Madaxweynihii hore ee Soomaaliya Xasan Sheekh Maxamuud oo goor dhow shir jaraa’id ku qabtay magaalada Muqdisho ayaa eedeyn u soo jeediyay Madaxweyne Farmaajo iyo Ra’iisul Wasaare Kheyre.

Madaxweynihii hore ee Soomaaliya Xasan Sheekh Maxamuud oo haatan hogaamiya mid kamid ah xisbiyada dalka ayaa ka hadlay arrimo kala duwan oo ay ka mid tahay maamulida hawada dalka iyo federalka dalka.

Xasan Sheekh ayaa sheegay in maamulida Hawada dalkeena sanado badan dadaal loo galay sidii gacanta Soomaaliyeed loogu soo celiyo lahaa balse aysan mudneyn in shacabka Soomaaliyed loo adeegsado in lagu cunoqabateeyo maamulida hawada.

Madaxweyne Xasan Sheekh ayaa ka digey in maamulka hawada soomaaliya gacanteeda laga saaro.

Xasan Sheekh oo ka hadlay arrimaha ka jira magaalada Kismaayo ayaa ku tilmaamay inay tahay nasiib darro weyn in dowlada dhexe ay cunoqabatayn saarto shacabkeeda.

Madaxweynihii hore ee Soomaaliya Xasan sheekh Maxamuud ayaa ku tilmaamay Madaxweyne Farmaajo iyo Ra’iisul Wasaare Xasan Cali Kheyre inay  baalmareen guud ahaan baalmaren Shuruucda dalka.

“Anagaa soo joognay 30 sano oo burbur ah hadaad idinka ka maqneydeen ogaada waxaad heysaan waddadii lagu hungoobay oo lagu dumay ka jooga”ayuu yiri Xasan Sheekh Maxamuud.

Sidoo kale Xasan Sheekh Maxamuud ayaa sheegay in shacabka ku nool Muqdisho in noloshu ay ku adkaatay isagoo tusaale u soo qaatay wadooyinka xiran.

Halkan hoose ka daawo shirka jaraa’id ee Xasan Sheekh Maxamuud.

Xigasho: Jowhar.com

Muqdisho (Caasimadda Online) – Odayaasha iyo duubabka Beesha uu kasoo jeedo Madaxweynihii hore ee Soomaaliya Shiikh Shariif Shiikh Axmed ayaa ku booqday gurigiisa kadib dhacdadii lagu xayiray.

Imaam Maxamed Yuusuf Cali  Imaam oo ah Imaamka Beelaha Mudulood iyo Ugaas Maxamuud Cali Ugaas ayaa u muujiyey Madaxweynihii hore ee Soomaaliya Shariif Shiikh Axmed sida ay uga xun yihiin tallaabadii ay Dowladda Federaalka Soomaaliya ugu diiday inuu u duulo Magaalada Kismaayo ee Caasimadda Jubbaland si uu uga qeybgalo Caleemka saarka Madaxweynaha dib loo doortay ee Axmed Madoobe.

Odayaashaan oo xal ahaan ugu tagay Shiikh Shariif ayaa ka codsaday in Xaaladda la dajiyo isla markaasna ay iyaga Dowladda Federaalka Soomaaliya kala xaajoon doonaan dhacdadaan.

Imaamka iyo Ugaaska Maanta u tagay Shiikh Shariif ayaa la rumeysan yahay inay daacad u yihiin Dowladda uu hoggaamiyo Maxamed Cabdullaahi Farmaajo taasoo bil kasta siiso lacago.

Dadka Falanqeeyo siyaaddda ayaa aaminsan inay aheyd in Ugaaska iyo Imaamka ay si cad u muujiyaan mowqifkooda ku aadan dhacdadaan isla markaasna ay farriin u cad u diraan Madaxweynaha iyo Ra’isul wasaaraha.

Waxaa laga sugayey inay saxaafadda la hadlaan isla markaasna ay si cad uga hadlaan kiiskaan taagan iyo cidda ka dambeyso iyo sida laga yeelayo arrimaha noocaan oo kale ah oo ay dhawr jeer ku dhaqaaqday Dowladda Federaalka.

Shalay ayey aheyd markii xubno uu hoggaaminayo Wasiirka Amniga Maxamed Abuukar Islow ay Shiikh Shariif ugu tageen gurigiisa iyadoo wado raali gelin, balse Shiikh Shariif ayaa si cad ugu sheegay inuusan intaan ku qanci karin balse loo baahan yahay inay Dowladda raali gelin rasmi ah ka bixiso.

