Muqdisho (Caasimada Online) – Cabdikariin Sheekh Muuse Qalbi-dhagax ayaa mar kale sharaxaad cusub ka bixiyey qaabkii loo soo qabtay, isla markaana loogu dhiibay dowladda Itoobiya, kadib wareysi uu siiyey VOA.

“Hadda waan soo noqday,  dadka Soomaaliyeed kala kulmay soo dhaweyn iyo qadarin balaaran, waana ku qanacsanahay joogitaanka Muqdisho,” ayuu yiri Qalbi-dhagax.

Sidoo kale wuxuu ka sheegeeyey sida uu u sharfay, una raali geliyey ra’iisul wasaare Rooble, isagoo eedeymo culus u jeediyey Farmaajo iyo Kheyre oo markii la dhiibay dadka maamulayey.

“Nimankii xilka hayey ee cadowga ii dhiibay waxay iga dhigeen qof aan dalka waxaba ku laheyn, Rooble isagoo heysta awoodii Ra’iisul Wasaaraha wadanka ayuu gaboodfalkaas iga raali geliyey, wuxuu I huwiyey calankii aan jiritaankiisa u halgami jiray, wuxuu ii xaal mariyey sidii Soomaalidu isku xaal-mari jirtay,” ayuu yiri Qalbi-dhagax.

Sidoo kale wuxuu sheegay in goobtii lagu go’aamiyey in lagu dhiibo, ONLF-na ay argagixiso tahay ay hadda ku raali geliyeen, Ra’iisul wasaare Rooble, golihiisa wasiirrada iyo xildhibaanada labada Aqal ee baarlamaanka Soomaaliya.

Ugu dambeyntii Qalbi-dhagax ayaa sheegay in waligiis uusan dhibaateyn qof Soomaali ah, oo xitaa dagaaladii sokeeye ee dalka ka dhacay uusan waligiis ku lug yeelan, balse uu maanta ku faraxsan yahay in goobtii lagu dulmiyey lagu raali geliyo.

Hoos ka dhageyso wareysiga

Muqdisho (Caasimada Online) – Musharax Madaxweyne Cabduraxmaan Cabdishakuur Warsame oo ka hadlay arrimaha doorashooyinka, sababta uu isku soo sharaxay iyo waxa u qorsheysan ayaa sidoo kale ka hadlay nooca iskaashi ee midowga musharaxiinta  ay yeela karaan, xilliga doorashada.

Cabdiraxmaan oo wareysi siiyey Idaacadda VOA ayaa sheegay in markii hore go’aanka Midowga Musharaxiinta uu ahaa in dalka ay doorasho ka dhacdo, mudo kororsigana laga hor tago.

Sidoo kale wuxuu sheegay in musharaxiinta aysan ku heshiin in qof ama xisbi gaar ah la dhiso, balse uu jiro is faham hoose oo dhanacyada siyaasiyiinta mucaaradka ah ay ku wajahaayaan doorashada.

“Midowga musharaxiinta labo u jeedo oo kaliya ayuu lahaa, 1 – in dalka ay doorasho ka dhacdo, 2 – iyo in mudo kororsiga la diido, wax kale ma jirin, labadaas qodoba waan ku guuleysanay, inkastoo lasoo maray jiitan dheer,” ayuu yiri Cabduraxmaan Cabdishakuur.

Sidoo kale waxaa la weydiiyey suurta galnimada inay isku tanaasuli doonaan, oo xubnihii ku mideysnaa golaha midowga musharaxiinta ay hal hoggaamiye dhisi doonaan.

“Waxaa noo socda wadahadal ah in la is kaashado ah, dadku sida ay isku leeyihiin, dadka qaar siyaasadda isku deegaan ayey kasoo galeen, siyaasiyiinta qaar waa saaxiibo dhow, marka qof kasta qofka u dhow ayaan hadda ku tashanay inuu kaashado,” ayuu yiri Cabduraxmaan Cabdishakuur.

Sidoo kale wuxuu sheegay in markii la fiiriyo sidii ay u dhacday doorashadii guddoonka labnada Aqal ee BF aysan jirin fursad uu heysto Madaxweyne Farmaajo.

“Ma aragno xulufo uu hadda wato oo garab taagan Farmaajo, marka ka midowga musharaxiinta ahaan waxaa naga go’an in dalka ay doorasho ka dhacdo, in la is kaashadana waxay ku xiran tahay, hadba sida la isugu siyaasad dhowyahay, sida la isku yaqaano iyo sida siyaasadda loo wadaagi karo,” ayuu yiri Cabduraxmaan Cabdishakuur.

Hoos ka dhageyso wareysiga

Dhuusamareeb (Caasimada Online) – Waxaa caawa Maqribkii soo gaaray dagaal qaatay 13 saacadood oo waaberigii hore ee Jimcihii saakay ka bilowday magaalada Dhuusamareeb ee caasimadda Galmudug.

Saraalkiishii hoggaaminaysay ciidamada dowladda ee maanta Dhuusamareeb ka dagaalamay ayaa Caasimada Online u xaqiijiyey in hadda lasoo gabagabeeyey dagaalka oo magaalada laga saaray ciidamadii Ahlu-Sunna.

