Baladweyne ( Caasimada Online) – Magaalada Baladweyne ee xarunta gobalka Hiiraan waxaa maanta oo Khamiis ah ka dhacay dibadbax lagu taageerayo qorshe la doonayo in maamul goboleed loogu sameeyo gobollada Hiiraan iyo Shabeellaha Dhexe.

Dibadbaxa oo ay soo qabanqaabiyeen ururrada bulshada rayidka ah ee magaalada Beledweyne ayaa waxaa ka qeyb-galay boqollaal qof oo isugu jiray dhallinyaro, haween, odayaal dhaqameed iyo siyaasiyiin ka soo jeeda gobolka Hiiraan.

Guddoomiyaha odayaasha dhaqanka gobolka Hiiraan, Xaaji Xasan Kulmiye Waasuge oo ka hadlay dibadbaxa ayaa sheegay inay taageerayaan qorshaha maamul u sameynta labada gobol, oo ay hormuud ka tahay dowladda federaalka Soomaaliya.

Xaaji Xasan ayaa uga digay dowladda inay gobolka u soo magacowdo shakhsiyaad aanan ku imaan rabitaanka dadweynaha gobolka.

Wuxuu u jeediyay dowladda inay shacabka ku dhaqan gobollada maamulka loo sameynayo u madax-banneyso inay ka tashadaan aayahooda, isagoo dhinaca kale muujiyay inay oggol yihiin in maamul loo dhan yahay loo sameeyo labada gobol.

Caasimada Online

Xafiiska Wararka Muqdisho

[email protected]

Qofki runta aanan ku dhaqmin Been ayaa u qarsoon, waxaan aad ugu xumahay in Xasan Shiikh Muqdisho kaga tago Odayaashii iyo Siyaasiyiintii ka soo jeeday Jubba, halka uu u hogaansamay Jabhadii Raaskambooni.

Waxaan aad ugu xumahay in Maamulka Puntland lagu casuumo Siyaasad aysan shaqo ku laheyn balse ay ka tahay mida ku shideeysa dabka Gobolada Jubbooyinka iyada oo ku raadineeyso isirwadaag aanan jirin.

Taariikhda ayey galeeysaa waxa Xasan ku kalifay in uu u hogaansamo Axmed Madoobe oo aan ognahay in uu ka yimid Walwaal iyo Wardheer halka dadkii degenaa gobolka laga dhigay kuwa Qaxooti ku ah Muqdisho iyo gobolada kale ee Dalka.

Waxaan isweeydiiyad Axmed Madoobe ma Damjadiid ayuu noqday, xaqiiqdii waa sidaa, sow lama dhihi karo Damjadiid ayaa ku shiraaya Kismaanyo?

Shacabka Soomaali aad ayuu u soo dhaweeynayaa soo celinta nabada Muqdisho, aad ayaan ugu faraxsanahay, balse waxaan aad ugu xunahay sida ay siyaasada u socoto oo ah mid horseedi doonta xasiloonidari, sabbabta oo ah haddii nabad lagashaqeeynaayo waxaa qumaneeyd in shacuubta degani Jubbooyinka ay qeyb ka ahaadaan dib u heshiisiinta hada laga bilaabay Kismaayo.

Maxey dhali doontaa Bay? Welise ma fool-diin ayeey ku jirtaa?  

Fool-diinka (inta aan la dhalin ayaa waxaa yimaada xanun marna taga marna xanuuniya qofka) – Waa qaska ka socda Bay.

Nunow waa uu diiday in uu ku biiro Damja-diid, waa uu diiday in uu Jeebabka buuxsado, reer Bay waa ay diideen Damja-diid hadafka guracan ee: Weybi oo xukun.

Xaqiiqdii waxaa ay dowlada diidan tahay rabitaanka shacabka iyada oo aay doorbiday in ay gacanta ku rimiso dhismaha Saddex Gobol, halka indhaha laga qabsanaayo in Lixda Gobol ay tahay xal abuurikara midnimada Soomaaliya iyo wadajirka.