Dowladda Soomaaliya ayaa lagu eedeeyey inay qaadeyso tallaabooyin ka baxsan Sharciga oo ka dhan ah Maamul Goboleedyada.

Madaxweynihii hore ee Soomaaliya Shariif Sheekh Axmed ayaa si adag uga hadlay qaabkii shalay loola dhaqmay ee lagu xanibay diyaaraddii u qaadi laheyd Kismaayo, waxaana uu uga digay dowladda Federaalka inay dalka u horseeddo burbur, oo ay meel qaldan wax ku wado.

“Farmaajo isagoo suud iyo boorso wata anaa magacaabay dalkaan wax ka galay ma jiro isagaa ka faa’ideysta, Xasan Cali Kheyre waa la mid annaga waxbaa naga galay inuu burburana kama yeeleyno dariiqaa ku socoto waa qaldantahay waxaan leennahay meeshaa joogto ma dhaafi kartid Soomaalina ha isku timaaddo”

Caasimada Online
Xafiiska Muqdisho
[email protected]

Muqdisho (Caasimadda Online) – Galmudug oo diyaar garoobeysa in ay doorato Madaxweynihii labaad ayaa waxaa ka furmay loolan adag oo la aamisan yahay in natiijada kasoo baxda ay go’aamin doonto rajada mucaaradka ee doorashada 2020. Waxaana si rasmi ah u bilowday ololaha doorashada iyada oo musharixiinta ugu cad cad ay ku dhawaaqeen doonistooda.

Mucaaradka dowladda ayaa ku duulaya labada musharax ee kala ah Cabdiraxmaan Odawaa iyo Kamal Guutaale halka muxaafadkuna ay riixayaan Axmed Qoor Qoor, waxaa intaas dheer musharaxiin  siyaasad qabow oo tartanka qeyb ka ah kuwaas oo aan la saadaalin Karin dhinaca ay u dhammaan doonaan.

Musharax Cabdiraxmaan Odawaa oo Muqdisho kaga dhawaaqay rabitaankiisa ayaa tagay Dhuusamareeb oo si wanaagsan loogu soo dhaweeyay balse isaga iyo saaxiibadiisa siyaasadda oo ay ku abtirsadaan Xisbiga UPD ayaa safar saxaafadda laga qariyay ugu soo laabtay Muqdisho iyada oo qaarkood ay usii gudbeen Turkiga, laakiin Odawaa oo aan wali Warbaahinta kasoo muuqan ayaa la rumeysan yahay in uu Muqdisho joogo wali.

Waxaa jira xogo hoose oo sheegaya in saaxiibadii ay niyad jabeen kalsoonida ah in ay reer Galmudug ka iibiyaan aragtidooda iyo in Madaxweynihii hore ee Soomaaliya ahna Guddoomiyaha Xisbigooda Xasan Sheikh uu si cad u sheegay in doorashada Galmudug uusan wax lacag ku bixin Karin taas oo ay dheer tahay in Xildhibaan Mahad Salaad uu wada hadal la furay Musharax Qoor Qoor isaga oo quud dareynaya in uu ku biiro Ololihiisa.

Haddii sidaan ay wax kusii socdaan waxa ay u muuqataa in Musharax Odawaa uu lumin doono taageerayaashiida oo ay biirin doonaan garabyada kale ee xifaaltanka ku jira.

Kamaal Guutaale oo isna ah Musharax aan la dhayalsan Karin oo mucaarad ah ayaa Muqdisho uga dhawaaqay Musharaxnimadiisa waxa uuna u gudbay Dhuusamareeb, Munaasabaddiisa shaacinta iyo soodhoweynta tagistiisa Dhuusamareeb kuma uusan soo bandhigin garbo culus oo saameyn ku leh siyaasadda maanta laakiin waxa uu ku dhiiran yahay in uu sii wato Ololihiisa.

Xisbiga uu ka tirsan yahay ee Wadajir Saraakiil ka tirsan ayaa laga soo xigtay in lacag iyo maskaxba ay la garab taagan yihiin Musharaxooda oo aysan wax cabsi ah qabin, laakiin dad badan ayaa u arka in saaxiibadiis ay saameyn badan ku lahayn siyaasadda gaar ahaa dowladdan iyo tii ka horeysaba.

Musharaxa seddaxaad waa kan aad loo hadal hayo oo loo badinayo in uu noqon doono Madaxweynaha soo socda Galmudug waana Axmed Qoor Qoor oo taageero badan ka heysta Dowladda iyo dad ay siyaasadda saaxiib ku noqdeen.

