Nairobi (Caasimada Online) – Rag loo maleynayo inay ka tirsan yiihiin xoogaga Al-Shabaab ayaa lagu soo warramayaa inay weerar ka fuliyeen gobolka waqooyi bari, Kenya.

Weerarka oo ahaa mid qorsheysan aya awaxaa lagu soo warramayaa in lala beegsaday gaari nooca ambalaasta ah oo ay la socdeen shaqaale caafimaad, sida uu sheegay Booliska

Dowladda Kenya ayaa shaaca ka qaaday in kooxda weerarka fulisay oo lala xiriirinayo Al-Shabaab inay afduub u geysteen gaarigaas, laba ka mid ah shaqaalaha caafimaadka iyo sidoo kale darawalkii waday, xilli ay marayeen meel ku dhow xadka Kenya iyo Soomaaliya.

Booliska ayaa intaa ku daray in raggaas loo maleynayo inay ka tirsan yihiin Al-Shabaab inay weerar gaadmo ah ku qaadeen ambalaasta oo ay leedahay dowlad goboleedka Mandera ee waqooyi bari Kenya xilli ay bukaanka u qaadaysay isbitaal ku yaala deegaanka.

Sidoo kale taliska saldhiga Lafey ee Mandhera ayaa sheegay in Ambalaasta iyo shaqaalaha caafimaadka ay kusii jeedeen isbitaalka Ceelwaaq si loogu gudbiyo bukaan, iyada maleeshiyada looga shakisanyahay Al-shabaab ee qafaashay baaburka iyo shaqaala ay ula baxsadeen dhinaca Soomaaliya.

Xaaladda ayaa haatan kacsan, waxaana ciidamada Kenya ay howlgallo lagu baadi goobayo kooxda weerarla geystay ay ka bilaabeen halkaasi, si loo soo bad-baadiyo shaqaalaha.

Inta badan kooxda Al-Shabaab ayaa weeraro khasaare geysta ka fulisa gudaha waddanka Kenya, gaar ahaan gobolka waqooyi bari oo so xiga dhinaca Soomaaliya.

Si kastaba, waxaa xusid mudan in kooxdu ay horey u beegsatay ciidamada ammaanka, iskuullada, gaadiidka, magaalooyinka iyo isgaarsiinta waqooyi bari  Kenya, taasi oo qeyb ka ah ololaha ay Kenya ku cadaadineyso, si ay ciidamadeeda ugala baxdo dalka Soomaaliya.

Milxo (Caasimada Online) – Faahfaahino dheeraad ah ayaa ka soo baxaya weerar qorsheysan oo markale xalay ka dhacay deegaanka Mixlo oo ku yaalla gobolka Sanaag.

Weerarkan oo sababay khasaare kala duwan oo isugu jiro dhimasho iyo dhaawac ayaa waxaa lagu soo warramayaa inay fuliyeen rag hubeysan oo afka soo duubtay.

Wararka ayaa sheegaya in dableyda hubeysan oo goobta isaga baxsatay ay rasaas ku furtay dad shacab ah ooku caweynayey mehrad ganacsi oo ku taalla halkaasi.

Inta la xaqiijiyey waxaa weerarkan ku dhintay hal qof, ayada oo ay ku dhaawacmeen saddex kale, sida ay innoo xaqiijiyeen ilo dadka deegaanka.

Sidoo kale waxaa goobta gaaray ciidamo ka tirsan kuwa ammaanka ee Puntland, kuwaas oo gurmad u sameeyey dadka ay waxyeelada soo gaartay, waxayna sidoo kale haatan wadaan howlgallo baaritaano ah oo lagu baadi goobayo raggii ka dambeeyey dhacdadaas

Illaa iyo hadda ma cadda heybta dableyda weerarkan fulisay iyo waxa ay salka ku heyso dhacdadaan sababtay dhimashada iyo dhaawaca.

Si kastaba, dhowr jeer oo hore ayaa sidaan oo kale weeraro sababay dhimasho iyo dhaawac waxayan uga dhaceen Milxo, kuwaasi oo midkood uu ahaa qarax xoogan, walow ninkii farsameeyey qaraxaa soo baxsad ahaa ciidankaPuntland ay ku qabateen Boosaaso.

