Muqdisho (Caasimada Online) – Xildhibaan Cusmaan Xaadoole oo ka mid ah masuuliyiinta maanta hoggaamineysa howlgalkii Shabeellada Dhexe ayaa warbaahinta kula hadlay degaanka Nuur-dugle ee hoos taga degmada Aadan-Yabaal.

Xildhibaan Xaadoole ayaa sheegay inay maanta Al-Shabaab ka xoreeyeen deegaano badan oo dhaca inta u dhaxeysa degaanka Masaajid Cali-Gaduud iyo degmada Aadan-Yabaal.

Xildhibaanka oo halkaas warbaahinta kula hadlay ayaa fariin u diray Al-Shabaab, isagoo ku goodiyey in aysan ka hari doonin kooxda, inta ay joogaan dhulka ay degto beesha uu ku metelo baarlamaanka.

Xildhibaan Xaadoole ayaa kooxda ugu baaqay inay dadkooda ku soo laabtaan oo waxay wadaan joojiyaan, hadii aysan isisoo dhiibin, wuxuu ku goodiyey in meel kasta ay uga daba geli doonaan.

Sidoo kale dadka ku nool deegaanada ay Al-Shabaab ka joogaan Sh/Dhexe ayuu Xildhibaan Xaadoole ugu baaqay inay kooxda iska dulqaadaan oo fursadaan ay ka faa’iideystaan.

Dhowr deegaan ayaa oo hoos taga degmada Aadanyabaal ayaa maanta laga xoreeyey Al-Shabaab, waxaana howlgalkaas hoggaaminaayey Xildhibaan Cusmaan Xaadoole, Xildhibaan Yuusuf Kabaale iyo guddoomiye Abshir Kaaraan.

Masuuliyiintaan ayaa ka mid ahaa ciidankii xoreeyey degaanka Masaajid Caligaduud, waxayna hadda u sii gudbeen degaanada kale ee gobolka ay ka joogaan Al-Shabaab, iyagoo kaabiga ku haya degmada Aadan-Yabaal oo muhiim u ah howlgalkaan.

Hoos ka daawo

Muqdisho (Caasimada Online) – Agaasimaha hey’adda nabad sugidda iyo sirdoonka qaranka Soomaaliya ee NISA Mahad Maxamed Salaad ayaa Muqdisho kula kulmay agaasime ku xigeenka Nabad sugidda ee dalka Itoobiya.

Xog ay Caasimada Online ka heshay kulankaas ayaa xaqiijineysa in labada sirdoon ee Soomaaliya iyo Itoobiya ay ku heshiiyeen inay iska kaashadaan dagaalka Al-Shabaab.

Kulankaan Muqdisho ay ku yeesheen madaxda labada sirdoon ayaa diiradda lagu saaray sida ay muhiim u tahay in sirdoonada labada dal ay iska kaashadaan ka hortagga khatarta argagixisada.

Agaasime ku xigeenka hey’adda nabad sugida Itoobiya General Sisay Tola, ayaa shalay soo gaaray Muqdisho, wuxuuna la socday wafdi Soomaaliya keenay dawo ay dowladda Itoobiya ugu qeyb qaadatay gurmadka dadkii ku dhaawacmay qaraxyadii Soobe.

Agaasime Mahad Salaad ayaa ka mid ahaa masuuliyiintii dowladda Soomaaliya ka socday ee shalay wafdiga Itoobiya Muqdisho ku soo dhaweysay.

Aragtida Mahad Salaad oo dadka ku yareed tan iyo markii loo magacaabay Taliyaha NISA ayaa shalay hadal heyn badan ka abuurtay baraha bulshada, markii uu ka soo muqday warbaahinta, isagoo ku sugan garoonka Aadan Cadde.

Itoobiya ayaa ka mid ah dalalka gobolka ee wajahaya khatarta ka imaa karta weerarrada Al-Shabaab, taas oo labada dalka muhiim uga dhigeysa inay iskaashi ka sameystaan dagaalka kooxda.

