland.

Lama oga khasaaraha soo gaaray mas’uuliyiinta goobta ku sugneyd, waxaana weli socdo dagaal u dhexeeyo xubnaha gudaha u galay hoteelka iyo ciidamada ammaanka.

Dhinaca kale Al-Shabaab ayaa sheegatay mas’uuliyadda weerarkan, waxayna shaacisay in hooteelka ay la wareegeen xubnaha weerarka fuliyey, sida ay hadalka u dhigtay.

Si kastaba weerarka Kismaayo ka socdo ayaa ku soo aadayo, xilli maalmihii u dambeeyey magaaladan laga dareemayey abaabul ka dhan ah Al-Shabaabka ku sugan Jubbooyinka.

Muqdisho (Caasimada Online) – Guddoomiyihii hore ee degmada Wadajir Axmed Daaci oo ka hadlay dagaalkii cuslaa ee maata ka dhacay degaanka Masaajid Caliguduud ee gobolka Shabeellada Dhexe ayaa xaqiijiyey in dagaal aad u culus uu maanta ka dhacay deegaankaas.

Axmed Daaci oo u waramay Idaacadda dowladda ee Radio Muqdisho ayaa sheegay in dagaal soo bilowday saakay afar saac oo barqonimo uu soo gaaray galabta gabal dhicii.

Sidoo kale guddoomiyaha oo ka mid ah masuuliyiinta hoggaamineysa dagaalka ayaa sheegay inay gabal-dhicii galabta ku guuleysteen inay Al-Shabaab ka saaraan deegaanka Masaajid Caliguduud.

“Saakay afartii saac ayuu dagaalku soo bilowday, waxaa la siku gaaray gabal-dhicii galabta, waxaana laga saaray, kooxda waa lagu laayey dagaalka, welina dagaalka faro kama qodna, inta ay dalka joogaan nimankaan,” ayuu yiri Axmed Daaci.

Mar la weydiiyey tirada xubnaha dagaalka looga dilay Al-Shabaab ayuu sheegay in tiro rasmi ah uusan sheegin karin, “Cadowga aad ayaa loogu jebiyey dagaalka, hadii ay muslim yihiina haween badan ayaa asaay qaadi doona,” ayuu yiri.

Sidoo kale wuxuu sheegay in dagaalka hal gaari looga gubay kooxda Al-Shabaab, isla markaana ay caawa ciidamada dowladda ku sugan yihiin deegaanka masaajid Caliguduud.

“Lagama hari doono waa sii daba joogi doonaa ilaa aan dalka ka xoreyno, hadda dagaalka anagaa ku gacan sareyna, welina culeys ayaa jira,” ayuu yiri.

Guddoomiye Axmed Daaci ayaa sidoo kale sheegay in dadka deegaankaas ay kooxdu Shabaab ka wada dhigtay, isla markaana dadka deegaankaas ay u baahan yihiin kala shaandheyn xoog leh.

Hoos ka dhageyso

Jabuuti (Caasimada Online) – Madaxweynaha Soomaaliya Xasan Sheekh Maxamuud iyo wafdi uu hoggaaminayo ayaa caawa gaaray dalka Jabuuti, waxaana ku soo dhaweeyey garoonka diyaradaha magaalada Jabuuti Madaxweyne Ismaaciil Cumar Geelle.

“Madaxweyne Xasan Sheekh Maxamuud ayaa Jabuuti kaga qeyb galaya shir looga hadlayo Isbeddelka Cimilada iyo Abaaraha soo noq-noqday ee aafeeyay gobolka,” ayaa lagu yiri qoraal ay madaxtooyadu ka soo saartay safarkaan.

Qoraalka ayaa intaas ku sii daray, “Madaxweynaha Jamhuuriyadda ayaa inta uu ku sugan yahay dalka Jabuuti waxa uu wada-hadallo ku qotoma iskaashiga labada dal ee dhanka amaanka iyo la dagaallanka argagixisada la yeelanayaa dhiggiisa dalkaas Mudane Ismaaciil Cumar Geelle.”

Madaxweyne Xasan Sheekh ayaa maanta ku sugnaa deegaanada Puntland oo galabta uu ka sii baxay, wuxuuna maanta xarigga ka jaray dekedda cusub ee degmo xeebeedka Garacad ee Puntland.

Waa safarkii labaad ee Madaxweyne Xasan Sheekh uu ku tegay dalka Jabuuti tan iyo markii dib loo soo doortay, wuxuuna safarkiisii hore ee Jabuuti ahaa mid lagu wanaajinayey xiriirkii xumaaday ee labada dal, intii uu xukunka joogay Farmaajo.