Waxaan aad u taageerayaa sida shacabka Bay ugu soo banaanbaxeen kuna diideen in qowmiyada Digil & Mirfle lagu kala qeybiyo Jubba iyo Koonfur galbeed, waxaan aad ugu dhiiragelinaayaa in ay maalin iyo habeen wadaan mudaaharaadka caalamkana u soo bandhigaan in dowlada federaalka dhagaha ka fureeysatay shacabka degan dhulkaa.

waxaan aad u jeclahay in aad darbiyada Gobolka Bay ku qortaan ninwalba oo caado-qaate ah magaciisa  si umada aay u arkaan taarikhda mugdiga ah oo aay rabaan in aay u horseedaan Digil & Mirifle, Jawaari waxaa quman in uu garawsado shacabka rabitaankooda haddii kale waxuu gali doonaa liiska mugdiga.

W/Q Dr. Cali A. Hirabe
Dr. Hiraabe waxaa kala xiriiri kartaa: [email protected]

Afeef: Aragtida qoraalkan waxa ay ku gaar tahay qoraaga ku saxiixan kamana tarjumeyso tan Caasimada Online.

Xilli lagu wado in Sabtida soo socoto uu furmo fadhigii 5-aad ee Baarlamaanka Somaliya, ayaa waxaa Magaalada Muqdisho ka soconaayo diyaarinta mooshinkii ka dhan ah Ra’iisal Wasaaraha Xukuumada Federalka ee Somaliya Dr. C/weli Sheekh Axmed Maxamed.

Madaxweynaha Somaliya Xasan Sheekh Maxamuud, ayaa 17-kii bishii Janaayo ee sanadkaan soo magacaabay Ra’iisal Wasaare C/weli Sheekh Axmed, ka gadaal markii 2-dii bishii December uu Baarlamaanku kalsoonida kala laabtay Ra’iisal Wasaarihii hore ee Somaliya Dr. Cabdi Faarax Shirdoon (Saacid).

Xildhibaanada Baarlamaanka ee ku sugan Magaalada Muqdisho, ayaa waxay xilligaan ku hawlan yihiin diyaarinta mooshinka ka dhanka ah Ra’iisal Wasaaraha, ka dib markii uu mugdi soo kala dhex galay isaga iyo Madaxweynaha.

Madaxweynuhu wuxuu dhabarka ka riixayaa mooshinka laga diyaarinaayo Wasiirka 1-aad ee Xukuumada, xilli loo arkay in uu caqabad ku yahay saxibada Madaxweyne Xasan Sheekh Maxamuud iyo in uu xil ka qaadista ku bilaabay.

Hoteelada Magaalada Muqdisho, ayaa waxaa ka soconaayo shirar gaar gaar ah oo ay ku yeelanayaan Xildhibaanada Baarlamaanka, iyagoo markaasi ka arrinsanaaya mooshinka cusub ee lagu wado, inay u gudbiyaan Guddoonka Baarlamaanka Somaliya.

Sidoo kale waxaa soo badanaaya mashquulka xoogga badan leh ee ka jira Bankiga Dhexe ee Somaliya, kaa oo aad arkeyso in lacagaha looga qaadanaayo waraaqaha ay ku saxiixan yihiin masuuliyiinta ku dhow dhow Madaxweynaha. Waxaana lacagahaan lagu iibsanayaa Xildhibaanada ku sugan Caasimada, si ay u taageeraan rabitaanka garabka Madaxweynaha.

Mooshinka laga diyaarinaayo Ra’iisal Wasaaraha, ayaa waxaa qayb ka noqon doono eedeymaha ah, in Xukuumaduusi ay tahay mid tiro badan, oo aan wax qabad badan lahayn, inaanay horu-socod muuqdo samayn mudadii ay jirtay iyo inaanay dhisin kaabayaasha dhaqaalaha ee dalka.

Sarkaal ka tirsan Madaxtooyada Somaliya, ayaa sheegay in dhaqaalihii lagu ridi lahaa Ra’iisal Wasaaraha, ay durbaba gacanta ku dhigeen ragga ku dhow dhow Madaxweynaha ee ka tirsan Xukuumada C/weli.

