Muqdisho (Caasimada Online) – Ergeyga gaarka ah ee Madaxweynaha Soomaaliya u qaabilsan Arrimaha Gurmadka Abaaraha, Cabdiraxmaan Cabdishakuur Warsame ayaa sheegay in kooxda Al-Shabaab ay qeyb ka tahay kororka abaarta ka jirta Soomaaliya.

Cabdiraxmaan Cabdishakuur ayaa waxa uu ku eedeeyay Al-Shabaab in dadka beeraleyda ah u diideen inay dallaagooda beertaan, xilli ay dadkaasi fursad u haysteen inay tacbadaan beeraha, sida uu sheegay.

“Annaga culeysyo badan ayaa na heysto oo run ahaantii qayb ayay ka yihiin sababaha abaaraha sababta oo ah waxa ay dadkii u diidan yihiin in beerihii tacbadaan oo xoolihii dhaqdaan iyaga oo ah dad masaakiin ah oo abaar iyo dhibaatooyin heysta oo 5 waqti roobaad ka baaqday,” ayuu yiri.

“Beerihii ma falan karaan oo canshuur badan ayay dulsaarayaan, aniga nin beeraley ah oo weliba ceel beertiisa uga dhex qodon yahay kuwa aan ceelasha lahayn iskaba dhaafee, habeenkii ma daari kartiin ayay ku dhaheen sababtoo ah nalka waxaa soo raacaya diyaaradaha Drones-ka ah, maalin keliya ayaa daari kartiin, beertana habeenkii ayaa la waraabiyaa.”

Ergeyga gaarka ah ee madaxweynaha Soomaaliya ayaa sidoo kale waxa uu sheegay in falalka nabad-gelyo darro ee kooxda ay qayb weyn ka tahay waxyaabaha dowladda Soomaaliya ka hortaagan inay hesho fursado maalgashi shisheeye ah iyo in gudaha dalka laga fuliyo mashaariic muhiim ah.

“Dadkii oo dhan ayay nolosha ku cariiriyeen waxa ay taasi keentay in abaarta culeyskeedii qayb ay ka noqdaan,” ayuu yiri Xildhibaan Cabdiraxmaan Cabdishakuur Warsame.

“Argagixisadu waxa ay naga hortaagan yihiin oo nabad la’aanta naga hortaagan tahay oo dowladda Soomaaliyeed ay hesho fursad oo maalgashi dibadda uga yimaado oo waxa uu dhaqaalaha ku kordhaa maalgashiga shisheeye. In ay dowladdu deyn qaadan karto, in ay dowladdu heli karto mashaariic waaweyn sida korontada, dhismaha jidadka iyo warshadaha balse waxaas oo dhan waxaa naga hortaagan xasilooni darrada argagixisada.”

Soomaaliya ayaa waxaa ka jirta abaar saameyn taban ku reebtay in ka badan 8 Milyan oo ruux, oo ay kamid yihiin 2.5 Milyan oo xaalad nafaqo darro ku heysato gobolada dalka.

Qorshaha waxqabadka bini’aadantinimo ee Soomaaliya ee 2023, oo dhawaan ay daaha ka rogeen QM, saaxiibadeeda bini’aadamnimada iyo dawladda federaalka Soomaaliya ayaa waxaa ka mid ahaa baaqa 2.6 bilyan oo dollar oo deeq ah.

Deeqdan lacageed ayaa waxaa la sheegay in lagu caawinayo in ka badan 8 milyan oo qof, oo lasoo wariyay inay si aad ah ugu baahan yihiin gar-gaar ay ku noolaadaan.

Nairobi (Caasimada Online) – Shir muhiim u ah Soomaaliya oo diiradda lagu saarayo arrimaha deyn cafinta ayaa magaalada Nairobi uga furmay dowladda federaalka Soomaaliya iyo Hey’adda lacagta adduunka ee IMF.

Sidoo kale shirkaan waxaa qeyb ka ah quburro ka socota Bangiga Adduunka, waxaana shirkaan hoggaamineysa wasaarradda Maaliyadda Soomaaliya, iyadoo lagu gorfeynayo arrimaha muhiimka u ah sharuudaha barnaamijka Deyn Cafinta Soomaaliya.

Dowladda Soomaaliyaayaa lagu qiimeynayaa shirkaan, iyadoo baaritaano iyo warbixino ku saabsan horumarinta hannaanka maamulka guud ee dhinaca Maaliyadda Soomaaliya lagu soo bandhigayo shirkaan.