Qoor Qoor oo Muqdisho iyo Dhuusamareebba kusoo bandhigay dhoola-tus indhaha soo jiitay sidoo kale noqday Musharaxa Ololaha xooggan tan iyo markii uu ku dhawaaqay hankiisa. Siyaasiin saameyn xoogan leh, ganacsato ay soo wada shaqeeyeen, odayaal dhaqan iyo qeybo kale oo bulshada Galmudug ka tirsan ayaa si mid ah u riixaya qorshaha uu ku maamuli lahaa Galmudug afarta sano ee soo aaddan.

Haddii dhinacyada mucaaradka aysan wax ka badalin siyaasadda ay ku wajahayaan Ololaha doorashada oo aysan la imaan hab u sahli kara in ay tartan adag gali karaan waxa ay u muuqataa ciyaar natiijadeeda la ogyahay.

Caasimada Online
Xafiiska Muqdisho
[email protected]

Muqdisho (Caasimada Online) – Wasiirkii hore ee arrimaha dibadda xukuumadda federaalka Soomaaliya, Yuusuf Garaad Cumar ayaa durbo ka falceliyey shirkii jaraa’id ee uu maanta qabtay Madaxweyne Sheekh Shariif Sheekh Axmed, kaas oo si adag uga hadlay is hortaagii shalay loogu geystay gudaha garoonka Aadan Cadde ee magaalada Muqdisho.

Yuusuf Garaad oo qoraal kooban soo dhigay bartiisa Facebook-ga ayaa sheegay in hadalka Sheekh Shariif uu arko mid dib u dhac horseedi kara oo aanay ahayn in la sahashado.

“Madaxweyne Shariif Shiikh Axmed waxaan hadalkiisa u arkaa mid dib u dhac horseedi kara oo aanay ahayn in la sahashado. Wax ma dhimi karo dad baa leh. Laakiin ma dooneyo in taas la isla gaaro.” ayuu yiri wasiirkii hore ee arrimaha dibadda dowladda Soomaaliya.

Sidoo kale wxuuu intaas ku daray in aan loo baanheyn in looga sii daro hadalka Sheekh Shariif Sheekh Axmed.

“Ma ahan in la dheyelsado mana ahan in looga sii daro.” ayuu markale yiri Yuusuf Garaad Cumar.

Ugu dambeyn wuxuu dowladda Soomaaliya ugu baaqay inay si deg deg ah u xaliso khilaafka kala dhexeeya Madaxweynihii hore ee dalka, Sheekh Shariif Sheekh Axmed.

“Waxaan Dowladda ugu baaqayaa, ayada oo danta guud ka eegeysa, in ay dhakhso u xalliso khilaafkaan oo ah mid markii horeba laga baaqsan karay.” ayuu qoraalkiisa ku soo gabagabeeyey, Mudane Yuusuf Garaad wasiirkii hore ee arrimaha dibadda Soomaaliya.

.Caasimada Online
Xafiiska Muqdisho
[email protected]

Muqdisho (Caasimadda Online) – Xisbiga Midowga Nabadda iyo Horumarku (UPD) ayaa war-saxaafadeed xasaasi ah kasoo saaray xayiraadii shalay ay dowladda Farmaajo saartay madaxweynihii hore ee Soomaaliya Sheekh Shariif Sheekh Axmed, kaasoo loo diiday inuu u duulo magaalada Kismaayo ee caasimadda Jubalanad.

Halkaan hoose ka akhriso war murtiyeedka kasoo baxay xisbiga oo dhameystiran 

Shalay oo taariikhdu ahayd 22ka September 2019 waxa laga baajiyay Madaxweynihii hore ee Jamhuuriyada Federaalka Soomaaliya, Mudane Sheikh Shariif Sheikh Ahmed, safar uu ku tegi lahaa magaalada Kismayo ka dib markii amar ka soo baxay Hay’adda Duulista Hawada lagu hakiyay duulimaadkii ay raaci lahaayeen isaga iyo wafdigiisu.

Xisbiga Midowga Nabadda iyo Horumarku (UPD) wuxuu si kulul u cambaareynayaa falkaa foosha xun waxaanu ka digeyaa in hay’adaha qaran ee bixiya adeega guud loo isticmaalo dano gaar ah oo aan  waafaqsanayn dastuurka ku meel gaarka ah sida ku cad qodobka 33aad oo waajib yeelaya in go’aammada maamul ee dalku ay “ahaadaan kuwo ku dhisan sharci, maangal ah, go’aan-ka-gaaristoodana loo maray hannaan caaddil ah”.