Sidoo kale ciidanka xoogga dalka, gaar ahaan kuwa Gor Gor ayaa galabta si nabad ah kula wareegay degaanka Bohol oo ciidanka Ahlu-Sunna ay ka soo duuleen shalay galab.

Guddoomiyaha Dhuusamareeb Cabdiraxmaan Geedaqorow, oo warbaahinta la hadlay sheegay in magaaladu ay nabad tahay, dadkii ka qaxayna ay ku soo laaba karaan, maadaama ay ciidamada dowladda si buuxda gacanta ugu hayaan.

Sidoo kale guddoomiyaha oo ka gaabsaday inuu faahfaahiyo khasaaraha ka dhashay dagaalkii maanta ayaa sheegay in guddi soo baara ay u xil-saari doonaan, oo dib ay kasoo shaaci doonaan xogta khasaaraha oo dhameystiran.

Ciidamadii Dhuusamareeb soo weeraray ee Ahlu-Sunna ayaa labo jiho galabta uga baxay magaalada, kadib markii looga tag roonaaday dagaalka, waxayna u bixeen dhanka bari iyo galbeedka magaalada, waana labadii jiho ee markii hore ay kasoo weerareen.

Saraakiisha aan la hadalnay waxay noo sheegeen maxaabiis iyo gaadiid dagaal ay ka furteen kooxda, isla markaana ay dhawaan soo bandhigi doonaan, sidoo kalena ay faahfaahin buuxda ka bixi doonaan dagaalkii maanta.

Waxaa jira khasaare xoog leh oo dhimasho, dhaawacyo iyo burbur hanyeed leh, balse ilaa hadda ma jirto koob rasmi ah oo la sameeyey, waxaana magaalada horay uga cararay inta badan dadkii ku noolaa oo habeenadii lasoo dhaafay digniino hor dhac ah ka helay xooggaga Ahlu-Sunna.

Hoos ka daawo

Muqdisho (Caasimada Online) – Waxaa maanta magaalada Muqdisho kulan ku yeeshay Ra’iisul Wasaare Maxamed Xuseen Rooble, Musharax Cabdiraxmaan Cabdishakuur, Cabdikariim Guuleed iyo Xildhibaano ka tirsan labada aqal, kaasi oo looga hadlay xoojinta ololaha Musharax Cabdiraxmaan Cabdishakuur.

Sida uu shaaciyay Musharaxa waxaa kulanka u daarna sidii awooda la isugu geyn lahaa ololaha Musharax Cabdiraxmaan, xilli uu goor sii horeysay u tanaasulay Cabdikariim Guuleed.

“Kulan daba socday kii xalay aan la yeelanay Madaxweynaha Galmudug, anig iyo walaalkeey Cabdikariin Xuseen Guuleed, ayaa maanta la yeelanay Raysal Wasaare Maxamed Xuseen Rooble iyo qaar kamid ah Xildhibaanada labada aqal ee Baarlamaanka nagu metala,” ayuu yiri.

Waxa uu intaas kusii daray qoraalkiisa Musharax Cabdiraxmaan Cabdishakuur “Wuxuu kusoo dhamaaday guul, waxaana lagu ballamay in awooda la isugu geeyo ololahayga.”

Kulanka maanta ayaa imanaya xili ay beesha Habar-gidir riixayso Musharax Cabdiraxmaan Cabdishakuur oo ay isugu geynayso awoodeeda, xili ay maalmo kooban ka harsan tahay doorashada madaxweynaha.

Cabdikariim Guuleed ayaa ka haray tartanka doorashada, isaga oo u tanaasulay Cabdiraxmaan, kadib cadaadis xoogan oo kaga yimid madaxweynaha Galmudug Axmed Qoor-Qoor, Siyaasiyiin iyo Ganacsato kasoo jeeda beesha Habar-gidir, iyo xaqiiqda ah in ololihiisa doorasho uu ahaa mid aan saldhig adag laheyn.

Guuleed ayaa tanaasulkiisa kadib waxa uu hadda si xoogan uga shaqeynaya sidii uu taageero ugu raadin lahaa Musharax Cabdiraxmaan Cabdishakuur.

Tallaabadan ayaa waxay tusaale u noqoneysa musharaxiin badan oo aan rajo laheyn balse caqabad ku noqon kara fursadaha musharaxiinta ku beesha ah, si gaar ahna kuwa beesha Abgaal.

Muqdisho (Caasimada Online) – Madaxweynihii hore Galmudug Cabdikariim Xuseen Guuleed oo ka haray tartanka doorashada madaxweynaha Soomaaliya ayaa goordhoweyd farriintii ugu horeysay u diray taageerayaashiisa.

Cabdikariim Guuleed ayaa ku booriyay taageerayaashiisa inay ololaha maalmaha kooban ku garab istaagaan hoggaamiyaha xisbiga Wadajir Cabdiraxmaan Cabdishakuur Warsame oo ay kasoo wada jeedaan beesha Habar-gidir.

“Dib-u-dhiska dalkeenu iyo horu-socodkiisu wuxuu u baahan yahay wada-shaqayn iyo isu-tanaasulid. Bulshadan burburtay waxa ugu wayn ee dawlad dhiskeeda loo samayn karo waa xoojinta kalsooni abuuris,” ayuu yiri.

