Beledweyne (Caasimada Online) – Xarakada Al-Shabaab ayaa amar culus dul dhigay ganacsatada ku sugan suuqyada gobalka Hiiraan ee ka ganacsada xoolaha lo’da iyo ariga.

Xubno ka mid ah ganacsatada magaalada Beladweyne ee ariga ayaa Caasimada Online u sheegay in lagu wargeliyay in aysan xoolaha ay iibiyaan u qaadi karin dekadaha Puntland iyo Somaliland, ama ka iibin karin ganacsatada dekadahaas wax ka dhoofiya.

Haddii ay halkaas geeyaan si loo sii dhoofiyo ayaa loogu hanjabay in calaa neef laga qaadi doono $100, qofka wadana laga qaadi doono hal qori iyo boosh.

Sababta ugu weyn ee dekadaha Puntland iyo Somaliland looga joojiyay xoolaha gobalka Hiiraan ayaa lagu sheegay in Al-Shabaab ay dooneyso in xoolaha laga dhoofiyo dekadaha Muqdisho iyo Kismaayo.

Ma cadda sababta ay Al-Shabaab u door bideyso labada dekad, hase yeeshee dadka qaar ayaa ku macneeyey inay Al-Shabaab saameyn ku leedahay koonfurta, lacagna ay ka qaadato labadan dekad iyo ganacsatada isticmaala.

Ma cadda haddii sidoo kale amarkan la siiyey ama la siin doonaa ganacsatada kale ee xoolaha ee suuqyada kale ee koonfurta Soomaaliya, hase yeeshee Caasimada Online waxay xaqiijisay in amarkan la siiyey ganacsatada Beledweyne. 

Muqdisho (Caasimadda Online) – Maamulka gobolka Banaadir ayaa shaqo joojin ku sameeyay waaxda dhulka ee dowladda hoose kadib markii sida la sheegay uu soo galay tuhun ah la xiriira inay musuq-maasuq sameeyeen.

Go’aankan ayaa sidoo kale lagu joojiyey dhammaan gabi ahaanba dhaq-dhaqaaqyada dhulalka ee gobolka Banaadir.

Maamulka ayaa sheegay in cabashooyin badan ay ka yimaadeen waaxdan, taasina ay keentay in shaqadeeda la joojiyo, illaa laga eegayo cabashooyinkan.

Warqad kasoo baxday xafiiska gudoomiyaha gobolka Banaadir ahna duqa magaalada Muqdisho – Cumar Filish ayaa lagu sheegay in baaritaano lagu sameyn doono dhamaan xafiisyada waaxda dowladda hoose ee xamar.

Afhayeenka maamulka gobolka Banaadir Saalax Xasan Cumar ayaa warbaahinta u akhriyay qoraalka kasoo baxay xafiiska gudoomiyaha gobolka Banaadir ee shaqada looga joojiyay waaxda dhulka.

Sidoo kale qoraalka warbaahinta loo akhriyay waxaa lagu sheegay in la sameyn doono guddi soo baara waxa ka jira cabashooyinka ay dadweynaha kasoo gudbiyeen waaxdaas.

Amarka kasoo baxay gudoomiyaha ayaa kusoo aadaya xilli muddooyinkii dambe uu batay is qab-qabsiga iyo dacwadaha la xiriira dhulka ku yaalla magaalada Muqdisho.

Mandhera (Caasimada Online) – Waxaa cabsi xoogan soo food saartay dadka ku nool magaalada Mandhera ee gobolka Waqooyi-Bari Kenya, xili ay sare u kacday xiisada soo noq-noqotay ee magaalada Beled-Xaawo oo 48-saac ee u dambeeyay ay ku dagaalameen dowladda iyo maamulka Jubbaland.