Agaasimaha hay’adda Sirdoonka iyo Nabad Sugidda Qaranka Soomaaliya wuxuu bogaadiyey heshiiska ay xukuumadda Itoobiya iyo kooxda hubeysan ee TPLF ay dhawaan ku gaareen magaalada Pretoria ee waddanka Koofur Afrika.

Agaasimaha NISA Mahad Salaad ayaa sidoo kale uga mahadceliyay dowladda Itoobiya garab istaageeda walaaltinimo iyo deeqihii caafimaad ee dhowaan ay soo gaarsiiyeen magaalada Muqdisho. Waxa uu intaas ku daray in Soomaaliya iyo Itoobiya ay yihiin labo dal oo ay waxbadan ka dhexeeyaan, wajahayana khatar argagixiso oo isku mid ah.

Sisay Tola Agaasime ku xigeenka Hay’adda Sirdoonka Itoobiya ayaa muujiyay sida uga xun yahay falkii argagixiso ee dhawaan ka dhacay magaalada Muqdisho, waxaana uu tilmaamay si loo yareeyo cabsida laga qabo dhacdooyinka noocaan oo kale ah in la xoojiyo iskaashiga iyo la dagaalanka argagixisada ee Bariga Afrika.

Madaxweynaha Soomaaliya Mudane Xasan Sheekh Maxamuud iyo R/wasaaraha Itoobiya ayaa dhowaan kulan ay ku yeesheen magaalada Addis Ababa ayaa waxay uga hadleen iskaashiga labada dal ee ku aadan ka hor taga qataraha Argagixisada.

Muqdisho (Caasimada Online) – Ciidamada dowladda Soomaaliya ee ku sugan degaanka Masaajid Cali-gaduud ayaa saakay fashiliyey gaari qarax ah oo Al-Shabaab ay doonayeen inay ku soo weeraraan deegaankaas.

Sida ay Caasimada Online u xaqiijiyeen saraakiil ku sugan deegaanka, gaariga qaraxa siday ayaa aad ugu soo dhawaaday ciidanka, waxaana lagu fashiliyey afaafka hore ee magaalada, gaar ahaan bar control oo ciidanku ay lahaayeen.

Gaariga ay Al-Shabaab u adeegsadeen qaraxaas ayaa ahaa Layla-calaawi, kaas oo inta badan loo adeegsado safarada gobollada koonfurta iyo bartamaha dalka.

Hase yeeshee ciidanka ayaa ka shakiyey gaariga oo xawaare badan ku socday iyo in kor aysan waxaba ka saareyn gaariga, sida lagu yaqaanay gaadiidka safarka ah, taas oo ciidanka u sahashay inay fashiliyaan qaraxaas.

Afhayeenka wasaaradda gaashaandhigga Jeneraal Caanood ayaa maanta xaqiijiyey in qaaraxaas ay dhaawacyo fudud ka soo gaareen laba askari, kuwaas oo ka mid ah askartii fashilisay gaariga qaraxa siday.

Deegaanka Masaajid CaliGaduud ee gobolka Sh/Dhexe oo ka mid ahaa talisyada ugu muhiimsanaa Al-shabaab ayaa dhawaan soo galay gacanta dowladda, kadib markii duqeyn looga saaray Shabaab-kii heystay sanadaha badan.

Dadka deegaanka Masaajid CaliGaduud ayaa warbaahinta u sheegay in saakay aroorninadii hore ay maqleen jugta gaariga lagu gubay duuleedka deegaanka oo aheyd mid aad u culus.

Deegaanka Masaajid Cali Gaduud ayaa Al-shabaab u ahaa mid istaraatiiji ah oo lacagaha canshuurta ah ay uga qaada jireen gadiidka u kala safra gobollada Hiiraan, Galgaduud, Sh/Dhexe iyo Mudug.