Muqdisho (Casimada Online) – Faahfaahino dheeraad ayaa laga helayaa dagaal aad u culus oo caawa fiidkii soo gaaray oo ciidanka xoogga dalka iyo kooxda Al-Shabaab ku dhex maray degaanka masaajid Cali-Gaduud ee gobolka Shabeellada Dhexe.

Wararkii u dambeeyey ee aan ka heleyno degaankaas waxay sheegayaan in caawa Al-Shabaab iyo ciidamada dowladda labada dhinac uga kala  sugan yihiin degaanka Masaajid Cali-gaduud, kadib markii dagaal aad u culus oo la isku habeensaday uu halkaas ka dhacay.

Khasaare badan ayaa lasoo werinayaa in labada dhinac uu soo kala gaaray, inkastoo aan la xaqiiji karin tirada rasmiga ah, waxaana ciidanka dowladda u suurta geli weysay inay si buuxda gacanta ugu dhigaan deegaanka.

Kooxda Al-Shabaab oo saakay u baqa dirirtay ciidanka ayaa dagaal rogaal celis ah soo qaaday maanta gelinkii dambe, waxayna caawa ku sugan yihiin qeybo ka mid ah degaanka Masaajid Caliguduud, halka ciidanka dowladda ay ayaguna dhinac ka joogaan deegaanka.

Markii ay Al-Shabaab isaga baxeen deegaanka, si buuxda ulama wareegin ciidamada dowladdu, waxayna Al-Shabaab soo rogaal celiyeen iyadoo miino baaris ay ka socoto gudaha iyo daafaha deegaanka.

Sidoo kale waxaa lasoo weriyey in ciidanka uu khasaare ka soo gaaray miinooyinkii kooxdu ay ku aastay wadooyinka gala degaanka, ugu yaraan hal gaari oo nooca dagaalka ah iyo dhowr askari ayaa naloo xaqiijiyey nin miino ay haleeshay.

Waxaa aad u yar xogta laga heli karo dagaalkii maanta ilaa caawa fiidkii ka socday degaanka Masaajid Caliguduud, madaxweynaha HirShabeelle Cali Guudlaawe iyo saraakiil ciidan oo badan ayaa hoggaaminaya dagaalkaan.

Wixii ka soo kordha kala soco Caasimada Online

Maxaas (Caasimada Online) – Ciidamada xoogga dalka oo kaashanaysa ciidanka dib u xoreynta deegaanka ayaa maanta weerar qorsheeysan ka fuliyay gudaha deegaanka Moqokori ee gobolka Hiiraan, halkaas oo xubno Shabaab ah ay ku sugnaayeen.

Seddax nin oo labo saraakiil sare tahay ayaa Al-Shabaab maanta looga dilay Moqokori, waxaana howlgalkaas looga furtay seddax qori iyo gaari NOAH ah oo ciidanku ay saxaafadda u soo bandhigeen.

Sarkaal ka tirsan ciidanka dowladda oo warbaahinta kula hadlay degmada Maxaas ee gobolka Hiiraan ayaa sheegay in howlgalkaas uu ahaa mid qorsheysan, isla markaana bartilmaameedkoodu uu ahaa xubnaha la dilay.

Deeroow oo ahaa guddoomiyihii Al-Shabaab u magacownaa Moqokori iyo Siraad Cumar Gacal oo kooxda u qaabilsanaa canshuurta gaadiidka ee gobolka Hiiraan iyo hal askari oo ilaalo u ahaa, ayaa lagu dilay howlgalka Moqokori, kuwaas oo meydkooda lasoo bandhigay.

Sidoo kale sarkaalka u hadlay ciidamada dowladda wuxuu sheegay in xubnaha ay dileen ay gaarayaa ilaa shan, balse ay u suurta gashay in seddaxdaan ay meydkooda Maxaas keenaan.

Meydadka xubnahaas maanta Shabaab laga dilay, hubkoodii iyo gaarigii ay wateen ayaa warbaahinta loo soo bandhigay, waxaana gaarigii galabta la geeyey degmada Maxaas.

Howlgalkaan maanta lagu soo dilay xubnaha Shabaab-ka ah ayaa imaanaya iyadoo dhawaan uu guddoomiyaha Gobolka Hiiraan Cali Jeyte uu balan qaaday in qofkii soo dila dagaalame ama sarkaal Shabaab ah uu siinayo lacag u dhaxeysa $5 kun ilaa $25 kun oo dollar.

