Baardheere (Caasimada Online) – Faahfaahino dheeraad ah ayaa waxaa laga helayaa khasaaraha ka dhashay roobab daadad watay oo xalay ka da’ay degmada Baardheere, kuwaas oo sababay dhimashada ku dhowaad 10 qof oo kamid ahaa dadka deegaanka.

Xoghayaha dowladda hoose ee degmada Baardheere Buulle Ibraahim Xuseen oo u warramay Idaacadda Risaala ayaa ka warbixiyay dhacdadaasi, wuxuuna sheegay in dhibaato xoogan ay ka dhalatay daadad ku dhuftay demadaasi iyo deegaanada ku xeeran.

Buulle ayaa shaaca ka qaaday in dhacdadan ay ku dhinteen illaa 9 qof, wuxuuna tilmaamay inay ku dhaceen tog kala qaybiya degmada, xilli ay ka tallaabayeen halkaasi.

“Walaalow meeshaan Baardheere dhibaataa ka dhacday nimcadii ilaahey ee xalay dhaceysay iyo roobabkii ayaa dad ay ku naf waayeen illaa 9 qof. Dadkaas oo ka tallaabayay tog kala qaybiya magaalada” ayuu yiri xoghaye Buulle Ibraahim Xuseen.

Sidoo kale wuxuu tilmaamay in dadka dhintay ay isku jireen dhalinyaro, carruur iyo dad waa weyn oo uu kamid yahay Macallin Dugsi Qur’aan oo caan ka ahaa Baardheere.

“Waxay isugu jireen dhalinyaro Sports ah, Macallin Dugsi Qur’aan waa uun bulshada qaybaheeda kalal duwan dadka meesha ku geeriyooday,” ayuu sii raaciyay..

Ugu dambeyn wuxuu hoosta ka xariiqay in maamulka Baardheere iyo shacabka degmada ay haatan wadaan gurmad iyo sidii loo aasi lahaa dadkaasi.

“Xaafadaha waa la’isku soo baxay gurmad ayaa la sameynayaa dhammaan reer Baardheere sidii dadkaas loo aasi lahaa ayaan hadda taladeeda ku jirnaa,” ayuu markale yiri Buulle.

Baardheere oo ka tirsan gobolka Gedo ayaa waxaa muddooyinkii dambe ay wajaheysay xaalado adag oo isbiirsaday, sida arrimo bani’aadanimo iyo kuwa amni darro intaba.

Muqdisho (Caasimada Online) – Wasiirka Arrimaha Gudaha, Federaalka iyo Dib-u-heshiisiinta Axmed Macalin Fiqi ayaa maanta magaalada Muqdisho ka furay shirka Wadatashiga Qaran ee Hindise-sharciyeedka Diiwaan-gelinta Madaniga ah iyo Tirakoobka dhacdooyinka muhiimka ah.

Shirkaan oo socon doona labo maalmood ayaa waxaa sidoo kale goobjoog ka ahaa Agaasimaha Guud ee Wasaaradda Arrimaha Gudaha, Federaalka iyo Dib u heshiisiinta mudane Aidarus M Hassan iyo mas’uuliyiin kale ee kascotay heerarka kala duwan ee dowladda federaalka iyo dowladaha xubnaha ka ah dowladda federaalka ah, gobolka Banaadir iyo bulshada rayidka ah.

Wasiirka Arrimaha Gudaha Axmed Macalin Fiqi ayaa ugu horreyn khudbad kooban ka jeediyay kulankaan, wuxuuna sheegay in hindise-sharciyeedkan uu nidaaminayo mid kamid ah adeegyadda asaasiga ah ee ay dowladdu bixiso ee dad-dhigista sida; dhalashada, guurka, furriinka, caruur korsashada, dhimashada, diiwaan-gelinta qoyska, degenaashaha iyo arrimo kale.

“Hindise sharciyeedkan oo diyaarintiisu ay wasaaradda arrimaha gudaha wadday muddo dheer, waxaa uu ka mid yahay dadaalo badan oo wasaaraddu galisay sidii dalka uu uga hanaqaadi lahaa nidaam diiwaan-gelin madaniya oo casri ah,” ayuu yiri Wasiir Fiqi.

