Muqdisho (Caasimada Online) – Xildhibaan Siciid C/qaadir oo ka mid ah Baarlamaanka Soomaaliya, ayaa arrimo kala duwan ka hadlay isaga oo wareysi siiyey mid ka mid ah FM-yada Muqdisho; waxyaabaha uu soo qaaday Xildhibaan Siciid waxaa ka mid ah socdaal uu shalay Magaalada Garoowe ku gaaray Wakiilka Xoghayaha Guud ee Q/Midoobay u qaabilsan Soomaaliya Nicholos Key iyo doorka Dowladda Talyaaniga ee arrimaha Soomaaliya, waxaana uu sheegay in Nicholos Key uusan xaq u laheyn inuu u dhoofo Garoowe, isaga oo aan ruqsad ka haysan Dowladda Soomaaliyeed.

Xildhibaan Siciid wuxuu sheegay  in Soomaaliya ay ka jirto Dowlad adduunka uu ictiraafsan yahay, oo aan loola dhaqmi karin sida dal maxmiyad ku jira, isaga oo Madaxda Dowladda ugu baaqay in aysan ka aamusin xadgudubyadda lagu samenayo sharciga, waxaana uu intaa ku daray  in xittaa haddii Dowladda ay ka dhaadhacsan tahay in aysan dalka wada xukumin in ay aaminaan in ay haystaan sharciyad caalamku aqoonsan yahay.

“Hay’ad kasta oo u safreysa meel  Soomaaliya ka mid ah waa in ay Dowladda soo wargelisaa” Ayuu yiri Xildhibaan Siciid, wuxuuna intaasi ku daray in Dowladdu haddii ay ka aamusto qaladaadka muuqda in taasi macnaheedu ey tahay  ogolaansho, isaga oo ku baaqay in Dowladdu hadasho halkii ay ka aamusi laheyd.

“Waxaan fahmi la’ahay waxa ku koobay awoodda Dowladda Muqdisho oo keliya; oo aaney Dowladdu wax xil ah isaga saareyn Goboladii dalka, siddeey ku dhici kartaa in wufuud caalami ah ay tagaan Goboladii dalka iyaga oo aan ku soo wargelin Dowladda ?” Ayuu yiri Xildhibaan Siciid wuxuuna intaasi ku daray in hadalada ka imaanaya Madaxda Maamul Goboleedka Puntland oo gaaray ilaa heer ay u dhaqmaan sida Dowlad gaar ah, oo yiraahdaan waxaan xiriirkii kala laabanay Dowladda Soomaaliya.

Xildhibaankan mar uu ka hadlayey Gobolada Soomaalida, wuxuu sheegay in haddii la gargaarayo Gobolada Soomaaliya in si caddaalad ah oo siman loo gargaaro, oo Gobol aan Gobolka kale laga fadli yeelin.

Xildhibaan Siciid wuxuu soo dhoweeyey tillaabada hubka lagaga uruurinayo Muqdisho, isaga oo ku baaqay in hub uruurintu ey dan u tahay Muqdisho.

“Kooxaha ku doodaya hubka dib u heshiisiin ayaa ka horeysay; yey tahay cidda la heshiisiinayo.? Muqdisho in hubka lagu uruuriyo bulshada ku dhaqan ayey dan u tahay;  4-ta dambiilayaal ee aaminsan haddii hubka la idinka qaado waxaad noqoneysaan bartilmaameed,  kuwaasi ma marin habaabin karaan rayiga bulshadda” Ayuu yiri Xildhibaankaasi, wuxuuna intaasi ku daray in hubka uu galo gacanta Dowladda,  Dowladduna ay  waajib ku tahay  in ay ilaaliso ammaanka muwaadiniinteeda.

Xildhibaan Siciid mar uu ka hadlayey xiriirka Talyaaniga iyo Puntland wuxuu sheegay in heshiiskaasi uu yahay mid ku saleysan dano dhaqaale oo u dhexeeya shaqsiyaad Talyaani ah dilaal ka ah taageero Dowladda Talyaaniga ay siiso Soomaaliya iyo dhinaca kalena shaqsiyaad Soomaali ah oo horay xiriir ula lahaa Talyaaniga.