Sarkaalkaan, ayaa tilmaamay in dalalka Kuwait iyo Qatar ay ka jawaabeen codsi kaga yimid xubnaha ku dhow dhow Madaxweynaha, oo ahaa in laga gacan-siiyo sidii daaqada looga saari lahaa Ra’iisal Wasaare C/weli Sheekh Axmed.

Xildhibaanada Baarlamaanka ee joogga Magaalada Muqdisho, ayaa u yeeraaya saxibadooda kale ee ku sugan Magaalada Nairobi iyo dalalka kale ee dibadda, si ay u yimaadaan Magaalada Muqdisho, qaybna uga noqdaan tallaabada xafiiska looga eryaayo Ra’iisal Wasaaraha.

Marka laga soo taggo Xildhibaanada u gurbinaysa garabka Madaxweyne Xasan Sheekh, ayaa waxaa dhanka kale jira tiro Xildhibaano ah oo taageersan Ra’iisal Wasaaraha Xukuumada Federalka ee Somaliya. Iyadoo uu xalay beeniyay in uu khilaaf kala dhaxeeyo Madaxweynaha Somaliya, mar uu la kulmay Somalida England.

Kolka laga soo taggo hadalka ka soo yeeray Ra’iisal Wasaaraha, ayaa waxay hadana Madaxtooyada Somaliya kuu xaqiijineysaa in xurgufi ay ka dhex tolan tahay Madaxweynaha iyo Wasiirka 1-aad ee Xukuumada Somaliya Dr. C/weli Sheekh Axmed.

Iyadoo ay shaqo adag xilligaan hortaal Baarlamaanka Somaliya, ayaa waxaa dhinaca kale kuu muuqaneyso inaanay si sax ah ugu adeeggin ummadaan dhiban, iyagoo hadba la safta garabyada Dowladda ee is haaya, dhinacii dhaqaalo bata.

Arrinta la xiriirta in shaqada laga eryo hogaanka Xukuumada, ayaa waxay sababi kareysaa in aynaan dalku ka dhicin wax doorasho ah sanadka 2016-ka, waxaana markaasi loo baahan doonaa in muddo laba sano ah uu xilka ku darsado Madaxweynaha. Wuxuuna horey Xafiiska Madaxweynuhu u diyaariyay qorshe uu muddo laba sano ah uu xilka isugu cabeynaayo.

Haddii Xildhibaanada Baarlamaanka ay ku guuleystaan ridada Ra’iisal Wasaare C/weli, ayaa waxa uu noqonayaa Ra’iisal Wasaarihii labaad oo shaqada laga eryo, wax ka yar muddo hal sano ah.

Si kastaba ha-ahaatee lama garanaayo waxa ay dunidu kaga jawaabi doonto khilaafka Madaxda Dowladda, ee sababa in xilka laga xayuubiyo Wasiirada 1-aad ee Xukuumadaha Somaliya yeelato.

Isha: Dhacdo.com

Nairobi (Caasimada Online)-Danjiraha Somalia uga wakiilka ah dalka Kenya, Ambassador Mohamed Ali Ameriko ayaa hadalkaasi ku sheegay Wareysi Khaas ah oo uu siiyey Wargeyska the Star ee ka soo baxa magaalladda Nairobi, wuxuuna xusay inaysan Dowladda Federalka marnaba qaadicin Shirarka looga xaajoonayo hakadka ku yimid dadaalka dib loogu soo celinayo ugu yaraan 500,000 oo Qaxooti Somali ku sugan Xeryaha Qaxootiga ee W/bari Kenya.

Ambassador Mohamed Ali Amerika oo haatan booqasho ku jooga dalka Kanada, ayaa sheegay in dib-u-dhaca wada hadalladaasi u sabab tahay iyadoo jihadda laga beddelay nidaamkii uu Shirka saddex-geesoodka ee Dowladaha Somalia, Kenya iyo Hay’adda UNHCR u socday.

Danjiraha waxa kaloo uu tilmaamay inay dowladda Federalka dalbatay in Shirarka Wada-xaajoodka lagu qabto magaalladda Muqdisho, inkastoo ay Wasaaradda Arrimaha Dibedda ee Kenya walaac ka muujisay xaalladda ammaanka Muqdisho.