Waxa uu sii raaciyay hadalkiisa “Waxaa kamid ahaa dadaaladaasi sida daraasado nidaamyada diiwaan-gelinta madanigaa, diyaarintii siyaasadda qaran ee diiwaan-gelinta madaniga ah iyo istaatistikada dhacdooyinka muhiimka ah oo golaha wasiiradu ansixiyeen bishii Agoosto 2019, dhismihiisa iyo howl-gelinta guddiga hagidda diiwaan-gelinta madanigaa oo ka kooban dhammaan madaxda hey’adaha kala duwan ee heerarka dowladda.”

Wasiirka ayaa sidoo kale waxa uu sheegay in hindise-sharciyeedkan uu hagayo siyaasadda Qaran ee diiwaan-gelinta madaniga ah, kuwaas oo dowladaha hoose ay gundhig u yihiin bixinta adeegan, halka kaalinta dowladda federaalkuna uu u qeexan yahay si waafaqsan heshiiskii awood qeybsiga ee golaha wadatashiga Qaran.

Ugu dambeyntiina waxa uu ka qeyb-galayaasha kulankan wadatashiga ah kula dardaarmay in inta uu shirka socdo ay wax ku daraan, saxaanna si wadatashigan oo kama dambeys ah kadib loogu gudbiyo baarlamaanka federaalka ee Soomaaliya.

Hoos ka daawo

Ruun-nirgood (Caasimada Online) – Warar kala duwan ayaa kasoo baxaya khasaaraha ka dhashay weerar toos ah oo ay saaka Al-Shabaab ku qaaday xero ciidan oo ku taalla deegaanka Daaru-nimca oo hoostaga degmada Ruun-nirgood ee gobolka Shabeelaha Dhexe.

Weerarka oo ku bilowday qaraxyo ayaa waxaa lagu soo warramayaa in lagu ekeeyay xero ay ku sugnaayeen ciidamada Xoogga dalka iyo kuwa deegaanka oo ku taalla halkaasi.

Ilo dadka deegaanka ah ayaa Caasimada Online u sheegay in ciidamada ammaanka ee ku sugnaa saldhigga la weeraray ay rasaas fureen kadib qaraxyada, waxayna kadib iska hor imaad kooban la galeen ragga weerarka soo qaaday oo mar dambe goobta ka baxsaday.

Deegaanka la weeraray ayaa waxaa sidoo kale ku sugnaa qaar kamid ah ciidamadii lagu soo tababaray dalka Eritrea, kuwaas oo maalin kahor gadood uga soo baxay Daaru-nimca, inkastoo mar dambe ciidamadaas oo ka cabanayey daryeel la’aan lagu qanciyay inay dib ugu laabtaan saldhiggooda, kadib wadahadal ay la yeesheen saraakiil ka tirsan Ciidanka Xoogga dalka Soomaaliyeed kula yeesheen magaallo xeebeedka Cadale.

Al-Shabaab oo sheegatay mas’uuliyadda weerarkan ayaa shaaca ka qaaday inay ku dishay 20 askari, isla-markaana ay ku dhaawacday 10 kale.

Sidoo kale Al-Shabaab ayaa intaasi ku dartay inay gudaha u gashay xerada, isla-markaana ay gubtay laba gaari oo ay lahaayeen ciidamada dowladda.

Dhanka kale ma jiro wax hadal ah oo kasoo baxay saraakiisha ciidamada dowladda iyo madaxda sare ee maamulka HirShabelle oo ku aadan weerarkaasi iyo dagaalka xigay.

Xaaladda ayaa haatan ah mid aad u kacsan, waxaana weli dhaq-dhaqaaqyo laga dareemayaa agagaarka degmada Ruun-nirgood ee gobolka Shabeelaha Dhexe.

Muddooyinkii u dambeeyay kooxda Al-Shabaab ayaa kordhisay weerarada ay ku beegsaneyso saldhigyada ciidamada dowladda ee ku yaalla koonfurta iyo bartamaha Soomaaliya, kuwaas oo inta badan dhaca hal xilli oo ah aroortii hore ee subax.

Todobaadkian ayey aheyd markii weerar kan lamid ah ee ay Al-Shabaab ku qaaday xero ku taalla duleedka degmada Baardheere, kaas oo dhaliyay khasaare leh dhimasho & dhaawac.