Dagaalka Beled-Xaawo ayaa dhaliyay khasaaro badan oo isugu jira mid nafeed iyo dhaawac, waana arrinta walaaca ku abuurtay dadka ku nool Mandhera, oo iyaga ka cabsi qaba in dagaalkaas uu usoo fido dhinacooda, maadama ay labada magaalo deris yihiin.

Billow Aadan Keerow oo ah senetor-kii ee magaalada Mandheer oo la hadlay idaacada BBC-da, ayaa sheegay in dagaalka Beled-Xaawo uu saameyn toos ah ku yeelanayo Mandheera, isaga oo cabsi ka muujiyay dhibaatada kasoo gaari karta dadka uu metelo.

“Mandheera iyo Beled Xaawo waxaa u dhexeeysaa waddo yar boqol mitir aan gaareyn, mar alaala markii lagu dagaallamo magaalada Beled Xaawo dhibaatooyin badan baa kasoo gaaraa dagaallada,” ayuu yiir Senator Billow.

Waxa uu intaas kusii daray “Ha ahaadaan dadka kasoo cararaya halkaas ama hubka iyo rasaasta la ridaya oo dhan baa magaalada Mandheera kusoo daadanaya.”

Xaalada degmada Beled-Xaaow ee gobolka Gedo ayaa lasoo sheegaya in maanta ay dagan tahay, kadib markii ay saacadihii la soo dhaafay ku dagaalameen ciidanka dowladda & kuwa ka amar qaata Wasiir Janan.

Degmada Beled-Xaawo ayaa hadda waxaa gacanta ku haya ciidamada Xoogga dalka, mana jiro wax rasaas ah oo saacadihii ugu dambeeyey laga maqlay gudaha magaaladaasi.

Saraakiiisha laamaha amniga ayaa sheegay in amniga uu yahay mid wanaagsan, islamarkaana la’isku haleyn karo.

Dadka deegaanka ayaa sidoo kale bilaabay inay dib ugu soo noqdaan guryahooda, kuwaas oo horey uga barakacay dagaalladii ka dhacay halkaasi.

N’Djamena (Caasimadda Online) – Gudoomiyaha Midowga Afrika Moussa Faki Mahamat ayaa sheegay inuu ka walaacsanyahy xiisada kasoo cusboonaatay degaanada xadka ah ee Somalia iyo Kenya, gaar ahaan degmada Beled-Xaawo ee gobolka Gedo, oo shalay dagaal culus uu ka dhacay.

Moussa Faki Mahamat ayaa bartiisi Twitter-ka kusoo qoray “Waxaan si dhow ula socday dagaalkii ka dhacay Beled-Xawo iyo cabsida lasoo daristay dadka rayidka, waxaan dhinacyada Soomaaliya iyo Kenya ugu baaqayaa in ay isxakameeyaan oo wada hadal lagu dhameeyo xiisada xadka ka jirta.”

Gudoomiyaha ayaa sheegay in xasiloonida labada dal, gaar ahaan xadka uu muhiim u yahay wadamada gobolka ku yaalla.

Hadalka Mr. Faki ayaa yimid, iyadoo dowladda Kenya ay warqad qoraal ah u dirtay Midowga Afrika, taas oo ay sheegtay in dagaalkii shalay ka dhacay Beled-Xaawo aysan wax lug ah ku laheyn, isla markaana ay ka walaacsan tahay sida ay wax u wado dowladda federaalka Soomaaliya.

Dowladda Soomaaliya ayaa shalay Kenya ku eedeysay iney hurisay dagaalkii ka dhacay magaalada Beledxaawo, walow ay wasaaradda arrimaha gudaha Kenya arrinkaas beenisay kuna tilmaantay dagaalkii dhacay mid Soomaalida dhexdeeda u dhaxeeya.

Urur goboleedka IGAD ayaa horay waan-waan uga dhex waday labada dowladood ee Kenya iyo Soomaaliya, balse wali wax heshiis ah lagama gaarin arrimaha u dhaxeeya labada dowladood.