Shirkaan ayaa sidoo kale waxa looga arrinsanaya sidii xoogga loo saari lahaa dhamaystirka Deyn Cafinta Soomaaliya, iyadoo la isla eegayo sharuudaha iyo barnaamijka muhiimka ah sidii loo gaari lahaa barta dhammaystirka Deyn Cafinta Soomaaliya.

Wasiirka Maaliyadda Xukuumadda Federaalka Soomaaliya, Dr. Cilmi Maxamuud Nuur oo shirkaan si rasmi ah furay ayaa sheegay in ay muhiim tahay in fulinta sharuudaha lagu heshiiyay, kicinta dakhliga gudaha iyo xoojinta hannaanka Maamulka Guud ee Maaliyadda dalka (PFM).

“Waxa maanta noo bilowday dib eegistii 5aad ee barnaamijka ECF aan leenahay Hey’adda IMF. Waxa aan uga hadli doonaa horumarka aan ka samaynay kicinta dakhliga gudaha, hannaanka MaamulkaMaaliyadda Guud iyo Dowlad wanaagga. Waxa naga go’an in aan sii xoojino dib-u-habeynta Maaliyadda dalka keenna,” ayuu yiri Wasiirka Maaliyadda Soomaaliya Dr. Cilmi M. Nuur.

Shirkaan ayaa waxaa sidoo kale ka qeybgalaya, wasaaradaha qorshaynta iyo Caddaaladda, Bangiga Dhexe ee Soomaaliya, xubno ka socda xafiisyada Madaxweynaha, Ra’iisul Wasaaraha iyo Wakiilo ka socda Hey’adaha IMF, Bangiga Adduunka, Bangiga Horumarinta Afrika iyo Hey’adaha kale Soomaaliya ka taageera kabka miisaaniyadda.

Mudo sanado ah waxaa Soomaaliya ku socota qiimeyn dhanka maamulka maaliyadda ah, si loo marsiiyo tijaabo sababta in marka dambe laga cafiyo deymaha ay dunidu ku yeelatay intii ay burbursaneed Soomaaliya.

Muqdisho (Caasimada Online) – Kooxda Al-Shabaab ayaa shaacisay inay dishay laba nin oo kamid ah ganacsatada daroogada noocyadeeda kala duwan ku iibin jiray gudaha magaalada Muqdisho.

Kooxda Al-Shabaab oo dhawaan billowday howlgallo ay ku baacsaneyso ciyaal-weerada iyo dadka ka ganacsada daroogada ayaa waxay xalay dagaal-yahaano ka tirsan weerar ku qaadeen degmada Wadajir, gaar ahaan suuqa weyn ee degan, halkaasi oo ay ku dileen nin magaciisa lagu sheegay Cusmaaneey oo ahaa nin ka ganacsada daroogada noocyadeeda kala duwan.

Ninkan ayaa ayay kooxdu sheegtay in lagu dhex dilay isla goobtii uu ku iibinayay daroogada noocyadeeda kala duwan ee gudaha suuqa weyn ee degmada Wadajir.

Al-Shabaab ayaa sidoo kale waxay sheegtay in isla xalay weerar kale ay maleeshiyaadkeedu ka fulisay deegaanka Garasbaaley gaar ahaan agagaarka Macaane ee duleedka Muqdisho.

Weerarkan ayaa waxay sheegtay in lagu dilay Cabdi Weli Ilyaas oo isaguna ka ganacsanayay daroogada noocyadeeda kala duwan, sidoo kalena waxaa lagu dhex dilay goobtiisii uu daroogada ku iibinayay.

Kooxda Al-Shabaab ayaa dhawaan ku u dhawaaqday in howlgal nooc cusub ah oo ay ku beegsaneyso kooxaha ka ganacsada maandooriyaha iyo ciyaal weerarada, ayada oo tan iyo markaas magaalada Muqdisho ka fulisay dilal kala oo ay sheegtay inay ku khaarajisay qaar kamid ah horjoogayaasha ciyaal-weerada iyo kuwa ka ganacsada daroogada.

Dabayaaqada bishii hore ayay aheyd markii ay kooxda shaacisay in deegaanka Tabeellaha Sheekh Ibraahim ay ku dishay Cabdiqaadir Carab oo kamid ahaa horjoogayaashii ciyaal-weerada, islamarkaana dhalinyarada magaalada Muqdisho ka gadi jiray taanbuuga iyo xashiishka.

