Muqdisho (Caasimada Online) – Xog ay heshay Caasimada Online, ayaa sheegeysa in kulankii Xubno ka tirsan golaha ammaanka qaramada midoobey ee ka dhacay Magaalada Muqdisho uu ahaa mid siyaabo badan loogu baraarujiyay Mas’uuliyiintii ka tirsaneyd Dowlada Federaalka Somalia ee ka qeybgashay Shirka.

Xogta qaar, ayaa sheegeysa in kulanka kadib ay Xubnahaasi kulan adag la qaaten Hoggaamiyaha Maamulka KMG ah ee Jubba Axmed Madoobe oo ay kala hadleen Arrimo badan.

Xubnaha ayaa waxa ay Hogaamiyaha Su’aalo badan ka weydiyeen Amniga iyo Ganacsiga, gaar ahaan kuwa kasoo dega Dekadda Kismaayo iyo kuwa laga dhoofiyo.

Wararku waxa ay tibaaxayan in Xubnahaasi ay Axmed Madoobe ku amreen inuu joojiyo dhoofinta Dhuxusha, waxaana la tilmaamayaa in Xubnaha ay la hadleen Saraakiisha AMISOM ee Kismaayo, iyagoona uga digay inay kusii dhiirnaadan dhoofinta Dhuxusha oo ay garab ku siinayaan Maamulka KMG.

Axmed Madoobe, ayaa la sheegayaa inuu dafiray in Kismaayo laga dhoofiyo Dhuxusha, hase yeeshee lagu dirqiyay inuu fuliyo Amarka, haddii taasi la waayana ay go’aan kasoo saari doonan.

Sidoo kale, Axmed Madoobe ayaa waxaa lagu amray inuu sida ugu dhaqsiyaha badan ku xaliyo colaadaha ka taagan Kismaayo, islamarkaana howlaha Ammaanka uu kaalintooda ka siiyo Saraakiisha Dowlada ka jooga Deegaanada Jubba oo iyagu aan iminka heyn Howshii halkaasi loo geeyay.

Dhanka kale, Axmed Madoobe iyo Wafdigiisa ayaa la sheegayaa inay durbadiiba ka ambabaxeen Garoonka Aadan Cadde ee Magaalada Muqdisho, kadib markii Axmed Madoobe uu ka biyo diiday inuu ku hoydo Magaalada Muqdisho.

Hoggaamiyaha jabhadda Raaskambooni, ayaa la sheegay inuu aad uga carrooday hadallada xubnihii golaha ammaanka, isaga oo dareemay in dowladda Soomaaliya ay ka bixisay xog uusan ogeyn.

Axmed Madoobe ayaa waxaa durbadiiba la duusha Diyaarad u taagneyd Garoonka, waxa uuna u baqay naftiisa, isagoona u hoyaaday Magaalada Kismaayo.

Caasimada Online

Xafiiska Muqdisho

[email protected]

Xaflad lagu soo dhaweeynayay Gudoomiyaha Gobolka Banaadir ahna duqa Magaalada Muqdisho Xasan Maxamed Xuseen Muungaab oo lagu qabtay magaalada Caasimadda ah ee Stockholm ee Wadanka Sweden.

 Soo dhaweeynta Xaflada ayaa waxaa halkaasi qudbado kala duwan ka jeediyay Siyaasiyiin, Abwaano iyo qeybaha kala duwan ee Jaaliyada Soomaalida Sweden balse waxaa halkaa ka dhacay Hadalo kulul oo la isugu jawaabay kuwaas oo ay is dhaafsadeyn Abwaan Mustafe Sheekh Cilmi iyo Gudoomiye Muungaab.

Gudoomiye Muungaab oo caro ka muuqata ayaa hadalo kulul ugu jawaabaya Abwaan Mustafe oo gabay ku weeraray Siyaasada Somalia balse maxaa dhacay nala daawo.

HALKAAN KA DAAWO VIDEO-GA: 

Muqdisho (Caasimada Online) – Iyadoo mudooyinkaani ay Dowlada Somalia la daal-dhaceysay Banaanbaxyo iyo Kacdoono Siyaasadeed oo looga soo horjeedo ayaa waxaa soo kordhaayo Siyaasiyiinta kasoo horjeesanaaya Madaxweynaha iyo Golayaashiisa.

Cabdi Ismail Samatar oo ku sugan Dalka Mareykanka, ayaa waxa uu aad u dhaliilay qaabka ay ku shaqeyneyso Dowlada Madaxweyne Xassan Sheekh, waxa uuna Tilmaamay in qaabkaasi uusan sii socon doonin waa haddii aan wax laga bedelin.

Cabdi Ismail Samatar waxa uu sheegay inay soo ifbaxayaan Kacdoono ka dhan ah Dowlada Xassan, taasi oo uu ku sheegay mid Albaabada u fureyso diidmada Madaxweynaha iyo Dowladiisa oo muujineysa howlkar la’aan.

Cabdi Ismail Samatar oo ka qeybqaadanaayay Barnaamij ka baxaayay Idaacada SKY ee Magaalada Muqdisho, ayaa waxa uu yiri ‘’Mar hadii ay dadku ka jeesteen dowladnimo wey ka dhamaatay Xassan iyo Xubnihiisa, maxaa yeelay shacabku wuu daalay waxa ay u baahan yihiin Madax aan isku mashquuleynin oo dalka hagaajineysa’’

Cabdi Ismail Samatar waxa uu Tilmaamay in Madaxweyne Xassan iyo Golayaashiisa ku adkaan doonto inay kusii raagan xilalka ay hayaan, isagoona u sababeeyay diidmooyinka uga imaanayo Shacabka.