Xisbigu wuxuu sidaa si la mid ah u cambaareynayaa guud ahaan ku xad-gudubka sharfta iyo karaamada muwaadin kasta gaar ahaanna dadka tix-gelinta iyo maamuuska qaran ku leh bulshada: xuquuqdaas oo ay ku tunteen kuwii loo igmaday in ay ilaaliyaan oo awooddii dawladnimo ugu takri falay si baal marsan qodobka 12aad farqadiisa 1aad ee dastuurka oo ku waajib yeelaya madaxda hay’adaha qaranka dhowrista xuquuqda aasaasiga ah ee muwaadiniinta.

Xisbigu wuxuu sidoo kale cambaareynayaa ku xad-gudubka xuquuqda aasaasiga ah ee muwaadin kasta taas oo ka hor imaneysa qodobka 20aad farqadiisa 1aad oo damaanad qaadeysa xorriyada ka qeyb-galka iyo abaabulka kulamada iyo sidoo kale qodobka 21aad farqadiisa 1aad oo u xaq-siineysa muwaadin  kasta in uu si xor ah “ugu dhex-socon karo meel kasta oo dalka ka mid ah, kana bixi karo”.

Xisbigu wuxuu hoosta ka xariiqayaaa in dhacdadan shalay ay markhaati cad u tahay sida xukuumaddu  ugu tumanayso xorriyadaha lama taab-taanka ah ee dastuurku damaanad qaadey waxaanu xasuusinayaa madaxda sare ee dalka in aan dib loogu dulqaadan Karin caadeysiga ku xad-gudubka dastuurka iyo shuruucda kale ee dalka.

Xisbigu wuxuu ugu danbeyn ku baaqayaa in saami-leyda siyaasadeed ay isugu yimaadaan shir deg-deg ah oo looga tashanayo xad-gudubyada ka dhanka ah xuquuqaha dastuuriga ah. Sidoo kale xisbigu wuxuu ugu baaqayaa ummada Soomaaliyeed in ay taageero dhan walba ah la garab-istaagaan dedaalada loo geli doono samato-bixinta dimoqraadiyada curdinka ah ee dalkeena

DHAMMAAD

Muqdisho (Caasimada Online) – Madaxweynihii hore ee Soomaaliya, Sheekh Shariif Sheekh Axmed oo shir jaraa’id ku qabtay hoyga uu ka dagan yahay magaalada Muqdisho ayaa si kulul uga hadlay is hortaagii shalay lagu sameeyey, xilli uu ku sii jeeday magaalada Kismaayo ee xarunta gobolka Jubbada Hoose.

Ugu horreyn Sheekh Shariif ayaa sheegay in madaxda dowladda Soomaaliya ay baal marayaan shuruucda dalka, halkii laga rabay inay ilaaliyaan dastuurka u yaalla dalka.

“Inta jeer ee madaxda dowladdu garab mareen sharciga u yaal dalka xisaab maleh.” ayuu yiri Madaxweynihii hore ee Soomaaliya.

Sidoo kale wuuxuu tilmaamay in isaga iyo Madaxweyne Farmaajo ay u siman yihiin sharciga, islamarkaana haddii uu ka duuli karo garoonka uu isna ka dhoofi karo, taasna ay xaq u siineyso muwaadinimadiisa, sida uu hadalka u dhigay.

Waxa kale uu intaas ku daray in dowladdii KMG aheyd, islamarkaana uu Madaxweynaha ka ahaa ay dadaal badan ku bixsay Garoonka Aadan Cadde, kuna guuleysatay dhowr sano kadib in ugu yaraan diyaaraduhu ay ka soo dagaan.

“Garoonka ay intaas iga soo gashay, haddii la ii ogolaan waayey, yaa loo ogolaanayaa?.” ayuu sii raaciyey hadalkiisa.

Sheekh Shariif ayaa tilmaamay in hay’adaha dowladda aysan madax banaaneyn, sida Baarlamaanka oo uu tilmaamay in uusan laheyn awoodii looga baahnaa.

Sidoo kale wuxuu ku dhaliilay dowladda amniga, dhaqaalaha iyo dastuurka oo uu sheegay in dhamman ay ka gaabisay, taasi bedalkeedna uu xusay in ay xooga saartay dagaalka ay kula jirto siyaasiyiinta mucaaradka.

Shariif ayaa sidoo kale su’aal galiyey, sida mustaqbalka Farmaajo iyo Khayre loogu aamini karo dalka, gaar ahaan doorashada 2020-ka, maadaama buu yiri ay iyagu hareer marayaan shuruucda dalka.

Ugu dambeyn wuxuu ka hadlay xiriirka dowladda federaalka iyo maamul goboleedyada, isagoo sheegay inuusan jirin maamul madax banaan oo xiriir la leh dowladda dhexe.