Hoos ka daawo

Muqdisho ( Caasimada Online) – Qoyska Allaha u naxariiste wasiirkii hore ee howlaha guud iyo dib u dhiska Soomaaliya Cabaas Siraaji ayaa bayaan ay soo saareen kusoo dhaweeyay xukunka dilka ah ee saaka lagu fuliyay Axmed Cabdullaahi Ceydiid.

Bayaanka kasoo baxay qoyska ayaa lagu sheegay in maanta “ay caddaaladdii timid” kadib muddo dheer ay raadiyeen. Qoyska waxay u mahadceliyeen cid kasta oo ku lug laheyd dadaalladii caddaaladda loogu raadinayay Marxuum Cabaas Siraaji.

Halkaan hoose ka akhriso war-saxaafadeedka kasoo baxay qoyska

Qoyska Xaaji Cabdulaahi Sheekh Siraaji oo ah qoyska uu ka dhashay Allah ha u naxariistee Marxuum Wasiir Cabaas Xaaji Cabdulaahi Sheekh Siraaji waxa uu soo dhaweenayaa qisaastii maanta oo ay taariikhdu tahay 22-October-2022 lagu fuliyey gacan ku dhiigle Axmed Cabdulaahi Cabdi Caydiid oo si bareer ah u dilay Marxuum Cabaas bishii May 03, 2017.

Qoyska waxa uu muddo dheer raadinayey cadaalad u helida Marxuum Cabaas, balse maanta ugu dambeyn, cadaaladii ayaa timid.

Qoyska waxa uu u mahadcelinayaa Maddaxweynaha JFS Mudane Xasan Sheekh Maxamuud oo maanta xaqiijiyay in ay Soomaaliya caddaalada ka shaqeyso, sidoo kale waxaa qoyska halkaan ugu mahad celinayaa Saraakiisha sare ee Maxkamada Ciidamada Qalabka sida iyo guud ahaan hay’adihii dowliga ay howshaan khuseeysay.

Ugu dambeyn, waxa uu qoyska Xaaji Cabdulaahi Sheekh Siraaji halkaan ugu mahadcelinayaa cid kasta oo qayb ka aheyd geedigii lagu raadinayey cadaalada Marxuum Wasiir Cabaas Cabdulaahi Sheekh Siraaji – waxaana leenahay mar walba garab istaagiina waxa uu noo ahaa qiimaha ugu weyn.

Soomaaliya Soomaali baa leh, Bulshana waxa ay ku wada noolaan kartaa Cadaalad.

Muqdisho (Caasimada Online) – Guddoomiye ku xigeenka amniga iyo siyaasadda gobolka Banaadir, Cali Yare Cale ayaa ka hadlay toogashadii saaka lagu fuliyey Axmed Cabdullahi Cabdi (Caydiid) oo bishii May ee 2017 dilay wasiirkii howlaha guud iyo dib u dhiska xukumaddii ra’iisul wasaare Kheyre Allah ha u naxariistee Cabaas C/llaahi Sheekh Siraaji.

Cali Yare oo qoraal soo dhigay bartiisa Facebook-ga ayaa sheegay inay xaq tahay toogashada lagu fuliyey ninkan oo aheyd qisaasta marxuum Cabaas.

Sidoo kale Cali Yare ayaa dalbaday in si deg deg ah iyaguna loo toogto raggii dilay guddoomiyihii hore ee maamulka degmada Hodan, Marxuum Cabdixakiin Dhagajuun.

“Waa xaq waana sharci in qofkii qof dila in loo qisaaso, sidoo kale waxaan rajeynayaa in iyadana si degdeg ah loo fuliyo qisaasta dilka bareerka ahaa ee loo geeystay walaalkeey Abdixakiin Dhagajuun” ayuu qoraalkiisa ku yiri guddoomiye ku xigeenka gobolka Banaadir,.

Dhinaca kale Cali Yare Cali ayaa soo bandhigay su’aallo la xiriira kiiskan, kuwaas oo tilmaamay in haboon tahay in la’is weydiidyo, wuxuuna yiri  “Nin ka mid ah Koox aan saakay meel ka wada quraacannay ayaa na waydiiyay labo su’aalood oo kala ahaa;

Maxaa dhici lahaa haddii saakay dilkaan la fuliyo iyada oo Farmaajo Madaxweyne yahay?