Dhanka kale, Waxa uu Cabdi Ismail Samatar Madaxda Dalka ugu baaqay inay ka shaqeeyaan Aayaha Dalka iyo dadka, isagoona ka digay in dalka lagu hago qaabka ay hadda Howshu u socto.

Caasimada Online

Xafiiska Muqdisho

[email protected]

Saax-dheer (Caasimada Online) – Wararka naga soo gaaraya deeganka Saax-dheer ee gobalka Sool ayaa sheegaya in halkaas ay ka dhacday doorashadda madaxtinimada ee maamulka Khaatumo State.

Waxaa haatan soo dhamaatay Doorashadii madaxwaynaha maamulka khaatumo taasi oo ay ku tarmatayeen Madaxwayinihii hore ee maamulka Mudane Maxamed Yuusuf Jaamac Indhosheel iyo Dr Cali Khaliif Galaydh.

Doorashada ayaa waxa Lagu kala baxay Wareegii Koobaad, waxaana Madaxwaynaha maamulka Khaatumo noqday Dr. Cali Khaliif Galaydh oo ah siyaasi Caan ah oo Ra’iisul wasaarana kasoo noqday wadanka Soomaaliya.

Waxaa cododka ay u kala heleen labada Musharax : Cali Khaliif Galaydh ayaa wuxuu helay 21 Cod, Maxamed Yuusuf Jaamac Ayaa wuxuu helay 9 Cod.

Sidaa darteedna Cali Khaliif waa madaxweynaha cusub ee maamulka Khaatumo State.

Caasimada Online

Xafiiska Laascaanood

[email protected] 

Muqdisho (Caasimada Online) – Warar hoose oo aan ka heleyno dhanka Siyaasiyiinta ku dhow-dhow Cabdi-Waal oo dhawaan ka bad-baaday isku day dil, ayaa sheegaya in Cabdi-Nuure uu ku howlan yahay ka jawaabida weerarkii lagu qaaday Agusut 10 ,2014 xilli uu kasoo baxaayay Hotel Jaziira ee Magaalada Muqdisho.

Wararku waxa ay sheegayaan in Cabdi-Waal oo sheegay in laga qaatay Hub iyo lacag uu ka bixin doono Jawaab, iyadoona ay warar hoose sheegayaan in iminka uu sameynta askar cusub oo tiro badan, kuwaasi oo isugu jira Militeri iyo Bolis, halka uu iska fogeeyay Nabadsugida, maadaama ay isku dhacsan yihiin Agaasimaha Hay’ada Sirdoonka C/llaahi Maxamed Cali (Sanbaloolshe)  oo uu ku sheegay mid isaga ka dambeeyay weerarkii lagu toogan lahaa.

Wararka qaar ayaa sheegaya in Cabdi-Waal oo kasoo jeeda beesha Cayr ee Habar-Gidir uu hooy ka dhigtay Hoteelada Muqdisho, isagoona marba mid jiifanaayo, cabsi kaga imaaneysa dhanka Nabadsugida awgeed.

Dhanka kale, Agaasimaha Hay’ada Nabadsugida C/llaahi Maxamed Cali (Sanbaloolshe) ayaa la sheegayaa inuu qaatay Ciidamo aad u farabadan kuwaasi uu uga gashamanayo Cabdi-Waal oo ay guluf colaadeed kala dhexeyso.

Sanbaloolshe, ayaa la sheegay inuu cabsi qaba inuu weerar kala kulmo Cabdi-Waal, kadib markii Idaacadaha Magaalada Muqdisho ay shaaciyeen wareysi uu Siyaasiga baxshay,  islamarkaana ku tilmaamay Shanbaloolshe mid ay cadaawo kala dhexeyso.

Dowlada Federaalka weli kama aysan hadlin Weerarada ay qaadayaan shaqsiyaadka Awoodaha Dowlada uga faa’iideysanaaya gulufta kala dhexeysa Siyaasiyiinta qaar.

Caasimada Online

Xafiiska Muqdisho

[email protected]

London (Caasimada Online) – Wasiirkii hore ee Arrimaha dibadda Somalia Fawziya Yuusuf Xaaji Aadam ayaa markii ugu horeeysay qiratay inay caalamka u kala dirtay warqado ay ku dalbaneyso in lasoo furo hantiada Somalia uga xayiran caalamka.

Fowsiya oo hore u inkiri jirtay inay lug ku yeelatay isku dayga xatooyadda hantida Qaranka Somalia ee Caalamka taal, waxay ugu dambeyn sheekadaan ku qiratay Wareeysi gaara oo Somali Channel ay siisay.

Fawziya waxaa la weydiiyay inay dimbi tahay in qareenada Shulman Rogers loo qoondeeyay inay hantida Qaranka Somalia qaataan boqolkiiba koow iyo toban 11%.

Markii Wariyaha Su’aashaas hadba dhinac ka geliyay ayey qiratay inay dimbi tahay, oo ay qalad ula muuqato.

Dhinaca kale, Fawziya Yuusuf, oo ku dhaaratay inay Midnimadda dalka iyo dadka Jamhuuriyadda Somalia muqadis tahay, waxay wareeysigeeda ku cadeeysay inay aaminsan tahay Madaxbanaanida Somaliland.

Fawziya waxay tiri “Somaliland waxay ka mid ahaan jirtay Somalia, laakiin hada waa laba dal, oo waxay Somaliland ku adkeeysaneysaa inay goosatay”

Hadii Baarlamaanka Somalia iyo shacabka Soomaaliyeed leeyihiin aragti wadaninimo iyo ilaalin Dastuur waxay Fawziya mudan tahay in laga saaro baarlamanka.