Muqdisho (Caasimada Online) – Bangiga Dhexe ee Soomaaliya ayaa ku guuleystay abaalmarin caalami ah oo ay bixiso hay’adda Central Banking, sida lagu shaaciyay war-saxaafadeed kasoo baxay maamulka bangiga dhexe.

Qoraalka kasoo baxay Bangiga Dhexe ayaa waxaa lagu sheegay in abaalmarintan uu ku muteystay horumarka uu ka sameeyay dib-u-habaynta kaabayaasha maaliyadda ee dalka, gaar ahaan hirgelinta hanaanka lacag-bixinta Qaranka, oo isku xira dhamaan bangiyada dalka oo dhan.

Hanaanka lacag bixinta Qaran waxaa si buuxda loo hirgeliyay sanadkii 2022-kii.

Abaalmarinta ayaa waxa uu Bangiga Dhexe ku tilmaamay aqoonsi weyn oo ka tarjumaya dadaalka iyo howl-karnimada ay muujiyeen hawl-wadeenada iyo maamulka, oo horumar la taaban karo ka gaaray dib-u-dhiska hanaanka maaliyadeed ee dalka.

“Waa guul weyn oo usoo hooyatay dalka iyo dadka Soomaaliyeed oo dhan,” ayaa lagu yiri war-saxaafadeedka uu soo saaray Bangiga Dhexe ee Soomaaliya.

Guddoomiyaha Bangiga Dhexe ee Soomaaliya ayaa ka mahad-celiyay guddida abaalmarinta hay’adda Central Banking, ee u gartay abaalmarinta kadib markii ay qiimeyn la xiriirta hal-abuurka kaabayaasha lacag-bixinta ku sameeyeen Bangiyada Dhexe ee caalamk.a

“Abaalmarintan caalamiga ah waxay caddayn u tahay horumarka uu Bankiga Dhexe ka sameeyay dib-u-dhiska kaabayaasha maaliyadda ee dalka. Waxaan rajeynaynaa in guushani ay kor u qaadi doonto kalsoonida bangiyada addduunka ay ku qabaan hannaanka maaliyadda Soomaaliya,” ayuu yiri.

Waxa uu intaas sii raaciyay “Tani waxay horseedi doonta in bangiyadeenu la-macaamilaan kuwa caalamka oo ay sannado badan caqabado ka haysteen.”

War-saxaafadeedka ayaa ugu dambeyntiina waxaa lagu sheegay in Bangiga Dhexe ee Soomaaliya ay ka go’an tahay ilaalinta xasillonida hanaanka maaliyadda iyo koboca dhaqaalaha dalka.

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa munaasabad xalay ku qabsoomtay Madaxtooyada Qaranka waxa uu ku saxiixay sharciyada ay ansixiyeen Labada Gole ee Baarlamaanka ee kala ah:

1- Sharciga La-dagaallanka Argagixisada.
2- Sharciga Dhismaha Hay’adda Socdaalka Iyo Jinsiyadda Soomaaliyeed.
3- Sharciga Socdaalka.
4- Sharciga Dhowrista Xogta Dadweynaha.
5- Sharciga Nidaamka Lagu Hagayo Kheyraadka Dhulka Hoostiis.
6- Sharciga Dhowrista Maalgashiga iyo Maalgashadayaasha.
7- Sharciga Aqoonsiga Iyo Diiwaangelinta Dadweynaha.
8- Sharciga Horumarinta iyo Maareynta Kalluumeysiga Soomaaliyeed. 

Madaxweynaha ayaa ku bogaadiyey guddoonka iyo mudaneyaasha Labada Gole ee Baarlamaanka Federaalka Soomaaliya sida ay u dardar-geliyeen ansixinta shuruucdan oo aas-aas u ah dowladnimada Soomaaliyeed iyo hirgelinta nidaam ku saleysan sharci iyo dowladnimo casri ah. 

Sidoo kale, Madaxweynaha ayaa ku ammaanay Golaha Xukuumadda iyo khubarada Soomaaliyeed soo diyaarinta shuruucdan, waxa uuna tilmaamay in ay taariikh cusub u tahay dowladnimada Soomaaliyeed, maadaama ay yihiin sharciyadii ugu badnaa ee muddo kooban lagu ansixiyo, taas oo muujinaysa muhiimadda wadashaqeynta Hay’adaha dowladda.