Xilligan maxay qori lahaayeen imisa Idaacad ayay ka hadli lahaayeen Abdirahman Abdishakur, Mahad Mohamed Salad, Saabir Shuuriye, Abshir Bukhaari, Ahmed Fiqi iyo ragga la midka ah?”

Kiiskan ayaa soo jiitamayey muddo ka badan 5 sano, waxaana guul dareystay dadaalo ay waday beesha uu kasoo jeedo askariga saaka la toogtay oo dooneysay in si hoose xal looga gaaro kiiskan balse waxaa arrintaas ku gacan seeray oo ka horyimid ehelada wasiir Cabaas.

Gaalkacyo (Caasimada Online) – Madaxweynaha Soomaaliya Mudane Xasan Sheekh Maxamuud oo uu wehelinayo Madaxweynaha Puntland Siciid Cabdullaahi Deni ayaa maanta xarigga ka jaray wajiga koowaad ee dhismaha Dekedda Garacad ee Gobolka Mudug.

Madaxweynaha Jamhuuriyadda ayaa ku bogaadiyey maamulka iyo bulshada Puntland sida ay uga dhabeeyeen himiladan isku tashiga ah, waxa uuna ku tilmaamay mid ka tarjumeysa sida shacabka Soomaaliyeed ay ugu istaageen horumarka iyo wax-wada qabsiga.

“Maanta waa maalin farxadeed, waa maalin la isu bogaadiyo, Ilaahay ayaana mahadda iska leh. Horumar kasta oo la gaaro waxaa sal u ah nabadda iyo isku duubnida. Bulshada deegankan iyo guud ahaan Puntland waxay muujiyeen geesinimo, hawlkarnimo iyo sida  shacabka Soomaaliyeed ay u gaari karaan guulo waaweyn haddi ay gacmaha is-qabsadaan. Guusha lagu hirgeliyey mashruucan waxaa iska leh Soomaaliya oo dhan,” ayuu yiri Xasan Sheekh.

Madaxweyne Xasan Sheekh Maxamuud ayaa dul istaagay halganka isku tashiga ah ee ka socda guud ahaan dalka oo uu ugu horreeyo midka lagu cirib tirayo argagixisada Alshabaab oo isbaarada u dhigtay nolasha iyo horumarka dadka Soomaaliyeed, waxa uuna xusay in Soomaaliya xasilloon oo nabad iyo barwaaqo ah ay ku imaaneyso dalka oo laga xoreeyo khawaarijta Alshabaab.

Xasan Sheekh Maxamuud ayaa ku dhiirri geliyey deegaannada dalka, dowlad-goboleedyada iyo guud ahaan shacabka Soomaaliyeed in ay ku tartamaan horumarka iyo wax-wada qabsiga, isagoo tilmaamay taageerada iyo mudnaanta dowladdu ay u siineyso mashaariicda isku tashiga ah.

Munaasabadea daahfurka ayaa waxaa ku sugnaa mas’uuliyiin kala duwan, sida madaxweynaha dowlad deegaanka Soomaalida Mustafe Muxumed Cagjar, wufuud ka kala socota dalalka Kenya iyo Itoobiya.

Madaxda madasha ka hadashay ayaa intooda badan qiray inay dekeddan wax badan ka beddeli doonto  dhaq-dhaqaaqa ganacsiga ee dalka, gaar ahaan isku xirka Soomaaliya iyo Itoobiya.

Dekedda Garacad ayaa ah dekeddii ugu horreysay oo ay maalgashtaan ganacsato Soomaaliyeed, waxaana la dhagax dhigay sannadkii 2017-kii.

Waa dekaddii shanaad ee ay Soomaaliya yeelaneyso, waxaana lagu maalgaliyay in ka badan 300 milyan oo dollar, ayada mashruucaan uu noqday kii ugu weynaa ee dalka laga hirgeliyo burburkii kadib.

Dekedda Garacad ayaa sidoo kale muhiim u noqon doonto isku xirka ganacsiga Soomaaliya iyo Ethoipia, maadaama ay tahay dekedda ugu dhow ee xigta dhinaca Ethiopia.

Puntland ayaa sheegtay in dhismaha dekedda uusii socon doono, maadaama haatan wejigii labaad uun lasoo gabagabeeyey, kaas oo qaatay muddo 5 sanno oo xiriir ah.