Halka ka daawo wareysiga Fowsiya

Caasimada Online

Xafiiska London

[email protected]

Timbuktu (Caasimada Online) – Taliska Hawlgalka QM ee dalka Mali (MINUSMA), ayaa xaqiijiyey in Dagaalyahanno ka kala yimid dalalka Somalia, Chad iyo Tunisia iyo kuwa haysta dhalashadda dalalka Spain iyo Morocco ay ka dagaalamayaan Galbeedka magaalladda Timbuktu ee dalka Mali.

Dagaalyahanadaasi ayaa xubno ka ah Kooxda Al-Qaacidada Islaamka Maqrib (AQIM) ee dagalladda ka wada dalka Maali iyo qeybo ka mid ah dalalka Algeria, Tunisia iyo Libya.

Hadalkaasi ayaa soo baxay, kadib, markii ay Ciidanka Faransiiska ee ku sugan dalka Maali gacanta ku dhigeen saddex qof oo lagu tuhunsan yahay inay xubno ka yihiin Alqaacida.

Afhayeenka Milliteriga Faransiiska, Lt. Col. Michel Sabatie oo la hadlay Wakaalladda Wararka Jarmalka ee DPA, ayaa sheegay inay su’aallo weydiinayaan ragga la qabtay, wuxuuna xusay inay ku wareejin doonaan Dowladda Mali.

Waxa uu intaasi ku daray in raggaasi lagu qabtay xilli ay Ciiddanka Gaarka ee Faransiiska hawlgal ka wadeen meel ku dhow Degmadda Timbuktu.

2,300 Askari oo Faransiis ah ayaa ku sugan dalka Maali, kuwaasi oo tan iyo sannadkii hore hawlgal kula jira Dagaalyahannadda Al-Qaacida ee ku sugan Waqooyiga Mali.

Caasimada Online
Xafiiska Nairobi
[email protected]

Muqdisho (Caasimada Online) – Wasiirka arrimaha dibedda xukuumadda Soomaaliya, Dr Cabdiraxmaan Ducaale Beyle ayaa ka warbixiyay wafdi ka socda 15-ka xubnood ee golaha ammaanka QM kuwaasoo shaley booqasho taarikhi ah Muqdisho ku yimid.

Wasiirka oo u warramay VOA-da ayaa sheegay in ay aad ugu faraxsan yihiin booqashada wafdiga golaha ammaanka QM ka socday isagoona intaas ku daray in arrimo dhowr ah ay kala hadleen.

Wuxuu sheegay wafdiga in ay kulamo la qaateen madaxda dowladda sidda madaxweynaha, ra’iisal wasaaraha, guddoomiyaha baarlamaanka iyo qaar ka mid ah xildhibannada baarlamaanka.

Mar uu ka hadlaayay wax yaabaha sida weyn looga hadlay kulanka, wuxuu tilmaamay in aad looga hadlay siddii dowladda ay u sameyn lahayd guddi madax-banaan oo ka shaqeeya doorasho ka dhacda dalka sannadka marka uu yahay 2016-ka iyo siddii dib u eegis loogu sameyn lahaa dastuurka qabyada ee dalka.

Wasiirka arrimaha dibedda ayaa xusay in xubnaha golaha ammaanka QM ay muujiyeen sidda ay ula dhacsan yihiin wax-qabadka dowladda isla markaana ay diyaar la yihiin taageero ay siiyaan dowladda iyo shacabka Soomaaliyeed.

Dr.Cabdiraxmaan Ducaale ayaa tilmaamay in dowladda Soomaaliya looga baahan yahay in ka faa’ideysato fursada ay heysato loona baahan yahay shacabka in ay taageero u muujiyaan dowladooda.

Ugu dambeyn wasiirka arrimaha dibedda Soomaaliya ayaa hoosta ka xariiqay in dadka Soomaaliyeed aaney waxbo u tareynin taageero dibadeed ee loo baahan yahay in ay ka faa’ideystaan kheyraadka uu eebe weyn ku maneestay oo ay ka mid tahay wabiyada, badaha iyo beeraha dalka ku yaalla.

Dowladda Soomaaliya ayaa soo dhaweysay booqashada taarikhiga ah ee xubnaha golaha ammaanka Qaramada Midoobay uu Muqdisho ku yimid.

Caasimada Online

Xafiiska Wararka Muqdisho

[email protected]

Muqdisho (Caasimada Online) – Sidda uu warbaahinta u sheegay guddoomiye waaxeedka xaafadda Taleex ee degmada Hodan, Calas Maxamed Guure, ayaa sheegay in uu ka badbaaday isku day dil oo ay u geesan rabeyn ciidamo nabad sugida ka tirsan.

Sarkaalkan ayaa sheegay isagoo wata ciidamo ilaalo ah in ay xaafadda Taleex ay ku istaajiyeen ciidamo nabad sugida ka tirsan kuwaasoo ku yiri adiga ayaan ku raadineynay oo waxaan rabnaa in aan ku dilno.

Waxa uu sheegay in ilaaladiisa ay difaaceyn oo ay badbaadiyeen kuwaasoo la dagaallamay ciidamada nabad sugida.

Wuxuu sheegay dhacdadaas in uu ku dhaawacmay mid ka mid ah ilaaladiisa baabuurkii uu watayna ay wax yeelo soo gaartay.

Mudane Calas Maxamed Guure ayaa tilmaamay in qorshaha uu ahaa in isaga la khaarijiyo sida uu hadalka u dhigay maadama lagu yiri adiga ayaan ku raadineynay.