“Talyaaniga maaligelinta uu siinayo Garowe oo beel keliya ay degan tahay waxeey horseedeysaa in Talyaanigu waayo kalsoonida inta badan shacabka Soomaaliyeed”

“Hiilada uu Garowe la garab taagan yahay ha noo fasiro ujeedada laga leeyahay.? waxey noqon kartaa isla sheekadii 80-meeyadii markii uu Talyaaniga ay yiraahdeen Soomaaliya ayaan gargaareynaa oo   lacagihii loogu talogalay in mashaariicdaasi lagu fuliyo ay wada cuneen shaqsiyaad isugu jira Talyaani iyo Soomaaliya, dadkii Talyaaniga ahaa  waagaas madaxda ka ahaa mashruucii FAI  waxaa la maxkamadeeyey, dhinaca Soomaaliya waxaa madax ka ahaa nin la yiraa Juriile isla isagii ayaa meesha hadda qabqable ka ah, oo mar walba oo qof ka socda Puntland ama Dowladda dhexe uu Talyaaniga u socdaalaayo isaga ayaa la kaxeystaa, ileyn wuxuu khabiir ku yahay wax isdaba marinta, waxaana mar walba oo Talyaaniga mashaariic laga soo qaato la yiraa Soomaaliya ayaan ku maalgelinaynaa meeshaas ayaana lacagta lagu kala qeybsadaa” Ayuu yiri Xildhibaan Siciid, wuxuuna intaa ku daray in Talyaaniga meheradiisu tahay musuq-maasuq.

Caasimada Online

Xafiiska Muqdisho

[email protected]

Muqdisho (Caasimada Online) – Waxaa goordhow magaalada Muqdisho lagu soo gabagabeeyay xaflad ballaaran oo lagu soo dhaweenaayay madaxweynaha cusub ee maamulka Khaatumo State, Prof Cali Khaliif Galeyr.

Xafladda waxaa ka soo qeybgalay xildhibaanno, wasiiro iyo wasiiro horrey uga tirsanaa dowladihii kumeel gaarka iyo siyaasiiyiin ka soo jeeda deegannada Khaatumo State iyo magaalada Muqdisho, sidda uu ku soo warramay wariye Caasimada Online ka tirsan oo ka qeybgalay xafladda.

Sidoo kale, waxaa xafladda ku sugnaa dadweyne aad u fara badan kuwaasoo soo dhaweenaayay doorashadda ka dhacday Khamiistii hore deeganka Saaxdheer ee u dhow soohdinta Itoobiya laguna doortay ra’iisal wasaarihii hore ee Soomaaliya.

Intii xafladda ay socotay waxaa qadka Taleefonka uga soo qeybgalay madaxweynaha cusub ee Khaatumo Cali Khaliif Galery wuxuuna bogaadiyay xafladda qaabka ay u dhacday iyo cidda ka soo qeybgashay isagoona ballan qaaday in uu qaadan doono dhammaan wixii tallo iyo waano ah oo loo soo jeediyay intii ay xafladda socotay.

Dhammaan xildhibaannadii iyo wasiiradii ku sugnaa xafladda ayaa madaxda dowladda ugu baaqay in ay taageeraan doorashadda uu ku guuleystay Cali Khaliif isla markaana la siiyo taageero la mid a kuwa la siiyo maamul gobaleedyada ka dhisan dalka.

Dadweyne u badan haween oo aad u labisan ayaa ka soo qeybgalay xafladda waxaana ay wateen calanka Soomaaliya iyo Khaatumo State.

Dowladda Soomaaliya ilaa hadda si rasmi ah ugama hadlin doorashadda uu ku guuleystay Cali Khaliif Galeyr oo ahaa xildhibaan baarlamaanka Soomaaliya ka tirsan. 

Caasimada Online

Xafiiska Wararka Muqdisho

[email protected]

Muqdisho (Caasimada Online) – War murtiyeedkii kasoo baxay golaha wasiiradda oo ay goobjooga wada ahaayeen Madaxweynaha Soomaaliya Mudane Hassan Sheikh iyo Raisul wasaaraha Soomaaliya Cabdi Weli Sheekh oo sumadiisuna ahayd Ref: XRW/OM/PR 0465/08/14 soona baxay 16-ka bisha August 2014 ayaa shacabka Soomaaliya, wuxuu ka doonayaa Masuuliyiinta Dawladda Cadeyn siyaasada Dawladda ee guud ahaan Dalka iyo Jawaabaha su’aalaha hoos ku qoran :-

1- Muxuu yahay qorshaha dawladda ee amaanka Gobolada ka baxsan caasimada Soomaaliya? Maamuladii hore u jiray sida Somaliland iyo Puntland maxuu yahay qorshaha dawladda ee Laamaha amaanku ku gaarayaan Maamuladaa? sidoo kale Maamulada Dawladaha Federaalka kamid noqonayo oo dawladu aqoonsatay ama hirgelinayso sida Maamulka KMG ah Juba? Maamulka Koofur Galbeed?, Maamulka Bartamaha Soomaaliya ee Mudug iyo Galgaduud?

2- Maxay amaan soo kordhin kartaa in Gudoomiyayaashii hore Maliishiyaadkooda hubka laga dhigo halka Gudoomiyayaasha dawladu magacaawday oo bedelay gudoomiyayaashii hore qorteen Maliishiyaad kale, hubna kasoo gateen Suuqyada Hubka Muqdisho??? Sidoo kalana Masuuliyiinta Dawladda min wasiir, Xildhibaan , iyo dhamaan masuuliyiinta kale ee dawladda qortaan Maliishiyaad, qaarna kasoo wataan Milateriga iyo Booliiska, Hubkana suuqa uga soo gadaan!!! Maadaama uusan jirin qorshe Wasaaradda Amnigu ku siinayso Ilaalo Masuuliyiinta kala duwan ee Dawladda?