Arrimahaan ayaa kusoo aadaya xilli ay kooxaha ciyaal-weerada markale kusoo laba kacleeyeen magaalada Muqdisho, kuwaasi oo dhibaato xoog leh ku hayay shacabka ku nool magaalada Muqdisho.

Muqdisho (Caasimada Online) – Xildhibaan Cabdiraxmaan Cabdishakuur Warsame ayaa shaaciyay in xisbiga Wadajir oo dhawaan ay ka tageen xubno badan uu qabsan doono shirweyne dib u qaabeyn loogu sameynayo xisbiga.

Cabdiraxmaan Cabdishakuur ayaa sidoo kale waxa uu ku tilmaamay ka tagista xubnahaasi in qeyb ka tahay sunaha xisbiyada ee marka doorasho laga soo baxo, sida uu hadalka u dhigay.

“Markasta oo doorasho siyaasadeed ay dhacdo dad ayaa xisbiyada ka taga oo kuwa cusub ayaa soo gala. Dadkii tagay waa mahadsan yihiin dad wanaagsan oo si fiican aan iskula soo shaqeyn waaye, xaq ayay u leeyihiin in xisbiga ka tagaan sababo u gaar ah ayay sheegeen oo qofka bini’aadamka ma dhihi kartid sabab gaar ah majiri karto.”

Waxa uu sii raaciyay hadalkiisa “Waxaa na saaran inaga intii soo hadhay in aan shirweyne qabano oo dib u habeyn ku sameyno xisbigii xilliga ugu dhaqsaha badan ee ugu haboon.”

Sidoo kale waxa uu sheegay in xisbiga uu hoggaamiyo ee Wadajir uu gacmo furan kusoo dhaweynayo ciddii daneynaysa ee la dhacsan hab fikira iyo aragtiyada xisbigaasi, “Dadka Soomaaliyeed ee afkaarta xisbiga la dhacsan, shirweyne ayaa qabaneyna oo muhiim ah oo aan go’aansanay intayada xisbiga ku hartay.”

Dhawaan ayay aheyd markii bayaan ay si wadajir ah u soo saareen 19 xubnood oo ka tirsanaa xisbigaan lagu cadeeyey in dhamaantood ay isaga baxeen xisbiga.

Liiskaas ayaa waxaa ka soo muuqday siyaasiyiin miisaan leh oo 6-dii sano ee lasoo dhaafay ka soo tirsanaa xisbiga Wadajir.

Xubnaha is-casilay ma sheegin waxa sababay go’aankaan, balse waxay ku gaabsadeen “inay jiraan arrimo u gaar ah oo ku khasbay inay gaaraan go’aankaan.”

Bayaanka ay soo saareen xubnahaan isaga baxay Xisbiga ayaa lagu baahiyey Bogga Facebook ee Wadajir Party.

Qoraalka ayaa ugu horeyn lagu yiri “Xisbiga Wadajir waxa uu ka mid ahaa axsaabta ugu waaweyen ee dalka. Muddadii uu jiray xisbiga waxuu ku guuleystay ballaarinta iyo baahinta nidaamka axsaabta badan iyo dimuqraadiyeynta dalka. Xisbiga waxuu xarumo ku yeeshay dalka gudahiisa iyo dibadiisa. Sidoo kale, tan iyo markii la aasaasay ee bishii June sanadki 2016, xubunaha iyo taageerayaash xisbiga waxey kor u dhaafeen kumanaan.”

“Xisbiga Wadajir waxuu ku dhisnaa — welina ku dhisanyahay — mabaadii’ iyo afkaar ku saleysan Wadatashi, Wadajir, Is-oggol, iyo Dimuqraadiyad,” ayaa lagu yiri qoraalka.

Doolow (Caasimada Online) – Magaalada Doolow ee gobolka Gedo ayaa waxaa saacadihii lasoo dhaafay gaaray ciidan cusub oo Itoobiyaan ah, kuwaasi oo ka madax-banaan howl-galka Midowga Afrika ee ATMIS (ex-AMISOM).