Guddoomiye waaxeedka xaafadda Taleex ayaa ku celceliyay in ciidamada nabad sugida ee dowladda in ay u badan yihiin dhallinyaro aan xirfad ciidan lahayn oo u hubeysan sidda maleeshiyaad.

Ugu dambeyn waxa uu sheegay shirqoolka uu xaley ka badbaaday uu la mid yahay mid lagu weerarray xildhibaan Cabdiweli Maxamed Qanyare iyo dagaal ooge Cabdinuure Siyaad kuwaasoo dhowr habeen ka hor lagu weerarray guryahooda oo waxaa weeraray ciidamo nabad sugida ka tirsan.

Ma jirto wax war ah oo ka soo baxay hey’adda nabad sugida oo ku aadan eedeenta uga timid guddoomiye waaxeedka xaafadda Taleex ee degmada Hodan.

Caasimada Online

Xafiiska Wararka Muqdisho

[email protected]

Muqdisho (Caasimada Online) – Shacabka Muqdisho ayaa ku dhow in ay dowladda mucaarad ku noqdaan kaddib markii ay marar badan la kulmeyn culeyso aad u ballaaran oo kaga yimid dhinaca dowladda.

Arrintan ayaa la xiriirta marka ay madaxda dowladda u ambabaxayaan ama ay ka immaanayaan dibedda iyo marka ay rabaan in ay booqdaan goobo gaar ah in la xiro waddooyinka isla markaana dadka loo diido in ay maraan, taasna waxay keentaa in dad badan oo rabay in ay aadaan shaqo ama goobo kale ay dib la soo daristo.

Sidoo kale waxaa arrintaas ay saameyn ku yeelataa bukaan rabay in uu aad takhtar oo xitaa mararka qaar xaaladiisa caafimaad ay halis noqoto.

Haddaba, Wariye Caasimada Online ka tirsan ayaa la lugeeyay qaar ka mid dadka arrintaas ay saameynta ku yeelatay, wuxuuna sheegay in dadka qaar ay ku jiraan dad da’ ah iyo arday u socday Jaamacado iyo Iskuulo kuwaasoo dib u dhac ay ku dhacday maalintaas.

Dadka uu la kulmay wariyaha ayaa u sheegay in ay dhib weyn ku qabaan safarada madaxweynaha iyo marka ay dalka ku soo laabanayaan in la xiro waddooyin muhiim ah.

Baabuurta ayaa mararka ay arrintaas dhacdo waxay maraan goobo qarbo jeex ah lacagtana waa ay kordhiyaan.

Qaar ka mid ah dadka ay arrintaas la kulmay dhowr jeer ayaa madaxda dowladda ka codsaday in waddooyinka la xiraayo ay dhibaatooyin kale ay ka dhalan karaan.

Shaley markii uu madaxweynaha ka soo laabanayay Maraykanka waxaa la xiray waddooyinka muhiim ah sidoo kale ra’iisal wasaaraha oo xarigga ka jarayay wasaaradda dhallinyarada ee xukuumadda ayaa isna loo xiray waddooyin muhiim ah.

Madaxda dowladda waxay u muuqdaan kuwa aaney ka fikirin dhibaatada ka dhalan karta waddooyinka la xiro mararka ay meelo booqanayaan ama safar dibedda ay u ambabaxayaan. 

Caasimada Online

Xafiiska Wararka Muqdisho

[email protected]

Muqdisho (Caasimaada Online) – Dr Xaashi Dhiblaawe Siyaad oo kamid ah Dhakhaatiirta ka howlgasha Magaalada Muqdisho, ayaa sheegay inuu ka bad-baaday iskuday dil oo lagu doonaayay in lagu Kharijiyo.

Dr Xaashi waxa uu sheegay in Ciidamada Nabadsugida ay rasaas ooda uga qaaden xilli uu maraayay wadada Sayidka ee Magaalada Muqdisho, halka Ciidamada rasaasta ku furayna ay marayeen isla wadada balse ay kusii jeeden Isgoyska L4.

“Anigoo ay ila socdee Carruurteyda iyo Xaaskeyga ayay rasaas igu fureen wadaduna ma aheyn saxmo ee waxa ay doonayeen inay idilaan, waxa ay filayeen in rasaasta ay i haleeshay laakin alle ayaa iga bad-baadiyay shartooda’’ ayuu yiri Dr Xaashi oo intaa kusii daray in Afar jeer oo horay lagu soo qaaday weerar, midkanna uu ahaa kii shanaad, balse uu ka baxsaday.

Dr Xaashi waxa uu sheegay haddii uu u geeriyoodo rasaas ku dhacda ama dil loo geystay ay ka dambeeyan Ciidamada Nabadsugida, isagoona horay ay u Toogteen Ciidamada Nabadsugida wiil isaga la dhashay oo ku baxay gacanta Ciidamada Nabadsugida.

Dr Xaashi waxa uu Dowlada Federaalka ugu baaqay inay sugto Ammaankiisa waxa uuna Tilmaamay inay il gaar ah ku eegto Ciidamada daan-daansiga ku hayo, sida uu hadalka u dhigay.

Dhanka kale, Dr Xaashi waxa uu cadeeyay in lagu raadinaayo fursado lagu dilo, islamarkaana ay baadi-goobayaan dad isagu uusan garaneynin.

Halkan ka dhageyso hadalkiisa

Caasimada Online

Xafiiska Muqdisho

[email protected]

Muqdisho (Caasimada Online)– Madaxweynaha Maamulka  Puntland C/weli Maxamed Cali ‘’Gaas’’, ayaa goor dhow shaaciyay in Maamulkiisa aysan ka qeybqaadan doonin shirka iminka ka socda Xarunta Xalane ee Magaalada Muqdisho.