3- Iyadoo Shacabka Soomaaliyeed ogsoon yahay in Dawladda Guud ahaan iyo Madaxda Laamaha Amniga aysan maamulin Maamulada Somaliland, Puntland sidoo kalena Maamulkii dawladdu dhowaan aqoonsatay ee MKG ah Juba-na aysan hoos tegin Ciidamada Jooga Wasaaradda gaashaandhiga , Wasaaradda Amniga Muxuu yahay qorshaha Dawladda ee Soomaaliya ugu sameynayaan Ciidamo Milateri , Booliis, Nabadsugid ee hoos tagaya Wasaaradaha Gaashaandhiga iyo Amniga qaranka? Mise Dawladdu waxay Soomaaliya u taqaanaa oo kaliya Muqdisho?

4- Marka laga reebo hawlgalo amni oo u baahan kara in si degdeg ah loo fuliyo maxaa dawladda u diiday in shacabka soomaaliyeed u soo bandhigaan qorshaha hub ka dhigista dalka guud ahaan, sida in dadka lagu wargeliyo in ciidan aan ahayn ciidamada dawladda (Milateri, Booliis, Nabadsugid) inaysan hub haysan Karin, cidii hub u heysata inay amaankeeda ku ilaashatana oo shacab, ganacsato, masuuliyiin hore, shirkado, hayaddo Caalami ah sida UN, INGO iyo LNGO-ba lagu wargeliyo xafiisyo ay tagi karaan si hub cayiman oo dawladu ogtahayna loogu ogolaado hadii loo arko inay macquul tahay sababta uu ugu baahan yahay in hubka loogu sharciyeeyo, hubkii ka badan inta dawladdu u ogolaatana dawladu kala wareegto.

5- Iyada oo ay Muhiim tahay in hawlgalada amniga lagu sugayo lasii wado miyeysan muhiim ahayn in wasaaradaha amniga iyo Gaashaandhiga isi saxaan marka hore iyaga oo xaqiijinaya:-

A- in Booliiska iyo Milateriga Soomaaliya noqdaan kuwo dhamaan aqoonsi heysta, degan xerooyin iyo saldhigyo loo cayimay oo ay ka hawlgalaan. Wax laga bedelo in tuutaha booliiska iyo Milateriga uu yahay aqoonsiga ciidanka dawladda. In ciidamada ka tirsan Laamaha amniga ee aqoonsi weydiinaya shacabka noqdaan kuwo wax aqrin kara? Kuwo yaqaana Aqoonsiga ay raadinayaan midka uu yahay? Kuwo aqoonsi weydiiya Ciidamada hubeysan oo aan aqoonsi weydiin kaliya shacabka? Ciidanka Jidadka taagan uusan noqon kuwo og tirada soomaalida ee Dawladda u shaqeysa yihiin tiro aad u yar? Shacabku xaq u leeyihiin in wadooyinka maraan markii la baaro kadib oo aqoonsi Dawladda kaliya aan jidadka loogu ogolaan dadweynaha?

B- In wax laga bedelo in ciidamo istaaf ah oo hubaysan in la heysto ay ku xiran tahay inaad kamid tahay masuuliyiinta Dawladda sida Wasiir, Ku xigeen, Xildhibaan, Agaasime , Gudoomiye Gobol, Gudoomiye Degmo kaliya ee ay dawladu sameyso gaar ahaan wasaarada amniga qorshaha ilaalo siinta Masuuliyiinta dawladda, qorshaha ilaalo siintana noqdo mid dawladu sameyso oo min xildhibaan, wasiir, W/kuxigeen, agaasime iyo Madaxda kale ee dawladda la go,aamiyo ilaalada xildhibaanka inta ay noqoneyso, ilaalada wasiirada inta ay noqoneyso, Ilaalada W/ku xigeenka inta ay noqoneyso, ilaalada agaasime inta ay noqoneyso, ilaalada gudoomiye gobol inta ay noqoneyso, ilaalada gudoomiye degmo inta ay noqonayso, ilaaladaas intii isku title ah qaadanaysana ay siiso wasaarada amniga, hubka iyo rasaasta ay haystaana la diiwaangeliyo, xabad rasaas ah hadii ay ridaana Masuuliyiin iyo xafiis ay wargeliyaan sababta ay u rideen la sameeyo.

C- Milateriga iyo Booliiska ku qoran saldhigyada Muqdisho iyo Goboladii kale oo Booliis iyo Milateri Soomaaliyed joogo la xaqiijiyo in Saldhigyada iyo xerooyinka ay ku qoran yihiin ka hawlgalaan.