Sidoo kale waxa uu sheegay in uu garab siinayo sidii dalka uga dhici lahaa isbedel, islamarkaana uu dhisayo Musharax Cabdiraxmaan Cabdishakuur, oo loolan adag kula jira musharaxiin badan oo u taagan xilka madaxweynaha.

“Dalku wuxuu soo maray shantii sano lasoo dhaafay is qab-qabsi iyo kala irdhoobid xoog leh. Wuxuu u baahan yahay isbadal mug leh oo xasiloonidii soo celiya. Waxaa qayb kasii ahaanaya isbadalkaas waxaana garab taaganahay Walaalkay Murashax Cabdiraxmaan Cabdishakuur. Ballanteenu waa Midnimo iyo Horumar.”

Tallaabada uu qaaday Guuleed ayaa ku timid cadaadis xoogan oo kaga yimid madaxweynaha Galmudug Axmed Qoor-Qoor, Siyaasiyiin iyo Ganacsato kasoo jeeda beesha Habar-gidir, iyo xaqiiqda ah in ololihiisa doorasho uu ahaa mid aan saldhig adag laheyn.

Guuleed ayaa tanaasulkiisa kadib waxa uu hadda si xooggan uga shaqeyn doona sidii uu taageero ugu raadin lahaa Musharax Cabdiraxmaan Cabdishakuur.

Si kastaba, tanaasulka Guuleed wuxuu tusaale u noqon doonaa musharaxiin badan oo aan rajo laheyn balse caqabad ku noqon kara fursadaha musharaxiinta ku beesha ah, si gaar ahna kuwa beesha Abgaal.

Muqdisho (Caasimada Online) – Koox xildhibaano ah oo ka kooban labada Aqal ee baarlamanka ayaa xalay ku biiray xildhibaanada taageersan madaxweynihii hore ee Soomaaliya Xasan Sheekh Maxamuud, sida ay ogaatay Caasimada Online.

Xildhibaanadan oo tiro ahaan lagu sheegay 24 ayaa dhammaantood ah xildhibaanada labada aqal ku matala Somaliland, sida ay xog ku heshay Caasimada Online.

Ilo-wareedyo lagu kalsoon yahay ayaa Caasimada Online u sheegay in xildhibaanadan ay hoggaaminayeen wasiirka dastuurka Soomaaliya Senator Saalax Axmed Jaamac, xildhibaan Biixi Iimaan Cige iyo Axmed Cusmaan Diiriye.

Go’aanka xildhibaanadan ayaa yimid kadib maalmo ay xildhibaanada Reer Waqooyiga ka fakarayeen musharax ay isku raacaan inay taageraan balse la heli waayey mowqif mid ah, taasi oo keentay in kooxdan ay gaaraan go’aankan ay ugu biireen dhanka Xasan Sheekh.

Si kastaba wararka ayaa sheegaya inay hadda socdaan wada-hadallo kale oo xildhibaano dheeri ah oo ka mid ah kuwa Reer Waqooyiga loogu soo biirinayo dhanka madaxweyne Xasan Sheekh Maxamuud, inkasta oo aan la hayn tirada rasmiga ah.

Sidoo kale, xildhibaano lagu qiyaasay dhowr iyo toban oo ka mid ah kuwa Koonfur Galbeed ayaa iyagana xalay u jabay dhanka madaxweyne Xasan Sheekh, taasi oo sii kordhisay taageerada madaxweynihii hore.

Xildhibaanada Koonfur Galbeed ayaa waxaa hoggaaminayey Xasan Cabdinuur oo dhowaan looga adkaaday xilkii guddoomiyaha golaha shacabka.

Wararka naga soo gaaraya ololaha doorashada ayaa sheegaya inay sii kordheyso dardarta ay xildhibaanada ugu biirayaan dhanka madaxweyne Xasan Sheekh, waxaana lagu warramayaa inay wareegga koowaad ee doorashada ugu cod badnaan doonaan isaga iyo madaxweyne Farmaajo, inkasta oo aany hubneyn sida ay u kala hormari doonaan.

Sababta ay xildhibaano badan ugu goosanayaan dhanka Xasan Sheekh ayaa lagu sheegay inay tahay ayada saadaasha iyo dardarta xagiisa u badatay maalmihii tegay, sidaas darteedna ay xildhibaano badan doonayaan inay kusii dhowaadaan.

Abu Dhabi (Caasimada Online) – Madaxweynihii dalka Isu-tagga Imaaraadka Carabta Sheikh Khalifa bin Zayed Al Nahyan ayaa geeriyooday, sida ay goordhow shaacisay wakaaladda wararka rasmiga ah ee dalkaas ee WAM.

Sheekh Khalifa, oo ahaa 73 jir ayaa muddo sanado ah la xarbinayey xanuuno.

“Wasaaradda Arrimaha Madaxtooyada waxay shacabka Imaaraadka Carabta iyo Dunida Islaamka uga tacsiyeyneysaa geeriday Sheikh Khalifa bin Zayed Al-Nahyan oo geeriyooday Jimce 13-ka May,” ayaa lagu yiri qoraal kasoo baxay wakaaladda WAM.

Sheikh Khalifa bin Zayed Al Nahyan ayaa sidoo kale ahaa amiirka Imaaraadda Abu Dhabi oo ka mid ah toddabada Imaaradood ee dalkaas uu ka kooban yahay.