“Jubbaland isma hayaan, Puntland isma hayaan, Galmudug waxa ka socda waan ognahay, HirShabelle waxa ka socda waan ognahay, Baay iyo Bakool waxa ka dhacay waan ognahay.” ayuu markale yiri, Sheekh Shariif Sheekh Axmed Madaxweynihii hore ee dalka.

Xiisada dowladda iyo Sheekh Shariif ayaa ka dhalatay, kadib markii shalay loo diiday inuu u duulo Kismaayo oo uu doonayey in uu kaga qeyb galo caleema saarka Axmed Madoobe.

Caasimada Online
Xafiiska Muqdisho
[email protected]

Muqdisho (Caasimada Online) – Dowladda federaalka ah ee Soomaaliya ayaa goor dhow ku dhawaaqday in muddo saddex maalin ah la joojiyey dhammaan duulimaadyadii tagi jiray magaalada Kismaayo ee xarunta gobolka Jubbada Hoose.

Maamulka hay’adda duulista hawada Soomaaliya ayaa shaaciyey in laga bilaabo maanta oo ay taariikhdu tahay 23-ka September, illaa 26-ka bishan la hakiyey dhammaan diyaaradaha tegaya ama ka imaanaya magaaladaasi.

Sidoo kale hay’adda ayaa go’aankan ku war gelisay shirkadaha duulimaadyada dalka, gaar ahaan kuwa isticmaala garoonka magaalada Kismaayo.

Arrintan ayaa waxa ay dowladdu kaga gol leedahay, sidii ay u baajijn laheyd mas’uuliyiinta ka qeyb galaya xafladda caleema saarka ee Axmed Madoobe.

Dowladda dhexe ayaa gabi ahaan ka hortimid doorashadii dib loogu doortay Madaxweynaha Jubbaland, taas oo dhowaan ka dhacday magaalada Kismaayo ee xarunta maamulkaasi.

Maalintii shalay ayey aheyd markii dowladda dhexe wafdi uu hoggaaminayey Madaxweynihii hore ee Soomaaliya Sheekh Shariif Sheekh Axmed ay uu diiday inay uu duulaan dhanka magaalada Kismaayo.

Sheekh Shariif ayaa u jeedkiisu wuxuu ahaan inuu ka qeyb galo xafladda caleema saarka ee Madaxwweynaha dowlad goboleedka Jubbaland.

Caasimada Online
Xafiiska Muqdisho
[email protected]

Muqdisho (Caasimada Online) – Guddoomiyaha xisbiga Wadajir, Cabdiraxmaan Cabdishakuur Warsame ayaa si adag uga hadlay is hortaagii lagu sameeyey Madaxweynihii hore ee Soomaaliya, Sheekh Shariif Axmed oo shalay laga celiyey, isagoo ku sii jeeda Kismaayo, si uu uga qeyb galo xafladda caleema saarka ee Axmed Madoobe.

Cabdiraxmaan Cabdi Shakuur ayaa sheegay inuu si xoogan u cambaareynayo sida loola dhaqmay Sheekh Shariif Sheekh Axmed oo uu sheegay in halgankiisa uu ka soo billowday soo deynta wiil ardaydiisa ka mid ah oo xorriyaddiisa laga qaaday, islamarkaana ay maanta joogto in isagii xorriyadda socodka laga qaado, sida uu hadalka u dhigay.

Sidoo kale wuxuu intaasi raaciyey in wixii dalka ka dhaca ay masuuliyadooda qaadeyso AMISOM, maadaama ay ka aamusan tahay waxa dhacaya, iyadoo la adeegsanayo awoodeeda.

Halkan hoose ka aqriso:

Waxaan si xooggan u cambaareynayaa xayiraadda safar ee loo geystay madaxwaynihii hore ee Soomaaliya Mudane Shariif Sheekh Axmad, wafdigiisa iyo shacabkii maanta Kismaayo u dhoofayey. Sheekh Shariif wuxuu halgankiisa siyaasadeed ka soo billawday soo deynta wiil ardaydiisa ka mid ah oo xorriyaddiisa laga qaaday, maantana waxay joogtaa in isaga xorriyadda socodka laga qaado.

Dastuurka Soomaaliya qodobkiisa 21-aad ayaa dammaanad qaadaya xorriyadda Isu-socodka. Dowladnimo dastuur ayey ku dhisan tahay, ku tumashada dastuurkana waa khiyaano qaran. Madaxweyne Farmaajo iyo Raysalwasaare Kheyre amarkooda ayaa lagu laayey shacabkii Baydhabo, doorasho ay AMISOM tartamayaashii qaarkood xabsiga dhigtay, dadkii ka dhiidhayeyna laysay ayuu Farmaajo caleema saarkeedii cammirtay.