Ciidamadan ayaa sidoo kale waxaa la socday Madaxa hawl-galinta ciidanka militariga dowladda Itoobiya General Tasfaye Ayalew iyo Taliyaha guud ee ciidanka xoogga gaarka ee dowlad deegaanka Soomaalida iyo Sarakiil kale oo ka socotay dowladda Itoobiya.

Masuuliyiintan ayaa waxaa garoonka diyaaradaha ee Doolow kusoo dhaweeyay saraakiisha ciidamada, guddoomiyaha degmada Maxamed Lafeey iyo qeybaha kala duwan ee bulshada.

Sida ay ogaatay Caasimada Online, Ciidankan ayaa waxay fariisimo cusub ka sameysteen aagga garoonka diyaaradaha magaalada, waxayna qeyb ka yihiin fulinta howl-gal wada-jir ah oo go’aankiisa madaxda dalalka safka hore ku gaareen magaalada Muqdisho.

Sidoo kale waxaa socda qorshe lagu doonayo in ciidankan aan ka tirsaneyn howl-galka ATMIS ee Itoobiyaanka ah lagu geynayo degmada Baardheere ee gobolka Gedo.

Hoggaamiyayaasha Itoobiya, Jabuuti iyo Kenya ayaa 1-dii Febraayo ka qeyb-galay kulan madaxeed uu Muqdisho ku marti-geliyey madaxweynaha Soomaaliya Xasan Sheekh Maxamuud.

War-murtiyeed kasoo baxay kulankaas ayey ku sheegeen inay isku raaceen inay si wadajir ah u qorsheeyaan una abaabulaan olole howlgal “oo lagu raadinayo laguna burburinayo” Al-Shabaab, kaasi oo ah dhowr jiho.

Itoobiya ayaa noqotay dalkii ugu horeeyay ee si rasmi ah u fuliya heshiiskaasi. Jabuuti iyo Kenya ayaa sidoo kale ciidamo dheeraad ah kusoo dari doona ciidamada horey dalka ugu sugnaa ee qeybta ka ah howl-galka ATMIS.

Ciidamadan ayaa qeyb ka noqonaya howl-galka dalalka safka hore ee ka dhanka ah kooxda Al-Shabaab, kaasi oo lagu xoojinayo dagaalka ka socda dalka, oo deegaano horleh looga xoreeyay kooxda.

La-taliyaha amniga qaranka ee madaxweynaha Soomaaliya Xuseen Sheekh Cali oo dhawaan shaaciyay in ciidamadan soo gaari doonaan dalka ayaa waxa uu yiri “Kaalintooda waa inay si wadajir ah u qorsheeyaan uguna howlgalaan taliska ciidamada amniga Soomaaliya. Sidaas darteed, waxay la dagaalami doonaan Al-Shabaab, ayaga oo garab taagan ciidamada Soomaaliya. Waa sidaas qorshaha.”

Matt Bryden, oo ah khabiir amniga Geeska Afrika ah ayaa sheegay in ciidamada dheeraadka ah, ee aan qeybta ka aheyn ATMIS “ay dedejin karaan dadaalalda lagu wiiqayo loogana adkaanayo Al-Shabaab.”

“Tan iyo markii dowladda federaalka iyo saaxiibadeeda ay ku dhowaaqeen damacooda, Al-Shabaab waxay u badan tahay inay kala dirtay dagaal-yahannadeeda si ay uga fogaato dagaal militari oo toos ah,” ayuu yiri.

Bryden ayaa ka digay in guusha wejiga labaad ee duulaanka ay ku xirnaan doonto laba arrin oo muhiim ah.

“Kan koowaad waa qorsheyn,” ayuu yiri

“Howl-gallada ka hortagga argagixisada waa inay noqdeen kuwa ay sirdoonka hoggaamiyaan oo leh ujeedooyin cad, sida burburinta saldhigyada la yaqaan ee Al-Shabaab iyo dilka hoggaamiyayaasha sare.”

Arirnta labaad ayuu ku sheegay in la helo ciidamo xaqiijiya oo gacanta ku haya deegaanada laga qabsado kooxda, ayuu yiri.

“Howl-galladii ugu dambeeyey ee dowladda ee ka dhanka ahaa Al-Shabaab ee gobollada dhexe, waxay muujiyeen maqnaanshaha ciidamada awood u leh inay sii hayaan deegaanada,” ayuu yir Bryden.