Madaxweyne Gaas waxa uu sheegay in Dowlada Federaalka ay ka codsatay inuu soo ajiibo ka qeybgalka shirka hayeeshee uu sheegay inuu diiday ka qayb galka Shir Magaaladda Muqdisho.

Shirka loogu yeeray Madaxweyne Gaas, ayaa waxaa Hogaaminaya 15 Xubnood ee joogtada ka ah Golaha Amaanka Qaramada Midoobay, iyadoona ay  ka qeyb galeen  Madaxweyne Xasan Sheekh iyo Madaxda Maamul Goboleedyadda Dalka.

Dhinaca kale Madaxweynaha Maamulka KMG ah ee Juba Axmed Madoobe ayaa isaguna goor dhow soo gaaray Madasha Shirka si uu uga qayb galo Shirka ay Hogaaminayaan Xubnaha Golaha Amaanka.

Imaanshaha Golahaani ayaa waxa uu noqonayaa kii ugu horeeyay oo ay Muqdisho ku imaadan laga soo bilaabo bur-burkii Dowladii dhexe ee Somalia.

Diidmada ka soo qeybgalka uu muujiyay Madaxweyne C/weli Gaas, ayaa waxa ay kusoo beegmeysaa xilli uu dhawaan Shaaciyay inay xiriirka u jareen Dowladda Federaalka ah ee Soomaaliya,isagoo Xubnaha ka jooga Muqdisho ugu baaqay inay soo faarujiyaan Magaalada Muqdisho.

Caasimada Online

Xafiiska Muqisho

[email protected]

Muqdisho (Caasimada Online) – Ilo wareedyo ka tirsan Beesha Karanle Murusade ayaa inoo xaqiijiyay in Odayaasha dhaqanka Beesha Murusade ay kulan deg deg ah isugu yeereen xildhibaanada uga jira Baarlamaanka DFS si ay uga tashadaan aayaha Wasiir Mustaf Dhuxulow iyo weeraradii maalmahaani lagu qaaday.

Ilo wareedka ayaa sheegaya in Xildhibaanada iyo Odayaasha kulanka qaadan doono ay u cod qaadi doonaan kalsooni kala laabashada Beesha ee Wasiir Mustaf oo isagu matalaaya Beesha, balse aan u dhaq-dhaqaaqin Howlaha beesha Khuseeya, isagoona ay ku eedeeyen inuu lumiyay kalsoonidii uu ka heystay Dhalinyarada iyo Siyaasiyiinta.

Wasiir Dhuxulow, ayaa la Tilmaamayaa in goortii xilka loo yagleelay illaa iyo hadda uusan talaabo u qaadin Beesha uu kasoo jeedo taasi oo keentay in Beeshu ay Dhuxulow u aragto Wasiir Fashilmay, sida laga soo xigtay Odayaasha

Sidoo kale, Ilo wareedka ayaa sheegaya in Kulanka Degdega ah looga tashan doono garaafooyinkii maalmahaani Beesha kasoo gaarayay dhanka Hay’ada Nabadsugida iyo Wasaarada Amniga oo weeraro u geystay Siyaasiyiin iyo Saraakiil Beesha ka tirsan islamarkaana qaarkood ay iminka weli ku jiraan Xabsi.

Suldaan Xasan Madow oo ah Suldaanka Beesha oo la hadlay warbaahinta ayaa waxa uu sheegay in kulankaasi uu khuseyn doono sida beeshu ay uga tashan laheyd caqabada cusub ee soo wajahday wixii ka danbeeyay dhismihii Xukuumada uu Mustaf kamid yahay, isaga oo si cad u sheegay in cid danaha beesha meteli karta aysan kamuuqan xukuumada.

Waxa uu sheegay Suldaanku in xildhibaanada dhan ay fariin deg deg ah u direen Mustafna ay amar kusiiyeen in uu kulankaasi kasoo qeyb galo si uu goob joog uga ahaado sida wax u dhacayaan, maadaama uu ka gaabiyay in uu sii hagaajiyo xariirka dowlada iyo Beesha.

Dhanka kale, Kulanka ayaa la filayaa in wax badan leeska yiraahdo qalalaadka xad-dhaafka ah ee uu galay iyada oo sidoo kale lafilayo in laga aqriyo bayaankii dhalinyarada kasoo baxay ee looga soo hor-jeeday Wasiirka war-faafinta, waxaana la filayaa in kulanka uu dhaco maalinta bari ah ee Khamiista.

Caasimada Online

Xafiiska Muqdisho

[email protected]

Muqdisho (Caasimada Online) – Waxaa ka dhacday Nairobi Xaflad lagu taageerayay Maamulka Puntland, waxaana Goobta ka dhacay dagaal Qaboow oo ay isku qaadeen siyaasiyiinta reer Puntland iyo kuwa Muqdisho.

Xili lagu Jiray Xaflada ayaa waxaa goobta ka hadlay Xaaji axamed Yaasiin, oo ka hadlay xoriyadda Soomaaliya iyo inay caddaalad darro ahayd in xukunka Somalia ay qabtaan siyaasiyiinta Hawiye, kadib gobinimadii, isaga oo si dadban u sheegay in beeshiisa ay xukunka usoo halgantay, ayna mudneyd in la siiyo.

Waxaa sidoo kale ay reer Puntland ammaaneyn jabhaddii SSDF, halka ay weerar ku qaadeen kuwa USC.