Muqdisho (Caasimada Online) – Ra’iisul Wasaaraha Soomaaliya Xamse Cabdi Barre ayaa kulan la qaatay xubno ka socday Ganacsatada Soomaaliyeed oo uu kala hadlay kaallinta kaga aadan Gurmadka iyo taakuleynta dadkii ku wax yeeloobay qaraxyadii shacabka badan lagu xasuuqay ee Soobe 2.

Kulanka oo ay goobjoog ka ahaayeen guddiga heerka wasiir ee xukuumadu ay u xilsaartay maareynta musiibadii ka dhalatay qaraxyadaas iyo guddoomiyaha gobolka Banaadir Yuusf Madaale.

Kulanka ayaa diiradda lagu saaray doorka ganacsatadu ay ku leeyihiin samata-bixinta iyo midaynta kaalmaha dhaqaale ee lagu taakuleynayo dadka ay wax yeelladu ka soo gaartay qaraxyadii Soobe 2 ee Al-Shabaab ay Muqdisho ka fuliyeen 29-kii October.

“Ra’iisul Wasaare Xamse oo ganacsatada ugu mahad celiyey doorkooda muuqda, ayaa xusay in wadajir xoogga loo saaro sidii shacabka loogu gurman lahaa, dowladduna ay qaaday tallaabooyin wax ku ool ah, lana sii wadi doono howlaha gurmadka, shacabka Soomaaliyeedna looga baahan yahay in ay sii kordhiyaan gurmadka iyo dadaalka ay wadaan,” ayaa lagu yiri qoraal uu kulankaas ka soo saaray xafiiska R/Wasaaraha.

Kulankaan uu Xamse Barre la yeeshay ganacsatada Muqdisho ayaa ku soo aadaya iyadoo dowladdu ay laba jibaartay cadaadiska ay saareyso ganacsatada, si meesha looga saaro canshuurta ay siiyaan kooxda Al-Shabaab.

Ganacsatada Soomaaliyeed oo kooxda Al-Shabaab badda siiya ayaa weli hoos u dhigaya go’aankooda, mana jiro ganacsade shaaciyey inuu dhaqaalihii ka jartay kooxda.

Arrintaas waxaa loo sabaneynayaa guulaaha ay dowladdu ka gaareyso furimaha dagaalka oo yar iyo ganacsatada oo weli beylah u ah Al-Shabaab, maadaama aan dalka laga xoreyn, iyaguna aysan sameysan ilaalo ka difaacda kooxda.

Muqdisho (Caasimada Online) – Wasiirka wasaaradda arrimaha gudaha Soomaaliya, Mudane Axmed Macallin Fiqi oo maanta ka hadlay kulan duco iyo xus loogu sameynayey dadkii ku dhintay qaraxyadii Sabtidii ka dhacay agagaarka Zoobe ayaa shaaca ka qaaday ujeedka laga lahaa qaraxyadaasi oo ay mas’uuliyaddoodu sheegatay kooxda Al-Shabaab.

Fiqi ayaa marka hore sheegay in dad shacab ah oo aan waxba galabay lagu xasuuqay weeraradaas, isla-markaana si nabad ah ugu ganacsanayey halkaasi.

Sidoo kale wuxuu tilmaamay in maalintaas Al-Shabaab u dagaal uga furmayaa meelo kala duwan oo ka mid ah furimaha dagaalka uu ka socda gobollada, balse ay kasoo weecdeen.

“Ayadoo nimanka Khawaarijta ah oo ay furimo badan oo ay ka diriri karaan u furan yihiin maalinkaas dagaalbaa uga furnaa Masaajid Caliguduud, maalinkaas Hiiraanbaa dagaal uga furnaa, maalinkaas Galgaduudbuu uga furnaa, maalinkaas Bakoolkbuu uga furnaa, Shabeelaha Hoose  ayuu uga furnaa,” ayuu yiri wasiir Axmed Macallin Fiqi.

Wasiirka arrimaha gudaga oo hadalkiisa sii wata ayaa sheegay in Al-Shabaab caro heysay darteed ay u beegsadeen shacabka ku sugnaa agagaarka wasaaradda waxbarashada, ayna ka soo baqdeen inay si foolka fool ah u wajahaaan ciidamada, sida uu hadalka u dhigay.

“Intay halkaas kasoo jiireeyeen oo kasoo baqdeen ayey caro iyo xasuuq u geysteen dadkii KM5 joogay maalinkaas,” ayuu markale sii raaciyey.