Dhinaca kale, Danjiraha Somalia uga wakiilka ah dalka Kenya, Ambassador Mohamed Ali Ameriko waxa uu xusay in ay Dowladda Federalka iyo Hay’adda QM ugu qaabilsan arrimaha Qaxootiga “UNHCR” walaac xooggan ka qabaan ammaan-xumidda ay Qaxootiga soo laabanayo kala kulmi karaan deegaanadooda.

Ku-simaha Madaxa Waaxda Arrimaha Qaxootiga Kenya, Haaruun Komen ayaa isagana sheegay in sababao dhinaca maaliyadda u hakadeen qorshaha dib-u-soo-celinta Qaxootiga Soomaalida.

Waxa uu intaasi ku daray inay qorsheynayaan inay Qaxootiga Somalia ee iskooda ku soo laabanayo waddo nabadeed uga dhigtaan Deegaannadda Amuma, Mandheera, Liboya iyo Wajeer oo ay kaga sii gudbi karaan xuduudka Kenya la wadaagto Somalia.

Xigasho: The Star

Caasimada Online

Xafiiska Nairobi

[email protected]

Kismaayo (Caasimada Online) – Ilo-xog-Ogaal ka tirsan shaqaalaha Madaxtooyada Kismaayo, gaar ahaan kuwa khuseeya Xafiiska Hoggaamiyaha Maamulka Jubba Axmed Madoobe, ayaa inoo xaqiijiyay in Wufuudii ka kala soctay Beesha Caalamka iyo kuwa Dowlada Federaalka Somalia Boorsooyinkooda laga saarayo Xarunta Madaxtooyada Kismaayo.

Ilo wareedka ayaa xaqiijinaaya in arrintaasi ay ka danbeysay kadib markii Wufuudaasi aysan xalay gamcin hurdada, iyadoona la maqlaayay gurxanka Hubka culculus oo ku dhaceysay daafaha Madaxtooyada.

Waxaa la soo warinayaa in Arrintaasi ay keentay walaac islamarkaana wufuudii ka kala soctay Dowlada Federaalka, UNSOM, Wakiilo ka kala socday EU,Italy,Ethiopia,Jaamacada Carabta,AU iyo qaar kale ay goor dhow Alaabahooda u rarteen Garoonka Kismaayo oo la Tilmaamay inay ka amaanbadan tahay Madaxtooyada.

Wafdiga oo halkaasi u jooga ka qeybqaadashada bilowga Shirka ayaa waxaa Saakay lagu amray inay u wareegaan Garoonka oo gacanta ugu jira Ciidamada AMISOM, islamarkaana leysu haleyn karo Ammaankeeda.

Arrintaani ayaa ka danbeysay kadib markii Habeenimadii xalaya la maqlaayay Dhawaqa Rasaas iyo Madaafiic oo ku dhaceysay Nawaaxiga Madaxtooyada Maamulka KMG ah ee Jubba oo ku taalada Magaalada kismaayo.

Dhanka kale, Maamulka KMG Jubba ayaa iyaguna walaac ka muujinaaya Arrintaasi xili uu bilow yahay Shirka Dib u heshiisiinta, waxa ayna ka cabsi qabaan in howshu ay intaa kasii adkaato.

Caasimada Online

Xafiiska Kismaayo

[email protected]

Kampala (Caasimada Online)-Sida lagu soo daabacay Wargeyska The New Vision ee ka soo baxa Magaalladda Kampala,ayaa waxaa lagu qoray in Ciidamada Ammaanka Dalka Ugaanda, gaar ahaan kuwa Caasimada ay gacanta ku dhigeen Gaari nooca raaxada ah oo ay ka buuxaan walxaha qarxa.

Wargeyska ayaa qoray in Ciidamadu ay ku guuleysteen qabashada gaarigaasi xili ay ku howlanaayeen Howlgalo ay ku xaqiijinayeen Ammaanka Dalkaasi.

Sidoo kale, Qoraalka Wargeyska ayaa waxaa lagu xaqiijiyay in gaari noociisu yahay (Toyota Noah) oo lahaa Taariko Nambar laga leeyahay dalka South Sudan lagu qabtay Xaafadda Mengo Kisenyi ee magaalladda Kampala.

