Muqdisho (Caasimada Online) – Qarax xooggan ayaa goordhow ka dhacay magaalada Muqdisho ee caasimadda Soomaaliya.

Dhawaaqa jugta qaraxa ayaa waxaa si weyn looga maqlay qeybo kamid ah caasimadda ee magaalada Muqdisho, ayada oo cirka isku shareertay uuro.

Qaraxa oo jugtiisa cusleyd ayaa waxaa la sheegay inuu ka dhacay degmada Xamarweyne, mana cadda weli nooca uu ahaa iyo khasaaraha ka dhashay.

Sidoo kale lama xaqiijin weli cidda lala beegsaday qaraxaas oo sida aan xog hordhac ku helnay uu ka dhacay aagga City Mall ee degmada Xamarweyne.

Qaraxan ayaa imanaya xilli muddooyinkii dambe uu soo hagaagayo amniga Muqdisho, kadib howl-galo isdaba joog ah ay ciidamada kala duwan ee amaanka ay ka sameynayeen caasimadda.

Wixii ka soo kordha iyo faah-faahinta qaraxaan kala soco Caasimada Online.

Muqdisho (Caasimada Online) – Xafiiska Xeer-Ilaaliyaha Guud ee Qaranka ayaa shaaciyay inuu gacanta ku hayo baarista kiis xasaasi ah oo la xiriira haweenay dil, dhaawac culus iyo jirdil u geysatay laba carruur ah.

Haweenaydaas oo la horgeeyay maxkamadda gobolka Banaadir ayaa waxa uu xafiiska Xeer Ilaaliyaha Guud uu sheegay inay magaalada Muqdisho ugu geysatay dil iyo jirdil wiil yar oo 3 sano jir ah.

Sidoo kale waxay haweenaydan dhaawac halis ah u geysatay gabar yar oo 7 sano jir ah, waxaana carruurtan dhalay seyga eedeysanadda oo isagu ka maqan dalka, sida uu xafiiska Xeer Ilaaliyaha Guud ee Qaranka ku sheegay war-saxaafadeed uu soo saaray.

“Fal-dembiyaadkaas oo baaristiisa uu gacanta ku hayo Xafiiska Xeer Ilaaliyaha Guud ee Qaranka ayaa marka ay natiijada baaristiisu soo dhamaato u gudbin doonaa Maxkamadda awoodda u leh,” ayaa lagu yiri war-saxaafadeedka.

Xafiiska ayaa sidoo kale wuxuu uga digay waalidiinta dayaca masuuliyadda ka saaran carruurtooda.

Xeer Ilaaliyaha Guud ee Qaranka ayaa waxa kale oo uu sheegay inuu had iyo goor u taagan yahay difaaca iyo dhowrista xuquuqda dadka nugul oo ay carruurtu kamid yihiin, si waafaqsan qodobka 8-aad XNG.

Ugu dambeyntiina waxa uu xafiiska Xeer Ilaaliyaha Guud ee Qaranka ku booriyay bulshada Soomaaliyeed inay lasoo wadaagan xad-gudubyada ka dhanka ah carruurta iyo guud ahaan dadka nugul.

Garoowe (Caasimada Online) – Dowlad-goboleedka Puntland ayaa ku eedeysay madaxweynaha Soomaaliya Xasan Sheekh Maxamuud inuu ka dambeeyo weerarkii xalay ka dhacay magaalada Garoowe.

Weerarkan ay Puntland ku eedeysay madaxweyne Xasan Sheekh ayaa waxaa lagu qaaday ciidamo galbinayay sanaadiiqda doorashada, xilli ay marayeen agagaarka garoonka diyaaradaha Garoowe, xilli ay kasii dartay xiisadda ka dhalatay khilaafka doorashooyinka.

Cabdi Faarax Siciid Juxa oo la hadlay warbaahinta ayaa waxa uu sheegay in weerarkan uu madaxweyne Xasan uga wakiil ahaa ergeygiisa, Khadar Cabdiraxmaan Faroole, oo ah wiilka uu dhalay madaxweynihii hore ee Puntland.

“Ergeyga Xasan Sheekh Maxamuud ee arimaha dhaqaalaha Khadar Cabdiraxmaan Faroole ayaa abaabuley weerarkii xalay lagu qaaday sanaaduuqda doorashada, qiyaamihii Xasan Sheekh uu sheegayey wuxuu ahaa mid isagu uu abaabulayo,” ayuu yiri wasiirka arrimaha gudaha Puntland.