Beledxaawo (Caasimada Online) – Dowladda Kenya ayaa maanta si toos ah uga jawaabtay eedeyntii kaga timid Soomaaliya ee la xiriirtay iney qeyb ka noqotay dagaalkii Beled Xaawo ka dhacay, waxeyna sheegtay inuu dagaalkaas yahay mid dhex-maray Soomaali.

Wasiirka arrimaha gudaha dalka Kenya Fred Matinagi ayaa sheegay in dagaalka dhacay uu dhexmaray laba ciidan oo Soomaali ah, islamarkaana aysan wax shaqo ah ku laheyn dowladda Kenya.

“Kenya wax lug ah kuma lahan dagaalka, mana jirin cid ka tirsaneyd ciidamadeena oo dagaalka qeyb ka ahaa kana tallaabay xadka Soomaaliya, ma garan karno waxey arintaas ula jeedaa, dagaalka waa mid Soomaali u dhaxeeya,” ayuu yiri wasiirka.

Jawaabta ka timid Kenya ayaa kusoo aadeysa xilli dowladda Soomaaliya ay si cad ugu eedyesay dhigeeda Kenya iney soo hubeysay waxa ay ku sheegtay maleeshiyaad oo soo weeraray magaalada Beledxaawo.

Jawaabta ay maanta bixisay Kenya ayaa ah mid toos ah oo ka duwan tii shalay oo ay ku gaabsatay kaliya inay walaac ka muujisay xaaladda ka jirta magaalada Beledxaawo oo dhacda xadka labada dal.

Muqdisho (Caasimada Online) – Wasiirka wasaaradda maaliyadda Soomaaliya Cabdiraxmaan Ducaale Beyle ayaa ka laabtay hadal uu shalay ku sheegay in qaadka laga keeni karo dal kasta, taasi oo loo fahmay in la fasaxay qaadka Kenya

Beyle ayaa beeniyey in dowladda federaalka ay si rasmi ah u fasaxday keenista qaadka maalin weliba ka imaan jiray dalka Kenya, kadib markii uu shalay shaaciyey inuu furan yahay bixinta shatiyada qaadka, lagana keeni karo dalka.

Beyle ayaa sheegay in hadalkiisa loo fahmay si khalad ah, islamarkaana kaliya uu ka hadlay Qaadka Hareriga ee laga keeno dalka Itoobiya, sida uu hadalka u dhigay.

Sidoo kale wuxuu intaasi ku daray in go’aankiisa uu ahaa sidii meesha looga saari lahaa inuu dad gaar ah u xirnaado keenista Qaadka nooca Hareriga.

Wasiirka ayaa shaaca ka qaaday in aysan jirin cid si gaar ah loogu xiray ka ganacsiga Qaadka, islamarkaana ay u furan tahay qof kasta oo raba inuu keeno dalka.

“Hadalkeygu wuxuu daba socdaa kii shalay, waxaan ka hadlay oo aan doonayaa in aan caddeeyo Qaadka Hareriga dadka qaarkood ay sheegeen inuu dad gaar ah u xiran yahay, haddii si khalad ah loo fahmay arrintu Qaadka Hareriga kaliya ayey ku saabsan tahay,” wasiirka wasaaradda maaliyadda ee xukuumadda federaalka ah ee Soomaaliya.

Soomaaliya ayaa horey u hakisay Qaadka nooca Miirooga ee laga keeni jiray dalka Kenya, tan wixii ka dambeeyey xayiraadaha cudurka Coronavirus, wuxuuna sidoo kale go’aankaasi saameyn xoogan ku yeeshay xiriirka labada dal ee Soomaaliya iyo Kenya.

Beledxaawo (Caasimada Online) – Wararka ka imaanaya gobolka Gedo ayaa sheegaya in maanta ay dagan tahay xaaladda degmada Beledxaawo ee gobolkaasi,kadib markii ay saacadihii la soo dhaafay ku dagaalameen ciidanka dowladda & kuwa Janan.

