Afgooye (Caasimada Online) – Warar dheeraad ah ayaa kasoo baxaya khasaaraha ka dhashay qarax khasaare geystay oo barqanimadii maanta ka dhacay qaybo ka mid ah gobolka Shabeelaha Hoose ee dowlad gobolleedka Koonfur Galbeed Soomaaliya.

Qaraxa oo ahaa miino ayaa waxaa lagu soo warramayaa inuu ka dhacay waddada dheer ee xiriirisa degmada Afgooye iyo deegaanka Mareerey ee gobolkaasi, sida ay innoo sheegeen ilo dadka deegaanka ah.

Wararka ayaa sheegaya in qaraxa uu haleelay shacab ku socdaalayay waddada, waxaana ku dhintay hal qof, ayada oo uu ku dhaawacmay mid kale.

Sidoo kale wararka ayaa intaasi kusii daraya in goobta uu qaraxu ka dhacay ay ka agdhaweyd fariisin ciidamada dowladda ay ku leeyihiin halkaasi.

Ciidamada ammaanka ayaa qaraxa kadib howlgal kooban ka sameeyay duleedka degmada Afgooye, balse ma jirto cid ay usoo qabteen falkaasi.

Xaaladda ayaa haatan ah mid deggan, waxaana si caadi ah kusoo laabtay dhaq-dhaqaaqa waddada xiriiirisa Afgooye iyo Mareerery ee gobolka Shabeelaha Hoose.

Inta badan dagaalyahanada Al-Shabaab ayaa qaraxyo iyo weerar toos ah ka fuliya gobolkan oo hoostaga dowlad goboleedka Koonfur Galbeed Soomaaliya.

Shabeelaha Hoose ayaa kamid ah meelaha la filayo inuu ka billowdo wajiga labaad ee howlgallada xoreynta oo ay horkaceyso dowladda federaalka Soomaaliya.

Soomaaliya ayaa haatan ku jirta marxalad dagaal, waxaana qorshuhu yahay inay howlgallada kusoo biiraan ciidamo ka socdo waddada dariska la ah Soomaaliya.

Muqdisho (Caasimada Online) – Xubnaha golaha wasiirada xukuumadda federaalka  Soomaaliya ayaa maanta shirkoodii caadiga ahaa ku yeeshay magaalada Muqdisho ee caasimada Soomaaliya, waxaana shir guddoomiyay ra’iisul wasaare Xamza Cabdi Barre.

Shirka ayaa waxaa intiisa badan diiradda lagu saaray arrimaha ammaanka, dagaalka Al-Shabaab, ayada oo sidoo kale lagu ansixiyay heshiis dhex-maray Somalia iyo Kenya.

Ugu horrey golaha ayaa bogaadiyey guulaha waa weyn ee ay ciidamadu ka gaareen howlgallada xorreynta ee haatan ka socda koonfurta iyo bartamaha dalka.

Golaha wasiirada ayaa sidoo kale tilmaamay in howlgallada socda ay suura-geliyeen in 70% hoos loo dhigay weeraradii ay kooxda Al-Shabaab ka geysan jirtay dalka oo dhan.

Sidoo kale golaha ayaa xusay in xittaa lagu guuleystay xasillinta caasimadda, taas oo keentay in si nabad ah ay shacabka Soomaaliyeed u cibaadeystaan bishii soon.

Dhanka kale inta uu socday shirka ayaa waxaa sidoo kale lagu meel-mariyay heshiiska Iskaashi ee Adeegga Duulista iyo Hawada ee Soomaaliya iyo Kenya, kaas oo dib u cusbooneysiin ay ku sameeyeen labada dal.

Xubnaha golaha wasiirada xukuumadda federaalka Soomaaliya ayaa sidoo kale soo dhaweeyey tallaabada hoos loogu dhigay qiimaha lacageed ee sannadkan ay ku tagi doonaan Xajka muwaadiniinta Soomaaliyeed oo ka yar qiimihii sannadkii hore, taas oo ku timid tartan daah-furan oo ay galeen shirkadaha doonaya adeegga xujeyda.