Muqdisho (Caasimada Online) – Maxkamadda ciidamada qalabka sida ee Soomaaliya ayaa ugu dambeyn saaka aroortii hore toogasho ku fulisay Axmed Cabdullahi Cabdi (Caydiid) oo bishii May ee 2017 dilay wasiirkii howlaha guud iyo dib u dhiska xukumadda ra’iisul wasaare Xasan Cali Kheyre Allah ha u naxariistee Cabaas C/llaahi Sheekh Siraaji.

Toogashada lagu fuliyey ninkan ayaa ka dhacday dugsiga tababarka General Gordan ee Muqdisho, waxaana soo dhoweeyey ehelada wasiir Siraaji oo muddo 5 sano ah sugayey in cadaalad uu helo wiilkooda.

Maxamuud Siraaji oo la dhashay wasiirka la dilay ayaa shaaciyey in ugu dambeyn ay guuleysatay cadaaddii ay muddada dheer sugayeen.

“Cadaaladda ayaa ugu dambeyntii guuleysatay” ayuu ku yiri qoraal uu soo dhigay bartiisa Twitter-ka.

Axmed Cabdullahi oo saaka la toogtay ayaa ahaa askari ka tirsanaa ilaalada hanti dhowrkii hore ee qaranka Dr. Nuur Faarax Jimcaale, wuxuuna dilka wasiirka ka dhacay agagaarka xarunta madaxtooyada Soomaaliya.

Dhanka kale waxaa guul dareystay dadaalo ay wadday shantii sano ee lasoo dhaafay beesha uu kasoo jeedo askariga saaka la toogtay oo dooneysay in si hoose xal looga gaaro kiiskan, balse waxaa arrintaas ku gacan seeray oo ka horyimid ehellada wasiir Cabaas.

AUN Cabaas Siraaji, oo 31 jir ahaa, ayaa sidoo kale ahaa wasiirkii ugu da’da yaraa xilligaas, waxa uu kasoo laabtay xerada qaxootiga ee Dhadhaab oo uu ku soo barbaaray.

Garbahaarey (Caasimada Online) – Diyaaradaha dagaalka ee dowladda Kenya ayaa saacadihii lasoo dhaafay duqeymo culus ka geystay gudaha deegaanka Ceelcadde ee gobolka Gedo.

Xoolo iyo guryo ay lahaayeen dad shacab ah ayaa la sheegay in lagu burburiyay duqeymaha ay ciidamada Kenya ka geysteen Caalcadde.

Korneyl Aadan Axmed Rufle oo ka tirsan saraakiisha ciidanka xoogga dalka ee gobolka Gedo ayaa Idaacadda Kulmiye u sheegay in 21 neef oo Ari ah, Faras iyo Rati Geel ah ay duqeymahaas ku dileen ciidamada Kenya.

Sidoo kale Korneyl Rufle wuxuu sheegay in laba Guri oo dad shacab ah ay lahaayeen lagu burburiyay duqeynta, waxaana ka badbaaday reerkii degaanaa gurigaas oo ka cararay goobta.

“Diyaaradaha Kenya oo ka soo gudbay Mandheera ayaa duqeyn ka geystay Ceelcadde, laba guri oo bartamaha magaalada ku yaalla ayaa la duqeeyey, halkaas waxaa lagu laayey xoolo, 21 neef oo Ari ah, Aawr geel ah iyo Faras ayaa lagu dilay,” ayuu yiri Korneyl Rufle.

Sidoo kale wuxuu sheegay in gantaallo aan qarxin ay weli goobta yaallaan, sidoo kale dadka deegaankaas ayuu sheegay inay guryahooda ka cararaan markii ay hawada soo galaan diyaaradaha Kenya, taas oo sabab u noqotay in reerkii deganaa gurigaas ay duqeynta ka badbaadaan.

“Wax khasaare ah dadka kama soo gaarin duqeyntaas, xoolihii iyo guryihii waa la baabi’iyey, waxaa intaas dheer in bartamaha magaalada Ceelcadde ay yaallaan ugu yaraan shan gantaal oo aan qarxin,” ayuu hadalkiisa ku sii daray Korneyl Rufle.

Wuxuu intaas ku sii daray, “Dadkaan mudo dheer ayey diyaaraduhu beegsanaayeen, markii ay hawada soo galeen ayaa laga cararay guryaha, dadka qaar waxay galeen guryaha shubka ah, halka qaarna ay u carareen dhul bacaad ah oo aan dhagax laheyn si firirka ay uga badbaadaan.”