Degmada Beledxaawo waxaa gacanta ku haya ciidamada Xoogga dalka, mana jiro wax rasaas ah oo saacadihii ugu dambeeyey laga maqlay gudaha magaaladaasi.

Saraakiiisha laamaha amniga ayaa sheegay in amniga uu yahay mid wanaagsan, islamarkaana la’isku haleyn karo.

Dadka deegaanka ayaa sidoo kale bilaabay inay dib ugu soo noqdaan guryahooda, kuwaas oo horey uga barakacay dagaalladii ka dhacay halkaasi.

Dhinaca kale saraakiil ka socota dowladda Soomaaliya ayaa saacadaha soo socda ku wajahan Beledxaawo, si ay u soo qiimeeyaan xaaladda guud ee magaaladaasi.

Si kastaba xaaladda Beledxaawo ayaa isku bedashay mid dagaal, kadib markii  habeen hore ay weerar ku soo qaadeen ciidamada uu horkacayo wasiirka amniga Jubaland.

Dhuusomareeb (Caasimada Online) – Saraakiil ku dhow madaxweynaha maamulka Galmudug Axmed Cabdi Kaariye Qoor Qoor ayaa sheegay inuu ka horyimid fulinta dalab ay soo jeediyeen madaxweynayaasha Jubaland iyo Puntland, kaas oo ku aadan doorashada Soomaaliya.

Ilo-wareedyada la hadlay Caasimada Online ayaa sheegay in wada-hadal khadka taleefonka ah oo ay yeesheen xubnaha beesha Caalamka iyo maamulada Puntland iyo Jubaland loogu ogolaaday labadaas maamul in wax laga badalo qodobada muranka ka taaganyahay ee doorashada Soomaaliya.

Maamulka Galmudug ayaa la sheegay in dhankooda diideen iyagoo sabab kaga dhigay in aysan macquul aheyn in markasta sida ay rabaan loo yeelo Axmed Madoobe iyo Saciid Deni la yeelo.

Taa beddelkeed Qoor Qoor, oo ku dhow Villa Somalia, ayaa doonaya in shir guud la isugu yimaado marka hore, si dhammaan looga wada-hadlayo arrimaha taagan, balse aysan xal aheyn in dhinacyo gaar ah la qanciyo.

Qoor Qoor ayaa markii uu ka dhinac hadlay ra’iisul wasaare Rooble oo ku dhowaaqaya doorasho aan loo dhameyn, wuxuu weeraray Axmed Madoobe iyo Saciid Deni, isaga oo sheegay inuu ka heli waayey jawaab uu ka sugayey.

Wakiilka Qaramada Midoobay oo ka duulaya tabashada Galmudug ayaa Axaddii u safray Dhuusamareeb, waxaana la sheegay in uu arrimo ku saabsan murankaas kala hadlay Qoor Qoor.

Inkastoo maalmahaan laga dareemayay siyaasadda Soomaaliya xoogaa isu soo dhawaasho ah ayaa haddana la soo warinayaa in dhinacyadu sii kala tagayaan kadib markii wax laga badalay qaar kamid ah qodobadii la isku heestay loona yeelay sidii ay rabeen Jubaland iyo Puntland.

Garoowe (Caasimada Online) – Wakiilka xogyahaha guud ee QM u qaabilsan Soomaaliya, James Swan ayaa markii u horeysay si faah-faahsan uga hadlay kulankii uu shalay la qaatay madaxweynaha maamulka Puntland, Saciid Deni.

Swan ayaa sheegay in kulankii uu la qaatay Deni ay kaga wada-hadleen muhiimadda ay leedahay xoojinta xiriirka wanaagsan ee ka dhexeeya Dowladda Federaalka Soomaaliya iyo Dowlad Goboleedyada xubnaha ka ah, oo xiligan u muuqda mid meeqaamkiisu hoos u dhacay.