Waxaa hadalkii qaatay Prof. Cali Maxamed Geedi oo u jawaabay, ayaa sheegay inay nasiib darro ay tahay in dadkii xoriyadda usoo dagaalamay sida Aadan Cabdulle Cusmaan, Cabdullaahi Ciise iyo wixii la mid ah la yiraahdo ma mudneyn xukunka.

“Waxaan rabaa in aan runta sheego ma jirto jabhad ay weyso u dhowrnayd, ninkii ka xuman lahaa iyo kii ku farxi lahaa, dhamaan Jabhadihii dalka soo maray dhibaato ayay dalka gaarsiiyeen”ayuu si kulul u yiri Ra’iisul wasaarihii hore ee Soomaaliya Cali Maxamed Geedi.

Halkan ka dhageyso hadallada la is weydaarsaday

Caasimada Online

Xafiiska Nairobi

[email protected]

Garoowe (Caasimada Online) – Siyaasiga Axmed Cabdi Xaabsade oo horrey wasiirka warfaafinta uga soo noqday maamulka Somaliland ayaa dhawaan u goostay dhinaca Puntland wuxuuna sheegay in uu halkaas u tagay siddii uu isugu soo dhaweyn lahaa maamulada Khaatumo State iyo maamulka Puntland.

Axmed Cabdi Xaabsade oo BBC-da u warramay ayaa sheegay in uu ka fadhistay siyaasadda ee uusan u goosan Puntland oo uu mucaarad noqday.

Waxaa kaloo uu sheegay in uu udhashay deegannada Puntland iyo Khaatumo State marka uusan isku arkin nin ka soo goostay Somaliland.

Siyaasiga Axmed Cabdi Xaabsade ayaa ku celceliyay in uu hadda yahay oday dhaqan oo raba in uu wax ka dhiso maamulada Puntland iyo Jubba.

Mar la weydiiyay in uu loo magacaabi rabo xil culus wuxuu iska fogeeyay arrintaas balse wuxuu tilmaanay in ay haddii la soo jeediyo uu diyaar u yahay.

Waxaa la weydiiyay khilaafka u dhexeeya maamulada Khaatumo State iyo Puntland, wuxuu ka dhawaajiyay in uu ku howllan yahay siddii uu isku soo dhaweyn lahaa Puntland iyo Khaatumo oo uu isaga u dhashay isagoona tilmaamay arrinta Laasacaanood in ay meel hagaagsan mareyso.

Hadalka Axmed Cabdi Xaabsade ayaa ku soo aadaya iyadoo dhowr cisho ka hor uu siyaasigan tagay magaalada Garoowe halkaasoo si weyn loogu soo dhaweeyay.

Ma ahan markii ugu horeysay oo Xaabsade uu u goosto dhinaca Puntland balse markan wuxuu lee yahay ma dhaceyso in aan dib ugu soo laabto Somailand.

Halkan ka dhageyso Xaabsade

Caasimada Online

Xafiiska Wararka Garoowe

[email protected]

Muqdisho (Caasimada Online) – Madaxweynaha Jamhuuriyada Somalia Xasan Sheekh Maxamuud ayaa xalay Madaxtooyada kula kulmay Wasiiro, Xildhibaano iyo Saraakiil ka tirsan laamaha Ammaanka iyo Sirdoonka, sida ay ilo xog-ogaal ah u sheegeen Caasimada Online.

Wararka ayaa sheegaya in Madaxweynaha uu Mas’uuliyiintaasi ka dhageystay waxyaabihii ka dhacay Muqdisho inta uu ku mashquulsanaa Socdaalkiisa, iyadoona ay warar hoose sheegayaan inuu canaantay Wasiirka Amniga iyo Agaasimaha Hay’adda Sirdoonka Qaranka.

Madaxweyne Xassan ayaa waxa uu Wasiir Khaliif iyo Agaasime Sanbaloolshe ku amray inay kasoo jawaab bixiyaan qaabka ay u fuliyeen weeraradii lagu qaaday Hooyga siyaasiyiin Muqdisho degan, oo beesha Hawiye u dhashay, si gaar ahna Xildhibaan C/Weli Qanyare, maadaama uu yahay xildhibaan ka tirsan baarlamanka.

Madaxweyne Xasan ayaa la sheegayaa inuu aad uga carooday weerarkii lagu qaaday Cabdi Weli Qanyare, waxa uuna imaanshihiisa kadib Labadaasi Mas’uul ugu yeeray Villa Somalia, isagoona la sheegay inuu u qabtay Muddo Asbuuc ah inay jawaab ka keenaan sababihii ka dambeeyay weerarka C/Weli.

Sidoo kale, Ilo wareedka ayaa intaa kusii daraayo in Madaxweyne Xassan uu Wasiir Ereg  ku amray inuu wax ka bedelo Howlgalada uu Saraakiisha ku amraayo inay guryaha ugu galaan Mas’uuliyiinta ka tirsan  Dowlada iyo siyaasiyiinta kale , waxa uuna ku Amaanay in mudada kooban uu xilkaasi haayo uu waxbadan ka bedelay Ammaanka Magaalada, balse uu banaanka soo dhigay weeraro dhibaatooyin badan kasoo wajahay Dowlada.

Madaxweynaha ayaa sheegaya in inta aan la weerarin dadka hubka ku haysta Muqdisho, ay haboon tahay in la siiyo fursad ay si nabad ah hubka ugu soo wareejiyaan, haddii ay diidaanna markaas kadib ay dowladda go’aan ka gaarto.