Ugu dambeyn wuxuu ugu baaqay guud ahaa dadka Soomaaliyeed inay u midoobaan la dagaalanka Al-Shabaab, si looga saaro meelaha ay ka joogaan dalka.

Halkan ayaa kusoo aadayo, ayada oo haatan magaalada Muqdisho uu ka socdo gurmad ballaaran oo loo fidinayo dadkii ay waxyeelada ka soo gaartay qaraxyadii Zoobe.

Aljeris (Caasimada Online) – Meertada 31-aad ee Shir-madaxeedka Ururka Jaamacadda Carabta ayaa si rasmi ah uga furantay magaalada Aljeris ee dalka Aljeeriya, halkaas oo ay goobjoog ka yihiin hoggaamiyeyaasha wadamada Carabta oo ay Soomaaliya qayb ka tahay.

Madaxweyne Xasan Sheekh Maxamuud ayaa ka qayb-galay furitaanka shirka 31-aad ee Ururka Jaamacadda Carabta, kaas oo sanadkaan lagu qabanayo dalka Aljeeriya.

Qoraal ka soo baxay Villa Soomaaliya ayaa waxaa lagu sheegay in madaxweynaha uu shirkan ka jeedin doono khudbad uu kaga hadlayo dhibaatooyinka arggagixisadu ay ku hayso nabadda, horumarka iyo dowladnimada Soomaaliya iyo sidoo kale guulaha dawladda iyo shacabka oo wadajira ay ka xaqiijiyeen dagaalka dalka ka dhanka ah kooxda Shabaab.

Sidoo kale madaxweyne Xasan Sheekh ayaa inta uu ku sugan yahay Aljeeriya waxa uu kulan doceedyo la yeelan doona Madaxda dalalka Carabta, hoggaanka hay’adaha iyo ururrada caalamiga ah ee ka soo qeybgalay meertadan.

Madaxweynaha waxaa ku wehelinaya shirkan, Wasiirka Wasaaradda Arrimaha Dibadda iyo Iskaashiga Caalamiga Mudane Abshir Cumar Huruuse, Wasiirka Wasaaradda Maaliyadda Dr. Cilmi Maxamed Nuur, Safiirka Soomaaliya ee dalka Masar ahna Wakiilka Soomaaliya ee Ururka Jaamacadda Carabta Danjire Ilyaas sheekh Cabdulqaadir iyo Safiirka Soomaaliya ee dalka Aljeeriya mudane Danjire C/wahaab Macallim Maxamed.

Dhanka kale Madaxweynaha Soomaaliya ayaa dalka Aljeeriya kulan kula qaatay Xoghayaha Guud ee Qaramada Midoobey António Guterres.

Madaxweynaha ayaa Xoghayaha kala hadlay labo arrin oo kan koowaad uu yahay dagaalka ay dowladdu kula jirto kooxda Al-shabaab iyo muhiimadda ay Soomaaliya u leedahay taageerada beesha caalamka, si loo soo af-jaro argagixisada.

Muqdisho (Caasimada Online) – Hay’adda xuquuqda Aadanaha ee Amnesty International ayaa si adag uga hadashay qaraxyadii lagu hoobtay ee Zoobe 2 ee magaalada Muqdisho, kaasi oo Sabtidii ay ka fulisay Al-Shabaab.

Amnesty ayaa waxay si kulul u cambaareysay qaraxyadaasi oo galaaftay nolosha shacab badan oo Soomaaliyeed, iyadoo baaq deg deg ah u kala dirtay dowladda federaalka Soomaaliya iyo kooxda Al-Shabaab.

Hay’adda xuquuqda Aadanaha ee Amnesty International ayaa ugu horeyntii ugu baaqday kooxda Al Shabaab inay joojiyaan weerarada aan loo meel dayin ee ku dilayaan shacabka.

Sidoo kale waxay madaxda dowladda federaalka Soomaaliya ugu baaqday inay xaqiijiyaan amaanka dadka rayidka ah, oo inta badan ay dhibaatada kasoo gaarto falalka ay fuliyaan argagixisada.

Waxay tilmaamtay hay’addu in weerarada ay Al Shabaab geysanayaan ay yihiin fal dambi, islamarkaana ay muhiim tahay in kuwa lagu tuhmayo inay masuul ka yihiin loo maxkamadeeyo.

Qaraxyadii Sabtidii ka dhacay isgooska Zoobe ee magaalada Muqdisho ayaa galaaftay nolosha dad kor u dhaafaya boqol, sidoo kalena waxaa ku dhaawacmay in ka badan 340 qof.

Algiers (Caasimada Online) – Madaxweynaha Soomaaliya Xasan Sheekh Maxamuud oo dalka Al-jeeriya uga qeyb galaya Shir Madaxeedka dalalka Jaamacadda Carabta ayaa halkaas kulan kula qaatay Xoghayaha Guud ee Qaramada Midoobey António Guterres.

Madaxweynaha ayaa Xoghayaha kala hadlay labo arrin oo kan koowaad uu yahay dagaalka ay dowladdu kula jirto kooxda Al-shabaab iyo muhiimadda ay Soomaaliya u leedahay taageerada beesha caalamka, si loo soo af-jaro argagixisada.

Madaxweynaha ayaa Xoghayaha guud la wadaagay horumarada ciidamada Soomaaliyeed oo kaashanaya Shacabka ay ka sameeyeen dagaalka ka dhanka ah Khawaarijta, waxa uuna xusay in cunaqabateynta hubka oo laga qaado Soomaaliya ay si weyn u caawineyso dagaalka lagu hayo Argagixisada Somaaliya, tan Gobolka iyo Caalamka.

Qodobka labaad, Madaxweyne Xasan Sheekh oo tilmaamay in dowladdiisa ay ka go’an tahay ciribtirka Al-shabaab ayaa Qaramada Midoobay ka codsaday in ay sii kordhiso taageerada bani’aadannimo iyo tan farsamo ee ay siiyaan dowladda Soomaaliya si loo xaqiijiyo xasiloonida dalka iyo in ciidanka Soomaaliyeed ay la wareegaan kuna filnaadaan ammaanka dalka.

Xoghahaya Qaramada Midoobey António Guterres ayaa bogaadiyay sida dowladda dhexe iyo dowladaha xubnaha ka ah ay uga mideysan yihiin ammaanka dalka iyo dhammeystirka dowlad dhiska Soomaaliya, isaga oo intaas ku daray in Qaramada Midoobay ay Soomaaliya ka taageerayaan dagaalka argagixisada, tayeynta ciidanka qalabka sida iyo arrimaha la xiriira Isbedelka cimilada iyo deegaanka.

Madaxweyne Xasan Sheekh ayaa ugu dambeyn uga mahadceliyey Qaramada Midoobey taageerada ay siiyaan dowladda Federaalka Soomaaliya, waxa uuna  adkeeyay in ay sii wadaan garab istaagga ay dalka iyo dadka Soomaaliyeed u muujiyeen.

Muqdisho (Caasimada Online) – Sheekh Mahad Warsame (Karataay) oo kamid ah hoggaamiyaasha sare ee kooxda Al-Shabaab ayaa ka hadlay qaraxyadii ka dhacay Isgoyska Zoobe ee magaalada Muqdisho, kuwaas oo lagu laayey dad shacab ah oo aan waxba galabsan.

Karataay oo ka hadlayey shir ay culumada taageersan ugu fatwoonayeen kooxda Al-Shabaab ayaa sheegay in qaraxyadii ka dhacay Isgoyska Zoobe ay ugu talageen xarunta Wasaaradda Xaxbarashada oo ku taal meel u dhow isgoyska Zoobe.

Mahad Warsame ayaa sheegay in qaraxii koowaad oo baabuur ah ay ku dhufteen Wasaaradda Waxbarashada, halka baabuurkii labaad uu sheegay inay rasaas ku fureen ciidamada dowladda, kadibna ay qarxiyeen isagoo aan gaarin halkii loogu talagalay.

“Qaraxii koowaad wuxuu u dhacay sidii loogu talo-galay, kii labaad waxaa rasaas ku furay ciidamada dowladda oo diiday inuu gaariga gaaro meesha loogu talagalay oo ah wasaaradda, khasaaraha shacabka kasoo gaaray waxaa mas’uuliyaddeeda qaadeysa dowladda Soomaaliya,” ayuu yiri.

Hoggaamiyahaan ayaa sheegay in Wasaaradda Waxbarashada ay muddo badan waday qorsho ardayda Soomaaliyeed looga dhigayo askar, sida uu hadalka u dhigay wuxuuna sheegay inay dhowr sano baaritaan ku hayeen.

“Annaga dhiigga muslimiinta waa naga xaaraan, dadkii shacabka ahaa ee qaraxyada ku dhintay waan u tacsiyeyneynaa, anaga mar kasta waxaan weerar kusoo nahay xarumaha dowladda, waxaan shacabka ugu baaqeynaa inay ka guuraan goobahaas, haddii aysan ka guurin wixii soo gaaro iyaga mas’uul ka ah,” ayuu yiri.

Hadalkiisa wuxuu kusii daray inay been abuur tahay warka kasoo baxay dowladda Soomaaliya ee ah inay qaraxyadaas ku dhinteen 100 qof oo shacab ah, wuxuuna taas badalkeeda sheegay in dadka dhintay ay 69 ka mid ahaayeen askarta dowladda, sida uu hadalka u dhigay.

Ugu dambeynti Mahad Karataay ayaa sheegay inay diyaar u yihiin dagaalka uu iclaamiyey madaxweynaha Soomaaliya Xasan Sheekh Maxamuud.

Al-Shabaab ayaan horey looga baran inay qiil u sameyso ama iska leexiso eedaha shacabka ay ku laayaan qaraxyada, waxaana hadalka Mahad Karataay uu abuurayaa su’aalo ku saabsan sababta ay xilligan sidaas u doorteen.

Kooxdan ayaa hadda wajaheysa kacdoon shacab oo awood badan, waxaana qaraxyadii Zoobe 2 ay sii kordhinayaan dadka u careysan ee hubka qaadanaya, taasi oo ay suurta-gal tahay inay ka walaacsan tahay, sidaasna Mahad Karataay ugu qiil dayayo dadkii la laayey.

Muqdisho (Caasimada Online) – Siyaasiyiinta iyo waxgaradka beelaha Duduble iyo Murusade ayaa maanta ku shiray magaalada Muqdisho, iyagoo ka arrinsanaya dagaalka lagula jiro kooxda Al-Shabaab.

Labadaan beelood ayaa sheegay inay isku af-garteen inay iska kaashadaan dagaalka deegaanada ay wada degaan looga xoreynayo Al-Shabaab, gaar ahaan degmada Ceelbuur iyo deegaanada hoos taga ee gobolka Galgaduud.

Xildhibaanada iyo wasiirrada beelahaas ayaa ka hadlay munaasabadii lagu soo gabagabeeyey shirkaas, waxayna sheegeen inay ka mideysan yihiin dagaalka lagu xoreyn doono Ceelbuur.

Wasiirka Cadaalda iyo Dastuurka XFS Xasan Macalin oo ka mid ahaa masuuliyiintii halkaas ka hadashay ayaa sheegay inuu Ceelbuur ku dhashay, isla markaana uusan maanta tegi karin Ceelbuur

Wasiir Xasan Macalin ayaa sheegay in tani ay ka dhigan tahay in beeshiisa Murusade ay ku jirto gumeysi ay Al-Shabaab ku heystaan dhulkooda, isagoo wacad ku maray inay dhulkooda ka xoreysa doonaan kooxda.

Wasiirka Maaliyadda Galmudug Senator Farxaan Cali Maxamuud ayaa balan qaaday in markii uu guuleysto is kaashiga ay Murusade iyo Duduble ku xoreynayaan Ceelbuur ay si gaar ah xoogga u saari doonaan ka shaqeynta hormarkeeda.

Xildhibaan Yuusuf Geele Ugaas ayaa sheegay in qorshihii hore uu ku fashilmay abaabulka oo yaraa, balse maanta ay garab ka helayaan beesha Murusade “hadii aan nahay reer Ceel-buur waa in aan dhiiga isku shubnaa oo dagaalka wada galnaa” ayuu yiri Dhegey Ugaas.

“Beesha Murusade hadda dagaalka waa soo gashay ilaa 7 diyaaradood oo ciidan ah ayey Muqdisho ka direen, sidoo kale Duduble waa diyaar garoobay, qabiil kasta ciidankiisa ayuu diyaariyey, waxaana muuqata inaan isku filanahay,” ayuu yiri Xildhibaan Yuusuf Geele Ugaas Dhegey.

Xildhibaan Mustaf Sheekh Cali Dhuxuloow ayaa sidoo kale muujiyey yidadiilo ah in iskaashigaan uu guuleysa karo isla markaana si fudud lagu xoreyn karo Ceelbuur, “waxaa arki doontiin madaxda Al-shabaab oo aad wada taqaaniin in la soo qaban doono dhamaantood,” ayuu yiri.

Washington (Caasimada Online) – Wasaaradda Lacagta ee dalkan Maraykanka ayaa cunaqabatayn saartay xubno ka tirsan ururka Daacish ee Soomaaliya oo lagu eedeeyey inay ku lug leeyihiin inay ku lug leeyihiin iibka hubka ee Bariga Afrika, sida ay qortay Wakaaladda Wararka ee Reuters.

Maraykanka ayaa sannadkii 2018-da liiska ururrada argagixisada ku daray ururka Daacish ee Soomaaliya.

Shaqsiyaadka cunaqabataynta la saaray waxaa ku jira Cabdirahman Mohamed Cumar, oo lagu eedeeyey inuu xubin ka yahay Daacishta Soomaaliya, iyo inuu yahay xubinta ugu firfircoon ee laga soo bilaabo 2020-kii hubka sharcidarada ah kasoo dejiya Puntland, sida ay qortay Reuters.

Waxaa sidoo kale cunaqabatayn la saaray Ciise Mohamoud Yusuf, oo lagu eedeeyey inuu hubka iyo saadka ufududeeyo Al-Shabaab, islamarkaana uu soo geliyo Puntland hub.

Waxaa sidoo kale cunaqabatayn la saaray Cabdirahman Faahiye oo lagu sheegay inuu yahay Amiirka Daacish ee Soomaaliya.

Waxaa sidoo kale xayiraadda lala beegsaday Mohamed Ahmed Qahiye oo Wasaaradda Maaliyadda ay sheegtay inuu yahay madaxa Amniyaatka, oo ah kooxda sirdoonka u aqaabilsan Al-Shabaab iyo xubno kale.

Tallaabadan ayaa imaneysa ayada oo Washington ay isku dayeyso inay sare u qaaddo diiradda lagu arbushayo shabakadaha maalgelinta argagixisada ee Afrika, sida uu weriyayaasha u sheegay sarkaal sare oo ka tirsan Wasaaradda Maaliyadda.

Inkasta oo tallaabdan ay tahay tii ugu horreysay ee Mareykanka uu ku beegsado kooxda Daacish ee Soomaaliya, haddana sarkaalka ayaa sheegay in toddobaadyada soo socda ay iman doonaan tallaabooyin kale oo dheeri ah.

Wasaaradda Maaliyadda waxay sidoo kale sheegtay in kooxda Daacish ee Soomaaliya “ay si caadi ah ula shaqeyso ururada kale ee argagixisada” sida Al-Shabaab iyo kooxaha burcad badeedda.

Muqdisho (Caasimada Online) – Xarunta bangiga dhiiga ee dhismaheedu ka socday magaalada Muqdisho ayaa waxaa shalay kormeer ku tagay wasiirka caafimaadka Dr. Cali Xaaji Aadan iyo wasiirka arrimaha gudaha Axmed Macalim Fiqi.

Xarunta bangiga dhiiga ayaa mareysa meel gaba-gabo ah, ayada oo dhismaheedu soo socday muddo sanad iyo bar ah, waxaana lagu wadaa in si rasmi ah u shaqo bilaabi doonto laba bilood gudahood, sida uu sheegay wasiirka caafimaadka.

Wasiirka caafimaadka Dr. Cali Xaaji Aadan ayaa sidoo kale waxa uu sheegay inay rajeynayaan in gobolada dalkana la gaarsiin doono.

Sidoo kale wasiirka arrimaha gudaha, federaalka iyo dib u heshiisiinta Mudane Axmed Macalim fiqi oo halkaasi ka hadlay ayaa ugu horeyntii u mahadceliyey wasaaradda caafimaadka iyo Isbitaalka Banaadir.

Waxa uu sheegay in bulshada uu hayay welwel la xiriira arrintaan, islamarkaana haddii xarunta bangiga dhiiga dhismaheeda xariga laga jaro uu bangiga dabooli doono baahiyo badan iyo qeyla dhaanta ka soo yeerta umadda Soomaaliyeed.

“Bangigaan oo Injineerada ay sheegeen in laba bil kadib la furi doono, taasi oo ah arin lagu farxo. Waxaa la ii sheegay in dhiigan loo dhoofin karo gobalada dalka oo meel kasta oo dhib ka dhaca lageyn karo dowladihii ka qeyb-qaatay ee dalkeenna ugu tabarucay waan ugu mahadcelinaa.”