“Aniga iyo Madaxweynaha waxaan ka wada-hadalnay u diyaar garowga doorashooyinka. Waxaana u iftiimiyay baahida loo qabo tanaasul wax ku ool ah oo u dhexeeya Dowladda Federaalka iyo Dowladaha xubnaha ka ah, si heshiis looga gaaro hirgelinta geeddi-socodka doorashooyinka, waana danta qaranka,” ayuu yiri.

Sidoo kale waxa uu ku carabka ku adkeeyay in xal laga gaaro doorashada uu muranka ka taagan yahay, wuxuuna ku booriyay dhammaan hoggaamiyeyaasha Soomaaliya inay wada-shaqeeyaan iyo in la helo qaabab lagu xalliyo arrimaha taagan, si hanaan doorasho oo lagu kalsoonaan karo ay uga dhacdo guud ahaan Soomaaliya.

“Tani waa arrin deg-deg ah. Waxaa la joogaa waqtigii xalka,” ayuu yiri Swan, isaga oo adkeynaya muhiimada ay leedahay in xal kama dambeys ah laga gaaro muranka dabada dheeraaday ee doorashada dalka, xili uu muddo kooban ka harsan tahay muddo xileedka dowladda.

Ugu dambeyntiina waxa uu si weyn uga mahad celiyay madaxweynaha Puntland soo dhoweynta diiraneyd ee uu u fidiyay, wuxuuna muujiyay niyad sami ku aadan xaalada dalka, isagoona balan qaaday inuu sii joogteyn doono wada-shaqeynta maamulka iyo shacabka Puntland.

Muqdisho (Caasimada Online) – Warar lagu kalsoon yahay ay heshay Caasimada Online ayaa sheegay in amar ka soo baxay Villa Somalia lagu joojiyay gaadiidka xildhibaanada baarlamanka ay la tagi jireen gudaha Madaxtooyada gaar ahaan xaruntooda Villa Hargeysa.

Si rasmi ah looma oga sababta, hase yeeshee xildhibaano la hadlay Caasimada Online ayaa sheegay in amar laga soo saaray madaxtooyada lagu joojiyay gaadiidka xildhibaanada ee tagi jiray Villa Hargeysa oo ku dhax-taalla Madaxtooyada Soomaaliya.

Xildhibaanada ayaa lagu wargeliyay in gaadiidka ay dhigtaan ka horjeedka xarunta guddiga madaxa banaan ee doorashooyinka qaranka kuna dhow taliska ciidanka 60-aad ee gudaha Madaxtooyada.

Arrintaan ayaa la aaminsan yahay inay raad la leedahay go’aan maalmo ka hor lagu joojiyay kulan ay yeelan lahaayeen xildhibaano ka tirsan baarlamaanka Soomaaliya oo looga soo horjeeday madaxweyne Farmaajo.

Madaxweyne Farmaajo ayaa waxaa xukunka uga haray laba toddobaad, mana cadda xaaladda uu dalka geli doono kadib marka la gaaray 7-da Febraayo oo ah maalinka ugu dambeysay xukunkiisa.

Baydhaba (Caasimada Online) – Taliska ciidamada booliska maamulka Koonfur Galbeed ayaa war ka soo saaray dagaal maanta ka dhacay deegaanka Seydheeloow oo qiyaastii 30-KM u jira magaalada Baydhaba ee gobolka Bay.

Dagaalka ayaa bilaawday kadib markii ciidamada dowladda Soomaaliya iyo kuwa Koonfur Galbeed oo is garabsanaya ay deegaankaas ku weerareen Al-Shabaab, xilli ay dadka ku nool ka uruurinayeen waxa ay ugu yeereen Zekawaad.

Taliyaha booliska maamulka K/Galbeed ayaa warbaahinta u sheegay ugu yaraan 7-dagaalame ay Al-Shabaab uga dileen weerarkaas, sidoo kalena ay nolosha ku qabteen illaa afar dagaalame, dhawaana ay warbaahinta u soo bandhigi doonaan.