Juxa ayaa waxa uu sheegay in weerarkas lagu dilay laba askari oo ka tirsan ciidanka, “Weerarka waxaa laga soo abaabulay guriga Khadar Faroole.”

“Doorashada Puntland way dhacaysaa, waa doorasho degaan oo afar boqol oo kun in ka badan ayaa isu diiwaan-galisay. Afar qof oo isku jifi ah oo magaalada Garowe joogta go’aankeeda ma gaari karto,” ayuu hadalkiisa sii raaciyay wasiir Juxa.

Sidoo kale waxa uu nasiib darro ku tilmaamay in garoonka diyaaradaha Garowe uu maanta xiran yahay, kadib markii maleeshiyaadka weerarka geysatay ay hub waaweyn la hortaagan tahay garoonka.

“Wax ay noqon karaan oo jabhad aheyn oo shufto aheyn ma garan karo. Ciidamada Puntland waa is difaaceen qalabkana waa gudbiyeen, waana is xakameeyen sida dhacday,” ayuu yiri wasiir Juxa oo sheegay in ciidamada qalabka doorashada waday ay dhankooda ka baaqsadeen in khasaaraha uu sii bato.

Wasiirka ayaa ugu dambeyntiina waxa uu sheegay in maamulka Puntland uu diyaar u yahay inuu la hadlo cidkasta oo tabasho ka qabta hanaanka doorashada, hase yeeshe ay halkaas uga hari doonin waxa dhacay ee lala xisaabtami doono kuwa ka dambeeyay qalalaasaha Garoowe.

Dagaalkan ayaa waxaa xalay isku fara saaray ciidamo galbinayay agabka doorashada goleyaasha deegaanka iyo ciidamo taageersan siyaasiyiinta mucaaradka Puntland, ayaa waxaa la’isku adeegsaday hubka noocyadiisa kala duwan, waxaana sidoo kale uu sababay dhimasho iyo dhaawac labada dhinac ah.

Dagaalkan ayaa kusoo aaday saacado uun kaddib markii siyaasiyiinta mucaaradka Puntland ay soo saareen bayaan ka dhan ah doorashada, kuna dhaliileen madaxweyne Saciid Deni.

Madasha Siyaasadda Puntland ayaa shaaca ka qaaday in qaabka loo wado doorashada ay horseedayso xasilooni darro, ayaga oo dhaliil xoogan u jeediyay hoggaanka Puntland.

Si kastaba, doorashada goleyaasha deegaanka ee dowlad goboleedka Puntland oo qof iyo cod ayaa loo ballansan yahay 25 ka bishaan May ee 2023-ka, waxaase sii xoogeysanaya khilaafka ka dhashay doorashadan oo hadda sababay dagaal u dhexeeyo labada dhinac.

Muqdisho (Caasimada Online) – Hooyo Soomaaliyeed oo lagu magacaabo Farxiyo Xuseen Cali ayaa xalay afar carruur ah oo mataano ah ku dhashay magaalada Muqdisho ee caasimadda dalka.

Mataanahaan oo Hooyo Farxiyo ay ku dhashay Isbitaalka Hooyada iyo Dhallaanka ee Banaadir ayaa dhammaantooda wada ah gabdho, waxayna dhasheen iyaga oo caafimaad qaba.

Hooyo Farxiyo ayaa iyaduna si lamid ah caafimaad qabta. Hooyadan ayaa la sheegay inay deganeyd deegaanka Oodweyne oo ka tirsan degmada Deyniile ee gobolka Banaadir.

Waxay todobado sano ka hor ka timid gobolka Hiiraan gaar ahaan degmada Jalalaqsi, sida uu sheegay agaasimaha Isbitaalka Hooyada iyo dhallaanka ee Banaadir Fartuun Shariif Maxamed.

Agaasimaha oo bulshada la wadaagay xogta Hooyada iyo caruurteeda ayaa shacabka Soomaaliyeed ka codsatay in la garab istaago carruurta iyo waalidkooda.

Telefishanka Qaranka Soomaaliyeed (SNTV) oo booqday ayaa sidoo kale warbixin ka diyaariyay Hooyo Farxiyo iyo Mataanahaan ay xalay ku dhashay Isbitaalka Hooyadda iyo Dhallaanka ee Banaadir, iyada oo halkaas uu kula hadlay aabaha dhalay carruurtan.