Muqdisho (Caasimada Online) – Xildhibaan Mahad Maxamed Salaad oo ka tirsan xildhibaanada golaha shacabka ee baarlamaanka Soomaaliya ayaa si kulul uga hadlay xanibaadii dhanka duulimaadka aheyd ee shalay lagu sameeyay Madaxweynihii hore Shariif Sheikh Axmed.

Xildhibaanka ayaa sheegay in mar hore uu ka digay in madaxweyne Farmaajo uu sidaan damacsanyahay, balse aan cidina ka dhageysan, “Labo sano kahor markii aan lahaa Madaxweyne Farmaajo waxa uu soo wado iyo waxa uu maaganyahay wax aad malayn kartaan maahan ee hurdada halaga kaco waa la’ ila yaabayay” ayuu yiri Mahad Salaad.

Mahad oo qoraalkaan kusoo daabacay Bartiisa Facebook-ga ayaa wax laga xumaado ku tilmaamay in madaxdii dalkaan soo maamushay la ixtiraami waayo oo wadooyinka laga xirto, “Maanta soo mari maayo madaxdii xukunka ku wareejiyay in uu jidadka ka xirto, diyaaradahana kala dago. Dowladnimadii shalay sida nabadgelyada iyo dimuquraadiyada ah ay ugu wareejiyeena in loogu xoog sheegto”

Ugu dambeyntii Mahad Salaad ayaa sheegay in uu ka calinayo fariintii labo sano ka hor uu u diray shacabka, taasi oo aheyd in waxii ay soo arkeen intii uu talada hayay madaxweyne Farmaajo wax ka daran ay soo socdaan, “Mar kale ayaan idin leeyahay waxa soo socda ayaa ka xanuun badan ee talo halaga yeesho”.

Caasimada Online
Xaafiiska Muqdisho
[email protected] 

Garoowe (Caasimada Online) – Kooxda Daacish, gaar ahaan faraceeda Soomaaliya ayaa soo bandhigtay dagaalyahanno cusub oo tababar ku qaadanaya dhulka buuraleyda Galgala ee gobolka Bari.

Dagaalyahannadan oo isugu jira Soomaali iyo ajaaniib ayey Daacish sheegtay inay ka mid noqonayaan ciidankooda ka dagaalama gudaha Soomaaliya.

Sawirrada laga soo qaaday dagaalyahannadan oo uu afka u duuban yahay ayaa muujinaya, iyaga oo tababar ku qaadanaya mid ka mid ah xeryaha Kooxda Daacish oo lagu magacaabo Daa’uud Al-Soomaali, taas oo loogu magac daray tababare horay loo dilay.

Daacish ma shaacin tirada dagaalyahannadan tababarka ku qaadanaya dhulka buuraleyda ee Puntland, marka laga reebo inay ka qeyb qaadanayaan dagaalka ay wado.

Dhowaan Mareykanka ayaa shaaciyey inay sare u kacday awooda kooxdan oo inta badan weeraro xoogan ka fulisa qeybo badan oo ka mid ah Soomaaliya.

Caasimada Online
Xafiiska Garoowe
[email protected]

Muqdisho (Caasimada Online) – Xisbiga Himilo Qaran ee uu hoggaamiyo madaxweynihii hore ee Soomaaliya Shariif Sheekh Axmed ayaa aad u cambaareeyey go’aankii dowladda Farmaajo ay ku hor-istaagtay safar uu maanta ku tagi lahaa magaalada Kismaayo.

Qoraal kasoo baxay Himilo Qaran ayaa lagu sheegay in falkii ay maanta ku kacday dowladda Farmaajo uu ahaa mid xadgudub ku ah xuquuqda isu-socodka ee dastuurka Soomaaliya uu siinayo muwaadiniinta.

Waxaa sidoo kale qoraalka lagu sheegay in falkaas uu kasoo horjeedo islamarkaana xadgudub ku yahay karaamada aadanaha uu leeyahay.

Xisbiga Himilo Qaran ayaa madaxda dowladda ugu baaqay inay ka waantoobaan ku tumashada sharciga dalka, ku xadgudubka xuquuqda muwaadinka iyo caburinta joogtada ah oo ay caadeysteen.

Himilo Qaran waxa uu sidoo kale xukuumadda uga digay inay joojiso faro-gelinta qaawan ee sharciga ka baxsan ee xukuumadda ay ku hayso maamul goboleedyada dalka.