“Markii aan ka war helnay inay joogaan halkaas ayaan weerar ku qaadnay, waxaana halkaas lagu dilay guddoomiyeyaashii u kala qaabilsanaa dhaqaalaha deegaanada Seydheelow iyo Labaatan-jirow iyo nin ay ku sheegeen Taliye, hub ayaan sidoo kale furanay, kuwo maxaabiis ah oo aan ka qabanay mar dhow ayaan warbaahinta u soo bandhigi doonaa,” ayuu yiri G/Sare Cabdi Ibraahim Shaamow oo ah Taliyaha booliska maamulka K/Galbeed.

Intii uu socday dagaalkii maanta ka dhacay deegaanka Seydheeloow ee gobolka Bay, waxaa sidoo kale lagu dilay laba askari oo ka tirsanaa ciidamada dowladda Soomaaliya, sida ay noo xaqiijyeen saraakiil ka tirsan taliska 60-aad ee militeriga Soomaaliya.

Dadka deegaanka Seydheeloow waxay Caasimada Online u sheegeen in ciidamada dowladda iyo kuwa K/Galbeed ay saacado kadib deegaanka isaga baxeen, isla markaana ay dib ugu laabteen magaalada Baydhaba oo kolkii hore ay ka soo duuleen.

Wararkii u dambeeyey ee aan ka heleyno deegaanka Seydheeloow waxay sheegayaan, inay dib ugu soo laabteen oo haatan ay ku suganyihiin dagaalamayaasha Al-Shabaab.

Hoos ka dhageyso codka Taliyaha

Muqdisho (Caasimada Online) – Dowladda federaalka ah ee Soomaaliya ayaa xalay magaalada Muqdisho keentay dadkii ku soo dhaawacmay dagaalkii xooganaa ee ka dhacay degmada Beledxaawo ee gobolka Gedo, kaas oo geystay khasaare dhimasho iyo dhaawac.

Ku dhowaad 20 qof oo isugu jiro askar iyo dad shacab ah ayaa la dhigay isbitaalka Madiina, kuwaas oo diyaarad looga soo qaaday magaalada Beledxaawo.

Dadka dhaawacyada ee la keenay ayaa waxaa soo gaartay waxyeelo xoogan, iyaga oo qaba dhaawacyo halis ah, sida ay sheegeen saraakiisha caafimaadka.

Dhaqaatiirka isbitaalka ayaa haatan la tacaalaya daaweynta bukaanadaasi oo qaarkood ay ku sugan yihiin xaalad miir dabool ah.

Sidoo kale saraakiisha ciidamada dowladda ee ay waxyeeladu soo gaartay ayaa iyaga la dhigay isbitaalka ciidanka Xoogga ee magaalada Muqdisho.

Si kastaba xaaladda Beledxaawo ayaa degan, iyada oo ay ku sugan yihiin ciidamada Xoogga dalka Soomaaliyeed oo weli dhaq-dhaqaaqyo ka wada duleedka magaaladaasi.

Muqdisho (Caasimada Online) – Duqii hore ee magaalada Muqdisho, Taabid Cabdi Maxamed ayaa ka hadlay dagaalkii xooganaa ee ka dhacay degmada Beledxaawo ee gobolka Gedo, kaas oo u dhexeeyey ciidamada dowladda Somalia iyo kuwa wasiir Janan.

Taabid ayaa marka hore cambaareeyey dagaalkaasi oo geystay khasaare kala duwan oo isugu jiro dhimasho iyo dhaawac.

Sidoo kale wuxuu wax laga xumaado ku tilmaamay in lagu kor-dagaalamo dad shacab ah oo aan waxba galabsan, lana barakiciyo.

Gudoomiyihii hore ee gobolka Banaadir ayaa sidoo kale ugu baaqay dowladda dhexe iyo Jubbaland inay u taraan shacabka, islaamarkaana aysan uga sii darin xaaladda Gedo.