Sida uu dhigayo dastuurka, madaxweyne ku-xigeenka iyo ra’iisul wasaaraha Sheikh Mohammed bin Rashid al-Maktoum oo xukuma Imaaradda Dubai ayaa sii hayn doona xilka madaxweynaha illaa inta ay muddo 30 maalmood gudahood ah ku kulmayaan golaha faderaalka oo ka kooban madaxda toddobada Imaaradood, si ay u doortaan madaxweyne cusub.

Khalifa waxa uu dhashay 1948-kii, wuxuuna xukunka Imaaradda Abu Dhabi iyo tan madaxweynaha dalka qabtay 2004. Waxaa xukunka Abu Dhabi kala wareegi doono ku-xigeenkiisa, ahna walaalkiisa ay isku aabaha yihiin Sheikh Mohammed bin Zayed al-Nahyan.

Mohammed bin Zayed ayaa ahaa hoggaamiyaha dadban ee Imaaraadka Carabta tan iyo markii Khalifa uu ku dhacay cudurka faaliga ama stroke 2014.

AFP + REUTERS

Dhuusamareeb (Caasimada Online) – Xooggaga Ahlu Sunna Waljamaaca ayaa saaka duullaan ballaaran ku soo qaaday magaalada Dhuusamareeb ee xarunta Galmudug, waxaana halkaa hadda ka socda dagaal culus.

Waxaa la dagaallamaya ciidamada dowladda Soomaaliya oo isugu jira booliska sida gaarka ah u tababaran ee Haramcad, kumaandoosta Gorgor iyo milateriga.

Dad deegaanka ah ayaa sheegay in dagaalka xooggiisa uu hadda ka socdo xarunta Inji, xero gadiid, madaxtooyada, cisbitaalka guud iyo saldhigga booliska.

“Marba dhinac ayaa la riixayaa oo weli xabbadu way socotaa. Mana jirto cid ku adkaatay ilaa hadda dagaalka,” ayuu yiri qof la hadlay Idaacadda BBC.

Ilaa iyo hadda lama oga khasaaraha ka dhashay dagaalka Dhuusamareeb.

Xalay ayaa magaalada waxaa ka jirtay cabsi dagaal kadib markii la ogaaday in xooggaga Ahlu Sunna ay ka soo dhaqaaqeen farriisinkooda deegaanka Bohol oo qiyaastii 30 KM waqooyi uga beegan Dhuusamareeb.

Garoonka Dhuusamareeb oo ku yaalla meel ka baxsan magaalada ayaa waxaa ku sugan ciidamo Jabuutiyaan ah oo ka tirsan ATMIS.

Dhammaadkii bishii October 2021 ayaa xooggaga Ahlu Sunna waxaa laga saaray degmada Guriceel oo ay muddo kooban haysteen, waxaana dagaalkaas ka dhashay khasaaro baahsan.

Muqdisho (Caasimada Online) – Inta badan Xildhibaanada Labada Aqal ayaan tegin Teendhada Afisyooni, oo musharaxiinta Madaxweynaha ay labadii maalmood ee tegay ka jeedinayeen khudbadahooda wax-qabadkooda, waxaana la arkay kuraas badna oo eber ah.

Tirada xildhibaanada tagtay hadal jeedinta shalay ayaa xitaa dhameyn 50, ayada oo xubnaha labada aqal ay yihiin 329.

Tallaabadaan ayaa banaanka usoo saartay in Xildhibaanada intooda badan aysan dan ka laheyn waxqabad iyo ajende siyaasadeed oo ay ku doortan hogaanka cusub ee dalka, taas badalkeeda ay doorbidayaan dhaqaale ama xulufeysi siyaasadeed.

Arrintan ayaa rejo beel ku riday musharaxiin badan oo markii hore rabay inay Xildhibaanada ku beerlaxowsadaan hadal jeedinta, ayada oo kal horeba mudaneyaasha ay soo saarteen inta badan musharaxiin gaar ah oo codkooda ku tashanaya.

Cidda kaliya ee hadda faa’iidada qabta ayaa ah musharaxiinta markii hore xooganaa ee haystay isbaheysiga siyaasadeed, ee aan khudbad wax ku raadineyn kuwaas oo kala ah Xasan Sheekh, Farmaajo, Sheekh Shariif iyo Deni.

Tallaabada ay qaadeen Xildhibaanada ayaa waxaa si weyn uga carooday xubno uu kamid yahay Gudoomiyaha Guddiga Doorashada Madaxweynaha, Senator Cabdiqani Geelle Maxamed oo asagu ku tilmaamay wax laga xumaaday sida ay shalay u dhaqmeen xildhibaanada oo ay khudbado u jeediyeen musharaxiinta madaxweynaha.

Doorashada madaxweynaha ayaa lagu wadaa inay qabsoomto 15-ka bishaan May, haddii uusan jadwalkeeda ku iman isbedel lama filaan ah oo dib u dhac kale ku keena.

Si kastaba, waxaa maalmihii udambeeyay si weyn loo dareemayay ololaha musharaxiinta madaxweyne ay ku rabaan inay iskaga gadaan bulshada Soomaaliyeed iyo kala jiidashada xildhibaanada, oo markii horeba qaarkood lagu xirtay koontooyin gaar ah.