Qoraalka ayaa waxaa sidoo kale lagu sheegay in Boliska qabteen nin Somali lagu tuhunsan yahay inuu lahaa gaariga, kaasi oo magaciisa lagu sheegay Aadan Garaar.

Boliska ayaa gacanta ku dhigay ugu yaraan  25-qof oo Soomaali ah oo lagu tuhunsan yahay inay ku lug lahaayeen waxyaabo qarxa oo Boliska sheegeen inay ka soo helaan Xaafad ay Soomaalida ka deggan tahay magaalladda Kampala.

Dhanka kale, Soomaalida ku nool Magaalada Kampala ayaa iyagu xiligaani ku jira kala carar salka ku haaya Tuhunada Argagixisnimo ee kaga imaanaya dhanka Sirdoonka Ugandha, iyadoona dadka loo qabtay gaariga ay yihiin Soomaali.

Caasimada Online

Xafiiska Kampala

[email protected]

Kismaayo (Caasimada Online) – Guddoomiyaha golaha nabadda iyo midnimada Jubbooyinka, Barre Aadan Shire ayaa faah-faahiyay sababta uu ku qaadacay shirka dib u heshiisiinta ee Jubbooyinka oo maalintii labaad ka socda magaalada Kismaayo ee xarunta gobalka Jubbada Hoose.

Isagoo la hadlaayay Idaacadda VOA-da ayuu sheegay in shirka ka furmay Kismaayo uusan ahayn kii loo sheegay in uu ka qeybgalaayo, wuxuuna sababta ku sheegay in lagu wargaliyay shirka dib u heshiisiinta Jubbooyinka 1-da bisha October.

Barre Hiiraale waxa uu tilmaamay in guddiga wasiiradda ee loo xil saaray qabashada shirkan ay ku wargaliyeen isaga iyo golaha uu madaxda yahay billowga bisha soo socota isagoona intaas ku daray in maalin iyadoo uu ka dhimman yahay shirka maanta ka furan yahay loogu yeeray madaxtooyada oo madaxweynaha uu ku yiri waxaan rabnaa in aad tagto Kismaayo oo aad ka qeybgasho shirka.

Wuxuu u sheegay madaxweynaha in shirka furmay uusan ahayn kii lagu ballamay isla markaana uusan ahayn shir ay garwadeen ka tahay dowladda oo waxaa wata ayuu yiri maamulka Axmed Madoobe.

Barre Hiiraale ayaa la weydiiyay mar haddiiba uu oggolaaday in uu qaato nabadda wax yaabaha uu ku diiddan yahay shirka ka furmay Kismaayo, wuxuu tilmaamay in shirka Kismaayo uu yahay mid gaar u ah maamulka Axmed Madoobe iyagana dhaqaalaha iyo ergada ka qeybgaleysa ay soo xuleen.

Mar uu ka hadlaayay shirka uu doonayo in uu ka qeybgalo, wuxuu tilmamaay in ay rabeen isaga iyo maamulkiisa shir ay garwadeen ka tahay dowladda oo dhaqaalaha iyo soo xulista ergada ay lee dahay si caddaalad ahna loo maamulo shirka.

Wasiirkii hore ee gaashandhigga Soomaaliya, ayaa ku celceliyay in ay diyaar u yihiin ka qeybgalka shirka dib u heshiisiinta balse dadka taageerada u ah ee ku sugan, Gedo, Kismaayo, Muqdisho iyo waddamada qurbaha lagu wargaliyay in la qabanaayo shirka dib u heshiisiinta Jubbooyinka 1-da bisha October ka horse iyagu ay yeeshaan shirar iyo kulamo ay uga hadlayaan wax yaabaha la tagi lahaayeen shirka Kismaayo.

Ugu dambeen, Barre Hiiraale ayaa sheegay in dowladda ay ka sugayaan bal in markooda ay shir u qabato si la mid ah kan maanta ka dhacay Kismaayo oo uu ku tilmaamay mid loo qabtay maamulka Axmed Madoobe.