Sidoo kale deegaankaan waxay kooxdu ka difaaca jirtay Aadan-Yabaal ee gobolka Sh/Dhexe oo weli gacanta ugu jirta Al-Shabaab, qaraxaan ay saakay soo abaabuleen ayaa ku soo aaday iyadoo deegaano hoos taga Aadan-Yabaal ay saakay ciidamada dowladdu ka xoreeyeen kooxda.

Muqdisho (Caasimada Online) – Ciidamada dowladda iyo kuwa deegaanka oo iskaashanaya ayaa maanta waxay kala wareegeen argagixisada Al-Shabaab deegaano dhowr ah oo ka tirsan gobolka Shabeellaha Dhexe.

Howl-galkaan ayaa waxaa hogaaminayay Xildhibaannada kala ah Cismaan Xaadoole iyo Yuusuf Kabaale, waxaana Ciidamada ay dagaal la’aan la wareegeen degaanada kala ah; Cadcadeey, Cadaan laxeey, Nuur Dugle,, Maxaad Siciid , Booska Xasan Geedi, iyo Ceelka Maraweyne.

Deegaanada ay maanta la wareegeen ciidamada dowladda iyo kuwa deegaanka ayaa waxay ku yaallan inta u dhaxeeysa degmada Aadan-Yabaal iyo degaanka Masaajid Cali gaduud.

Saraakiisha horkaceysay howl-galka oo la hadlay warbaahinta ayaa sheegay inaysan wax iska caabin ah kala kulmin dagaal-yahaanada Al-Shabaab, oo iyagu isaga baxay markii ay ka warheleen ciidamada kusoo wajahan.

Howl-galadaan ayaa sii socon doona illaa inta laga gaarayo degaanada gobolka Galgaduud, haatana ay ku dow yihiin degmada Aadan-yabaal oo katirsan gobolka Shabeellaha Dhexe, sida ay sheegeen saraakiishu.

Waxaa sii xoogeysanaya kacdoonka dagaal ee kooxda Al-Shabaab looga saarayo Shabeellaha Dhexe iyo guud ahaan dalka, kaasi oo illaa hadda deegaano badan looga fara-maroojiyay kooxda.

Xudur (Caasimada Online) – Taliska qeybta 60-aad ee Ciidamada Xoogga Dalka Soomaaliyeed ayaa maanta soo bandhigay xubin ka tirsan kooxda Al-Shabaab oo isku soo dhiibay ciidamada dowladda ee ku sugan degmada Diinsoor.

Abshir Macallin idiris, oo magaciisu afgarashadu ay yahay Sahal, ayaa isku soo dhiibey ururka 154-aad ee taliska guutada 8-aad qeybta 60-aad ee ciidanka dhulka ee fadhiggooda yahay degmada Diinsoor.

Abshir ayaa markii uu isisoo dhiibayey watay qori nooca AK47 ah iyo booshkiisa, wuxuuna kooxda Al-Shabaab u qaabilsanaa dhinaca Jabhadda ama kuwa weerarada gaysta, sida ay sheegeen saraakiisha dowladda.

Wuxuu sheegay inuu kasoo qeyb galay weeraro badan oo ay kooxda Al-Shabaab ka geysatay deegaano ka tirsan gobollada Hiiraan, Shabeellaha Dhexe, Galgaduud, Mudug iyo degmada Afmadow ee gobolka Jubbada Hoose.

Ninkan oo saxaafadda la hadlay ayaa sheegay inuu kooxda Al-Shabaab ka tirsanaa muddo 5 sano ah, wuxuuna sheegay inuu markii uu kooxda ku biirayey ku sugnaa degaanka Gurbaan ee gobolka Baay

Bilihii la soo dhaafay ayaa saraakiisha ciidamada xoogga dalka, gaar ahaan qeybta 60-aad waxa ay sheegeen inay kordheen xubnaha katirsan Al-Shabaab ee isku soo dhiibaya, iyada oo ay socdaan howlgallo ka dhan ah Al-Shabaab.