Muqdisho (Caasimada Online) – Cabdikariin Muuse “Qalbi Dhagax” oo shalay soo gaaray magaalada Muqdisho ayaa hadal uu jeediyey wuxuu ugu mahad celiyay xukuumadda ra’iisul wasaare Rooblesida ay u qaadacday go’aankii lagu dhiibay iyo ururkii uu ka tirsanaa ee lagu tilmaamay argagixiso.

Qalbi Dhagax ayaa sheegay in wixii dhacay iyo ciddii geysatay shacabka Soomaaliyeed xusuusan yahay, taariikhdana ay qoreyso qof walba wixii uu ummada u geystay, dadkaasina inay waajib tahay in dhamaan shacabka Soomaaliyeed dib ula xisaabtamaan.

Qalbi-dhagax ayaa waxaa Itoobiya u gacan geliyey xukuumadda Xasan Cali Kheyre oo hadda ah musharax, weli u aqoonsan Qalbi-dhagax iyo ONLF inay yihiin argagixiso.

“Nasiib daro, iyadoo aan ognahay dhowrkii sano u danbeysay inaanu ku sugneyn jahwareer, hubanti la’aan dowladeed iyo qiyaas aan la garan karin meesha aan ku danbeyn doono, ciddii dhibaatadaas inoo geysatay mar kale inay leedahay han, haddaad dhiman weydeen mar kale nasoo doorto, nasoo celiya, si aan idiin wada baabi’ino” ayuu yiri Qalbi Dhagax.

“Ummada waxaas sameyneysay ee maanta mar kale dooneysa inay dib isu soo diyaariso, waxaa fiicnaan laheyd, inay ummada horyimaadaan ay fasiraan wixii dhacay, muxuu ahaa, maxaa idinku kalifay, miyey xanuunsanaayeen ma caruureey ahaayeen, waa iney ka cudur daartaan wixii dhacay ummada u sheegaan, ama ay qaataan mas’uuliyadda, halkii loo baahnaa dhibaatadii gaartay ummadda Soomaaliyeed inay ugu tacsiyadeeyaan, raali gelin weydiistaan maanta mar kale inay yiraahdaan dib ha naloo soo doorto waa arrin nasiib daro ah,” ayuu sii raaciyay Qalbi Dhagax.

Halgamaa Qalbi Dhagax ayaa xildhibaanada baarlamaanka federaalka ka rajeeyay maalinta Axada ee 15-ka May oo ku asteysan maalin qaran oo la xusayo halgamayaashii SYL in lagu ciqaabo waxa ay mudnaayeen, ummada Soomaaliyeedna ay u dooraan dadkii samata-bixin lahaa shacabka.

Qalbi Dhagax wuxu intaa raaciyay inaysan xaq u haleyn dadkaasi uu eedeeyay in xildhibaanadii matalayay shacabka ay xil weydiistaan, balse iyaga xaq loogu leeyahay in lagula xisaabtamo dhibaatadii ay geysteen.

Imaanshaha Qalbi Dhagax ee Muqdisho ayaa dharbaaxo ku ah madaxweyne Farmaajo iyo Xasan Cali Kheyre oo xiligii uu ahaa ra’iisul wasaaraha la dhiibay Qalbi Dhagax.

Warar aan la xaqiijin ayaa sheegaya in Qalbi Dhagax loogu yeeray inuu ka qeybgalo kulanka baarlamaanka Axada ku yeelanayo teendhada Afisyoone ee lagu dooranayo madaxweynaha cusub ee Soomaaliya.

Muqdisho (Caasimada Online) – Madaxweynihii hore Galmudug Cabdikariim Xuseen Guuleed ayaa ka haray tartanka doorashada madaxweynaha Soomaaliya, sida ay ilo-wareedyo lagu kalsoon yahay u xaqiijiyeen Caasimada Online.

Xogta aan helnay ayaa sheegeysa in Guuleed uu u tanaasulay islamarkaana taageeray hoggaamiyaha xisbiga Wadajir Cabdiraxmaan Cabdishakuur Warsame oo ay kasoo wada jeedaan beesha Habar-gidir.

Tallaabada uu qaaday Guuleed ayaa ku timid cadaadis xooggan oo kaga yimid madaxweynaha Galmudug Axmed Qoor Qoor, siyaasiyiin iyo ganacsato kasoo jeeda beesha Habar-gidir, iyo xaqiiqda ah in ololihiisa doorasho uu ahaa mid aan saldhig adag laheyn.

Kulanka uu ku dhacay tanaasulka, ayaa waxaa goobjoog ka ahaa Cabdikariin Guuleed, Cabdiraxmaa Cabdishakuur, Axmed Qoor Qoor, Senator Cabdi Qeybdiid, iyo saddex xildhibaan oo kale oo kasoo jeeda.

Cabdiraxmaan Cabdishakuur ayaa qoraal uu soo saaray kadib kulanka ku yiri “Waxaan u mahadcelinayaa walaalkeey C/kariin Xuseen Guuleed oo ii tanaasulay si guul looga keeno tartanka doorashada madaxtinnimada. Waxaan kaloo u mahadcelinayaa Madaxweynaha Galmudug, Axmed Cabdi Kaariye, xikdhibaanmada, Senatorrada, odoyaasha, siyaasiyiinta iyo ganacsatada hawshaas qaybta ka ahaa.”