Qaahira (Caasimada Online) – Wasiirrada arimaha dibbada ee dowladaha Jaamacadda Carabta oo shir ku yeeshay magaalada Qaahira ayaa si adag uga digay biyo xireenka halka dhinac ee ay dowladda Itoobiya ka waddo wabiga Nile-ka.

Bayaan laga soo saaray shirka wasiiradan ayaa waxaa lagu sheegay in biyo xireenka Itoobiya uu khatar weyn ku yahay ku tiirsanaan Masar ee webiga, taasi oo sii xoojineysa dooddii xukuumadda Qahira ee xiisadda kala dhaxeysa Itoobiya.

“Jaamacadda Carabtu waxay sii wadi doonta inay la xiriirto dhammaan dhinacyada gobolka iyo kuwa caalamiga ah si ay u taageeraan geeddi-socodka nabadda iyo xuquuqda dadka Falastiiniyiinta.”

Wasiirrada arimaha dibbada ee dowladaha Jaamacadda Carabta ayaa sidoo kale waxay muujiyeen sida ururkooda diyaarka ugu yahay inay difaacan danaha dalalka Carabta ah.

“Urur ahaan waxaa dejinay aragtiyo ku saabsan xiisadda ka taagan Ukraine, hubka nukliyeerka, isbeddelka cimilada, iyo arrimaha dalalka Carabta.”

Bayaankan ayaa imanaya xilli ay dowladda Masar ay doonayso inay dalalka Carabta ku qanciso in Itoobiya ay aqbasho “heshiis sharci ah” oo ku saabsan buuxinta biyo xireenka wabiga Nile-ka.

Wasiirka Arrimaha Dibadda ee Masar Sameh Shoukry oo ka hadlayay shirka Jaamacadda Carabta ee Qaahira, ayaa sheegay inuu doonayo “in dalalka Carabta ay ku cadaadiyaan Itoobiya inay aqbasho mid ka mid ah xalalka tanaasulka ah ee lagu soo bandhigay miiska wada xaajoodka arrintan.”

Itoobiya ayaa biyo xireenka ka dhiseysa webiga Nile-ka, taasi oo Masar ay ka cabsi qabto xaddidaad dheeri ah oo ku timaadda biyaha ay ka hesho wabiga Nile oo dadkeeda oo 100 milyan ka badan ay noloshoodu ku tiirsan tahay.

Wabiga Niilka Buluugga ah ayaa ah isha ay Masar ka hesho 90% biyaheeda nadiif ah.

Muqdisho (Caasimada Online) – Guddiga tartanka adeega Xajka sanadka 1444/2023 ee dhawaan uu magacaabay Wasiirka Wasaaradda Diinta iyo Awqaafta XFS Sheekh Mukhtaar Roobow Cali ayaa shaaciyay shuruudaha laga rabo shirkadaha doonaya u tartamida u adeega Xujeyda Soomaaliyeed.

Shuruudahan uu soo saaray guddiga oo ka adag kuwii sanadihii hore ayaa waxaa loo dhigay shirkadaha doonaya inay bixiyaan adeega Xajka ee sanadkaan, ayada oo tartankaan uu ku eg yahay maalinta Axad ee ku taariikheysan 12-ka March 2023-ka.

Shirkadaha doonaya iney u tartamaan u adeegida Xujeeyda Soomaaliyeed ayay guddiga hor dhigeen inay soo buuxiyaan sharuudo dhowr iyo toban qodob ka kooban oo ay ugu horeyso in Milkiilayaasha shirkaddaha ay yihiin muwaadiniin Soomaaliyeed.

Shuruudahan ayaa sidoo kale waxaa qeyb ka ah in Shirkada iyo Milkiiliyaasheedu yihiin dad sumcad leh, maxkamadna aysan ku ridin xukun ciqaabeed kama danbeys ah 5-tii sano ee u danbeysay, islamaarkaana soo gudbiyaan warqadda danbi la’aanta maamulaha shirkadda ee CID-da.

“Waa in Shirkadda leedahay khibrad la xiriirta Adeegyada Xajka & Cumrada ugu yaraan laba sano oo khibrad ah. Shirkad, Wakaalad iyo Xamlad walba oo daneyneysa Adeegga Arrimaha Xajka waa in ay ogoshahay bixinta lacagta dhigaalka ah (Deposit).”