Ugu dambeyntii sarkaalkaan ka tirsan ciidanka xoogga dalka ayaa sheegay in deegaanka ay duqeyntu ka dhacday ee Ceelcadde uusan ka jirin wax maamul ah, oo Al-shabaab ay yimaadaan markii ay doonaan, wuxuuna degaankaasi hoos tagaa degmada Garbahaarey ee xarunta gobolka Gedo.

Hoos ka dhageyso wareysiga Korneyl Rufle:

Muqdisho (Caasimada Online) – Dowladda Sacuudiga ayaa maanta magaalada Muqdisho diyaarad uga qaaday sideed qof oo qabta dhaawacyo kale duwan, kuwaas oo ku dhaawacmay weerarkii Hotel Xayaat iyo weerarro kale oo Hoobiye loo adeegsaday oo Al-shabaab ay Muqdisho ka fuliyeen.

Dadkaan oo dhamaantood shacab ah ayaa waxaa la sheegay in qaar kamid ah guryahooda ay hoobiyayaal ugu tageen, qaarna ay ku dhaawacmeen weerarkii Hotel Xayaat, kadibna isbitaallada Muqdisho waxaba looga qaban waayey.

Diyaarad maanta oo Jimco ahayd ka timid Boqortooyada Sacuudiga ayaa 8-daan qof garoonka Aadan Cadde ka qaaday, waxaana lagu soo daweynayaa dalkaas.

Wasiir Caafimaadka XFS, xildhibaano, safiirka Sacuudiga ee Soomaaliya iyo masuuliyiin kale ayaa maanta ku sugnaa garoonka Aadan Cadde markii laga qaadayey dhaawacyada dadkaan oo lagu soo daweynayo dalka Sacuudiga.

Safiirka Sacuudiga ee Soomaaliya ayaa sheegay in tani ay qeyb ka tahay caawinta ay la garab taagan yihiin dadka iyo dowladda Soomaaliyeed ee burburka ka soo kabanaya.

Wasiirka Caafimaadka XFS Cali Xaaji oo warbaahinta kula hadlay garoonka ayaa sheegay in dowladda Sacuudiga ay maanta ka soo jawaabtay codsi ay u dirsatay dowladda Soomaaliya, oo ahaa in gurmad caafimaad  ay u fidiso dadka Soomaaliyeed ee dhaawacyadooda dalka waxaba looga qaban waayey.

Hoos ka daawo

Muqdisho (Caasimada Online) – Madaxweynaha Soomaaliya Mudane Xasan Sheekh Maxamuud ayaa maanta daah-furay qorshaha Qaran ee Soomaaliya Cagaar ah, isaga oo ku beeray guriga Ummadda geed ka mid ah 10 Malyan oo geed oo lagu dhireynayo dalka.

Madaxweynaha ayaa tilmaamay ahmiyada dhirtu ay u leedahay dalkeena oo abaaro soo noq-noqday ay aafeeyeen, saameyn xoogana ay ku yeelatay duruufihii adkaa ee dalku soo maray, taasi oo sababtay nabaad-guur xoogan oo saameeyey nolosha iyo deegaankaba.

“Burburkii ku dhacay dalka kaliya ma saameyn dadka ee dhibaato xooggan ayuu gaarsiiyey deegaanka Soomaaliyeed, waxaa naga guuray xayawaanaadkii iyo dhirtii uu caanka ku ahaa dalkeennu'” ayuu yiri.

“Dib u dhiska dowladnimada waa in ay barbar socotaa dib u cagaarinta deegaanka iyo kobcinta wacyiga dadweynaha ee ku aaddan daryeelka deegaanka.”

Sidoo kale waxa uu madaxweynuhu faray hay’adaha dowladda inay hormuud u noqdaan qorshahan oo dhireeyaan xarumaha ay ku shaqeeyaan.

Wuxuu ugu baaqay haweenka Soomaaliyeed oo taariikh ahaan door wanaagsan ka qaata daryeelka deegaanka in ay guryaha iyo goobaha ganacsiga ay ku tallaalaan geedahan waxtarka u leh deegaanka ee ay dowladdu diyaarisay.

Ugu dambeyntiina waxa uu si gaar ah u faray maamulka gobolka Banaadir iyo wasaaradda deegaanka Soomaaliya inay labada bilood ee sannadka ka dhiman ay ku abuuraan caasimadda 100,000 oo geed si loogu gudbo dhireynta caasimadaha dowlad-goboleedyada iyo guud ahaan degmooyinka iyo deegaanada dalka.