D- Milateriga iyo Booliiska Soomaaliya oo Magac ahaanta u jira oo qaarkood mar hore dhinteen, qaarkood shaqada isaga tageen, qaarkood ka shaqeeyaan Hay’addo kale oo mushahar ka qaataan, qaarkood ilaalo ka dhigteen Masuuliyiinta ku qabiilka ah ee dawladda in dib loo saxo oo la xaqiijiyo inta run ahaan u jirta oo joogta oo dhab ahaan u shaqeysa, inta dhimatay, inta iska tagtay iyo inta u shaqo tagtay hay,ado kale oo ay tahay in la bedelo.

6- Dawladu waxay sheegtay in Hay’adaha amniga iyo Ciidamada qalabka sida kaliya hub heysan karaan iyo cidii ruqsad loo siiyo, Ruqsada hub heysashada marka laga tago go’aanka aan qeexneyn ee ah hay’adaha amniga ayaa bixin kara ruqsada heysashada hubka, Waa hay’addee ka tirsan Laamaha amniga ee bixin karta ruqsada Haysashada Hubka? Mise sidii hore ayuu qofba u doonanayaa masuulkuu doono sida Wasiirka Amniga, Ku xigeenkiisa, Agaasimaha Hay’adda nabadsugida, Taliska Booliiska Heer qaran iyo heer Gobol, Madaxda Gudoomiyayaasha Gobolada, Degmiiyinka?

7- Xukuumadu waxay sheegtay in markasta dhawreyso xuquuqda aadanaha iyo sareynta sharciga (respect to the supremacy of law and the rule of law), Marka laga reebo qoraalkaan maxaa cadeynaya dhowrista Xuquuqda shacabka Soomaaliya? Maxay ugu Talo gashay xuquuq ahaan iyo sharci ahaan shacabka Soomaaliyeed eek u dhintay, ku dhaawacmay , kuwo guryahoodii ku burbureen Hawlgalkii Ciidamada dawladda iyo Kuwa AMISOM?

8- Xukuumadu waxaa ay sheegtay in Warbaahinta madax banan dhowraan Sharciga, Ma jiraa sharciga Saxaafadda oo Dawladdu iyo Saxaafaddu isla meel dhigeen, Baarlamaanka-na loo gudbiyey oo la meel mariyey? Iyada oo ay muhiim tahay in la dhowro Xuquuqda Saxaafada, Xuquuqda Muwaadiniinta maadaama aan la sameyn sharcigii warbaahinta iyo saxaafada madax banaan ma loo qaadan karaa hawlgalkii Laamaha amniga Ku xireen Idaacadaha Shabelle iyo SKY kuna qaateen qalabkii idaacadahaas ku hawlgalayeen mid lagu caburinayo Saxaafada xorta ah oo lagu cabsi gelinayo idaacadaha kale inaysan ka hadlin qaladaadka dawladda iyo Musuqmaasuq baahsan eek a dhex jira dawladda Soomaaliya?

9- Xukuumadda JFS waxay sheegtay inay abuurayso oo dhowaan soo bandhigayso Khad (Taleefoon) gaar ah oo cidii qabta tabasho, wargelin iyo Talo bixin kala soo xiriiri karto Hay,addaha Amniga, Khadkaas ma wuxuu noqonayaa mid quseeya Muqdisho kaliya? Hal khad ma kaafin karaa tabashada shacabka? Khadadka shacabka u gudbinayaan cabashadooda, wargelintooda ma noqonayaan kuwa shaqeeya 24-ka saacba? Warbixin ma laga sameynayaa weekly ah ama Bille ah Cabashada soo gaartay laamaha amniga iyo waxa ay ka qabteen?

Su’aalahaan kore iyo kuwo kale oo fara badan ayaa shacabka Soomaaliyeed uga baahan yahay dawladda Soomaaliya inay uga jawaabto shacabka Soomaaliya si shacabku ugu kalsoonaado dawladda Soomaaliya iyo wax qabadkeeda.

Caasimada Online

Xafiiska Muqdisho

[email protected]

Muqdisho (Caasimada Online) – Ilo-xog-Ogaal ka tirsan Maamulka Gobolka Banaadir, ayaa inoo xaqiijiyay in Guddoomiyaha Gobolka uu xil ka qaadis ku sameynaayo qaar ka tirsan Guddoomiyayaasha Degmooyinka.

Guddoomiyaha Gobolka ayaa waxaa la filaaya in maalmaha soo socdo uu xilka ka qaadi doono Gudoomiyaha Degmada Yaaqshiid Cismaan Maxamed Cadaawe.

Xogtu waxa ay sheegeysaa in Xilkaasi loo magacaabi doono Bare Food Cadde oo horay ula soo shaqeeyay Maamulkii hore ee Gobolka Banaadir, waxaana la sheegayaa in xil ka qaadista Gudoomiyaha ay ka dambeyso kadib markii uu si waafi ah u gudan waayay waajibaadka Degmada ka saaran, sida ay xogtu sheegeyso.