Caasimada Online

Xafiiska Wararka Muqdisho

[email protected]

Britain (Caasimada Online)-Ra’iisul Wasaaraha Jamhuuriyada Federaalka Somalia C/wali Sheekh Axmed Maxamed oo arrimo shaqo u jooga Dalka Britain, ayaa daboolka ka qaaday Arrimo la xiriira Khilaafka la sheegay inuu kala dhexeeyo Madaxweyne Xassan.

C/wali Sheekh Axmed Maxamed oo ka hadlaayay arintaasi ayaa sheegay inay tahay mid been abuur ah oo aan sal iyo baar ku laheyn Siyaasada dhabta ah ee ka taagan Madaxtooyada iyo xafiisyada labada Mas’uul.

Waxa uu sheegay inuu si adag u beeninaayo warar lagu qoray baraha Website-yada, kaasi oo ahaa inuu khilaaf ka dhex tagan yahay Ra’iisul Wasaaraha iyo Madaxweyne Xasan Sheekh Maxamuud.

Ra’isul wasaaraha ayaa hadalkaani sheegay xili uu ka hadlaayay kulan uu la qaatay Jaliyada Soomaalida ee dalka Britain, waxa uuna tilmaamay in wararka noocaasi ah ay yihiin kuwa been abuur ah oo ay baahiyeen websiteyada.

Sidoo kale, R/w C/wali Sheekh oo hadalkiisa sii watay ayaa waxa uu sheegay in xiligaani la joogo uu  hanaanka Dowladnimo dalka Soomaaliya yahay mid si wanaagsan u socda, Shacabka Soomaaliyeed ee dibada ku sugana ay iska daayaan aqrinta wararka lagu qoro Websiteyada Been abuurka ah.

Dhanka kale, waxa uu Carabka ku dhuftay in xili waliba ay suuragal tahay inay dhacaan Siyaasado keeni kara kala feker duwanaansho, maadaama dadka aysan isku maan aheyn, balse ay muhiim tahay hadafka mar waliba laga wada duulaayo uu yahay muujinta wanaaga dalka iyo dadka.

Caasimada Online

Xafiiska Britain

[email protected]

Shirka lagu balansanaa in loo qabto Kooxihii isku khilaafsanaa Maamulka KMG ah ee Juba oo ay gar wadeenka ka aheyd xukuumada Soomaaliya xubno kamid ah, xubnahaas oo uu hogaaminayey Wasiirka Arimaha Gudaha Abdullahi Godax Bare si hordhac ahna heshiis loogu gaaray, heshiiskaas oo qodobadiisu kamid ahaayeen in shir dib u heshiisiin iyo dhamaysir Maamul loo qabto Kooxda Ahmed Madoobe hogaamiyo oo fadhigoodu yahay Kismaayo iyo Kooxda Col Bare Aden Shire “ Col Bare Hiiraale” oo fadhigoodu ahaa Tuulada Goobweyn, kooxdaan oo diidaneyd MKG Juba ee uu Hogaamiyo Ahmed Madoobe.

Heshiiskaas oo ahaa heshiiskii Col Bare Hiiraale loogu soo waday Magaalada Muqdisho, Ciidamadii uu hogaaminayay lagu geeyay Magaalada Kismaayo, Heshiiskaa ayaa qodobadiisu qorayeen in labada ciidan amniga magaalada ka wada qeyb qaataan inta shirka laga qabanayo iyo waqtiga ka horeeya.

Heshiiskaan ay garwadeenka ka aheyd Xukkumada ayaa la sheegayaa inuu kusoo aaday xili Raisul wasaare Abdiweli uu u anbabaxay shir looga hadlayo Amaanka Soomaaliya iyo sidii dib loogu dhisi lahaa ciidanka Xooga Dalka Soomaaliya, shirkaas oo ka dhacaya dalka Britain (UK), Warar laga helay dad ku dhow xafiiska Raisul Wasaare Abdiweli ayaa sheegaya in RW Abdiweli faray wasiirka arimaha gudaha in shirka dib loo dhiga ilaa 1-da October 2014 si Raisul wasaaraha iyo Wasiiradda kale ee shaqada ku maqan ugu suuragasho inay goob jog ahaadaan xiliga shirku u furmayo labada Kooxood. Wasiirka Arimaha Gudaha Abdullahi Godax Bare ayaa la sheegayaa inuu ku wargeliyey Labada kooxood-ba dib u dhaca shirka iyo xiliga loo qabtay in shirku furmo oo ah 1-da October 2014.

Kooxda Ahmed Madoobe oo aan daneyneynin dib u heshiisiin loo sameeyo iyaga iyo Kooxda Col Barre, aadna u doonaysa in Raisul wasaaraha DF Soomaaliya laga dhigo Hussein Abdi Halane oo haatan ah wasiirka Maaliyada xukuumada Abdiweli oo ka faaiideysanaysa Khilaafka xargaha goostay ee u dhaxeeya Madaxweynaha iyo Raisul wasaaraha Soomaaliya ayaa la sheegayaa inay lasoo xiriireen Madaxweyne Hassan Sheikh iyo Wasiirka Maaliyadda Hussein Abdi Halane iyaga oo ka codsaday Madaxweynaha inuu Kismaayo yimaado uuna u furo shirka Dib u heshiisiinta ay sida gaarka ah u wataan kooxda Ahmed Madoobe.

Madaxweyne Hassan Sheikh oo sida la sheegay xaaladu ku xun tahay, dareemayana in awoodii iyo Maamulkii DF Soomaaliya uu gacanta u galay Raisul Wasaare Abdiweli iyo Xukuumadiisa, kana rajo dhigay inuu lasii shaqeeyo Raisul wasaare Abdiweli, haatana doonaya inuu rido RW Abdiweli kuna bedelo Siyaasiga Hussein Abdi Halane si uu garab siyaasadeed uga helo xildhibaanada Beesha Kablalax ee wata MKG ah ee Juba iyo Puntland ayaa si lama filaan ah u aqbalay qorshaha Kooxda Ahmad Madoobe sidaa daraadeedna uu Madaxweyne Hassan Sheikh u tagay Kismaayo, una furay shir labadii kooxood oo loo qaban lahaa midkood goob jog-ba ahayn.

Col Bare Hiiraale oo hogaaminaya koox kamid ah labada kooxood oo shirka dib u heshiisiinta loo qaban lahaa ayaa 15/09/2014 sheegay in Wasiirka Arimaha Gudaha Abdullahi Godax Bare kusoo wargeliyey in shirka dib loo dhigay oo uu qabsoomi doono 1-da bisha October 2014, warkaan oo uusan beenin Wasiirka Arimaha gudaha Abdullahi Godax Bare.

Isku soo wada duube hadii aysan xukuumadda Soomaaliya ee uu gudoomiyo RW Abdiweli ka hadlin shirka qabyada ah oo ay furatay Koox kamid ah labadii kooxood oo isku khilaafsanaa MKG ah ee Juba ayaa arinta ka dhigaysa in heshiiskii ay goobjooga ka ahaayeen IGAD, UNSOM oo ay garwadeenka-na ka ahayd Xukuumadda RW Abdiweli ee uu Shir gudoominayeen xubnihii Golaha Wasiirada ee kala ahaa Wasiirka Arimaha Gudaha Mudane Abdullahi Godax Bare, Wasiirka Dastuurka Garsoorka iyo Cadaalada Md. Farah Abdulkadir iyo Wasiirka Maaliyada Dr Hussein Abdi Halane inuu gebi ahaanba ahaa mid lagu qiyaamayey Koocda Col Bare Hiiraale, Ujeedka laga lahaana uu ahaa kaliya uu ahaa in Col Bare Hiiraale laga soo bixiyo Tuulada Goobweyn oo dacalka ku haysa Kismaayo lana keeno Magaalada Muqdisho iyo in Ciidanka Col Bare Hiiraale la geeyo Kismaayo hubkana laga dhigo . Aimaha Noocaan oo kale ah iyo is jiid jiidka Madaxda Dawladda iyo indha ka laabashada beesha caalamka ayaa shacabka Soomaaliyeed gelinaya niyad jab iyo sida aan dawladnimada Soomaaliya loogu dooneyn inay caga dhigato.