Guuleed ayaa lagu warramay in tanaasulka ka sokow uu hadda si xooggan uga shaqeyn doono sidii uu taageero ugu raadin lahaa Cabdiraxmaan Cabdishakuur, oo isaga naftiisa rajadiisa aysan sidaas u weyneyn.

Musharaxiinta ugu cadcad doorashada ayaa la rumeysan yahay inay kala yihiin Farmaajo, Sheekh Shariif, Xasan Sheekh, Saciid Deni iyo Xasan Kheyre, mana cadda haddii tanaasulka Guuleed uu taas wax ka beddeli doono, sarena usoo qaadi doono Cabdiraxmaan Cabdishakuur.

Sida ay fahansan tahay Caasimada Online, isbaheysiga Guuleed iyo Cabdiraxmaan ayaan waxaa inta badan qeyb ka aheyn xildhibaanada beesha Habargidir, oo badankood ah laf dhabarta ololaha madaxweynihii hore ee Soomaaliya Xasan Sheekh, waxayna ka maqnaayeen inta badan kulanka.

Si kastaba, tanaasulka Guuleed wuxuu tusaale u noqon doonaa musharaxiin badan oo aan rajo laheyn balse caqabad ku noqon kara fursadaha musharaxiinta ku beesha ah, si gaar ahna kuwa beesha Abgaal.

Beesha Abgaal ayaa ah tan ugu musharaxiinta badan balse waxaa la rumeysan yahay inaysan intooda badan rajo laheyn marka laga reebo labadii madaxweyne ee hore ee Xasan Sheekh iyo Shariif Sheekh Axmed.

Berbera (Caasimada Online) – Madaxweynaha Somaliland Muuse Biixi Cabdi ayaa shalay  magaalada Hargeysa kusoo dhoweeyay wafdi uu hoggaaminayay Jeneral Stephen Townsend oo ah taliyaha taliska ciidammada Maraykanka ee Afrika (AFRICOM), waxaana wafdigaasi ka mid ahaa safiirka Mareykanka ee Soomaaliya Larry André.

Qoraal kasoo baxay AFRICOM ayaa lagu sheegay in madaxda labada dhinac ay ka wada hadleen ballaarinta iyo tayeynta iskaashiga Somaliland si la mid ah dowladdaha xubinta ka ah dowladda federaalka Soomaaliya, taasoo waafaqsan siyaasadda Mareykanka ee Soomaaliya.

Wafdiga ayaa sidoo kale waxay booqasho ku tageen garoonka diyaaraddaha ciidamada cirka ee Berbera, halkaasoo ay qiimeyn ku sameeyeen sanadkii hore.

Africom ayaa boggeeda Twitter-ka ku sheegtay in booqashada iyo qiimeynta wafdiga Mareykanka ay qeyb ka tahay dadaalada joogtada ah ee lagu qiimeynaayo goobaha suuragalka ah in ciidamada Mareykanka ugu diyaar garoobaan xaaladaha lama filaanka ama deg dega ah ama in la howlgeliyo marka loo baahdo.

Mareykanka ayaa ka fakaraya saldhig cusub oo uu ku yeesho Geeska Afrika, oo aan aheyn kan Jabuuti, xilli uu ka xun yahay in dowladda Jabuuti ay saldhig ka siisay dalkaas dalka Shiinaha oo ay Mareykanka xifaaltamaan.

Muuse Biixi ayaa wafdiga Mareykanka uga mahad celiyey booqashada ay ku yimaadeen Somaliland, isagoo sheegay inay soo dhawaynayaan iskaashiga dhinacyada Amniga iyo Militriga ee labada dhinac.

Muqdisho (Caasimada Online) – Ra’iisul Wasaare Maxamed Xuseen Rooble ayaa goordhoweyd ka tacsiyeeyay geerida madaxweynihii Imaaraadka Sheikh Khaliifa Bin Zayid, oo ahaa 73 jir muddo sanado ah la xarbinayey xanuuno.

Ra’iisul Wasaare Rooble ayaa Shacabka iyo Dowladda Imaaraadka Carabta uga tacsiyeeyay geerida ku timid Allaha u naxariistee madaxweynihii Dowladda Imaaraadka Carabta Sheikh Khaliif Bin Zayid, sidoo kalena ahaa amiirka Imaaraadda Abu Dhabi oo kamid ah toddabada Imaaradood ee dalkaas uu ka kooban yahay.

“Waxaan walaaleheenna Imaaraadka Carabta la qeybsaneynaa xanuunka iyo murugada ka dib geeridii ku timid Allaha u naxariistee Sheikh Khaliifa Bin Zayid, madaxweynihii Imaaraadka Carabta oo geeriooday maanta oo Jimce ah,” ayuu yiri.

“Anigoo ku hadlaya magaceyga iyo magaca Shacabka Soomaaliyeed waxa aan uga tacsiyeynayaa qoyska marxuumka, dowladda Imaaraadka shacab iyo hoggaanba, Shucuubta Carabta iyo Islaamka, geerida Allaha u naxariistee Sheikh Khaliifa Bin Zayid oo ka mid ahaa haldoorka iyo hoggaanka Ummadda Carabta iyo Islaamka.”