“Ilaahay ayaa nagu deeqay, isbitaalkana aad buu noo caawiyay. Isbitaalka toban habeen ayaa ku jirnay, Hooyaddana waa fiican tahay xaaladeeda caafimaad,” ayuu yiri Yaxye Shire oo ah aabaha dhalay mataanahaan ku dhashay Isbitaalka Banaadir.

Sidaan oo kale dhammaadka bishii March ee isla sanadkaan ayey ahayd markii sidaan oo kale Hooyo Maryan Maxamed Xasan ay ku dhashay afar carruur ah Isbitaalka Banaadir ee magaalada Muqdisho.

Hooyo Maryan oo aheyd 38 sano jir, ayaa markaas ka timid miyiga degmada Cadale ee gobolka Shabeellada Dhexe, iyada oo xilligaasi maamulka isbitaalka iyo wasiirka caafimaadka oo booqday markaas ay xaqiijiyeen in markii ugu horeysay ay arkeen kiis noocaan ah.

Hoos ka daawo muuqaalka

Laascaanood (Caasimada Online) – SSC-Khaatumo ayaa ka hadashay dagaalka saaka dib uga qarxay duleedka magaalada Laascaanood, kaasi oo u dhaxeeyay ciidamada Somaliland iyo kuwa deegaanka ee SSC.

War-saxaafadeed kasoo baxay SSC-Khaatumo ayaa waxaa lagu sheegay in ciidamada deegaanka ay iska caabiyeen laba weerar oo ciidamada Somaliland ay kusoo qaadeen deegaanka Dhabansaar ee duleedka Tuulo-Samakaab iyo bariga magaalada Laascaanood.

“Waxaa barqanimadii maanta Ciidamada malayshiyada Somaliland ay labo weerar ku soo qaadeen deegaanka Dhabansaar ee duleedka Tuulo-Samakaab iyo bariga magaalada Laascaanood, iyaga oo dharbaaxo iskacaabbin ah oo kulul kala kulmay Ciidamada xaq-u-dirirka ah ee difaaca shacabka SSC.”

SSC ayaa sidoo kale waxay sheegtay in maalmihii dambe ay Somaliland qorsheynayso ka daba-taga shacabkii hore uga qaxay madaafiicda ay ku garaacayaan magaalada Laascaanood ee gobolka Sool, sida lagu yiri qoraalka kasoo baxay.

“Dhinaca Dhabansaar, maalmihii ugu dambeeyey Malayshiyada Somaliland waxay ku aruurinayeen ciidamo qorshohoodu ahaa in ay kaga dabotagaan shacabkii hore uga qaxay madaafiicda ay ku garaacayaan magaalada Laascaanood.”

“Iyada oo uu dagaalka ay isku difaacayaan shacabka deegaanku uu weli ka socdo duleedka Samakaab, waxaana jab xooggan halkaas lagu gaarsiiyey ciidamada malayshiyada Somaliland,” ayaa sidoo kale lagu yiri qoraalka SSC.

SSC ayaa ugu dambeyntiina sheegtay in shacabka deegaanka SSC ay wacad ku mareen inay dalkooda ka sifeeyaan maleeshiyada duulaanka ku ah, oo ula jeedo ciidamada Somaliland.

“Dhinaca duleedka bariga Laascaanood ayaa waxaa ka socda dagaal ka dib markii ay weerar soo qaadeen malayshiyada Somaliland, ciidamada shacabka deegaanka ayaa weerarka caabbiyey welina dagaal qadhaadh ayaa aagaa ka socda.”

Dagaalkan saaka dib uga qarxay xarunta gobolka Sool ayaa imanaya xilli muddooyinkii u dambeeyay xaaladda Laascaanood ayaa ahayd mid deggan, inkastq oo mas’uuliyiinta labada dhinac ay hanjabaadyo isku marinayeen warbaahinta.

Muqdisho (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta magacaabay La-taliyaha cusub ee dhanka Xakameynta Qul-qulka Hubka Sharci darrada ah ee Soomaaliya.

Madaxweynaha ayaa xilkaan u magacaabay Marwo Mako Maxamuud Muuse, sida lagu sheegay wareegto kasoo baxay xafiiska Madaxweynaha, oo lagu baahiyay bogga Villa Somalia.