Falalkii ay ciidamada dowladda Muqdisho ka geysteen habeennadii dhowaa, ayaa waxaa aad u dhaliilay siyaasiyin iyo shacabka Muqdisho, oo ku qeexay hab maleeshiyo-nimo oo aan dowli ahayn

Caasimada Online

Xafiiska Muqdisho

[email protected]

Muqdisho (Caasimada Online) – Kulan lugu doonayey in lugu dhiso guddiga dhismaha maamulka Gobollada Galgaduud iyo Mudug ee dhawaan Muqdisho looga dhawaaqay ayaa isfahan waa ku dhammaaday.

Shirkan ayaa ahaa mid lugu doonayey Beelaha degga labada Gobol ee la doonayo Maamulka in loo sameeyey in laga soo dhex xulo xubnaha ka shaqeynaya dhameystirka Maamulka, balse qabka wax loo qeybiyey ayaa waxaa ka soo horjestay qaar ka mid ah Beelihii ka qeyb-galay.

Ergooyinka dhismaha Maamulka ayaa kulanka kaga dhawaaqay sida ay Beelaha u kala heleen xubnaha ka shaqeynaya dhismaha Maamulka, waxaana qeyb-tooda ka saluugay qar ka mid ah Beelihii ka qeyb-galay.

Guud ahaana 25 xubnood ayey sheegen ergadu inay ka soo shaqeyn doonto dhameystirka maamulka,waxaana beeluhu xubnaha u kala heleen, sida hoose,

Beesha Hawiye waxaa ay heshey, 15-xubnood.

Beesha Mareexaan ee Gobolka Galgaduud, waxaa ay heleen, 3-xubnood.

Beesha Majeerteen ee Mudug degta waxaa ay heleen, 2-xubnood.

Beesha Leelkase ee Mudug degta waxaa ay heleen, 2-xubnood.

Beeshs Dir ee Mudug degta waxaa ay heelen, 1-xubin.

Beesha Shiikhal ee Mudug degta waxaa ay heleen, 1-xubin.

Beesha Carab Saalax ee Mudug degta waxaa ay heelen, 1-xubin.

Ergadu marka ay shaacisay guddiga markiiba waxaa dhashay buuq badan oo sabab u noqday in shirka la isku fahmi waayo,ugu danbeyna lugu kala kaco.

Isfahan waa inuu shirka ku dhammaado waxaa sabab looga dhigay labo arrimod oo kala ah, in qabaa’ilada ka socday beesha Daarood ay isaga baxeen shirka iyagoona sheegay inay caddaalada ka fogtahay qabka ay ergadu u qeybisay guddiga maamulka soo dhisaya.

Waxaa ay soo jeediyen in hab siman loo dhiso maamulka oo aysan cidna sad buuxsan maadaama la is degmooyin le eg yahay, balse haddii ay taas imin wayday ay ka laaban doonan qorsha maamulka gobollada Galgaduud iyo Mudug lugu dhisayo.

Maamulka oo la Rabo in loo Bixiyo MUGA

Qodobka labaad ee la isku diiday ayaa ah sida uu noqon doono magaca maamulka gobollada dhexe ee Mudug iyo Galgaduud, waxaana dhinacyadii shirka ka soo qeyb-galay ay soo bandhigeen ilaa afar magac oo ay koox walba doonayso in maamulka uu yeesho.

Ximan iyo Xeeb oo maamusha qeyb ka mid ah dhulka maamulka loo sameynayo, waxaa ay soo jeediyen in magacooda loo bixiyey, sidoo kale maamulka Galmudug oo iyaguna soo jeediyey in Galmudug loo bixiyey maamulka.

Kooxda saddexad ayaa iyaguna soo jeediyey in maamulka loogu magacdaro Central State, halka kuwa ugu danbeenaya oo ay dowladda faderaalka la sheegay inay la socotana ay soo jeediyen in loo bixiyey magaca cusub ee ah MUGA oo looga jeedo Mudug iyo Galgaduud.

Arrintan ayaa sababtay in shirka la faarujiyo oo lugu kala dareero, balse waxaa la sheegay ergada ku howlan dhismaha maamulka inay wadaan dadaallo lugu doonayo in lugu xaliyo khilafka ka tagan xubnaha maamulka soo dhisaya iyo magaca uu yeelanayo maamulka.

Isfahan waaga ka taagan dhismaha maamulka ayaa la sheegay inay caqabad weyn nodon doonto,waxaana horay maamulka ugu soo horjestay dowlad Goboleedka Puntland oo ka talisa waqooyiga galkacyo iyo Ahlu-Sunna Wal-Jameeca oo qeybo ka mid ah gobollada dhexe ku sugan.

Si kastaba waxaa ay u muuqatana in arrimo badan ay hortaagan-yihiin Mudug iyo Galgaduud inay maamul noqdan, lamana garan karo dhismaha maamulka halka ay ku biyo shuban doonto iyo qabka uu u dhammankaro khilaafadka hareeyey.

Isha: KON

bMuqdisho (Caasimada Online) – Kulan ay ka qeyb galeen waxgarad iyo odayaal dhaqameedyo metelaya qaar ka mid ah beelaha dega gobolka Sh/Hoose ayaa shalay lagu qabtay magaalada Muqdisho, waxaana looga dhowaaqay taageerada maamul goboleed matalay gobolka.

Waxaa kulankan uu ahaa mid dib u heshiisiineed oo lagu taageerayey maamulka Shabelle State, waxaana ka mid ahaa beelaha ka qeyb galay beelaha Hawiye, Biyo-Maal, Digil iyo Daamo, waxaana ka hadlay waxgarad fara badan.

Gudoomiyaha dhaqanka beelaha Hawiye Maxamed Xasan Xaad, oo kulankaas furay ayaa sheegay in kulanka ay isugu yimaadeen beelahan uu yahay mid muhiim ah oo dib u heshiisiineed.