Ra’iisul Wasaare Rooble ayaa marxuumka Alle uga baryay in uu naxariistii Janno ku manneysto, ehelkiisa, shacabka imaaraadka iyo guud ahaan ummadda Islaamkana Samir iyo iimaan ka siiyo.

Sida uu dhigayo dastuurka, madaxweyne ku-xigeenka iyo ra’iisul wasaaraha Sheikh Mohammed bin Rashid al-Maktoum oo xukuma Imaaradda Dubai ayaa sii hayn doona xilka madaxweynaha illaa inta ay muddo 30 maalmood gudahood ah ku kulmayaan golaha faderaalka oo ka kooban madaxda toddobada Imaaradood, si ay u doortaan madaxweyne cusub.

Khalifa waxa uu dhashay 1948-kii, wuxuuna xukunka Imaaradda Abu Dhabi iyo tan madaxweynaha dalka qabtay 2004. Waxaa xukunka Abu Dhabi kala wareegi doono ku-xigeenkiisa, ahna walaalkiisa ay isku aabaha yihiin Sheikh Mohammed bin Zayed al-Nahyan.

Mohammed bin Zayed ayaa ahaa hoggaamiyaha dadban ee Imaaraadka Carabta tan iyo markii Khalifa uu ku dhacay cudurka faaliga ama stroke 2014.

Dhuusamareeb (Caasimada Online) – Waxaa sii xoogeystay dagaalka Magaalada Dhuusamareeb ee Caasimadda Maamulka Galmudug ku dhexmaraya Ciidamada dowladda & kuwa Galmudug oo dhinac ah iyo xoogagga Ahlusunna oo soo weeraray Magaalada.

Dagaalka ayaa waxaa uu ka socdaa qeybo kamid ah Magaalada Dhuusamareeb, waxaana goobjoogayaal ay sheegeen in la isku adeegsanayo hubka noocyadiisa kala duwan, sidoo kalena Gaadiidka dagaalka ee Cabdi Billaha ay wataan labada dhinac ee dagaalamaya.

Wararka ayaa waxaa ay intaasi kudarayaan in Ciidamada Dowladda ee Gorgor iyo Haramcad ay dagaalka kubiireen,  kuwaas oo doonaya inay Magaalada ka saaraan dhinacyada ay kasoo galeen Ciidamada xoogagga Ahlusunna.

Galmudug ayaa Magaalada Dhuusamareeb ka saartay qaar kamid ah Ciidankeeda iyo kuwa Federaalka oo wata Gaadiid Dagaal saacado kahor in aanay gudaha u galin ciidamada ka amar qaata Sheekh Shaakir.

Sarkaal ka tirsan Ciidanka Duullaanka ku qaaday Dhuusamareeb ayaa muuqaal uu iska soo duubay xili la maqlayay rasaas xooggan oo ka dhaceysa agagaarka goobta uu muuqaalka isaga soo duubay ayaa sheegay in ay gacan ku dhigeen qaybo kamid ah Magaalada.

Guddoomiye ku xigeenka Dhuusamareeb Cabdi Xaashi oo dhankiisa muuqaal kooban iska duubay ayaa sheegay in ay iska caabbiyeen Ciidanka ka amar qaata Sheekh Shaakir ee duullaanka ku qaaday.

Waxaa jira khasaaro dhimasho iyo dhaawac ah oo dagaalka kasoo gaaray dad rayid ah iyo dhinacyada dagaalamay, inkastoo aan tiro sax ah weli la heyn.

Muqdisho (Caasimada Online) – Madaxweynaha Koonfur Galbeed Cabdicasiis Xasan Maxamed (Lafta-gareen) oo ku sugan Muqdisho ayaa wada kulamada uu la qaadanayo murashaxiinta u tartameysa xilka madaxweynaha Soomaaliya.

Kulamada uu Lafta-gareen la yeelanaayo murashaxiinta ayaa ah kuwo ka raadinayo murashax uu ku kalsoonaan karo oo uu taageero maadaama maamulka Koonfur Galbeed xildhibaanada ugu badan baarlamaanka laga soo doorto.

Lafta-gareen oo taageersan Farmaajo ayay wararku sheegayaan inuu ka niyad jabay qaabkii ay doorashada guddoomiyaha baarlamaanka u dhacday, isagoona murashaxii uu waday oo sidoo kale ay taageersaneyd Villa Somalia laga adkaaday, taasi oo ku qasabtay inuu raadiyo qorshe labad.

Musharaxii Lafta-gareen ee looga adkaaday guddoonka golaha shacabka Xasan Cabdinuur, ayaa la sheegay inay Villa Somalia uga digtay inuusan gadmeyn balse uu diiday, taasi oo labada dhinacba soo istaajisay meel cidlo ah. 

Niyad jabkaasi ayaa sababay in Lafta-fareen uu murashaxiinta ka raadiyo mid uu kalsooni ku qabo oo uu ku taageero xildhibaanada maamulkiisa uu soo saartay, haddii aanu Farmaajo awood badan muujin wareegga koowaad ee doorashada.