“Waxaan aad u cambaareynayaa dagaalka Beledxaawo, waxaana ku baaqayaa in shacabka loo turo, dhib kale uma uusan harin. Dhanka kale, waa in DG Jubbaland iyo Dowladda Federaalka ay xaaladda cakiran uga sii darin. Wax yaabaha la isku maan-dhaafsan yahayna miiska wadahadalka lagu maareeyo oo dagaal marnaba uunan xal aheyn. Wadahadal waa lama huraan,” ayuu yiri  siyaasiga caanka ah ee Taabid Cabdi.

Hadalkan ayaa ku soo aadaya, iyada oo maanta xaaladda Beledxaawo ay dagan tahay, kadib dagaallo qaatay saacado badan oo ka dhacay gudaha magaaladaasi.

Nairobi (Caasimada Online) – Dowladda Federaalka Soomaaliya ayaa shaacisay inuu fashilmay qorshe iyo isku day ay dowladda Kenya ku dooneyso inay ku maamusho qeybo ka mid ah Soomaaliya.

Qoraal kasoo baxay wasaaradda arrimaha dibedda Soomaaliya ayaa lagu sheegay in maleeshiyo ay soo hubaysay Dowladda Kenya ay xalay weerar qaawan kusoo qaadeen degmada Beled Xaawo ee Gobolka Gedo, balse ay si geesinimo iyo wadaninimo ku jirto weerarkaas uga hortagay Ciidanka Xoogga Dalka Soomaaliya.

“Waxaana halkaas ku beenoobay gardarradii iyuo damaacigii qaawanaa ee Dowladda Kenya ay ku doonaysay inay si aan toos ahayn u maamusho qayba ka mid ah dalka Soomaaliya,” ayaa lagu yiri qoraalka.

Dowladda Federaalka Soomaaliya ayaa sidoo kale sheegtay inay cambaaraynayso isku daygaan fashilmay oo ay dabada ka wadday, soona qorshaysay Dowladda Kenya. 

“Isku dayada noocaan oo kale ah waxay kasoo horjeedaan nabad ku wada noolaanshaha waddamada deriska ah iyo sharciga adduunka labadaba. Waxay sidoo kale dhaawacayaan xornimada, midnimada iyo qaranimada,” ayaa lagu yiri qoraalka.

Qoraal goor hore oo maanta ah kasoo baxay wasaaradda arrimaha dibedda Kenya ayey ku sheegtay inay aad uga walaacsan tahay dagaalka kasoo cusboonaaday xuduudda, gaar ahaan magaalada Beled-Xaawo ee gobolka Gedo.

Kenya waxay sheegtay in “dagaalka uu u muuqdo inuu u dhaxeeyo ciidamada dowladda fedeeraalka Soomaalia iyo kuwa maamulka Jubaland.”

Muqdisho (Caasimada Online) – Dowladda federaalka Soomaaliya ayaa maanta ku dhawaaqday inuu furan yahay bixinta shatiyada qaadka, lagana keeni karo dal kasta, taasi oo u muuqata inay meesha ka saarayso xayiraadii hore u saarneyd qaadkii laga soo dhoofin jiraya dalka Kenya.

Wasiirka maaliyada Soomaaliya, Cabdiraxmaan Ducaale Beyle oo warbaahinta la hadlay ayaa ganacsatada Soomaaliyeed u sheegay inaysan jirin cid si gaar ah loogu xiray ka ganacsiga qaadka, islamarkaana ay u furan tahay qof kasta oo raba inuu keeno dalka.

“Anigoo ku hadlaya magaca dowladda federaalka Soomaaliya, waxaan halkaan ka cadeynayaa in cidna uusan u xirneyn ka ganacsiga qaadka, keliya qofka ka ganacsanaya waxa looga baahan yahay inuu sharcigeeda soo maro oo uu liisan soo qaato,” ayuu yiri Wasiir Beyle.