Ugu dambeyn golaha ayaa warbixin ka dhagaystay Guddiga Wasiirrada ah ee loo xil saaray soo celinta muwaadiniinta Soomaaliyeed ee ku xayirmay dagaalka Suudaan, iyada oo lagu guuleystay in 1198 qof oo u badan arday wax ka baranaysay Suudaan lagu soo celiyo dalka, welina ay soconayaan howlaha daadgureynta muwaadiniinta Soomaaliyeed.

Halkan hoose ka daawo sawirrada:-

Xarardheere (Caasimada Online) – Warar kala duwan ayaa kasoo baxaya dagaal culus oo u dhexeeyo Al-Shabaab iyo ciidamada dowladda oo maanta ka dhacay duleedka koonfureed ee degmada Xarardheere oo ka tirsan giobolka Mudug ee bartamaha dalka.

Dagaalka ayaa yimid, kadibn markii ciidamada Xoogga dalka oo kaashanaya kuwa dadka deegaanka ay weerar culus ku qaadeen saldhigyo ay ku sugnaayeen Al-Shabaab oo ku yaalla halkaasi, waxaana kadib xigay dagaal toos ah oo u dhexeeyay labada dhinac.

Taliyaha ciidamada dhulka ee Xoogga dalka, General Maxamed Tahliil Biixi oo ka warbixiyay dagaalkaas ayaa shaaciyay in weerarka ay ku qaadeen deegaano hoos yimaada magaallo xeebeedka Xarardheere, halkaas oo ay isku uruursanayeen xubno ka tirsan kooxda Al-Shabaab, sida ay hadalka u dhigeen.

Sidoo kale taliyaha ayaa intaasi ku daray in xubnaha la weeraray ay qorsheynayeen inay soo qaadaan weeraro, balse ay ka hortageen, kadib xog ay ka heleen dadka shacabka ah.

Waxa kale oo uu tilmaameen iy howlgalladaasi ay khasaare culus ku gaarsiiyeen Al-Shabaab, isla-markaana ay ka dileen ilaa 7 xubnood, ayna ka qabsadeen gaadiid iyo deegaanka lagu dagaalamay, sida uu hadalka u dhigay.

Xaaladda ayaa haatan ah mid aad  kacsan, waxaana weli dhaq-dhaqaaqyo iska horjeedo laga dareemayaa duleedka Xarardheere, ayada oo labada dhinac ay helayaan gurmadyo.

Dhanka kale ma jiro illaa iyo hadda wax hadal ah oo kasoo baxay dhinaca Al-Shabaab oo ku aadan dagaalkaas ee ay guulaha ka sheegteen ciidamada dowladda Soomaaliya.

Maalin kahor ayay ahayd markii ay sidaan oo kale ciidamada huwanta u weerareen xubno ka tirsan Al-Shabaab oo ku sugnaa deegaanka Ceel Qaboobe oo 30 KM koonfur ka xiga degmada Xarardheere ee gobolka Mudug, waxaana halkaas lagu dilay illaa 60 xubnood.

Dowladda Soomaaliya ayaa sidoo kale sheegtay in howlgalkaas ay kusoo furatay hub fara badan, rasaas iyo gaadiid loo waday kooxda Al-Shabaab.

Koonfurta Mudug ayaa waxaa weli ka socda howlgallo xoreyn ah oo ay iska kaashanayaan ciidamada dowladda Soomaaliya, kuwa maamulka Galmudug iyo Macawiisleyda/

Muqdisho (Caasimada Online) – Wasiir ku-xigeenka wasaaradda warfaafinta Soomaaliya, Mudane Cabdiraxmaan Yuusuf Al-Cadaala iyo gudddoomiye ku-xigeenkii hore ee amniga iyo siyaasadda ee gobolka Banaadir, Cali Cabdi Wardheere (Cali Yare) oo siyaasad ahaan kala fikir duwan ayaa mar kale ay ka dhex-tafatay, waxayna isugu jawaabeen baraha bulshada.

Labadaan nin ayaa isku qabtay arrin la xiriirta dagaalka Al-Shabaab oo haatan si dardar leh uga socda koonfurta iyo bartamaha dalka Soomaaliya.

Wasiir Al-Cadaala oo marka hore qoraal kooban soo dhigay bartiisa Facebook-ga ayaa sheegay in been abuurka dacaayadda uu yahay adeeg argagixiso, sida uu hadalka u dhigay.

“Isma qabato “Khawaarijta waan necbahay waxa ay jecelyihiiinna waan qabanayaa” Been-abuurka iyo dcaayaddu waa adeeg Argagixiso.” ayuu yiri wasiir Al-Cadaala.

Intaas kadib ayaa waxaa isna usoo jawaabay siyaasiga Cali Yare Cali, wuxuuna sheegay in aysan is qabaneyn in la qaado isbaaro Shabaab, lana dhigto mid ka daran.

“Isma qabato isbaarada shabaab ayaa shacabka ka qaadeynaa iyo innaga ayaa isla isbaaraddii iyo mid kasii ascaar kulul shacabka tabaaleeysan u dhiganeyna, intaas waliba ugu simi meeyno ee hantidoodana waan boobeeynaa.” ayuu isna ugu jawaabay Cali Yare.

Sidoo kale wuxuu intaasi kusii daray in Al-Shabaab laga itaal roonaaday, islamarkaana aan loo baahneyn in lacago lagu dul raadsado, sida uu hadalka u dhigay.

“Dagaalka Eeyaha naarta laguma dhex tuugeeysan karo. Waan ka indho-dheernahay, ka hal-abuur badannahay, kana awood badannahay laamaha warbaahineed ee aad malaayiinta dollar ku bixisaan. ISKEEN-SIIYA.”  ayuu mar kale yiri siyaasiga Cali Yare Cali.

Soomaaliya ayaa waxaa haatan ka socda dagaal ka dhan ah Al-Shabaab, kaas oo ay hoggaamineyso dowladda federaalka oo kaashaneysa dadka deegaanka, waxaana laga gaaray guullo dhul ballaaran looga qabsaday Al-Shabaab

London (Caasimada Online) – Warar hoose oo soo baxaya ayaa sheegaya in dowladda UK ay qaaday tallaabo ka dhan ah madaxwenaha Soomaaliya, Mudane Xasan Sheekh Maxamuud oo la filayay in maalmaha soo socda uu safar shaqo ku gaaro London.

Go’aan cusub oo ay haatan soo saartay dowladda Ingiriiska ayaa waxaa lagu sheegay in madaxweyne Xasan Sheekh laga saaray liiska madaxda lagu casuumay xafladda caleema saarka boqorka UK, isla-markaana laga joojiyay safarkii uu ku tegi lahaa waddankaasi.

Madaxweynaha Soomaaliya oo markii hore lagu daray madaxda la casuumay, kadib warqad loo soo diray ayaa hadda isbeddal deg deg ah lagu sameeyay, ayada oo uu soo baxay go’aan kale oo liiska looga reebay, kaas oo lagu wargeliyay hoggaanka Villa Soomaaliya.

UK ayaa si toos ah farriinteeda ula wadaagtay dowladda federaalka, waxayna u sheegtay in madaxweynaha uusan qeyb ka eheyn madaxda  rasmiga ah ee la marti qaaday, isla-markaaa la beddalay liiskii hore ee casuumaadda.

Sababta ayaa lagu sheegay in la xiriirto dhanka socdaalka UK, maadaama Soomaaliya ay ka mid tahay dalalka Ingiriiska uu saaray xayiraadda dhanka socdaalka, isla-markaana aysan diyaaradaha si toos ah isaga kala gooshi karin magaalooyinka Muqdisho iyo London.

Arrintaan ayaa dhalisay dood xoogan iyo hadal xoogan oo qabsatay baraha bulshada ee Internet-ka oo si weyn loogu faaqidayo, waxaana dadka ay si weydiinayaan sababta ay dowladda UK uga laabatay casuumaadii ay horay ugu fidisay madaxweyne Xasan Sheekh Maxamuud, haatana ay dib uga joojisay safarkii uu ku tegi lahaa dalkaasi.

Dhanka kale ma jiro war rasmi ah oo kasoo baxay dhanka Villa Soomaaliya oo ku aadan tallaabada ay qaaday dowladda Ingiriiska ee ka dhanka ah madaxweynaha, taas oo ay haatan si aad u warineyso warbaahinta maxalliga ah ee dalkaasi.

Ingiriiska oo kamid ah dalalka reer Yurub ayaa taageerada u fidiya Soomaaliya, wuxuuna ka caawiyaa dib u dhiska ciidamada xoogga dalka Soomaaliyeed iyo dhanka dhaqaalaha.

Si kastaba, horay madaxweynaha dowladda federaalka ah ee Soomaaliya, Xasan Sheekh Maxamuud ayaa u booqday dalka Ingiriiska, kadib dib u doorashadiisii 15-kii May ee sanadkii hore, wuxuuna ka qeyb galay aaska boqoradii waddankaasi, Queen Elizabeth II.

Muqdisho (Caasimada Online) – Xoghayaha Guud ee Qaramada Midoobey, António Guterres, ayaa ergey cusub u soo magacaabay Soomaaliya.

Muqdisho (Caasimada Online) – Dowladda federaalka Soomaaliya ayaa faah-faahin ka bixisay sababta ka dambeysa in dalalka safka hore ay la kaashato dagaalka socda ee ka dhanka ah kooxda Al-Shabaab.

Madaxweynaha Soomaaliya Xasan Sheekh Maxamuud oo habeenkii Isniinta ka qeyb-galay kulan dadweyne ayaa shaaciyay in dowladda Soomaaliya ay waddamada jaarka iyo kuwa naga fogba ay u kaashanayaan dagaalka, maaddaama uu cadowgu yahay mid caalami ah.

“Dagaalka aan ku jirno waa argagixiso caalami ah, dalalka safka hore waxaa u door bidnay si aan uga fogaano in Al-Shabaab ay helaan marba meel ay ku baxsadaan oo xagga u riix iyo xagga u soo riix ay meesha ka baxdo,” ayuu yiri madaxweyne Xasan Sheekh oo ka jawaabayay su’aal ahayd sababta ay dowladdu u door bidday in ay dagaalka ka qeyb qaataan dowladaha safka hore.

Sidoo kale waxa uu sheegay madaxweynaha in howl-galka la qorsheeyay ee ay wada-geli doonaan dowladda Soomaaliya iyo Ciidamada dalalka safka hore uu noqon doono muddo ku siman sagaashan maalmood oo keliya, oo kooxda lagu furayo furimo horleh, si loo wiiqo awoodooda gudaha dalka.

Madaxweynaha ayaa waxa kale oo uu ka dhawaajiyay in ciidanka ay dalalka safka hore u soo dirayaan wejiga labaad ee dagaalka ay uga gedisan yihiin kuwii hore uga joogay dalka qeybta ka ah howl-galka ATMIS, inay yihiin kuwa howl-geli kara sida ay rabto dowladda Soomaaliya oo iyadu hoggaamineysa gulufka dagaal ee ka dhanka ah kooxda Al-Shabaab.

“Ma heli karno inaan dhahno AMISOM ha naloo soo badiyo, ma heli karno AMISOM sida annaga aan rabno in ay u shaqayso, dowladahoodiina kalama heshiin karno sababta oo ah AMISOM waxay ku jirtaa United Nations Security Council iyo African Union, dowladahoodii xitaa wax badan kama baddeli karaan , kuwo annaga aan dhihi karno waddadaan baan rabnaa inaad martaan, ayaguna ay dowladahooda dhihi karaan waddadaas ay dowladda Soomaaliya codsatay mara waaye kuwa aan maanta haysanna.”

Ugu dambeyntiina waxa uu madaxweynaha tusaale usoo qaatay bulshada bariga Afrika oo ay Soomaaliya dooneyso inay ku biirto iyo waddamada xubnaha ka ah, kuwaas oo aan wax lala wadaagi karin haddii aan la helin amni, sidaa daraaddeedna ay kaashanayaan cid kasta oo ka caawineysa la dagaallanka kooxaha khawaarijta.

Si kastaba, Dagaalka Al-Shabaab ayaa tan iyo markii uu billowday waxaa laga gaaray guulo wax ku ool ah, ayada oo kooxda laga xoreeyay deegaano horleh oo sanado badan ku jiray gacantooda, waxaana dhawaan si rasmi ah u bilaabanaya wejiga labaad ee dagaalka, kaasi oo qeyb ka noqonayaan dalalka safka hore oo dowladda Soomaaliya ka gacan siinaya sidii kooxda looga cirib-tiri lahaa dalka.

Hoos ka daawo muuqaalka madaxweynaha

Qardho (Caasimada Online) – Wararka naga soo gaaraya magaalada Qardho ee gobolka Karkaar ayaa sheegaya in xalay mar kale ay daadad xoogan ku rogmadeen gudaha magaaladaasi, kuwaas oo ka dhashay roobab xoogan oo ka da’ay galbeedka magaaladaasi.