Dowladda Soomaaliya ayaa ballan qaaday inay cafin doonto cid kasta oo Shabaab ka tirsan oo isku soo dhiibta ciidamada dowladda.

Kooxda Al-Shabaab ayaa hadda waxaa ku socdo kacdoon culus oo looga soo horjeedo kaasoo hadda si rasmi ah uga socdo gobolada Hiiraan, Shabeelaha dhexe iyo Mudug.

Jowhar (Caasimada Online) – Ciidamada Dowladda Soomaaliya ayaa weerar qorsheysan ku qaaday degaanka Ceel-hareeri oo ku yaalla xadka gobolada Hiiraan iyo Shabeellaha Dhexe, halkaas oo ay ku sugnaayeen dagaalyahano ka tirsan kooxda Al-Shabaab.

Dagaalka oo ay si wadajir ah u qaadeen ciidamada dowladda iyo dadka deegaanka ayaa socday muddo saacado ah, waxaana la isku adeegsaday hubka noocyadiisa kala duwan.

Taliyaha Guutada 16-aad kumaandooska ee Danab G/le Axmed Cabdulaahi Beeryare ayaa warbaahinta ciidamada qalabka sida u sheegay in dagaalka ay barbar socdeen duqeymo dhinaca cirka ah, islamarkaana lagu dilay 200 oo xubnood.

Wuxuu sheegay in Ciidanka DANAB oo kaashanaya dadka degaanka ay howlgalka si wadajir u fuliyeen, islamarkaana degaano dhowr ah oo u dhow degaanka Ceel-hareeri ay ciidamada la wareegeen.

Sidoo kale, wuxuu sheegay inay burburiyeen saldhigyo ay gobolka Hiiraan kaga sugnaayeen ayna sii wadi doonaan howlgallada ilaa iyo inta Al-Shabaab laga saarayo guud ahaan ďalka Soomaaliya.

Gobollada Hiiraan iyo Shabeellaha Dhexe ayaa waxaa ka qarxay kacdoon ka dhan ah kooxda Al-Shabaab, waxaana deegaanadaas kooxda looga dilay dagaalayahano badan waxaana sidoo kale laga qabsaday deegaano badan oo ay gacanta ku heysay sanado badan.

Muqdisho (Caasimada Online) – Ciidamada dowladda iyo maleeshiyada dib u xoreynta Gobolka Hiiraan ayaa la sheegay inay ka wareegeen difaacii ugu weynaa ee Al-Shabaab u yaallay Gobolka Hiiraan, kaasoo ku dhow xaruntooda degmada Aadan Yabaal ee Gobolka Shabeellaha Dhexe.

Dagaal culus oo billowday shalay subax ayaa soo gaaray illaa xalay, waxaana dhowr jeer lagu dagaalamay degaanno ka tirsan degmada Jalalaqsi, markii ay weerar ku qaadeen ciidamada dowladda iyo kuwa degaanka oo ka war helay Shabaab isku urursanaya halkaasi.

Saraakiisha maleeshiyada degaanka ayaa sheegay inay ugu danbeyn Al-Shabaab ka qabsadeen saldhiggii ugu weynaa ee Ceel-hareeri oo 20 KM u jira degmada Aadan Yabaal oo laga difaacayey, ayna gaarsiiyeen khasaare fara badan.

Wararka ayaa sheegaya in Al-Shabaab looga dilay dagaalka ilaa 40 dagaalame, dhaawacayna intaas ka badan yihiin, halka wararka qaarkood ay dhimashada ka badinayaan, waxaana guul ka sheegtay dagaalka saraakiisha ciidamada dowladda iyo maleeshiyada degaanka.