Sidoo kale, Guddoomiyaha Gobolka Banaadir Xasan Max’ed Xuseen”Muungaab” , ayaa waxa uu xil ka qaadis Ceynkaasi ah ku sameyn doonaa illaa Afar Guddoomiye kuwaasi oo la sheegay inay wax ka qaban waayen Ammaanka Degmadooda.

Lama Oga shaqsiyaadka loo wado Degmooyinka kale inkastoo warar hoose ay sheegayaan in Xil ka qaadista ay saameyn doonto Guddoomiyayaasha Degmooyinka Xamar-Jajab, Waabari, Dharkiinley iyo Wardhiigley.

Caasimada Online

Xafiiska Muqdisho

[email protected]

Muqdisho (Caasimada Online)-Labo Sarkaal oo darajo hoose ka ah Ciiddanka Uganda (UPDF), kuna eedeysan inay lunsadeen 100 xirmo oo rasaas ah ayaa la amray in Xabsiga lagu celiyo, tan iyo maalinta Talaadada oo dib loodhegeysanayo dacwadooda.

Labada Sarkaal oo lagu kala magacaabo Dhamme Bosco Mwanga oo 32-jir ah iyo Gaashaanle David Eloku oo 33-jir  ayaa dib loogu celiyey Xabsiga Milliteriga ee Makindiye.

Saraakiishaasi oo ka tirsanaa Guutadda Ciiddanka Uganda ee uu farriisinkooda dhexe ahaa Deegaanka Nambar Konton ee Gobalka Sh/hoose ayaa lagu soo oogay inay saxiix la’aan rasaas fara badan kala baxeen Xeradda, iyadoo lagu tuhunsan yahay inay suuq madow ku iibiyeen.

Sarkaal saddexaad oo lagu magacaabo G/sare Benson Olanya ayaa isagana ka mid ah dhowr Saraakiil sarsare oo ka tirsan Ciiddanka UPDF ee qeybta ka ahaa Hawlgalka AMISOM, waxaana lagu soo oogay falal isugu jira shidaal uu dhacay, Awoodiisa oo uu ku takri-falay iyo eedeymo la xiriira gogol-dhaaf.

Sarkaalkan oo Taliye ka ahaa Guutadda 343aad ee qeybta ka ahaa Hawlgalka AMISOM  waxaa toddobaadkii hore la dhigay Isbitaalka Milliteriga Bombo Army Hospitaal oo ku yaalla Degmadda Luweero, isagoo la il-daran cuddurka Macaanka ama Diabetic.

Afhayeenka Milliteriga Boliska Uganda, Dhamme Geoffrey Burushana ayaa sheegay inuu Sarkaalkaasi muddo dheer qabay cuddurkaasi.

Xigasho: New Vision

Caasimada Online

Xafiiska Muqdisho

[email protected]

Muqdisho (Caasimadaa Online) – Wasiirka arrimaha dibedda Soomaaliya, Dr. Cabdiraxmaan Ducaale Beyle ayaa ka warbixiyay warbixin lagu qoray Wargeyska The State ee Kenya ka soo baxa kaasoo Sabtidii qoray in dowladda Kenya ay ka carootay dowladda Soomaaliya in ay markii labaad ka baaqato shir looga hadli lahaa dib u celinta qoxootiga Soomaalida ee Kenya ku nool.

Wasiirka arrimaha dibedda oo u warramay VOA-da ayaa tilmaamay in wax yaabaha labada dal ay isku khilaafsan yihiin uu la xiriiro halka lagu qabanaayo shirka labaad ee looga hadlaayo qoxootiga Soomaalida ee Kenya, dowladda Somalia-na aysan aqbali karin inay mar walba Kenya u raacdo rabitaankeeda.

Wuxuu sheegay oo kale in dowladda Kenya gaar ahaan wasiirka arrimaha dibedda Amiina Maxamed ay qoreyn warqad ay ku lee yihiin shirka labaad halagu qabto Muqdisho, balse wuxuu tilmaamay in ay tiri Nairobi ayaa lagu qabanayaa.

Wuxuu sheegay in wax khilaaf ah oo sidaas u buuran aanu jirin balse la isku maandhaafsan yahay halka uu ka dhacay shirka labaad oo markii hore ahayd ballanta Muqdisho in lagu qabto, dowladda Somalia-na ay go’aankeeda ku saxan tahay

Wasiirka arrimaha dibedda ee Soomaaliya ayaa rajo fiican ka muujiyay in la xaliyo khilaafka soo baxay isla markaana ay diyaar u yihiin siddii loo soo celin lahaa qoxootiga Soomaalida ee Kenya ku nool.

Horrey ayaa waddamada Kenya, Soomaaliya iyo UNHCR ay ugu heshiiyeen in qoxootiga Soomaalida ee Kenya ku nool dib loogu celiyo dalka Soomaaliya.