Ugu dambeyntiina waxaa goobta ka hadlay agaasimaha guud ee isbitaalka hooyada iyo dhalaanka Banaadir Marwo Fartuun Shariif, iyada oo u mahadcelisay dowladaha Sweden iyo Finland oo dhismahaan kaalin weyn ka geystay.

Muqdisho (Caasimada Online) – Madaxtooyada Soomaaliya ayaa ka hortimid in la gowraco maleeshiyada kooxda Al-Shabaab ama la beegsado qoysaskooda, kadib markii falal noocaas ah ay ka dhaceen gobolka Hiiraan.

Maleeshiyada Macawiisleyda ayaa dagaal ka dhacay gobolka Hiiraan 18-kii September waxay ku dileen 45 maleeshiyo oo ka tirsan Al-Shabaab, kuwaasi oo saddex ka mid ah ay gowraceen.

Sidoo kale, guddoomiyaha gobolka Hiiraan Cali Jeyte ayaa 16-kii bishan, wuxuu Macawiisleyda ku amray inay dilaan xaasaska iyo caruurta Al-Shabaab, isaga oo sidoo kale lacag abaal-marin dul dhigay madaxa saraakiisha Al-Shabaab.

Cali Jeyte ayaa sheegay in qofkii u keena madax Al-Shabaab uu siinayo lacag, taasi oo uu ka dhabeeyey toddobaadkii tegay islamarkaana lacagtii ugu horreysay siiyey dagaal-yahan u keenay madax Al-Shabaab uu soo dilay.

Hase yeeshee madaxtooyada Soomaaliya ayaa sheegtay in taasi aanay sax aheyn.

Xuseen Sheekh Cali oo ah la-taliyaha amniga qaranka madaxweyne Xasan Sheekh, ayaa wareysi uu siiyey wargeyska Mareykanka ee New York Times, ku sheegay in gowraca uu yahay khalad ay tahay inaan lasii wadin.

Xuseen ayaa sheegay in dowladda ay weydiisatay maleeshiyada Macawiisleyda inay joojiyaan fulinta ficillada noocaas ah.

Waxa uu intaas ku daray in dowladda ay la xiriirtay guddoomiyaha gobolka Hiiraan iyo dadka kale ee saameynta ku leh gobolka, si looga fogaado in la beegsado xaasaska, caruurta iyo ehellada xubnaha Al-Shabaab.

“Qoysaska mintidiintan ma ahan dad xor ah. Waxaana dooneynaa inay annaga na isku key soo dhiibaan. Ma ahan siyaasadda dowladda in la dilo rayid, mana dhiiri-gelineyno,” ayuu yiri. 

Hargeysa (Caasimada Online) – Maamulka Somaliland ee sheegta inuu ka go’ay inta kale ee Soomaaliya ayaa jawaab kulul ka bixiyey hadalkii shalay kasoo yeeray Madaxda Golaha Wadatashiga Qaran ee shirka kusoo geba-gebeeyey Muqdisho.

Golaha wadatashiga Qaran ayaa ugu baaqay inay madaxda iyo shacabka Somaliland ilaashadaan xasilloonida iyo nabadda xilli ay deegaanadaas ka taagan tahay xasarad ka dhalatay doorashada madaxweyne ee weli la qaban la’yahay.

Wasiirka wasaaradda warfaafinta Somaliland Saleemaan Cali Koore ayaa sheegay in hadii ay cid la talinayaan oo ay wax yihiin Golaha Wadatashiga ay badbaadin lahaayeen shacabka hortooda maalin walba lagu dilayo.

Wasiirka ayaa intaas ku daray in maalin kasta Soomaaliya lagu dilo dad shacab ah oo ay mas’uul ka yihiin Golaha Wadatashiga Qaran loogana baahan yahay inay dadkooda u tashadaan oo ay ka badbaadsaadan cadawga dilaya.

Saleemaan Cali Koore ayaa madaxda Dowladda Soomaaliya ugu baaqay inaysan waqti isaga lumin arrimaha Somaliland, islamarkaana looga baahan yahay inay ku ekaadaan xalinta dhibka heysto shacabka ay madaxda u yihiin.