“Beelahan waxay mudooyinkan lahaayeen kulamo gaar gaar ah oo dib u heshiisiineed, shirkaana waxaa uu kulmiyey kulamadaas maadaama beelihii ay hal goob soo wada fadhiisteen” ayuu yiri nabadoon Xaad.

Gudoomiyaha dhaqanka beelaha Hawiye ayaa sheegay in dowlada Somalia ay ka gaabisay dhinaca dib u heshiisiinta beelaha ay wax kala gaareen, hase ahaatee ay odayaasha dhaqanku kaalintaas buuxiyeen kuna guuleysteen gaar ahaan gobolka Sh/hoose.

“Dib u heshiisiinta ay gaareen beelahan Soomaaliyeed waxay guul u tahay shacabka dega gobolka, dowlada Somalia iyo nabada, shirkana waa fursad qaali ah oo aan soo marin dadka halkaan fadhiya, waxaan rabnaa in walaalahood kale ee gobolka la dega iney nabada la wadaagaan” ayuu intaa ku daray Xaad oo intaa ku daray in kulamo lagu dhameystirayo dib u heshiisiinta beelaha lagu qaban doono dhowaan degmada Afgooye gobolka Sh/hoose kuwaasoo uu sheegay in sidoo kale lagu taageerayo maamulka Shabelle State.

Waxaa sidoo kale ka hadlay kulankaas xubno ay ka mid ahaayeen Suldaan Cismaan Maxamed Maxamuud oo ka socday beesha Digil ee Sh/hoose, Ugaas Abroone Maxamed Shiikh oo ah Ugaaska beesha Biyomaal, Aadan Maxamed Xuseen oo ku hadlayey magaca beesha Daameed, Ex-xildhibaan Maxamed Xuseen oo ka mid ah siyaasiyiinta gobolka, Faadumo C/qaadir Faarax oo ku hadleysay magaca haweenka gobolka Sh/hoose iyo waxgarad kale.

Xubnahan ayaa dhamaantood waxay sheegeen iney ku faraxsan yihiin kulankan lagu shaacinayo dib u heshiisiinta ay gaareen waxayna xuseen iney dhowaan tegi doonaan degaanada ay ka soo jeedaan si beelaha ay metelaan heshiiskan loo gaarsiiyo, iyagoo ka codsaday dowlada iney gacan ku siiso dib u heshiisiinta ay wadaan.

Sidoo kale xubnaha ka hadlay goobtaas ayaa sheegay iney si weyn u taageersan yihiin maamul goboleedka Shabelle State waxayna sheegeen in maamulkaas mid aan aheyn aan laga sameyn Karin labada Shabelle, iyagoo xusay in maamulka Shabelle State uu ku yimid rabitaanka shacabka gobolada Sh/hoose iyo dhexe.

Caasimada Online

Xafiiska Muqdisho

[email protected]

Boosaaso (Caasimada Online) – Madaxweynaha maamulka Puntland, Cabdiweli Maxamed Cali Gaas oo hadda ku sugan isaga iyo wafdi uu hoggaaminaayo magaalada Boosaaso ee gobalka Bari, ayaa sheegay in uu socdo wadahadallo ay garwadeen beesha caalamka ka tahay, kuwaasoo u jeedkooda uu yahay siddii loo dhexdhexaadin lahaa dowlaldda fedaraalka iyo maamulka Puntland.

Wuxuu sheegay Puntland in ay diyaar u tahay sidii nidaamka fedaraalka uu ugu hirgali lahaa dalka oo dhan balse wuxuu ka digay in Gaalkacyo ay ka mid tahay qeybo badan maamulka Puntland.

Madaxweynaha Puntland ayaa tilmaamay in uu socdo wahadallo ay garwadeen ka tahay beesha caalamka kuwaasoo looga gun lee yahay in la isku soo dhaweeyo dowladda dhexe iyo maamulka Puntland kaddib markii Puntland ay shaacisay in ay xiriirta u jartay dowladda Soomaaliya.

Madaxweynaha Puntland, ayaa sidoo kale tilmaamay in dowladda looga baahan yahay in ay soo kala caddeyso waxa loogala jeedo Galgaduud iyo Mudug ayaa maamul loo dhisayaa isagoona intaas ku daray in Puntland aan marnaba ka gorgortami doonin dhul ay lee dahay in maamul loo sameeyo.

Wuxuu ku celceliyay in Puntland ay dooneyso in la hagaajiyo xiriirka ay kala dhexeyso dowladda fedaraalka balse loo baahan yahay in wax kasta loo sameeyo sidda ugu hagaagsan.

Madaxweynaha Puntland wuxuu kaloo ka hadlay wax yaabaha uu u tagay Boosaaso isagoona sheegay in Boosaaso u yimid siddii uu ula kulmi lahaa madax ka socota dowladda Imaaraadka kuwaasoo raba in ay mashaariic ka hirgaliyaan magaalada Boosaaso gaar ahaan in ay ballaariyaan dhismaha dekedda Kismaayo.

Ugu dambeyn wuxuu tilmaamay in uu la kulmi doono saraakiisha ciidamada dowladda si uu gala hadlo dil dhawaan loogu geystay magaalada Boosaaso taliyihii ciidanka booliska iyo ku xigeenkiisa.

Wuxuu tilmaamay in ay aad uga xun yihiin dilkaas isla markaana ay labada sarkaal kuwa shaqooyin badan qabtay.

Caasimada Online

Xafiiska Wararka Boosaaso

[email protected]