Waxaa dagaalka qeyb ka aahaa ciidmaada Danab oo taageero ka helaya Diyaaradaha Drone-ka Mareykanka. Dhinaca kale Al-Shabaab ayaa sheegay inay dagaalkii maanta ku dishay 36 askari oo uu ka mid yahay Axmed Muuse Fiidoow oo ah sarkaal u dhow Guddoomiyaha Gobolka Hiiraan.

Guuldarrada Al-Shabaab ee looga qabsaday degaanka Ceel-hareeri ayaa imaneysa ayada oo dhowaan laga qabsaday degaanka Masaajid Caligaduud ee gobolka Shabeellaha Dhexe oo ay ku lahaayeen saldhigga labaad ee ugu weyn ee ay ku lahaayeen gobolka.

Saraakiisha dowladda ayaa sheegaya inay hadda maalmo un naga xigto in Shabaabka laga saaro Aadan Yabaal.

Beledweyne (Caasimada Online) – Gudoomiyaha Gobolka Hiiraan Cali Jeyte Cismaan ayaaka hadlay arrin hadalhayn ka dhex dhalisay bulshada, ka dib markii uu dhowaan shaaciyay inay lacago ku bixinayaan dilka xubin kasta oo ka tirsan maleeshiyada Al-Shabaab.

Gudoomiyaha ayaa 23-kii bishii October abaalmarin lacageed guddoonsiiyay askar ka tirsan Ciidanka Xoogga Dalka iyo kuwa Macawiisleyda, kadib markii ay dileen xubno ka tirsanaa maleeshiyadaasi.

Gudoomiyaha ayaa sheegay inuu amray oo keliya in la dilo Shabaabka dagaalamaya iyo kuwooda sirdoonka ah, ayna tahay in sidaasi loo fahmo.

“Waxaan rabaa hal qodob inaan caddeeyo amaba iftiimiyo, oo ah dhacdadii maalin dhaweyd ka dhacday Aboorey. Anigu waxaan iri ragga qoryaha wato ee Al-Shabaabka ah iyo kuwa sirdoonka ah ee faltamaya madaxooda lacag baan saarnay,” ayuu yiri Gudoomiyaha.

Gudoomiyaha ayaa yiri “Allaha (SWT) wiilka anigu aan dhalay dembiga anigu aan la imaaddo annaa iska leh, wiilka dembiguu la yimaadana, hadduu qaangaarana asagaa iska leh, taasi soo ma cadda? Dembiga aan anigu galay wiilkayga Ilaahay ma u ciqaabayaa? Waa maya, sabab loogu ciqaabaa ma jirto.”

Gudoomiye Jeyte ayaa tilmaamay in kuwa uu amray in la dilo aanay ka mid ahayn xaasaska iyo carruurta Shabaabka, islamarkaana ay kuwaasi yihiin birimageeddo, ayna tahay in la daryeelo.

“Waa ku keligood, waxa aniga aan ka hadlayna ka mid ma ahayn, inaan caddeeyaa rabaa. Birimageedada kuma jirto waxa la dilayo, carruurta iyo dumarka kuma jiraan. Dadka birimageedada ah kuwaa waxaa loo baahan yahay in la xannaaneeyo oo laga saaro howsha shidada ah ee Shabaab ku jiraan,” ayuu yiri Gudoomiye Jeyte.

Jeyte ayaa hadalkiisa ku xoojiyay “Mowduucaas waxaan rabaa inaan saas u qeexo, ninkii waxaan ka hadlay wax aan ahayn ka shaqeeyay, aniga la iguma dabaqi karo, Soomaali inay fahamtaa rabaa.”

Muqdisho (Caasimada Online) – Go’aankii dowladda federaalka Soomaaliya ee ku aadana in Ganacsatada aysan lacag siin karin Al-Shabaab ayaa waxaa soo baxeysa in weli si rasmi ah uusan u noqon karin dhaqan-gal.