Waxa kale oo lagu yiri qoraalka “Shirkadu waa in ay ka diiwaan-gashan tahay hay’adda IATA, soona gudbiso Code Number-keeda ama ay keento warqad wada-shaqeyn shirkad ka diiwaan-gashan IATA laguna cadeeyay Code Number-ka (IATA), (ayaatta).”

Guddigan Xajka ee uu magacaabay Wasiir Mukhtaar Roobow ayaa dhawaan waxaa ka dhashay khilaaf xoogan oo ku saabsan hufnaantooda, inkasta oo markii dambe ay soo fara-geliyeen madaxda sare khilaafkaas oo u dhaxeeyay wasiirka iyo ku-xigeenkiisa, lana xaliyay.

Hoos ka aqriso shuruudaha uu soo saaray guddiga oo dhameystiran:

Laascaanood (Caasimada Online) – Xukuumadda Somaliland ayaa markale ka hadashay dagaalka Laascaanood ee xarunta gobolka Sool, ayada oo sheegtay in shaqaaqooyinka gobolkaasi laga leeyahay burburinta dimuquraadiyadda iyo nidaamka doorashada ee Somaliland.

“26 illaa 28-kii December 2022 guud ahaan Somaliland waxa looga diyaar garoobayey diiwaan-gelinta codbixiyeyaasha doorashooyinka, gobolka Soolna wuxuu ka mid ahaa gobollada diyaar-garawgu ka socday ee Jamhuuriyadda Somaliland, waxase lagu soo beegay shaqaaqooyinka ka dhacay magaalada Laascaanood,” ayaa lagu yiri qoraal kasoo baxay Golaha Wasiirada Somaliland.

Xukuumadda ayaa sidoo kale waxay sheegtay in ujeedka dagaalka Laascaanood iyo xiisadda ka taagan guud ahaan gobolka Sool aysan ka madhneyn wiiqida dagaalka ay Somaliland kula jirto argagixisada, burcad baddeeda iyo in meesha laga saaro nabadda ay sanadaha badan kusoo caano maashay, sida lagu yiri qoraalka.

“Xukuumadda Somaliland waxay mar-walba diyaar u tahay in arrinta Magaalada Laascaanood lagu dhammeeyo wada hadal, iyadoo hirgelinaysa xabad joojintii bilaa shuruuda ahayd ee hore Xukuumaddu ugu dhawaaqday.”

Sidoo kale waxay ku boorisay in shacabka Somaliland iyo hay’addaha Caalamiga ah in ay sii xoojiyaan taakulada bini’aadannimo ee ay u fidinayaan dadka ka barakacay Laascaanood, taasi oo ay sheegtay in xukuumaduna diyaar u tahay in ay fudaydiso wixii gargaar ah ee dadkaasi la gaadhsiinayo.

Somaliland ayaa tan iyo markii uu billowday dagaalka Laascaanood waxay iska soo daba saareysay qoraalo ay ku sheegayso in dagaalka socda laga leeyahay qorshe looga soo horjeedo jiritaankeeda iyo nabad-gelyadeeda.

Xukuumadda ayaa dagaalkan ku eedeysay dhinacyo badan inay qeyb ka yihiin, taasi oo ay ugu dambeysay “in ciidamo ka yimid dowlad deegaanka Soomaalida islamarkaana kasoo tallaabaday dhanka xadka ay ka dagaalamayaan magaalada Laascaanood.”

Dagaalka u dhexeeya ciidamada Somaliland iyo kuwa deegaanka ee SSC ayaa qaatay muddo bil ah, kaasI oo ay ku dhinteen dad badan shacab ah, kuna dhaawacmeen kuwa kale.

Muqdisho (Caasimada Online) – Taliyaha ciidamada Xoogga dalka Soomaaliyeed, Odawaa Yuusuf Raage ayaa shalay tababar usoo xiray cutubyo ka tirsan ciidamada sida gaarka ah u tababarn ee Gorgor, kuwaas oo ay tababartay dowladda dalka Turkiga.

Ciidamadan oo ka tirsan Guutada 17-aad ee Gorgor ayaa tababarka ku qaatay magaalada Muqdisho, gaar ahaan dugsiga tababarka ee dowladda Turkiga ee ku yaalla caasimada.

Taliye Odawaa oo khudbad ka jeediyay xiritaanka tababarka ciidamadan cusub ayaa u mahadceliyay taliyeyaasha dugsiga ee tababarka siiyay askartaasi Soomaaliyeed.