Waxa uu intaas ku daray “Jaadka waa furan yahay, meesha rabto kasoo qaad, keliya wadadeeda soo mar oo sida alaabaha kale loo canshuuro usoo mari kastamka.”

Sidoo kala waxa uu carabka ku adkeeyay in marnaba aysan dowladda aqbalayn in qaadka si tuuganimo ah loo soo geliyo dalka, midaasi oo ka hor imaneysa sharciga cusub ee loo dajiyay ka ganacsiga qaadka.

Beyle ayaa ku booriyey ganacsatada rabta inay qaad ka ganacsadaan ay qaatan shatigiisa, isagoona ka digay in si dhuumaaleysi ah qaadka lagu soo gasho dalka.

Hadalkan ayaa meesha ka saaraya xayiraadii ay dowladda federaalka hore ugu soo rogtay qaadka loo yaqaano Miirooga ee laga keeni jiray Kenya, maadama uu sheegay Beyle in uu furan yahay ka ganacsiga qaadka.

Arrintan ayaa imaneysa xili ay kasii dartay xiisada labada dal, iyada oo dowladda federaalka ku eedeysay Kenya in maleeshiyaad ay soo abaabushay dagaal ka bilaabeen magaalada Beled-Xaawo ee gobolka Gedo.

Hoos ka daawo Beyle 

Kismaayo (Caasimada Online) – Maamulka Jubbaland ayaa beeniyay sheegashada dowladda federaalka ee ku aadaneyd dagaalkii magaalada Beled-Xaawo ee gobolka Gedo, kaasi oo ay sheegtay inay qeyb ka ahaayeen ciidamada Kenya.

Madaxweyne ku-xigeenka Jubbaland, Maxamuud Sayid Aadan ayaa waxba kama jiraan ku tilmaamay eedeyntaasi, isagoona xusay inay been abuur tahay hadalkii uu wasiirka warfaafinta dowladda federaalka Soomaaliya u ku sheegay in dagaalka ka dhacay Beled-Xaawo ay ku qabteen ku dhow boqol maxaabiis oo ah ciidamada Jubbaland.

“Nin Wasiir ah oo dhahaya maxaabiis ayaan ku qabanay dagaal ka dhacay Beled Xaawo,waa caadadooda in baraha bulshada ay been ka buuxiyaan,wasiir ku faanaya maxaabiis inaan u jawaabo mustawaheyga ma ahan,” ayuu yiri madaxweyne ku-xigeenka Jubbaland.

Maxamuud Sayid oo wareysi siiyay idaacada VOA-da laanteeda Afka Soomaaliga ayaa dowladda federaalka ku eedeyay inay Beledxaawo soo dhoobtay ciidamo aan marnaba u tureyn shacabka ku nool magaaladaas, oo u horseeday geeri, sida uu hadalka u dhigay.

Waxa uu carabka ku adkeeyay in maamulka Jubbaland uusan waxba ka khuseyn xiisada Kenya kala dhaxeysa dowladda federaalka, isla markaana aysan jirin ciidamo ka qeyb qaatay dagaalka Beled-xaawo oo gacan siinayey kuwa Jubbaland.

“Dowlada Kenya deris ayaan nahay annaga dowlad goboleed ayaan nahay, dowlada federalka iyadaa mas’uul ka ah xiriirka wadamada deriska ah Kenyana ma joogto meesha,” ayuu yiri Maxamuud Sayid Aadan oo la hadlay VOA-da.

Magaalada Beled-xaawo ayaa waxa ka dhacay saacadihii u dambeeyay dagaal ay ku dhintay dad ka badan 20 qof oo isugu jira shacab iyo dhinacyadii dagaalamay, waxaana ugu dambeyn gacan ku haynta magaalada la wareegay ciiidamada dowladda oo markiii horeba haystay.