“Shacabka hortooda ugu dhimanaya sida Ayaxa iyo Kaneecadda la buufiyey oo kale ayaa tallo uga baahan ee Somaliland talo ugama baahna,” ayuu wasiir Saleemaan Cali Koore oo qabtay shir jaraa’id.

Somaliland ayaa mar walba ka jawaabta hadallada iyo go’aanada kasoo baxa Dowladda Soomaaliya ee ku saabsan arrimaah Somaliland, iyaga oo aaminsan inay ka go’een Soomaaliya inteeda kale.

Somaliland ayaa dhowr sano ka hor ku dhawaaqday inay tahay dal madax banaan balse illaa iyo hadda ma aysan helin aqoonsi caalami ah, waxaana sidoo kale diidan Soomaalida inteeda kale.

Cadale (Caasimada Online) – Dowladda federaalka ah ee Soomaaliya ayaa faahfaahin cusub ka bixisay howlgalkii culuslaa ee todobaadkan lagula wareegay deegaanka Masaajid Caliguud, kadib dagaallo u dhexeeyey ciidanka dowladda & Shabaab oo ka dhacay halkaasi.

General Axmed Maxamed Calasow (Tareedisho) oo ka mid ah saraakiisha sare ee milatariga Soomaaliya oo warbaahinta kula hadlay furinta hore ee dagaalka ayaa sheegay in Masaajid Caliguduud oo muddo saldhig u aheyd Al-Shabaab haatan laga fara maroojiyey, wuxuuna shaaca ka qaaday in halkan ay kooxda u aheyd albaab muhiim ah oo laga soo galo.

“Runtii Caliguduud dadka waxa ay u heysteen magaallo caadi ah, laakiin ma aheyn waxa ay aheyd albaabka koowaad ee Al-Qaacidada laga galo” ayuu yiri Gerenaral Tareedisho.

Sidoo kale wuxuu shaaciyey tirada rasmiga ee Al-Shabaab looga hadlay howlgalkaasi, isaga oo xaqiijiyey inay gaarayaan illaa 189 xubnood, sida uu hadalka u dhigay.

“Howlgallada meel fiican ayey marayaan Khawaarijta meeshaan waxaa looga dilay dad gaaraya ilaa 189, halkaas way ku baaba’day,” ayuu yiri markale sii raaciyey.

Dhinaca kale xildhibaano, siyaasiyiin, waxgarad iyo guddi ka socdo dowladda Soomaaliya ayaa gaaray Masaajid Caliguud, kuwaas oo kormeeray gudaha deegaankaasi.

Xaaladda ayaa haatan ah mid deggan, waxaana ciidamada huwanta ay isku ballaariyeen magaaladaasi, kadib markii Al-Shabaab duqeyn iyo dagaal looga saaray halkaasi.

Ciidamada dowladda iyo kuwa deegaanka ayaa ujeedkooda uu yahay inay gaaraan illaa degmada Aadan Yabaal oo uu ku yaallo saldhigga ugu weyn ee kooxda Al-Shabaab.

Muqdisho (Caasimada Online) – Abwaan Cusmaan Cabdullahi Guure ayaa loo magacaabay maareeyaha golaha murtida iyo wac-gelinta qaranka, xilkaas oo horay sidaan oo kale loogu magacaabay markii ay cusbeed dowladdii uu hoggaaminayey Madaxweyne Farmaajo.

Wasiirka warfaafinta Daa’uud Aweys ayaa xilkaan u magacaabay Abwaan Guure, wuxuuna sheegay in deg deg loogu baahan yahay in la soo saaro fanaaniin qaran oo kaalin ka qaada karta wacyi gelinta iyo jiheynta bulshada.

Waxaa wareegtadaan xilkii maareeyaha golaha murtida iyo wacyi-gelinta looga qaaday Abwaan Shube oo saaxiib dhow la ahaa madaxweynihii hore Farmaajo.

Shube ayaa aad u taageersanaa mudo kororsigii Farmaajo, wuxuuna sameeyey hees markii dambe ay kooxdii Farmaajo ku dhici weysay inay baahiso, taas oo Abwaan Shube uu ku taageeray mudo kororsigii fashilmay.

Waa markii labaad oo xilkaan loo magacaabay Abwaan Guure, waxaana xusid mudan in markii hore la magacaabay tiyaatarka qaranka oo burbursan, kaas oo Guure uu olole u galay in isxilqaan lagu dhiso.

Hoos ka daawo wareegtada