Hoos ka aqriso qoraalka oo dhameystiran

Muqdisho (Caasimada Online) – Maamulka goboleedka Soomaaliyeed ee Jubalanad ayaa aad u cambaareeyey go’aankii dowladda Farmaajo ay ku hor-istaagtay safar uu maanta ku tagi lahaa magaalada Kismaayo.

Qoraal kasoo baxay Jubaland ayaa lagu sheegay in falkii ay maanta ka dhacay garoonka diyaaradaha Aadan Cadde uu caddeyn u yahay sida madaxda hadda hoggaamisa dowladda federaalka ay ugu tagri falayaan awoodda, una adeegsanayaan inay ku caburiyaan dadka ka aragti duwan.

War saxaafadeedka ayaa sidoo kale lagu sheegay xanibaada iyo is hortaagga lagula kacay Madaxweynihii hore ay tahay mid ka soo horjeeda shuruucda iyo Dastuurka dalka u yaalla, taasoo muwaadinka Soomaaliyeed xoriyad u siineysa inuu tagi karo, una safri karo meesha uu doono sida ku cad qodobka 21aad farqadiisa 1aad iyo 2aad ee Dastuurka KMG ah.

Hoos ka aqriso qoraalka Jubaland oo dhameystiran

Muqdisho (Caasimada Online) – Xubnihii uu hoggaaminayay wasiirka amniga xukuumadda Soomaaliya Maxamed Abuukar Islow Ducaale ee raali galinta ugu tagay hooygiisa Shariif Sheikh Axmed ayaa Shariif kala soo kulmay sharuud adag.

Xubnaha gaaray hooyga uu Muqdisho ka daganyahay madaxweynihii hore ee Soomaaliya Shariif Sheikh Axmed oo ka socday xukuumadda federaalka ayaa iskugu jiray wasiirro iyo xildhibaano waxaana hoggaaminayay wasiirka amniga Maxamed Islow.

Shariif ayay ka dalbadeen in uusan la hadlin warbaahinta oo markii uu kasoo laabtay garoonka soo buux dhaafisay gurigiisa, iyagoo isku dayay in ay si hoose uga raali galiyaan xayiraadii loogu gaystay garoonka Aadan-Cadde xilli maanta uu ku wajahnaa magaalada Kismaayo.

Madaxweyne Shariif ayaa gabi ahaanba iska diiday in si hoose loo raali galiyo, isagoo ku xiray raali galintiisa sharuud ah, in dowladdu ay soo saarto bayaan cad oo looga garaabayo xanibaadii maanta loo gaystay.

Xubnihii ka socday xukuumadda oo uu hoggaaminayay wasiir Islow ayaa waji gabax kala soo laabtay hooyga Sheikh Shariif uu ka daganyahay magaalada Muqdisho ee caasimadda dalka.

Xildhibaano ka tirsan labada gole ee baarlamaanka federaalka, siyaasiyiin iyo hoggaamiyaasha xisbiyada siyaasadeed ee dalka ayaa buux dhaafiyay hooyga madaxweynihii hore Shariif Sheikh Axmed, waxaana hadda u socda kulamo gooni gooni.

Kulamada ka socda guriga Sheikh Shariif ayaa waxaa dibad joog ka ah warbaahinta, waxaana lagu wargaliyay Weriyaasha ku sugan goobta in goor dhaw loo sooban dhigi doono waxa kasoo baxa kulamadaas.

Shariif Sheekh Axmed ayaa maanta laga hor istaagay safar uu ku aadi lahaa magaalada Kismaayo ee xarunta gobolka Jubbada Hoose, si uu uga qeyb-galo caleemo-saarka madaxweynaha Jubbaland Axmed Madoobe.

Caasimada Online
Xaafiiska Muqdisho
[email protected]

Muqdisho (Caasimadda Online) – Madaxweynihii hore ee Soomaaliya Xasan Sheekh Maxamuud oo qoraal soo dhigay Bartiisa Facebook ayaa kaga hadlay dhacdadii Maanta lagu xayiray Sheekh Shariif Sheekh Axmed.

Sheekh Shariif ayaa Maanta loo diiday inuu ka dhoofo Garoonka DIyaaradaha ee Magaalada Muqdisho isagoo kusii jeediyey Kismaayo oo uu doonayo inuu kaga qeybgalo Xafladda Caleemka Saarka madaxweynaha mar labaad la doortay ee Axmed Madoobe.

Xasan Sheekh Maxamuud oo arrintaan ka hadlayey ayaa sheegay inay 30 Sano qaadatay in gacanta lagu soo dhigo maamulitaanka hawada Soomaaliya.

Xasan Sheekh ayaa arrin laga xumaado ku tilmaamay inay Dowladda Federaalka Soomaaliya u adeegsado maamulitaanka Hawada Soomaaliya hub siyaasadeed.