Xasan Sheekh ayaa waxa uu tilmaamay in tallaabadani ay qeyb ka tahay qorshaha Qaran ee dalkeenna lagaga dulqaadayo cuna-qabateynta hubka ee saaraan, maadama ay muhiim tahay in la xaqiijiyo in hubka aanu galayn gacan aan ahayn tan sharciga iyo dowladnimada.

Madaxweynaha ayaa Alle uga baryey La-taliyaha cusub ee xakameynta qul-qulka hubka sharci darrada ah Marwo Mako Maxamuud Xuseen inuu u fududeeyo masuuliyadda culus ee loo igmaday, waxa uuna kula dardaarmay in ay si hufan oo daacadnimo leh ugu adeegto Qaranka.

Magacaabistan ayaa imaneysa xilli dowladda federaalka Soomaaliya ay taageero horleh u heshay qaadista cuna-qabateynta hubka ee saaran, kadib shir-madaxeedkii daba-yaaqadda bishii hore ka dhacay magaalada Kampala ee dalka Uganda, kaasi oo ay ka qeyb-galeen madaxda dalalka ciidamadu ka joogaan Soomaaliya.

Bayaan kasoo baxay shirkaas ayaa waxaa lagu taageeray qorshaheeda qaadista cunaqabateynta hubka ee Qaramada Midoobey, iyada oo madaxda ka qeyb-gashay shirkaas ay dalbadeen in la qaado cuna-qabateynta hubka, islamarkaana la dhaqan-geliyo qorshaha kala guurka ee Soomaaliya si loo helo Soomaaliya nabad ah.

Madaxda waddamada ciidamadu ka joogaan Soomaaliya ayaa ugu baaqay Golaha Ammaanka ee Qaramada Midoobay inuu tix-geliyo in Soomaaliya laga qaado cuna-qabaeaynta hubka, si waddanku uu awood ugu helo qaadista mas’uuliyaddiisa amni.

Dowladda federaalka Soomaaliya ee uu hogaamiyo madaxweyne Xasan Sheekh ayaa muddooyinkii dambe dadaal badan galineysa sidii looga qaadi lahaa cuna-qabateynta hubka ee saaran.

Madaxweyne Xasan Sheekh ayaa hore usheegay in cuna-qabateynta hubka ee saaran Soomaaliya ay caqabad ku tahay dib-u-dhiska ciidamada iyo dadajinta dabar-goynta argagixisada, xilli uu dalka ka socda guluf dagaal oo ka dhan ah Al-Shabaab.

Golaha Ammaanka ee QM ayaa bishii Janaayo 1992-kii kusoo rogay Soomaaliya cunaqabateyn aan dhamaad lahayn kahor inta aan qeyb ahaan wax laga bedelin Febraayo 2007-dii, si loogu ogolaado sahayda hubka ee ciidamada dowladda federaalka Soomaaliya.

Beledweyne (Caasimda Online) – Warbixin dheer oo ay soo saartay hay’adda arrimaha bani’aadanimada UNOCHA ee Qaramada Midoobay ayaa waxaa looga hadlay xaaladda adag ee ka taagan  gudaha magaalada Beledweyne, kadib markii uu ku fatahay wabiga Shabelle.

Hay’adda ayaa shaaca ka qaaday in fatahaadda ay sababeen roobab mahiigaan oo todobaadkii lasoo dhaafay ka da’ay Beledweye, taas oo dhalisay khasaare xoogan.

UNOCHA waxa ay xaqiijisay in Beledweyne ay ku dhinteen ugu yaraan illaa 22 qof, kadib waxyeelo kasoo gaartay daadadka iyo biyaha qaaday xaafado ka tirsan magaaladaasi.

Sidoo kale waxa ay intaasi ku dartay inay burbureen guryo badan oo ay daganaayeen dad shacab ah, taas oo keentay inay barakacaan in ka badan 200 oo kun oo qoys.

Warbixinta UNOCHA ayaa sidoo kale lagu xusay in xaafadaha iyo waddooyinka magaalada Beledweyne ay qariyeen biyo, taasi oo saameyn ku yeelatay dad lagu qiyaasay 460,470 qof, kuwaas oo ku dhawaad 219,000 ka mid ahna ay isaga carareen guryihii ay ka deganaayeen Magaalada Baladweyne.

Dhanka kale waxa ay hay’addu tilmaamtay in fatahaadda sidoo kale ay baabi’isay dagalyo kala duwan ii beernaa dhul beeree ku yaalla gobolka Hiiraan ee bartamaha Soomaaliya.

Xaaladda Beledwene ayaa weli cakiran, waxaana hakad galay ganacsiga, waxbarashada, caafimaadka iyo isku socodka, maadaama ay biyo ay go’doomiyeen magaaladaasi.

Waxaa sidoo kale xaalad adag wajahaya qoysaska haatan ka barakacay Beledweyne, kuwaas oo aan heysan hoy, wax ay cabaan iyo wax ay cunaan intaba.

Fatahaaddaan ayaa soo laa laabta, waxayna sanad kastaa ay saameyn ku yeelataa nolosha qosaska Soomaaliyeed ee ku dhaqan deegaanada maamul goboleedka HirShabelle.

Garoowe (Caasimada Online) – Wararka naga soo gaaraya Garoowe ayaa sheegaya in ay kasii daresyo xiisadda siyaasadeed ee ka taagan magaaladaas, taas oo ka dhalatay muranka hareeyay doorashooyinka dadweyne ee la filayo inay ka dhacaan maamulkaasi.

Xiisadda ayaa lagu soo warramayaa inay haatan isku rogtay dagaal ka dhashay doorashada oo ay isku hayaan hoggaanka sare ee Puntland iyo xubnaha siyaasiyiinta mucaaradka oo ka biyo diidan hannaanka ay xukuumadda u wajaheyso doorashooyinka qof iyo codka ah.

Dagaalka oo ahaa mid kooban ayaa waxaa lagu soo warramayaa inuu ka dhacay agagaarka garoonka diyaaradaha Garowe iyo koontaroolka bari, halkaas oo ay isku fara saareen ciidamo galbinayay agabka doorashada goleyaasha deegaanka iyo ciidamo taageersan siyaasiyiinta mucaaradka Puntland oo kasoo horjeedo qabsoomida doorashooyinkaasi.

Wararka ayaa intaas ku daraya in ciidamada la dagaalamay kuwa ammaanka Puntland ay ka yimaadeen dhanka Laascaanood, waxayna xalay gudaha usoo galeen Garoowe, si ay taageero ugu muujiyaan xubnaha mucaaradka oo iyaguna shirar ka wada magaaladaasi.

Inta uu socday dagaalka ayaa waxaa la’isku adeegsaday hubka noocyadiisa kala duwan, waxaana sidoo kale uu sababay dhimasho iyo dhaawac labada dhinac ah.

Inta la xaqiijiyay waxaa dagaalkan ku dhintay ugu yaraan illaa 4 askari oo ka tirsanaa ciidamada PMPF ee maamulka goboleedka Puntland, halka ay ku dhaawacmeen 9 kale.

Xaaladda ayaa haatan ah mid kacsan, waxaana weli dhaq-dhaqaaqyo iska soo horjeedo laga dareemaya bariga magaalada Garoowe oo ah halka lagu dagaalamay.

Dagaalkan ayaa kusoo aaday saacado uun kaddib markii siyaasiyiinta mucaaradka Puntland ay soo saareen bayaan ka dhan ah doorashada, kuna dhaliileen madaxweyne Saciid Deni.

Madasha Siyaasadda Puntland ayaa shaaca ka qaaday in qaabka loo wado doorashada ay horseedayso xasilooni darro, ayaga oo dhaliil xoogan u jeediyay hoggaanka Puntland.

“Shirku wuxuu ugu baaqayaa xukuumadda Puntland in ay joojiso doorashooyinka aan heshiiska lagu ahayn oo sababi kara xasilooni darro iyo qalalaase” ayaa lagu yiri bayaanka.

Si kastaba, doorashada goleyaasha deegaanka ee dowlad goboleedka Puntland oo qof iyo cod ayaa loo ballansan yahay 25 ka bishaan May ee 2023-ka, waxaase sii xoogeysanaya khilaafka ka dhashay doorashadan oo hadda sababay dagaal u dhexeeyo labada dhinac.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Faderaalka Soomaaliya Xamza Cabdi Barre ayaa soo saaray baaq cusub oo la xiriira dagaalka kooxda Al-Shabaab ka dhanka ah ee ka socda dalka.

Mudane Xamza oo dhallinyarada Soomaaliyeed ugu hambalyeeyey maalinta 15-ka May oo ku beegneyd curashadii ururkii gobanimo doonka Soomaaliyeed ee SYL, ayaa waxa uu ugu baaqay dhalinyarada inay xoojiyaan kaalinta ay ka qaadanayaan xoreynta dalka iyo dagaalka socda.

Ra’iisul Wasaaraha ayaa sidoo kale waxa uu ka dhawaajiyay in aas-aaskii xisbigii Leegada (SYL) uu Soomaaliya u horseeday gobanimada iyo madax-bannaanida ay maanta ku faanayso, “taas oo ay dhiiggooda u hureen halyeeyo Soomaaliyeed oo u istaagay in ummadda ay ka kor qaadaan heeryada gumeystihii arxanka darnaa.”

“Dhallinyaradii ku midoowday ururka SYL ee sababta u noqday xaqiijinta rabitaankii shacabka Soomaaliyeed ee ahayd in laga dulqaado heeryadii Gumeysiga waxa ay ku sifoobeen isku duubni, waddaniyad iyo weliba in ay ka fogaadeen qabyaaladda, dhallinyaradaas waxay baal-dahab uga qoran yihiin sooyaalka taariikheed ee Soomaaliya,” ayuu yiri ra’iisul wasaare Xamza Cabdi Bare.

Ugu dambeyntiina waxa uu uga mahad-celiyey dhallinyarada Soomaaliyeed doorkooda ku aadan dowlad-dhiska dalka, isaga oo sii xoojiyay baaqa ah inay kaalin wax ku ool ah ay ka qaatan xoreynta dalka, la-dagaallanka musuq-maasuqa iyo dagaalka ka dhanka ah Al-Shabaab.

Sanad walba waxaa la xusaa maalinta dhallinyarada Soomaaliyeed, oo ku beegan aas-aaska ururkii gobanima doonka ee SYL, kaasi oo dhidibada loo taagay 15-kii May, 1943, oo aas-aastay dhallinyaro Soomaaliyeed.

Si kastaba, dagaalka Al-Shabaab ayaa tan iyo markii uu billowday waxaa laga gaaray guulo wax ku ool ah, ayada oo xilligaan uu si dardar leh uga socdo gobollada dalka, uuna dhawaan si rasmi ah u bilaaban doono wejiga labaad ee dagaalka oo qeyb ka noqonayaan ciidamo ka socda dalalka deriska.

Garoowe (Caasimada Online) – Xubnaha siyaasadda mucaaradka ee maamul goboleedka Puntland oo shirweyne ku yeeshay gudaha magaalada Garoowe ayaa soo saaray go’aanno culus oo ka dhan ah doorashooyinka dadweyne ee maamulkaasi.

Siyaasiyiintaan oo la magac baxay Madasha Siyaasadda Puntland ayaa si guud uga hadlay xaaladda siyaasadeed ee maamulkaasi oo haatan ah mid kacsan, waxayna sidoo kale ka horyimaadeen doorashooyinka golaha deegaanka ee la filayo inay ka dhacaan Puntland.

Sidoo kale siyaasiyiinta ayaa shaaca ka qaaday in qaabka loo wado doorashada ay horseedayso xasilooni darro, ayaga oo dhaliil xoogan u jeediyay hoggaanka Puntland.

“Shirku wuxuu ugu baaqayaa xukuumadda Puntland in ay joojiso doorashooyinka aan heshiiska lagu ahayn oo sababi kara xasilooni darro iyo qalalaase” ayaa lagu yiri.

Waxa kale oo ay intaasi kusii dareen in ciidamada ammaanka Puntland, gaar ahaan kuwa Booliska iyo Badda loo adeegsanayo dano siyaasadeed, taasina ay ka digayaan.

Sidoo kale waxa ay sheegeen in madaxweyne Saciid Deni aan lagu aamini karin geeddi socodka dimuqraadiyadeed ee Puntlan, sida ay hadalka u dhigeen.

Warsaxaafadeedka kasoo baxay Madasha Siyaasadda Puntland ayaa sidoo kale lagu dalbaday in la joojiyo wax ka beddelka Dastuurka, si aysan u imaan khilaafaad kale.

Dhanka, kale, siyaasiyiinta ku shiray Garoowe ayaa waxay ugu baaqeen dowladda federaalka Soomaaliya inay faragelinta siyaasadeed iyo hadallada xanafta leh ka dayso Puntland, iyagoo sheegay inay Puntland isaga filan tahay xalka khilaafka dhexdeeda yaal.

Xaaladda siyaasadeed ee Puntland ayaa haatan ah mid cakiran, waxaana la’isku hayaa arrinta doorashada, ayada oo ay sii dheer tahay khilaafka kala dhexeeya dowladda dhexe.