Mid kamid ah Ganacsatada magaalada Muqdisho oo la hadlay VOA ayaa sheegay in uusan isbedel badan ku iman lacagihii ay Al-Shabaab siinayeen Ganacsatada.

Waxa uu sheegay in kooxda ay ku billowday Ganacsatada cago-jugleyn hore leh, xilli ay wajahayaan cadaadis uga imanaya dowladda oo ayadu rabta inay meesha ka saarto dhaqaalaha ay Al-Shabaab ka hesho Ganacsatada dalka.

“Waxaa la iisheegay Nin diiday in uu telefoon ka qabto (Al-Shabaab) waxaa loo soo direy Nin oo inta uu utagay ku yiri telefoonka hada qaban weydo waa ka shalaaye, markaas uu ka qabtay telefoonka oo waxa lagu yiri lacagta soo tuur,” ayuu yiri Ganacsadahaan la hadlay VOA oo magaciisa loo qariyay sababo amni.

Sidoo kale waxa uu tilmaamay in sababta u weyn ee Ganacsatada weli kusii qasbaysa inay Al-Shabaab lacag siiyaan ay tahay inaysan haysan damaanad qaad buuxa oo amnigooda ah.

“Waa baqayaan oo damaanad ma haystaan inay badbaadayaan. Waxaa diidaya inay Nimankaan lacagta joojiyaan naftooda ayey u baqayaan.”

Arrintaan ayaa banaanka usoo saareysa inay xiligaan adag tahay in Ganacsatada ay joojiyaan lacagaha ay siinayaan Al-Shabaab, illaa inta ay dowladda kala imaaneyso qorshe dhab ah oo lagu dhaqan-galin karo go’aankaan.

Muqdisho (Caasimada Online) – Ciidamo ka tirsan kuwa dowladda federaalka Soomaaliya oo loo abaabulay hab Beeleed ayaa waxay maanta diyaarad ka qaaday garoonka diyaaradaha Aadan Cadde ee magaalada Muqdisho.

Xildhibaano ka tirsan golaha Shacabka ayaa maanta ciidamadaan kasii sagootiyay garoonka diyaaradaha Aadan Cadde, kuwaasi oo sheegay in ciidamadaan ay door muhiim ah ka qaadan doonaan dagaalka ka dhanka argagixisada.

Ciidamadaan oo kasoo jeeda beesha Duduble ayaa waxay kusii wajahan yihiin magaalada Dhuusamareeb, halkaasi oo ay kaga biiri doonaan kacdoonka dagaal ee ka dhanka ah Al-Shabaab, kaasi oo ay iska kaashanayaan ciidamada dowladda iyo kuwa deegaanka.

Wararka ayaa intaas kusii daraya in ciidamadaan ay si gaar ah qeyb uga noqon doonaan ciidamo loo diyaariyay howl-gal Al-Shabaab looga saarayo degmada Ceelbuur ee gobolka Galgaduud.

Waxaa muddooyinkii dambe socday abaabul ballaaran oo beelaha ay uga qeyb noqonayaan dagaalka ka dhanka ah Al-Shabaab, kaasi oo durtaba laga gaaray guulo waaweyn.

Al-Shabaab ayaa waxaa kacdoonkaan dagaal looga xoreeyay deegaano badan oo ay gacanta ku hayeen sanadihii dambe, waxaana weli gobolada dalka ka sii socda howl-galada lagu baacsanayo dagaal-yahanaada kooxda.

Muqdisho (Caasimada Online) – Ciidanka xooga dalka iyo kuwa deegaanka oo iskaashanaay ayaa maanta kooxda Al-Shabaab kala wareegay deegaano muhiim ah oo ka tirsan degmada Aadan Yabaal ee gobolka Shabeellaha Dhexe.

Afhayeenka wasaarada gaadhaandhiga Janaral Caanood oo howl-galadaas uga waramay Radio Muqdisho ayaa waxa uu sheegay in ciidamadu ay burburiyeen labo dhufeys oo waaweyn oo argagixisada ku laheyd deegaanada laga wareegay.