“Waxaa rabaa inaan u mahadceliyo taliyeyaasha dugsiga oo runtii laf-dhabar u ah fulinta iyo hirgelinta dhammaan shaqooyinka muhiimka ah ee halkan ka qabsoomay,” ayuu yiri.

Sidoo kale wuxuu aad u amaanay dowladda Turkiga, isaga oo sheegay inay door lixaadleh ka qaaday dib u dhiska qaybaha kala duwan ee ciidamada Xoogga dalka Soomaaliyeed.

Odayaa ayaa xusay in dadaalka iyo garab istaagga Turkigga uu muhiim u yahay howlgallada xoreynta ah ee haatan ka socda koonfurta iyo bartamaha dalka.

“Waxaan rabaa sidoo kale inaan u mahadceliyo dowladda Turkiga oo xaqiiqatan, haddii aan iyaga ahaan laheyn aanay hirgeleen dhammaan howlaha nooga hirgalay dib u dhiska ciidanka Xoogga dalka Soomaaliyeed, dib u xoreynta dalka iyo dib u xoreynta Khawaarijta guud ahaan oo dadka Soomaaliyeed ciriiri ku haaya,” ayuu markale yiri taliye Odawaa.

Ugu dambeyn wuxuu farriin u diray ciidamada tababarka loo soo xiray, isaga oo dalbaday inay u diyaar garoobaan sidii ay wax uga beddali lahaayeen dagaalka Al-Shabaab.

“Aad iyo aad ayaa ugu faraxsanahay in tababarkiina uu idin soo gabagaboobo, kuna biirtaan ciidanka Gorgor ee Xoogga dalka Soomaaliyeed, isbeddalka socdana aad horay usii wadi doontaan” ayuu hadalkiisa kusoo gabagabeeyay taliyaha ciidamada Xoogga dalka.

Kismaayo (Caasimada Online) – Shirkii maalmihii ugu dambeeyay magaalada Kismaayo ee xarunta KMG ee maamulka Jubbaland uga socda dowladda federaalka iyo dowlad-goboleedyada ayaa lasoo gaba-gabeeyay.

Shirkan oo u dhaxeeyay taliyayaasha Booliska dowlad-goboleedyada dalka iyo taliska guud ee Booliska federaalka Soomaaliya ayaa waxa lagu go’aamiyay in arrimaha Booliska xiriirka dibadda ee INTERPOL in uu noqdo mid gaar u ah Booliska Heer Federaal.

“7-9 March 2023 waxaa magaalada Kismaayo ee dowlad-goboleedka Jubbaland lagu soo xiray shirka Madasha Wasaaraddaha Amniga Gudaha iyo Taliyaasha Booliska ee Dowladda Federaalka iyo Dowladaha Xubnaha ka ah oo Saddexdii Bilood hal-mar la qabto ayaa waxaa la iskugu raacay in mashruuca wadajirka Booliska ee JPP wajiga 2-aad loo magacaabo guddi farsamo oo labada heer ee DF iyo dowlad-goboleedyad.”

Shirkan ayaa waxaa kasoo qeyb-galin dowlad-goboleedka Puntland oo ayadu hore ugu dhawaaqday inay u dhaqmi doonto sidii dowlad madax-banaan oo kale.

Go’aamada kasoo baxay madashan ayaa sidoo kale waxaa lagu sheegay inay isku raaceen in gunooyinka ka imaanayay mashruuca wadajirka Joint Police Program (JPPG) ee la siinayay ciidanka Booliska dowladdaha xubnaha ka ah DF la sii joogteeyo bixinteeda.

“Madashu waxay isku raaceen in arrimaha khuseeya dhaqan-celinta xubnaha isa-soo dhiibay ee horay uga tirsanaa Al-Shabaab in lasii wado hawsha socota iyo dhaqaalo u raadinta xarumaha kale ee dowladdaha xubnaha ka ah DF, islamarkaana caruurta la ciidameeyo lala kaashado hay’addaha UNICEF ee QM.”

Madasha Wadatashiga Wasaaraddaha Amniga Gudaha iyo Ciidanka Booliska heer federaal iyo dowlad-goboleedyada ayaa sidoo kale isla qaatay in Booliska dowlad-goboleedyada xubnaha ka ah dowladda federaalka ay yeeshaan unnuga baarista dembiyada.

Hoos ka aqriso war-murtiyeedka oo dhameystiran: