Xarardheere (Caasimada Online) – Taliyaha ciidanka dhulka ee xoogga dalka Jeneraal Maxamed Tahliil Biixi ayaa faahfaahin ka bixiyey howlgal shalay lagu laayey Al-Shabaab oo ka dhacay deegaano hoos taga degmada Xarardheere ee gobolka Mudug.

Jeneraal Biixi oo la hadlay Idaacadda Dowladda ee Radio Muqdisho ayaa sheegay in la dilay ugu yaraan 39 xubnood oo Shabaab ka tirsanaa, isagoo u mahad celiyey saaxiibada dowladda ka taageera howlgallada Al-Shabaab.

“Waxaan Khawaarijta u geysanay jab aan laga sheekeyn karin, waxaan tirinay meydadka 39 xubnood, waxaan gubnay gaadiidkoodii, waxaan dul istaagnay meydadka 47 Shabaab ah, dhaawacyada in ka badan 50 kalena waxay geeyeen Joowle,” ayuu yiri Jeneraal Biixi.

Deegaanada ay ciidanka xoogga dalka howlgalkaan ka fuliyeen ayaa galbeed ka xiga degmada Xarardheere, waxayna u dhowyihiin deegaanka Caad oo hadda ay ciidamadu aad ugu dhowyihiin.

Howlgalka waxaa ka qeyb qaatay diyaaradaha dagaalka, waxaana Shabaab-ka lagu baacsaday dhowr deegaan oo hoos tagta Xarardheere, iyadoo la isugu daray duqeymo iyo dagaal toos ah.

“Laba maalin gudahood Shabaab badan ayaan leynay, 47 meydad ah ayaan dul istaagnay, bulshada deegaanadaan ku nool waxay si joogto ah noo siiyaan xogta Khawaarijta, waa dad raba in deg deg looga xoreeyo cadowga,” ayuu hadlkiisa ku sii daray.

Jeneraal Biixi ayaa sheegay in ay Al-Shabaab deegaanka Caad ku gubeen gaadiid ay lahaayeen dad shacabka, sidoo kale gaadiid ay ayagu lahaayeen oo ka halaabay ayuu sheegay inay dab qabadsiiyeen.

“Dadkii dhulkaan ku noolaa waa caroodeen, hubkooda ayey la soo baxeen, meel kasta oo Shabaab uu ka joogo Mudug iyo Galgaduud waxaa nooga imaanaya ciwitaano, dadku waxay codsanayaan in aan ka soo gaarno, war naga kiciya hal mar, anagaa dhameystiri doonee ayey na leeyihiin dadku,” ayuu yiri Jeneraal Biixi.

Hoos ka dhageyso wareysiga Biixi

Muqdisho (Caasimada Online) – Madaxweynaha Soomaaliya Xasan Sheekh Maxamuud oo Muqdisho ka furay shirweynaha Culimada Soomaaliyeed ayaa xujo adag dul-dhigay culumada Soomaaliyeed, isagoo tusaaleeyey caqabadaha iyo kala shakiga ay bulshada ka dhex abuureen khilaafaadka yar-yar ee culumada ka dhaxeeya.

Madaxweyne Xasan Sheekh ayaa culumada ka dalbaday inay ku heshiiyaan dhismaha hey’addii maamuli laheyd, “In culumadu ay dowladda toosiso, dadkana u sheegto in dowladdu ay masuul ka tahay diinta, wax dambe nagama qaldamayaan,” ayuu yiri.

Madaxweynaha ayaa culumada ka balan qaaday in hey’adda uu dhisi doono hadii ay la yimaadaan naqshad ay heshiis ku yihiin, “Waxaan rabnaa waajibkaan aan idiin wakiilanayo inaad nagu soo celisaan oo dhahdaan intii naloo diray waa tan, markaas dowladdu kaalinteeda ayey guda doontaa,” ayuu yiri.

Madaxweynaha ayaa intaas ku sii daray, “Diinta dowladda wakiil ka ah 4.5 maaha, federaalisim maaha, waa meesha kaliya ee dalkeena laga toosi karo, hadii aan hey’ad diinta maamusha dhisno waajibaa naga dhacaya.”

Madaxweynaha ayaa sheegay in markii qeylo yeerto dhinaca Masaajidka loo carari jiray, balse hadda ay qayladii ka yeertay culumada dhexdeeda, isagoo culumada ka dalbaday inay isku dulqaataan.

“Culumoy is aqbala oo haku kala tegina waxyaabaha yar yar oo aad ku kala duwan tihiin, wada socda idinkoo ra’yigiinu kala duwan yahay, horta idinku is aqbala,” ayuu yiri Madaxweynuhu.

Madaxweynaha ayaa culumada Soomaaliyeed ka balan-qaaday in doorkii ku dhaqanka diinta ee dhanka dowladda oo aan sal-dhiya laheyn tan iyo xornimadii Soomaaliya uu toosi doono.

Madaxweynaha ayaa xaqiijiyey in dowladdu ay mudnaan siineyso diyaarinta sharcigii lagu dhisi lahaa hey’adda Culimada Soomaaliyeed, taas oo ka mid noqoneysa hay’adaha ugu muhiimsan dowladda, una xilsaaran ilaalinta diinta Islaamka, iyaga oo wakiil uga ah dowladda.

Muqdisho (Caasimada Online) – Sheekh Cabdiqaadir Soomow oo maanta khudbad ka jeediyay furitaanka shirweynaha Culimadda Soomaaliyeed ayaa sheegay in ciidamada dagaalka kula jira kooxda xagjirka ah ee Al-Shabaab ay shuhado yihiin haddii ay ku dhintaan dagaalka.

Sheekh Soomow ayaa waxa uu dagaalka socda ku macneeyay “Jihaad loogu jiro Islaamnimada saxda ah” taasi oo ay kooxaha xagjirka ah suurad xumeeyeen, islamarkaana u adeegsadeen si qaldan, sida uu hadalka u dhigay.

“Dhamaanteen waxaa nagu waajib ah in aan galno Jihaadka, waxaa rabaa in loo duceeyo dhamaan intii ku shahiiday. Geesiyaasha ku dhintay dagaalka waa shahiideen waa dhinteen yaa la dhihin oo loo baroordiiqin,” ayuu yiri Sheekh Soomow.

Waxa uu sii raaciyay hadalkiisa “Kuwa anaga naga dhinta waa Ahlu-Janno, ciidamada qalabka sida waxay ku jiraan Jihaad fii-sabiili-laah. Khawaarij in aan bixino ayaa isku waafaqsanahay.”

Sidoo kale waxa uu adkeeyay in laga toobad keeno maanta oo kale Culimaddii Soomaaliyeed ee la-laayay, taasi oo dowladdii millateriga aheyd ay xasuuqday 23 Janaayo 1975-kii kadib markii ay ka horyimaadeen falal kasoo horjeeda Diinta oo ay ku kacday.

“Haddii aan saxno fikirkaas, waa in laga towbad keenaa maalintii culimaddii Soomaaliyeed la-laayay oo weliba Salaad towba la tukado oo meeshii la tago waa ku waafaqsanahay.”

Sheekh Soomow ayaa ugu dambeyntiina wuxuu ugu baaqay dadkii iska lahaa fikirka xagjirka ah ee Diinta sida qaldan u adeegsaday ee Shabaab ku gumaadayaan bulshada in ay Ilaahay uga towbad keenaan.

“Nebiga CSW ayaa horay noogu sheegay in ay imaan doonaan Qoom cibaado badan balse aysan kalxamaha dhaafsiisnayn Alle ka cabsigoodu. Qof walba oo kaalin kulahaa in fikirkaan guracan dalka la keeno waa in uu Alle u laabto Ummadana cafis weydiisano.”

Nairobi (Caasimada Online) – Wararka naga soo gaaraya gobolka Waqooyi Bari ayaa sheegaya in ciidamada ammaanka ee dalka Kenya ay maanta howlgal culus ka sameeyeen agagaarka magaalada Gaarisa, kaas oo lagu beegsaday xubno ka tirsanaa Al-Shabaab.

Ciidamada ayaa lagu soo warramayaa inay gudaha u galeen saldhig qarsoodi ah oo ay xoogaga Al-Shabaab ku lahaayeen deegaanka Sedahgose oo hoostaga degmada Gaarisa, waxaana halkaas ka dhacay dagaal culus oo foolka fool ah islamarkaana geystay khasaare.

Qoraal ka soo baxay Booliska Kenya ayaa waxaa lagu sheegay in howlgalkaas lagu dilay ugu yaraan illaa 12 xubnood oo ka tirsanaa xubnaha Al-Shabaab ee ku sugnaa saldhigga.

Booliska ayaa sidoo kale shaaciyay in nolosha lagu soo qabtay hal xubin oo ka tirsan Al-Shabab, sidoo kalena ay ciidamadda qabsadeen walxaha qarxa, qori PKM ah iyo 1 AK47 ah.

Kenya ayaa intaasi kusii dartay inay sii wadeyso dhaq-dhaqaaqyo ay ka waddo gobolka Waqooyi Bari, si ay looga hortago weerarada Al-Shabaab ee ka dhaca gobolkaasi.

Xaaladda ayaa haatan ah mid deggan, mana jiro wax hadal ah oo kasoo baxay dhinaca kooxda Al-Shabaab oo ku aadan howlgalkaas ee ay guulaha ka sheegteen ciidanka Kenya.

Dowladda Kenya ayaa maalmihii dambe dhaq-dhaqaaqyo ka wadday xadka ay la wadaagto Soomaaliya, ayada oo soo dhigtay boqolaal askari, si ay u adkeeyaan amniga halkaasi.

Kooxda Al-Shabaab ayaa weeraro gaadmo ah oo khasaare kala duwan geysta ka fulisa gobolka Waqaooyi Bari, kuwaas oo muddooyinkii u dambeeyay aad u kordhay.

Si kastaba, Kenya ayaa qayb ka ah dagaalka ka dhanka ah kooxda Al-Shabaab , waxayna ciidamo ka joogaan Soomaaliya, kuwaas oo ka howlgallada gobollada Gedo & Jubbooyinka.

Kismaayo (Caasimada Online) – Faahfaahino dheeraad ah ayaa kasoo baxaya weerar ay maanta ciidamada Nabad Sugidda maamulka Jubbaland ku qaadeen goobo ay ku sugnaayeen dagaalyahanada kooxda Al-Shabaab oo ku yaalla gobolka Jubbada Hoose.

Weerarka oo ahaa mid qorsheysan ayaa ka dhacay agagaarka degmada Afmadow, gaar ahaan deegaanka Miido oo hoostaga degmadaas, sida ay xaqiijiyeen ilo wareeydo xilkas ah.

Saraakiisha ammaanka Jubbaland oo ka hadlay weerarka ayaa shaaca ka qaaday inay ku beegsadeen kooxda Al-Shabaab, isla-markaana ay khasaare ku gaarsiyeen howlgalkaas.

Sidoo kale saraakiisha ayaa xaqiijiyey inay dileen ugu yaraan laba xubnood, isla-markaana ay burburiyeen maxkamad beenaad ee ay kooxda ku laheyd halkaasi.

Jubbaland ayaa sidoo kale intaasi ku dartay inay sii wadeyso dhaq-dhaqaaqyada ka dhanka ah kooxda Al-Shabaab ee ka socdo gobollada Jubbooyinka ee koonfurta Soomaaliya.

Tallaabada ay qaaday Jubbaland ayaa jawaab u ah weerar ay shalay Al-Shabaab ku qaadan deegaanka Singaleyr, kaas oo lagu dhaawacay taliyihii deegaankaas iyo laba askari oo kale.

Dhaq-dhaqaaqyada labada dhinac ayaa kusoo aadaya, ayada oo haatan Jubbaland u diyaar garowday howlgallo lagu xoreynayo deegaanada ay maamulkaas ka joogaan Al-Shabaab.

Ujeedka ayaa ah in la qabto degmada Jilib oo ah xarunta gobolka Jubbada Dhexe, isla-markaana uu ku yaallo saldhigga ugu weyn ee kooxda Al-Shabaab.

Si kastaba, Al-Shabaab ayaa haatan wajaheysa kacdoon uga billowday gobollada dalka, kaas oo ay iska kaashanayaan ciidamada dowladda iyo kuwa deegaanka ee Macawiisleyda.

Muqdisho (Caasimada Online) – Guddoomiyaha Gobolka Banaadir ahna duqa Muqdisho Yuusuf Xuseen Jimcaale (Madaale) ayaa shalay si degdeg ah ugu soo laabtay caasimadda dalka, isaga oo soo gaabiyay safar shaqo oo ugu maqnaa dalka Kuwait.

Guddoomiye Madaale oo markii uu soo gaaray Muqdisho la hadlay warbaahinta ayaa sheegay in uu aad uga xun yahay wixii Axadii ka dhacay xarunta maamulka gobolka Banaadir, isaga oo ka tacsiyadeeyay dadkii ku dhintay.

“Sabtidii ayaa safar shaqo ah u baxay oo dalka Kuwait ayaa aaday oo maalintii Axada ayuu shirkii noo furmay, dhacdadan markaa maqalnay safarkii waa soo gaabinay si aan dhibta ula qeybsano shacabkeena iyo shaqaalihii ku waxyeeloobay, runtii dhibku aad buu u yar yahay,” ayuu yiri.

“Intii ku shahiiday halkan (xarunta gobolka) ee dhimatay Allaha unaxariisto, inta dhaawacantay Allaha bogsiiyo. Waxaa runtii aad iyo aad ugu mahad-celinayna hay’addaha amniga iyo ciidankii joogay xarunta gobolka oo ka howl-galay cadowgii isku dayay inay waxyeelayaan dadka masaakiinta ah,” ayuu yiri.

Waxa uu sii raaciyay hadalkiisa “Waa fikir qaldan, cida murtadka ah ee sheegayaan wa ayo? ma kala garanayaan waa dad dhalinyaro ah oo la maran-habaabiyay, Soomaalidu waa Muslim oo Diinta Islaamka ayey ku dhaqmaan.”

Sidoo kale waxa uu tilmaamay in dhalinyarada ay Shabaab weerarada usoo diraan ay marka hore soo miir-dooriyaan “Dhalinyarada yaryarka yeysan ku dhumin nimanka danleyda ee iyagu shahaadada soo raadsan ee ciyaalka yaryarka intay kiniin soo siiyaan iraahda orda shahiida, waa nasiib darro runtii qof Muslim dhiigiisa daadintiisa laguma Janno-galo.”

Guddoomiye Madaale ayaa ugu dambeyntiina sheegay in weerarada Shabaab oo xilligaan ku jabay dagaalka uga socda gobolada aysan marnaba cabsi-galin doonin, islamarkaana ay bulshadooda u adeegi doonaan marwalba.

“Waxaa aaminsanahay in mowd-ku ina-haleelayo oo nama baqdin galinayaan Khawaarijta, laakiin waxaa kula talinaya intay goori-goor tahay ay ka towbad keenaan dadka Soomaaliyeed ee walaalahood ee laynayaan, hana kamid noqdaan dadkooda.”

Axaddii ayay aheyd markii dagaal-yahaano ka tirsan kooxda Al-Shabaab ay weerar qaraxyo ku billowday ku qaadeen xarunta maamulka gobolka Banaadir, kuwaasi oo markii dambe dagaal toos ah la-galay ciidamada dowladda.

Maleeshiyaadka Shabaab ee weerarka soo qaaday ayaa gudaha u galay dhismaha, inkasta oo saacado kadib lasoo afjaray, waxaana weerarkaas ku dhintay illaa 5 qof oo rayid ah, halka ay ku dhaawacmeen 4 ruux oo kale, sida ay sheegtay dowladda federaalka Soomaaliya.

Muqdisho (Caasimada Online) – Qaraxyo xooggan oo la rumeysan yahay inay yihiin hoobiyeyaal ayaa goordhow laga maqlay magaalada Muqdisho ee caasimadda Soomaaliya. 

Hoobiyeyaasha ayaa ku dhacay xaafado ku dhow madaxtooyada qaranka, waxaana illaa hadda la xaqiijiyey inay soo dhaceen 7 hoobiye, kuwaas oo kala carar iyo argagax dhaliyey. 

Hoobiyeyaasha qaarkood ayaa ku dhacay meelo u dhow madaxtooyada qaranka, SYL iyo wasaaradda warfaafinta, waxaana la arkayey dadweyne kala cararaya iyo kuwa gabbaad raadsanaya. 

Illa aiyo hadda ma cadda khasaaraha ka dhashay, haddiiba ay jiraan. Faah-faahin naga filo goordhow. 

Muqdisho (Caasimada Online) – Madaxweynaha Soomaaliya Xasan Sheekh Maxamuud oo Muqdisho ka furay shirweynaha Culimada Soomaaliyeed ayaa dib u xusay culimadii Soomaaliyeed ee lagu dilay magaalada Muqdisho, 23-kii Janaayo sanadkii 1975-kii.

Madaxweyne Xasan Sheekh ayaa sheegay in culumadaas ay u shahiiday in ay dadka Soomaaliyeed ka difaacaan afkaartii khaldanayd ee hanti-wadaagga iyo marin habaabinta diinta Islaamka.

Madaxweyne Xasan Sheekh ayaa sheegay in dowladnimada Soomaaliyeed ee maanta ay aas-aas u tahay ilaalinta diinta iyo ku dhaqanka shareecadda Islaamka.

“Waayihii ay dhaceen waxaas ee culumada la laayey dowladeena ayaa ku aragti aheyd dowladihii watay hantiwadaagga oo diinteena aan shuqul ku laheyn, culumadii diidayna waad ogeydeen oo waa la laayey,” ayuu yiri Madaxweyne Xasan Sheekh.

Madaxweynaha ayaa sheegay in xiligaas aysan dadka Soomaaliyeed suurta-gal u noqoneyn inay raacaan nidaamkaas, maadaama aysan wax shaqo ah isku laheyn dhaqanka Soomaalida ee ku saleysan diinta suuban ee islaamka iyo kii Midowgii Suufiyeti ee Hanti-wadaaga.

“Culumadii maalintaas la dilay waqtigooda ayaa intaas ku ekaa, laakiin kadib maxaa dhacay? Dagaalka Khawaarijta maalintii ay soo baxeen waxaa bilaabay madaxweyne Sheekh Shariif, maanta meel dhib badan ayuu soo gaaray,” ayuu yiri Madaxweyne Xasan Sheekh.

Madaxweynaha ayaa carrabka ku adkeeyey in xalka Khawaarijta daawadiisa ay hayaan culumada Soomaaliyeed, “Culumo allay diinta islaamku ma qeybsanaa, marka aqoontii diinta idinkay idinku idishehee, waxaad shirkaan uga faa’iideysataan in doodaha yaryar ee dhexdiina ah aysan caamada soo gaarin,” ayuu yiri Madaxweynuhu.

Madaxweyne Xasan ayaa sheegay in kooxda Al-shabaab ay xasuuqeen culimadii iyo wax-garadkii dalka, ayna hor istaageen nolasha iyo horumarka deegaannada ay xoogga ku haysteen.

“Qofkii rajo ka qaba Al-Shabaab in ay u naxariisanayaan haku tusaale qaato wadaadkii Indhoolaha ahaa ee isaga oo meel uu u baxsado la’ ay ku dileen Xarunta Gobolka Benaadir. Dagaalka Khawaarijta, muddo dheer ayuu soo socday, waxa uuna soo gaaray maanta oo dhibaatadoodu ina wada gaartay. Waxaan rabnaa in xal loo helo dabar-goynta fikirkaas, xalkiina shirkaan ayaa laga sugayaa,” ayuu yiri Madaxweyne Xasan Sheekh.

Muqdisho (Caasimada Online) – Madaxweynaha Soomaaliya Xasan Sheekh Maxamuud oo maanta furay shirweynaha Culimada Soomaaliyeed ayaa si weyn u dhaliilay in hay’addaha dowladda aysan xil gaar ah iska saarin dugsiyada Qur’aanka, si lamid ah Iskuulada iyo Jaamacadaha.

Madaxweyne Xasan ayaa sheegay in xilligaan ay Dugsi Qur’aanka ka meeqaam sareeyaan Iskuulada iyo Jaamacadaha, taasi oo uu sheegay in ay wasaaraddaha xukuumadihii kala dambeeyay aysan ku baraarugsaneyn, islamarkaana ay hadda xooga wada saari doonaan.

“Jaamacadaha iyo Iskuulladeenu inay qurxoonadaan waa fiican tahay laakiin in Dugsi Qur’aanka uu jidka ku dhex yaallo maahan, asna waa in uu qurxoonaada oo nadiif ahaada oo uu yeesho wixii ay lahaan lahaayeen dad meel iskugu yimid.”

“Iskuul markii meel laga dhiso suuli ayaa loo sameeya oo meel biyo laga cabo ayaa loo sameeya, Dugsi Qur’aanka muxuu intaas oo kale u yaalan karin oo u muteystay meel ay kala istaagan, dayacaad sow maha ahan, meesha aan rabno in aan ka imano meeshaas waaye.”

Madaxweynaha ayaa sidoo kale waxa uu sheegay inuu rabo in Diinta ay xil gaar ah iska saarto dowladda, ayna masuuliyadeedu tahay inay ilaaliso oo ay ka hortagto dadka iyo kooxaha raba in ay sida gaarka ah u adeegsadaan.

“Dowladdu markay deegaan qorsheynayso ee Iskuulka u yeelayso ee wax walba u yeelayso, dugsi Qur’aanka iyo Masaajidka aysan u yeelayn. Diinta weli dadkaa iska leh maanta la joogo waa rabna berri Ilaahay hana gaarsiiyo, laakiin dowladdu diinta malahan inay lahaato oo ilaaliso waaye.”

Waxa uu sii raaciyay hadalkiisa “Ma ahan in wax ka badasho ee waa in ay ilaaliso oo luuq laga soo galin, dowladda masuuliyadeeda u horeysa waa taas.”

Madaxweynaha oo lahaa soo jeedinta shirweynaha Culimadda Soomaaliyeed ee maanta ka furmay magaalada Muqdisho ayaa waxa uu dadaal badan galinaya sidii loo dhisi lahaa Gole sare oo Islaami ah oo hormuud u yihiin Culimadda Soomaaliyeed.

Hoos ka daawo

Muqdisho (Caasimada Online) – Dowladda federaalka Soomaaliya ayaa shaacisay in duqeymo cirka ah ay ciidamadu ku garaaceen saldhig xubno Shabaab ah ku dhuumanayeen, kaasi oo ku yaalla deegaanka Beer-faarax oo dhaca Waqooyi-galbeed degmada Xarardheere ee Koonfurta gobolka Mudug.

Qoraal kooban oo kasoo baxay wasaaradda warfaafinta ayaa lagu sheegay in duqeynta kadib uu xigay dagaal, islamarkaana khasaare xoogleh lagu gaarsiiyay Al-Shabaab, loogana dilay ku dhawaad 40 dagaal-yahan.

“Ciidanka xoogga dalka ayaa weerar ku qaaday Deeganka Beer-faarax oo dhaca waqooyi galbeed Degmada Xarardheere ee koonfurta Gobolka Mudug. Ciidanka ayaa la wareegay deegaanka,” ayaa lagu yiri qoraalka kasoo baxay wasaaradda warfaafinta.

Deegaanka Beer-faarax ee maanta la wareegeen ciidamadu ayaa dhaca Waqooyiga degmada Xarardheere oo dhawaan laga xoreeyay Al-Shabaab, waxaana fariiso muhiim ah ka sameystay ciidanka xoogga dalka iyo kuwa Daraawiishta Galmudug.

Madaxweynaha dowlad-goboleedka Galmuudg, Axmed Qoor-Qoor oo haatan ku sugan magaalada Xarardheere ee gobolka Mudug ayaa halkaas ka wada dardar-gelinta dagaalka, ayada oo maalmihii dambe ka socdeen howl-galo is-ballaarin ah.

Wasiirka Gaashaandhigga, Cabdulqaadir Maxamed Nuur iyo Taliyaha ciidamada dhulka ayaa sidoo kale ku sugan Xarardheere oo ah degmo muhiim ah, waxayna xooga saarayaan kasii duulaan tagida degmadaas iyo sifeynta deegaanada ay ku dhuumaleysanayaan Shabaabku.

Si kastaba, Sheegashada dowladda ayaa imaneysa maalmo uun kadib markii ay sidan oo kale sheegtay inay Al-Shabaab ka dishay 100 dagaal-yahan oo Jimcihii toddobaadkii hore weerar ku qaaday degmada Galcad.

Muqdisho (Caasimada Online) – Dagaal-yahaano ka tirsan kooxda Al-Shabaab ayaa shalay weerar qaraxyo ku billowday ku qaaday xarunta maamulka gobolka Banaadir, iyaga oo markii dambe dagaal toos ah la galay ciidamada dowladda.

Maleeshiyaadka Shabaab ee weerarka soo qaaday ayaa gudaha u galay dhismaha, iyada oo weerarkaas ay ku dhinteen illaa 5 qof oo rayid ah, halka ay ku dhaawacmeen 4 ruux oo kale, sida ay sheegtay dowladda federaalka Soomaaliya.

Weerarka shalay ee xarunta maamulka gobolka Banaadir ayaa banaanka soo dhigay saddex arrimood oo ay tahay in dowladda federaalka si weyn ugu baraarugto, sida uu sheegay Axmed Cabdullaahi oo hore wasiir ku-xigeen uga soo noqday maamulka Galmudug.

Axmed Cabdullaahi oo la hadlay VOA ayaa sheegay in aan daba-gal badan lagu sameyn marka ay wax dhacaan, taasi oo keenaysa in dhacdooyin isku nooc ah ay markasta soo noq-noqdaan.

“Waxaa isleeyahay goldalooloyin ayaa ka dhex jira hay’addaha amniga iyo dowladda oo dhan, markii wax dhacaan aan wax laga baraneyn oo aan dadaal badan xooga laga sameyn in dib u dhacaan wixii oo kale. Arrimahaan oo marwalba soo noq-noqonaya markasta waxay leeyihiin calaamad ah in la fududeydinayo oo dad dowladdii ama ciidamada kamid ah ay fududeynayaan,” ayuu yiri.

“Haddii aan damco in aan tago gobolka Banaadir oo gudaha galo wey igu adkaaneysa ID-card kasta oo sito in aan gudaha galo, tana waxa waaye intaas oo checkpoint ayey soo mareysa oo meeshii u dambeysay ayaa falka laga sameynaya in ay markaas gacmo ku jiraan ayaa muuqaneysa.”

Waxa uu sii raaciyay hadalkiisa “Dadkii shaqeynayay oo aan la iska jirin dhexdooda gacmo ah oo shaqeynaya inay jiraan ayaa muuqaneysa iyo in daba-gal badan uusan jirin oo marka wax dhacaan aan dadaal badan laga sameyn in markale dhacaan.”

Maleeshiyaadka Shabaabka ahaa ee weerarka ku qaaday xarunta gobolka Banaadir ayaa ahaa kuwa lugaynaya, iskuna ekaysiiyay ciidamada Qaranka si ay halkaas usoo gaaraan, sida lagu sheegay qoraal kasoo baxay dowladda.

Weerarkan ayaa ku soo aaday, xilli maalmihii u dambeeyay ay Al-Shabaab culeyska soo saartay magaalada Muqdisho, kadib dagaalka culus ee kaga socda gobollada dalka, waxaana weerarkii u dambeeyay oo toos ahaa ay ku qaaday Villa Rays oo ku yaalla agagaarka madaxtooyada.

Muqdisho (Caasimada Online) – Waxaa maanta magaalada Muqdisho ka furmay Shirweynaha Culimada Soomaaliyeed, kaasi oo uu horay ugu baaqay Madaxweynaha Soomaaliya Mudane Xasan Sheekh Maxamuud.

Shirkan oo ay kasoo qeyb-galeen culimo gudaha dalka iyo dibadda isaga kala timid ayaa waxa uu ku saabsan yahay doorka culimada ee la-dagaalanka fikirka xagjirka ah ee Al-Shabaab.

Culimada ayaa kulankooda dood uga yeelan doonaan dhowr qoddob oo miiska saaran, kuwaasi oo kala ah;

1. Sharciyad ka qaadista Al-Shabaab: Sixida fahamka saxda ah ee Diinta Islaamka
2. Sharciyad siinta dowladda: Xukunka Islaamka iyo dowladnimada casriga ah iyo
3. Dhisidda Golaha Sare ee Culumada Soomaaliyeed: Muhiimadiisa iyo Sharciyeyntiisa.

Qaar kamid ah culimada qeybta ka ah kulankaan oo goor sii horeysay warbaahinta la hadlay ayaa sheegay in shirkaan uu muhiim u yahay jiheynta dalka, si culimadu usoo saarto bayaan guud oo ku socda madaxda dowladda federaalka, dowlad-goboleedyada iyo shacabka.

Agaasimaha Waaxda Diinta iyo ku-dhaqanka Shareecada Islaamka ee wasaaradda Awqaafta iyo arimaha Diinta Soomaaliya ayaa dhankiisa sheegay in shirkaan uu kusoo beegmay waqti aad loogu baahan yahay.

“Waa shir Culimada Soomaaliyeed loo qabanayo, waa shir maslaxada guud looga hadlayo, waa shir la doonaayo in waddanka uu is raaco, si fiican isu raaco, diinta islaamkana isu raaco oo culimaduna si qeexan ra’yidooda usoo bandhigto,” ayuu yiri Sheekh Cali Sheekh Maxamuud Cumar.

Waxa uu sii raaciyay hadalkiisa “Waa shir la rajeynayo haddii Alle idmo in qodobo kasoo baxaan, waana la caddeyn doonaa qodobadiisa.”

Furitaanka shirkan ayaa sidoo kale waxa qeyb ka ah mas’uuliyiin ka tirsan dowladda federaalka oo khudbado ka jeedinaya, wuxuuna kusoo aadaya xilli uu dalka ka socdo dagaal culus oo ka dhanka ah kooxda xagjirka ah ee Al-Shabaab.