Caasimada Online

Xafiiska Wararka Muqdisho

[email protected]

Garoowe (Caasimada Online) – Wakiilka gaarka ah ee Qaramada Midoobay u qaabilsan Soomaaliya, danjire Nicholas Key ayaa isagoo ka hadlaayay xaflad lagu xusaayay sannad guuradii koobaad ee ka soo wareegatay markii la dhisay xafiiska QM ee Soomaaliya UNSOM ayuu sheegay in Puntland ay hooyo u tahay dowladda fedaraalka Soomaaliya maadama ay tahay buu yiri meesha lagu soo unkay.

Mr. Key ayaa ku celceliyay in Puntland ay u baahan tahay dowladda Soomaaliya, dowladda Muqdishana ay u baahan tahay Puntland.

Danjiraha QM ee Soomaaliya ayaa xusay in uu ku rajo weyn yahay siddii uu dib ugu soo laaban lahaa xiriirka Puntland iyo Soomaaliya maadama ay kala marmaarmin labada dhinac.

Wuxuu sheegay in uusan Garoowe kaliya u immaan dabaal-degga sannad-guuraddii koobaad ee UNSOM ee uu u yimid siddii la isugu soo dhaweyn lahaa Puntland iyo dowladda fedaraalka Soomaaliya.

Hadalka Key ayaa imaanaya iyadoo isla xafladda ka dhacday Garoowe uu ka sheegay madaxweynaha Puntland in ay diyaar la yihiin siddii dib loogu celin lahaa xiriirka ka dhexeeya iyaga iyo dowladda fedaraalka Soomaaliya.

“Key wuxuu yiri waxaan dhiseebaa buundo u dhexeysa Puntland iyo Dowladda Soomaaliya, annaga waxaan lee nahay dhinaceena diyaar ayaan la nahay ee waa in uu isagana u sheegaa qoladaas Xamar inay buunadada ka joojiyaan dubaha ay la dhacayaan” ayuu yiri Gaas.

Marka loo eego xafladda lagu Garoowe ee lagu xusaayay xafiiska UNSOM waxaa muuqata in Puntland lagu qancinaayo in ay noqotay meeshii ugu horreysay ee lagu qabto xaflaladda sannad-guuradii koobaad ee UNSOM maadama ay ahayd in lagu qabto Muqdisho oo ah saldhigga ugu weyn ee UNSOM.

UNSOM ayaa xafiisyo ku leh Muqdisho, Kismaayo, Baydhabo iyo Garoowe.

Soomaal

Caasimada Online

Xafiiska Wararka Garoowe

Nairobi (Caasimada Online) – Siyaasiga Xaaji Maxamed Yaasiin oo shir saxaafadeed ku qabtay magaalada Nairobi ayaa sheegay in aysan jirin dood dhex martay isaga iyo Prof. Cali Mohd Geedi, inkasta oo Video arrintaas muujinaya uu jiro. Xaajiga wuxuu sheegay in dhalinyaro fidno ka shaqaysa ay khudbadaydiisii iyo tii Cali googoysay una ekeysiisay dood.

Sidoo kale Musharaxii hore Madaxawaynaha Xaaji Yaasiin ayaa beeniyey inuu wax ka sheegay madaxdii hore ee Somalia sida Aadan Cabdule, Cabdirashid, Cabdirazaaq iyo Cabdullahi Isse.

Waxa kale oou u beeniyey inuu yiri Hawiye ama qaabil kale ee Soomaaliyeedba Xukun ehel uma aha, wuxuuna raaciyey in damiirkiisa iyo caqligiisa uusan u saamaxayn erayo noocaas oo kale ah.

Sidoo kale Xaaji Yaasiin waxa uu sheegay inuu codsanaayo diyaarna u yahay inay dood siyaasadeed oo fool ka fool ah dhex marto isaga iyo Pro. Geedi oo ay kala difaacaan mabaadi’da kala ah ku dhaqanka Shareecada iyo qaabka Cilmaanniyadda ee reer Galbeedka ku dhaqmaan ee siyaasiin badan jeclyihiin inay taageero kaga helaan dalalka shisheeyaha.

Halkan ka daawo Xaaji Maxamed Yaasiin

Caasimada Online

Xafiiska Nairobi

[email protected]

Muqdisho (Caasimada Online) – Ergayga gaarka ah ee Qaramada Midoobay u qaabilsan Soomaaliya, Nichalas Key ayaa maanta oo Axad ah booqasho ku tagay magaalada Garoowe isagoona la kulmay madaxda maamulka Puntland.

Kulanka labada dhinac oo ka dhacay xarunta madaxtooyada ee Garoowe ayaa waxaa kaloo ka qeybgalay wasiiro ka tirsan maamulka Puntland wuxuuna ahaa mid albaabada uu xiran yahay oo saxaafadda ay banaanka ka joogto.

Markii uu kulan soo dhammaaday ayaa waxaa saxaafadda la hadlay madaxweynaha maamulka Puntland iyo danjire Key.

Madaxweynaha Puntland ayaa sheegay in ay aad ugu faraxsan yihiin immaatinka danjire Key oo markii lixaad uu soo booqdo Puntland, isagoona intaas ku daray in ay ka hadleen arrimo ay ka mid tahay xiriirka UNSOM iyo Puntland iyo xiriirka xumaaday Puntland iyo dowladda fedaraalka wixii ka dambeeyay markii la saxiixay heshiis lagu dhisaayo maamulada dhexe.

Madaxweyne Gaas ayaa sheegay in ay u sheegeen wakiilka QM ee Soomaaliya Nick Key sidda ay u doonayaan in la sii hormariyo howlaha fedaraalka iyo in la gaaro yoolka 2016-ka si doorasho ay uga dhacdo dalka.

Danjire Key ayaa isna sheegay in uu aad ugu faraxsan yahay kulanka uu la qaatay madaxweynaha Puntland iyo wasiiradiisa isagoona u ballan qaaday in maamulka Puntland uusan wax saameyn ah ku yeelan doonin heshiiskii dhawaan ka dhacay Villa Somalia ee lagu dhisaayo maamul ay ku mideesan yihiin gobalada dhexe.

Wuxuu sheegay in uu ku rajo weyn yahay siddii la isugu soo dhaweyn lahaa Puntland iyo dowladda fedaraalka maadama labada dhinac ay isku raacsan yihiin in 2016-ka dalka laga qabto doorasho rasmi ah sidda uu hadalka u dhigay.

Kulankan ayaa ku soo aadaya iyadoo galabta ay ka dhaceyso magaalada Garoowe xaflad loogu xusaayo sannad guurradii koowaad ee ka soo wareegatay markii la dhisay xafiiska UNSOM ee Soomaaliya oo sannad laga joogo.

Waxaa xafladda oo ay ka qeybgalayaan madaxda Puntland iyo marti sharraf kale lagu soo bandhigi doonaa wax yaabaha uu qabtay xafiiska iyo howlaha hor yaalla.

Caasimada Online

Xafiiska Wararka Garoowe

[email protected]

Muqdisho (Caasimada Online) – Wasiir-ku-xigeenka Amniga Qaranka, Ibraahim Isaaq Yarow oo ku sugan Magaalada Baydhabo, ayaa waxa uu sheegay in Howlgalada hub dhigista Muqdisho xoogeeda loo weecin doono Magaalada Baydhabo.

Waxa uu sheegay in maalmaha soo socda ay Ciidamada Ammaanka u guda gali doonaan Hub ka dhigista Maleeshiyaadka iyo weliba Shaqsiyaadka aan ka tirsaneyn Dowlada ee hubka ku dhex wata gudaha iyo daafaha Magaalada Baydhabo.

Ibraahim Isaaq Yarow ma shaacin xilliga iyo goorta uu bilaabanaayo hawlgalkaasi, waxaana iminka socdo diyaarinta Ciidamdii sameyn lahaa Hubka dhigistaasi, inkastoo la Tilmaamay inay ka qeybqaadan doonaan Ciidamada Alf-grup oo laga qaadi doono Magaalada Muqdisho.

Dhinaca kale, Magaalada Baydhabo, ayaa waxaa ka bilowday in dadka heysta ay hubkooda ku keydsadaan Howdka, halka kuwa kalane la sheegay inay u dhiibanayaan Mas’uuliyiinta iyo Saraakiisha Maamulka ka tirsan.

Caasimada Online

Xafiiska Muqdisho

[email protected]

Muqdisho (Caasimada Online) – Hadal ka soo baxay Maamulka Sare ee Dekedda Caalamiga ee Dubai ee dalka Imaaraadka Carabta ayaa lagu sheegay inay qabanqaabiyaan Shirweyne bishan August 26-da, kaasi oo looga hadlayo xoojinta Dhaqaalaha iyo Horumarinta Bulshadda iyo La-dagaalanka Burcad-baddeeda.

Shirweynahaasi oo kii labaad ee looga hadlayo Ganacsiga iyo Dib-u-dhiska Somalia ayaa waxaa diiradda lagu saari doonaan horumarinta Kheyraadka Dabiiciga ee mustaqbalka , Ganacsiga, Ibedel iyo Ilaha muhiimka ee maalgashiga Somalia.

Qorshaha Madaxda Dekedda DP ayaa lagu sheegay inay Shirweynahaasi

isugu keeni doonaan 30-xubnood oo isugu jirta Mas’uuliyiin ka tirsan Dowladda, Madaxda Hay’addaha aan Dowliga ahayn, Ganacsatadda iyo Madaxda Wershadaha.

Agaasimaha Guddiga Fulinta ee Dekedda Dubai (DP World Group), Mohamed Sharaf ayaa sheegay inay muhiimadda tahay sidii loo sahmin lahaa Horumarinta wanaagsan iyo qaabka ugu wanaagsan ee loo taageerayo dhismaha Awoooda Dhaqaalaha Somalia.

“Waxaan muhiimadda saaraynaa inaan maqalno Dhallinyarradda Somomaaliyeed iyo in lagu dhiirigeliyo horumarinta dalkooda iyo sidii loo dhisi lahaa Ganacsiyo Gudaha ah (Local Businesses)” ayuu yiri Mohamed Sharaf.

Waxa uu intaasi ku daray inay si wadajir uga shaqeyn doonaan sidii Somalia loogu soo dabaali lahaa Nabadda, HorumarintaDhaqaalaha iyo Shaqo-abuurista.

Xigasho: Arabian Supply Chain

Caasimada Online

Xafiiska Muqdisho

[email protected]

Hargeysa (Caasimada Online) – Mid ka mid ah axsaabta mucaaradka Somaliland ayaa ka soo horjeestay doorashadda Cali Khaliif Galeyr loogu doortay maalintii Khamiista ee la soo dhaafay madaxweynaha cusub ee maamulka Khaatumo State.

Guddoomiyaha xisbiga mucaaradka UCID Feysal Cali Waraabe ayaa sheegay in Khaatumo ay ka mid tahay Somaliland isla markaana wax maamul khaatumo la dhaho aan laga dhisi karin.

Mar uu ka hadlaayay doorashadda Cali Khaliif oo ka dhacday deeganka Saaxdheer ayuu sheegay in uu Cali Khaliif doonayo siddii uu maamulkaas ugu soo gali lahaa siyaasadda isagoo doonaya in uu xil ka qabto Somaliland ayuu yiri.

Feysal Cali Waraabe ayaa ku eedeeyay siyaasiga Cali Khaliif Galeyr in uu abaarayo colaad iyo naceyb dhexdooda ah oo dadka reer Somaliland ee deggan gobalada Sool, Ceyn iyo Buuhoodle.

Wuxuu sheegay oo kale in uu Cali Khaliif Galeyr uu carruurtiisa soo dhigtay dalka Maraykanka isla markaana uu rabo dagaal uu ka holciyo deegannada Somaliland.

Waxaa la weydiiyay maxaa keenay isagoo mucaarad ah in uu u jawaabo Cali Khaliif Galeyr halkii maamulka Somaliland uu ka hadli lahaa.

Feysal Cali Waraabe ayaa tilmaamay marka ay timaado qadiyadda Somaliland in uu xaq u leehay in uu difaaco oo uu ka hadlo.

Si kastaba, Cali Khaliif Galeyr ayaa tilmaamay in uu diyaar u yahay dagaal uu ku xorreeyo deegannada Somaliland ay ka heysato maamulka Khaatumo State.

Cali Khaliif Galeyr ayaa horrey u sheegay in dadka reer Khaatumo ay diyaar u yihiin dagaal ay isaga xorreeyaan ciidamada maamulka Somaliland ilsla markaana ay xarun KMG ah ay ka dhiggan doonaan magaalada Laasacaanood oo hadda ay ku sugan ciidamada Somaliland.

Caasimada Online

Xafiiska Wararka Hargeysa

[email protected]

Muqdisho (Caasimada Online) – Kaddib markii dowladda ay Muqdisho ka billowday olole ka dhan ah hubka sharci-darrada, waxaa soo baxay warar sheegaya in beelaha Hawiye ee hubka heysta ay magaalada ka rartaan iyagoona geenaya goobo kale.

Ilo xog-ogaal ah oo diiday in aan magacooda u adeegsan warbaahinta ayaa u xaqiijiyay Caasimada Online in beelaha Habar-gidir, Murusade iyo Abgaal ay billaabeyn inay hubkooda u yaallay magaalada ay rartaan.

Meelaha qaar ayaa lagu akayay hub laga daad-gureenaayo kuwaasoo lagu raraayo gaadid waxaana si qarsoodi ah loogu qaaday magaalooyinka kale ee dalka.

Arrintan ayaa daba socota markii ciidamada dowladda ay billaabeyn howgallo ka dhan hubka sharci-darrada ee magaallada yaalla.

Dad badan ayaa aaminsan arrintan in ay dhallin karto dagaal sokeeye oo dib uga qarxa magaalada Muqdisho.

Dowladda Soomaaliya ayaa caddeeysay howgallada Muqdisho ka socda ee lagu aruurinaayo hubka sharci-darrada in uusan salka ku hayn cid ama shaqsi gaar ah ee uu yahay mid lagu adkeenaayo ammaanka caasimada.

Ra’iisal wasaaraha Soomaaliya oo shaley shir guddoominaayay shir xasaasi ah oo uu ka qeybgalay madaxweyne Xasan ayaa sheegay in madaxda dalka ay raalli ka yihiin howlgallada magaalada ka billowday.

Caasimada Online

Xafiiska Wararka Muqdisho

[email protected]