Warar Caasimada Online heshay ayaa sheegaya in suuragal tahay in Lafta-gareen uu heshiis la gaaro mid ka mid ah murashaxiinta si uu u taageero, waxaana laga yaabaa in murashaxaasi uu noqdo Xasan Sheekh Maxamuud ama Shariif Sheekh Axmed.

Lafta-gareen ayaa siyaabo kala duwan ula kulmay Madaxweyne Shariif iyo Xasan Sheekh, waxayna isla soo qaadeen dhameystirka doorashada oo 15-ka May oo balansan yahay in la doorto madaxweynaha cusub.

Inkasta oo Lafta-gareen uu labada musharaxba la kulmay, haddana wararku waxay sheegayaan inuu isaga ku kalsoon yahay Xasan Sheekh, balse ay Villa Somalia aad u diidan tahay Xasan Sheekh, kuna cadaadineyso inuu musharax kale ka fakaro, si gaar ahna Shariif.

Si kastaba, ma cadda halka uu Lafta-gareen raaci doono, waxayna isugu iman dootaa inuu dantiisa eegto ama uu Villa Somalia qanciyo. 

Muqdisho (Caasimada Online) – Ra’iisul Wasaare Maxamed Xuseen Rooble oo maanta qaabilay Halgamaa Cabdikariin Qalbi Dhagax ayaa ka dalbaday cafis ku aadan gabood-falkii ay xukuumad Soomaaliyeed kula kacday.

Rooble ayaa wax laga xumaado ku tilmaamay in madaxdii hore ee qeybta ka aheyd dhiibistii Qalbi Dhagax ay dalka joogan, islamarkaana aysan garawshiyo ka bixin gabood-falkaas foosha xun.

“Waxaa ka codsanaya in uu na cafiyo, waan ka xumahay in madaxdii iga horeysay ay waddanka joogaan oo weli aan laga hayn raali-gelin, aniga oo ku hadlaya magaca xukuumadda hada joogta waxaa leeyahay walaal soo dhawoow, waa ka raali-gelinayna oo dalkaaga Hooyo ayaa joogta,” ayuu yiri.

Sidoo kale waxa uu sheegay in tallaabooyin badan ay xukuumadiisa u qaaday sidii uu Halgamaa Qalbi Dhagax iyo ururkii uu ka tirsanaa ee ONLF, sidii dib looga noqon lahaa dambigii ay xukuumaddii hore ka gashay.

Halgamaa Cabdikariim Sheekh Muuse (Qalbi Dhagax) ayaa galabta kasoo dagay magaalada Muqdisho, ayada oo si weyn loogu soo dhaweeyay garoonka diyaadaha ee Aadan Cadde, afar sano iyo bar kadib markii cadowga loo gacan geliyey.

Qalbi Dhagax ayaa afar sano iyo siddeed billood ka hor laga dhoofiyay isla garoonka maanta sida heerka sare ah loogu soo dhaweeyay, xiligaasi oo isagoo indhaha ka xiran loo gacan geliyay cadowga Ethiopia, ayada oo ay dhiibtay xukuumaddii Xasan Cali Kheyre.

Xukuumadda Soomaaliya ee uu hogaamiyo Ra’iisul Wasaare Maxamed Xuseen Rooble ayaa ansixiyay xiligaas in laga laabto go’aan ay gaartay xukuumaddii Kheyre sanadkii 2017-kii, kaasi oo Soomaaliya ay ururka ONLF ugu aqoonsatay urur argagixiso.

Sidoo kale waxa uu Golaha sheegay inay khalad aheyd dhiibistii Cabdikariin Qalbi Dhagax ee loogu gacan galiyay dowladda Ethiopia.

Muqdisho (Caasimada Online) – Guddoomiyaha Golaha Shacabka, Sheekh Aadan Maxamed Nuur Madoobe oo maanta soo xiray kulankii khudbad jeedinta musharrixiinta xilka Madaxweynaha ayaa la dardaarmay Xildhibaanada.

Ugu horeyntii Guddoomiey Aadan Madoobe ayaa u mahad celiyay Xildhibaannada labada aqal iyo Guddiga isku-dhafka ah ee doorashada Madaxweynaha.

Waxaa u sheegay in labada maalmood ee inagu soo aadan la guda geli doono diyaar-garoowga doorashada Madaxweynaha Soomaaliya oo dhaceeysa maalinta Axada ee ku beegan 15-ka bishaan May.

Guddoomiyaha ayaa ugu baaqay Xildhibaannada inay ilaaliyaan waqtiga ballanta ee la isugu imaanayo doorashada madaxweynaha, xili maalmihii dambe ay muuqaneysay inay si weyn uga dib dhacayeen hadal jeedinta doorashada.

Sidoo kale waxa uu ku booriyay inay u dul qaataan waqtiga yar ee ka haray culeyska heysta, kaasi oo ku eeg sida lagu wado maalinta Axad oo ay dhaceyso doorashada madaxweynaha.

Hadalka Guddoomiyaha ayaa imanaya ayada oo lagu jiro diyaar-garowgii u dambeeyay ee doorashada madxweynaha, islamarkaana ay magaalada Muqdisho ka socdaan ololaha musharaxiinta iyo kala jiidashada Xildhibaanada labada aqal.