Sharciyada madaxweynaha saxiixay ayaa qaarkood ah kuwa muhiim ah sida kan Aqoonsiga Iyo Diiwaangelinta Dadweynaha iyo sharciga la-dagaalanka argagixisada.

Si kastaba, sharciyada qaar sidan kan la-dagaalanka argagixisada ayaa waxaa laga muujiyey walaacyo ah in si khaldan loo adeegsan karo, laguna beegsan karo ciddii la doono, gaar ahaan dadka siyaasad ahaan diidan dowladda, ayada oo lagu soo oogayo eedo argagixiso.

Muqdisho (Caasimada Online) – Saacadihii lasoo dhaafay waxaa baraha bulshada qabsatay sheekada gabar shaqo doon ah oo boor ku soo qoratay “Walaal Shaqo isii” taas oo dhalisay hadal-heyn badan.

Warbaahinta Qaranka ayaa sii deysay warbixinta gabadhaas oo lagu magacaabo Iglan Cabdullahi Axmed, waxaana codsigeeda ka soo jawaabay wasiirka dhalinyarada iyo cayaaraha Soomaaliya.

Sheekada gabadhaan ayaa dareen laheed waxayna sheegtay inay hooyadeed iyo walaalkeed ay Al-Shabaab qarax ku dileen, isla markaana ay koriso afar carruur ah oo waalid la’aan ah.

Wasiirka dhalinyarada Soomaaliya Maxamed Barre ayaa deg deg uga soo jawaabay codsigii gabdhaan shaqo doonka ah, wuxuuna ka balan qaaday inuu shaqo siinayo, isagoo amray in berri oo Talaado ah laga shaqaaleysiiyo wasaaradda dhalinyarada.

“Wasiirka Wasaaradda Dhallinyarada iyo Cayaaraha XFS Mudane Xil Maxamed Barre Maxamuud oo dalka dibaddiisa safar shaqo ugu maqan ayaa ka jawaabay  baaqa Iglan Cabdullaahi Axmed isagoo isla maanta amray waaxda shaqada iyo shaqaalaha ee wasaaradda dhallinyarada iyo cayaaraha in la hawlgeliyo gabadhaas Soomaaliyeed oo lagu qoro boos darajada labaad (B) ee shaqaalaha Kumeel gaarka ah ee gunnada qaata,” ayaa lagu yiri qoraal ka soo baxay wasaaradda.

Sidoo kale wasiir Maxamed Barre ayaa ballan-qaaday in muddo kooban gudaheed  marka ay tababarrada dhamaysato Eglan loo dalacsiin doono darajada (A) oo ah heerka ugu sareeya ee shaqaalaha rayidka ah.

Wasiirka dhalinyarada iyo cayaaraha ee XFS ayaa sheegay inuu xil ka saaranyahay guud ahaan dhallinyarada Soomaaliyeed, isagoo cadeeyay in awoodda wasaaradda ee wax ka qabashada shaqo la’aanta dhallinyarada ay koobantahay, laakiin kiiska Eglan oo dad badan dareenkooda dhaqaajiyay, isla markaana masuul ka ah walaalaheed ka yar yar ay xil gooni ah iska saarayaan.

Eglan Cabdullaahi iyo qoyskeed ayaa ka mid ah dhibanayaasha  weeraradii argagixiso ee dalka ka dhacay, iyadoo ku wayday Waalid iyo walaal.

Gabadhaan ayaa warbixintii laga diyaariyey ku sheegtay in Hooyadeed iyo wiil la dhashay ay ku dhinteen qarax ay Al-Shabaab ka fuliyeen Mall-ka Xamarweyne, maalmo ka hor waxay dowladdu toogatay sarkaal ka tirsanaa ciidanka xoogga oo qaraxaas geeyey goobta.

Muqdisho (Caasimada Online) – Booliska Soomaaliya ayaa galabta soo bandhigay natiijada howlgallo ka dhan ah maan-dooriyaha oo maalmihii lasoo dhaafay ay ka fuliyeen dhowr degmo oo ka tirsan magaalada Muqdisho.

Afhayeenka booliska Soomaaliya Gaashaanle Sadiiq Aadan Cali (Doodishe) ayaa sheegay inay soo qabteen maan-dooriye badan iyo rag ku eedeysan inay ka ganacsadaan daraagiska.

Afhayeenka oo galabta warbaahinta kula hadlay degmada Kaaraan ayaa soo bandhigay juwaano ay ku jiraan waxyaabaha maanka-dooriya oo la gubay, kuwaas oo isugu jiray Calaq, Xashiish, Qamri iyo daawooyin loo isticmaalo maan-dooriye ahaan.

“Kalkaan waxaa marqaati ka tihiin inaan ku gubeyno lix juwaan oo Xashiish ah, calaq caagado ku jira iyo kaniiniyo ay isticmaalayeen kooxdaan,” ayuu yiri Sadiiq Doodishe.

Sidoo kale Afhayeenka ayaa sheegay in dembiyada ugu badan ee ka dhaca magaalada Muqdisho ay geystaan dadka isticmaalaha waxyaabaha maanka-dooriya.

“Intii ay ciidanku ku jireen howlgalka waxaa la soo qabtay eedeysanayaal gacanta kula jiray muqaadaraadkaan, saldhigga Kaaraan ayaa lagu soo xiray rag ku eedeysan inay faraha kula jireen waxyaabahaan maankadooriya,” ayuu hadalkiisa ku sii daray.

Sidoo kale booliska ayaa shirkaan jaraa’id ku cadeeyey inay si gaar ah u beegsa doonaan dadka beerta Xashiisha iyo waxyaabaha kale ee maanka dooriya.

“Howlgalkaan wuxuu saamey doonaa dadka beera Xashiish, dadka soo daabula iyo dadka ka ganacsada, sidoo kale dadka isticmaala ayuu saameynayaa howlgalkaan,” ayuu yiri Sadiiq Doodishe.

Hoos ka daawo

Muqdisho (Caasimada Online) – Maxkamadda gobolka Banaadir ayaa soo saartay digniin culus oo la xiriirta dadka weli xoogga ku haysta dhulalka aysan laheyn, kadib tallaabo ay qaaday maanta.

Guddoomiyaha maxkamadda gobolka Banaadir Saalax Cali Maxamuud (Dabaan) ayaa maanta ku wareejiyay dadkii lahaa dhul ku yaalla degmada Wadajir, kaasi oo sanado loo haystay si sharci darro ah, iyada oo sidii qasabka aheyd ay maxkamadda u fulisay xukunkaan oo muddo soo jiitamayay.

“Hadda kadib waxaa socon doona fulino qasab ah oo isdaba-joog ah oo ka socon doona magaalada, xilligaan wixii ka dambeysa qofka markuu xaqiisa yeesho wuxuu heli doona xaquuqdii ay maxkamadaha u xukumeen,” ayuu yiri guddoomiyaha maxkamadda gobolka Banaadir.

“Waxaa uga mahad-celinayna Booliska gobolka Banaadir oo qeyb ka ah sugitaanka amniga iyo qabsoomida hawshaan, ayaga oo qaadanaya amarka maxkamadda fuliyay burburinta dhulkaan oo maanta u taaganahay in aan ku wareejino Maxamed Cabdiraxmaan oo wakiil u ah loo fuliyaha.”

Sidoo kale waxa uu ugu baaqay dadka dhul ay maxkamad xukuntay iska haysta inay sida ugu dhaqsaha badan ugu hogaansamaan sharciga, haddii kale ay maxkamadda si qasab ah ku fulin doonto, sida maanta dhacday oo kale.

“Dadka caadeystay ama dad inta dhulka laga xukumay haddana iska haysta xilligaan wixii ka dambeeya majiri doonto. Maxkamadduna tallaabada sharciga ee waafaqsan ka hor imaanshaha fulimadaas ay qaadi doonto.”

Waxa uu intaas sii raaciyay “Waxaa farriin u diraya dadka xukunada haysta ee dhahaya dhulkii nalooma fulin waa in maxkamaddaha imaadan. Maxkamaddaha waxay u tafa-xaydatay in fulinadaas ay si camali ah ugu wareejiso dhulkooda.”

Guddoomiyaha ayaa ugu dambeyntiina sheegay in maxkamadda gobolka Banaadir ay ka go’an tahay meel-marinta xukunada hore u dhacay ee dhulalka, kuwaasi oo waqti badan qaatay inay dhaqan-galaan, balse xilligaan ay meel-marinayaan iyaga oo adeegsanaya awooda ciidanka Booliska.

Hoos ka daawo

Muqdisho (Caasimada Online) – Dowladda federaalka Soomaaliya ayaa maanta dalka dib ugu soo celisay tahriibayaal Soomaali ah oo muddo sanado ah ku xirnaa dalka Liibiya.

Dhalinyaradaan oo tiradoodu dhameyd 11 qof, ayaa waxaa garoonka diyaaradaha Aadan Cadde ee magaalada Muqdisho kusoo dhaweeyay xafiiska ergayga gaarka ah ee muhaajiriinta iyo xuquuqda caruurta ee JFS, wasaaradda arrimaha dibadda Iyo hay’adda IOM.

Dhalinyaradaan ayaa muddo badan magafe ku heystay Liibiya waxaa soo celintooda iska kaashaday safaaradda Soomaaliya ee dalka Liibiya, xafiiska ergayga gaarka ah ee muhaajiriinta iyo wasaaradda arrimaha dibadda, hay’adda IOM iyo Midowga Yurub oo maal-galiyey.

Maryan Yaasiin Xaaji Yuusuf, Ergayga gaarka ah ee muhaajiriinta oo ka hadashay soo dhaweynta ayaa sheegtay in xafiiska uu ka shaqeynayo soo celinta dadka ku dhibaateysan dibadda, iyada oo u mahad-celisay madaxweynaha JFS.

Agaasimaha Arrimaha Diaspora-ha ee wasaaradda arrimaha dibddda, Ibraahim Guure Maxamed oo ka hadlay halkaasi ayaa asaguna uga mahad-celiyay dhinacyadii ka shaqeeyay soo celinta dhalinyaradaan oo muddo ku dhibaateysnaa dalka Liibiya.

Tan iyo sabadkii 2016-kii xafiiska ergayga gaarka ah ee muhaajiriinta ayaa ka shaqeynayay soo celinta muwaadiniinta Soomaaliyeed ee ku dhibaateysan xabsiyada, iyada oo gacan ka helayso dowladda federaalka, wasaaradda arrimaha dibadda, IOM iyo muwaadiniinta Jaaliyadaha Soomaaliyeed ee Qurbaha.

Dowladda federaalka ayaa horay ugu guuleysatay inay maxaabiis fara badan kasoo deyso qaar ka mid ah dalalka caalamka, taasi oo aad loogu bogaadiyey dowladda dhexe.

Horraanta sanadkii hore ayaa waxay dowladda federaalka dalka dib ugu soo celisay tahriibayaal Soomaali ah oo gaarayo illaa 97 ruux, kuwaasi oo muddo sanado ah ku xirnaa dalka Liibiya.

Kampala (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta qasriga Madaxtooyada Uganda kulan muhiim ah kula yeeshay dhiggiisa dalkaasi Mudane Yoweri Museveni.

Kulankaan ayaa waxaa looga wada-hadlay dagaalka socda ee dowladda Soomaaliya ay kula jirto kooxda Al-Shabaab iyo qorsheyaasha ku qotoma shirka waddamada ciidamada ay ka joogaan Soomaaliya ee TCC (Troop contributing countries) oo dhawaan ka qabsoomi doona magaalada Kampala ee dalka Uganda.

Madaxweyne Museveni ayaa ku ammaanay dowladda federaalka Soomaaliya guulaha wax ku oolka ah ee ay ka gaartay la-dagaalllanka kooxda Al-Shabaab oo hadda galay wajigiisi labaad,.

Yoweri Museveni ayaa sidoo kale waxa uu madaxweynaha Soomaaliya la wadaagay sida ay dowladdiisa uga go’an tahay inay kaalin weyn ka qaadato dagaallada sifeynta Khawaarijta Al-Shabaab ee ka socda dalkeena.

Madaxweyne Xasan Sheekh ayaa dhankiisa sheegay in dowladda ay ka go’an tahay ciribtirka kooxaha argagixisada, si dalkeena hormuud ugu noqdo isbedelka hurumarineed ee gobolka iyo guud ahaan qaradda Afrika.

Madaxweynaha Soomaaliya Xasan Sheekh Maxamuud oo ku sugan caasimada dalka Uganda ee Kampala ayaa shalay tababbar u soo xiray cutubyo kamid noqonaya ciidamada qalabka sida ee Soomaaliya.

Ciidankaan ayaa bilihii lasoo dhaafay tababar ku qaadanayey dalka Uganda, wuxuuna madaxweynuhu uga warbixiyey xaaladda dalka.

Madaxweynaha oo khudbad ka jeediyay halkaasi ayaa waxa uu sheegay in muhiimadda koowaad ay dowladdu saareyso dib u habaynta Ciidanka Qaranka, isaga oo carrabka ku adkeeyey in tayeynta ciidanka qaranka ay aas-aas u tahay dowladnimada dalkeenna iyo in guul deg-deg ah laga gaaro dagaalka dalka lagaga sifaynayo argagixisada.

Aadan-yabaal (Caasimada Online) – Sida ay ogaatay Caasimada Online waxaa gadooday ciidankii laga keenay dalka Eritrea ee dowladda Soomaaliya ay geysay degaanka Daarunimca ee gobolka Shabeellada Dhexe, halkaas oo bishii hore lagu soo weeraray dhowr askarina looga dilay.

Ciidankaas oo gaarayey 300 oo askari ayaa maalmo ka hor ka soo baxay degaanka Daarunimca oo hoos taga degmada Aadan-Yabaal, halkaas oo ku dhawaad hal bil ay ku sugnaayeen.

Ciidanka oo ka soo lugeeyey degaanka Daarunimca ayaa lagu hakiyey degmada Cadale ee gobolka Shabeellada Dhexe, halkaas oo lug ay ku yimaadeen, iyagoo aan wadan wax gaadiid ah.

Taliska ciidanka xoogga dalka ayaa ciidan kale ka diray Muqdisho, kuwaas oo ciidanka ka soo lugeeyey degaanka Daarunimca uga hor tegay degmada Cadale, waxaana lagu guuleystay in ciidankaas la celiyo, iyadoo aysan dhicin wax gacan ka hadal ah.

Dowladda Soomaaliya ayaa la sheegay in ciidankaas aysan siinin daryeelkii ay u baahnaayeen, sida raashin ku filan, gaadiid iyo sahay kale toona, taas oo ku kaliftay inay ka soo lugeeyaan deegaanadii la geeyey ee gobolka Shabeellada Dhexe.

Sida ay noo xaqiijiyeen saraakiil ka tirsan militeriga Soomaaliya, taliska xoogga ayaa doonayey in ciidankaas lagu celiyo xoog iyo xeelad intaba, maadaama ay dhibaatooyin badan geysa karaan, hadii ay soo galaan Muqdisho.

Ciidankii lagu soo tababaray dalka Eritrea ayaa hadda muhiim u ah dagaalka ay dowladdu kula jirto Al-Shabaab, balse warar soo baxaya waxay sheegayaan inay dowladda ku adagtahay inay daryeesho ciidankaas soo qaatay tababarka adag.

Hadda waxaa ciidankii soo gadooday iyo kumanaan askari oo kale la isugu geeyey degmada Aadan-yabaal ee gobolka Shabeellada Dhexe, halkaas oo taliska xoogga dalka uu ka hoggaami doono dagaal Al-Shabaab looga xoreynayo gobollada dhexe meelaha ay ka joogaan, howlgalkaas waxaa la qorsheynayaa in la bilaabo maalmaha soo socda.

Taliyaha ciidanka dhulka Jeneraal Biixi ayaa hoggaaminaya howlgalka, Biixi ayaa hadda ku sugan Aadan-yabaal, waxaana howlgalka laga bilaabayaa cirifka waqooyi ee gobolka Sh/Dhexe, iyadoo la qorsheeyey in ciidanka ka baxa Aadan-yabaal ay xoreeyaan deegaanada ay kooxdu ka joogto Sh/Dhexe, Galgaduud iyo Mudug.