Daadadka oo ku rogmaday bartamaha magaalada, ayaa waxaa lagu soo warramayaa inay saameyn ku yeesheen dhaq-dhaqaaqa ganacsiga, dadweynaha iyo gaadiidka.

Wararka ayaa intaasi ku sii daraya in fatahaadda aysan geysan khasaare nafeed, balse waxaa jiro burbur xoogan oo soo gaaray goobo ganacsi, guryo iyo waddooyinka qaar.

Xaaladda ayaa haatan ah mid cakiran, waxaana magaalada dhex ceegaaga biyo sida ay soo sheegayaan qaar kamid ah dadka deegaanka oo haatan dalbanaya gurmad deg-deg ah.

Dhanka kale war qoraal ah oo kasoo baxay, maamulka degmada Qardho ayaa looga hadlay roobabka daadadka wata ee mar kale ku dhuftay magaaladaasi, wuxuuna maamulka farriin u diray dadka shacabka ah, isaga oo ugu baaqay inay muujiyaan feejignaan dheeri ah.

Maamulka ayaa shacabka ku wargeliyay inay ka fogaadaan goobaha ay biyaha maraan, si aysan uga soo gaareen waxyeelo halis karta naftooda.

”Waxaan Bulshada Qardhood ku wargelinaynaa in roobabka hada ka de’aaya galbeedka magaalada Qardho la filaayo in ay daadad ku soo celiyaan magaalada.sidaas daraadeed waxaan Bulshada Qardhood u sheegaynaa in ay ka digtoonaadaan kana baxaan meelaha biyuhu maraan. Ayaa lagu yiri warsaxaafadeed kasoo baxay maamulka degmada Qardho.

Ma jiro wax war ah oo kasoo baxay dhinaca madaxda sare ee dowlad goboleedka Puntland ee ku aadan xaaladda adag ee ka taagan degmada Qardho oo hoostagta maamulkaasi.

Si kastaba, waa markii labaad oo ay daadad xoogan ku dhufanayaan magaalada Qardho oo sanadkii hore dhaliyay khasaare isugu jiro dhimasho, dhaawac iyo burbur xoogan, waxaana haatan mar kale laga digayaaa in fatahaad kale ay ku dhufato magaaladaasi.

Garoowe (Caasimada Online) – Maamulka Puntland ayaa weerar culus oo afka ah ku qaaday dowladda federaalka Soomaaliya oo uu kala dhaxeeyo khilaaf siyaasadeed, kadib markii uu madaxweyne Xasan Sheekh uu hoos u dhigay khilaafkaasi kala dhaxeeya maamulka Puntland, isaga oo sheegay in uusan ogeyn  waxa ay ka tabwaneyso dowladdiisa.

Wasiirka Qorsheynta Puntland Maxamed Saciid Faroole ayaa waxa uu sheegay in Puntland ay wax badan tartay dib-u-dhiska Soomaaliya, islamarkaana ay dowladda Xasan isku haysan dan shaqsi ee isku hayaan inaysan qeyb ka noqon karin waxa hadda socda, oo ka gedisan wixii lagu heshiiyay, sida uu sheegay.

“Inta ay ka imaaneyso dowlad cadaali ah oo ay ka dhab tahay in nidaam federaal cadaali ah laga hirgeliyo dalka, waxay Puntland isticmaaleysa waxyaabaha Dastuurkeeda u ogol yahay, oo waxa aan qabsan karno qabsano, oo aynaan u dhutin Xamar,” ayuu yiri Wasiirka Qorsheynta Maamulka Puntland Maxamed Saciid Faroole.

Wasiirka ayaa waxa uu ku eedeeyay madaxda sare ee dowladda federaalka inaysan rabin dowladnimo Soomaaliyeed, “Soomaalinimo ma rabaan oo Laascaano oo wiilal iyo gabdho yar oo Soomaali oo calan buluug ah wato oo lagu laynayo ayay madaxweynihii iyo ra’iisul wasaarihii ka hadli la’yihiin. Marka la isma rabo ee maxaa la isku khasbaya.”

“Damuljadiida maanta waxay lamid tahay Damuljadiidi toban sano ka hor,” ayuu yiri wasiirka oo weerar culus oo afka ah ku qaaday madaxda sare ee dowladda federaalka Soomaaliya.