“Howl-galkaas oo ka dhacay Xabaal-Xuseen iyo Gurac-dheere oo aheyd labo dhufeys oo waaweyn oo cadowgu ugu tala-galay in Aadan Yabaal looga imaan dhanka, waa labo deegaan oo muhim ah oo ayagu haysteen, waxay u jireen magaalada Aadan Yabaal 18-20KM,” ayuu yiri.

Sidoo kale waxa uu sheegay in howl-galka argagixisada looga saaray deegaanadaas muhiimka ah ay ku dhaawacmeen labo askari oo kaliya, islamarkaana ay ciidamadu si buuxda gacanta ugu hayaan deeganadaas.

Afhayeenka marnaba ma sheegin khasaaraha Al-Shabaab kasoo gaaray howl-galkaas lagala wareegay deegaanada hoos yimaada Aadan Yabaal.

“Laba Askari ayaa xagayaga ku dhaawacantay, laakiin iyaga wixii khasaare ah weli nalooma soo sheegin oo dib ayaa kasoo sheegi doona.”

Ugu dambeyntiina waxa uu sheegay in howl-galada ay sii socon doonaan, islamarkaana ay ciidamada uga daba-tagi doonaan deegaanada kale ee ay u firxadeen dagaal-yahanada Al-Shabaab.

Muqdisho (Caasimada Online) – Taliyaha hay’adda Nabad-sugidda iyo Sirdoonka Qaranka ee Soomaaliya, Mahad Maxamed Salaad ayaa maanta sameeyey arrin lama filaan ku noqotay dad badan, kadib markii uu kasoo muuqday munaasabad ka dhacday garoonka diyaaradaha Aadan Cadde.

Munaasabaddan oo ay dowladdu kula wareegeysay gargaar ay soo dirtay dowladda Itoobiya ayaa waxaa ku sugnaa mas’uuliyiin kala duwan, sida duqa Muqdisho, wasiirka caafimaadka, wasiirka waxbarashada, wasiirka warfaafinta, taliyaha NISA iyo xubno kale.

Deeqda ka timdi Itoobiya ayaa ah daawo loogu talagalay dadkii ku waxyeeloobay qaraxyadii Zoobe 2, ayada oo sidoo kale ay la socdeen dhaqaatiir laga soo diray Addis Ababa, waxaana gargaarkaan wasaaradda caafimaadka ku wareejiyey safiirka Itoobiya.

Wasiirka wasaaradda caafimaadka Dr Cali Xaaji Aadan ayaa u mahadceliyey dowladda Itoobiya, sida ay uga soo jawaabtay dalka wasaaraddiisa, kadibna deeqda ay soo dirtay.

Dhinaca kale qaar ka mid ah shacabka Soomaaliyeed ee isticmaala baraha bulshada ayaa si weyn uga falceliyey in taliyaha NISA uu ka soo muuqdo la wareegida gargaarka Itoobiya.

“Wakaas madaxii nabad sugidda dalku caawamida tirsanaya” ayuu yiri Aadan Maxamed oo ka mid ah dhalinyarada isticmaala Facecook ee ka falceliyey arrintaan.

“Oo kan muxuu meesha ka dooney bilo ku ciyaadhey” ayuu isna yiri wiil kale oo lagu magacaabo Khayre Cali Nuur.

“Fahad sidaan ma lagu garaa?” ayuu isna yiri Cabdirisaaq Aadan Cabdisalaan oo ka mid ah dadka isticmaala Faceebok.

“Mahad Salaad ma iska hubisay daawadan nooga timid Itoobiya” ayuu dhankiisa yiri Nasiib Cabdi Tahliil oo qoraalkan uga falceliyey arrinta uu maanta sameeyey Taliye Mahad Salaad.