Wuxu sheegay inay arrintaas ka dhallan karto qatar ku aadan xasiloonida Siysaadeed iyo midnimada Soomaaliya.

“Soomaaliya waxay 30 sano sugeysay inay hesho maamulka Hawada ” ayuu yiri Xasan Sheekh.

“Waa xaalad murugo leh in Dowladdu u isticmaasho Maareynta Hawada sidii hub siyaasadeed saameyn culus ku yeelan kara xasilloonida siyaasadeed iyo midnimada dalka” ayuu sii raaciyey.

Wasiirka Amniga Dowladda Soomaaliya Ducaale oo ay isku Beel yihiin Sheekh Shariif ayaa gelinkii dambe ku booqday gurigiisa, wuxuuna ka raali geliyey falkii Maanta lagula kacay.

Caasimada Online
Xafiiska Muqdisho
[email protected]

Muqdisho (Caasimada Online) – War hadda naga soo gaaray guriga madaxweynihii hore ee Soomaaliya Sheekh Shariif Sheekh Axmed ayaa sheegaya in halkaas ay tageen wafdi ka socda dowladda oo uu hoggaaminayo wasiirka amniga Soomaaliya Maxamed Abuukar Islow Ducaale.

Wafidgan ayaa ka codsaday Shariif Sheekh Axmed inuusan warbaahinta kala hadlin xayiraaddii maanta laga saaray inuu u safro magaalada Kismaayo, si uu uga qeyb-galo caleemo-saarka madaxweynaha Jubaland Axmed Madoobe.

Shariif ayaa goor sii horreysay u yeeray warbaahinta, waxaana la filayey inuu qabto shir jaraa’id oo uu kaga hadlayo wixii maanta dhacay.

Ducaale, oo ku beel ah Shriif, iyo xubno la socda ayaa madaxweynihii hore ka codsaya in la xalinayo wixii maanta dhacay islamarkaana uusan hadlin inta ka horreysa, ayaga oo ka cabsi qaba in hadalkiisa uu dhalin karo xiisad cusub.

Ducaale iyo xubnaha la socda ayaa u sheegay Shariif  in amarka laga joojiyey diyaaraddiisa ay ahayd mid aysan dowladda oo dhan isku raacsan tahay, islamarkaana ay baarayaan cidda bixisay.

Waxaa hadda la filayaa in warbaahinta uu la hadlo guddoomiyaha xisbiga Shariif Sheekh Axmed ee Himilo Qaran, ayada oo Shariifna laga yaabo inuu hadlo kadib marka ay dhammaadaan wada-hadallada uu la leeyahay dowladda.

Caasimada Online
Xafiiska Muqdisho
[email protected]

Muqdisho (Caasimadda Online) – Magaalada Muqdisho waxaa ka socda qaban qaabada kulan deg deg ah oo ay yeelanayaan madaxweynayaashii hore ee Soomaaliya iyo qaar ka tirsan asxaabta siyaasadda.

Saacadaha soo socdo ayaa la filayaa in madaxweynihii hore ee Soomaaliya Xasan Shiikh Maxamuud iyo xubno ka tirsan Xisbiyada siyaasadda ay gurigiisa ku booqdaan Shiikh Shariif oo Maanta la saaray xayiraad ku aadan inuu aado Magaalada Kismaayo.

Kulankaan dhici doono ayaa la filayaa in madaxweynayaashii hore iyo Xisbiyada Siyaasadda ay uga hadlaan Xaaladda uu dalka hadda ku jiro iyo caburinta ay Dowladda Federaalka ku heyso Siyaasiyiinta kasoo horjeedo.

Is wareysi kadib kulankaan ayaa la filayaa in laga soo saaro war murtiyeed ku aadan qaabkii Maanta loola dhaqmay Madaxweynihii hore ee Soomaaliya Shiikh Shariif Shiikh Axmed.

Hey’adda duulista Rayidka Soomaaliyeed SCAA ayaa soo saartay amar ah in Shirkad kasta oo u duuleysa Kismaayo inay soo weydiisato Xafiiska Hey’adda fasax duulimaad 24 saac ka hor.

Hay’adda ayaa ka dalbatay Diyaaraddaha aadaya Kismaayo inay soo weydiisato Xafiiska Hey’adda fasax duulimaad 24 saac ka hor, sidaas darteed waxaa lagu wargeliyay shirkad kasta fasaxii ay ugu duuli laheyd Kismaayo, si aan looga joojin duulimaadka.

Caasimada Online
Xafiiska Muqdisho
[email protected]