Puntland ayuu sheegay in lagu naco rabitaankeeda dowladnimo lagu dhan yahay, sidaas darteed ay hadda usoo jeesteen inay ka shaqeeyaan danaha Puntland, islamarkaana ay hoos iskaga dhigeen xiriirkii dowladda federaalka Soomaaliya.

“Dowladda Xamar joogta oo iyadaba la waardiyeynayo oo ciidan caalami ah waardiyeynaya ayaa rabta inay mashruuc walba iyo hay’add walba gacanta ku hayso, anaga waxaa rabnaa in Puntland ay yimaadan oo laga shaqeeyo maal-gashiga Puntland oo aan ka shaqeyno siyaasadayada iyo horumarkayaga.”

Si kastaba, Puntland oo dhibsatay in madaxweyne Xasan uu hoos u dhigo khilaafka kala dhaxeeya ayaa sheegtay inaysan tabasho qabin ee talada dalka wax ku leedahey, islamarkaana laga tillaabsan karin, maadama ay dhiig iyo dhaqaale ku bixisay dhismaha dowladnimada dalka iyo soo-celinta Jamhuuriyadda 3-aad ee Somalia oo ah tan maanta jirta.

When it comes to President Hassan, we don’t need to believe words. We might question actions, BUT we should never doubt the patterns. Damujadiid today is the same as Damujadiid a decade ago. #Somalia #Puntland @Plstatehouse @HESaidADeni pic.twitter.com/l7Kb5FD41v

— Hon. Mohamed Said Farole (Max Samofare) (@m_farole) May 3, 2023

Muqdisho (Caasimada Online) – Dowladda federaalka Soomaaliya ayaa maanta waxay gudaha garoonka diyaaradaha magaalada Muqdisho ee Aadan Cadde ku qabatay shirka deg deg ah oo la xiriira xaaladda ka taagan dalka Sudan.

Shirkan oo si gaar ah ugu saabsana taageerada iyo joogteynta daad-gureynta muwaadiniinta Soomaaliyeed ee Sudan ayaa waxaa kasoo qeyb-galay Wasiirka Arrimaha Dibadda, Xoghayaha Joogtada, Qaramada Midoobay, gaar ahaan wakiilada hay’adaha IOM, UNHCR, WHO, UNFPA, UN,-OCHA iyo Ergeyga Madaxweynaha JFS ee Soo-galootiga.

Shirkan oo maanta ka qabsoomay dhismaha VIP-da garoonka Aadan Cadde ayaa waxay dhinacyadu uga wada-hadleen dadaalada daad-gureynta muwaadiniinta Soomaaliyeed ee laga samata-bixinayo dagaallada iyo dalalka deriska oo ay ku qaxeen.

Kulankan oo uu shir-guddoominayay Wasiirka Arrimaha Dibadda iyo Iskaashiga Caalamiga ah XFS Mudane Abshir Cumar Haruuse, ayaa waxaa soo qaban-qaabisay Ergayga Madaxweynaha DFS ugu qaabilsan Soogalootiga iyo Xuquuqda Caruurta danjire Maryan Yaasiin Xaaji.

Dowladda federaalka Soomaaliya ayaa tan iyo markii uu billowday dagaalka Sudan ku howlaneyd sidii dalkaasi looga soo daad-gureyn lahaa muwaadiniinta Soomaalida ah, si dib loogu soo celiyo dalkooda, loogana badbaadiyo dhibaatooyinka ka jira dalkaas.

Si kastaba, Toddobaadkan ayay aheyd markii ay dowladda soo daad-gureysay ku dhowaad 312 qof oo isagu jira dhalinyaro, haween iyo caruur, kuwaasi oo billowgii dagaalka Sudan u cararay xuduudaha Koonfurta Sudan iyo Itoobiya.

Tan iyo markii uu billowday dagaalka Sudan waxaa ajaanibtii ugu badneyd laga daad-gureeyay dalkaasi, gaar ahaan magaalada Khartuum, dadka isaga tagaya dalkaas ee laga soo saarayo ayaa waxaa kamid ah muwaadiniin Soomaaliyeed, inkasta oo ay weli ay jiraan qaar ku go’doonsan meelo kala duwan.